2 Crónicas
5 Chashnami Salomonca Jehová Diospaj huasipaj rurana cashca tucui trabajota tucuchirca. Shinallataj paipaj yaya David Diospajlla chꞌicanyachishca cosascunatami apamurca. Cullquita, orota, tucui cosascunatapish Diospaj huasipimi achca valij cosascunata huaquichina cuartocunapi churarca. 2 Chai punllacunapica Salomonca israelitacunata pushajcunatami* tandachirca. Paica familiacunata tucui pushajcunata, yayacunapaj familiacunata pushajcunatapishmi tandachirca. Paicunaca Jerusalenmanmi shamurcacuna. Jehová Dioshuan ari ninacushca arcata Davidpaj Llajtamanta huichiyachingapajmi shamurcacuna. Chai llajtataca Sion nishpapishmi rijsincuna. 3 Israelmanta tucui cꞌaricunami Chuglla huasicunata rurana fiestapica reypaj ñaupajpi tandanacurcacuna. Chai fiestataca séptimo quillapimi rurajcuna carca.
4 Israelitacunata tucui pushajcuna shamujpimi levitacunaca Arcata alzarcacuna. 5 Diospaj Arcata, tandanacuna carpa huasita, chai carpa huasipi tiyaj Diospajlla chꞌicanyachishca tucui cosascunatami huichiyachircacuna. Chaicunataca sacerdotecuna, levitacunami* huichiyachircacuna. 6 Rey Salomonpish, paihuan tandanacungapaj cayashca tucui israelitacunapishmi Arca ñaupajpi carcacuna. Paicunaca Diosman cushpa huañuchishca ovejacunapish, huagracunapish yallitaj achca cashcamantami mana yupai tucurcacuna. 7 Chai qꞌuipami sacerdotecunaca Jehová Dioshuan ari ninacushca arcataca maipi churana cashcaman aparcacuna. Diospaj huasipi ashtahuan ucujman caj cuartoman apashpami querubincunapaj alas ucupi churarcacuna. Chai cuartoca Diospajlla ashtahuan chꞌicanyachishca ucumi carca. 8 Querubincunapaj alascunaca Arca jahuata chutashcami carca. Chashnami querubincunaca jahua ladomantaca Arcatapish, caspicunatapish tapacurca. 9 Caspicunaca yallitaj largo cashcamantami chai caspicunapaj puntacunataca Diospajlla chꞌicanyachishca ucumanta ricunalla carca. Chai ucuca ashtahuan ucujman caj cuarto ñaupajpimi carca. Pero canllamantaca mana ricunallachu carca. Chaicunaca cunan punllacunacamami chaillapitaj can. 10 Arca ucupica ima shujtaj cosascunaca mana tiyarcachu, ishqui tabla rumicunallami tiyarca. Chai rumicunataca Moisesca Horebpi cashpami Arca ucupi churashca carca. Chaipimi Jehová Diosca israelitacunata Egipto llajtamanta llujshichishpa paicunahuan ari ninacurca.*
11 Diospajlla chꞌicanyachishca ucumanta sacerdotecuna llujshijpica (tucui chaipi caj sacerdotecunaca maijan grupomanta cashpapish Diospajllami chꞌicanyarishcacuna carca), 12 tucui cantaj levitacunami alli telahuan rurashca churanacunata churashpa, cimbalocunata apashpa, cuerda instrumentocunata apashpa, arpacunatapish apashpa rircacuna. Paicunataca Asafpish, Hemanpish, Jedutunpish, paicunapaj churicunapish, paicunapaj huauquicunapishmi pushajcuna carca. Cantaj levitacunaca altarmantaca inti llujshin ladopimi shayacurcacuna. Shinallataj paicunapaj cꞌuchupica 120 sacerdotecunami trompetacunapi tocacurcacuna. 13 Trompetata tocajcunapish, cantajcunapish tucuicunami shuj shinalla Jehová Diostaca alabashpa pagui nircacuna. Jehová Diosta alabacujpica trompetacuna, cimbalocuna, caishuj tocana instrumentocunapish sinchita tocashcami uyarirca. Paicunaca “paica allimari, paipaj mana tucurij cꞌuyaica huiñai huiñaipajmari” nishpami cantarcacuna. Chai ratomi pꞌuyuca huasipi jundarca, chai huasica Jehová Diospaj huasimi can. 14 Diospaj huasipica Jehová Diospaj sumaj achijnicujmi jundarca. Chaimi sacerdotecunaca pꞌuyu tiyashcamanta sacerdotecuna shina sirvingapaj mana saquiri tucurcacuna.