ÉXODO

1 Israelpaj churicunaca paicunapaj familiacunandijmi Egipto llajtaman Jacobhuan chayarcacuna. Paicunapaj shuticunaca caicunami can: 2 Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad, Aser. 5 Jacobpaj huahua huahuacunaca totalca 70-mi carcacuna. Joseca ñami Egiptopi carca. 6 Tiempohuanca Joseca huañurcami. Shinallataj Josepaj huauquicunapish, paicunahuan igual huiñai gentecunapish tucuicunami huañurcacuna. 7 Israelitacunaca* achca huahuacunata charishpami mirari callarircacuna. Paicunaca rato mirarishpami sinchi runacuna tucushpa chai llajtapica jundarircacuna.

8 Tiempohuanca Joseta mana rijsij shuj mushuj reymi Egipto llajtata mandai callarirca. 9 Chai reyca paipaj llajta gentecunataca cashnami nirca: “¡Ricuichij! Israelitacunaca ñucanchijtapish yalli achcacunamari, ñucanchijtapish yalli sinchi runacunamari. 10 Paicuna ama mirarishpa catichunca imata ruranatami yuyarina canchij. Mana imata rurajpi, shuj macanacui callarijpica paicunaca ñucanchij contracunahuan tandanacushpami ñucanchij contra macanacungacuna. Chashna rurashpaca cai llajtamantami ringacuna” nircami.

11 Chaimantami egipciocunaca mandajcunata churarcacuna. Chai mandajcunami israelitacunataca sinchita trabajachishpa sufrichircacuna. Israelitacunaca Pitom, Raamsés llajtacunatami shayachircacuna. Chai llajtacunapimi faraonca pai imalla charishca cosascunata huaquichij carca. 12 Pero israelitacunaca paicunata ashtahuan llaquichijpipish ashtahuan mirarishpami caipi chaipi causai callarircacuna. Chaimantami egipciocunaca israelitacunataca achcata manchai callarircacuna. 13 Egipciocunaca israelitacunataca esclavocunata rurashpami sinchita trabajachun obligarcacuna. 14 Sinchi trabajocunata rurachun obligashpami paicunataca achcata llaquichircacuna. Lodota rurachishpa, ladrillocunata rurachishpami trabajachircacuna. Allpacunapipish tucui laya trabajocunatami rurachircacuna. Chashnami esclavocuna rurana tucui laya trabajocunata rurachishpa maltratarcacuna.

15 Tiempohuanca Egipto llajtata mandajca Sifrá, Pua shuti ishqui hebrea parteracunahuanmi parlarca. 16 Paicunataca: “Hebrea huarmicuna huachacujpi ayudacushpaca caitami rurana canguichij:* cꞌari huahua cajpica huañuchinguichij, cutin huarmi huahua cajpica causachun saquinguichijlla” nircami. 17 Shinapish partera huarmicunaca Diostami manchajcuna carca. Chaimantami Egipto llajtata mandaj ima nishcata cazunapaj randica cꞌari huahuacunataca causachun saquircallacuna. 18 Tiempohuanca parteracunata cayashpami Egipto llajtata mandajca: “¿Imamantataj cꞌari huahuacunataca causachun saquishcanguichij?” nirca. 19 Chaimi partera huarmicunaca faraonmanca: “Hebrea huarmicunaca mana egipcia huarmicuna shinachu can. Paicunaca sinchi huarmicunami can. Parteracuna manaraj chayajpimi paicunaca ña huahuata huachashcacuna” nircacuna.

20 Chaimi partera huarmicunataca Diosca bendiciarca. Israelitacunaca ashtahuan mirarishpami ashtahuan sinchi runacuna tucurcacuna. 21 Chai partera huarmicunaca Diostami manchajcuna carca. Chaimi paica huahuacunata charichun bendiciarca. 22 Ultimopica faraonca tucui egipciocunatami: “Hebreocunapaj cunanlla huacharishca cꞌari huahuacunataca Nilo jatun yacupi shitaichij. Pero huarmi huahuacunataca causachun saquinguichijlla” nishpa mandarca.

2 Chai punllacunapica Levipaj familiamanta shuj runami Levipaj shuj ushushihuan* cazararca. 2 Chai huarmica chichu saquirishpami shuj cꞌari huahuata huacharca. Chai huahua sumaj cajta ricushpami paitaca quimsa quillacunata pacarca. 3 Ña mana ashtahuan pacai tucushpaca papiro* plantahuan rurashca shuj canastata japishpami alquitranhuan, breahuan llihuishpa chai canasta ucupi huahuata churarca. Chai canastatami Nilo jatun yacu uripi tiyaj carrizocuna chaupipi churarca. 4 Pero chai huahuapaj panica huahuahuan ima tucujta ricungapajmi asha caru carulla saquirirca.

5 Faraonpaj ushushica Nilo jatun yacupimi armanaman uriyarca. Paita sirvij huarmicunaca jatun yacu uritami puricurcacuna. Chaipimi paica carrizocuna chaupipi shuj canasta tiyacujta ricurca. Chaimi paita sirvij huarmitaca chai rato apanaman cacharca. 6 Canastata pascashpaca shuj huahua huacacujtami ricurca. Paica chai huahuamanta llaquirishpami: “Hebreocunapaj shuj huahuamari” nirca. 7 Chaimi huahuapaj panica faraonpaj ushushitaca: “¿Huahuata chuchuchichunpish, cuidachunpish shuj hebrea huarmita* mashcanaman richun ninguichu?” nirca. 8 Chaimi faraonpaj ushushica: “¡Ari, mashcamugri!” nirca. Shina nijpimi chai jovencitaca chai rato huahuapaj mamata mashcanaman rirca. 9 Faraonpaj ushushica chai huarmitaca: “Cai huahuata apashpa, chuchuchishpa cuidapai. Ñucaca pagashallami” nircami. Chaimi chai huarmica huahuata apashpa, chuchuchishpa cuidarca. 10 Huahua huiñajpica faraonpaj ushushimanmi curca. Chai huahuaca faraonpaj ushushipaj churimi tucurca. Faraonpaj ushushica: “Paitaca yacumantami llujshichircani” nishpami Moisés* shutita churarca.

11 Tiempohuanca Moisesca ña jatun* cashpami paipaj huauqui hebreocunata ricunaman rirca. Chaipimi paicuna sinchita trabajacujta ricurca. Shinallataj shuj egipcio runa shuj hebreo runata macacujtami ricurca. 12 Chaimi paica urata, janajta ricushpa pi mana ricurijpica chai egipcio runata huañuchishpa arena allpapi pambarca.

13 Cayandij punlla llujshishpaca ishqui hebreocunapura macanacucujtami ricurca. Chaimi culpata charij runataca: “¿Imamantataj cambaj huauquita macacungui?” nirca. 14 Chashna nijpimi chai runaca: “¿Pitaj cantaca ñucanchijta mandachun, ñucanchij juez cachunpish churashcari? ¿Egipcio runata shinallatajchu ñucatapish huañuchisha ningui?” nirca. Chashna nijpimi Moisesca mancharishpa paipaj shungupica: “Ñami ñuca imata rurashcataca yachaj chayashcacuna” nirca.

15 Faraón chaita yachaj chayashpaca Moisestami huañuchisha nirca. Pero Moisesca faraonmanta miticushpami Madián llajtapi causanaman rirca. Ña chaiman chayashpaca shuj pugyu cꞌuchupimi tiyarirca. 16 Madián llajtamanta sacerdoteca canchis* ushushicunatami charirca. Chai ushushicunami paicunapaj yayapaj ovejacuna ubyachun, animalcuna ubyanapi jundachingapaj yacuta surcunaman chayarcacuna. 17 Pero huaquin michij runacuna shamushpami ima shina ruraj cashca shinallataj chaimanta llujshichishpa cacharcacuna. Chaita ricushpami Moisesca chai huarmicunata ayudangapaj* jatarirca. Ovejacunamanpishmi yacuta ubyachirca. 18 Chai huarmicuna huasiman tigrajpimi paicunapaj yaya Reuelca* mancharishpa: “¿Cunanca ima nishpataj huasimanca utca shamushcanguichij?” nishpa tapurca. 19 Chaimi paicunaca: “Shuj egipcio runami michijcunamanta ñucanchijta difindirca. Paica ovejacunamanpishmi yacuta llujshichishpa ubyachirca” nircacuna. 20 Chaimi paipaj ushushicunataca: “¿Paica maipitaj? ¿Imamantataj chaipi saquimurcanguichij? Ñucanchijhuan micunaman shamuchun cayamugrichij” nirca. 21 Chai qꞌuipaca Moisesca chai runahuan causashpa saquiringapajmi ari nirca. Chai runaca paipaj ushushi Ziporahuanmi Moisestaca cazarachirca. 22 Tiempohuanca Ziporaca shuj huahuatami charirca. Chai huahuatami Moisesca Guersom* shutita churarca. Paica: “Cai llajtapica shujtaj llajtamanta shamushca runa shinami tucushcani” nishpami chashna shutichirca.

23 Achca tiempo* qꞌuipami Egipto llajtata mandajca huañurca. Chashnapish israelitacunaca esclavocuna cashcamantami shungupi nanarishpa, quejarishpa catircacuna. Paicunaca Diostaca ayudachunmi rogarishpa catircacuna. 24 Tiempohuanca Diosca paicuna shungupi nanarishpa huacacushcatami uyarca. Chaimi paica Abrahanhuan, Isaachuan, Jacobhuan ari ninacushcata* yuyarirca.* 25 Diosca israelitacuna llaquita apacujta ricushpaca paipishmi achcata llaquirirca.

3 Moisesca paipaj suegro Jetropaj ovejacunata michijmi tucurca. Jetroca Madianmanta sacerdotemi carca. Shuj punllaca Moisesca chaquishca pambata, inti huashicun ladoman ovejacunata pushacushpaca Horeb* urcumanmi chayarca. Chai urcuca Dios agllashca urcumi carca. 2 Chaiman chayajpica zarza yura* rupacuj chaupipimi Jehová Diospaj ángel ricurirca. Moisesca alli alli ricushpami chai zarza yuraca nina japirishca cashpapish mana rupacujta ricurca. 3 Chaimi Moisesca: “¡Caica imatajyari! ¿Zarza yuraca imamantashi mana rupan? Alli ricungapajmi ashtahuan cꞌuchuyagrini” nirca. 4 Jehová Diosca Moisés alli ricungapaj cꞌuchuyacujtami ricurca. Chaimi Diosca zarza yuramantaca: “¡Moisés! ¡Moisés!” nirca. Chashna nijpimi paica: “Caipimi cani” nishpa cutichirca. 5 Chaimi Diosca: “Ama ashtahuan cꞌuchuyaichu. Canca jucha illaj* pambapimi shayacungui. Chaimanta cambaj chaquicunamanta sandaliacunata llujshichi” nirca.

6 Chai huashami Diosca: “Ñucaca cambaj ñaupa yayacunapaj* Diosmi cani. Abrahanpaj Dios, Isaacpaj Dios, Jacobpaj Diosmi cani” nirca. Chaimi Moisesca Diosta ricunata manchashpa paipaj ñahuita taparirca. 7 Shinallataj Jehová Diosca cashnami nirca: “Ñuca agllashca pueblo Israel Egipto llajtapi achca llaquita apacujtami ricushcani. Paicunata sinchita trabajachishcamanta caparishpa mañashcatapishmi uyashcani. Paicuna sufricushcataca allimi yachani. 8 Chaimantami Egipto llajtaman uriyashpa paicunataca chaimanta llujshichishpa jatun, alli allpaman pushasha. Chai allpapica achca leche, achca mielmi tiyan. Paicunataca cananeocunapaj, hititacunapaj, amorreocunapaj, perizitacunapaj, heveocunapaj, jebuseocunapaj allpamanmi pushasha. 9 Ricui, ñuca pueblo Israel ayudachun nishpa caparishpa mañashcataca uyashcanimi. Egipciocuna paicunata yallitaj llaquichicushcatapish ricushcanimi. 10 Cunanca shamui, cantaca faraonpajmanmi cachagrini. Ñuca pueblo Israeltaca canmi Egiptomanta llujshichingui” nircami.

11 Shinapish Moisesca Diostaca: “¿Faraonpaj ñaupajman ringapaj, israelitacunata Egiptomanta llujshichingapajca ñucaca pitaj caniyari?” nircami. 12 Chaimi Diosca: “Ñucaca canhuanmi casha. Ñuca canta cachashcata ricuchij señalca caimi canga: israelitacunata Egiptomanta llujshichishpaca tucui cancunami cai urcuman shamushpa ñucata* caipi adoranguichij” nirca.

13 Shinapish Moisesca Diostaca: “Israelitacunapajman rishpaca: ‘Cancunapaj ñaupa yayacunapaj Diosmi cancunapajman ñucata cacharca’ nishachari. Paicunaca ‘¿Paica ima shutitaj?’ nishpachari tapungacuna. ¿Chaipica imatataj nina cani?” nircami. 14 Chaimi Diosca Moisesmanca: “Ñucaca Ñuca ima Tucusha Nishcami Casha”* nirca. Shinallataj: “Israelitacunamanca: ‘Ñucami Casha nishcami cancunapajman cacharca’ ningui” nircami. 15 Chai qꞌuipami Diosca cutinllataj Moisesmanca cashna nirca:

“Israelitacunamanca: ‘Cancunapaj ñaupa yayacunapaj Jehová Diosmi cancunapajman ñucata cachashca. Paica Abrahanpaj Dios, Isaacpaj Dios, Jacobpaj Diosmi can’ ninami cangui. Ñuca shutica huiñaipajmi canga. Ñucataca cai shutipimi huiñaita yuyaringacuna. 16 Cunanca ri, israelitacunata pushajcunata* tandachigri. Paicunamanca cashna ningui: ‘Cancunapaj ñaupa yaya Abrahanpaj, Isaacpaj, Jacobpaj Jehová Diosmi ñucaman ricurirca. Paica cashnami nirca: “Cancunataca ricushcanimi. Egipto llajtapi cancunata imata ruracujtapish ricushcanimi. 17 Chaimantami egipciocuna cancunata sufrichicushcamanta quishpichinata decidishcani. Cancunata quishpichishpaca cananeocunapaj, hititacunapaj, amorreocunapaj, perizitacunapaj, heveocunapaj, jebuseocunapaj allpamanmi pushasha. Chai allpapica achca leche, achca mielmi tiyan” nircami’ ningui.

18 Paicunaca canta uyangacunami. Canca israelitacunata pushajcunahuanmi Egipto llajtata mandajpajman rina cangui. Paitaca: ‘Hebreocunapaj Jehová Diosmi ñucanchijhuan parlarca. Shinaca ñucanchij Jehová Diosman sacrificiocunata cungapaj chaquishca pambaman quimsa punllacunata purishpa richun saquihuai’ ninguichij. 19 Pero Egipto llajtata mandaj cancuna richun mana saquina cashcataca allimi yachani. Shinapish poderyuj maqui obligajllapimi richun saquinga. 20 Chaimantami ñuca maquita chutashpa, mancharina ruraicunata rurashpa Egipto llajtataca castigasha. Chai qꞌuipami cancunataca richun saquinga. 21 Israelitacunataca egipciocunapaj ñaupajpi alli ricurichunmi saquisha. Chai llajtamanta llujshishpaca mana chushaj maquilla ringuichijchu. 22 Cada huarmimi paipaj vecinatapish, paipaj huasipi causaj huarmitapish cullquihuan, orohuan rurashca cosascunata, ropatapish mañana can. Chaicunatami cancunapaj churicunaman, ushushicunaman churachina canguichij. Cancunaca egipciocuna charishca cosascunatami quichunguichij” nircami.

4 Pero Moisesca: “¿Ñucata mana crijpi, ñucata mana uyajpica imatataj rurasha? Paicunaca ‘Jehová Diosca canmanca mana ricurishcangachu’ ningacunami” nircami. 2 Chaimi Jehová Diosca: “¿Maquipica imatataj charicungui?” nishpa tapurca. Chashna tapujpimi Moisesca: “Shuj varatami charicuni” nirca. 3 Diosca: “Chai varata pambaman shitai” nircami. Moisés pambaman shitajpica varaca shuj culebrami tucurca. Chaimi Moisesca chai rato culebramanta caruyarca. 4 Jehová Diosca Moisestaca: “Maquita chutashpa chupamanta japi” nircami. Chashna nijpimi Moisesca maquita chutashpa japirca. Chaimi culebraca shuj vara tucurca. 5 Chaimi Diosca: “Chashnami paicunapaj ñaupa yayacunapaj Jehová Dios canman ricurishcata yachangacuna. Paica Abrahanpaj Dios, Isaacpaj Dios, Jacobpaj Diosmi” nirca.

6 Shinallataj Jehová Diosca: “Cambaj maquitaca pecho churana ucupi churapai” nircami. Chaimi Moisesca paipaj maquitaca pecho churana ucupi churarca. Paipaj maquita surcujpica, ¡maquica leprahuanmi carca! ¡Rasu shina yurajllami carca! 7 Chai qꞌuipami Diosca: “Cambaj maquitaca pecho churana ucupi cutin churai” nirca. Chaimi Moisesca paipaj maquitaca cutinllataj paipaj pecho churana ucupi churarca. Paipaj maquita surcujpica, ¡maquica tucui cuerpo shinallataj sanomi carca! 8 Diosca cashnami nirca: “Punta señalta mana crishpa, mana cazushpapish catij señalta ricushpaca cringacunami. 9 Pero cai ishqui señalcunata ricushca jahua mana crijpi, mana uyasha nijpica Nilo jatun yacumanta yacuta llujshichishpami chaquishca pambapi tallina cangui. Nilo jatun yacumanta llujshichishca yacuca pambapica yahuarmi tucunga” nircami.

10 Chaimi Moisesca Jehová Diostaca: “Jehová Dioslla, perdonahuai. Canta sirvij ñucaca ñaupapish, ñucahuan can parlai callari punllamantapish mana nunca alli parlai pudishcanichu. Ñucaca mana utca rimai tucuj, imata rimangapajpish cꞌallu huataricujmi cani” nirca. 11 Chaimi Jehová Diosca cashna nirca: “¿Pitaj runamanca shimita curca? ¿Pitaj mana rimajtapish, mana uyajtapish rurai tucun? ¿Pitaj ricujta rurai tucun o ciegota saqui tucun? ¿Manachu ñuca, Jehová Dios chaitaca rurai tucuni? 12 Shinashpaca cunanca rilla. Can rimacujpica canhuanmi casha. Imata ninatapish ñucami yachachisha” nircami. 13 Pero Moisesca: “Jehová Dioslla, perdonahuai. Pero shujtajta cachapai, maijanta can munashcata cachapailla” nircami. 14 Chaimi Jehová Diosca Moiseshuan achcata colerashpaca cashna nirca: “¿Manachu levitacunapuramanta Aarón shuti huauquita charingui? Pai alli rimaj cashcataca yachanimi. Paica canhuan tupangapajmi caiman shamucun. Canta ricushpaca achcatami cushicunga. 15 Paimanca canman ñuca imalla nishcata parlai. Pai imata nina cashcatapish huillai. Cancuna parlacujpica cancunahuanmi casha. Imata rurana cashcataca ñucami yachachisha. 16 Aaronmi israelitacunahuanca cambaj randi rimanga. Canca paipajca Dios shinami cangui.* 17 Cambaj maquipica cai varata apangui. Caihuanmi señalcunata rurangui” nircami.

18 Chaimi Moisesca paipaj suegro Jetró maipi cashcaman tigrashpaca: “Ñucataca richun saquipai. Ñuca familiacuna* todavía causacushcata ricungapajmi Egipto llajtaman tigrasha nini” nirca. Shina nijpimi Jetroca Moisestaca: “Allilla ripangui” nirca. 19 Chai qꞌuipami Moisés Madianpi cajpi Jehová Diosca: “Ri, Egiptoman tigrai. Canta huañuchisha nijcunaca tucuicunami ña huañushca” nirca.

20 Chaimantami Moisesca paipaj huarmitapish, paipaj huahuacunatapish burropi tiyachishpa Egipto llajtaman tigrarca. Shinallataj paipaj maquipica Diospaj varatami apashpa rirca. 21 Jehová Diosca Moisesmanca cashnami nirca: “Egiptopi cutin cashpaca ñuca cushca poderhuan faraonpaj ñaupajpi milagrocunata* rurangui. Chashnapish ñucaca faraón rumi shungu tucuchunmi saquisha. Chaimi paica israelitacuna richunca mana saquinga. 22 Chaipimi faraonmanca caita nina cangui: ‘Jehová Diosca caitami nin: “Israelca ñuca churimi, ñuca punta churimi. 23 Chaimanta ñucata adorachun* ñuca churi caimanta llujshichun saqui. Mana llujshichun saquijpica cambaj churita, cambaj punta churitami huañuchisha” ninmi’ ningui” nircami.

24 Paicuna tuta maipi samarina lugarman ricujpimi Jehová Dios* paihuan tupashpaca paita huañuchisha nirca. 25 Chaimi Ziporaca filoyuj pedernal rumita* japishpa paipaj churitaca circuncisionta rurarca. Chai circuncisionta rurashca aichatami paipaj* chaquipi tupachirca. Chashna rurashpami paica: “Canca cai yahuarmantami ñuca cusa* tucushcangui” nirca. 26 Chaimantami Diosca richun saquircalla. Ziporaca paipaj churita circuncisionta rurashcamantami: “Cai yahuarmantami ñuca cusa tucushcangui” nirca.

27 Chai qꞌuipami Jehová Diosca Aarontaca: “Chaquishca pambapi Moiseshuan tupanaman ri” nirca. Chaimi Aaronca Diospaj urcupi Moiseshuan tupanaman rirca. Ña tupashpaca Moisestaca muchashpami saludarca. 28 Moisesca paita cachaj Jehová Dios tucui imalla nishcatami Aaronman parlarca. Shinallataj imalla señalcunata rurachun nishpa mandashcatapishmi huillarca. 29 Chai qꞌuipaca Moisespish, Aaronpish israelitacunata pushajcunahuan* tandanacungapajmi rircacuna. 30 Aaronca Jehová Dios Moisesman tucui imalla nishcatami paicunaman parlarca. Cutin Moisesca israelitacunapaj ñaupajpimi milagrocunata rurarca. 31 Chaicunata ricushpami israelitacunaca Moisesta crircacuna. Israelitacunaca paicuna llaquita apacushcata Jehová Dios ricushcata yachashpami cungurishpa cumurircacuna.

5 Chai qꞌuipami Moisespish, Aaronpish faraonpaj ñaupajman rircacuna. Paicunaca: “Israelitacunapaj Jehová Diosca: ‘Chaquishca pambapi ñucata adorangapaj shuj fiestata rurachun ñuca pueblota llujshichun saqui’ ninmi” nircacunami. 2 Pero faraonca: “¿Pitaj Jehová pai nishcata cazushpa israelitacunata llujshichun saquingapajca? Jehová pi cashcataca mana rijsinichu. Israelitacunatapish caimanta richunca mana saquishachu” nircami. 3 Chaimi paicunaca: “Hebreocunapaj* Diosmi ñucanchijhuan parlashca. Ñucanchij Jehová Diosman sacrificiocunata cungapaj chaquishca pambaman quimsa punllacunata purishpa richun saquihuai. Mana chashna rurajpica shuj ungüihuan o espadahuanmi ñucanchijtaca castiganga” nircacuna. 4 Pero Egipto llajtata mandajca: “Moisés, Aarón, ¿imamantataj israelitacuna trabajanata saquichun munanguichij? ¡Tucuicuna trabajanaman tigraichij!” nircami. 5 Shinallataj faraonca: “Ricuichij, caipica achca gentecunami trabajacun. ¿Paicunapaj trabajotachu jarcasha ninguichij?” nircami.

6 Faraonca chai punllallatajmi esclavocunata mandajcunatapish, paicunata ayudajcunatapish cashna nishpa mandarca: 7 “Chai gentecunamanca ladrillocunata rurachunca ña ama ujshata cunguichijchu. Paicunallataj tandanaman richun. 8 Ashtahuanpish ñaupaman mashna ladrillocunata rurashca valillatataj rurachunmi mañana canguichij. Menosta rurachunca ama saquinguichijchu. Paicunaca qꞌuillacunami.* Chaimantami: ‘¡Rishun ninchijca! ¡Ñucanchij Diosmanmi sacrificiocunata cusha ninchij!’ nishpa purincuna. 9 Paicunataca ashtahuan sinchita trabajachichij. Chashnami llullacunata nishcata uyangapajca tiempota mana charingacuna” nircami.

10 Chaimi esclavocunata mandajcunapish, paicunata ayudajcunapish gentecunapajman rishpaca cashna nircacuna: “Faraonca caitami nin: ‘Ujshataca ña mana ashtahuan cushachu. 11 Maipi cashpapish cancunallataj tandanaman richij. Menosta trabajachunpish mana saquishachu’ ninmi” nircacunami. 12 Chaimi gentecunaca tucui Egipto llajtapi ujshapaj randica rastrojota* mashcanaman rircacuna. 13 Esclavocunata mandajcunaca: “Tucui cancunami ujshata cujpi mashna ladrillocunata ruraj cashca valillatataj cada punlla rurana canguichij” nishpami obligarcacuna. 14 Chashna jahuapish ayudaj israelitacunatami macarcacuna. Chai ayudajcunataca esclavocunata mandajcunami israelitacunata ricuchun churashcacuna carca. Chai mandajcunaca: “¿Ima nishpataj cainapish, cunanpish ladrillocunataca ñaupa rurashca valillatataj mana rurarcanguichij?” nishpami tapurcacuna.

15 Chaimi ayudaj israelitacunaca faraonpajman rishpa quejarircacuna. Paicunaca cashnami nircacuna: “¿Canta sirvijcunataca imamantataj chashna tratangui? 16 Canta sirvijcunamanca ujshataca mana cuncunachu. Pero paicunaca: ‘¡Ladrillocunata ruraichij!’ nishpami catincuna. Cambaj pueblollataj culpata charijpipish ñucanchijtaca macacuncunami” nircacunami. 17 Shinapish faraonca cashnami nirca: “¡Qꞌuillacuna! ¡Cancunaca qꞌuillacunami canguichij! Chaimantami: ‘Rishun ninchijca. Jehová Diosman sacrificiocunata cungapajmi rishun ninchij’ ninguichij. 18 ¡Richij, trabajanaman tigraichij! Ujshataca mana cushunchu. Pero mashna ladrillocunata ruraj cashca valillatatajmi rurana canguichij” nircami.

19 Chashna nijpimi ayudaj israelitacunaca achcata sustarircacuna. Paicunataca: “Ñaupaman mashna ladrillocunata ruraj cashca valillatatajmi rurana canguichij” nishpami mandashcacuna carca. 20 Chai qꞌuipami paicunaca Moiseshuan, Aaronhuan tandanacurcacuna. Moisespish, Aaronpish faraón maipi cashcamanta paicuna llujshingacamami shuyacurcacuna. 21 Chaimi paicunaca chai rato Moisestapish, Aarontapish: “Cancuna imata rurashcata ricushpa Jehová Dios juzgachun. Cancunapaj culpamantami faraonpish, paita sirvijcunapish ñucanchijta pꞌiñancuna. Ñucanchijta huañuchichunpishmi paicunapaj maquipi shuj espadata churashcanguichij” nircacuna. 22 Shina nijpimi Moisesca Jehová Diosta mañashpa cashna nirca: “Jehová Dioslla, ¿imamantataj cai pueblotaca sufrichinguiyari? ¿Imamantataj ñucataca caiman cacharcanguiyari? 23 Cambaj shutipi rimangapaj faraonpaj ñaupajpi ricurishca punllamantami paica cai pueblotaca ashtahuan llaquichishca. Cambaj pueblota quishpichingapajca canca imata mana rurashcanguichu” nircami.

6 Chaimi Jehová Diosca Moisestaca: “Faraonta ñuca imata ruragrishcataca cunanmi ricungui. Ñuca poderyuj maquimi cancunata cacharichun obliganga. Shinallataj ñuca poderyuj maquimi paipaj llajtamanta cancunata llujshichishpa cachachun obliganga” nirca.

2 Chai qꞌuipami Diosca Moisestaca cashna nirca: “Ñucaca Jehová Diosmi cani. 3 Ñucaca Abrahanman, Isaacman, Jacobmanca Tucui poderta charij Dios cashcatami ricuchircani. Pero ñuca shuti Jehová ima nisha nishcataca* paicunamanca mana huillarcanichu. 4 Shinallataj Canaán allpata cungapajmi paicunahuan shuj ari ninacuita rurarcani. Paicunaca chai allpapimi shujtaj llajtamanta shina causarcacuna. 5 Israelitacuna shungupi nanarishpa huacashcataca ñucallatajmi uyashcani. Paicunatami egipciocunaca esclavocunata rurashcacuna. Paicunapaj ñaupa yayacunahuan ari ninacushcatapish yuyarinimi.

6 Chaimanta israelitacunamanca cashna ni: ‘Ñucaca Jehová Diosmi cani. Cancunataca egipciocuna sinchita trabajachicushcamantami cacharichisha. Esclavocuna cachun churashcamantapishmi quishpichisha. Ñuca poderyuj rigrahuan paicunata jatunta llaquichishpami* cancunataca quishpichisha. 7 Cancunataca ñuca pueblo cachunmi chasquisha. Ñucaca cancunapaj Diosmi casha. Ñucaca cancunapaj Jehová Dios cashcatami yachanguichij. Egipto llajtapi cancuna sinchita trabajacushcamantami ñucaca quishpichisha. 8 Abrahanman, Isaacman, Jacobman cushami nishpa jurashca allpamanmi pushasha. Chai allpataca cancunapaj cachunmi cusha. Ñucaca Jehová Diosmi cani’ ningui” nircami.

9 Chai huashami Moisesca israelitacunamanca Dios imata nishcata huillarca. Pero israelitacunaca desanimarishca cashcamanta, esclavocuna cashpa yallitaj sufricushcamantami Moisestaca mana uyarcacuna.

10 Chaimi Jehová Diosca Moisestaca cashna nirca: 11 “Egipto llajtata mandaj faraonmanca, cambaj llajtamanta israelitacuna llujshichun saqui nigri” nircami. 12 Shinapish Moisesca Jehová Diostaca: “Pero israelitacunaca ñucataca mana uyashcacunachu, ¿ima shinataj faraoncarin ñucataca uyangari? Ñucaca alli rimanatapish mana pudinica” nircami. 13 Chashna nijpipish Jehová Diosca pai imata mandashcata israelitacunaman, Egipto llajtata mandaj faraonman huillachunmi Moisesta, Aaronta cutin mandarca. Israelitacunata Egipto llajtamanta llujshichingapajmi chashna mandarca.

14 Israelitacunapaj familiacunata pushajcunaca* caicunami can: Israelpaj punta churi Rubenpaj churicunaca Hanok, Palú, Hezrón, Carmí shuticunami carca. Paicunami Rubenpaj familiacuna can.

15 Simeonpaj churicunaca Jemuel, Jamín, Ohad, Jakín, Zóhar, Shaúl shuticunami carca. Shaulpaj mamaca shuj cananea huarmimi carca. Paicunami Simeonpaj familiacuna can.

16 Levipaj churicunapaj shuticunaca según paicunapaj familiami caicuna can: Guersón, Cohat, Merarí. Levica 137 huatacunatami causarca.

17 Guersonpaj churicunaca según paicunapaj familiami Libní, Simeí shuticuna carca.

18 Cohatpaj churicunaca Amram, Izhar, Hebrón, Uziel shuticunami carca. Cohatca 133 huatacunatami causarca.

19 Meraripaj churicunaca Mahlí, Musí shuticunami carca. Tucui paicunami según paicunapaj familia levitacunapaj familiacuna carca.

20 Amram runaca paipaj yayapaj pani Jokébed shuti huarmihuanmi cazararca. Qꞌuipamanca Jokebedca Aarón, Moisés shuti churicunatami charirca. Amramca 137 huatacunatami causarca.

