Josué

6 Israelitacunata manchashcamantami Jericó llajta pungucunataca alli huichcashcata charircacuna. Chaimi chai llajtamantaca ni pi mana llujshirca, chai llajtamanpish ni pi mana yaicurca.

2 Jehová Diosca Josuemanca cashnami nirca: “Ricui, Jericó llajtata mandaj reytapish, paipaj sinchi macanacujcunatapish cambaj maquipimi cushcani. 3 Canpish, cambaj soldadocunapish Jericó llajta muyundijtami punllapi shuj cutin marchana canguichij. Chaitaca sujta* punllacunatami chashna rurana canguichij. 4 Canchis* sacerdotecunami cada uno carneropaj gachucunata paicunapaj maquipi aisashpa Arca ñaupajta rina can. Sacerdotecunami carneropaj gachucunapica tocana can. Shinapish séptimo punllapica cancunami cai llajta muyundijtaca canchis cutin marchana canguichij. 5 Carneropaj gachucunapi tocacushca uyarijpica tucui soldadocunami macanacungapaj sinchita caparina canguichij. Chashna rurajpimi Jericó llajtapaj pircaca urmanga. Qꞌuipaca tucui soldadocunami cada uno chai llajtaman huichiyana canguichij” nircami.

6 Chaimi Nunpaj churi Josueca sacerdotecunata cayarca. Paicunataca: “Ari ninacushca arcata apaichij. Canchis sacerdotecunapish canchis carneropaj gachucunahuan Jehová Diospaj Arca ñaupajta richij” nircami. 7 Josueca soldadocunatapish: “Jericó llajta muyundijta rishpa marchaichij. Shinallataj macanacunacunahuan caj soldadocunaca Jehová Diospaj Arca ñaupajtami ñaupashpa rina can” nircami. 8 Chaipi caj soldadocunaman Josué nishca shinami canchis sacerdotecunaca canchis carneropaj gachucunata apashpa, Jehová Diospaj ñaupajpi chai gachucunapi tocashpa rircacuna. Cutin Jehová Dioshuan ari ninacushca arcata apaj sacerdotecunaca paicunatami caticurcacuna. 9 Macanacunacunahuan caj soldadocunaca gachucunapi tocacuj sacerdotecunapaj ñaupajtami ricurcacuna. Shinallataj Arca huashataca caishuj soldadocunami caticurcacuna. Chaicamaca sacerdotecunaca mana pararishpami gachucunapi tocacurcacuna.

10 Josueca chai soldadocunamanca: “Cancunaca ama caparinguichij, cancunapaj rimashcallapish ama uyarichun. Cancunapaj shimicunamantaca shuj shimillapish ñuca ‘¡Caparichij!’ ningacama ama llujshichun. Ñuca ‘¡Caparichij!’ nijpimi cancunaca caparina canguichij” nishpami mandashca carca. 11 Josueca paicuna Jehová Diospaj Arcata apashpa shuj cutinlla Jericó llajta muyundijta richunmi saquirca. Chai qꞌuipaca paicunapaj carpa huasicunaman tigrashpami tutaca chaipi saquirircacuna.

12 Josueca cayandij punllaca manaraj achijyajpimi jatarirca. Cutin sacerdotecunaca Jehová Diospaj Arcatami aparcacuna. 13 Canchis sacerdotecunaca canchis carneropaj gachucunata apashpami Jehová Diospaj Arca ñaupajpi mana pararishpa chai gachucunahuan tocashpa rircacuna. Paicunapaj ñaupajtaca macanacunacunahuan caj soldadocunami ricurcacuna. Shinallataj Jehová Diospaj Arca huashataca caishuj soldadocunami caticurcacuna. Chaicamaca sacerdotecunaca mana pararishpami gachucunapi tocacurcacuna. 14 Cayandij punllapish chashnallatajmi Jericó llajta muyundijta shuj cutinhuan marchashpa rircacuna. Chai qꞌuipaca paicunapaj carpa huasicunamanmi tigrarcacuna. Chaitaca sujta punllacunatami chashna rurarcacuna.

