2 Crónicas
10 Rehoboamca Siquem llajtamanmi rirca. Tucui israelitacunami paitaca reyta rurangapaj Siquemman shamushcacuna carca. 2 Nebatpaj churi Jeroboanca chaitami yachaj chayarca. Chaita yachaj chayashpami chai rato Egiptomanta tigramurca (paica rey Salomonmanta miticushpami Egipto llajtapi causacushca carca). 3 Chaimi Jeroboanta mashcanaman cacharcacuna. Jeroboanpish, tucui israelitacunapishmi Rehoboamta ricunaman rircacuna. Paicunaca: 4 “Cambaj yayaca ñucanchijmanca llashaj yugotami churarca. Pero can ñucanchijta mana yallitaj trabajachijpi, cambaj yaya churashca llashaj yugomanta ashallatapish aliviajpica ñucanchijca cantami sirvishun” nircacunami.
5 Chaimi Rehoboamca: “Quimsa punllapi ñucata ricunaman tigramunguichij” nirca. Chashna nijpimi gentecunaca chaimanta rircacuna. 6 Rey Rehoboamca paipaj yaya Salomón causacujpiraj paipaj yayata sirvij israelitacunata pushajcunataca:* “¿Cai gentecunamanca imata cutichichuntaj aconsejanguichij?” nishpami tapurca. 7 Paicunaca: “Can gentecunata alli tratajpi, paicuna nishcacunata rurajpi, paicuna mañashcatapish alli cutichijpica paicunaca siempremi canta sirvijcuna canga” nircacunami.
8 Ashtahuanpish paica israelitacunata pushajcuna cushca consejota mana cazushpami paihuan huiñashca jovencunata tapurca. Chai jovencunaca cunanca paita ayudajcunami carca. 9 Paicunataca: “¿Imatataj aconsejanguichij? Cai gentecunaca: ‘Cambaj yaya churashca llashaj yugomanta ashallatapish aliviahuai’ nircacunami. ¿Paicunamanca imatataj cutichisha?” nishpami tapurca. 10 Paihuan huiñashca jovencunaca Rehoboamtaca cashnami nircacuna: “‘Cambaj yayaca ñucanchijmanca llashaj yugotami churarca. Cambaj yaya churashca llashaj yugomanta ashallatapish aliviahuai’ nij gentecunataca cashnami nina cangui: ‘Ñuca huahua dedoca ñuca yayapaj huasha caderatapish yalli racumi canga. 11 Ñuca yayaca llashaj yugotami cancunapica churarca. Ñucacarin ashtahuan llashaj yugotami churasha. Ñuca yayaca angucunahuanmi cancunataca castigarca. Ñucacarin puntasapa angucunahuanmi castigasha’ ninami cangui” nircacunami.
12 Jeroboanpish, paihuan caj tucui gentecunapish Rehoboamtaca ña quimsa punlla tucujpimi ricunaman rircacuna. Reyca paicunataca: “Quimsa punllapi ñucata ricunaman tigramunguichij” nishcami carca. 13 Pero rey Rehoboamca israelitacunata pushajcuna cushca consejota mana cazushpami paicunataca sinchi shimicunahuan cutichirca. 14 Jovencuna cushca consejota catishpami paica: “Cancuna charishca llashaj yugotaca ashtahuan llashaj yugotami rurasha. Ñuca yayaca angucunahuanmi cancunataca castigarca. Ñucacarin puntasapa angucunahuanmi castigasha” nirca. 15 Chashnami reyca gentecuna mañashcataca mana uyarca. Nebatpaj churi Jeroboanman Dios nishca shimicuna pajtarichunmi Jehová Diosca chashna tucuchun saquirca. Chaitaca Siló llajtamanta Ahíya runamanmi huillachishca carca.
16 Tucui israelitacunaca rey paicunata mana uyasha nishcamantami reytaca: “Davidhuanca imata ricunata mana charinchijchu. Jesepaj churihuanca ima herenciata mana charinchijchu. ¡Israelitacunalla, cada uno cancunapaj dioscunata adoranaman tigraichijlla! Davidpaj huahua huahuacuna, cunanca cancunallataj cuidarichijlla” nircacunami. Chashna nishca qꞌuipaca tucui israelitacunami paicunapaj huasiman tigrarcacuna.
17 Pero Rehoboamca Judá llajtapi tiyaj llajtacunapi causaj israelitacunatami mandashpa catirca.
18 Chai qꞌuipaca rey Rehoboamca Hadoram runatami paicunapajman cacharca. Hadoramca sinchi trabajocunata rurachun tandachishca runacunata mandajmi carca. Pero paitaca israelitacunami rumicunahuan huañuchirca. Rehoboamca Jerusalenman miticushpa ringapajmi paipaj carretaman huichiyarca. 19 Israelitacunaca Davidpaj huahua huahuacunataca cunan punllacunacamami mana cazushpa catincuna.