21 Izharpaj churicunaca Coré, Néfeg, Zicrí shuticunami carca.

22 Uzielpaj churicunaca Misael, Elzafán, Sitrí shuticunami carca.

23 Aaronca Eliseba shuti huarmihuanmi cazararca. Elisebaca Aminadabpaj ushushi, Nahsonpaj panimi carca. Tiempohuanca Elisebaca Nadab, Abihú, Eleazar, Itamar shuti churicunatami charirca.

24 Corepaj churicunaca Asir, Elcaná, Abiasaf shuticunami carca. Corepaj churicunapaj familiacunatami coreitacuna nijcuna carca.

25 Aaronpaj churi Eleazarca Putielpaj shuj ushushihuanmi cazararca. Tiempohuanca chai huarmica Finehás shuti churitami charirca.

Tucui paicunami según paicunapaj familia levitacunapaj familiacunata* pushajcuna can.

26 Jehová Diosca Aarontapish, Moisestapishmi: “Israelitacunataca Egipto llajtamanta grupo grupopi llujshichichij” nishpa mandarca. 27 Moisespish, Aaronpishmi Egipto llajtamanta israelitacunata llujshichingapaj Egipto llajtata mandaj faraonhuan parlarcacuna.

28 Jehová Diosca Moiseshuanmi Egipto llajtapi parlarca. Chaipimi 29 Jehová Diosca Moisestaca: “Ñucaca Jehová Diosmi cani. Ñuca tucui imalla nicushcata Egipto llajtata mandaj faraonman huillai” nirca. 30 Shinapish Moisesca Jehová Diostaca: “Pero ¿ñucataca ima shinataj faraonca uyangari? Ñucaca alli rimanatapish mana pudinica” nircami.

7 Chaimi Jehová Diosca Moisestaca cashna nirca: “Ricui, faraonpaj ñaupajpica cantaca Dios shina cachunmi churashcani. Cambaj propio huauqui Aaronmi cambaj profeta canga. 2 Canca tucui ñuca imalla mandashcatami cambaj huauqui Aaronman huillana cangui. Cutin paimi faraonhuan rimanga. Chaimi faraonca israelitacunataca cai llajtamanta llujshichun saquinga. 3 Ñucaca faraón rumi shungu tucuchunmi saquisha. Egipto llajtapica achca milagrocunata, señalcunatami rurasha. 4 Pero faraonca cancunataca mana cazungachu. Chaimi ñuca maquihuan Egipto llajtata llaquichishpa ñuca pueblo Israeltaca achca soldadocunata shina llujshichisha. Egipto llajtata jatunta llaquichishpami* ñuca pueblotaca llujshichisha. 5 Ñuca maquihuan Egiptota llaquichishpa paicunapuramanta israelitacunata llujshichijpimi egipciocunaca ñucaca Jehová Dios cashcata yachangacuna” nircami. 6 Chashna nijpimi Moisespish, Aaronpish Jehová Dios mandashcata rurarcacuna. Paicunaca Dios nishca shinallatajmi rurarcacuna. 7 Faraonhuan parlanacui punllacunapica Moisesca 80 huatacunatami charirca. Cutin Aaronca 83 huatacunatami charirca.

8 Chai qꞌuipami Jehová Diosca Moisestapish, Aarontapish cashna nirca: 9 “Faraón cancunata ‘Shuj milagrota ruraichij’ nijpica canca Aarontami ‘Cambaj varata japishpa faraonpaj ñaupajpi shitai’ nina cangui. Chaimi varaca shuj jatun culebra tucunga” nircami. 10 Shina nijpimi Moisespish, Aaronpish faraonpaj ñaupajman rishpaca Jehová Dios mandashca shina rurarcacuna. Aaronca faraonpaj ñaupajpi, faraonta sirvijcunapaj ñaupajpimi paipaj varata shitarca. Chaimi chai varaca shuj jatun culebra tucurca. 11 Pero faraonca yachaj runacunata, brujocunatami cayarca. Egipto llajtamanta adivinaj sacerdotecunaca magiata rurashpami Aarón shinallataj rurarcacuna. 12 Cada unomi paicunapaj varata pambaman shitarca. Chashna shitajpimi tucui varacunaca jatun culebracuna tucurca. Shinapish Aaronpaj culebrami* paicunapaj culebracunata millpurca. 13 Chai jahuapish faraonca rumi shungumi tucurca. Paica Jehová Dios nishca shinallatajmi Moisestapish, Aarontapish mana cazurca.

14 Chai qꞌuipami Jehová Diosca Moisestaca cashna nirca: “Faraonca israelitacuna llujshichunca mana saquisha ninchu. Paica rumi shungumi can. 15 Caya tutamantaca faraonta ricunaman ringui. Paica Nilo jatun yacumanmi ringa. Chaipi paihuan tupangapaj jatun yacu uripi shuyangui. Cambaj maquipica culebra tucushca varata apashpa ringui. 16 Faraonmanca caitami nina cangui: ‘Hebreocunapaj Jehová Diosmi ñucataca: “Chaquishca pambapi ñucata adorachun* ñuca pueblota llujshichun saqui” nishpa canman huillachun cacharca. Pero canca cunancama mana cazushcanguichu. 17 Jehová Diosca caitami nin: “Caita rurajpimi ñucaca Jehová Dios cashcata yachangui: ñuca maquipi charicushca varahuanmi Nilo jatun yacuta huajtasha. Chaipimi yacuca yahuar tucunga. 18 Nilo jatun yacupi tiyaj pescadocunaca huañungami. Yacupish ashnangami. Egipciocunaca chai yacutaca mana ubyai tucungacunachu” ninmi’ ningui” nircami.

19 Chai qꞌuipami Jehová Diosca Moisestaca: “Aaronmanca: ‘Cambaj varata japishpa Egipto yacucuna jahuata chutai. Chai yacucuna yahuar tucuchunca jatun yacucuna jahuata, larcacuna jahuata, guzucuna* jahuata, tandashca yacucuna jahuata cambaj varata chutai’ ni. Tucui Egipto llajtapi tiyaj yacucunami yahuar tucunga. Caspi matecunapi tiyaj yacucunapish, rumi mangacunapi tiyaj yacucunapishmi yahuar tucunga” nirca. 20 Chai ratomi Moisespish, Aaronpish Jehová Dios mandashca shinallataj rurarcacuna. Aaronca faraón ricucujpi, faraonta sirvijcunapish ricucujpimi paipaj varata alzashpa Nilo jatun yacuta huajtarca. Chaimi yacuca yahuar tucurca. 21 Yacupi tiyaj pescadocunaca huañurcami. Jatun yacupish ashnai callarircami. Egipciocunaca Nilomanta yacutaca ña mana ubyai tucurcacunachu. Tucui Egipto llajta yacucunami yahuar tucurca.

22 Egipto llajtamanta adivinaj sacerdotecunaca magiata rurashpami paicunapish chai shinallataj rurarcacuna. Faraonca Jehová Dios nishca shinallataj rumi shungu tucushpami Moisestapish, Aarontapish mana cazurca. 23 Qꞌuipaca faraonca paipaj huasiman tigrarcallami. Paica ima tucushcataca ña mana yuyarircachu. 24 Egipciocunaca Nilomanta yacutaca mana ubyai tucurcacunachu. Chaimantami ubyangapajca jatun yacu muyundijpi yacuta mashcashpa allai callarircacuna. 25 Jehová Dios Nilo jatun yacuta yahuarta rurashcamantaca canchis punllacunami pasarca.

8 Chai qꞌuipami Jehová Diosca Moisestaca cashna nishpa mandarca: “Faraón maipi cashcaman rishpa paitaca cashna ningui: ‘Jehová Diosca caitami nin: “Ñucata adorachun* ñuca pueblo llujshichun saqui. 2 Mana saquijpica sapocunata cachashpami tucui cambaj llajtata llaquichisha. 3 Nilo jatun yacupica sapocunami jundanga. Chai sapocunaca yacumanta llujshishpami cambaj huasiman, cambaj dormina cuartoman, cambaj camaman, canta sirvijcunapaj huasicunamanpish yaicunga. Tucui cambaj llajta gentecunapaj chaupipimi canga. Cambaj hornocuna ucupi, masata rurana cambaj bateacuna ucupimi yaicunga. 4 Chai sapocunaca cantapish, cambaj llajta gentecunatapish, tucui canta sirvijcunatapishmi llaquichinga” ninmi’ ningui” nircami.

5 Chai qꞌuipami Jehová Diosca Moisestaca: “Aarontaca: ‘Tucui Egipto llajtapi sapocuna jundarichunca jatun yacucuna jahuata, Nilo larcacuna jahuata, guzucuna* jahuata cambaj maquipi charicushca varata chutai’ ni” nishpa mandarca. 6 Chaimi Aaronca Egipto llajta yacucuna jahuata paipaj maquita chutarca. Chashna rurajpimi yacumanta sapocuna llujshishpa tucui chai llajtapi jundai callarirca. 7 Adivinaj sacerdotecunapish magiata rurashpami chashnallataj rurarcacuna. Paicunapishmi yacumanta sapocunata llujshichircacuna. Chaimi sapocunaca Egipto llajtapi jundarirca. 8 Chai qꞌuipami faraonca Moisesta, Aaronta cayashpaca: “Ñucamantapish, ñuca llajta gentecunamantapish sapocunata anchuchichun Jehová Diosta rogaichij. Israelitacunataca Jehová Diosman sacrificiocunata cunaman richunmi saquisha” nirca. 9 Shina nijpimi Moisesca faraontaca: “Canmantapish, canta sirvijcunamantapish, cambaj llajta gentecunamantapish, cambaj huasicunamantapish sapocunata anchuchichun ima hora Diosta mañanataca nipailla. Sapocunaca Nilo jatun yacullapimi saquiringa” nirca. 10 Chaimi faraonca: “Caya mañapangui” nirca. Shina nijpimi Moisesca cashna nirca: “Ñucanchij Jehová Dios shina pi mana tiyashcata yachachunmi can nishca shina tucunga. 11 Sapocunaca cambaj huasicunamantami chingaringa. Chaimi canpish, canta sirvijcunapish, tucui cambaj llajta gentecunapish sapocunamanta libraringuichij. Sapocunaca Nilo jatun yacullapimi saquiringa” nircami.

12 Chashna nishca qꞌuipami Moisespish, Aaronpish faraonpaj ñaupajmanta rircacuna. Faraonpajman cachashca sapocunata anchuchichunmi Moisesca Jehová Diosta rogarishpa mañarca. 13 Chaimi Jehová Diosca Moisés mañashcata rurarca. Sapocunaca huasicunapi, patiocunapi,* campocunapimi huañui callarirca. 14 Egipciocunaca chai huañushca sapocunata tandashpami achca montoncunata rurarcacuna. Chai llajtaca yallitajmi ashnai callarirca. 15 Faraonca sapocuna ña mana tiyashcata ricushpaca cutinllatajmi rumi shungu tucurca. Paica Jehová Dios nishca shinallatajmi Moisestapish, Aarontapish mana uyasha nirca.

16 Chai qꞌuipami Jehová Diosca Moisestaca: “Aarontaca: ‘Cambaj varata chutashpa pambapi huajtai. Chashna huajtajpimi ñutu allpaca tucui Egipto llajtapi uchilla chuspicuna* tucunga’ ni” nishpa mandarca. 17 Paicunaca chaitatajmi rurarcacuna. Aaronca paipaj varata chutashpami pambapi huajtarca. Chaimi uchilla chuspicunaca gentecunapaj jahuapi, animalcunapaj jahuapi tiyari callarirca. Pambapi tiyaj ñutu allpaca tucui Egipto llajtapimi uchilla chuspicuna tucurca. 18 Adivinaj sacerdotecunapish magiata rurashpami uchilla chuspicunata rurashun nircacuna, pero mana pudircacunachu. Uchilla chuspicunaca gentecunapaj jahuapi, animalcunapaj jahuapimi tiyarishpa catirca. 19 Chaita ricushpami adivinaj sacerdotecunaca faraontaca: “¡Caitaca Diospaj maquimari* ruracun!” nircacuna. Shinapish faraonca rumi shungu tucushpami catirca. Paica Jehová Dios nishca shinami Moisestapish, Aarontapish mana cazurca.

20 Chai huashaca Jehová Diosca Moisestaca cashna nishpami mandarca: “Caya tutamantaca utca jatarishpa faraonhuan tupanaman ringui. Paica Nilo jatun yacumanmi ringa. Paitaca cashna ningui: ‘Jehová Diosca caitami nin: “Ñucata adorachun ñuca pueblota llujshichun saqui. 21 Pero ñuca pueblota richun mana saquijpica canmanpish, canta sirvijcunamanpish, cambaj llajta gentecunamanpish, cambaj huasicunamanpishmi tábano chuspicunata* cachasha. Chai chuspicunaca egipciocunapaj huasicunapimi jundanga, paicuna maipi cashca pambacunatapishmi tapanga. 22 Chai punllaca ñuca pueblo causacun Gosén allpamanca mana cachashachu. Chaipica tábano chuspicunaca mana tiyangachu. Chashnami ñuca, Jehová Dios cai llajtapi cashcata canca yachangui. 23 Ñuca pueblotaca mana cambaj pueblota shinallatajchu tratasha. Cayami chaitaca rurasha” ninmi’ ningui” nircami.

24 Jehová Diosca chaitatajmi rurarca. Achca tábano chuspicuna shamushpami faraonpaj huasipi, paita sirvijcunapaj huasipi, tucui Egipto llajtapi jundari callarirca. Chai tábano chuspicunami chai llajtataca llaquichirca. 25 Por finmi faraonca Moisesta, Aaronta cayashpaca: “Richij, cancunapaj Diosman sacrificiocunata cai llajtapi cugrichij” nirca. 26 Pero Moisesca cashnami nirca: “Chaita ruranaca mana allichu. Ñucanchij Jehová Diosman cusha nishca sacrificiocunataca egipciocunaca millanayachincunami. Paicuna millanayachishca sacrificiocunata paicunapaj ñaupajpi rurajpica, ¿manachu ñucanchijtaca rumicunahuan shitashpa huañuchingacuna? 27 Chaimantami chaquishca pambaman quimsa punllacunata purishpa rishun. Chaipimi ñucanchij Jehová Diosmanca pai nishca shinallataj sacrificiocunata cushun” nircami.

28 Shina nijpimi faraonca: “Cancunapaj Jehová Diosman sacrificiocunata cuchunmi chaquishca pambaman richun saquisha. Pero ama yallitaj caruta ringuichijchu. Ñucamantapish paita rogarishpa mañanguichij” nirca. 29 Chaimi Moisesca faraontaca: “Caimanta llujshishpami canmantapish, canta sirvijcunamantapish, cambaj llajta gentecunamantapish tábano chuspicuna caya anchurichun Jehová Diosta mañasha. Pero faraonca ñucanchijtaca ama cutin umachun.* Jehová Diosman sacrificiocunata cungapaj ñucanchij pueblo caimanta llujshichunpish ama jarcachun” nirca. 30 Shina nishca huashami Moisesca faraonpaj ñaupajmanta llujshishpa Jehová Diosta mañarca. 31 Chaimi Jehová Diosca Moisés imata mañashcata rurarca. Chaimantami tábano chuspicunaca faraonmantapish, paita sirvijcunamantapish, paipaj llajta gentecunamantapish anchurirca. Chai llajtapica shuj chuspillapish mana saquirircachu. 32 Shinapish faraonca rumi shungu tucushpami israelitacuna llujshichunca mana saquirca.

9 Chai qꞌuipami Jehová Diosca Moisestaca cashna mandarca: “Faraonmanca caita nigri: ‘Hebreocunapaj Jehová Diosca caitami nin: “Ñucata adorachun* ñuca pueblo llujshichun saqui. 2 Pero paicunata richun mana saquijpi, paicunata jarcashpa catijpica 3 Jehová Diospaj maquimi campopi caj cambaj animalcunata huañuchinga. Caballocunata, burrocunata, camellocunata, vacacunata, ovejacunataca huañuchij ungüimi japinga. 4 Pero Jehová Diosca israelitacunapaj animalcunataca cuidangami. Paicunapaj animalcunaca egipciocunapaj animalcuna shinaca shujllapish mana huañungachu” ninmi’ ningui” nircami. 5 Ashtahuanpish Jehová Diosca chai llaqui ima hora callarinatami huillarca. Paica: “Cayami Jehová Diosca cai llajtapica chaita ruranga” nircami.

6 Cayandij punllaca Jehová Diosca chaitatajmi rurarca. Chaimantami egipciocunapaj tucui laya animalcuna huañui callarirca. Pero israelitacunapaj animalcunaca shujllapish mana huañurcachu. 7 Faraonca paita sirvijcunatami ima tucushcata ricunaman cacharca. Chaipimi paicunaca israelitacunapaj animalcuna shujllapish mana huañushcata ricurcacuna. Chashna jahuapish faraonca rumi shungu tucushpami israelitacuna llujshichunca mana saquirca.

8 Chai qꞌuipami Jehová Diosca Moisesta, Aarontaca cashna nirca: “Hornomanta ushpata ishqui maquihuan japichij. Chai ushpatami Moisesca faraonpaj ñaupajpi huairaman shitana can. 9 Chai ushpami ñutujlla polvo tucushpa tucui Egipto llajtata tapanga. Chai polvomi tucui Egipto llajtapica gentecunapipish, animalcunapipish quiyayashca úlcera ungüi tucunga” nircami.

10 Chaimi paicunaca shuj hornomanta ushpata japishpa faraonpaj ñaupajpi shayarircacuna. Chai qꞌuipami Moisesca ushpataca huairaman shitarca. Chaimi gentecunapipish, animalcunapipish quiyayashca úlcera ungüi llujshirca. 11 Adivinaj sacerdotecunaca Moisespaj ñaupajpica mana ricuri pudircacunachu. Paicunatapish tucui egipciocunata shinallatajmi úlcera ungüi japishca carca. 12 Pero Jehová Diosca faraón cutinllataj rumi shungu tucuchunmi saquirca. Chaimantami faraonca Jehová Dios Moisesman nishca shinallataj paicunataca mana cazurca.

13 Chai qꞌuipami Jehová Diosca Moisestaca cashna nirca: “Cayaca utca jatarishpa faraonhuan tupanaman ringui. Paitaca cashna ningui: ‘Hebreocunapaj Jehová Diosca caitami nin: “Ñucata adorachun ñuca pueblo llujshichun saqui. 14 Cunanca cantapish, canta sirvijcunatapish, cambaj llajta gentecunatapish tucui laya llaquicunahuanmi castigagrini. Chashnami canca tucui allpapi ñuca laya Dios pi mana tiyashcata yachangui. 15 Ñucaca cantapish, cambaj llajta gentecunatapish ñuca maquita chutashpami huañuchij ungüihuan ña castigaiman carcani. Canca allpamantaca ñami chingaringuiman carcangui. 16 Shinapish ñuca poderta ricuchingapaj, tucui muyundij allpapi ñuca shutita rijsichingapajmi cantaca causashpa catichun saquishcani. 17 Pero canca jatun tucushpami catingui. Ñuca pueblo llujshichunpish mana saquinguichu. 18 Cayaca cai hora shinatami achcata runduchisha. Chashna laya rundutaca Egipto llajta tiyai callarishcamanta cunancama pi mana ricushcachu. 19 Chaimanta tucui cambaj animalcunata, campopi tucui can imalla charishcacunata huaquichichun cachai. Mana miticushpa campopi saquirij runapish, animalpish rundu urmajpica huañungacunami” ninmi’ ningui” nircami.

20 Faraonta sirvijcunamanta Jehová Dios ima nishcata tucui cazujcunaca chai ratomi paicunata sirvijcunataca huasiman yaicuchircacuna. Paicunapaj animalcunatapishmi huaquichircacuna. 21 Jehová Dios ima nishcata mana cazujcunaca paicunata sirvijcunatapish, paicunapaj animalcunatapish campopimi saquircacuna.

22 Chaimantaca Jehová Diosca Moisestaca: “Cambaj maquita huichiman chutai. Chashna rurajpimi tucui Egipto llajtapi rundu urmanga. Chai runduca tucui Egipto llajtapimi gentecunapaj jahuapi, animalcunapaj jahuapi, campopi huiñashca plantacuna jahuapi urmanga” nircami. 23 Shina nijpimi Moisesca paipaj varata huichilla chutarca. Jehová Diosca cꞌulun nichishpami runduchirca, ninapishmi* allpamanca urmarca. Jehová Diosca Egipto llajtapica runduchishpami catirca. 24 Runduca yallitajmi urmarca. Chai rundu chaupipipish ninami achijnicurca. Egipto llajta tiyai callarishcamantaca mana nunca chashna rundushcachu carca. 25 Runduca Egipto allpacunapi tucui imalla tiyashcatami tucuchirca. Gentecunatapish, animalcunatapishmi tucuchirca. Shinallataj tucui plantacunata, tucui yuracunatami ñuturca. 26 Israelitacuna causacushca Gosén allpallapimi mana rundurca.

27 Chaimi faraonca Moisesta, Aaronta cayanaman cachashpaca cashna nirca: “Cunanca juchata rurashcatami cuentata cuni. Jehová Diosca cashcata rurajmi. Pero ñucapish, ñuca pueblopish mana allitami rurashcanchij. 28 Cꞌulun nicushcapish, rundupish parachichun Jehová Diosta rogapaichij. Chai qꞌuipami cancunataca richun saquishalla. Caipica ña mana ashtahuan saquiringuichijchu” nircami. 29 Shina nijpimi Moisesca cashna nirca: “Cai llajtamanta llujshishpaca chai ratomi Jehová Diospaj ñaupajpi ñuca maquicunata chutasha. Cai allpa pacha Jehová Diospaj cashcata can yachachunmi cꞌulun nicushcapish, rundupish pararinga. 30 Chashna jahuapish canta sirvijcunapish, canpish Jehová Diosta mana manchana cashcataca ñucaca ñami yachani” nircami.

31 Chai tiempopajca cebadaca ñami quilluyacurca, linopish ñami sisacurca. Chaimantami linopish, cebadapish chingarirca. 32 Pero trigopish, espeltapish* llulluraj cashcamantami mana chingarirca. 33 Moisesca faraón maipi cashca llajtamanta llujshishpaca Jehová Diospaj ñaupajpimi maquicunata chutarca. Chaimi cꞌulun nicushcapish, rundupish pararirca, tamyapish ña mana urmarcachu. 34 Tamyapish, rundupish ña pasajpi, cꞌulun nicushcapish pararijpimi faraonca rumi shungu tucushpa cutinllataj juchata rurarca. Paita sirvijcunapish chashnallatajmi rurarcacuna. 35 Faraonca rumi shungu tucushpami catirca. Chaimi paica Jehová Dios Moisesman nishca shinallataj israelitacuna llujshichunca mana saquirca.

10 Chai qꞌuipami Jehová Diosca Moisestaca cashna nirca: “Faraonpaj ñaupajman ri. Faraonpaj ñaupajpi ñuca señalcunata rurajta ricuchunmi paitapish, paita sirvijcunatapish rumi shungu tucuchun saquishcani. 2 Shinallataj egipciocunata ñuca ima shina castigashcata, paicunapaj chaupipi ñuca ima señalcunata rurashcata cambaj huahuacunaman, cambaj nietocunaman parlachunmi chashna tucuchun saquishcani. Chashnami ñucaca Jehová Dios cashcata cancunaca yachanguichij” nircami.

3 Shina nijpimi Moisespish, Aaronpish faraonpaj ñaupajman rishpaca cashna nircacuna: “Hebreocunapaj Jehová Diosca caitami nin: ‘¿Ima horacamataj ñucataca mana cazunguiyari? Ñucata adorachun* ñuca pueblo llujshichun saqui. 4 Ñuca pueblota jarcashpa catijpica cayaca langostacunatami* cambaj llajtaman cachasha. 5 Chai langostacunami allpataca tucui tapanga. Chaimi pambaca mana ricuringa. Langostacunaca rundumanta saquirishcacunatami micunga. Campopi huiñacuj yuracunatapish tucuimi micunga. 6 Chai langostacunaca cambaj huasicunapi, canta sirvijcunapaj huasicunapi, tucui egipciocunapaj huasicunapimi jundangacuna. Cai llajtapi causai callarishcamanta cai laya langostacunataca cambaj yayacunapish, cambaj abuelocunapish mana ricushcachu cangacuna’ ninmi” nircacunami. Chashna nishpaca paicunaca tigrarishpa faraonpaj ñaupajmanta rircallacunami.

7 Chai qꞌuipami faraonta sirvijcunaca paipaj amotaca: “¿Ima horacamataj cai runaca ñucanchijtaca llaquipi churashpa catingari? Chai gentecunataca paicunapaj Jehová Diosta adoranaman richun saqui. ¿Egipto llajta llaquinai cashcataca manachu ricungui?” nircacuna. 8 Chaimi Moisesta, Aaronta faraonpaj ñaupajman cutin pushamurcacuna. Chaipimi faraonca paicunataca: “Cancunapaj Jehová Diosta adoranaman richij. Pero ¿picunallataj cancunahuanca rigrincuna?” nirca. 9 Chashna nijpimi Moisesca: “Jehová Diospaj shuj fiestata ruragrishcamantaca ñucanchij jovencunandij, ñucanchij mayorcunandij, ñucanchij churicunandij, ñucanchij ushushicunandijmi rishun. Ñucanchij ovejacunata, ñucanchij vacacunatapishmi pushashpa rishun” nirca. 10 Pero faraonca cashnami nirca: “¿Cancunatapish, cancunapaj huahuacunatapish ñuca cachana cashcatachu yuyanguichij? Cancunata cachajpica, ¡Jehová Dios cancunahuan cashcatami yuyanguichij! Cancunaca ima mana allita ruranatami yuyacunguichij. 11 ¡Mana cachashachu! Jehová Diosta adoranamanca cꞌaricunallami ri tucunguichij. Chaitami cancunaca mañarcanguichij” nircami. Chashna nijpica chai ratomi paicunataca faraonpaj ñaupajmanta llujshichishpa cacharcacuna.

12 Jehová Diosca Moisestaca: “Cambaj maquitaca Egipto llajta jahuata chutai. Chashnami tucui llajtaman langostacuna shamushpa verdijlla plantacunatapish, rundumanta saquirishcacunatapish tucui micunga” nircami. 13 Chai ratomi Moisesca Egipto llajta jahuata paipaj varata chutarca. Chaimi Jehová Diosca tucui punlla, tucui tuta inti llujshin ladomanta shamuj huaira chai llajtata pꞌucuchun saquirca. Cayandij tutamantaca inti llujshin ladomanta shamuj huairami langostacunata apamurca. 14 Chai langostacunaca* Egipto llajtata rishpami tucui ladocunapi jundarirca. Yallitaj mancharinami carca. Chashna achca langostacunaca mana nunca tiyashcachu carca, cutinpish manataj tiyangachu. 15 Langostacuna tucui Egipto llajtata tapajpimi chai llajtaca amsayarca. Chai langostacunaca rundumanta saquirishca plantacunata, yuracunapi saquirishca frutacunatami tucui micurca. Egipto llajtapica yuracunapipish, chagracunapipish ima verdijlla mana saquirircachu.

16 Chaimi faraonca chai rato Moisesta, Aaronta cayanaman cachashpaca cashna nirca: “Cancunapaj Jehová Diospaj ñaupajpi, cancunapaj ñaupajpimi juchata rurashcani. 17 Cai cutinllahuan ñuca juchata perdonapaichij. Cai huañuchij castigotapish ñucamanta anchuchichun cancunapaj Jehová Diosta rogapaichij” nircami. 18 Shina nijpimi Moisesca faraonpaj ñaupajmanta llujshishpaca Jehová Diosta rogarishpa mañarca. 19 Chaimi Jehová Diosca huairata shujtaj ladoman cambiashpa inti huashicun ladomanta shamuj sinchi huairata rurarca. Chai huairami langostacunata apashpa Puca mama cuchapi shitarca. Tucui Egipto llajtapica shuj langostallapish mana saquirircachu. 20 Pero Jehová Diosca faraón rumi shungu tucuchunmi saquirca. Chaimi faraonca israelitacuna llujshichunca mana saquirca.

21 Chai qꞌuipami Jehová Diosca Moisestaca: “Egipto llajta amsayachunca cambaj maquita huichiman chutai. Amsaca yallitaj yana cashcamantami maquihuan tupana shina canga” nirca. 22 Chai ratomi Moisesca paipaj maquita huichiman chutarca. Shina rurajpica tucui Egipto llajtami quimsa punllacunata yallitaj amsayarca. 23 Egipciocunaca caishuj chaishuj mana ricui pudircacunachu. Paicuna maipi cashcamantaca quimsa punllacunatami ni pi mana cuyurirca. Pero israelitacuna causashca ladopica achijllami carca. 24 Chaimi faraonca Moisesta cayashpaca: “Jehová Diosta adoranaman richij. Cancunapaj huahuacunatapish pushaichijlla. Pero ovejacuna, vacacunaca caipimi saquiringa” nirca. 25 Shina nijpimi Moisesca cashna nirca: “Canpishmi sacrificiocunata rurangapaj, rupachishca ofrendacunatapish cungapajca animalcunata ñucanchijman cuna cangui.* Chai animalcunatami ñucanchij Jehová Diosman cushun. 26 Ñucanchij animalcunatapishmi pushashpa rishun. Caipica ni shuj animalta* mana saquishunchu. Jehová Diosta adorangapajmi chai animalcunamanta maijancunata cushun. Chaiman chayashpallami maijan animalta Jehová Diosman cuna cashcata yachashun” nircami. 27 Pero Jehová Diosca cutinllatajmi faraón rumi shungu tucuchun saquirca. Chaimi faraonca israelitacuna llujshichunca mana saquirca. 28 Faraonca Moisestaca: “¡Caimanta llujshi! Ñuca ñaupajmanca cutinca ama shamunguichu. Ñuca ñaupajman shamushpaca chai punllallatajmi huañungui” nircami. 29 Chashna nijpimi Moisesca: “Can nishca shinami canga. Cambaj ñaupajmanca cutinca mana shamushachu” nirca.

11 Chai qꞌuipami Jehová Diosca Moisestaca cashna nirca: “Faraontapish, Egipto llajtatapishmi shuj cutinhuan llaquichigrini. Chai huashami faraonca cancuna richun saquinga. Paitajmi cancunataca caimanta llujshichishpa cachanga. 2 Cunanca israelitacunahuan parlai. Tucui cꞌaricunata, tucui huarmicunataca cullquihuan, orohuan rurashca cosascunata paicunapaj vecinocunata mañachun ni” nircami. 3 Jehová Diosca israelitacuna egipciocunapaj ñaupajpi alli ricurichunmi ayudarca. Moisespish tucui Egipto llajtapimi respetashca runa tucushca carca. Paitaca faraonta sirvijcunapish, egipciocunapishmi respetajcuna carca.

4 Moisesca faraontaca cashnami nirca: “Jehová Diosca caitami nin: ‘Chaupi tuta shinatami tucui Egipto llajtata risha. 5 Egipto llajtapica tucui punta* churicunami huañunga. Jatun tiyarinapi tiyacuj faraonpaj punta churimanta callarishpaca cutana rumipi cutaj esclavapaj punta churicamami huañunga. Shinallataj punta huacharishca tucui animalcunami huañunga. 6 Paicuna sinchita caparishpa huacashcaca tucui Egipto llajtapimi uyaringa. Chai shina huacashcaca nunca mana uyarishcachu, cutinpish mana uyaringachu. 7 Pero israelitacunataca shuj allcullapish mana ladrangachu.* Paicunatapish, paicunapaj animalcunatapish mana ladrangachu. Chashnami cancunaca Jehová Dios egipciocunata tratashca shinallataj israelitacunata mana trataj cashcata yachanguichij’ ninmi. 8 Chai qꞌuipami tucui canta sirvijcunaca ñuca maipi cashcaman shamungacuna. Paicunaca ñuca ñaupajpi cungurishpami: ‘Canpish, canta catij tucui gentecunapish caimanta llujshichij’ ningacuna. Chai qꞌuipami ñucaca risha” nircami. Chaita nishca qꞌuipami Moisesca faraonpaj ñaupajmantaca achcata colerashpa llujshishpa rirca.