15 Séptimo punllapica ña pacarijpimi inti manaraj llujshijpi jatarircacuna. Paicunaca ñaupaman marchashca shinallatajmi Jericó llajta muyundijta canchis cutinhuan marcharcacuna. Chai punllallapimi Jericó muyundijtaca canchis cutin chashna marcharcacuna. 16 Canchis cutinpica sacerdotecunaca gachucunapimi tocarcacuna. Chashna tocajpimi Josueca soldadocunataca: “¡Caparichij, cai llajtataca Jehová Diosmi cancunaman cushca! 17 Jericó llajtapish, tucui chaipi imalla tiyashcapish tucuimi tucuchishca cana can. Tucui caicunami Jehová Diospaj can. Ñucanchij cachashca huillajcunataca huainayaj huarmi Rahab miticuchishcamantami pailla, paipaj huasipi paihuan tucui cajcunapish causashpa catina can. 18 Shinapish cancunaca tucui tucuchishca canamantami caruyana canguichij. Chashnami chai tucuchishca canamanta imatapish mana munashpa, cancunapaj mana japinguichij. Pero cancuna chai tucuchishca canamanta imatapish japishpaca carpa huasicunapi caj tucui israelitacunatami tucuchishpa jatun llaquiman apanguichij. 19 Pero tucui cullquita, orota, cobremanta, fierromanta rurashca cosascunataca Jehová Diospajmi chuyayachina canguichij. Chaitaca Jehová Diospaj achca valij cosascunahuanmi huaquichina canguichij” nircami.

20 Gachucunapi tocajpimi soldadocunaca caparirca. Soldadocuna gachucunapi tocashcata uyajpi, paicuna macanacungapaj sinchita caparijpimi Jericó llajtapi tiyaj muyundij pircaca urmarca. Chai qꞌuipaca tucui soldadocunami chai llajtaman cada uno huichiyarcacuna. Chashnami chai llajtataca japircacuna. 21 Paicunaca espadacunahuanmi cꞌaricunatapish, huarmicunatapish tucui huañuchircacuna. Shinallataj jovencunatapish, mayorcunatapishmi huañuchircacuna. Torocunatapish, ovejacunatapish, burrocunatapishmi tucui huañuchircacuna.

22 Josueca chai allpata pacalla ricunaman rij ishqui runacunamanca: “Huainayaj huarmipaj huasiman yaicushpa cancuna jurashca shina paitapish, paipaj huasipi cajcunatapish llujshichichij” nircami. 23 Chaimi allpata pacalla ricunaman rij jovencunaca Rahabtapish, paipaj yayatapish, mamatapish, paipaj turi ñañacunatapish, paipaj huasipi tucui cajcunatapish chai huasimanta llujshichircacuna. Paipaj tucui familiata llujshichishpaca Israelpaj carpa huasicunamanta canllamanmi churarcacuna.

24 Chai qꞌuipaca chai llajtatapish, chai llajtapi tucui imalla tiyashcacunatapishmi tucui rupachircacuna. Shinapish cullquita, orota, cobremanta, fierromanta rurashca cosascunatapish Jehová Diospaj achca valij cosascunahuan huaquichichunmi curcacuna. 25 Josueca Rahab huarmipaj causaita, paipaj yayapaj familiapaj causaita, paipaj huasipi tucui cajcunapaj causaillatami quishpichirca. Jericó llajtata pacalla ricunaman richun Josué cachashca runacunata paipaj huasipi miticuchishcamantami Rahabca cunan punllacama Israelpi causan.

26 Chai punllapica Josueca: “Maijanpish Jericó llajtata cutin shayachijca Jehová Diospaj ñaupajpi maldicishca cachun. Cai llajtapaj cimientocunata churajpica paipaj punta churica huañungami. Cutin pungucunata churajpica paipaj qꞌuipa churimi huañunga” nishpami jurarca.*

27 Jehová Diosca Josuehuanmi carca. Paica tucui cai allpapimi ashtahuan rijsishca carca.