2 Crónicas
18 Jehosafatca yallitaj charij, tucuicunapajpish rijsishcami carca. Chashna jahuapish Jehosafatca paipaj familiataca Acabpaj familiahuan cazarachunmi saquirca. 2 Asha huatacuna qꞌuipaca Acabtami Samariapi ricunaman uriyarca. Acabca Jehosafatpajpish, paihuan caj achca gentecunapajpish achca ovejacunata, achca huagracunatami huañuchishpa curca. Chashna rurashpami Jehosafattaca Ramot-Galaadpaj contra macanacunaman richun rogarca.* 3 Israel llajtata mandaj rey Acabca Judá llajtata mandaj rey Jehosafattaca: “¿Ñucahuan Ramot-Galaadpi macanacuiman ringuichu?” nircami. Chashna nijpimi paica: “Ñucaca canhuanmi casha. Ñuca pueblopish cambaj pueblohuanmi canga. Ñuca puebloca macanacuipipish ayudangami” nishpa cutichirca.
4 Shinapish Jehosafatca Israel llajtata mandaj reytaca: “Puntaca, Jehová Dios ima nishcata tapupai” nircami. 5 Chashna nijpimi Israel llajtata mandaj reyca 400 profetacunata tandachishpaca: “¿Ramot-Galaad llajtahuan macanacungapaj rishunchu o mana?” nirca. Shina nishpa tapujpimi profetacunaca: “Rilla, Diosca reypaj maquipimi entreganga” nircacuna.
6 Chaimantaca Jehosafatca: “¿Manachu caipica Jehová Diospaj shuj profeta tiyan? Dios ima nishcata yachangapaj paitapish tapushunchij” nircami. 7 Chashna nijpimi Israel llajtata mandaj reyca Jehosafattaca: “Shuj profeta tiyanrajmi. Jehová Dios ima nishcata yachangapajca paitami tapui tucunchij. Pero paica ñucamantaca allicunataca mana nunca huillanchu, siempremi mana allicunallata huillan. Chaimantami paitaca pꞌiñani. Paica Imlapaj churi Micayami can” nirca. Pero Jehosafatca: “Reyca mana chashna rimanachu can” nircami.
8 Israel llajtata mandaj reyca palaciopi achca autoridadta charijcunamanta shujta cayashpami: “Utca rishpa Imlapaj churi Micayata pushamugri” nirca. 9 Israel llajtamanta reypish, Judá llajtamanta rey Jehosafatpish Samariaman yaicuna pungupimi shuj trillana pambapi tiyacurcacuna. Paicunaca reycuna churarina ropata churarishcami cada uno paicunapaj jatun tiyarinapi tiyacurcacuna. Paicunapaj ñaupajpica tucui profetacunami huillacurcacuna. 10 Chaimantaca Kenaanapaj churi Sedequiasca fierro gachucunata rurashpami: “Jehová Diosca: ‘Cai gachucunahuanmi siriocunataca tucuchingacama llaquichingui’ ninmi” nirca. 11 Tucui caishuj profetacunapish chashnallatajmi huillarcacuna. Paicunaca: “Ramot-Galaadman huichiyailla, mishanguimi. Jehová Diosca reypaj maquipimi entreganga” nircacunami.
12 Micayata pushanaman rij runaca: “Ricui, tucui profetacunami reymanca allicunallata nishca. Canpish paicuna shinallataj allicunallata huillapai” nircami. 13 Pero Micayaca: “Causaj Jehová Diospaj shutipimi jurani. Ñuca Dios nishcallatami huillasha” nircami. 14 Chaimantaca Micayaca reypaj ñaupajmanmi rirca. Chaimi reyca: “Micaya, ¿Ramot-Galaad llajtahuan macanacungapaj huichiyashunchu o mana?” nirca. Chai ratomi Micayaca: “Huichiyailla, mishanguimi. Paicunaca cancunapaj maquipimi entregashca canga” nirca. 15 Chaita uyashpami reyca: “¿Mashna cutintaj Jehová Diospaj shutipi verdad cashcallata huillachun jurachina cani?” nirca. 16 Chashna nijpimi Micayaca: “Tucui israelitacunatami michij illajlla ovejacuna shina urcucunapi caita chaita puricujta ricuni. Jehová Diosca: ‘Paicunaca dueñota mana charincunachu. Chaimanta cada uno paicunapaj huasiman tranquilo tigrachunllacuna’ nircami” nirca.
17 Chaimi Israelmanta rey Acabca Jehosafattaca: “¿Manachu ñucaca ‘Cai runaca ñucamantaca ima allicunataca mana huillangachu, mana allicunallatami huillanga’ nircani?” nirca.