9 Chai huashami Jehová Diosca Moisestaca: “Faraonca cancunataca mana uyangachu. Egipto llajtapi ashtahuan milagrocunata ñuca rurajta ricuchunmi chashna tucunga” nirca. 10 Moisespish, Aaronpish chai tucui milagrocunatami faraonpaj ñaupajpi rurashcacuna carca. Pero Jehová Diosca faraón rumi shungu tucuchunmi saquirca. Chaimantami faraonca paipaj llajtamanta israelitacuna richunca mana saquirca.

12 Chai qꞌuipami Jehová Diosca Egipto llajtapi Moisestapish, Aarontapish cashna nirca: 2 “Cai quillami huatapaj callari quilla canga. Cai quillami cancunapajca callari quilla canga. 3 Tucui israelitacunapaj ñaupajpi parlashpa paicunataca cashna nichij: ‘Cai quillapaj chunga punllapica cada familiami shuj malta ovejata agllana can. Cada huasipi cajcunami shuj malta ovejata agllana can. 4 Pero malta ovejata tucui micungapaj maijan familiapi ashallacuna cashpaca vecinocunata huasiman cayashpami paicunahuan tandalla micuna can. Mashna gentecuna cashcata ricushpa, cada uno mashnata micugrijta ricushpami oveja aichataca chaupina can. 5 Malta carneroca shuj huatatami charina can. Shinallataj sano animalmi cana can. Malta ovejata cashpa o malta chivota cashpami agllai tucunguichij. 6 Chai animaltaca cai quillapaj 14 punllacamami cuidana canguichij. Chai punllami israelitacunapaj tucui familiacunaca ña tutayacujpi chai animalta huañuchina canguichij. 7 Chai qꞌuipaca chai animalpaj aichata micugrishca huasipimi pungu ishqui lado caspicunapi, pungu umbralpipish asha yahuarta tsirapana* canguichij.

8 Aichataca chai tutallatajmi micuna canguichij. Chai aichataca ninapi cusashpami levadura illaj tandahuan, jayaj verduracunahuan micuna canguichij. 9 Aichataca ashallatapish chahuataca ama micunguichijchu. Yacupi tꞌimbuchishpa yanushcatapish ama micunguichijchu. Ashtahuanpish umandij, chaqui tullucunandij, chunllullicunandij* tucuita ninapi cusaichij. 10 Cayandij tutamantapajca ima aichata ama huaquichinguichij. Caya tutamantapaj sobrajpica ninapimi rupachina canguichij. 11 Cancunaca cinturonta huatarishca, sandaliacunata churarishca, maquipi tauna caspita aisashcami micuna canguichij. Shinallataj utca utcami micuna canguichij. Caica Jehová Diospaj Pascua fiestami. 12 Cai tutaca tucui Egipto llajtata rishpami chaipi causaj gentecunapaj tucui punta churicunata huañuchisha. Shinallataj chaipi tiyaj punta huacharishca animalcunatami huañuchisha. Egiptopi tiyaj tucui dioscunatapishmi juzgashpa castigasha. Ñucaca Jehová Diosmi cani. 13 Yahuarca cancuna maipi cashca huasicunapica shuj señalmi canga. Yahuarta ricushpaca pasashpa rishallami. Egipciocunata castigashpaca cancunataca mana llaquichishachu.

14 Cancunaca cai punllataca Jehová Diospaj shuj fiestata rurashpami yuyarina canguichij. Cancunapaj huahua huahuacunapish huatantami cai fiestataca rurana can. Cai leytaca siempremi pajtachina canguichij. 15 Levadura illaj tandataca canchis punllacunatami micuna canguichij. Pꞌunguillishca masataca primer punllamantami cancunapaj huasimanta llujshichina canguichij. Maijanpish chai canchis punllacunapi imatapish levadurahuan chagrushcata micujca Israel llajtapica huañuchishcami canga. 16 Punta punllaca Diosta adorangapajmi tandanacuna canguichij. Canchis punllapish Diosta adorangapajmi cutin tandanacuna canguichij. Chai punllacunapica ima trabajota mana ruranachu canguichij. Cada uno imata micugrishcallatami preparai tucunguichij.

17 Chai punllami tucui cancunataca Egipto llajtamanta llujshichisha. Chaimantami cancunaca Levadura illaj tandata micuna fiestata rurana canguichij. Cancunapaj huahua huahuacunapish huatantami cai fiestataca rurana can. Cai leytaca siempremi pajtachina canguichij. 18 Punta quillapica levadura illaj tandatami micuna canguichij. 14 punlla chishimanta callarishpaca 21 punlla chishicamami micuna canguichij. 19 Canchis punllacunataca pꞌunguillishca masaca cancunapaj huasipica mana tiyanachu can. Maijanpish shujtaj llajtamanta cashpa o cai llajtallamantataj cashpa imatapish levadurahuan chagrushcata micujca Israel llajtapica huañuchishcami canga. 20 Levadurahuan* rurashcataca imatapish ama micuichijchu. Tucui cancunapaj huasicunapimi levadura illaj tandata micuna canguichij’ nichij” nircami.

21 Chaimi Moisesca chai rato israelitacunata tucui pushajcunata* cayashpaca cashna nirca: “Richij, cada uno shuj malta ovejata o malta chivota cancunapaj familiapaj agllaichij. Chaitaca Pascua fiestata rurangapaj huañuchichij. 22 Chai qꞌuipaca lutsai hisopota* japishpa matepi tandashca yahuarpi pambaichij. Chaihuanca pungu ishqui lado caspicunapi, pungu umbralpipish llihuichij. Huasimantaca cayandij punllacama ni pi mana llujshinachu can. 23 Jehová Diosca egipciocunata castigangapajmi shamunga. Chashna shamushpaca pungu ishqui lado caspicunapi, pungu umbralpipish yahuarta ricushpaca Jehová Diosca pasashpa ringallami. Paica cancunapaj huasipi cajcunataca ni maijanta mana huañuchingachu.

24 Cancunaca cai fiestatami rurana canguichij. Cai leytaca cancunapish, cancunapaj huahuacunapishmi siempre pajtachina canguichij. 25 Jehová Dios cancunaman cushami nishpa jurashca allpaman yaicushpaca cai punlla fiestatami rurashpa catina canguichij. 26 Cancunapaj huahuacuna ‘¿Imamantataj cai fiestataca ruranguichij?’ nishpa tapujpica 27 cancunaca ‘Cai sacrificioca Jehová Diospaj Pascua* fiestata rurangapajmi can. Diosca Egipto llajtapica israelitacunapaj huasicunataca pasashpa rircallami. Paica egipciocunata castigashpaca ñucanchij familiacunataca quishpichircami’ nishpami cutichina canguichij” nircami.

Chaimi israelitacunaca cungurishpa cumurircacuna. 28 Chashnami israelitacunaca Jehová Dios Moisesman, Aaronman mandashca shinallataj rurarcacuna. Paicunaca Dios mandashca shinatajmi rurarcacuna.

29 Ña chaupi tuta cajpimi Jehová Diosca Egipto llajtapica tucui punta churicunata huañuchirca. Jatun tiyarinapi tiyacuj faraonpaj punta churimanta callarishpaca prezupi tiyacuj runapaj punta churicamami huañuchirca. Shinallataj tucui punta huacharishca animalcunatami huañuchirca. 30 Chai tutaca faraonpish, faraonta sirvijcunapish, tucui caishuj egipciocunapishmi jatarircacuna. Tucui huasicunapi huañui tiyashcamantami tucui Egipto llajtapica sinchita caparishpa huacashca uyarirca. 31 Chai tutallatajmi faraonca Moisesta, Aaronta chai rato cayashpaca cashna nirca: “¡Cai rato richij! Cancunapish, caishuj israelitacunapish ñuca pueblomanta caruyaichij. Cancuna nishca shinallataj Jehová Diosta adoranaman richij. 32 Cancuna nishca shinallataj cancunapaj ovejacunatapish, vacacunatapish pushaichij. Shinallataj ñucata bendiciachun Diosta mañaichij” nircami.

33 Chaimi egipciocunaca israelitacunataca chai llajtamanta utca richun mañarcacuna. Paicunaca: “¡Paicuna mana rijpica tucuicunami huañushun!” nishpami yuyarcacuna. 34 Israelitacunaca paicunapaj jahua churanacunapi pilluchishca levadura illaj masatapish, masata rurana bateacunatapish japishpami rigra jahuapi aparircacuna. 35 Shinallataj israelitacunaca Moisés nishcatami rurarcacuna. Paicunaca cullquihuan, orohuan rurashca cosascunata, ropatapishmi egipciocunata mañarcacuna. 36 Jehová Diosca israelitacunataca egipciocunapaj ñaupajpi alli ricurichunmi saquirca. Chaimi paicuna imata mañashcata curcacuna. Israelitacunaca egipciocuna charishca cosascunatami quichurcacuna.

37 Chai qꞌuipaca israelitacunaca Ramesesmanta llujshishpaca Sucot ladomanmi rircacuna. Paicunaca casi 600.000 cꞌaricunami* carca. Shinapish huahuacunataca mana cuentashcacunachu carca. 38 Israelitacunahuanca tucui laya achca gentecunami* rircacuna. Shinallataj israelitacunaca ovejacunata, vacacunata, achca animalcunatami pushashpa rircacuna. 39 Paicunaca Egiptomanta apashca masahuanmi levadura illaj redondo tandata rurarcacuna. Paicunata Egiptomanta rato llujshichishpa cachajpimi micunata preparangapajca tiempota mana charircacuna. Chaimantami tandaca levadura illaj carca.

40 Israelitacunaca Egipto llajtapica 430 huatacunatami causashcacuna carca. 41 Ña 430 huatacuna pajtai punllami Jehová Diospaj puebloca Egipto llajtamanta llujshirca. 42 Jehová Diosca israelitacunataca chai tutami Egipto llajtamanta llujshichirca. Chaimantami israelitacunaca chai tutata yuyarishpa Jehová Diosta jatunyachingapaj shuj fiestata rurana can. Chaitaca paicunapaj huahua huahuacunapishmi huashan huashan rurana can.

43 Chai qꞌuipami Jehová Diosca Moisesta, Aarontaca cashna nirca: “Pascua fiestapaj leyca caimi can. Shujtaj llajtamanta runacunaca Pascua micuitaca ni pi mana micui tucunchu. 44 Maijanpish cullquihuan randishca esclavota charishpaca circuncisiontami rurachina can. Chashna rurajllapimi chai esclavoca Pascua micuita micui tucunga. 45 Caru llajtamanta shamushca runacunapish, cullqui jahua trabajaj runacunapish Pascua micuitaca mana micui tucuncunachu. 46 Malta ovejapaj aichataca shuj huasillapimi micuna can. Chai aichataca ashallatapish huasimantaca mana llujshichinachu can. Shuj tullullatapish mana pꞌaquinachu can. 47 Pascua fiestataca tucui israelitacunami rurana can. 48 Shujtaj llajtamanta runa cancunahuan causacushpa Jehová Diospaj Pascua fiestata rurasha nishpaca paipaj huasipi caj tucui cꞌaricunatami circuncisionta rurachina can. Chashna rurashpallami Pascua fiestataca rurai tucunga. Paica shuj israelita shinallatajmi tucunga. Circuncisionta mana rurachishca runaca Pascua micuitaca mana micui tucungachu. 49 Israelitacunapish, cancunapurapi causacuj shujtaj llajtamanta runapish chai leyllatatajmi pajtachina can” nircami.

50 Israelitacunaca tucuicunami Moisesman, Aaronman Jehová Dios mandashca shinallataj rurarcacuna. Paicunaca Dios imata nishcatami rurarcacuna. 51 Chai punllallatajmi Jehová Diosca Egipto llajtamantaca tucui israelitacunata llujshichirca.

13 Jehová Diosca Moisesmanca caitapishmi nirca: 2 “Israelitacunapaj punta churicunataca ñucapaj chꞌicanyachi. Israelitacunapaj punta churipish, punta huacharishca cꞌari animalpish ñucapajmi can” nircami.

3 Chai qꞌuipaca Moisesca israelitacunamanca cashnami nirca: “Cai punllata yuyaringuichij. Egipto llajtamanta llujshishca punllata yuyaringuichij. Chaipica esclavocunami carcanguichij. Pero Jehová Diosca cai llajtamantami cancunataca paipaj poderyuj maquihuan llujshichirca. Chaimanta levadurahuan chagrushcataca imata ama micunguichijchu. 4 Cancunaca cai punllami llujshinguichij, abib* quillapimi llujshinguichij. 5 Jehová Diosca cananeocunapaj, hititacunapaj, amorreocunapaj, heveocunapaj, jebuseocunapaj allpata cancunaman cuna cashcatami cancunapaj ñaupa yayacunaman jurarca. Chai allpapica achca leche, achca mielmi tiyan. Cancunata chai allpaman pushajpica cai fiestatami cai quillapi rurashpa catina canguichij. 6 Levadura illaj tandataca canchis punllacunatami micuna canguichij. Ña canchis punlla tucujpica Jehová Diosta jatunyachingapajmi shuj fiestata rurana canguichij. 7 Levadura illaj tandataca chai canchis punllacunatami micuna canguichij. Levadurahuan chagrushcataca ama imata charinguichijchu. Tucui cancunapaj llajta ucupica* pꞌunguillishca masaca mana tiyanachu can. 8 Chai punllaca cancunapaj churicunamanca: ‘Caitaca Egipto llajtamanta Jehová Dios ñucanchijta llujshichishcata yuyaringapajmi ruranchij’ ninami canguichij. 9 Cai fiestaca cancunapaj maquipi shuj señal shinami canga. Cancunapaj frentepipish yuyarina señal shinami canga. Jehová Dios Egipto llajtamanta paipaj poderyuj maquihuan cancunata llujshichishcamantami Jehová Diospaj leyca cancunapaj shimipi canga. 10 Cai leytaca agllashca punllapimi cada huata pajtachina canguichij.

11 Jehová Diosca cancunamanpish, cancunapaj ñaupa yayacunamanpishmi cananeocunapaj allpata cusha nishpa jurarca. Cancunata chaiman pushajpica 12 punta* churicunatapish, punta huacharishca cꞌari animalcunatapish Jehová Diospajmi chꞌicanyachina canguichij. Tucui chaicunaca Jehová Diospajmi can. 13 Punta huacharishca burropaj randica shuj ovejata cushpami pagana canguichij. Chai burromanta mana pagashpaca cungata pꞌaquishpami huañuchina canguichij. Cancunapaj tucui punta churicunata quishpichingapajpish paganami canguichij.

14 Shamuj punllacunapi cancunapaj huahuacuna ‘¿Caica imatataj ricuchin?’ nishpa tapujpica paicunamanca cashnami nina canguichij, ‘Jehová Diosmi paipaj poderyuj maquihuan Egipto llajtamanta llujshichirca. Chaipica esclavocunami carcanchij. 15 Faraonca chai llajtamanta ñucanchijcuna llujshichunca mana saquircachu. Chaimi Jehová Diosca gentecunapaj punta churicunatapish, punta huacharishca animalcunatapish Egipto llajtapi huañuchirca. Chaimantami punta huacharishca animalcunataca Jehová Diosman cunchij. Cutin ñucanchij punta churicunata quishpichingapajca paicunamantami paganchij’ ninami canguichij. 16 Jehová Dios Egipto llajtamanta paipaj poderyuj maquihuan ñucanchijta llujshichishcamantami caica cambaj maquipica shuj señal shina canga, cambaj frentepipish huatashca cinta shina canga” nircami.

17 Israelitacuna llujshichun faraón ña saquijpica filisteocunapaj* allpata rina ashtahuan cꞌuchulla cajpipish Diosca mana chai ñanta pusharcachu. Diosca: “Israelitacuna shujtajcunahuan macanacuna cashpa, yuyaita cambiashpa ñataj Egiptoman tigranman” nishpami chashna rurarca. 18 Chaimantami israelitacunataca chaquishca pambata Puca mama cucha ladopi tiyaj ñanta Diosca pusharca. Israelitacunaca Egipto llajtamantaca macanacungapaj allichirishca soldadocuna shinami ordenpi llujshircacuna. 19 Moisesca Josepaj tullucunatami aparca. Joseca Israelpaj churicunatami jurachishca carca. Paica: “Diosca cancunataca ayudangami. Ñuca tullucunataca caimanta apanguichij” nishcami carca. 20 Israelitacunaca Sucotmanta llujshishpaca Ezampi, chaquishca pamba callaripimi carpa huasicunapi saquirircacuna.

21 Jehová Diosmi paicunata ñaupashpa rirca. Punllaca shayacuj jatun pꞌuyuhuanmi ñanta pusharca. Tutaca jatun lunyacuj ninahuanmi achijyachishpa pusharca. Chashnami paicunaca punllapish, tutapish viajai tucurcacuna. 22 Shayacuj jatun pꞌuyuca punllapish paicunamantaca mana caruyarcachu. Jatun lunyacuj ninapish tutaca paicunamantaca mana caruyarcachu.

14 Jehová Diosca Moisestaca cashnami nirca: 2 “Israelitacunataca tigrashpa, Pihahirot chꞌimbapurapi carpa huasicunata shayachishpa saquirichij ni. Chai lugarca Migdolhuan mama cuchahuan chaupipimi saquirin. Chai lugarmantami Baal-Zefontaca ricui tucunguichij. Baal-Zefón chꞌimbapurapi, mama cucha cꞌuchupimi carpa huasicunapi saquirina canguichij. 3 Chai qꞌuipami faraonca israelitacunamantaca: ‘Paicunaca cai llajtapica chingarishcami puricuncuna. Chaquishca pambamantapish mana llujshi tucuncunachu’ ninga. 4 Ñucaca faraón rumi shungu tucuchunmi saquisha. Chaimi paica israelitacunata catishpa ringa. Pero ñucaca faraontapish, paipaj tucui soldadocunatapish mishashpami jatunyarisha. Chashnami egipciocunaca ñucaca Jehová Dios cashcata yachangacuna” nircami. Chaimi israelitacunaca paicunaman nishca shinallataj rurarcacuna.

5 Asha tiempo qꞌuipami Egipto llajtata mandajmanca, israelitacunaca caimantami miticushpa rishcacuna nishpa huillarcacuna. Chaimi chai rato faraonpish, paita sirvijcunapish richun saquishcamanta arrepintirircacuna. Paicunaca: “¿Imatataj rurashcanchijyari? ¿Ñucanchij esclavo israelitacunataca imamantataj cacharircanchijyari?” nircacunami. 6 Shina nijpimi faraonca paipaj macanacuna carretacunata allichichun cacharca. Paipaj soldadocunatapish paihuanmi pusharca. 7 Paipaj 600 ashtahuan alli carretacunatapishmi aparca. Shinallataj Egipto llajtamanta shujtaj carretacunatapish tucuitami aparca. Soldadocunapish cada carretapimi rircacuna. 8 Jehová Diosca Egipto llajtata mandaj faraón rumi shungu tucuchunmi saquirca. Chaimantami faraonca israelitacunata catishpa rirca. Chaicamaca israelitacunaca imata mana manchashpami* chai llajtamanta llujshicurcacuna. 9 Israelitacuna mama cucha cꞌuchupi cajpi, Pihahirot ladopi cajpi, Baal-Zefón chꞌimbapurapi cajpimi faraonca paipaj caballocunandij, paipaj carretacunandij, paipaj caballocunapi purijcunandij, paipaj soldadocunandij israelitacunata cati rishpa paicunapajman cꞌuchuyacurcacuna.

10 Faraón ashtahuan cꞌuchuyacujpimi israelitacuna huichilla ricushpaca egipciocuna paicunata caticushcata ricurcacuna. Israelitacunaca achcatami mancharircacuna. Chaimantami paicunata ayudachun Jehová Diosta caparishpa mañai callarircacuna. 11 Paicunaca Moisestaca cashnami nircacuna: “¿Egipto llajtapi ñucanchijta maipi pambana mana tiyajpichu cai chaquishca pambapi huañuchun pushamushcangui? ¿Imatataj rurashcanguiyari? ¿Imamantataj ñucanchijtaca Egiptomanta llujshichimushcanguiyari? 12 ¿Manachu Egiptopi cashparaj chaitaca nircanchij? ¿Manachu cantaca: ‘Tranquilo causachun saqui. Egipciocunata sirvishpa catichun saqui’ nircanchij? Chaquishca pambapi huañunapaj randica egipciocunata sirvinami alli canman” nircacunami. 13 Pero Moisesca israelitacunataca cashnami nirca: “Ama manchaichijchu. Tranquilo shuyaichijlla. Jehová Dios cancunata cunan ima shina quishpichijtami ricunguichij. Cunan ricushca chai egipciocunataca cutinca mana nunca ricunguichijchu. 14 Jehová Diosllatajmi cancunamantaca macanacunga. Cancunaca tranquilo* shuyanguichijllami” nircami.

15 Chai qꞌuipami Jehová Diosca Moisestaca cashna nirca: “¿Imamantataj ayudachun nishpa ñucataca caparishpa mañacunguilla? Israelitacunataca carpa huasicunata pascaichij ni. 16 Canca mama cucha yacu ishquipi chaupirichun chai yacu jahuata cambaj varata chutai. Chashnami israelitacunaca mama cucha chaupitaca chaquishca allpata pasai tucungacuna. 17 Ñucaca egipciocuna rumi shungu tucuchunmi saquisha. Israelitacunata catishpa yacuman yaicuchunpishmi saquisha. Faraontapish, paipaj soldadocunatapish, paipaj macanacuna carretacunatapish, paipaj caballocunapi purijcunatapish mishashpami jatunyarisha. 18 Egipciocunaca faraontapish, paipaj macanacuna carretacunatapish, paipaj caballocunapi purijcunatapish mishashpa jatunyarijpimi ñucaca Jehová Dios cashcata yachangacuna” nircami.

19 Chai qꞌuipami Dios cachashca angelca israelitacunata ñaupashpa ricushcamantaca paicunapaj huashaman tucurca. Shinallataj paicunapaj ñaupajpi caj shayacuj jatun pꞌuyupish paicunapaj huashaman rishpami chaipi saquirirca. 20 Chashnami shayacuj jatun pꞌuyuca egipciocunapaj, israelitacunapaj chaupipi saquirirca. Chai pꞌuyuca egipciocunapaj ladotaca amsayachicurcami. Cutin israelitacunapaj ladotaca achijyachicurcami. Chaimantami egipciocunaca israelitacunapajmanca tucui tuta mana cꞌuchuyai tucurcacuna.

21 Chai qꞌuipami Moisesca paipaj maquitaca mama cucha jahuata chutarca. Chaimi Jehová Diosca inti llujshin ladomanta shamuj sinchi huaira tucui tuta mama cuchata pascachun saquirca. Yacucuna ishquipi chaupirijpimi ucu pambaca chaquishca saquirirca. 22 Chashnami israelitacunaca mama cucha chaupitaca chaquishca allpata pasarcacuna. Yacucunaca alli ladomanpish, lluqui ladomanpish pircacuna shinami tucurca. 23 Egipciocunaca israelitacunatami catishpa rircacuna. Faraonpaj tucui caballocunapish, macanacuna carretacunapish,* caballopi purijcunapishmi paicunata catishpa mama cuchaman yaicurcacuna. 24 Ña pacaricuitami* Jehová Diosca jatun lunyacuj nina pꞌuyu chaupimanta egipciocunata ricurca. Egipciocunaca achcatami mancharircacuna. 25 Shinallataj egipciocuna carretacunata ama purichi tucuchunmi carretacunamanta ruedacuna llujshichun saquirca. Egipciocunaca: “¡Israelitacunamanta caruyashpa jacuchij. Jehová Diosmi paicunamantaca egipciocunahuan macanacucun!” nircacunami.

26 Chai qꞌuipami Jehová Diosca Moisestaca: “Egipciocunata, paicunapaj macanacuna carretacunata, caballopi purijcunatapish yacucuna tapachunca cambaj maquita mama cucha jahuata chutai” nirca. 27 Chai ratomi Moisesca paipaj maquita mama cucha jahuata chutarca. Chaimi ña pacaricuitaca yacucunaca chaillamantaj tigrarca. Egipciocunaca quishpirisha nishpami callparcacuna. Pero Jehová Diosca paicunataca mama cucha chaupipimi shitarca. 28 Yacucuna chaillamantaj tigrashpaca macanacuna carretacunata, caballocunapi purijcunata, faraonpaj tucui soldadocunatami taparca. Paicunaca israelitacunata catishpami mama cuchaman yaicushcacuna carca. Paicunamantaca shujllapish mana quishpirircachu.

29 Cutin israelitacunaca mama cucha ucu pambataca chaquishca allpata purishpami pasarcacuna. Yacucunaca paicunapaj alli ladomanpish, lluqui ladomanpish pircacuna shinami carca. 30 Chashnami chai punllaca Jehová Diosca egipciocunapaj maquimanta israelitacunata quishpichirca. Israelitacunaca egipciocunapaj huañushca cuerpocunataca mama cucha uripi siricujtami ricurcacuna. 31 Shinallataj israelitacunaca Jehová Dios paipaj jatun poderhuan* egipciocunata llaquichishcatami ricurcacuna. Chaimantami israelitacunaca Jehová Diosta manchai callarircacuna. Jehová Diospipish, paita sirvij Moisespipishmi feta churarcacuna.

15 Chai punllaca Moisespish, israelitacunapish Jehová Diosta alabangapajmi cai cantota cantarcacuna:

“Jatun macanacuita mishashcamantami Jehová Diosta cantasha.

Caballotapish, caballopi purijtapish mama cuchapimi shitarca.

 2 Jah-mi* ñuca fuerza, ñuca poder. Paica ñucata quishpichijmi.

Paica ñuca Diosmari, paitami ñucaca alabasha. Paica ñuca yayapaj Diosmari. Paitami ñucaca jatunyachisha.

 3 Jehová Diosca sinchi macanacujmi. Paica Jehová shutimi.

 4 Faraonpaj* carretacunatapish, paipaj soldadocunatapish mama cuchapimi shitarca.

Faraonpaj alli macanacuj soldadocunaca Puca mama cuchapimi pambarirca.

 5 Paicunataca caiman chaiman cuyuricuj yacumi taparca. Paicunaca shuj rumi shinami yacu ucujman urmarcacuna.

 6 Jehová Dioslla, cambaj alli lado maquica achca poderyujmi.

Jehová Dioslla, cambaj alli maquica contracunata ñutunllami.

 7 Canca jatun cashcamantami cambaj contracunataca urmachingui.

Can pꞌiñarishcaca nina shina cajpimi paicunaca ujsha shina rupan.

 8 Cambaj singa samaillahuanmi yacucunaca jatarirca.

Mana maiman cuyurishpami pirca shina saquirirca.

Cuyuricuj yacucunaca mama cucha chaupipimi cuajarirca.

 9 Ñucanchijta pꞌiñajca: ‘¡Paicunataca catishpami risha! ¡Paicunataca cati japishami!

¡Ñuca munashcatami tucui quichusha!

¡Ñuca espadahuanmi huañuchisha!’ nircami.

10 Cambaj samaihuan pꞌucujpimi mama cuchaca paicunata taparca.

Caiman chaiman cuyuricuj yacupimi paicunaca plomo shina pambarirca.

11 ¿Jehová Dioslla, dioscunapaj chaupipica can shinaca pitaj tiyanyari?

¿Can shina yallitaj jucha illaj cashcata ricuchijca pitaj tiyanyari?

Canllatami manchana canchij, cantaca cantocunahuanmi alabana canchij, canca mancharina ruraicunatami* rurangui.

12 Cambaj alli lado maquita chutajpimi allpaca paicunata millpurca.

13 Can quishpichishca pueblotaca cambaj mana tucurij cꞌuyaihuanmi pushashcangui.

Cambaj fuerzahuanmi can causana chꞌicanyachishca* lugarman pushangui.

14 Pueblocunaca chaicunatami uyanga. Paicunaca chujchungacunami.

Filisteapi causajcunaca yallitajmi sustaringacuna.

15 Chai punllaca Edom llajtata pushajcunaca achca manchaihuanmi cangacuna.

Moab llajtamanta poderta charij mandajcunaca chujchungacunami.

Canaán llajtapi tucui causajcunami manchaihuan cangacuna.

16 Paicunaca manchaihuan, chujchuihuanmi cangacuna.

Cambaj poderyuj rigramantami paicunaca shuj rumi shina mana cuyuringacuna.

Jehová Dioslla, cambaj pueblo pasangacamami chashna saquiringacuna.

Can agllashca pueblo pasangacamami chashna saquiringacuna.

17 Cambaj pueblota pushamushpami cambaj urcupi churangui.

Jehová Dioslla, can allichishca huasimanmi paicunataca pushamungui.

Jehová Dioslla, cambaj maquihuan shayachishca huasimanmi pushamungui.

18 Jehová Diosca huiñai huiñaitami mandanga.

Pero israelitacunaca mama cucha chaupitami chaquishca allpata purircacuna”.

20 Chaimi Aaronpaj pani profeta Miriamca panderetata japishpa tocarca. Tucui huarmicunapish panderetacunapi tocashpa, bailashpami paita catishpa llujshircacuna. 21 Miriamca cꞌaricuna cantajpica:

“Jatun macanacuita mishashcamanta Jehová Diosta cantaichij.

Caballotapish, caballopi purijtapish mama cuchapimi shitarca” nishpami cutichirca.

22 Chai qꞌuipami Moisesca israelitacunataca Puca mama cuchamanta pushashpa rirca. Paicunaca Sur chaquishca pambaman rishpaca quimsa punllacunatami chaquishca pambata purircacuna. Chaipica yacuta mana japircacunachu. 23 Chaimantaca Mará* nishcamanmi chayarcacuna. Pero Marapi tiyaj yacutaca jayaj cajpimi mana ubyai tucurcacuna. Chaimantami paica chai lugartaca Mará nishpa shutichirca. 24 Chaimi israelitacunaca Moisespaj ñaupajpi quejari callarircacuna. Paicunaca: “¿Imatataj ubyashun?” nircacunami. 25 Moisesca Jehová Diostami ayudachun mañarca. Chaimi Jehová Diosca paimanca shuj yurata ricuchirca. Chai yuratami Moisesca yacupi shitarca. Chaimantami yacuca mishqui tucurca.

Chaipimi Diosca paicunamanca shuj leyta curca. Shinallataj paicuna imata rurana cashcatami ricuchirca. Chaipimi paicunataca pruebapi churarca. 26 Paicunataca: “Cancunapaj Jehová Dios rimashca shimicunata alli uyajpi, ñuca ñaupajpi allita rurajpi, ñuca mandashcacunata alli uyajpi, tucui ñuca leycunata cazujpica egipciocunaman cachashca ungüicunataca cancunamanca mana cachashachu. Ñuca, Jehová Diosmi cancunataca alliyachicuni” nircami.

27 Chai qꞌuipaca israelitacunaca Elim nishcamanmi chayarcacuna. Chaipica 12 pugyu yacucuna, 70 palmeracunami tiyarca. Chaipimi paicunaca yacu cꞌuchupi, carpa huasicunapi saquirircacuna.

16 Chai qꞌuipaca tucui israelitacunaca Elimmantami rircacuna. Tiempohuanca Elimhuan, Sinaihuan* chaupipi saquirij Sin nishca chaquishca pambamanmi chayarcacuna. Paicunaca Egipto llajtamanta llujshishca ishqui quillapaj 15 punllapimi chayarcacuna.

2 Chai chaquishca pambapimi tucui israelitacunaca Moisesmanta, Aaronmanta quejari callarircacuna. 3 Israelitacunaca paicunataca: “¡Egipto llajtapi Jehová Diospaj maquipi huañunami alli canman carca! Chaipica mangacuna junda aichata micungapajmi tiyarij carcanchij. Tandatapish huijsa jundatami micuj carcanchij. Pero cancunaca cai chaquishca pambapi tucuicuna yaricaihuan huañuchunmi pushamushcanguichij” nircacunami.

