2 Crónicas
15 Obedpaj churi Azariasca Diospaj espiritutami chasquirca. 2 Chaimi Azariasca Asata tupanaman llujshishpaca cashna nirca: “¡Asapish, tucui Judapi caj runacunapish, Benjaminpi caj runacunapish, uyaichij! Cancuna Jehová Dioshuan cajpica paipish cancunahuanmi canga. Cancuna paita mashcashpaca japinguichijmi. Pero cancuna paita saquijpica paipish cancunata saquingami. 3 Achca tiempotami israelitacunaca Dios illaj, paicunata yachachij sacerdotecuna illaj, ley illaj causarcacuna. 4 Pero paicunaca llaquilla cashpaca israelitacunapaj Jehová Diostami mashcarcacuna. Chashna rurajpimi paicunataca Diosca chasquirca. 5 Chai llajtacunapica tucui causajcunami paicunapura bullata rurashpa jatarircacuna. Chaimantami chai punllacunapica ni pi mana tranquilo viajai tucurcacuna.* 6 Diosllatajmi tucui laya llaquicunata cachashpa yallitaj muspachirca. Chaimantami shuj grupo gentecunaca caishuj grupo gentecunata tucuchirca. Shinallataj shujtaj llajtamanta cajcunaca caishuj llajtacunatami tucuchirca. 7 Pero cancunaca ama desanimarichijchu, sinchi caichij. Cancuna tucui imalla rurashcacunamantaca japinguichijtajmi” nircami.
8 Asá cai shimicunata uyashpa, profeta Oded nishca shimicunata uyashpaca Judapaj familiapaj allpamanta, Benjaminpaj familiapaj allpamanta, Efraín urcucunapi mishashpa japishca llajtacunamantapishmi mana manchashpa millanana rurashcalla dioscunata anchuchirca. Shinallataj Jehová Diospaj altartami cutin shayachirca. Chai altarca Jehová Diospaj huasiman yaicuna corredor ñaupajpimi carca. 9 Chai qꞌuipaca Judapaj familiamanta, Benjaminpaj familiamanta tucui cajcunatami tandachirca. Shinallataj paicunapurapi causaj shujtaj llajtamanta shamushca runacunatapishmi Efrainpaj familiamanta, Manasespaj familiamanta, Simeonpaj familiamanta tandachirca. Paicunamanta achcacunaca Asapaj Jehová Dios paihuan cajta ricushpami israelitacunamantaca Asapaj lado tucushca carcacuna. 10 Asá 15 huatacunata mandacujpimi tercer quillapi Jerusalenpi tandanacurcacuna. 11 Chai punllacunaca paicuna quichushpa apamushcacunamantami Jehová Diosmanca 700 huagracunata, 7.000 ovejacunata sacrificiota rurashpa curcacuna. 12 Ashtahuanpish paicunapaj ñaupa yayacunapaj Jehová Diosta tucui shunguhuan, tucui almahuan* mashcangapajmi ari ninacurcacuna. 13 Maijanpish israelitacunapaj Jehová Diosta mana mashcajca uchilla cashpapish, jatun cashpapish, cꞌari cashpapish, huarmi cashpapish huañunami carca. 14 Chashnami paicunaca sinchita rimashpa, cushicuihuan caparishpa, trompetacunahuanpish, cuernocunahuanpish tocashpa Jehová Diosman shuj juramentota rurarcacuna. 15 Tucui Judapi cajcunaca tucui shunguhuan jurashcamantami cushilla carcacuna. Paicunaca Jehová Diosta mashcanataca manataj saquircacunachu. Chashna rurajpimi paicunataca Diosca chasquirca. Shinallataj sumaj causaitapishmi tucui ladocunapi cushpa catirca.
16 Asapaj abuela Maacapish adorana posteta adorangapajmi shuj millanana rurashcalla diosta rurashca carca. Chaimantami Asaca paipaj abuelataca reina canamanta anchuchirca. Paica chai millanana rurashcalla diosta urmachishpa, ñutushpami Cedrón pugru pambapi rupachirca. 17 Pero Israelmanta adorana lugarcunataca* mana anchuchircachu. Shinapish Asaca paipaj tucui causaipimi* Diostaca tucui shunguhuan sirvirca. 18 Asaca pai chꞌicanyachishca cosascunata, paipaj yaya chꞌicanyachishca cosascunatami Diospaj huasiman apamurca. Paica cullquita, orota, shujtaj cosascunatapishmi apamurca. 19 Asá 35 huatacunata mandacui punllacunacamaca ima macanacui mana tiyarcachu.