18 Micayaca cashnami nirca: “Cunanca Jehová Dios nishca shimicunata uyai. Jehová Diostaca paipaj jatun tiyarinapi tiyacujtami ricurcani. Paipaj cꞌuchupipish alli ladoman, lluqui ladoman tucui angelcuna* shayacujtami ricurcani. 19 Chaipimi Jehová Diosca: ‘¿Ramot-Galaadman huichiyashpa chaipi huañuchunca Israelmanta rey Acabtaca pitaj umangayari?’ nirca. Chaimi shujca caita, caishujca chaita nicurcacuna. 20 Shuj ángel* cꞌuchuyashpa, Jehová Diospaj ñaupajpi shayarishpaca: ‘Ñucami umasha’ nircami. Chaimi Jehová Diosca: ‘¿Ima shinataj umanguiyari?’ nirca. 21 Shina nijpimi chai angelca: ‘Ñuca rishpami paipaj tucui profetacuna llullacunata nichun paicunata pandachisha’ nirca. Chaimi Diosca: ‘Ari, pandachinguimi. Tucuimi alli llujshinga. Rilla chaita ruragri’ nirca. 22 Chaimantami Jehová Diosca cambaj profetacuna llullacunata huillachun shuj ángel pandachichun saquishca. Pero Jehová Diosca shuj llaquita can apana cashcatami huillashca” nircami.
23 Kenaanapaj churi Sedequías Micayapajman cꞌuchuyashpaca quijadospimi huajtarca. Paica: “¿Jehová Diospaj espirituca canhuan parlanaman ringapajchu ñucamanta anchurishca? ¿Maitataj rirca?” nircami. 24 Chaimi Micayaca: “¡Ricui! Ashtahuan ucujman caj cuartopi pacatucunaman yaicui punllami yachaj chayangui” nishpa cutichirca. 25 Chai huashami Israelmanta reyca cashna nirca: “Micayata pushashpa llajtata mandaj Amonman, reypaj churi Joasman entregaichij. 26 Paicunataca: ‘Reyca: “Cai runataca prezupi churaichij. Macanacuipi ñuca mishashpa* tigramungacamaca ashalla tandata, ashalla yacuta cunguichij” ninmi’ ninguichij” nircami. 27 Pero Micayaca: “Macanacuipi can mishashpa tigramujpica Jehová Diosca ñucahuanca mana parlashcachu canga” nircami. Shinallataj paica: “Tucui cancuna, tucui gentecuna caitaca yuyaipi charinguichij” nircami.
28 Chaimantaca Israelmanta rey Acabpish, Judamanta rey Jehosafatpish Ramot-Galaadmanmi huichiyarcacuna. 29 Israel llajtamanta mandajca Jehosafattaca: “Ñucaca macanacuiman yaicungapajca shujtaj laya ropatami churarisha. Pero canca rey churarina ropata churaringui” nircami. Chashnami Israel llajtata mandajca shujtaj laya ropata churarirca. Chaimi paicunaca macanacuiman yaicurcacuna. 30 Siria llajtata mandajca carretacunata pushajcunata mandaj runacunataca: “Ama pihuan macanacunguichijchu. Uchillacunahuanpish, jatuncunahuanpish ama macanacunguichijchu. Israel llajtamanta reyllahuan macanacunguichij” nishpami mandashca carca. 31 Shinapish carretacunata pushajcunata mandajcunaca Jehosafatta ricushpaca: “Paimi Israel llajtata mandaj can” nircacunami. Chaimantami paita llaquichingapaj cꞌuchuyarcacuna. Cutin Jehosafatca paita ayudachunmi caparirirca. Chaimi Jehová Diosca paita ayudarca. Shinallataj Diosca chai ratomi paicunataca Jehosafatmanta caruyachirca. 32 Carretacunata pushajcunata mandajcunaca mana Israel llajtata mandaj cashcata cuentata cushpami paita catinata saquircacuna.
33 Shuj runaca huairallapi flechata shitashpami Israel llajtata mandajtaca pechopi fierro churanata churarishca chaupipi chugrichirca. Chaimi Israel llajtata mandajca paipaj carretata pushajtaca: “Macanacuimanta* ñucata llujshichi, ñucataca achcatami chugrichishca” nirca. 34 Chai punllaca macanacuica sinchimi carca. Israelmanta reytaca siriocunapaj ladota ricuchunmi carretapi shayachishpa chishicama charicurcacuna. Paica inti huashicushca huashami huañurca.