4 Chaimi Jehová Diosca Moisestaca cashna nirca: “Jahua cielomantami tamyata shina tandata cachagrini. Chaimi tucuicuna canllaman llujshishpa paicuna minishtishcata cada punlla japina can. Ñucaca paicuna ñuca leyta cazujta o mana cazujta ricungapajmi pruebapi churasha. 5 Pero sexto punllapica ishqui punllapaj tandashcatami preparana can” nircami.

6 Chai qꞌuipaca Moisespish, Aaronpish tucui israelitacunatami cashna nircacuna: “Egipto llajtamanta Jehová Dios cancunata llujshichishcataca chishi ladomi yachaj chayanguichij. 7 Cayandij tutamantaca Jehová Dios cancuna quejarishcata uyashcamantami Jehová Diospaj jatun poderta ricunguichij. ¿Ñucanchijmanta cancuna quejarichunca ñucanchijca pitaj canchijyari?” nircacunami. 8 Moisesca cashnapishmi nirca: “Jehová Diosca huijsa pajtata micuchunmi cancunamanca chishi ladoca aichata, tutamanta ladoca tandata cunga. Chaipimi cancuna quejarishcata Jehová Dios uyashcata cuentata cunguichij. ¿Ñucanchijca pitaj canchijyari? Cancunaca mana ñucanchij contrachu quejaricunguichij. Ashtahuanpish Jehová Diospaj contrami quejaricunguichij” nircami.

9 Chai qꞌuipami Moisesca Aarontaca: “Tucui israelitacunataca: ‘Jehová Diospaj ñaupajman shamuichij. Paica cancuna quejarishcatami uyashca’ ni” nirca. 10 Aarón tucui israelitacunahuan parlashca qꞌuipallami paicunaca tigrarishpa chaquishca pambata ricui callarircacuna. Chaipimi paicunaca Jehová Diospaj sumaj achijnicujta pꞌuyupi ricurcacuna.

11 Jehová Diosca Moisesmanca caitapishmi nirca: 12 “Israelitacuna quejarishcataca uyashcanimi. Paicunamanca: ‘Tutayaitaca aichatami micunguichij. Cutin tutamanta ladoca tandatami huijsa pajtata micunguichij. Chashnami ñucaca cancunapaj Jehová Dios cashcata yachanguichij’ ni” nircami.

13 Chai chishica achca codorniz pajarocuna shamushpami carpa huasicuna muyundijpi jundarca. Cutin tutamanta ladoca carpa huasi muyundijpimi shulla tamya urmashca carca. 14 Shulla tamya ña chaquirijpica pambataca rasu shina uchilla granocunami taparca. 15 Israelitacuna chaita ricushpa, ima cashcata mana yachashpaca caishuj chaishuj tapunacushpami: “¿Chaica imatajyari?” nircacuna. Chashna nijpimi Moisesca cashna nirca: “Caica cancuna micuchun Jehová Dios cushca tandami. 16 Jehová Diosca: ‘Cada uno micuna pajtata tandachun. Cancunapaj carpa huasipi causajcunapajca cada unopaj shuj omerta* japichun’ nishpami mandashca” nircami. 17 Israelitacunaca chaitami rurarcacuna. Maijancunaca achcatami japircacuna, shujtajcunaca ashallatami japircacuna. 18 Omerhuan midijpica achcata tandajpish mana yallitaj charircachu, ashallata tandajpish mana menosta charircachu. Cada unomi micuna pajtata tandarcacuna.

19 Chai qꞌuipami Moisesca: “Caya tutamantapajca maijanpish ama imata sobrachinguichijchu” nirca. 20 Shinapish Moisestaca mana cazurcacunachu. Maijancuna cayandij tutamantacama ashallatapish saquijpica cꞌurucuna jundashpami ashnai callarirca. Chaimi Moisesca paicunahuan pꞌiñarirca. 21 Tucui tutamantacunami cada uno micui pudishcata tandajcuna carca. Pero ña inti cunujyachijpica saquirishcacunaca yacuyajllami carca.

22 Sexto punllapica ishqui punllapaj micunata japina cashcamantami paicunaca ishqui omerta cada unopaj tandarcacuna. Chaimantami israelitacunata pushajcuna shamushpaca Moisesman tucuita huillarcacuna. 23 Chaimi Moisesca paicunamanca: “Jehová Diosca caitami nin. Cayaca samarina jatun punllami canga. Jehová Diospajlla chꞌicanyachishca sábado punllami canga. Chaimanta imata cusana cashcataca cusaichij. Imata tꞌimbuchina cashcataca tꞌimbuchichij. Ima sobrajpica cayandij punllacama huaquichichij” nirca. 24 Chashna nijpimi paicunaca Moisés mandashca shina cayandij punllapaj huaquichircacuna. Chai micunapica cꞌurucunaca mana llujshircachu, micunaca mana ashnajyarcachu. 25 Chaimantaca Moisesca cashnami nirca: “Cancunaca cunan punlla micuichij. Cai punllaca Jehová Diospaj chꞌicanyachishca sábado punllami can. Cai punllaca micunataca mana pambapi japinguichijchu. 26 Sujta* punllacunatami tandai tucunguichij. Pero séptimo punllapi, sábado punllapica mana imata japinguichijchu” nircami. 27 Chashna jahuapish huaquincunaca séptimo punllapica micunatami tandanaman rircacuna. Pero mana imata japircacunachu.

28 Chaimi Jehová Diosca Moisestaca cashna nirca: “¿Cancunaca ima horacamataj ñuca mandamientocunata, ñuca leycunataca mana cazusha ninguichij? 29 Ñuca, Jehová Dios cancunaman sábado punllata cushcataca ama cungaringuichijchu. Chaimantami sexto punllapica cancunamanca micunataca ishqui punllapaj cuni. Pero séptimo punllapica cancuna maipi cashcapimi saquirina canguichij. Chaimantaca ni maijan mana llujshinachu canguichij” nircami. 30 Chaimi israelitacunaca séptimo punllapica samarircacuna.

31 Israelitacunaca chai tandataca maná nishpami shutichircacuna. Chaica culantro* muyu shinami yurajlla carca, mielhuan rurashca galletas shinami carca. 32 Chai qꞌuipaca Moisesca: “Jehová Diosca: ‘Cancunata Egipto llajtamanta llujshichishpami chaquishca pambapi cajpica maná shuti micunata cararcani. Chaimanta shuj omer maná shuti micunata japishpa cancunapaj huahua huahuacuna ricuchun huaquichichij’ nishpami mandan” nircami. 33 Chaimi Moisesca Aarontaca: “Shuj jarrata japishpa shuj omer maná shuti micunata jundachi. Chaitaca Jehová Diospaj ñaupajpi churai. Chaitami cancunapaj huahua huahuacunaca huatanta ricungacuna” nirca. 34 Chashnami Aaronca Jehová Dios Moisesman mandashca shina chai jarrataca Leyta huaquichina arca* ñaupajpi churashpa huaquichirca. 35 Israelitacunaca gentecuna tiyan llajtaman chayangacamami maná* shuti micunataca 40 huatacunata micurcacuna. Paicunaca Canaán allpa linderocunaman chayangacamami maná shuti micunata micurcacuna. 36 Chunga omerca shuj efatami* charin.

17 Israelitacunaca tucuicunami Sin nishca chaquishca pambamanta llujshishpa rircacuna. Paicunaca Jehová Dios mandashca shinami asha asha samarishpa viajarcacuna. Chaimantaca Refidimman chayashpami carpa huasicunapi saquirircacuna. Pero chaipica paicuna ubyachunca yacuca mana tiyarcachu.

2 Chaimi israelitacunaca Moiseshuan pꞌiñanacushpaca: “¡Ubyangapaj ñucanchijman yacuta cui!” nircacuna. Shinapish Moisesca paicunamanca: “¿Imamantataj ñucahuanca pꞌiñanacunguichij? ¿Imamantataj Jehová Diostaca pruebapi churashpa* catinguichij?” nircami. 3 Pero israelitacunaca yacunaihuanmi carcacuna. Chaimantami Moisesmanta quejarishpa catircacuna. Paicunaca: “¿Imamantataj ñucanchijtaca Egiptomanta llujshichircangui? ¿Ñucanchijtapish, ñucanchij huahuacunatapish, ñucanchij animalcunatapish yacunaihuan huañuchingapajchu llujshichircangui?” nircacunami. 4 Chaimi Moisesca Jehová Dios ayudachun rogarishpa mañarca. Paica: “¿Cai pueblohuanca imatataj rurashayari? ¡Ñucataca ñallamari rumihuan shitagrincuna!” nircami.

5 Chashna nijpimi Jehová Diosca Moisestaca cashna nirca: “Israelitacunata pushaj* huaquin runacunahuan tucuicunata ñaupashpa ri. Nilo jatun yacuta huajtashca varatapish apashpa ri. Chaitaca cambaj maquipi apashpa ñaupai. 6 Ñucaca Horebpimi casha. Cambaj ñaupajpimi jatun rumi jahuapi casha. Canca chai jatun rumitami huajtana cangui. Chaimi israelitacuna ubyachun chaimanta yacu llujshinga” nircami. Shina nijpimi Moisesca israelitacunata pushajcunapaj ñaupajpi chaita rurarca. 7 Chaimi Moisesca israelitacuna paihuan pꞌiñanacushcamanta chai lugartaca Masá* nishpa, Meribá* nishpapish shutichirca. Israelitacunaca: “¿Jehová Diosca ñucanchijpurapichu o mana?” nishpami Jehová Diostaca pruebapi churashcacuna carca.

8 Chai qꞌuipaca amalequitacunaca israelitacunahuan macanacungapajmi Refidimman rircacuna. 9 Chaimi Moisesca Josuetaca: “Ñucanchijpuramanta huaquin runacunata agllashpa amalequitacunahuan macanacunaman llujshi. Ñucaca cayami Diospaj varata maquipi apashpa loma puntaman llujshishpa chaipi casha” nirca. 10 Chaimi Josueca Moisés nishcata rurashpa amalequitacunahuan macanacunaman rirca. Cutin Moisés, Aarón, Hur runapish loma puntamanmi llujshircacuna.

11 Moisés maquicunata alzashpa charijpica israelitacunami misharcacuna. Pero Moisés maquicunata uriyachijpica amalequitacunami misharcacuna. 12 Moisespaj maquicuna llashajpica pai tiyarichunmi shuj rumita churarcacuna. Chaimi Moisesca chaipi tiyarirca. Cutin Aaronpish, Hurpish Moisespaj cada ladoman shayarishpami paipaj maquicunata charircacuna. Chaimi Moisesca inti huashicungacama maquicunata alzashpa charirca. 13 Chashnami Josueca amalequitacunataca espadahuan misharca.

14 Chaimi Jehová Diosca Moisestaca: “Caitaca yuyaringapaj shuj libropi quillcai. Shinallataj Josuemanca cutin cutin: ‘Amalequitacunataca tucui allpamantami chingachisha. Paicunataca pi mana yuyaringachu’ ni” nirca. 15 Chai qꞌuipaca Moisesca shuj altarta rurashpami chai altartaca Jehová-Nisí* nishpa shutichirca. 16 Paica: “Jah* Diospaj jatun tiyarinapaj contra maquita alzashcamantami Jehová Diosca amalequitacunahuan, paicunapaj huahua huahuacunahuanpish macanacuipi canga” nircami.

18 Moisespaj suegro Jetroca Madianmanta sacerdotemi carca. Paica Moisestapish, paipaj pueblo Israeltapish Dios ima shina ayudashcatami yachaj chayarca. Paica israelitacunata Jehová Dios Egiptomanta ima shina llujshichishcatami yachaj chayarca. 2 Moisesca paipaj huarmi Ziporataca paipaj suegro Jetropaj huasimanmi tigrachishpa cachashca carca. Chaimi Jetroca Ziporata cuidarca. 3 Shinallataj Ziporapaj ishqui churicunatami cuidarca. Moisesca shuj churitaca Guersom* shutitami churarca. Paica: “Cai llajtapica shujtaj llajtamanta shamushca runa shinami tucushcani” nishpami chai shutita churarca. 4 Caishuj churitaca Eliezer* shutitami churarca. Paica: “Ñuca yayapaj Diosca ñucata ayudajmi. Paimi ñucataca faraón espadahuan ama huañuchichun quishpichirca” nishpami chai shutita churarca.

5 Moisespaj suegro Jetroca Moisespaj ishqui churicunata pushashpa, Moisespaj huarmita pushashpami chaquishca pambapi paihuan tupanaman rirca. Moisesca chaquishca pambapimi Diospaj urcu cꞌuchullapi carpa huasita shayachishpa chaipi saquirishca carca. 6 Chaimi Jetroca: “Ñuca, cambaj suegromi cambaj huarmindij, cambaj ishqui churicunandij canta ricunaman shamucuni” nishpa Moisesman huillanaman cacharca. 7 Chaimi Moisesca paipaj suegrohuan tupangapaj chai rato llujshirca. Paica cumurishpa, muchashpami saludarca. Shinallataj caishuj chaishujmi ima shina cashcata tapunacurca. Chai qꞌuipami paicunaca carpa huasiman yaicurcacuna.

8 Moisesca paipaj suegro Jetromanca Jehová Dios israelitacunata ayudangapaj faraontapish, egipciocunatapish imata rurashcatami parlarca. Shinallataj viajepi paicuna charishca tucui problemacunata, chaicunamanta Jehová Dios ima shina quishpichishcatami parlarca. 9 Jetroca Jehová Dios israelitacunata Egipto llajtamanta llujshichishpa imalla allicunata rurashcata uyashpami cushicurca. 10 Chaimi Jetroca cashna nirca: “Israelitacunata egipciocunamantapish, faraonmantapish quishpichishcamantaca Jehová Diosca alabashca cachun. Paica israelitacunataca egipciocunapaj maquimantami quishpichishca. 11 Cunanmi Jehová Diosca shujtaj dioscunatapish yalli ashtahuan poderta charij cashcata yachani. Jatun tucushpa llaquichijcunamanta paipaj pueblota quishpichishcamantami chaitaca yachani” nircami. 12 Moisespaj suegro Jetroca Diosman cungapajmi rupachishca ofrendatapish, shujtaj ofrendacunatapish aparca. Cutin Aaronhuan, israelitacunata tucui pushajcunahuanca* Diospaj ñaupajpi Moisespaj suegrohuan micungapajmi rircacuna.

13 Cayandij punllaca Moisesca ima shina ruraj cashca shinallatajmi israelitacunata juzgangapaj tiyarirca. Israelitacunaca tutamanta ladomantaca chishicamami Moisespajman rijcuna carca. 14 Jetroca Moisés israelitacunamanta imallata ruracujta ricushpami: “¿Israelitacunahuanca imatataj ruracungui? ¿Caipica imamantataj canlla tiyaringui? ¿Imamantataj gentecunaca tutamanta ladomanta chishicama cambajman shamuncuna?” nishpa tapurca. 15 Chaimi Moisesca paipaj suegromanca cashna nirca: “Israelitacunaca Diospaj ayudata mashcangapajmi ñucapajman shamuncuna. 16 Ishquindijpura shuj problemata charishpaca ñucapajman shamushpami huillancuna. Chaitami ñucaca juzgana cani. Shinallataj paicunamanca Dios imata nishcata, paipaj leycunatapishmi huillana cani” nircami.

17 Pero Moisespaj suegroca cashnami nirca: “Chashna ruranaca mana allichu. 18 Canpish, canhuan caj gentecunapish yallitajmi shaicuringuichij. Caita ruranaca cambajca yallitaj sinchimi. Mana tucuita can solo rurai tucunguichu. 19 Uyahuai, cai consejotami cugrini. Diosca canhuanmi canga. Canca Diospaj ñaupajpimi israelitacunapaj randi parlangui. Paicunapaj problemacunataca Diosmanmi huillana cangui. 20 Paicunamanca mandashcacunata, leycunatami yachachina cangui. Shinallataj ima shina causanata, imata rurana cashcatami yachachina cangui. 21 Pero israelitacunapuramantaca yachaj, Diosta manchaj, confiaipaj, mana allita rurashpa imata japinata mana munaj runacunatami agllana cangui. Paicunataca israelitacunata mandachunmi 1.000 gentecunata pushaj cachun, 100 gentecunata pushaj cachun, 50 gentecunata pushaj cachun, 10 gentecunata pushaj cachun churana cangui. 22 Paicunami gentecuna paicunapaj problemacunata huillajpica juzgangacuna. Jatun problemacuna cajpica canmanmi huillangacuna. Pero uchilla problemacuna cajpica paicunallatajmi juzgangacuna. Paicuna chashna ayudajpimi cambajca ashtahuan jahualla canga. 23 Ñuca nishcata rurashpa, Diospish chashna mandajpica canca mana shaicuringuichu. Gentecunapish tucuicunami paicunapaj huasicunamanca tranquilo ringacuna” nircami.

24 Chai ratomi Moisesca paipaj suegro cushca consejota uyashpa pai tucui imalla nishcata rurarca. 25 Tucui israelitacunapuramanta yachaj runacunata agllashpami paicunata pushajcuna cachun churarca. Paicunataca 1.000 gentecunata pushaj cachun, 100 gentecunata pushaj cachun, 50 gentecunata pushaj cachun, 10 gentecunata pushaj cachunmi churarca. 26 Gentecuna paicunapaj problemacunata huillajpica paicunami juzgajcuna carca. Jatun problemacuna cajpica Moisesmanmi huillajcuna carca. Pero uchilla problemacuna cajpica paicunallatajmi juzgajcuna carca. 27 Chaicuna pasashca qꞌuipami Moisesca paipaj suegrotaca minchacama nirca. Chaimi Jetroca paipaj llajtaman tigrarca.

19 Israelitacunaca Egipto llajtamanta llujshishca huashami tercer quillapi Sinaí chaquishca pambaman chai punllallataj* chayarcacuna. 2 Paicunaca Refidimmanta llujshishpaca Sinaí chaquishca pambamanmi chayarcacuna. Chaipimi urcu chꞌimbapurapi carpa huasicunapi saquirircacuna.

3 Chai qꞌuipami Moisesca Diospaj ñaupajpi ricuringapaj huichiyarca. Chaimi Jehová Diosca urcumanta cayashpa cashna nirca: “Jacobpaj huahua huahuacunamanca caitami nina cangui, israelitacunamanca caitami intindichina cangui: 4 ‘Egipciocunata imata rurashcataca cancunapaj propio ñahuicunahuanmi ricushcanguichij. Cancunataca aguilacunapaj alas jahuapi churashpa ñucapajman pushamungapajmi chashna rurarcani. 5 Ñuca nishcata tucuipi cazushpa, ñucahuan ari ninacushcata pajtachishpaca ñucapajca tucui caishuj pueblocunamanta yalli valishca pueblomi tucunguichij. Tucui allpami ñucapaj can. 6 Cancunaca ñucapajca reycuna shina mandaj sacerdotecuna, shuj jucha illaj* llajtami tucunguichij’. Tucui caicunatami israelitacunamanca nina cangui” nircami.

7 Chaimi Moisesca urcumanta uriyashpa israelitacunata pushajcunata* tandachishpaca Jehová Dios tucui imalla mandashcata huillarca. 8 Chai qꞌuipami tucui israelitacunaca: “Ñucanchijca Jehová Dios tucui imalla nishcatami pajtachishun” nircacuna. Shina nijpimi Moisesca chai rato israelitacuna imata nishcata Jehová Diosman huillanaman rirca. 9 Chaimi Jehová Diosca Moisestaca: “Ricui, cambajmanca shuj amsa pꞌuyupimi shamusha. Canhuan ñuca parlajta israelitacuna uyachun, canpipish siempre feta churachunmi chashna shamusha” nirca. Chai qꞌuipami Moisesca israelitacuna imata nishcata Jehová Diosman huillarca.

10 Chai qꞌuipaca Jehová Diosca cashnami nirca: “Israelitacuna maipi cashcaman ri. Paicunataca cunanpish, cayapish chuyayarichun mandai. Paicunaca paicunapaj ropacunatapish tajshanami can. 11 Tercer punllapica paicunaca allichirishcami cana can. Chai punllapimi Jehová Diosca tucuicuna ricucujpi Sinaí urcu jahuaman uriyamunga. 12 Israelitacuna urcuman ama huichiyachunmi urcu muyundijpica señalcunata churana cangui. Paicunataca cashnami nina cangui: ‘Ñataj urcuman huichiyanguichijman, urcu chaquillatapish sarunguichijman. Maijanpish urcupi chaquita churajca huañungatajmi. 13 Chashna ruraj runataca mana tuparinachu canguichij. Ashtahuanpish rumicunahuan shitashpa o flechata shitashpami huañuchina canguichij. Animal cashpapish o gente cashpapish mana causashpa catingachu’ ningui. Shinapish carnero gachupi tocashcata uyashpaca urcumanca cꞌuchuyai tucungacunami” nircami.

14 Chai qꞌuipaca Moisesca urcumanta uriyashpami israelitacunataca chuyayarichun mandarca. Israelitacunaca paicunapaj ropacunatami tajsharcacuna. 15 Moisesca paicunataca: “Tercer punllapaj allichiringuichij. Shinallataj cancunapaj huarmihuanca ama chayarinacunguichijchu”* nircami.

16 Ña tercer punlla tucujpica tutamanta ladoca cꞌulun nishcami uyarirca, achij nishcapishmi ricurirca. Urcu jahuapica yana amsa pꞌuyumi tiyarca. Shinallataj gachupi sinchita tocashcami uyarirca. Carpa huasicunapi caj tucui gentecunami chujchui callarircacuna. 17 Chai huashami Moisesca Dioshuan tupangapaj israelitacunataca carpa huasicunamanta llujshichun mandarca. Chaimi paicunaca urcu chaquipi shayari callarircacuna. 18 Jehová Diosca nina chaupipimi Sinaí urcumanca uriyashca carca. Chaimantami chai urcupica tucui ladocunamanta cushni llujshicurca. Chai cushnica shuj hornomanta llujshij cushni shinami llujshicurca. Tucui urcumi sinchita chujchucurca. 19 Gachupi tocashcaca ashtahuan ashtahuan sinchitami uyarirca. Chaimi Moisesca Dioshuan parlarca. Diospish paihuan parlashpami cutichirca.

20 Chai qꞌuipaca Jehová Diosca Sinaí urcu jahuamanmi uriyarca. Paica urcu puntamanmi uriyarca. Chai huashami Jehová Diosca Moisestaca chai urcu puntaman huichiyachun mandarca. Shina mandajpimi Moisesca huichiyarca. 21 Jehová Diosca Moisestaca cashna nishpami mandarca: “Caimanta uriyashpa, israelitacunataca Jehová Diosta ricungapaj maicama señalashcata ama pasachun advirtigri. Mana cazushpaca achcacunami huañunga. 22 Shinallataj punllanta Jehová Diospajman cꞌuchuyaj sacerdotecunaca paicunata Jehová Dios ama huañuchichunmi chuyayarina can” nircami. 23 Chaimi Moisesca Jehová Diostaca: “Israelitacunaca Sinaí urcumanca mana huichiyai tucuncunachu. Canllatajmi ñucamanca: ‘Urcu muyundijpica señalcunata churai. Chai urcutaca ñucapajlla cachun chꞌicanyachi’ nishpa ñucanchijta advirtircangui” nirca. 24 Shinapish Jehová Diosca: “Ri, caimanta uriyashpa Aaronta pushashpa tigramugri. Pero Jehová Dios maipi cashcamanca sacerdotecunapish, caishuj israelitacunapish can churashca señalta pasashpa huichiyachunca ama saquinguichu. Chashnami paicunataca Diosca mana huañuchinga” nircami. 25 Shina nijpimi Moisesca israelitacuna maipi cashcaman uriyashpa Dios ima nishcata huillarca.

20 Chai qꞌuipami Diosca cai mandashcacunata curca:

2 “Ñucaca cambaj Jehová Diosmi cani. Ñucami cantaca Egipto llajtamanta llujshichircani. Chai llajtapimi canca esclavo carcangui. 3 Ñucallatami adorana cangui. Shujtaj dioscunataca ama adoranguichu.

4 Ima santocunataca ama ruranguichu. Cielopi cajcunaman rijchajtapish, allpapi cajcunaman rijchajtapish, yacu ucupi cajcunaman rijchajtapish ama imata ruranguichu. 5 Chaicunapaj ñaupajpica ama cunguringuichu, chaicunataca ama adoranguichu. Ñuca, cambaj Jehová Diosca ñucallata adorachun munaj Diosmi cani. Ñucata pꞌiñaj yayacuna juchata rurashcamantaca paicunapaj huahuacunata, paicunapaj nietocunata, paicunapaj bisnietocunatapishmi castigani. 6 Pero ñucata cꞌuyajcunapaj, ñuca mandamientocunata cazujcunapaj huahua huahuacunamanca huaranga huaranga huahua huahuacunacamami ñuca mana tucurij cꞌuyaita ricuchini.

7 Cambaj Jehová Diospaj shutitaca ama yangamanta utilizanguichu. Jehová Diosca paipaj shutita yangamanta utilizajcunataca castigangami.

8 Sábado punlla* Diospajlla chꞌicanyachishca cashcata yuyaringui. 9 Sujta punllacunatami trabajana cangui. Chai punllacunapica tucui can imata rurana cashcatami rurana cangui. 10 Pero séptimo punllaca cambaj Jehová Diospajlla chꞌicanyachishca sábado punllami can. Chai punllapica canpish, cambaj churipish, cambaj ushushipish, cambaj esclavopish, cambaj esclavapish, cambaj animalpish, cambaj llajtapi causaj shujtaj llajtamanta shamushca runapish ni pi ima trabajota mana ruranachu can. 11 Jehová Diosca cielotapish, allpatapish, mama cuchatapish, chaicunapi tucui imalla tiyajcunatapish sujta punllacunapimi rurarca. Pero séptimo punllapica paica samarircami. Chaimantami Jehová Diosca sábado punllata bendiciashpa paipajlla chꞌicanyachirca.

12 Cambaj Jehová Dios cugrishca allpapi achca tiempota causangapajca cambaj yayata, cambaj mamata respetangui.

13 Ama huañuchingui.

14 Ama huainayangui.*

15 Ama shuhuangui.

16 Testigo cachun cayajpica cambaj projimopaj contraca ama llullashpa huillanguichu.

17 Cambaj projimopaj huasitaca ama munanguichu. Cambaj projimopaj huarmita, paipaj esclavota, paipaj esclavata, paipaj torota, paipaj burrota, pai tucui imalla charishca cosascunatapish ama imata munanguichu”.

18 Tucui israelitacunami cꞌulun nishcata, gachupi tocashcatapish uyarcacuna. Shinallataj achij nijta, urcumanta cushni llujshijtapishmi ricurcacuna. Tucui chaicunata ricushpa, chaicunata uyashpami paicunaca chujchushpa caru carulla saquirircacuna. 19 Chaimi paicunaca Moisestaca: “Dios ñucanchijhuan parlajpica huañunatami manchanchij. Chaimanta can ñucanchijhuan parlai, cantaca ñucanchijca uyashunllami” nircacuna. 20 Shina nijpimi Moisesca israelitacunataca: “Ama manchaichijchu. Dios verdaderoca paita siempre manchachun, juchata ama rurachunmi cancunata ricunaman shamushca” nirca. 21 Chaimi israelitacunaca caru carulla saquirircacuna. Cutin Moisesca Dios verdadero maipi cashca amsa pꞌuyumanmi cꞌuchuyarca.

22 Chai qꞌuipami Jehová Diosca Moisestaca cashna nirca: “Israelitacunamanca caita ningui: ‘Cielomanta ñuca rimashcataca cancunapaj propio ñahuicunahuanmi ricushcanguichij. 23 Ñucata adorashca jahua cullquimanta, oromanta dioscunata ama ruraichijchu. Ama paicunata adoraichijchu. 24 Ñucapajca allpahuan shuj altarta rurai. Chai jahuapica cambaj rupachishca ofrendacunata, ñucahuan alli tucungapaj cambaj sacrificiocunata, cambaj ovejacunata, cambaj vacacunatami cuna cangui. Maipimi ñuca shutita yuyarichun agllasha,* chaiman rishpami canta bendiciasha. 25 Rumihuan shuj altarta rurashpaca labrashca rumicunahuanca ama ruranguichu. Cincelhuan rurashpaca altartami mapayachingui. 26 Altarman huichiyajpi cambaj lluchulla aicha ama ricurichunca ñuca altarpica ama gradacunata ruranguichu’ ningui.

21 Shinallataj paicunamanca ñuca imallata rurachun nishcacunatami huillana cangui:

2 Shuj hebreo runata esclavota shina can randijpica paica sujta huatacunatami esclavo shina trabajanga. Pero séptimo huatapica imata mana pagashpami libre saquiringa. 3 Pailla shamushca cashpaca paillami ringa. Pero huarmindij shamushca cajpica huarmipish paihuanmi ringa. 4 Shinapish paipaj amo shuj huarmita cujpi chai huarmihuan churicunata, ushushicunata charijpica huarmipish, huahuacunapish paipaj amopajmi canga. Chaimi cꞌarica pailla ringa. 5 Pero chai esclavo cutin cutin ‘Ñucaca mana libre casha ninichu. Ñuca amotapish, ñuca huarmitapish, ñuca huahuacunatapishmi cꞌuyani’ nijpica 6 paipaj amoca Diospaj ñaupajmanmi pushanga. Chai qꞌuipaca pungupi o pungu caspicunapi churashpami shuj punzonhuan paipaj rinrinta jutcunga. Chashnami chai runaca tucui paipaj causaipi amopaj esclavo canga.

7 Shuj runa paipaj ushushita esclava cachun cꞌatujpica chai huarmica cꞌari esclavo shinallatajca mana cacharichishcachu canga. 8 Shinallataj paipaj amoca mana munashcamantachari chai esclavataca paipaj caishuj huarmi* cachun mana japisha ninga. Pero shujtaj runa randisha nijpica shujtaj llajtamanta runaman cꞌatuna derechotaca mana charinchu. Chai amoca mana allitami rurashca. 9 Pero paipaj churipaj huarmi cachun japishpaca paipaj ushushita shinami tratana can. 10 Paipaj huarmi cachun shujtaj huarmita japishpapish punta huarmimanca micunata, ropatapish chashnallataj cushpa catichun. Paihuan chayarinatapish ama saquichun. 11 Shinapish cai quimsa cosascunata pai mana cusha nijpica chai huarmica ima cullquita mana pagashpami libre saquiringa.

12 Maijanpish shuj runata llaquichishpa huañuchijca paipish huañunami can. 13 Pero mana munaimanta chashna rurashpa, Diospish chashna tucuchun saquijpica paica ñuca ricuchigrishca lugarmanmi miticushpa ri tucunga. 14 Maijan runa paipaj projimohuan pꞌiñarishpa huañuchina munaihuan huañuchishpaca ñuca altarmanta apana cajpipish paica huañunami can. 15 Maijanpish paipaj yayata, paipaj mamata macajca huañunami can.

16 Maijanpish shuj runata secuestrashpa paita cꞌatujpi o paita pacalla charicujta yachaj chayajpica chai runaca huañunami can.

17 Maijanpish paipaj yayata o paipaj mamata maldicijca huañunami can.

18 Ishqui runacuna macanacucushpa paicunamanta shuj runa paipaj projimota rumihuan shitashpa o maquihuan* huajtashpa chugrichijpi, pai mana huañujpi pero camapi saquirina cajpica caitami rurana can: 19 pai jatari tucujpi, shuj tauna caspipi charirishpa puri tucujpica dañota ruraj runaca mana castigashcachu canga. Shinapish chugririshca runa mana trabajai tucushca punllacunamantami pai alliyangacama pagana can.

20 Shuj amo paipaj esclavota o paipaj esclavata caspihuan macashpa huañuchijpica chai amotaca castiganami can. 21 Shinapish chai esclavo o chai esclava shuj punllapi o ishqui punllapi mana huañujpica amotaca mana castiganachu can. Chai amoca paipaj propio cullquihuanmi paitaca randirca.

