1 Crónicas
23 Davidca ña yuyajlla cashpa huañunapaj ashalla illajpimi, paipaj churi Salomontaca Israel llajtapaj rey cachun churarca. 2 Chaimi Israel llajtata tucui mandajcunata, sacerdotecunata, levitacunata tandachirca. 3 Chaipimi 30 huatacunata huichiman charij levitacunata yuparcacuna. Shuj shuj yupajpica tucuica 38.000 cꞌaricunami carcacuna. 4 Caicunamantaca 24.000 cꞌaricunami Jehová Diospaj huasita ima shina shayachijta ricujcuna carca. 6.000 cꞌaricunaca pushajcuna, juezcunami carca. 5 Cutin 4.000 cꞌaricunaca punguta cuidajcunami carca. Caishuj 4.000 cꞌaricunaca David: “Diosta alabangapajmi rurarcani” nishca instrumentocunahuanmi Jehová Diosta alabajcuna carca.
6 Davidca tucui cꞌaricunatami grupocunapi chaupirca. Levipaj churicunamantaca Guersón, Cohat, Merarimi carca. 7 Guersonpaj churicunaca Ladán, Simeipishmi carca. 8 Ladanpaj churicunaca quimsami carca: familiata pushaj Jehiel, Zetam, Joelpishmi carca. 9 Simeipaj churicunaca quimsami carca: Selomot, Haziel, Haranpishmi carca. Caicunami Ladanpaj yayacunapaj familiacunata pushajcuna carca. 10 Simeipaj churicunaca Jáhat, Ziná, Jeús, Beriaspishmi carca. Cai chuscumi Simeipaj churicuna carca. 11 Jahatca familiata pushajmi carca. Zizaca catij pushajmi carca. Shinapish Jeús, Beriasca mana achca churicunata charircachu. Chaimantami paicunaca shuj familia* shinalla yupashca cashcamanta, shujlla responsabilidadta pajtachijcuna carca.
12 Cohatpaj churicunaca chuscumi carca: Amram, Izhar, Hebrón, Uzielpishmi carca. 13 Amrampaj churicunaca Aarón, Moisespishmi carca. Shinapish Aarontami Diospajlla ashtahuan chꞌicanyachishca ucuta punllanta chuyayachichun agllashca carca. Shinallataj Aaronpish, paipaj churicunapish Jehová Diospaj ñaupajpi sacrificiocunata cungapaj, sirvingapaj, paipaj shutipi huiñai huiñaita gentecunata bendiciangapajmi agllashcacuna carca. 14 Diosta sirvij Moisespaj churicunaca levitacunapaj familia ucupimi yupashca carca. 15 Moisespaj churicunaca Guersom, Eliezermi carca. 16 Guersompaj churicunamanta familiata pushajca Sebuelmi carca. 17 Eliezerpaj churicunamanta familiata pushajca Rehabiasmi carca. Eliezerca mana achca churicunata charircachu. Shinapish Rehabiaspaj churicunaca achcacunami carca. 18 Izharpaj churicunamanta familiata pushajca Selomitmi carca. 19 Hebronpaj churicunamanta familiata pushajca Jerías, puntapaj qꞌuipa Amarías, ishquipaj qꞌuipa Jahaziel, quimsapaj qꞌuipa Jecameammi carca. 20 Uzielpaj churicunamanta familiata pushajca Miqueas, paipaj qꞌuipaca Isiasmi carca.
21 Meraripaj churicunamantaca Mahlí, Musipishmi carca. Mahlipaj churicunamantaca Eleazar, Quispishmi carca. 22 Eleazarca churicunata mana charishpami huañurca, ushushicunallatami charirca. Chaimi Quispaj churicunaca paipaj ushushicunahuan cazararca. Quispaj churicunaca paicunapaj familiami* carca. 23 Musipaj churicunaca quimsami carca: Mahlí, Éder, Jeremotpishmi carca.
24 Tucui cai runacunami Levipaj huahua huahuacunamanta carca. Paicunaca cuentashcacuna, shuticunapi registrashcacunami carca. Paicunaca según paicunapaj familiacunapaj shuticunapimi chꞌicanyachishca carcacuna. Shinallataj según cada familiata pushajcunapaj shutipimi chꞌicanyachishca carcacuna. Paicunaca Jehová Diospaj huasipimi sirvijcuna carca. Cai runacunaca 20 huatamanta huichimanmi registrashcacuna carca. 25 Davidca cashnami nishca carca: “Israel llajtapaj Jehová Diosca paipaj pueblomanca sumaj causaitami cushca. Paica Jerusalenpipish huiñai huiñaitami causanga. 26 Ashtahuanpish levitacunaca Diospaj carpa huasitapish, chaipi adorangapaj shujtaj cosascunatapish ña mana maiman apangacunachu” nircami. 27 David mandashca shinami levitacunataca 20 huatamanta huichiman yuparcacuna. 28 Paicunaca Jehová Diospaj huasi ucupi trabajashpami Aaronpaj churicunata* ayudajcuna carca. Shinallataj paicunaca Diospaj huasi patiocunata, micuna cuartocunatami cuidajcuna carca. Jucha illaj cosascunatapishmi chuyayachijcuna carca. Paicunaca Diospaj huasipipish shujtaj trabajocunatapishmi rurajcuna carca. 29 Paicunaca montonashca tandacunata,* grano ofrendapaj alli* harinata, levadura illaj ñañujlla galletasta, sartenpi rurashca tandacunatami rurashpa ayudajcuna carca. Shinallataj masatapish aceitehuanmi chagrujcuna carca. Tucui chaipi imalla tiyajcunatami pesashpa, midishpa ayudajcuna carca. 30 Levipaj huahua huahuacunaca cada punllami tutamantacunapish, chishicunapish Jehová Diosta pagui ningapaj, alabangapaj chaipi carcacuna. 31 Shinallataj paicunaca sábado punllacunapi, llullu lunapi, chꞌican chꞌican fiesta punllacunapimi, leypi mandashca shina Jehová Diosman rupachishca sacrificiocunata cushpa ayudajcuna carca. Chaitaca Jehová Diospaj ñaupajpimi punllanta rurajcuna carca. 32 Levitapaj huahua huahuacunaca tandanacuna carpa huasita, Diospajlla chꞌicanyachishca lugartami cuidajcuna carca. Shinallataj Aaronpaj churicunatami Jehová Diospaj huasipi ayudajcuna carca. Aaronpaj churicunaca paicunapaj huauquicunami carca.