2 Crónicas
16 Rey Asá 36 huatacunata mandacujpimi Israelmanta rey Baasaca Judá llajtahuan macanacurca. Chashnami Judá llajtapi rey Asá mandacushca allpacunaman ama pi llujshichun, ama pi yaicuchun Ramá llajtapica muyundijta pircacunata shayachirca. 2 Chashna rurajpimi Asaca Jehová Diospaj huasimantapish, reypaj huasimantapish* achca valij cosascunata huaquichina cuartomanta cullquita, orota llujshichishpa Siria llajtamanta Ben-Hadad reyman cuchun cacharca. Ben-Hadadca Damascopimi causacurca. Rey Asaca cashnapishmi nirca: 3 “Canhuan ñucahuanca shuj tratotami rurarcanchij. Cambaj yayapish ñuca yayahuanmi shuj tratota rurarcacuna. Caipimi canmanca cullquitapish, orotapish cachani. Cunanca Israel llajtata mandaj rey Baasá ñucamanta caruyachun paihuan tratota rurashcata saqui” nircami.
4 Ben-Hadadca rey Asá nishcata uyashpami Israel llajtapi tiyaj llajtacunata llaquichichun soldadocunata mandajcunata cacharca. Paicunaca Ijón llajtata, Dan llajtata, Abel-Maim llajtata, Neftalipi tiyaj llajtacunapaj tucui huaquichina cuartocunatapishmi mishashpa japircacuna. 5 Rey Baasá chaita yachaj chayashpaca chai ratomi Ramá llajtapi pircacunata shayachinata saquirca. Shinallataj trabajocunata ruranatapishmi saquirca. 6 Rey Asaca tucui Judá llajtatami japirca. Shinallataj rey Baasá pircacunata shayachingapaj rumicunata, caspicunata tandachishcatami paicunaca Ramá llajtamanta apashpa rircacuna. Chaicunahuanmi rey Asaca Gueba llajtata, Mizpá llajtatapish cutin shayachirca.
7 Chai tiempocunapimi Dios ricuchishcata huillaj Hananí runaca Judá llajtata mandaj rey Asapajman shamushpaca cashna nirca: “Canca Jehová Diospi mana confiashcamanta, Siria llajtata mandaj reypi confiashcamantami Siriamanta soldadocunataca mana tucuchi tucurcangui. 8 ¿Manachu etiopecunapish, libiocunapish achca soldadocunata, carretacunata, caballopi purijcunata charirca? Pero Jehová Diospi can confiashcamantami paica cambaj maquipi entregarca. 9 Jehová Diospaj ñahuica paita tucui shunguhuan sirvijcunaman fuerzata cungapajmi* tucui cai allpata ricucun. Shinapish cunanca canca mana yachaj shinami tucushcangui. Chaimi cunanmantaca cambaj contraca achca macanacuicuna tiyanga” nircami.
10 Chashna nishcamantami Asaca yallitaj pꞌiñarirca. Chaimantami Dios ricuchishcata huillaj runahuanca colerashpa paitaca prezupi churarca. Chai punllacunallatajmi Asá runaca chai llajtapi causaj huaquin gentecunataca mana alli tratai callarirca. 11 Asapaj causaimantaca callarimanta tucuringacamami Judá llajtamanta, Israel llajtamanta Reycunapaj Libropi quillcashca tiyacun.
12 Asá 39 huatacunata mandacujpimi paitaca chaquipi ungüi japirca. Chai ungüimantami paica anchayashpa catirca. Chashna ungüihuan cashpapish Jehová Diostaca mana mashcarcachu. Ashtahuanpish doctorcunatami* mashcarca. 13 Chai qꞌuipami Asaca huañurca.* Paica 41 huatacunata mandacushpami huañurca. 14 Paitaca sumaj pambana jutcupimi pambarcacuna. Chai pambana jutcutaca paillatajmi Davidpaj Llajtapi rurashca carca. Shinallataj paitaca shuj camapimi sirichircacuna. Chai camapica aceite balsamicota, mishquijlla ashnacujcunata chꞌican chꞌican aceitecunahuan chagrushcatami churarcacuna. Shinallataj paita pambashca ñaupajpimi paipaj shutipi ninata japichircacuna.*