22 Ishqui runacuna macanacucushpa shuj chichu huarmita chugrichijpi, manaraj huachana horaspi chai huarmi huachajpi,* pero ni pi mana huañujpica culpata charij runaca dañota rurashcamantaca chai huarmipaj cusa imata mañashcatami pagana can. Paica juezcuna decidishca shinallatajmi pagana can. 23 Pero huarmi o huahua huañujpica chai huañuchij runaca paipaj causaihuanmi pagana can. 24 Ñahui lulunta chugrichijtaca paipaj ñahui luluntapish chugrichichun. Quiruta pꞌaquijtaca paipaj quirutapish pꞌaquichun. Maquita chugrichijtaca paipaj maquitapish chugrichichun. Chaquita chugrichijtaca paipaj chaquitapish chugrichichun. 25 Rupachijtaca paitapish rupachichun. Chugrichijtaca paitapish chugrichichun. Huajtajtaca paitapish huajtachun.

26 Shuj runa paipaj esclavota o paipaj esclavata ciegoyangacama ñahui lulunpi chugrichishpaca chai ñahuimantami esclavotaca libre saquina can. 27 Shinallataj paipaj esclavota o paipaj esclavata huajtashpa quiruta llujshichishpaca chai quirumantami esclavotaca libre saquina can.

28 Shuj cꞌarita o shuj huarmita toro sagmashpa huañuchijpica chai torotaca rumicunahuan shitashpami huañuchina can, pero toropaj aichataca mana micunachu can. Shinapish dueñoca mana castigashcachu canga. 29 Pero shujtaj cutincuna chai toro ña sagmashca cajpi, dueñotapish chai torota cuidachun advirtishca jahua chai toro shuj cꞌarita o shuj huarmita huañuchijpica chai torotaca rumicunahuan shitashpami huañuchina can, dueñotapishmi huañuchina can. 30 Pero dueñota paipaj causaita quishpichingapaj pagachun nijpica mashnata mañashcatami pagana can. 31 Shuj cꞌari huahuata o shuj huarmi huahuata toro sagmajpica dueñotaca chashnallatajmi juzgana can. 32 Shuj esclavota o shuj esclavata toro sagmajpica esclavopaj amomanmi toropaj dueñoca 30 siclo* cullquita pagana can. Pero torotaca rumicunahuan shitashpami huañuchina can.

33 Maijan runa shuj jutcuta pascashpa saquijpi o shuj jutcuta rurashpa mana tapajpi chai jutcupi shuj toro urmajpi o shuj burro urmajpica 34 jutcuta ruraj runaca chai animalmantami pagana can. Animal mashna valishcatami dueñomanca pagana can. Cutin chai huañushca animaltaca paimi japina can. 35 Shuj runapaj toro caishuj runapaj torota chugrichishpa huañuchijpica paicunaca causaj torotami cꞌatuna can. Causaj toromanta pagashca cullquitapishmi chaupinacuna can. Shinallataj huañushca animalpaj aichatapishmi chaupinacuna can. 36 Pero shujtaj cutincuna chai toro pita ña sagmashca cajpi, pero paipaj dueño mana cuidashca cajpica huañushca toromantaca shujtaj torotami pagana can. Cutin huañushca torotaca paimi japinga.

22 Shuj runa shuj huagrata o shuj ovejata shuhuashca qꞌuipa huañuchishpa o cꞌatushpaca huagramantaca pichca* huagratami pagana can. Cutin ovejamantaca chuscu ovejatami pagana can.

2 (Shuj shuhua tuta lado huasiman yaicucujpi paita japishpa, chugrichishpa o huañuchishpaca huañuchij runaca paita huañuchishcamantaca mana culpayujchu can. 3 Pero pacarishca qꞌuipa tucui caicuna pasajpica huañuchij runaca shuhuata huañuchishcamantami culpayuj can).

Shuhuaca imata shuhuashcamantaca paganami can. Shuhuashca cosascunamanta pagangapaj imata mana charishpaca paillatajmi cꞌaturina can. 4 Chai shuhuashca animal causashpa caticujpi, chai animalta pai charicushparajca huagra cajpipish, burro cajpipish, oveja cajpipish dobletami pagana can.

5 Maijan runa paipaj animalcunata paipaj campopi o paipaj uva chagrapi michinaman pushacushpa, shujtaj runapaj campopi o uva chagrapi animalcuna micuchun saquishpaca paipaj campopi pꞌucushca alli granocunahuan o uva chagrapi pꞌucushca alli uvacunahuanmi pagana can.

6 Shuj runa ninata japichijpi chai nina cashacunata rishpa gavillacunata rupachijpi, manaraj cosechashca granocuna rupajpi o tucui campo rupajpica chai runaca imalla rupashcamantami pagana can.

7 Shuj runa cullquita o shujtaj cosascunata huaquichichun paipaj projimoman cujpi, chai projimopaj huasimanta shuhuajpi, shuhuata japijpica chai shuhuaca dobletami pagana can. 8 Pero shuhuata mana japijpica huasi dueñotaca paipaj projimopaj cosascunahuan saquirishcata o mana saquirishcata yachangapajmi Diospaj ñaupajman pushana can. 9 Maijanpish shuj runata mana paipaj cashca huagrahuan, burrohuan, ovejahuan, churanahuan o ima chingarishca cosascunahuan saquirishcata juchachishpaca Diospaj ñaupajpimi chai problemata allichinaman rina can. Chaipimi Diosca maijan culpata charishcata ricuchinga. Culpata charijca paipaj projimomanca dobletami pagana can.

10 Maijanpish paipaj projimoman shuj burrota, shuj huagrata, shuj ovejata o ima shujtaj animalta cuidachun saquijpi, chai animal huañujpi o lisiarijpi o chai animalta apajpi, ima tucujta pi mana ricujpica 11 chai animalta cuidacuj runaca Jehová Diospaj ñaupajpimi mana culpayuj cashcata jurana can. Chaimi dueñoca pai jurashcata uyana can. Cutin cuidaj runaca imata mana paganachu can. 12 Pero animalta shuhuashca cajpica chai animalmantaca dueñomanmi pagana can. 13 Cutin chai animalta shuj sacha animal pedazashca cajpica sobrashcatami pruebata shina apamuna can. Sacha animal huañuchishcamantaca imata mana paganachu can.

14 Shuj runa paipaj projimoman shuj animalta mañajpi, chai animal lisiarijpi o dueño mana ricucujpi huañujpica chai runaca mañashca animalmantaca paganami can. 15 Pero dueño ricucujpi animal lisiarijpi o huañujpica animalta mañaj runaca imata mana paganachu can. Shinapish animalta cullquihuan alquilashca cajpica chai cullquica animalmantami pago shina saquiringa.

16 Cazarangapaj manaraj ari nishca, cꞌarihuan manaraj chayarishca soltera huarmita shuj runa inquitashpa, paihuan siririshpaca chai soltera paipaj huarmi tucuchunmi paimantaca shuj preciota pagana can. 17 Pero solterapaj yaya paipaj ushushita manataj cusha nijpica chai runaca solteramantaca precio completotami pagana can.

18 Shuj bruja huarmitaca ama causachun saquinguichu.

19 Maijanpish shuj animalhuan chayarinacushpaca huañunatajmi can.

20 Maijanpish Jehová Diosllaman sacrificiocunata cunapaj randi shujtaj dioscunaman sacrificiocunata cushpaca huañunatajmi can.

21 Shujtaj llajtamanta shamushca runataca ama maltratanguichu, ama llaquichinguichu. Cancunapish Egipto llajtapica shujtaj llajtamanta shamushca runa shinami carcanguichij.

22 Viuda huarmicunatapish, yaya illaj huahuacunatapish ama maltratanguichijchu. 23 Paicunata ima shinapish can sufrichijpi, paicuna ayudachun nishpa ñucata mañajpica ñucaca uyashatajmi. 24 Chaimi ñucaca cancunahuan yallitaj pꞌiñarishpa cancunataca espadahuan huañuchisha. Cancunapaj huarmicunaca viudami saquiringacuna. Cancunapaj huahuacunapish yaya illajmi saquiringacuna.

25 Ñuca pueblomanta pobre* runaman, cancunapurapi causaj gentecunaman cullquita mañachishpaca prestamota mañachij runacuna shinaca mana tratanachu cangui. Paicunataca interestaca mana cobranachu canguichij.

26 Shuj prestamomanta garantiata* shina cambaj projimopaj jahua churanahuan saquirishca cashpaca manaraj inti huashicujpimi tigrachina cangui. 27 Paica taparingapajca chai churanallatami charin. Chai jahua churanahuanmi paipaj cuerpotaca cunujyachin. ¿Dorminaman rishpaca paica imahuantaj cꞌataringari? Pai ayudachun nishpa ñucata mañajpica ñucaca llaquij cashcamantami pai mañashcataca uyashataj.

28 Diostaca ama maldicingui.* Cambaj llajtata pushajcunatapish ni maijanta ama maldicingui.

29 Cambaj achca cosechamanta, jicharicuj aceitemanta, jicharicuj vinomanta ofrendata shina ñucaman cunataca ama dudaichu. Cambaj punta churitaca ñucapajmi chꞌicanyachina cangui. 30 Cambaj huagrahuan, cambaj ovejahuanca caitami rurana cangui: animaltaca canchis punllacunata paipaj mamahuan cachunmi saquina cangui. Pero octavo punllapica ñucamanmi cuna cangui.

31 Cancunaca ñuca jucha illaj pueblo cashcatami ricuchina canguichij. Mai campopi shuj sacha animal pedazashpa huañuchishca animalpaj aichataca mana micunachu canguichij. Ashtahuanpish allcucunamanmi shitana canguichij.

23 Llulla huillaita huillashpa ama puringui. Llullacunata nishpa millai runataca ama apoyangui. 2 Achcacuna* mana allita rurashcallamantaca canpish mana allitaca ama ruranguichu. Huillashpapish shujtajcunapaj ñaupajpi alli saquiringapajllaca ama llullashpa huillangui. Chaita rurashpaca cashcata ruranatami jarcangui. 3 Shuj pobre runata juzgacushpaca chai runa pobre cashcallamantaca ama paipaj parte tucushpa juzgangui.

4 Cambaj contra runapaj chingarishca huagrata o burrota japishpaca paimanmi tigrachina cangui. 5 Canta pꞌiñaj runapaj burro cargata aparishca urmajta ricushpaca mana chaipi saquinachu cangui. Ashtahuanpish chai runapaj animalta salvangapajmi ayudana cangui.

6 Cancunapurapi causaj pobre runata juzgacushpaca juiciopi imata decidishcataca ama cambiangui.

7 Llullashpa juchachicujpica ama participangui. Culpata mana charij runatapish, cashcata ruraj runatapish ama huañuchingui. Ñucaca millai runataca culpayuj cashcatami ricuchisha.

8 Ima camarita ama japingui. Chai camarica alli yachaihuan juzgaj runatapish pandachi tucunmi, cashcata ruraj runa imata decidishcatapish cambiachi tucunmi.

9 Shujtaj llajtamanta shamushca runataca ama llaquichingui. Cancunapishmi shujtaj llajtamanta cana ima shina cashcataca yachanguichij.* Cancunaca Egipto llajtapimi shujtaj llajtamanta shamushca runa shina carcanguichij.

10 Cambaj allpapica sujta huatacunatami tarpuna, cosechana cangui. 11 Pero séptimo huatapica mana tarpunachu cangui, chaipaj randica allpataca samachinami cangui. Chai allpapi pꞌucushcataca cambaj pueblomanta pobre gentecunami micunga, cutin saquirishcacunaca sacha animalcunapajmi canga. Cambaj uva chagracunahuanpish, olivo chagracunahuanpish chashnallatajmi rurana cangui.

12 Sujta punllacunatami trabajana cangui. Pero séptimo punllataca cambaj huagra, cambaj burro samarichunmi mana trabajana cangui. Cambaj esclavapaj churipish, shujtaj llajtamanta shamushca runapish fuerzata japichunmi mana trabajana cangui.

13 Ñuca tucui imalla nishcata cancuna pajtachicushcata alli ricuraichij. Shujtaj dioscunapaj shuticunataca ama ninguichijchu. Chai dioscunapaj shuticunataca ama nombranguichijchu.

14 Ñucata adorangapajca cada huata quimsa fiestata rurangui. 15 Levadura illaj tandata micuna fiestata* rurangui. Levadura illaj tandataca ñuca mandashca shinami canchis punllacunata micuna cangui. Chaitaca abib* quillapimi agllashca punllapi rurana cangui. Canca chai punllami Egipto llajtamanta llujshircangui. Ñuca ñaupajpica maijanpish chushaj maquillaca ama ricurichun. 16 Chagrapi tarpushca punta pꞌucushca granocunata tandashpaca Cosechana nishca fiestata* rurangui. Chagrapi can trabajashca granocunata tandashpaca huata tucuripi Tandana nishca fiestata* rurangui. 17 Cancunamanta tucui cꞌaricunami huatapica Amito Jehová Diospaj ñaupajpi quimsa cutin ricurina can.

18 Ñucaman shuj animalta sacrificiota shina cushpaca yahuartaca levadurahuan chagrushca tandahuan ama cungui. Ñuca fiestacunapi cushca animalcunapaj huiratapish ama cayandij tutamantacama huaquichingui.

19 Cambaj chagrapi punta pꞌucushca alli granocunata Jehová Diospaj huasiman apamungui.

Huahua chivotaca paipaj mamapaj lechepica ama tꞌimbuchingui.

20 Canta ñaupashpa richunca ñuca angeltami cachagrini. Paimi can ricuj ñanpi cuidanga, cambaj allichishca lugarmanpish pushanga. 21 Paitaca alli uyangui, pai nishca shimicunatapish cazungui. Paitaca ama cꞌariyangui. Can cꞌariyajpica ñuca shuti paipi cashcamantami cambaj juchacunataca mana perdonanga. 22 Shinapish pai nishca shimicunata tucuipi cazujpi, ñuca nishcacunatapish tucuita rurajpica cambaj contracunapaj contrami casha. Ñucaca canhuan macanacujcunahuanmi macanacusha. 23 Ñuca angelca cancunata ñaupashpami ringa. Paica cancunataca amorreocuna, hititacuna, perizitacuna, cananeocuna, heveocuna, jebuseocuna maipi cashcamanmi pushanga. Chaipimi ñucaca paicunata tucuchisha. 24 Paicunapaj dioscunapaj ñaupajpica ama cunguringui, chai dioscunatapish ama adorangui. Chai gentecuna rurashcacunatapish ama catingui. Ashtahuanpish paicunapaj rurashcalla dioscunata, paicunapaj adorana pilarcunatapish* urmachishpami ñutuna cangui. 25 Cancunapaj Jehová Diostami sirvina canguichij. Paimi tandata cushpa, yacuta cushpa cancunataca bendicianga. Ñucaca cancunamantaca tucui laya ungüicunatami anchuchisha. 26 Cambaj llajtamanta huarmicunaca huahuacunataca mana shullungachu, mana huachaj huarmipish mana tiyangachu. Ñucami cancunataca unai unaicama causachun saquisha.

27 Manaraj can chayajpimi ñucataca manchangacuna. Canhuan tupaj tucui gentecunatami muspachisha. Tucui cambaj contracunatapish can mishajpi miticushpa richunmi saquisha. 28 Can manaraj chayajpimi paicunataca desanimachisha.* Chashnami heveocunata, cananeocunata, hititacunataca cambaj ñaupajmanta llujshichishpa cachasha. 29 Shinapish paicunataca shuj huatallapica mana llujshichishpa cachashachu. Chashnami allpaca mana shitashca saquiringa, sacha animalcunapish mana miraringa, cantapish mana llaquichinga. 30 Achca huahuacunata charishpa chai allpata can japingacamami paicunataca cambaj ñaupajmanta asha asha llujshichishpa cachasha.

31 Cambaj llajta linderocunaca Puca mama cuchamanta callarishpaca filisteocunapaj mama cuchacamami chayanga. Shinallataj chaquishca pambamanta callarishpaca Éufrates jatun yacucamami chayanga. Chai llajtapi causaj gentecunataca cambaj maquipimi churasha. Canmi paicunataca cambaj ñaupajmanta llujshichishpa cachangui. 32 Chai llajta gentecunahuanpish, paicunapaj dioscunahuanpish ima ari ninacuitaca ama rurangui. 33 Ñuca ñaupajpi canta ima juchata ama rurachichunca chai gentecunaca cambaj llajtapica mana causanachu can. Paicunapaj dioscunata adorashpaca* shuj trampapimi urmangui”.

24 Chai qꞌuipaca Moisestaca cashnami nirca: “Jehová Dios maipi cashcaman huichiyai. Canhuanca Aaronta, Nadabta, Abihuta, israelitacunata pushaj* 70 runacunatapish canhuan pushashpa huichiyai. Chaimantaca caru carullapi cumuringuichij. 2 Jehová Diospajmanca Moisesllami cꞌuchuyanga. Caishujcunaca ama cꞌuchuyachuncuna. Israelitacunapish Moiseshuanca ama huichiyachuncuna” nircami.

3 Chai qꞌuipami Moisesca Jehová Dios nishca shimicunata, pai imallata rurachun nishcacunatapish israelitacunaman huillanaman rirca. Chaimi tucui israelitacunaca: “Jehová Dios nishca shimicunataca tucuitami cazushun” nircacuna. 4 Chashnami Moisesca Jehová Dios nishca tucui shimicunata quillcashpa churarca. Chai qꞌuipaca utca jatarishpami urcu chaquipi shuj altarta rurarca. Shinallataj Israelpaj 12 familiacunata ricuchij 12 pilarcunatami shayachirca. 5 Chai huashaca israelitacunapuramanta joven cꞌaricunatami agllarca. Paicunami Diosmanca rupachishca ofrendacunata curca. Shinallataj Jehová Dioshuan alli tucungapaj sacrificiocunata cungapajmi torocunatapish huañuchircacuna. 6 Chaimantaca Moisesca chaupi yahuartaca tazoncunapimi tandarca. Cutin chaupitaca altar jahuapimi tsiraparca. 7 Chai qꞌuipaca Moisesca Dioshuan ari ninacushca* librota japishpami tucuicunapaj ñaupajpi sinchita liyirca. Chaita uyashca qꞌuipami israelitacunaca: “Ñucanchijca Jehová Dios tucui imalla nishcatami pajtachishun. Paitaca cazushunmi” nircacuna. 8 Chai qꞌuipami Moisesca israelitacunata yahuarhuan tsirapashpaca: “Cai yahuarca Jehová Dios cancunahuan ari ninacushcata ricuchij yahuarmi. Cai ari ninacuita rurashpaca tucui uyashcatami pajtachishun nircanguichijmi” nirca.

9 Chashnami Moisés, Aarón, Nadab, Abihú, israelitacunata pushaj 70 runacunapish urcuman huichiyarcacuna. 10 Chaiman huichiyashpaca israelitacunapaj Diostami ricurcacuna. Diospaj chaqui ucupica zafiro rumicunahuan rurashca pamba shinami tiyarca. Chaica jahua cielo shina achijnicujmi carca. 11 Diosca Israelmanta importante runacunataca ima dañota mana rurarcachu. Chai runacunaca shuj muscuipi shinami Diosta ricurcacuna. Paicunaca micurcacunami, ubyarcacunami.

12 Chai qꞌuipami Jehová Diosca Moisestaca: “Ñuca maipi cashca urcuman huichiyashpa chaipi saquiri. Chaipimi israelitacunaman yachachingapaj leycunata, mandamientocunata quillcagrishca tabla rumicunata cusha” nirca. 13 Chaimi Moisespish, paita ayudaj Josuepish allichirircacuna. Chaimantaca Moisesca Diospaj urcumanmi huichiyarca. 14 Pero manaraj rishpami Moisesca pushaj runacunataca: “Cancunaca ñucanchij tigramungacama caipi saquirichij. Aaronpish, Hurpishmi cancunahuan caipi saquiringacuna. Chaimanta maijanpish shuj jatun problemata charishpaca paicunaman huillanguichijlla” nishca carca. 15 Chai qꞌuipaca Moisesca urcuman huichiyarcallami. Chai urcutaca pꞌuyumi tapacurca.

16 Jehová Diospaj sumaj achijnicujca Sinaí urcu jahuapimi catirca. Chai urcutaca sujta punllacunatami pꞌuyu tapacurca. Ña séptimo punllapica Diosca Moisestami chai pꞌuyumanta cayarca. 17 Chaita ricushpa saquirij israelitacunapaj ñahuipica Jehová Diospaj sumaj achijnicujca tucuita tucuchij nina shinami urcu jahuapi ricurirca. 18 Moisesca pꞌuyu chaupiman yaicushpami urcuman huichiyarca. Chaipimi paica 40 punllacunata, 40 tutacunata saquirirca.

25 Jehová Diosca Moisestaca cashnami nirca: 2 “Israelitacunataca ñucapaj shuj ofrendata tandachichun ni. Maijanpish shuj ofrendata shungumanta ñucapaj cusha nijpica chasquichijlla. 3 Cai ofrendacunatami chasquina canguichij: orota, cullquita, cobreta, 4 azul puchcata, morado* puchcata, pucanicuj puchcata, alli lino puchcata, chivo millmata, 5 pucahuan teñishca carnero carata, foca carata, acacia caspita, 6 lamparacunapaj aceiteta, balsamotapish chasquinguichij. Chai balsamoca agllana aceitepajpish, mishquijllata ashnacuj inciensopajpishmi canga. 7 Shinallataj efodpi, pectoralpi churangapajca ónice rumicunatapish, shujtaj rumicunatapish chasquichijlla. 8 Cancunaca ñucata adorangapajmi shuj huasita* rurana canguichij. Ñucaca cancunapurapimi causasha. 9 Diospaj carpa huasitapish,* chaipi imalla tiyaj cosascunatapish ima shina ruranata ñuca ricuchigrishca shinami rurana canguichij.

10 Shinallataj acacia caspimantami shuj arcata rurana canguichij. Chai arcaca largomanca shuj metro yallitami* midinga. Anchomanca casi 67 centimetrocunatami* midinga. Altomanpish casi 67 centimetrocunatami midinga. 11 Chai qꞌuipaca arca ucutapish, arca jahuatapish oro purohuanmi jahuata churana cangui. Arca muyundij filopica oro adornocunata labrangui. 12 Shinallataj orota yacuyachishpami chuscu argollacunata rurana cangui. Chaicunataca chuscundij chaquicuna jahuapimi churana cangui. Ishqui argollacunataca shuj ladoman, ishqui argollacunataca caishuj ladomanmi churana cangui. 13 Shinallataj caspicunataca acacia maderamantami rurana cangui. Chaicunataca orohuanmi jahuata churana cangui. 14 Chai caspicunataca Arcata apangapajmi cada ladopi caj argollacunapi churachina cangui. 15 Caspicunaca arcapi caj argollacunapimi saquiringa. Chaimantaca ama pi llujshichichun. 16 Ñuca cugrishca Leyta quillcashca tabla rumicunataca Arca ucupimi churana cangui.

17 Arca tapataca* oro purohuanmi rurana cangui. Chai tapaca largomanca shuj metro yallitami midinga. Anchomanca casi 67 centimetrocunatami midinga. 18 Shinallataj martillohuan labrashpami ishqui oro querubincunata rurana cangui. Chaicunataca arca tapa ishquindij ladopimi churana cangui. 19 Querubincunataca ishquindij ladomanmi rurana cangui. Cada unomi tapa cada ladopi cana can. 20 Querubincunapaj* ishqui alascunaca tapa jahuata chutashcami cana can. Querubincunaca chꞌimbapurami cana can. Paicunapaj ñahuica arca tapatami ricucuna can. 21 Canmi tapataca Arca jahuapi churana cangui. Arca ucupica ñuca cugrishca Leyta quillcashca tabla rumicunatami churana cangui. 22 Ñucaca chaipimi cambaj ñaupajpi ricurisha. Arca tapa jahuamantami canhuan parlasha. Leyta huaquichina arca jahuapi caj ishqui querubincunapaj chaupimantami tucui ñuca mandashcacunata canman huillasha. Chai mandashcacunatami israelitacunaman huillana cangui.

23 Shinallataj acacia caspimantami shuj mesata rurana cangui. Chai mesaca largomanca 89 centimetrocunatami* midinga. Anchomanca 44 centimetrocuna yallitami* midinga. Altomanca casi 67 centimetrocunatami midinga. 24 Chai mesataca oro purohuanmi jahuata churana cangui. Mesa muyundij filopica oro adornocunatami labrana cangui. 25 Tucui muyundijtaca canchis centimetrocuna yalli* shuj franjatami churana cangui. Chai franja muyundij filopica oro adornocunatami labrana cangui. 26 Shinallataj chuscu oro argollacunatami rurana cangui. Chaicunataca chuscu esquinacunapimi churana cangui. Mesa chaquicunata pegachishca partepimi churana cangui. 27 Chai argollacunataca franja cꞌuchullapimi churana cangui. Chai argollacunaca caspita pasachishpa mesata apangapajmi canga. 28 Caspicunataca acacia maderamanta rurashpami orohuan jahuata churana cangui. Chai caspicunaca mesata apangapajmi canga.

29 Shinallataj platocunata, copacunatami rurana cangui. Vino ofrendacunata tallingapajpish jarracunata, tazoncunatami rurana cangui. Tucui chaicunatami oro purohuan rurana cangui. 30 Mesa jahuapica siempremi ñucaman cushca tandata* ñuca ñaupajpi churana cangui.

31 Shinallataj oro purohuanmi shuj candelerota rurana cangui. Chaica shuj solo piezami cana can. Martillohuan labrashpa rurashcami cana can. Chai candeleroca shuj baseta, chaupipi huichiman shayacuj shuj ejeta, maquicunata, copacunata, globocunata, sisacunatami charina can. 32 Candeleropaj chaupi ejemantaca sujta maquicunami llujshinga: quimsa maquicunaca shuj ladoman, quimsa maquicunaca caishuj ladomanmi llujshinga. 33 Shuj ladomanca cada maquicunami almendro sisa shina quimsa copacunata charinga. Chaipica globocunata, sisacunata shuj shujta churashcami canga. Caishuj ladomanpish cada maquicunami almendro sisa shina quimsa copacunata charinga. Chaipica globocunata, sisacunata shuj shujta churashcami canga. Candelero chaupi ejemanta llujshij sujta maquicunami chashna rurashca canga. 34 Candelero chaupi ejeca almendro sisa shina chuscu copacunatami charinga. Chaipica globocunata, sisacunata shuj shujta churashcami canga. 35 Candeleropaj chaupi ejemanta llujshij punta ishqui maquicunapaj ucupica shuj globomi tiyanga. Catij ishqui maquicunapaj ucupica shujtaj globomi tiyanga. Catij ishqui maquicunapaj ucupipish shujtaj globomi tiyanga. Candeleropaj chaupi ejemanta llujshij sujta maquicunami chashna canga. 36 Globocunapish, maquicunapish tucui candeleromi shuj solo pieza canga. Martillohuan labrashca oro purohuan rurashcami canga. 37 Shinallataj canchis lamparacunatami rurana cangui. Chai lamparacunata japichijpica chai ñaupajtami tucuita achijyachinga. 38 Pinzacunapish, braserillocunapish oro purohuanmi rurashca cana can. 39 Candeleropish, tucui shujtaj cosascunapish shuj talento* oro purohuanmi rurashca cana can. 40 Chaicunataca ima shina ruranata urcupi canman ricuchishca shinami rurana cangui.

26 Diospaj carpa huasitaca chunga telacunahuan rurangui. Chaicunaca caupushca alli lino puchcahuan, azul puchcahuan, morado puchcahuan, pucanicuj puchcahuan rurashcami canga. Chai telacunapica querubincunatami bordana cangui. 2 Cada telami largomanca 12 metrocunata* midinga. Anchomanca casi ishqui metrocunatami* midinga. Tucui telacunami chaillatataj midinga. 3 Pichca telacunata tandachishpami shuj grupopi separana cangui. Shinallataj caishuj pichca telacunata tandachishpami shujtaj grupopi separana cangui. 4 Punta grupopi separashca último tela puntapica azul puchcahuan rinrincunata rurangui. Caishuj grupopi separashca último tela puntapipish chashnallataj rurangui. Chai rinrincunataca ishqui grupopi separashca telacunata tandachinapimi rurana cangui. 5 Shuj grupo telacunapaj puntapica 50 rinrincunatami rurana cangui. Caishuj grupo telacunapaj puntapipish 50 rinrincunatami rurana cangui. Ishquindij grupo telacuna tupanacunpimi tucui rinrincunaca chꞌimbapura saquiringa. 6 Shinallataj 50 oro ganchocunatami rurana cangui. Chai ganchocunahuanmi ishqui grupopi separashca telacunataca tandachina cangui. Chashnami Diospaj carpa huasica shuj solo saquiringa.

7 Shinallataj Diospaj carpa huasita tapachunca chivo millmamantami 11 telacunata rurana cangui. 8 Cada telami largomanca 13 metrocunata* midinga. Anchomanca casi ishqui metrocunatami midinga. Tucui 11 telacunami chaillatataj midinga. 9 Pichca telacunataca tandachishpa sirangui. Caishuj sujta telacunatapish tandachishpa sirangui. Diospaj carpa huasi ñaupajpi caj último telataca doblashpa churangui. 10 Shuj grupo telacuna puntapica 50 rinrincunata rurangui. Caishuj grupo telacuna puntapipish 50 rinrincunata rurangui. Chai rinrincunataca ishquindij grupo telacuna tupanacunpimi rurana cangui. 11 Shinallataj cobremanta 50 ganchocunata rurangui. Chaicunataca ishquindij grupo telacunata tandachingapajmi chai telacunapaj rinrincunapi churana cangui. Chashnami shuj solo saquiringa. 12 Sobraj telacunaca huarcushcami saquiringa. Sobraj telamanta chaupica Diospaj carpa huasi huasha ladopimi huarcushca saquiringa. 13 Chai telacunamantaca cada ladomanmi largomanca 44 centimetrocuna yalli* sobranga. Diospaj carpa huasi tapashca saquirichunmi chashna huarcushca saquiringa.

14 Shinallataj chai jahuapica pucahuan teñishca carnero carahuan cꞌatachingui. Cutin chai jahuapica foca carahuan cꞌatachingui.

15 Diospaj carpa huasipajca acacia caspimanta armazoncunata rurangui. Chaicunataca huichiman shayachingui. 16 Cada armazonmi largomanca chuscu metrocuna yallita* midinga. Anchomanca casi 67 centimetrocunatami* midinga. 17 Cada armazonmi ishqui espigacunata charinga. Chai espigacunaca ishquindijmi igual canga. Diospaj carpa huasipaj tucui armazoncunatami chashna rurana cangui. 18 Diospaj carpa huasi ura ladopajca 20 armazoncunatami rurana cangui.

19 Shinallataj 20 armazoncunapaj chaquipica cullquimanta 40 basecunatami* rurana cangui. Shuj armazón chaquipica ishqui espigacuna yaicuchunmi ishqui basecuna tiyanga. Caishuj armazoncuna chaquipipish cada ishqui espigacuna yaicuchunmi ishqui basecuna tiyanga. 20 Diospaj carpa huasi janaj ladopajpish 20 armazoncunatami rurana cangui. 21 Shinallataj cullquimanta 40 basecunatami rurana cangui. Shuj armazón chaquipica ishqui basecunami tiyanga. Caishuj armazoncunapaj chaquipipish ishqui basecunami tiyanga. 22 Diospaj carpa huasi huasha ladopajpish* sujta armazoncunata rurangui. 23 Diospaj carpa huasi huasha ladomanca esquinacuna tucuchunmi ishqui armazoncunata rurana cangui. 24 Cada armazoncunami ucu ladopica ishqui parteta charina can. Jahua ladopica chai ishqui partecunaca punta argollapimi shujlla tucuna can. Chashnami chai ishqui armazoncunahuanca rurana can. Chai armazoncunaca esquinacuna tucushpami saquiringa. 25 Shinallataj pusaj* armazoncunaca cullquimanta rurashca 16 basecunatami charinga. Shuj armazón chaquipica ishqui basecunami tiyanga. Caishuj armazoncuna chaquipipish ishqui basecunami tiyanga.

