1 Reyes
21 Chaicuna pasashca qꞌuipami Jezreelmanta Nabotpaj uva chagra allpamanta shuj problema tiyarca. Chai uva chagraca Jezreelpimi carca. Samaria llajtata mandaj rey Acabpaj huasi cꞌuchullapimi carca. 2 Acabca Nabottaca: “Cambaj uva chagraca ñuca huasi cꞌuchullapimi, shuj huertata rurangapaj ñucaman cui. Chai uva chagrapaj randica ashtahuan alli uva chagratami cusha o can munajpica cullquihuanmi pagasha” nircami. 3 Pero Nabotca Acabtaca: “Ñuca ñaupa yayacuna cushca herenciataca canmanca manataj cushachu. Jehová Diosca chaitaca mana mandashcachu” nircami. 4 Chaimi Acabca Jezreelmanta Nabot ima nishcata uyashpaca llaquilla, pꞌiñarishca paipaj huasiman yaicurca. Nabotca “Ñuca ñaupa yayacunapaj herenciataca canmanca mana cushachu” nishcami carca. Qꞌuipaca Acabca camapi siririshpami ñahuita taparishpa mana micusha nirca.
5 Paipaj huarmi Jezabel paita ricunaman rishpaca: “¿Imamantataj yallitaj llaquilla canguiyari? ¿Imamantataj mana micusha ninguiyari?” nircami. 6 Chaimi Acabca: “Jezreelmanta Nabottaca ‘Cambaj uva chagrata cꞌatui o can munajpica shujtaj uva chagratami canman cusha’ nircanimi. Pero paica ‘Ñuca uva chagrataca canmanca mana cushachu’ nircami” nirca. 7 Chaimi paipaj huarmi Jezabelca: “¿Manachu canca rey cangui? ¿Manachu Israel llajtataca can mandangui? Jatari, imallatapish micushpa animari. Ñucami Jezreelmanta Nabotpaj uva chagrataca canman cusha” nirca. 8 Chaimantami Jezabelca Acabpaj shutipi cartacunata escribishpa, reypaj sellohuan sellashpa Nabotpaj llajtapi causaj autoridadcunapajman,* pushajcunapajman cacharca. 9 Chai cartacunapica Jezabelca cashnami nirca: “Gentecunataca ayunachun tandachichij, Nabottaca tucuicunapaj ñaupajpi tiyachichij. 10 Ishqui mana vali runacunata paipaj ñaupajpi tiyachichij. Paicuna Nabotpaj contra llullashpaca ‘¡Canca Diostapish, reytapishmi maldicishcangui!’ nichuncuna. Chai qꞌuipaca canllaman llujshichishpa rumicunahuan huañuchichij” nircami.
11 Chaimi Nabotpaj llajtapi causaj autoridadcunapish, pushajcunapish Jezabel cachashca cartacunapi nishcata rurarcacuna. 12 Chaimantami gentecunataca ayunachun tandachircacuna. Nabottapish tucuicunapaj ñaupajpimi tiyachircacuna. 13 Ishqui mana vali runacuna shamushpaca Nabotpaj ñaupajpimi tiyarircacuna. Paicunaca tucuicunapaj ñaupajpi Nabotpaj contra llullashpaca: “¡Nabotca Diostapish, reytapishmi maldicishca!” nircacunami. Chaimantaca llajtamanta canllaman llujshichishpami rumicunahuan huañuchircacuna. 14 Qꞌuipaca Jezabel huarmimanca: “Nabottaca rumicunahuanmi shitashcacuna, paica ñami huañushca” nishpa huillachunmi cacharcacuna.
15 Jezabel huarmica Nabotta rumicunahuan shitashpa huañuchishcata uyashpami Acabmanca: “Nabotca ña mana causacunchu. Paica huañushcami. Chaimanta Jezreelmanta Nabot mana cꞌatusha nishca uva chagrataca cunanca japilla” nirca. 16 Nabot huañushcata yachashpami Acabca chai rato Jezreelmanta Nabotpaj uva chagrata japingapaj uriyarca.
17 Pero Jehová Diosca Tisbemanta Eliasmanca cashnami nirca: 18 “Ri, Israel llajtata mandaj rey Acabhuan tupagri. Paica Samariapimi can. Nabotpaj uva chagrapimi can. Paica chai chagrata japingapajmi chaiman rirca. 19 Paimanca: ‘Jehová Diosca: “¿Shuj runata huañuchishpachu paipaj allpatapish quichushcangui?”* ninmi’ ninami cangui. Qꞌuipaca: ‘Jehová Diosca: “Nabotpaj yahuarta maipimi allcucuna lambirca chaillapitajmi cambaj yahuartapish allcucuna lambinga” ninmi’ ningui” nircami.
20 Acabca Eliastaca: “¡Ñuca enemigolla, ñuca imata rurashcatamari yachaj chayashcangui!” nircami. Chaimi Eliasca: “Ari, yachaj chayashcanimi. Diosca cantaca cashnami nishca: ‘Jehová Diospaj ñaupajpi mana allicunallata rurashcamantaca 21 canmanca jatun llaquitami cachasha. Cantaca librimi tucuchisha. Acabpaj huahua huahuacunamantaca tucui cꞌaricunatami mana difindiri tucujcunatapish, debilcunatapish Israel llajtamanta chingachisha. 22 Ñucata pꞌiñachishcamanta, israelitacunatapish juchapi urmachishcamantaca Nebatpaj churi Jeroboanpaj familiata rurashca shinallataj, Ahiyapaj churi Baasapaj familiata rurashca shinallatajmi cambaj familiatapish tucuchisha’ nishcami. 23 Jehová Diosca Jezabel huarmimantapish caitami nirca: ‘Jezabel huarmitaca Jezreel allpapimi allcucuna micunga. 24 Acabpaj familiamanta cajcuna llajta ucupi huañujpica allcucunami micunga. Cutin campopi huañujcunataca jahuata volaj* animalcunami micunga. 25 Acab shinaca nunca pi mana tiyashcachu. Paica paipaj huarmi Jezabel yuyaita cujpimi Jehová Diospaj ñaupajpica mana allicunallata rurarca. 26 Acabca millanana rurashcalla dioscunata adorashpami yallitaj millaita rurarca. Israelitacunapaj ñaupajmanta Jehová Dios llujshichishpa cachashca tucui amorreocuna shinami millaita rurarca’ nirca” nircami.
27 Chai shimicunata uyashpami Acabca paipaj ropata lliquirishpa, racu sacota* churarirca. Shinallataj ayunashpa, racu sacota churarishca siririshpami desanimarishca carca. 28 Chaimi Jehová Diosca Tisbemanta Eliasmanca cashna nirca: 29 “¿Acab ñuca ñaupajpi ima shina humillarishcataca ricushcanguichu? Ñuca ñaupajpi pai chashna humillarishcamantaca pai causacujpirajca llaquitaca mana cachashachu. Paipaj churi causacui punllacunapimi chai llaquitaca paipaj familiaman cachasha” nircami.