2 Crónicas
22 Jerusalenpi causajcunaca Jehorampaj último churi Ocoziastami Jehorampaj randi rey cachun churarcacuna. Achca shuhuacunaca arabecunahuan tandanacushpami Judapi tiyaj carpa huasicunaman shamushpa Jehorampaj punta churicunata huañuchishcacuna carca. Chaimi Jehorampaj churi Ocoziasca Judá llajtata rey shina mandai callarirca. 2 Ocoziasca 22 huatacunata charishpami rey tucurca. Jerusalenpica shuj huatatami mandarca. Ocoziaspaj mamaca Omripaj nieta* Ataliami carca.
3 Ocoziasca Acabpaj familiapaj ejemplotami catirca. Paipaj mamaca mana allicunata rurachunmi aconsejarca. 4 Acabpaj familia rurashca shinallatajmi paica Jehová Diospaj ñaupajpi mana allicunata ruraj carca. Ocoziaspaj yaya huañushca qꞌuipaca Acabpaj familiami paipaj consejajcuna tucurca. Chaimi Ocoziastaca huañuiman aparca. 5 Paicunapaj consejocunata catishpami Ocoziasca Israel llajtata mandaj rey Acabpaj churi Jehoramhuan, Siriamanta rey Hazaelpaj contra Ramot-Galaadpi macanacunaman rirca. Chaipimi arcocunahuan flechacunata shitajcunaca Jehoramta chugrichircacuna. 6 Jehoramca Ramá llajtapi Siria llajtamanta rey Hazaelpaj contra macanacucujpimi paita chugrichircacuna. Chaimi alliyangapajca Jezreel llajtaman tigrarca.
Acabpaj churi Jehoram chugrichishca cashcamantami, Judá llajtata mandaj rey Jehorampaj churi Ocoziasca* paita ricunaman uriyarca. 7 Ocoziasca Jezreelpimi Jehoramta visitanaman rirca. Chaiman chayashpaca Ocoziasca Jehoramhuanmi Nimsipaj nieto* Jehuta ricunaman llujshircacuna. Jehú runataca Jehová Diosmi Acabpaj familiata tucuchichun agllashca carca. Pero Ocozías Jehoramta visitanaman rijpimi Diosca Ocozías huañuchun saquirca. 8 Jehuca Acabpaj familiata llaquichinaman shamushpaca Judamanta mandajcunata, Ocoziaspaj huauquicunapaj churicunatami japirca. Ocoziaspaj sobrinocunaca paita sirvijcunami carca. Jehuca paicunatami huañuchirca. 9 Qꞌuipaca Ocoziastami mashcarcacuna. Ocoziasta Samariapi miticushcata japishpami Jehupajman prezu apashpa huañuchircacuna. Qꞌuipamanca paita pambashpami: “Paica Jehosafatpaj nietomi can. Paica tucui shunguhuanmi Jehová Diosta sirvirca” nircacuna. Ocozías huañujpica Ocoziaspaj familiamanta rey shina pi mandajca mana tiyarcachu.
10 Ocoziaspaj mama Ataliaca paipaj churi huañushcatami ricurca. Chaimi Ataliaca Judapaj familiamanta reypaj tucui huahua huahuacunata tucuchirca. 11 Shinapish rey Jehorampaj ushushi Jehosabeatca Ocoziaspaj churi Jehoastami miticuchishpa aparca. Reypaj churicunata huañuchigrijpimi Jehosabeat huarmica Jehoasta aparca. Paica Jehoastaca paipaj huiñachij mamahuanmi shuj cuartopi churarca. Chashnami rey Jehorampaj ushushi Jehosabeatca Ataliamanta pacashpa Jehoasta huañuchichun mana saquirca. (Jehosabeatca sacerdote Jehoiadapaj huarmimi carca. Paica Ocoziaspaj panimi carca). 12 Atalía chai llajtata mandacujpimi Jehoasca paicunahuan Diospaj huasipi sujta huatacunata pacalla saquirirca.