26 Shinallataj acacia caspimanta barracunatami rurana cangui: pichca barracunaca Diospaj carpa huasi shuj lado armazoncunata tandachingapajmi canga, 27 caishuj pichca barracunaca Diospaj carpa huasi caishuj lado armazoncunata tandachingapajmi canga, caishuj pichca barracunaca Diospaj carpa huasi huasha lado armazoncunata tandachingapajmi canga. 28 Quinriman churashca barraca armazoncuna chaupipimi saquiringa. Shuj ladomanta caishuj ladocamami pasanga.

29 Armazoncunataca orohuanmi jahuata churana cangui. Barracunata pasachingapajca oro argollacunatami rurana cangui. Barracunatapish orohuanmi jahuata churana cangui. 30 Diospaj carpa huasitaca ima shina ruranata urcupi canman ricuchishca shinami rurana cangui.

31 Diospaj carpa huasipaj cortinataca* azul puchcahuan, morado puchcahuan, pucanicuj puchcahuan, caupushca alli lino puchcahuanmi rurana cangui. Chai cortinapica querubincunatami bordana cangui. 32 Chai cortinataca acacia caspimanta rurashca chuscu pilarcunapimi huarcuna cangui. Chai pilarcunaca orohuan jahuata churashcami canga. Ganchocunapish orohuan rurashcami canga. Pilarcunapish cullquimanta rurashca chuscu basecuna jahuapimi canga. 33 Cortinataca ganchocuna uripimi huarcuna cangui. Leyta huaquichina arcataca cortina huashamanmi apana cangui. Chai cortinami Diospajlla chꞌicanyachishca ucutaca* Diospajlla ashtahuan chꞌicanyachishca ucumanta* separanga. 34 Leyta huaquichina arca jahuapica shuj tapata churangui. Arcaca Diospajlla ashtahuan chꞌicanyachishca ucupimi canga.

35 Mesataca cortina caishuj ladoman churangui. Candelerotaca mesa chꞌimbapurapi churangui. Mesaca Diospaj carpa huasipimi janaj ladoman saquiringa. Candeleroca ura ladomanmi saquiringa. 36 Diospaj carpa huasiman yaicunapica azul puchcahuan, morado puchcahuan, pucanicuj puchcahuan, caupushca alli lino puchcahuan ahuashpami shuj cortinata rurana cangui. 37 Chai cortinata huarcungapajca acacia caspimantami pichca pilarcunata rurana cangui. Chai pilarcunaca orohuan jahuata churashcami canga. Shinallataj oro ganchocunatami rurana cangui. Cobreta yacuyachishpami pichca basecunatapish rurana cangui.

27 Altartaca* acacia caspimantami rurana cangui. Chai altarca cuadradomi cana can. Largomanca ishqui metrocuna yallitami* midinga. Anchomanpish ishqui metrocuna yallitami midinga. Altomanca shuj metro yallitami* midinga. 2 Altar chuscu esquinacunapica gachucunatami rurana cangui. Chai gachucunaca altarhuan shujllata rurashcami canga. Altartaca cobrehuanmi jahuata churana cangui. 3 Ushpata* pallangapajpish baldecunatami rurana cangui. Shinallataj palacunata, tazoncunata, jatun trinchecunata, braserillocunatami rurana cangui. Tucui chai cosascunaca cobremantami canga. 4 Altarpajca cobremanta shuj parrillatami rurana cangui. Chai parrillapaj chuscu esquinacunapica cobre argollacunatami churana cangui. 5 Parrillataca altar ucupimi chaupi chaupillapi churana cangui. Filomanta asha ucumanmi saquirina can. 6 Shinallataj altarpajca acacia maderamanta caspicunata rurashpami cobrehuan jahuata churana cangui. 7 Chai caspicunaca altarpi caj argollacunapimi churachishca canga. Altarta apacujpica chai argollacunaca ishquindij ladopimi canga. 8 Altarca shuj jutcu caja shinami canga. Tabloncunahuan rurashcami canga. Chai altartaca urcupi canman ricuchishca shinami rurana cangui.

9 Diospaj carpa huasi muyundijtaca shuj patiotami* rurana cangui. Ura ladoman saquirij patiopica caupushca alli lino puchcahuanmi cortinacunata rurashpa churana cangui. Chai ladoca 44 metrocuna yallitami* midinga. 10 Chai patiopica cobremanta 20 pilarcuna, cobremanta 20 basecunami* tiyanga. Pilarcunapi tiyaj ganchocunapish, abrazaderacunapish* cullquimanta rurashcami canga. 11 Janaj ladoman saquirij patiopipish cortinacunami tiyanga. Chai lado patiopish 44 metrocuna yallitami midinga. Shinallataj cobremanta 20 pilarcuna, cobremanta 20 basecunami tiyanga. Pilarcunapaj ganchocunapish, abrazaderacunapish cullquimantami canga. 12 Inti huashicun ladoman saquirij patiopipish cortinacunami tiyanga. Chai patioca anchomanca 22 metrocunatami* midinga. Shinallataj chunga pilarcuna, chunga basecunami tiyanga. 13 Inti llujshin ladoman saquirij patiopish anchomanca 22 metrocunatami midinga. 14 Yaicuna shuj ladopica casi canchis metrocunata* midij cortinacunami tiyanga. Chaipica quimsa pilarcunapish, quimsa basecunapishmi tiyanga. 15 Caishuj ladomanpish casi canchis metrocunata midij cortinacunami tiyanga. Chaipipishmi quimsa pilarcuna, quimsa basecuna tiyanga.

16 Patioman yaicunapica casi iscun* metrocunata* midij shuj cortinami tiyanga. Chai cortinaca azul puchcahuan, morado puchcahuan, pucanicuj puchcahuan, caupushca alli lino puchcahuan rurashcami canga. Patioman yaicunapica chuscu pilarcuna, chuscu basecunami tiyanga. 17 Patio muyundijpi churashca tucui pilarcunami cullquimanta rurashca abrazaderacunata, cullquimanta rurashca ganchocunata charinga. Pero basecunaca cobremantami canga. 18 Patioca largomanca 44 metrocuna yallitami midinga. Anchomanca 22 metrocunatami midinga. Altomanca ishqui metrocuna yallitami midinga. Patio muyundijpi churashca telaca caupushca alli lino puchcahuan rurashcami canga. Basecunaca cobremanta rurashcami canga. 19 Diospaj carpa huasipi sirvingapaj rurashca tucui cosascunapish, carpa huasita charichingapaj rurashca estacacunapish, patiopi churana estacacunapish cobremanta rurashcami canga.

20 Shinallataj israelitacunataca achijyachinapaj aceite de oliva purota apamuchun mandangui. Chashnami lamparacunaca siempre japichishca canga. 21 Aaronpish, paipaj churicunapishmi tandanacuna carpa huasipi lamparacunata japichingacuna. Chai lamparacunaca Leyta huaquichina arca cꞌuchulla cortina caishuj ladopimi canga. Chai lamparacunaca Jehová Diospaj ñaupajpimi chishi ladomanta tutamantacama japichishca cana can. Cai leytaca israelitacunapish, paicunapaj huahua huahuacunapishmi siempre pajtachina can.

28 Tucui israelitacunapuramantaca cambaj huauqui Aarontapish, paipaj churicunatapishmi ñuca sacerdotecuna cachun agllana cangui. Aarontapish, paipaj churicuna Nadab, Abihú, Eleazar, Itamartapishmi agllana cangui. 2 Cambaj huauqui Aaronta jatunyachingapajca sacerdote churarina churanacunata rurangui. 3 Imatapish alli ruraj runacunahuan parlangui. Ñucaca paicunamanmi alli yachaita cushcani. Paicunataca Aaronpaj churanacunata rurachunmi mañana cangui. Chashnami paica ñucapajlla chꞌicanyachishca ñuca sacerdote canga.

4 Paicunaca cai churanacunatami* rurangacuna: shuj pectoralta, shuj efodta,* sin mangas churanata, a cuadros ahuashca churanata, shuj sumaj turbanteta, shuj cinturontami rurangacuna. Ñuca sacerdote cachunmi chai churanacunataca Aaronpajpish, paipaj churicunapajpish rurangacuna. 5 Imatapish alli ruraj trabajadorcunaca orohuan, azul puchcahuan, morado puchcahuan, pucanicuj puchcahuan, alli lino puchcahuanmi chaicunataca rurangacuna.

6 Efodtaca orohuan, azul puchcahuan, morado puchcahuan, pucanicuj puchcahuan, caupushca alli lino puchcahuanmi rurangacuna. Chai efodca bordadomi canga. 7 Efodca shuj delantal shinami canga. Ñaupaj ladotapish, huasha ladotapish shuj solota rurashpa rigracuna jahuapi tandachishcami canga. 8 Ahuashca cinturonca efodpi sirashcami canga. Chai cinturonca efodta huatangapajmi canga. Chaipish orohuan, azul puchcahuan, morado puchcahuan, pucanicuj puchcahuan, caupushca alli lino puchcahuan rurashcami canga.

9 Ishqui ónice* rumicunata japishpami chaipica Israelpaj churicunapaj shuticunata quillcana cangui. 10 Shuj rumipica sujta churicunapaj shuticunatami quillcana cangui. Cutin caishuj rumipica caishuj sujta churicunapaj shuticunatami huacharishca ordenpi quillcana cangui. 11 Shuj artesanomi shuj sellota labraj shina Israelpaj churicunapaj shuticunataca ishqui rumicunapi labrashpa churanga. Chai qꞌuipaca uchilla oro monturacunapi churachunmi mandana cangui. 12 Chai ishqui rumicunataca Israelpaj churicuna yuyarishca cachunmi rigracuna jahuapi tandachishca efod jahuapi churana cangui. Aaronca Jehová Diospaj ñaupajpimi israelitacuna yuyarishca cachun chai shuticunataca paipaj rigracuna jahuapi apana can. 13 Shinallataj uchilla oro monturacunatami rurana cangui. 14 Huatucuna shina caupushca oro puro ishqui uchilla cadenacunatapishmi rurana cangui. Chai cadenacunataca uchilla monturacunapimi churana cangui.

15 Juzgana pectoraltaca* shuj bordaj runamanmi rurachina cangui. Efodta rurashca shinallatajmi pectoraltapish orohuan, azul puchcahuan, morado puchcahuan, pucanicuj puchcahuan, caupushca alli lino puchcahuan rurana can. 16 Doblajpica cuadradomi saquiringa. Largomanca 22 centimetrocuna yallitami* midinga. Anchomanpish 22 centimetrocuna yallitami midinga. 17 Chuscu fila rumicunatami churana cangui. Callari filapica rubí rumi, topacio rumi, esmeralda rumimi canga. 18 Catij filapica turquesa rumi, zafiro rumi, jaspe rumimi canga. 19 Quimsa filapica léshem* nishca rumi, ágata rumi, amatista rumimi canga. 20 Chuscu filapica crisólito rumi, ónice rumi, jade rumimi canga. Tucui rumicunami uchilla oro monturacunapi churashca canga. 21 Chai rumicunapica Israelpaj 12 churicunapaj shuticunami quillcashca canga. Cada shutimi Israelpaj 12 familiacunamanta shuj familiata ricuchinga. Cada rumipimi shuticunaca shuj sellota labrashca shina labrashpa churashca canga.

22 Shinallataj pectoralpi churangapajca huatucuna shina caupushca oro puro uchilla cadenacunatami rurana cangui. 23 Pectoralpi churangapajca ishqui uchilla oro argollacunata rurangui. Chai argollacunataca pectoral ishqui esquinacunapi* churangui. 24 Chai qꞌuipaca pectoral esquinacunapi caj ishqui argollacunapica ishqui oro huatucunata pasachingui. 25 Chai ishqui huatucunapaj ishqui puntataca uchilla monturacunata pasachishpami efod ñaupaj ladoman saquirichun rigra jahuapi huatana cangui. 26 Shinallataj ishqui uchilla oro argollacunata rurangui. Chaicunataca efodhuan tupaj pectoral ucu lado ishqui esquinacunapi churangui. 27 Shinallataj efod ñaupaj ladopipish shujtaj ishqui uchilla oro argollacunata rurangui. Chai argollacunaca rigracuna jahuapi tandachishca efod uripi, efodta charichina cꞌuchullapi, ahuashca cinturón jahua ladopimi canga. 28 Pectoral ama cuyurichunca pectoralpi tiyaj argollacunatapish, efodpi tiyaj argollacunatapish caupushca azul puchcahuan huatangui. Chashnami pectoralca maiman mana cuyurishpa ahuashca cinturón jahua ladopi saquiringa.

29 Aaronca Diospajlla chꞌicanyachishca ucuman yaicushpaca Israelpaj churicunapaj shuticunataca juzgana pectoralpi quillcashcatami paipaj pechopi apana can. Jehová Diospaj ñaupajpi israelitacuna siempre yuyarishca cachunmi chashna rurana can. 30 Juzgana pectoral ucupica Urimta, Tumimtami* churana cangui. Jehová Diospaj ñaupajman yaicushpaca Aaronca paipaj pechopimi chaicunataca apanga. Jehová Diospaj ñaupajpi cashpa israelitacunata juzgangapajca Aaronca siempremi Urimtapish, Tumimtapish paipaj pechopi apanga.

31 Efod ucupi churarina sin mangas churanataca tucuita azul puchcahuan rurangui. 32 Chai churana chaupipica uma yaicuna cuellota rurangui. Cuello muyundij filotaca shuj ahuaj runami siranga. Soldadocunapaj churanapi rurashca cuello shinami canga. Chashnami mana lliquiringa. 33 Granadacunataca* azul puchcahuan, morado puchcahuan, pucanicuj puchcahuan rurangui. Chaicunataca doblashca tucui filopi churangui. Granadacunatapish, uchilla campanacunatapish shuj shujmi churana cangui. 34 Sin mangas churana doblashca filopica uchilla oro campanacunata, granadacunatami shuj shuj churana cangui. 35 Chai churanataca Aaronmi sacerdote shina sirvingapaj churaringa. Jehová Diospaj ñaupajpi cangapaj Diospaj huasiman yaicujpi, llujshijpica chai uchilla campanacuna chꞌilin nishcami uyarina can. Chashnami paica mana huañunga.

36 Shinallataj oro purohuanmi achijnicuj placata rurana cangui. Chai placapica shuj sellota labraj shina labrashpami: ‘Jehová Diosca jucha illajmi’* nishca shimicunata churana cangui. 37 Chai placataca caupushca azul puchcahuanmi sumaj turbantepi* huatana cangui. Chashnami turbante ñaupaj ladopi saquiringa. 38 Chai placataca Aaronmi siempre paipaj frentepi apanga. Maijanpish Diosman shuj regalota shina cushca cosascunata yangapi churajpica Aaronmi culpayuj tucunga. Chai cosascunataca israelitacunami Diospajlla cachun chꞌicanyachingacuna. Aaronca israelitacuna Jehová Diospaj ñaupajpi alli ricurichunmi chai placataca siempre paipaj frentepi apanga.

39 Shinallataj a cuadros ahuashca alli lino churanata, alli linomanta sumaj turbanteta, ahuashca shuj cinturontapishmi rurana cangui.

40 Shinallataj Aaronpaj churicunata jatunyachingapaj, sumajyachingapajca churanacunata, cinturoncunata, turbantecunata rurangui. 41 Cambaj huauqui Aarontapish, paipaj churicunatapishmi chai churanacunahuan churachina cangui. Paicunata agllashpa* sacerdotecuna* cachun nombrashpami chꞌicanyachina cangui. Chashnami paicunaca ñuca sacerdotecuna canga. 42 Shinallataj paicunapaj lluchulla aichata tapachingapajca lino calzoncillocunatami rurana cangui. Chai calzoncillocunaca caderamantaca mama changacamami tapana can. 43 Aaronpish, paipaj churicunapish tandanacuna carpa huasiman yaicungapaj o Diospaj huasipi sirvingapaj altarman cꞌuchuyangapajmi cai churanacunata churarina can. Chashnami paicunaca mana culpayuj tucungacuna ni mana huañungacuna. Cai leytaca Aaronpish paipaj huahua huahuacunapishmi siempre pajtachina can.

29 Paicunataca ñuca sacerdotecuna cachunmi ñucapajlla chꞌicanyachingapaj caicunata rurana cangui. Shuj malta torota, ishqui sano carnerocunata agllai. 2 Cutin alli trigo harinahuanca levadura illaj tandata rurai. Shinallataj aceitehuan rurashca levadura illaj roscas tandatapish, aceitehuan jahuata llihuishca levadura illaj ñañujlla galletastapish rurai. 3 Chai tandacunataca shuj canastapi churashpa torohuan, ishqui carnerocunahuan ñucaman cungapaj apamui.

4 Aarontapish, paipaj churicunatapish tandanacuna carpa huasi yaicunman pushangui. Paicunataca chaipi yacuhuan maillarichun mandangui.* 5 Chai qꞌuipaca Aaronmanca pai churarishca ropacunata anchuchishpa sacerdotepaj churanata churachingui. Shinallataj efod ucupi churarina sin mangas churanata, efodta, pectoraltapish churachingui. Efodpi caj ahuashca cinturontaca cinturapi alli huatangui. 6 Paipaj umapica sumaj turbanteta churangui. Chai turbantepica Dios agllashcata ricuchij jucha illaj señalta* churangui. 7 Chai qꞌuipaca paita agllangapaj paipaj uma jahuapica agllana aceiteta tallingui.

8 Chai qꞌuipaca Aaronpaj churicunata cꞌuchuyachingui. Paicunamanpish sacerdotepaj churanata churachingui. 9 Paicunapaj cinturapica cinturonta churangui. Paicunapaj umapica turbanteta churangui. Chaicunataca Aaronmanpish, paipaj churicunamanpish churachingui. Sacerdote canaca paicunapajpish, paicunapaj huahua huahuacunapajpishmi canga. Cai leytaca siempremi pajtachina canguichij. Chashnami Aarontapish, paipaj churicunatapish ñuca sacerdotecuna cachun agllana cangui.

10 Chai qꞌuipaca torotaca tandanacuna carpa huasi ñaupajman apangui. Chaipimi Aaronpish, paipaj churicunapish toropaj uma jahuapi paicunapaj maquicunata churangacuna. 11 Chai torotaca Jehová Diospaj ñaupajpi, tandanacuna carpa huasi yaicunapi huañuchingui. 12 Toropaj asha yahuartaca cambaj dedohuan japishpa altar gachucunapi churangui. Chai huashaca sobrashca yahuartaca altar chaquipi tallingui. 13 Tripacuna jahuapi tiyaj tucui huirata, higadomanta* tucui huirata* anchuchingui. Ishqui riñoncunatapish anchuchingui. Riñoncunapi tiyaj huiratapish anchuchingui. Tucui chaicunataca altarmanta cushni llujshichun rupachingui. 14 Pero toropaj aichata, toropaj carata, majadatapish carpa huasicunamanta canllaman ninapi rupachingui. Chai toroca juchamanta ofrendami can.

15 Chai qꞌuipaca shuj carnerota japingui. Chai carneropaj uma jahuapimi Aaronpish, paipaj churicunapish paicunapaj maquicunata churangacuna.* 16 Carnerota huañuchishpaca paipaj yahuartaca altar tucui ladocunapi tsirapangui. 17 Chai qꞌuipaca carnerotaca mirga mirgapi* pꞌitingui. Tripacunata, chaqui tullucunataca maillangui. Mirga mirgapi pꞌitishca aichataca shuj shujta cada ladoman umahuan tandalla churangui. 18 Altarmanta cushni llujshichunca carnerotaca enterota rupachingui. Chaica Jehová Diosman cushca mishquijllata ashnacuj rupachishca ofrendami* can. Shinallataj Jehová Diosman cushca ninahuan rupachishca ofrendami can.

19 Chai qꞌuipaca chaishuj carnerota japingui. Chai carneropaj uma jahuapimi Aaronpish, paipaj churicunapish paicunapaj maquicunata churangacuna. 20 Chai carnerota huañuchishpaca asha yahuartaca Aaronpaj, paipaj churicunapaj alli lado rinrinpi churangui. Shinallataj paicunapaj alli lado maqui mama dedopi, alli lado chaqui mama dedopi churangui. Yahuartaca altar tucui ladocunapi tsirapangui. 21 Altar jahuapi caj asha yahuarta, agllana asha aceitetaca Aaronpipish, paipaj churanapipish tsirapangui. Shinallataj Aaronpaj churicunapi, paicunapaj churanacunapipish tsirapangui. Chashnami Aaronpish, paipaj churanapish, Aaronpaj churicunapish, paicunapaj churanacunapish Diospajlla chꞌicanyachishca canga.

22 Chai qꞌuipaca carneromantaca huirata anchuchingui. Huira chupata, tripacuna jahuapi tiyaj huirata, higadopi tiyaj huirata, ishqui riñoncunata, riñoncunapi tiyaj huirata, alli lado chaquitapish anchuchingui. Chai carneroca sacerdoteta nombrangapaj cushcami can. 23 Jehová Diospaj ñaupajpi churashca levadura illaj tandacunahuan caj canastamantaca shuj redondo tandata, aceitehuan rurashca shuj rosca tandata, ñañujlla shuj galletatapish japingui. 24 Tucui caicunataca Aaronpaj maquipipish, paipaj churicunapaj maquipipish churangui. Chai qꞌuipaca caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchichun ningui. 25 Chashna rurashca huashaca paicunapaj maquicunamanta japishpa chaicunataca rupachishca ofrendandij altar jahuapi rupachingui. Caica Jehová Diosman cushca ninahuan rupachishca ofrendami can. Jehová Diosman cushca mishquijllata ashnacuj ofrendami can.

26 Chai huashaca Aaronta sacerdote cachun nombrangapaj cushca carneromanta pecho aichata japingui. Chai aichataca caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchingui. Canca chai aichatami japingui. 27 Aaronpish, paipaj churicunapish sacerdote cachun nombrangapaj cushca carneromantaca caiman chaiman cuyuchishpa cushca ofrenda pecho aichatapish, caiman chaiman cuyuchishpa cushca Diospajlla chꞌicanyachishca ofrenda chaquitapish chꞌicanyachingui. 28 Chaicunaca Aaronpaj, paipaj churicunapajmi canga. Israelitacunami chaicunataca cunga. Paicunaca cai leytaca siempremi cazuna can. Chaicunaca Jehová Dioshuan alli tucungapaj cushca sacrificiocunamanta Diospajlla chꞌicanyachishca ofrendami can.

29 Aaronpaj qꞌuipaca sacerdote Aarón churarina churanacunataca paipaj churicunami paicunata agllashca qꞌuipa, sacerdote cachun nombrashca qꞌuipa churangacuna. 30 Aaronpaj churicunamanta Aaronpaj randi sacerdote cajmi tandanacuna carpa huasiman yaicungapaj, chai ucupi sirvingapaj canchis punllacunata chai churanacunataca churaringa.

31 Chai huashaca sacerdoteta nombrangapaj cushca carnero aichataca Diospajlla chꞌicanyachishca lugarpi tꞌimbuchingui. 32 Aaronpish, paipaj churicunapishmi carnero aichatapish, canastapi churashca tandatapish tandanacuna carpa huasi yaicunapi micungacuna. 33 Tucui chaicunatami paicunaca micungacuna. Chaicunahuanmi sacerdotecuna cachun nombrangapaj, ñucapajlla chꞌicanyachingapaj paicunapaj juchata perdonarcani. Pero mana sacerdote cashpaca* mana micunachu can. Chaicunaca Diospajlla chꞌicanyachishcami can. 34 Sacerdoteta nombrangapaj cushca sacrificiomanta asha aicha, asha tanda cayandij tutamantapaj sobrajpica ninapi rupachingui. Chaicunaca ñucapajlla chꞌicanyachishcami can. Chaimantami mana micuna can.

35 Aaronhuanpish, paipaj churicunahuanpish ñuca mandashca shina tucuita rurangui. Paicunataca sacerdotecuna shina sirvichunca canchis punllacunapimi nombrana cangui. 36 Cada punllami juchamanta ofrendapajca shuj torota cuna cangui. Juchacunata perdonachun Diosta mañangapaj, altartapish chuyayachingapajmi chaita rurana cangui. Shinallataj Diosta adorangapaj chꞌicanyachishca cashcata ricuchingapajmi altar jahuapica aceiteta tallina cangui. 37 Altartaca canchis punllacunapimi chuyayachina cangui. Chashnami ñucapajlla cachun chꞌicanyachishca canga. Maijanpish altarta tuparijca chuyami cana can.

38 Altar jahuapica caitami cuna cangui. Shuj huatata charij ishqui carnerocunatami punllanta cuna cangui. 39 Punta malta carnerotaca tutamanta lado cungui. Cutin caishuj malta carnerotaca ña tutayacuita cungui. 40 Punta malta carnerota cushpaca shuj litro* aceite de olivahuan chagrushca ishqui libra yalli* alli harinatami cuna cangui. Shinallataj shuj litro vino ofrendatami cuna cangui. 41 Catij malta carnerotaca tutamanta ladoman cushca shinallatajmi grano ofrendahuan, vino ofrendahuan tutayaita cuna cangui. Tucui cai ofrendaca Jehová Diosman cushca ninahuan rupachishca, mishquijllata ashnacuj ofrendami canga. 42 Cai rupachishca ofrendataca cancunapish, cancunapaj huahua huahuacunapishmi tandanacuna carpa huasi yaicunapi, Jehová Diospaj ñaupajpi siempre cuna canguichij. Chaipimi ñucaca canhuan parlangapaj cancunapaj ñaupajpi ricurisha.

43 Chaipimi ñucaca israelitacunapaj ñaupajpi ricurisha. Ñuca poderhuanmi chai lugartaca ñucapajlla chꞌicanyachisha. 44 Tandanacuna carpa huasitapish, altartapishmi ñucapajlla chꞌicanyachisha. Aarontapish, paipaj churicunatapish ñuca sacerdotecuna cachunmi ñucapajlla chꞌicanyachisha. 45 Ñucaca israelitacunapurapimi causasha. Paicunapaj Diosmi casha. 46 Israelitacunaca ñuca paicunapaj Jehová Dios cashcatami yachangacuna. Paicunapurapi causangapajmi Egipto llajtamanta llujshichircani. Ñucaca paicunapaj Jehová Diosmi cani.

30 Inciensota rupachingapajca acacia caspimanta shuj altarta rurangui. 2 Altarca cuadradomi canga. Largomanca 44 centimetrocuna yallitami* midinga. Anchomanpish 44 centimetrocuna yallitami midinga. Altomanca 89 centimetrocunatami* midinga. Altarpish, gachucunapish shuj solo piezami canga. 3 Arca jahuatapish, ladocunatapish, gachucunatapish oro purohuan jahuata churangui. Arca muyundij filopica oro adornocunata labrangui. 4 Altar filomanta asha ucumanca oro argollacunatami churana cangui. Ishqui argollacunataca shuj ladopi, cutin ishqui argollacunataca caishuj ladopimi churana cangui. Chai argollacunaca caspicunata pasachishpa arcata apangapajmi canga. 5 Caspicunataca acacia maderamanta rurangui. Chaicunataca orohuan jahuata churangui. 6 Altartaca Leyta huaquichina arca cꞌuchullapi caj cortina ñaupajpi churangui. Leyta huaquichina arca tapa ñaupajpi churangui. Chaipimi ñucaca cambaj ñaupajpi ricurisha.

7 Aaronmi altar jahuapica mishquijllata ashnacuj inciensota rupachinga. Paica lamparacunata allichicushpami cada tutamanta inciensota cushnichinga. 8 Aaronca tutayaita lamparacunata japichicushpapishmi inciensota rupachinga. Cai inciensotaca paipish, paipaj huahua huahuacunapishmi Jehová Diospaj ñaupajpi siempre rupachingacuna. 9 Manapish cuna inciensota, rupachishca ofrendacunata, grano ofrendacunatapish altar jahuapica pi mana rupachinachu can. Vino ofrendacunatapish chai jahuapica pi mana tallinachu can. 10 Aaronca huatapica shuj cutinmi altartaca chuyayachina can. Paica juchamanta ofrendata cushca asha yahuarta altar gachucunapi churashpami chuyayachinga. Caitaca cada huatami siempre rurana can. Altarca Jehová Diospaj ñaupajpica yallitaj chuyami can” nircami.

11 Chai qꞌuipaca Jehová Diosca Moisestaca cashnami nirca: 12 “Can siempre shuj censota rurashpa israelitacunapuramanta cꞌaricunata yupacujpica paicunapaj causaita quishpichingapajmi cada uno shuj preciota Jehová Diosman pagana can. Chashnami paicunata registracujpica mana llaquichishca cangacuna. 13 Tucui registrashcacunami medio siclota* pagana can. Chai sicloca Diospaj huasipi pesaj siclo shinallatajmi pesana can. Shuj sicloca 20 guerás* cullquimi valin. Jehová Diosman cuna cullquica medio siclomi canga. 14 Tucui registrashcacunami 20 huatacunata charishpa o ashtahuan huatacunata charishpaca Jehová Diosman cuna cashcata pagana can. 15 Cancunapaj causaita quishpichingapajca Jehová Diosman cushca medio siclo cullquitaca charijcunapish mana yalli cunachu can, pobrecunapish mana menosta cunachu can. 16 Israelitacuna paicunapaj causaita quishpichingapaj cushca cullquitaca* chasquinguilla. Chasquishca cullquitaca tandanacuna carpa huasipi imalla rurana cashcapajmi cuna cangui. Chai cullquica Jehová Diospaj ñaupajpi israelitacuna yuyarishca cachunmi sirvinga. Shinallataj cancunapaj causaita quishpichingapajmi sirvinga” nircami.

17 Shinallataj Jehová Diosca Moisestaca cashnami nirca: 18 “Maillaringapajca shuj tanqueta rurangui. Shinallataj shuj basetapish rurangui. Tanquepish, basepish cobrehuan rurashcami canga. Chai tanquetaca tandanacuna carpa huasihuan altarhuan chaupipi churangui. Chaipica yacuta jundachingui. 19 Chaipimi Aaronpish, paipaj churicunapish maquicunata, chaquicunata maillaringacuna. 20 Tandanacuna carpa huasiman yaicushpa o altarpi sirvingapaj cꞌuchuyashpa ninahuan rupachishca ofrendacunata, cushnichishca ofrendacunata Jehová Diosman cunaman yaicushpaca yacuhuanmi maillarina can. Chashnami paicunaca mana huañungacuna. 21 Ama huañungapajca chaquicunata, maquicunatami maillarina can. Cunanmantami cai leytaca Aaronpish, paipaj huahua huahuacunapish siempre pajtachishpa catina can” nircami.

22 Jehová Diosca Moisestaca cashnapishmi nirca: 23 “Chai qꞌuipaca mishquijllata ashnacuj cosascunamantaca caicunata tandachingui: chaquishca mirrataca* 500 siclota tandachingui. Mishquijllata ashnacuj canelataca 250 siclota tandachingui. Mishquijllata ashnacuj calamotaca 250 siclota tandachingui. 24 Casiataca* 500 siclota tandachingui. Chaicunaca Diospaj huasipi pesaj siclo shinallatajmi pesana can. Chaicunataca casi chuscu litro* aceite de olivahuan tandachingui. 25 Tucui chaicunahuanmi Diospajlla chꞌicanyachingapaj agllana aceiteta rurana cangui. Chai aceiteca alli preparashcami* cana can. Diospajlla chꞌicanyachingapaj* agllana aceitemi canga.

