Éxodo
7 Chaimi Jehová Diosca Moisestaca cashna nirca: “Ricui, faraonpaj ñaupajpica cantaca Dios shina cachunmi churashcani. Cambaj propio huauqui Aaronmi cambaj profeta canga. 2 Canca tucui ñuca imalla mandashcatami cambaj huauqui Aaronman huillana cangui. Cutin paimi faraonhuan rimanga. Chaimi faraonca israelitacunataca cai llajtamanta llujshichun saquinga. 3 Ñucaca faraón rumi shungu tucuchunmi saquisha. Egipto llajtapica achca milagrocunata, señalcunatami rurasha. 4 Pero faraonca cancunataca mana cazungachu. Chaimi ñuca maquihuan Egipto llajtata llaquichishpa ñuca pueblo Israeltaca achca soldadocunata shina llujshichisha. Egipto llajtata jatunta llaquichishpami* ñuca pueblotaca llujshichisha. 5 Ñuca maquihuan Egiptota llaquichishpa paicunapuramanta israelitacunata llujshichijpimi egipciocunaca ñucaca Jehová Dios cashcata yachangacuna” nircami. 6 Chashna nijpimi Moisespish, Aaronpish Jehová Dios mandashcata rurarcacuna. Paicunaca Dios nishca shinallatajmi rurarcacuna. 7 Faraonhuan parlanacui punllacunapica Moisesca 80 huatacunatami charirca. Cutin Aaronca 83 huatacunatami charirca.
8 Chai qꞌuipami Jehová Diosca Moisestapish, Aarontapish cashna nirca: 9 “Faraón cancunata ‘Shuj milagrota ruraichij’ nijpica canca Aarontami ‘Cambaj varata japishpa faraonpaj ñaupajpi shitai’ nina cangui. Chaimi varaca shuj jatun culebra tucunga” nircami. 10 Shina nijpimi Moisespish, Aaronpish faraonpaj ñaupajman rishpaca Jehová Dios mandashca shina rurarcacuna. Aaronca faraonpaj ñaupajpi, faraonta sirvijcunapaj ñaupajpimi paipaj varata shitarca. Chaimi chai varaca shuj jatun culebra tucurca. 11 Pero faraonca yachaj runacunata, brujocunatami cayarca. Egipto llajtamanta adivinaj sacerdotecunaca magiata rurashpami Aarón shinallataj rurarcacuna. 12 Cada unomi paicunapaj varata pambaman shitarca. Chashna shitajpimi tucui varacunaca jatun culebracuna tucurca. Shinapish Aaronpaj culebrami* paicunapaj culebracunata millpurca. 13 Chai jahuapish faraonca rumi shungumi tucurca. Paica Jehová Dios nishca shinallatajmi Moisestapish, Aarontapish mana cazurca.
14 Chai qꞌuipami Jehová Diosca Moisestaca cashna nirca: “Faraonca israelitacuna llujshichunca mana saquisha ninchu. Paica rumi shungumi can. 15 Caya tutamantaca faraonta ricunaman ringui. Paica Nilo jatun yacumanmi ringa. Chaipi paihuan tupangapaj jatun yacu uripi shuyangui. Cambaj maquipica culebra tucushca varata apashpa ringui. 16 Faraonmanca caitami nina cangui: ‘Hebreocunapaj Jehová Diosmi ñucataca: “Chaquishca pambapi ñucata adorachun* ñuca pueblota llujshichun saqui” nishpa canman huillachun cacharca. Pero canca cunancama mana cazushcanguichu. 17 Jehová Diosca caitami nin: “Caita rurajpimi ñucaca Jehová Dios cashcata yachangui: ñuca maquipi charicushca varahuanmi Nilo jatun yacuta huajtasha. Chaipimi yacuca yahuar tucunga. 18 Nilo jatun yacupi tiyaj pescadocunaca huañungami. Yacupish ashnangami. Egipciocunaca chai yacutaca mana ubyai tucungacunachu” ninmi’ ningui” nircami.
19 Chai qꞌuipami Jehová Diosca Moisestaca: “Aaronmanca: ‘Cambaj varata japishpa Egipto yacucuna jahuata chutai. Chai yacucuna yahuar tucuchunca jatun yacucuna jahuata, larcacuna jahuata, guzucuna* jahuata, tandashca yacucuna jahuata cambaj varata chutai’ ni. Tucui Egipto llajtapi tiyaj yacucunami yahuar tucunga. Caspi matecunapi tiyaj yacucunapish, rumi mangacunapi tiyaj yacucunapishmi yahuar tucunga” nirca. 20 Chai ratomi Moisespish, Aaronpish Jehová Dios mandashca shinallataj rurarcacuna. Aaronca faraón ricucujpi, faraonta sirvijcunapish ricucujpimi paipaj varata alzashpa Nilo jatun yacuta huajtarca. Chaimi yacuca yahuar tucurca. 21 Yacupi tiyaj pescadocunaca huañurcami. Jatun yacupish ashnai callarircami. Egipciocunaca Nilomanta yacutaca ña mana ubyai tucurcacunachu. Tucui Egipto llajta yacucunami yahuar tucurca.
22 Egipto llajtamanta adivinaj sacerdotecunaca magiata rurashpami paicunapish chai shinallataj rurarcacuna. Faraonca Jehová Dios nishca shinallataj rumi shungu tucushpami Moisestapish, Aarontapish mana cazurca. 23 Qꞌuipaca faraonca paipaj huasiman tigrarcallami. Paica ima tucushcataca ña mana yuyarircachu. 24 Egipciocunaca Nilomanta yacutaca mana ubyai tucurcacunachu. Chaimantami ubyangapajca jatun yacu muyundijpi yacuta mashcashpa allai callarircacuna. 25 Jehová Dios Nilo jatun yacuta yahuarta rurashcamantaca canchis punllacunami pasarca.