26 Chai aceitetaca tandanacuna carpa huasipi, Leyta huaquichina arcapimi churana cangui. 27 Shinallataj mesapi, mesapi tiyaj tucui cosascunapi, candeleropi, candeleropi tiyaj tucui cosascunapi, inciensota rupachina altarpimi churana cangui. 28 Rupachishca ofrendata cuna altarpi, tucui chaipi tiyaj cosascunapi, tanquepi, tanquepaj basepipishmi churana cangui. 29 Chaicunataca ñucapajlla cachunmi chꞌicanyachina cangui. Maijanpish chaicunapi tuparijca chuyami cana can. 30 Aarontapish, paipaj churicunatapishmi agllana cangui. Ñuca sacerdotecuna cachunmi paicunataca chꞌicanyachina cangui.

31 Israelitacunataca cashnapish ningui: ‘Cunamantami cai aceiteca ñucapajlla chꞌicanyachingapaj ñuca agllana aceite canga. 32 Cai aceitetaca paipaj cuerpopica pi mana churarinachu can. Cai laya aceitetapish pi mana ruranachu can. Cai aceiteca ñucapajlla chꞌicanyachishcami can. Cancunapajpish siempremi Diospajlla chꞌicanyachishca aceite canga. 33 Maijanpish cai shina mishquijllata ashnacuj aceiteta rurashpa, manapish churana cashca runapi* churashpaca israelitacunapuramantaca huañuchishcami canga’ ningui” nircami.

34 Chai qꞌuipami Jehová Diosca Moisestaca cashna nirca: “Mishquijllata ashnacuj estacteta, mishquijllata ashnacuj uñata, mishquijllata ashnacuj galbanota, olíbano* purotapish tandachingui. Tucui cai mishquijllata ashnacuj cosascunataca* chai valillatataj tandachingui. 35 Tucui caicunahuanca inciensota rurangui. Cai mezclaca chuya, ñucapajlla chꞌicanyachishcami canga. Mishquijllata ashnacuj cosascunahuan rurashcami canga. Alli preparashca, cachihuan mishquiyachishcami canga. 36 Cai mezclamanta ashata japishpami ñutujlla polvo tucungacama cutana cangui. Chaimantaca ashata japishpami tandanacuna carpa huasipi, Leyta huaquichina arca ñaupajpi churana cangui. Chaipimi ñucaca cambaj ñaupajpi ricurisha. Cancunaca cai inciensoca Diospajlla ashtahuan chꞌicanyachishca cashcatami yachana canguichij. 37 Cai laya chagrushca inciensotaca cancunapajca mana ruranachu canguichij. Cancunaca cai inciensotaca Jehová Diospajlla chꞌicanyachishca cashcatami siempre yuyarina canguichij. 38 Maijanpish paillataj ashnachingapaj cai laya inciensota rurashpaca israelitacunapuramantaca huañuchishcami canga” nircami.

31 Chai qꞌuipaca Jehová Diosca Moisestaca cashnami nirca: 2 “Ricui, Judapaj familiamanta caj Bezaleltami agllashcani.* Paica Uripaj churimi can. Urí runaca Hurpaj churimi can. 3 Bezalelmanca ñuca espiritutami cusha. Chashnami paica alli yachaita, entendimientota, alli yuyaita charinga. Shinallataj tucui laya artesaniacunata ruranatami yachanga. 4 Paica sumaj dibujocunata ima shina ruranatami ricunga. Shinallataj orohuan, cullquihuan, cobrehuan trabajocunatami ruranga. 5 Rumicunatapish pꞌaquishpa, labrashpami alajata churanga. Maderahuanpish tucui laya cosascunatami ruranga. 6 Paita ayudachunca Danpaj familiamanta caj Ahisamacpaj churi Oholiabtami agllashcani. Shinallataj imatapish alli ruraj runacunapaj shungupimi ñuca alli yachaita churasha. Chashnami paicunaca canman tucui imalla mandashcata rurangacuna: 7 tandanacuna carpa huasita, Leyta huaquichina arcata, arca tapata, carpa huasipi tiyaj tucui cosascunata, 8 mesata, mesapi tiyaj tucui cosascunata, oro puro candelerota, candeleropaj tucui cosascunata, inciensota rupachina altarta, 9 rupachishca ofrendata cuna altarta, altarpaj tucui cosascunata, tanqueta, tanquepaj baseta, 10 sumajta ahuashca churanacunata, sacerdote Aarón churarina churanacunata, sacerdotecuna shina sirvingapaj Aaronpaj churicuna churarina churanacunata, 11 agllana aceiteta, Diospaj huasipi rupachina mishquijllata ashnacuj inciensotapishmi rurangacuna. Paicunaca canman tucui imalla mandashcatami rurangacuna” nircami.

12 Jehová Diosca Moisestaca cashnapishmi nirca: 13 “Israelitacunahuan parlashpaca cashna ningui: ‘Tucuimanta yallica ñuca sábado punllacunatami respetana canguichij. Cai punllacunaca cancunahuan ari ninacushcata ricuchij señalmi canga. Cai señalmi ñuca, Jehová Dios cancunata ñucapajlla chꞌicanyachishcata siempre yuyachinga. 14 Sábado punllataca ñucapajlla chꞌicanyachishca cashcamantami respetana canguichij. Maijanpish chai punllata yangapi churashpaca huañunami can. Maijanpish chai punllapi ima trabajota rurashpaca israelitacunapuramantaca huañuchishcami canga. 15 Cancunaca sujta punllacunatami trabajai tucunguichij. Pero séptimo punllaca sábado punlla, samarina jatun punllami can. Chai punllaca Jehová Diospajlla chꞌicanyachishcami can. Maijanpish sábado punllapi trabajashpaca huañunami can. 16 Israelitacunaca sábado punllataca respetanami can. Sábado punllataca siempremi yuyarina can. Cai ari ninacushcaca huiñaipajmi can. 17 Caica ñucahuan israelitacunahuan ari ninacushcata huiñaipaj ricuchij señalmi canga. Jehová Diosca cielotapish, allpatapish sujta punllacunapimi rurarca. Pero séptimo punllapica trabajanata saquishpami samarirca’ ningui” nircami.

18 Diosca Moiseshuan Sinaí urcupi parlashca qꞌuipaca Leyta quillcashca ishqui tablacunatami curca. Chaicunaca ishqui tabla rumicunami carca. Chai tablacunapimi Diosca paipaj dedohuan quillcarca.

32 Israelitacunaca Moisés urcumanta mana utca uriyamujtami ricurcacuna. Chaimi tucuicuna Aaronpaj muyundijpi tandanacushpaca: “Ñucanchijta ñaupashpa richun shuj diosta rurai. Egiptomanta ñucanchijta llujshichimuj Moiseshuan ima tucushcataca mana yachanchijchu” nircacuna. 2 Shina nijpimi Aaronca paicunataca: “Cancunapaj huarmicuna, cancunapaj churicuna, cancunapaj ushushicuna rinrincunapi aparishca oro aretecunata llujshichishpa apamuichij” nirca. 3 Chaita uyashpami tucuicuna paicunapaj rinrincunamanta oro aretecunata llujshichishpaca Aaronman curcacuna. 4 Aaronca orota japishpami shuj cincelhuan labrashpa biziman rijchaj shuj diosta rurarca. Chaimi paicunaca: “Israelitacunalla, caimi ñucanchij Dios. Paimi ñucanchijtaca Egipto llajtamanta llujshichirca” nishpa capari callarircacuna.

5 Aarón chaita ricushpaca bizipaj ñaupajpimi shuj altarta rurarca. Paica: “Cayami Jehová Diosta jatunyachingapaj shuj fiestata rurashun” nircami. 6 Chaimantami cayandij tutamanta utca jatarishpaca rupachishca ofrendacunatapish, Dioshuan alli tucungapaj sacrificiocunatapish cui callarircacuna. Chaita rurashca qꞌuipami gentecunaca micungapaj, ubyangapaj tiyarircacuna. Qꞌuipaca cushicungapajmi jatarircacuna.

7 Chaimi Jehová Diosca Moisestaca cashna nirca: “Caimanta uriyai. Egipto llajtamanta can llujshichishca puebloca millaitami rurashca. 8 ¡Paicunaca ñuca ima shina causanata yachachishca ñanmantaca ratomi caruyashcacuna! Biziman rijchaj shuj diosta rurashpami chai ñaupajpi cumurishpa, sacrificiocunatapish cushpa paicunaca: ‘Israelitacunalla, caimi ñucanchij Diosca. Paimi ñucanchijtaca Egipto llajtamanta llujshichirca’ nicuncuna” nircami. 9 Shinallataj Jehová Diosca Moisestaca cashnami nirca: “Cai gentecuna rumi shungu cajtami ricushcani. 10 Cunanca paicunata tucuchichun saqui. Paicunahuanca yallitaj pꞌiñarishcami cani. Paicunata tucuchishpaca canmantami shuj jatun llajtata rurasha” nircami.

11 Shina nijpimi Moisesca Jehová Diosta rogarishpaca cashna nirca: “Jehová Dioslla, cambaj pueblotaca Egipto llajtamantami cambaj jatun poderhuan, cambaj poderyuj maquihuan llujshichircangui. Chashna rurashca qꞌuipaca, ¿imamantataj paicunahuanca yallitaj pꞌiñaringuiyari? 12 Can chaita rurajpica egipciocunaca: ‘Paicunapaj Diosca mana alli munaihuanmi llujshichishca. Paicunataca cai allpamanta chingachingapajmi urcucunapi huañuchisha nishca’ ningacunami. Can yallitaj pꞌiñarishcata saquishpa cambaj pueblota llaquichisha nishcata cutin alli yuyaripai. 13 Canta sirvij Abrahán, Isaac, Israeltapish yuyaripai. Cambaj shutillapitaj jurashpami paicunamanca: ‘Cancunapaj huahua huahuacunataca jahua cielopi tiyaj estrellacunata shinami achcata mirachisha. Ñucallataj agllashca cai allpatami cancunapaj huahua huahuacunaman cusha. Cai allpaca paicunapajmi huiñaipaj canga’ nircanguimi” nircami.

14 Chaimi Jehová Diosca paipaj pueblota llaquichisha nishca cashpapish cutin alli yuyarirca.

15 Chai qꞌuipami Moisesca Leyta quillcashca ishqui tabla rumicunata paipaj maquipi apashpa urcumanta uriyarca. Chai tablacunapica ñaupaj ladomanpish, huasha ladomanpishmi ishquindij ladoman quillcashca carca. 16 Chai tabla rumicunataca Diosllatajmi rurashca carca. Chai tablacunapica paipaj shimicunatami quillcarca. 17 Josueca gentecuna bullata ruracujta, caparicujta uyashpami Moisesmanca: “Israelitacunapurapica macanacuipi capariricuj shinami uyarin” nirca. 18 Pero Moisesca:

Ñucaca shujtaj laya cantotami uyacuni” nircami.

19 Moisesca israelitacunapaj carpa huasicunaman cꞌuchuyashpa, bizita ricushpa, gentecuna bailacujta ricushpaca achcatami pꞌiñarirca. Chaimi paipaj maquipi charicushca tabla rumicunataca pambaman shitashpa urcu chaquipi ñuturca. 20 Chai huashaca paicuna rurashca bizita japishpami ninapi rupachirca. Qꞌuipaca polvoyangacamami ñuturca. Chai polvotami yacupi shitashpa chai yacutaca israelitacunaman ubyachirca. 21 Chaita rurashca qꞌuipami Moisesca Aarontaca: “¿Imamantataj cai gentecunataca jatun juchapi urmachircanguiyari?” nirca. 22 Chaimi Aaronca: “Ñuca amitolla, ama pꞌiñarichu. Cai pueblo mana allita ruranata munajtaca canllatajmi alli yachangui. 23 Paicunami ñucataca: ‘Ñucanchijta ñaupashpa richun shuj diosta rurai. Ñucanchijta Egiptomanta llujshichimuj Moiseshuan ima tucushcataca mana yachanchijchu’ nircacuna. 24 Chaimi ñucaca: ‘Maijanpish oromanta imata charishpaca llujshichishpa ñucaman cuichij’ nircani. Orota ninapi shitajpica biziman rijchaj cai dios llujshircallami” nircami.

25 Moisesca israelitacuna millaita ruracujtami ricurca. Chaitaca Aaronca mana jarcashcachu carca. Chashna millaita rurashcamantami israelitacunataca paicunapaj contracuna pꞌiñarca. 26 Chai qꞌuipami Moisesca israelitacunapaj carpa huasicunaman yaicunapi shayarishpaca: “¿Picunataj Jehová Diospaj lado canguichij? ¡Ñucapajman shamuichij!” nirca. Shina nijpimi tucui levitacunaca Moisespaj muyundijpi tandanacurcacuna. 27 Chai qꞌuipami Moisesca: “Israelitacunapaj Jehová Diosca: ‘Cada uno paipaj espadata japishpa carpa huasicunata shuj ladomanta caishuj ladocama pasashpa paipaj huauquita, paipaj vecinota, paipaj amigota huañuchichun’ ninmi” nirca. 28 Levitacunaca Moisés nishcatami rurarcacuna. Chai punllaca casi 3.000 cꞌaricunami huañurca. 29 Chai qꞌuipami Moisesca: “Tucui cancunaca cancunapaj churicunahuan, cancunapaj huauquicunahuanmi macanacushcanguichij. Chaimanta cunanca Jehová Diosta sirvingapaj chꞌicanyarichij. Paimi cunanca cancunata bendicianga” nirca.

30 Cayandij punllaca Moisesca israelitacunataca: “Cancunaca jatun juchatami rurashcanguichij. Cunanca urcuman huichiyashpami Jehová Diosta rogarigrini. Chashna rurajpica cancunapaj juchacunata perdonangapishchari” nircami. 31 Chai huashaca Moisesca cutinllataj urcuman huichiyashpami Jehová Diostaca cashna nirca: “¡Cai puebloca shuj jatun juchatami rurashca! ¡Paicunaca shuj oro diostami rurashcacuna! 32 Pero can munashpaca paicunapaj juchata perdonapai. Mana cashpaca can quillcashca libromanta ñuca shutita anchuchihuai” nircami. 33 Shinapish Jehová Diosca Moisestaca cashnami nirca: “Ñuca ñaupajpi juchata rurajpaj shutillatami ñuca libromantaca anchuchisha. 34 Cunanca ri, israelitacunataca ñuca nishca lugarman pushai. Ñuca angelmi canta ñaupashpa ringa. Paicunata juzgana punllami paicunapaj juchamantaca castigasha” nircami. 35 Jehová Diosca Aaronta shuj oro bizita rurachishcamantami israelitacunataca castigai callarirca.

33 Jehová Diosca Moisestaca cashnapishmi nirca: “Egiptomanta can llujshichishca gentecunahuan viajashpa cati. Abrahanman, Isaacman, Jacobman cushami nishpa jurashca allpaman ri. Paicunamanca: ‘Cai allpataca cambaj huahua huahuacunamanmi cusha’ nircanimi. 2 Canta ñaupashpa richunca shuj angeltami cachasha. Cananeocunata, amorreocunata, hititacunata, perizitacunata, heveocunata, jebuseocunataca cambaj ñaupajmantami llujshichishpa cachasha. 3 Achca leche, achca miel tiyan allpaman huichiyai. Pero ñucaca cancunahuanca mana rishachu. Cancunaca rumi shungumi canguichij. Chaimantami cancunataca ñanpi tucuchi tucuni” nircami.

4 Chai sinchi shimicunata uyashpaca israelitacunaca llaquillami sintirircacuna. Chaimantami paicunapaj adornocunataca mana churarircacuna. 5 Jehová Diosca Moisestaca: “Israelitacunataca: ‘Cancunaca rumi shungumi canguichij. Cancunapaj chaupita pasashpaca ratomi cancunataca tucuchiman. Chaimanta cancunahuan imata ruranata ñuca yuyaringacama cancunapaj adornocunataca ama churaringuichij’ ni” nircami. 6 Chaimi israelitacunaca paicunapaj adornocunata Horeb urcupi anchuchishpaca cutinca mana churarircacuna.

7 Chai qꞌuipaca Moisesca paipaj carpa huasitaca israelitacunapaj carpa huasicuna chaupimanta llujshichishpami asha caru carulla shayachirca. Chai carpa huasitaca tandanacuna carpa huasi* nishpami shutichirca. Jehová Diosta tapusha nijcunaca tandanacuna carpa huasimanmi rijcuna carca. Tandanacuna carpa huasica israelitacunapaj carpa huasicunamanta canllamanmi carca. 8 Tandanacuna carpa huasiman Moisés rijpica tucuicunami shayarijcuna carca. Paicunapaj carpa huasicuna ñaupajpimi shayarishpa saquirijcuna carca. Chashnami tandanacuna carpa huasiman Moisés yaicungacama paita ricushpa saquirijcuna carca. 9 Moisés chaiman yaicujpica chai ratomi shayacuj jatun pꞌuyu uriyaj carca. Chaipimi jatun pꞌuyuca Moiseshuan Dios parlangacama tandanacuna carpa huasi yaicunapi saquirij carca. 10 Israelitacuna tandanacuna carpa huasi yaicunapi shayacuj jatun pꞌuyuta ricushpaca tucuicunami paicunapaj carpa huasi yaicunapi cumurijcuna carca. 11 Jehová Diosca Moiseshuanca shuj runa caishuj runahuan parlaj shinami ñahui ñahui parlaj carca. Moisés chaimanta llujshishpa israelitacunapaj carpa huasicunaman tigrajpica paita ayudaj, paita sirvij Josueca tandanacuna carpa huasipimi saquirij carca. Josueca Nunpaj churimi carca.

12 Chai qꞌuipaca Moisesca Jehová Diostaca cashnami nirca: “Canca ‘Cai pueblota pushai’ ninguimi. Pero maijanta ñucahuan cachanataca mana nishcanguichu. Ashtahuanpish ‘Cantaca cambaj shutipimi rijsini.* Canca ñuca ñaupajpica allimi ricurishcangui’ nishcanguimi. 13 Cambaj ñaupajpi ñuca alli ricurishca cajpica canta rijsishpa catichun, cambaj ñaupajpi alli ricurishpa catichun cambaj ñancunata rijsichihuai. Cai gentecuna cambaj pueblo cashcataca amataj cungaripaichu” nircami. 14 Chaimi Diosca Moisestaca: “Canhuanca ñucallatajmi risha. Canmanca sumaj causaitami cusha”* nirca. 15 Chaimi Moisesca cashna nirca: “Canllataj ñucanchijhuan mana rina cashpaca caimanta llujshichunca ama saquichu. 16 ¿Cambaj ñaupajpi alli ricurishcataca ima shinataj ñucapish, cambaj pueblopish yachashunyari? Can ñucanchijhuan shamujpica ñucapish, cambaj pueblopish cai allpapi tiyaj shujtaj pueblocunamantaca chꞌicanmi cashun” nircami.

17 Jehová Diosca Moisestaca: “Can ñuca ñaupajpi alli ricurishcamanta, cambaj shutipi canta rijsishcamantaca can imata mañashcatami rurasha” nircami. 18 Chaimi Moisesca: “Cambaj sumaj achijnicujta ricuchun saquihuai” nirca. 19 Chashna nijpimi Diosca: “Ñuca sumaj achijnicuj cambaj ñaupajta pasachunmi saquisha. Canmanca ñuca shuti Jehová cashcatami huillasha. Ñuca munashcamanmi ñuca alli cashcata ricuchisha. Ñuca munashcamanmi ñuca llaquij cashcatapish ricuchisha” nirca. 20 Shinallataj Diosca Moisestaca: “Ñuca ñahuitaca mana ricui tucunguichu. Maijanpish ñuca ñahuita ricushpaca mana causashpa cati tucunchu” nircami.

21 Jehová Diosca cashnapishmi nirca: “Caipimi ñuca cꞌuchullapi shuj lugar tiyan. Chaipi tiyaj jatun rumi jahuapi shayari. 22 Chaita pasacushpa canman ñuca sumaj achijnicujta ricuchicushpaca cantaca chai jatun rumi jutcu ucupimi churasha. Chaipimi ñuca sumaj achijnicuj pasangacama cantaca ñuca maquihuan cuidasha. 23 Chai qꞌuipami ñuca maquita anchuchisha. Chaipimi canca ñuca huashata ricungui. Pero ñuca ñahuitaca mana ricunguichu” nircami.

34 Chai qꞌuipami Jehová Diosca Moisestaca cashna nirca: “Punta tabla rumicunata shinallataj ishqui tabla rumicunata rurai. Chaicunapica punta tabla rumicunapi imata quillcashcatami cutin quillcasha. Punta tabla rumicunataca ñutushpami shitarcangui. 2 Caya tutamanta Sinaí urcuman huichiyangapaj allichiri. Chai urcu jahuapimi ñuca ñaupajpi ricurina cangui. 3 Canhuanca pi ama huichiyachun, chai urcupica ama pi cachun. Chai urcu chaquipica ovejacunatapish, vacacunatapish mana michinachu can” nircami.

4 Chaimi Moisesca punta tabla rumicunata shinallataj ishqui tabla rumicunata rurarca. Cayandij tutamantaca utca jatarishpami Jehová Dios mandashca shina Sinaí urcuman huichiyarca. Paipaj maquipica ishqui tabla rumicunata apashpami rirca. 5 Chai qꞌuipami Jehová Diosca pꞌuyupi uriyamushpa Moisespaj cꞌuchullapi shayarirca. Jehová Diosca paipaj shutitami Moisesman huillarca. 6 Jehová Diosca Moisespaj ñaupajta pasashpaca cashnami nirca: “Jehová Diosmi cani. Jehová Diosmi cani. Ñucaca llaquij, alli shungu, pacienciata charij,* achcata cꞌuyaj,* pajtachij Diosmi cani. 7 Huaranga huarangacunaman mana tucurij cꞌuyaita ricuchij Diosmi cani. Pandarishcacunata, mana cazushcacunata, juchacunatapish perdonaj Diosmi cani. Pero culpata charijtaca sin castigoca manataj saquinichu. Yayacuna pandarishcamantaca paicunapaj huahuacunata, paicunapaj nietocunata, paicunapaj bisnietocunatapishmi castigani” nircami.

8 Chaimi Moisesca chai rato cungurishpa pambacama cumurirca. 9 Chaimantaca Moisesca: “Jehová Dioslla, cambaj ñaupajpi ñuca alli ricurishca cajpica ñucanchijta compañapai. Jehová Dioslla, ñucanchijcuna rumi shungu cajpipish ñucanchijta compañapai. Ñucanchij pandarishcata, ñucanchij juchata perdonashpa cambajlla cachun chasquipai” nircami. 10 Chashna nijpimi Diosca Moisestaca cashna nirca: “Cancunahuanca shuj ari ninacuitami ruragrini. Tucuicunapaj ñaupajpimi yallitaj sumaj ruraicunata rurasha. Chaicunataca tucui allpa pachapi o tucui llajtacunapi mana rurashcanichu. Cancunapurapi causaj tucui pueblocunami Jehová Dios rurashcataca ricungacuna. Cancunata ayudangapajca mancharina ruraicunatami rurasha.

11 Cunan cugrishca ñuca mandashcacunataca alli uyangui. Cambaj ñaupajmantaca amorreocunata, cananeocunata, hititacunata, perizitacunata, heveocunata, jebuseocunatami llujshichishpa cachasha. 12 Can rigrishca llajtapi causaj gentecunahuanca ñataj shuj ari ninacuita ruranguiman. Chashna rurashpaca shuj trampapimi urmangui. 13 Ashtahuanpish cancunaca paicunapaj adorana altarcunatami urmachina canguichij. Adorana pilarcunatapish ñutunami canguichij. Adorana postecunatapish* cuchunami canguichij. 14 Shujtaj diospaj ñaupajpica ama cunguringuichu. Ñucaca Jehová Diosmi cani. Ñucallata adorachun munaj cashcamantami ñucaca rijsishca cani. Ari, ñucaca ñucallata adorachun munaj Diosmi cani. 15 Chai allpapi causajcunahuanca ñataj shuj ari ninacuita ruranguichijman. Paicunapaj dioscunata adorashpa, chai dioscunaman sacrificiocunata cushpami paicunaca huainayancuna. Chashna ruracushpaca cancunatami invitangacuna. Chaimi cancunapish chai dioscunaman cushca sacrificiomanta micunguichij. 16 Qꞌuipaca cancunapaj churicunataca paicunapaj ushushicunahuanmi cazarachinguichij. Chai huarmicunaca paicunapaj dioscunata adorashpami huainayangacuna. Paicunaca cancunapaj churicunatapish paicunapaj dioscunata adorachishpami huainayachingacuna.

17 Ama fierrota yacuyachishpa dioscunata ruranguichu.

18 Levadura illaj tandata micuna fiestata rurangui. Levadura illaj tandataca ñuca mandashca shinami micuna cangui. Chaitaca ñuca agllashca punllapimi abib* quillapi canchis punllacunata rurana cangui. Canca abib quillapimi Egipto llajtamanta llujshircangui.

19 Punta huacharishca tucui churicunaca ñucapajmi can. Punta huacharishca cꞌari animalcunapish ñucapajmi can. Vacacunapaj, ovejacunapaj punta huacharishca cꞌari animalcunaca ñucapajmi can. 20 Punta huacharishca burropaj randica shuj ovejata cushpami pagana canguichij. Chai burromanta mana pagashpaca cungata pꞌaquishpami huañuchina canguichij. Shinallataj cancunapaj tucui punta churicunata quishpichingapajca paganami canguichij. Ñuca ñaupajpica maijanpish chushaj maquillaca ama ricurichun.

21 Sujta punllacunatami trabajana cangui. Pero séptimo punllapica samarinami* cangui. Yapuna, cosechana punllacuna cajpipish samarinami cangui.

22 Punta pꞌucushca trigota tandashpaca Semana nishca fiestata* rurangui. Cutin huata tucurijpica Tandana nishca fiestata* rurangui.

23 Cancunamanta tucui cꞌaricunami huatapica israelitacunapaj Amito Jehová Diospaj ñaupajpi quimsa cutin ricurina can. 24 Llajtacunataca cambaj ñaupajmantami llujshichishpa cachasha. Cambaj allpataca ashtahuanmi mirachisha. Huatapi quimsa cutin Jehová Diospaj ñaupajpi ricurinaman can huichiyajpica cambaj allpacunataca mana pi quichungachu.

25 Ñucaman shuj animalta sacrificiota shina cushpaca yahuartaca levadurahuan chagrushca tandahuan ama cungui. Pascua fiestapi cushca sacrificiotapish ama cayandij tutamantacama huaquichingui.

26 Cambaj chagrapi punta pꞌucushca alli granocunata Jehová Diospaj huasiman apamungui.

Huahua chivotaca paipaj mamapaj lechepica ama tꞌimbuchingui” nircami.

27 Jehová Diosca Moisestaca: “Cai shimicunata quillcai. Cai shimicunapi quillcashca shinallatajmi canhuanpish, israelitacunahuanpish shuj ari ninacuita ruracuni” nircami. 28 Moisesca chai urcupimi Jehová Dioshuan 40 punllacunata, 40 tutacunata saquirirca. Paica tandatapish mana micurcachu, yacutapish mana ubyarcachu. Diosca* tabla rumicunapimi ari ninacushca Chunga Mandamientocunata* quillcarca.

29 Chai qꞌuipaca Moisesca Leyta quillcashca ishqui tabla rumicunata paipaj maquipi apashpami Sinaí urcumanta uriyarca. Dioshuan parlacushcamantami paipaj ñahuica rayo shina achijnicurca. Pero paica chaitaca mana yacharcachu. 30 Aaronpish, tucui israelitacunapish Moisesta ricushpaca paipaj ñahuica rayo shina achijnicujtami ricurcacuna. Chaimantami paipajman cꞌuchuyanata mancharcacuna.

31 Pero Moisesca paicunatami cayarca. Chaimi Aaronpish, israelitacunata tucui pushajcunapish paipajman cꞌuchuyarcacuna. Chai huashami Moisesca paicunahuan parlarca. 32 Chai qꞌuipaca tucui israelitacunami paipajman cꞌuchuyarcacuna. Chaimi Moisesca Sinaí urcupi Jehová Dios cushca tucui mandamientocunata paicunaman huillarca. 33 Moisesca paicunahuan parlashca qꞌuipaca paipaj ñahuitaca shuj telahuanmi taparij carca. 34 Pero Moisesca Jehová Dioshuan parlangapaj paipaj ñaupajman rishpaca ñahuita taparishca telataca anchuchijmi carca. Chaimanta llujshishpaca imalla mandashcacunata chasquishcatami israelitacunaman huillaj carca. 35 Israelitacunaca Moisespaj ñahui rayo shina achijnicujtami ricurcacuna. Chaimi Moisesca cutinllataj paipaj ñahuitaca telahuan taparij carca. Dioshuan* cutin parlangacamami chashna taparishpa saquirij carca.

35 Chai qꞌuipaca Moisesca tucui israelitacunata tandachishpami cashna nirca: “Jehová Diosca caita rurachunmi mandashca: 2 cancunaca sujta punllacunatami trabajai tucunguichij. Pero séptimo punllaca cancunapajca chꞌicanyachishca punllami canga. Chai punllaca sábado punlla, Jehová Diospaj chꞌicanyachishca samarina jatun punllami canga. Maijanpish sábado punllapi trabajashpaca huañunami can. 3 Sábado punllapica ni maijanpaj huasipi ninataca ama japichinguichijchu” nircami.

4 Chai qꞌuipami Moisesca israelitacunataca cashna nirca: “Jehová Diosca caitami mandashca: 5 ‘Jehová Diospaj shuj ofrendata apamuichij. Shungumanta Jehová Diospaj ofrendata cusha nishpaca caicunata apamuichij: orota, cullquita, cobreta, 6 azul puchcata, morado puchcata, pucanicuj puchcata, alli lino puchcata, chivo millmata, 7 pucahuan teñishca carnero carata, foca carata, acacia caspita, 8 lamparacunapaj aceiteta, agllana aceitepi churana balsamota, mishquijllata ashnacuj inciensotapish apamuichij. 9 Efodpi, pectoralpi churangapajca ónice rumicunatapish, shujtaj rumicunatapish apamuichij.

10 Cancunapuramanta imatapish alli ruraj runacuna shamushpa Jehová Dios mandashcataca tucuita rurachun: 11 Diospaj carpa huasipaj tucui partecunata, Diospaj carpa huasipaj cꞌatata, ganchocunata, armazoncunata, barracunata, pilarcunata, pilarcunapaj basecunata,* 12 Arcata, arcapaj caspicunata, arca tapata, chꞌicanyachij cortinata, 13 mesata, mesapaj caspicunata, mesapaj tucui cosascunata, Diosman cushca tandata, 14 achijyachinapaj candelerota, candeleropaj cosascunata, lamparacunata, achijyachinapaj aceiteta, 15 inciensota rupachina altarta, altarpaj caspicunata, agllana aceiteta, mishquijllata ashnacuj inciensota, Diospaj carpa huasiman yaicunapi churana cortinata, 16 rupachishca ofrendata cuna altarta, altarpaj cobre parrillata, altarpaj caspicunata, altarpaj tucui cosascunata, tanqueta, tanquepaj baseta, 17 patiopaj cortinacunata, pilarcunata, pilarcunapaj basecunata, patioman yaicuna cortinata, 18 Diospaj carpa huasipaj estacacunata, patiopaj estacacunata, huascacunata, 19 Diospaj carpa huasipi sirvingapaj sumajta ahuashca churanacunata, sacerdote Aarón churarina churanacunata, sacerdotecuna shina sirvingapaj Aaronpaj churicuna churarina churanacunata rurachun’ nishpami mandashca” nircami.

20 Chaimi tucui israelitacunaca Moisespaj ñaupajmanta rircacuna. 21 Chai qꞌuipaca tucui israelitacunami paicunapaj shungu yuyachijpi Jehová Diosman cungapaj cosascunata aparcacuna. Chaicunataca tandanacuna carpa huasita rurangapajmi curcacuna. Shinallataj chaipi sirvingapaj imalla minishtirishcacunata churachun, sacerdote churarina churanacunata rurachunmi curcacuna. 22 Cꞌaricunapish, huarmicunapishmi ganchocunata, aretecunata, anillocunata, shujtaj joyacunata, oromanta shujtaj cosascunatapish shungumanta curcacuna. Tucui paicunami oro ofrendacunata* Jehová Diosman curcacuna. 23 Shinallataj azul puchcata, morado puchcata, pucanicuj puchcata, alli lino puchcata, chivo millmata, pucahuan teñishca carnero carata, foca carata charijcunaca tucuicunami curcacuna. 24 Cullquita, cobreta Jehová Diosman cusha nijcunaca tucuicunami curcacuna. Tandanacuna carpa huasipi trabajocunata rurangapaj acacia caspita charijcunaca tucuicunami curcacuna.

25 Imatapish alli ruraj huarmicunaca tucuicunami maquihuan puchcashpa paicuna puchcashcata curcacuna: azul puchcata, morado puchcata, pucanicuj puchcata, alli lino puchcatami curcacuna. 26 Imatapish alli ruraj huarmicunami paicunapaj shungu yuyachijpica chivo millmata puchcarcacuna.

27 Shinallataj israelitacunata pushajcunapish efodpi, pectoralpi churangapajmi ónice rumicunata, shujtaj rumicunatapish curcacuna. 28 Paicunaca balsamotapish, aceitetapishmi curcacuna. Chai aceiteca achijyachinapaj, agllana aceitepaj, mishquijllata ashnacuj inciensopajmi carca. 29 Jehová Dios Moisesman mandashca trabajocunata rurangapajca tucui cꞌaricuna, tucui huarmicunami paicunapaj shungu yuyachishcata curcacuna. Israelitacunaca chaicunataca shungumanta cushca ofrendata shinami Jehová Diosman curcacuna.

30 Chai qꞌuipaca Moisesca israelitacunataca cashnami nirca: “Ricuichij, Jehová Diosca Judapaj familiamanta caj Bezaleltami agllashca. Paica Uripaj churimi can. Urí runaca Hurpaj churimi can. 31 Bezalelmanca Diosca paipaj espiritutami cushca. Chaimi paica alli yachaita, entendimientota, alli yuyaita charinga. Shinallataj tucui laya artesaniacunata ruranatami yachanga. 32 Paica sumaj dibujocunata ima shina ruranatami ricunga. Shinallataj orohuan, cullquihuan, cobrehuan trabajocunatami ruranga. 33 Rumicunatapish pꞌaquishpa, labrashpami alajata churanga. Maderahuanpish tucui laya sumaj cosascunatami ruranga. 34 Diosca Bezalelpaj shungupipish, Danpaj familiamanta caj Ahisamacpaj churi Oholiabpaj shungupipish shujtajcunaman alli yachachij cana yuyaitami cushca. 35 Paicunamanca artesano shina trabajocunata rurachun, dibujocunata rurachun, azul puchcahuan, morado puchcahuan, pucanicuj puchcahuan, alli lino puchcahuan bordadocunata rurachun, alli ahuaj cachunmi alli yachaita cushca. Chai runacunaca tucui laya trabajocunata, tucui laya dibujocunatami rurangacuna.

36 Bezalelca Oholiabhuan, imatapish alli ruraj runacunahuanmi Diospaj carpa huasipaj trabajocunata ruranga. Jehová Dios mandashca shinami ruranga. Paicunamanmi Jehová Diosca alli yachaita, entendimientota cushca” nircami.

2 Chai qꞌuipami Moisesca Bezalelta, Oholiabta, imatapish alli ruraj runacunatapish cayarca. Jehová Diosca paicunapaj shungupimi alli yachaita churashca carca. Moisesca paicunapaj shungu yuyachijpi chai trabajota rurasha nijcunatami cayarca. 3 Moisesca paicunamanmi Diospaj carpa huasipaj trabajocunata rurachun israelitacuna cushca ofrendacunataca tucuita curca. Pero israelitacunaca cada tutamantami shungumanta cushca ofrendacunata apashpa catircacuna.

4 Diospaj carpa huasipaj trabajocunata rurai callarishca qꞌuipami imatapish alli ruraj tucui trabajadorcunaca shuj shuj rishpa 5 Moisestaca: “Jehová Dios mandashca trabajota rurangapajca gentecunaca ña yalli yallimi apamucuncuna” nircacuna. 6 Chaimi Moisesca israelitacuna causashca tucui carpa huasicunapica: “Tandanacuna carpa huasita rurangapaj cosascunataca ña ama ashtahuan apamuichijchu” nirca. Chaimi gentecunaca ña mana ashtahuan cosascunata apamurcacuna. 7 Dios mandashca trabajota rurangapajca suficiente materialmi tiyarca. Yalli yallimi tiyarca.

8 Chai qꞌuipami imatapish alli ruraj tucui trabajadorcunaca Diospaj carpa huasitaca chunga telacunahuan rurarcacuna. Chai telacunataca caupushca alli lino puchcahuan, azul puchcahuan, morado puchcahuan, pucanicuj puchcahuanmi rurarcacuna. Bezalelca chai telacunapica querubincunatami bordarca. 9 Cada telami largomanca 12 metrocunata* midirca. Anchomanca casi ishqui metrocunatami* midirca. Tucui telacunami chaillatataj midirca. 10 Chai qꞌuipaca pichca telacunatami tandachirca. Cutin caishuj pichca telacunatapish separadomi tandachirca. 11 Punta grupopi separashca último tela puntapica caishuj grupopi separashca telacuna tupanacunpimi azul puchcahuan rinrincunata rurarca. Caishuj grupopi separashca último tela puntapipish punta grupopi separashca telacuna tupanacunpimi chashnallataj rurarca. 12 Shuj grupo telacunapaj puntapica 50 rinrincunatami rurarca. Caishuj grupo telacunapaj puntapipish 50 rinrincunatami rurarca. Ishquindij grupo telacuna tupanacunpimi chai rinrincunataca chꞌimbapura saquirichun rurarca. 13 Ultimopica 50 oro ganchocunatami rurarca. Chai ganchocunahuanmi ishqui grupopi separashca telacunataca tandachirca. Chashnami Diospaj carpa huasica shuj solo saquirirca.

14 Chai qꞌuipaca Diospaj carpa huasita tapachunmi chivo millmamanta 11 telacunata rurarca. 15 Cada telami largomanca 13 metrocunata* midirca. Anchomanca casi ishqui metrocunatami midirca. Tucui 11 telacunami chaillatataj midirca. 16 Chai huashaca pichca telacunatami tandachishpa sirarca. Caishuj sujta telacunatapishmi tandachishpa sirarca. 17 Qꞌuipaca punta grupo telacuna puntapi, caishuj grupo telacuna tupanacunpimi 50 rinrincunata rurarca. Shinallataj caishuj grupo telacuna puntapi, punta grupo telacuna tupanacunpimi 50 rinrincunata rurarca. 18 Ishquindij grupopi separashca telacunata tandachishpa shuj solota rurangapajmi cobremanta 50 ganchocunata rurarca.

19 Shinallataj Diospaj carpa huasipajca pucahuan teñishca carnero carahuanmi cꞌatata rurarca. Cutin carnero carahuan cꞌatashca jahuapi churangapajca foca carahuanmi shuj cꞌatata rurarca.

20 Chai qꞌuipaca Diospaj carpa huasipajca acacia caspimantami armazoncunata rurarca. Chai armazoncunaca huichiman shayachishcami carca. 21 Cada armazonmi largomanca chuscu metrocuna yallita* midirca. Anchomanca casi 67 centimetrocunatami* midirca. 22 Cada armazonmi ishqui espigacunata charirca. Chai espigacunaca ishquindijmi igual carca. Chashnami Diospaj carpa huasipajca tucui armazoncunata rurarca. 23 Diospaj carpa huasi ura ladopajca 20 armazoncunatami rurarca. 24 Shinallataj 20 armazoncunapaj chaquipica cullquimanta 40 basecunatami* rurarca. Shuj armazón chaquipica ishqui espigacuna yaicuchunmi ishqui basecuna tiyarca. Caishuj armazoncuna chaquipipish cada ishqui espigacuna yaicuchunmi ishqui basecuna tiyarca. 25 Cutin Diospaj carpa huasi janaj ladopajca 20 armazoncunatami rurarca. 26 Shinallataj cullquimanta 40 basecunatami rurarca. Shuj armazón chaquipica ishqui basecunami tiyarca. Caishuj armazoncunapaj chaquipipish ishqui basecunami tiyarca.

27 Diospaj carpa huasi huasha ladopajpish* sujta armazoncunatami rurarca. 28 Diospaj carpa huasi huasha ladomanca esquinacuna tucuchunmi ishqui armazoncunata rurarca. 29 Cada armazoncunami ucu ladopica ishqui parteta charirca. Jahua ladopica chai ishqui partecunaca punta argollapimi shujlla tucurca. Chashnami esquinapi saquirij ishqui armazoncunahuanca rurarca. 30 Pusaj armazoncunaca cullquimanta rurashca 16 basecunatami charirca. Shuj armazón chaquipica ishqui basecunami tiyarca.

31 Shinallataj acacia caspimanta barracunatami rurarca: pichca barracunaca Diospaj carpa huasi shuj lado armazoncunata tandachingapajmi carca, 32 caishuj pichca barracunaca Diospaj carpa huasi caishuj lado armazoncunata tandachingapajmi carca, caishuj pichca barracunaca Diospaj carpa huasi huasha lado armazoncunata tandachingapajmi carca. 33 Chaupipi churashca barraca armazoncuna churashca chaupicamami saquirca. Chai barraca shuj ladomanta caishuj ladocamami pasarca. 34 Armazoncunataca orohuanmi jahuata churarca. Barracunata pasachingapajca oro argollacunatami rurarca. Barracunatapish orohuanmi jahuata churarca.

35 Diospaj carpa huasipaj cortinataca azul puchcahuan, morado puchcahuan, pucanicuj puchcahuan, caupushca alli lino puchcahuanmi rurarca. Chai cortinapica querubincunatami bordarca. 36 Cortinata huarcungapajca acacia caspimantami chuscu pilarcunata rurarca. Chai pilarcunataca orohuanmi jahuata churarca. Shinallataj oro ganchocunatami rurarca. Pilarcunapajpish cullquimanta chuscu basecunatami rurarca. 37 Chai qꞌuipaca Diospaj carpa huasiman yaicunapica azul puchcahuan, morado puchcahuan, pucanicuj puchcahuan, caupushca alli lino puchcahuan ahuashpami shuj cortinata rurarca. 38 Shinallataj pichca pilarcunata, pilarcunapaj ganchocunatami rurarca. Pilarcuna puntatapish, abrazaderacunatapish* orohuanmi jahuata churarca. Pero pilarcunapaj pichca basecunaca cobremanta rurashcami carca.

37 Chai qꞌuipaca Bezalelca acacia caspimantami Arcata rurarca. Chai Arcaca largomanca shuj metro yallitami* midirca. Anchomanca casi 67 centimetrocunatami* midirca. Altomanpish casi 67 centimetrocunatami midirca. 2 Arca ucutapish, Arca jahuatapish oro purohuanmi jahuata churarca. Arca muyundij filopica oro adornocunatami labrarca. 3 Chai qꞌuipaca chuscundij chaquicuna jahuapi churangapajmi orota yacuyachishpa chuscu argollacunata rurarca: ishqui argollacunataca shuj ladoman, ishqui argollacunataca caishuj ladomanmi churarca. 4 Shinallataj caspicunataca acacia maderamantami rurarca. Chaicunataca orohuanmi jahuata churarca. 5 Chai caspicunataca Arcata apangapaj cada ladopi caj argollacunapimi churachirca.

6 Shinallataj arca tapataca oro purohuanmi rurarca. Chai tapaca largomanca shuj metro yallitami midirca. Anchomanca casi 67 centimetrocunatami midirca. 7 Shinallataj martillohuan labrashpami ishqui oro querubincunata rurarca. Chai querubincunataca tapa ishquindij ladopimi rurarca. 8 Shuj querubintaca tapa shuj ladopimi churarca, caishuj querubintaca tapa caishuj ladopimi churarca. Chai querubincunataca tapa ishquindij ladopimi rurarca. 9 Querubincunapaj ishqui alascunaca tapa jahuata chutashcami carca. Querubincunaca chꞌimbapurami carca. Paicunapaj ñahuica arca tapatami ricucurca.

10 Shinallataj acacia caspimantami shuj mesata rurarca. Chai mesaca largomanca 89 centimetrocunatami* midirca. Anchomanca 44 centimetrocuna yallitami* midirca. Altomanca casi 67 centimetrocunatami midirca. 11 Chai mesataca oro purohuanmi jahuata churarca. Mesa muyundij filopica oro adornocunatami labrarca. 12 Chai qꞌuipaca tucui muyundijtaca canchis centimetrocuna yalli* shuj franjatami churarca. Chai franja muyundij filopica oro adornocunatami labrarca. 13 Shinallataj orota yacuyachishpami chuscu argollacunata rurarca. Chaicunataca chuscu chaquicunata charichishca chuscu esquinacunapimi churarca. 14 Chai argollacunaca franja cꞌuchullapimi carca. Chaicunaca caspita pasachishpa mesata apangapajmi carca. 15 Mesata apana caspicunataca acacia maderamanta rurashpami orohuan jahuata churarca. 16 Chai qꞌuipaca mesa jahuapi churana shujtaj cosascunatapish oro purohuanmi rurarca: platocunata, copacunata, vino ofrendacunata tallingapaj tazoncunata, jarracunatapish oro purohuanmi rurarca.

17 Qꞌuipaca oro purohuanmi shuj candelerota rurarca. Chaica shuj solo piezami carca. Martillohuan labrashpa rurashcami carca. Chai candeleroca shuj baseta, chaupipi huichiman shayacuj shuj ejeta, copacunata, globocunata, sisacunatami charirca. 18 Candeleropaj chaupi ejemantaca sujta maquicunami llujshirca: quimsa maquicunaca shuj ladoman, quimsa maquicunaca caishuj ladomanmi llujshirca. 19 Shuj ladomanca cada maquicunami almendro sisa shina quimsa copacunata charirca. Chaipica globocunata, sisacunata shuj shujta churashcami carca. Caishuj ladomanpish cada maquicunami almendro sisa shina quimsa copacunata charirca. Chaipica globocunata, sisacunata shuj shujta churashcami carca. Candelero chaupi ejemanta llujshij sujta maquicunami chashna rurashca carca. 20 Candelero chaupi ejeca almendro sisa shina chuscu copacunatami charirca. Chaipica globocunata, sisacunata shuj shujta churashcami carca. 21 Candeleropaj chaupi ejemanta llujshij punta ishqui maquicunapaj ucupica shuj globomi tiyarca. Catij ishqui maquicunapaj ucupica shujtaj globomi tiyarca. Catij ishqui maquicunapaj ucupipish shujtaj globomi tiyarca. Candeleropaj chaupi ejemanta llujshij sujta maquicunami chashna carca. 22 Globocunapish, maquicunapish tucui candeleromi shuj solo pieza carca. Martillohuan labrashca oro purohuan rurashcami carca. 23 Chai qꞌuipaca canchis lamparacunata, pinzacunata,* braserillocunatapish* oro purohuanmi rurarca. 24 Candelerotapish, tucui shujtaj cosascunatapish shuj talento* oro purohuanmi rurarca.

25 Shinallataj acacia caspimantami inciensota rupachina altarta rurarca. Chai altarca cuadradomi carca. Largomanca 44 centimetrocuna yallitami midirca. Anchomanpish 44 centimetrocuna yallitami midirca. Altomanca 89 centimetrocunatami midirca. Altarpish, gachucunapish shuj solo piezami carca. 26 Chai qꞌuipaca altar jahuatapish, ladocunatapish, gachucunatapish oro purohuanmi jahuata churarca. Altar muyundij filopica oro adornocunatami labrarca. 27 Altar filomanta asha ucumanca oro argollacunatami churarca. Ishqui argollacunataca shuj ladopi, cutin ishqui argollacunataca caishuj ladopimi churarca. Chai argollacunaca caspicunata pasachishpa altarta apangapajmi carca. 28 Chai qꞌuipaca caspicunataca acacia maderamantami rurarca. Chaicunataca orohuanmi jahuata churarca. 29 Shinallataj Diospajlla chꞌicanyachingapaj agllana aceiteta, mishquijllata ashnacuj inciensotami rurarca. Chaicunaca alli preparashcami* carca.

38 Shinallataj rupachishca ofrendata cuna altartaca acacia caspimantami rurarca. Chai altarca cuadradomi carca. Largomanca ishqui metrocuna yallitami* midirca, anchomanpish ishqui metrocuna yallitami midirca. Altomanca shuj metro yallitami* midirca. 2 Altar chuscu esquinacunapica gachucunatami rurarca. Altarpish, gachucunapish shuj solo piezami carca. Qꞌuipaca altartaca cobrehuanmi jahuata churarca. 3 Chai huashaca altarpaj tucui cosascunatami rurarca: baldecunata, palacunata, tazoncunata, jatun trinchecunata, braserillocunatami rurarca. Tucui chai cosascunataca cobrehuanmi rurarca. 4 Altarpajca cobremanta shuj parrillatami rurarca. Chai parrillataca altar ucupimi chaupi chaupillapi churarca, filomanta asha ucumanmi churarca. 5 Shinallataj chuscu esquinacunapimi chuscu argollacunata rurarca. Chai argollacunataca caspicunata pasachingapajmi cobre parrilla rectopi churarca. 6 Chai qꞌuipaca caspicunataca acacia maderamantami rurarca. Chai caspicunataca cobrehuanmi jahuata churarca. 7 Altarta apangapajca altar ladocunapi churashca argollacunapimi caspicunata pasachirca. Altarca shuj jutcu caja shinami carca. Tabloncunahuan rurashcami carca.

8 Chai qꞌuipaca cobre tanqueta, tanquepaj cobre basetami rurarca. Chaicunataca Diospaj carpa huasi yaicunapi sirvij huarmicunapaj espejocunahuanmi rurarca.

9 Chai huashaca patiotami rurarca. Ura ladoman saquirij patiopica 44 metrocuna yallita* midij cortinatami caupushca alli lino puchcahuan rurarca. 10 Chai patiopica cobremanta 20 pilarcuna, cobremanta 20 basecunami* tiyarca. Pilarcunapi tiyaj ganchocunapish, abrazaderacunapish* cullquimanta rurashcami carca. 11 Janaj ladoman saquirij patiopipish cortinacunami tiyarca. Chai cortinacunaca 44 metrocuna yallitami midirca. Shinallataj cobremanta 20 pilarcuna, cobremanta 20 basecunami tiyarca. Pilarcunapaj ganchocunapish, abrazaderacunapish cullquimanta rurashcami carca. 12 Inti huashicun ladoman saquirij patiopipish cortinacunami tiyarca. Chai cortinacunaca 22 metrocunatami midirca.* Shinallataj chunga pilarcuna, chunga basecunami tiyarca. Pilarcunapaj ganchocunapish, abrazaderacunapish cullquimanta rurashcami carca. 13 Inti llujshin ladoman saquirij patioca anchomanca 22 metrocunatami midirca. 14 Patioman yaicuna shuj ladopica casi canchis metrocunata* midij cortinacunami tiyarca. Chaipica quimsa pilarcunapish, quimsa basecunapishmi tiyarca. 15 Patioman yaicuna caishuj ladomanpish casi canchis metrocunata midij cortinacunami tiyarca. Chaipipish quimsa pilarcuna, quimsa basecunami tiyarca. 16 Patio muyundijpi tiyaj cortinacunaca caupushca alli lino puchcahuan rurashcami carca. 17 Pilarpaj basecunaca cobremanta rurashcami carca. Ganchocunapish, abrazaderacunapish cullquimanta rurashcami carca. Pilar puntaca cullquihuan jahuata churashcami carca. Patiopi churana tucui pilarcunapajpish cullquimanta rurashca abrazaderacunami tiyarca.

18 Patioman yaicuna cortinaca azul puchcahuan, morado puchcahuan, pucanicuj puchcahuan, caupushca alli lino puchcahuan ahuashcami carca. Chai cortinaca largomanca casi iscun metrocunatami* midirca. Altomanca ishqui metrocuna yallitami midirca. Chai cortinaca altomanca patiopi churashca cortinacuna shinallatajmi midirca. 19 Chai cortinata churana chuscu pilarcunapish, chuscu basecunapish cobremanta rurashcami carca. Ganchocunapish, abrazaderacunapish cullquimanta rurashcami carca. Pilar puntapica cullquihuan jahuata churashcami carca. 20 Diospaj carpa huasipaj estacacunapish, patio muyundijpaj estacacunapish cobremanta rurashcami carca.

21 Leyta huaquichina arcata churashca Diospaj carpa huasita rurangapajca cai materialcunatami utilizarcacuna. Moisesca chaicunamanta shuj inventariota* rurachunmi mandarca. Levitacunaca sacerdote Aaronpaj churi Itamar pushajpimi paicunaman mingashcata pajtachircacuna. 22 Judapaj familiamanta caj Bezalelca Jehová Dios Moisesman mandashcatami tucuita rurarca. Bezalelca Uripaj churimi carca. Urí runaca Hurpaj churimi carca. 23 Bezaleltaca Danpaj familiamanta caj Ahisamacpaj churi Oholiabmi ayudarca. Oholiabca artesano, bordadormi carca. Shinallataj azul puchcahuan, morado puchcahuan, pucanicuj puchcahuan, alli lino puchcahuan ahuajmi carca.

24 Diospaj carpa huasipaj utilizashca oroca caiman chaiman cuyuchishpa cushca oro ofrenda valillatajmi carca: 29 talento,* 730 siclomi* carca. Chai sicloca Diospaj huasipi pesaj siclo shinallatajmi pesana carca. 25 Israelitacunapuramanta censopi registrashca runacuna apashca cullquica 100 talento, 1.775 siclomi carca. Chai sicloca Diospaj huasipi pesaj siclo shinallatajmi pesana carca. 26 Censopi registrashca 20 huatacunata o ashtahuan huatacunata charij cꞌaricunaca cada unomi medio siclota aparcacuna. Chai sicloca Diospaj huasipi pesaj siclo shinallatajmi pesana carca. Tucui registrashcacunaca 603.550 cꞌaricunami carca.

27 Diospaj carpa huasipaj basecunata, chꞌicanyachij cortinapaj basecunata rurangapajca 100 talento cullquitami yacuyachircacuna. 100 basecunapajca 100 talentotami utilizarcacuna. Cada basepajmi shuj talentota utilizarcacuna. 28 Shinallataj 1.775 siclo cullquihuanca pilarcunapaj ganchocunatami rurarca. Pilarcuna puntatapish cullquihuanmi jahuata churarca. Chashnami shujllata rurarca.

29 Israelitacuna cushca cobreca: 70 talento, 2.400 siclomi carca. 30 Bezalelca tucui caicunahuanmi Diospaj carpa huasi yaicunapi tiyaj basecunata, cobre altarta, cobre parrillata, altarpaj tucui cosascunata, 31 patio muyundijpi tiyaj basecunata, patioman yaicunapi tiyaj basecunata, Diospaj carpa huasipaj estacacunata, patio muyundijpaj tucui estacacunatapish rurarca.

39 Paicunaca azul puchcahuan, morado puchcahuan, pucanicuj puchcahuanca Diospaj carpa huasipi sirvingapajmi sumajta ahuashca churanacunata rurarcacuna. Aaronpajpish sacerdote churarina churanacunatami rurarcacuna. Moisesman Jehová Dios mandashca shinami rurarcacuna.

2 Bezalelca efodtaca orohuan, azul puchcahuan, morado puchcahuan, pucanicuj puchcahuan, caupushca alli lino puchcahuanmi rurarca. 3 Chaimantaca martillohuan tacashpami ñañujlla oro laminacunata rurarcacuna. Chai qꞌuipami Bezalelca chai laminacunataca puchcata shina rurangapaj ñañujllata uturca. Paica oro puchcahuan, azul puchcahuan, morado puchcahuan, pucanicuj puchcahuanmi alli lino telapi bordarca. Chashnami efodta bordarca. 4 Efodtaca ñaupaj ladotapish, huasha ladotapish shuj solota rurashpami rigracuna jahuapi tandachircacuna. 5 Ahuashca cinturonca efodpi sirashcami carca. Chai cinturonca efodta huatashcami carca. Chaipish orohuan, azul puchcahuan, morado puchcahuan, pucanicuj puchcahuan, caupushca alli lino puchcahuan rurashcami carca. Chaitaca Jehová Dios Moisesman mandashca shinami rurarcacuna.

6 Chai qꞌuipaca ishqui uchilla oro monturacunapica ónice rumicunatami churarcacuna. Chai rumicunapica shuj sellota labraj shinami Israelpaj churicunapaj shuticunata labrashpa churarcacuna. 7 Chai rumicunataca Bezalelca Israelpaj churicuna yuyarishca cachunmi rigracuna jahuapi tandachishca efod jahuapi churarca. Jehová Dios Moisesman mandashca shinami rurarca. 8 Chai qꞌuipaca efodta rurashca shinallatajmi pectoraltapish orohuan, azul puchcahuan, morado puchcahuan, pucanicuj puchcahuan, caupushca alli lino puchcahuan rurarca. 9 Pectoralca doblajpica cuadradomi saquirirca. Largomanca 22 centimetrocuna yallitami* midirca. Anchomanpish 22 centimetrocuna yallitami midirca. 10 Chuscu fila rumicunatapishmi churarcacuna. Callari filapica rubí rumi, topacio rumi, esmeralda rumimi carca. 11 Catij filapica turquesa rumi, zafiro rumi, jaspe rumimi carca. 12 Quimsa filapica léshem* nishca rumi, ágata rumi, amatista rumimi carca. 13 Chuscu filapica crisólito rumi, ónice rumi, jade rumimi carca. Tucui rumicunami uchilla oro monturacunapi churashca carca. 14 Chai rumicunapica Israelpaj 12 churicunapaj shuticunami quillcashca carca. Cada shutimi Israelpaj 12 familiacunamanta shuj familiata ricuchirca. Cada rumipimi shuticunaca shuj sellota labrashca shina labrashpa churashca carca.

15 Chai qꞌuipaca pectoralpi churangapajmi huatucuna shina caupushca oro puro uchilla cadenacunata rurarcacuna. 16 Chaimantaca ishqui uchilla oro monturacunatami rurarcacuna. Shinallataj ishqui uchilla oro argollacunatami rurarcacuna. Chai ishqui argollacunataca pectoral ishqui esquinacunapimi* churarcacuna. 17 Chai qꞌuipaca pectoral esquinacunapi caj ishqui argollacunapica ishqui oro huatucunatami pasachircacuna. 18 Chai qꞌuipaca chai ishqui huatucunapaj ishqui puntataca uchilla ishqui monturacunata pasachishpami efod ñaupaj ladoman saquirichun rigra jahuapi huatarcacuna. 19 Chai qꞌuipaca ishqui uchilla oro argollacunatami rurarcacuna. Chaicunataca efodhuan tupaj pectoral ucu lado ishqui esquinacunapimi churarcacuna. 20 Shinallataj efod ñaupaj ladopipish shujtaj ishqui uchilla oro argollacunatami rurarcacuna. Chai argollacunaca rigracuna jahuapi tandachishca efod uripi, efodta charichina cꞌuchullapi, ahuashca cinturón jahua ladopimi carca. 21 Ultimopica pectoral ama cuyurichunmi pectoralpi tiyaj argollacunatapish, efodpi tiyaj argollacunatapish caupushca azul puchcahuan huatarcacuna. Chashnami pectoralca maiman mana cuyurishpa ahuashca cinturón jahua ladopi saquirirca. Jehová Dios Moisesman mandashca shinami rurarcacuna.

22 Bezalelca efod ucupi churarina sin mangas churanataca tucuitami azul puchcahuan rurarca. Chai churanaca ahuashcami carca. 23 Sin mangas churana chaupipica uma yaicuna cuellotami rurarca. Soldadocunapaj churanapi rurashca cuello shinami carca. Ama lliquirichunca cuello muyundij filoca sirashcami carca. 24 Sin mangas churana doblashca filopica azul puchcahuan, morado puchcahuan, pucanicuj puchcahuan caupushpami granadacunata rurarcacuna. 25 Shinallataj oro puro uchilla campanacunatami rurarcacuna. Chaicunataca sin mangas churanata doblashca tucui filopimi granadacuna chaupipi churarcacuna: granadacunatapish, uchilla campanacunatapish shuj shujmi churarcacuna. 26 Uchilla campanacunatapish, granadacunatapish shuj shujmi churarcacuna. Sin mangas churana doblashca tucui filopimi chaicunataca churarcacuna. Chai churanaca sacerdote shina sirvingapajmi carca. Jehová Dios Moisesman mandashca shinami rurarcacuna.

27 Aaronpajpish, Aaronpaj churicunapajpish shuj ahuaj runa ahuashca alli linohuan rurashca churanacunatami rurarcacuna. 28 Shinallataj alli linohuanmi sumaj turbanteta rurarcacuna. Aaronpaj churicunapajpish alli linohuanmi turbanteta rurarcacuna. Cutin caupushca alli lino puchcahuanca calzoncillocunatami rurarcacuna. 29 Shinallataj caupushca alli lino puchcahuan, azul puchcahuan, morado puchcahuan, pucanicuj puchcahuanmi shuj cinturonta rurarcacuna. Jehová Dios Moisesman mandashca shinami rurarcacuna.

30 Ultimopica oro purohuanmi achijnicuj placata rurarcacuna. Chaica Dios agllashcata ricuchij jucha illaj señalmi carca. Chai placapica shuj sellota labraj shina labrashpami: “Jehová Diosca jucha illajmi” nishca shimicunata churarcacuna. 31 Chai qꞌuipaca turbantepi huatangapajmi placapica caupushca azul puchcata churarcacuna. Jehová Dios Moisesman mandashca shinami rurarcacuna.

32 Chashnami tandanacuna carpa huasipaj* tucui cosascunata rurashpa tucuchircacuna. Israelitacunaca Jehová Dios Moisesman mandashcatami tucuita rurarcacuna. Paicunaca Dios mandashca shinami rurarcacuna.

33 Chashnami Diospaj carpa huasipaj tucui partecunataca Moisespajman aparcacuna. Telacunata, Diospaj carpa huasipi tiyaj tucui cosascunatami aparcacuna: ganchocunata, armazoncunata, barracunata, pilarcunata, basecunata,* 34 pucahuan teñishca carnero cara cꞌatata, foca cara cꞌatata, chꞌicanyachij cortinata, 35 Leyta huaquichina arcata, arcata apana caspicunata, arca tapata, 36 mesata, mesapi tiyaj tucui cosascunata, Diosman cushca tandata, 37 oro purohuan rurashca candelerota, filapi churashca candeleropaj lamparacunata, candeleropaj tucui cosascunata, achijyachinapaj aceiteta, 38 oro altarta, agllana aceiteta, mishquijllata ashnacuj inciensota, Diospaj carpa huasi yaicunapi churana cortinata, 39 cobre altarta,* altarpaj cobre parrillata, altarpaj caspicunata, altarpaj tucui cosascunata, tanqueta, tanquepaj baseta, 40 patiopaj cortinacunata, patiopaj pilarcunata, pilarpaj basecunata, patio yaicunapi churana cortinata, huascacunata, estacacunata, Diospaj carpa huasipi sirvingapaj rurashca tucui shujtaj cosascunata, 41 Diospaj carpa huasipi sirvingapaj sumajta ahuashca churanacunata, sacerdote Aarón churarina churanacunata, sacerdotecuna shina sirvingapaj Aaronpaj churicuna churarina churanacunatami aparcacuna.

42 Israelitacunaca Jehová Dios Moisesman mandashca shinami tucui trabajocunata rurarcacuna. 43 Moisesca paicuna rurashca trabajota ricushpaca Jehová Dios mandashca shina tucuita rurashcatami ricurca. Chaimi Moisesca paicunata bendiciarca.

40 Chai qꞌuipami Jehová Diosca Moisestaca cashna nirca: 2 “Primer quillapaj punta punllapica Diospaj carpa huasita* shayachingui. 3 Chaipimi Leyta huaquichina arcataca cortina huashapi churashpa pacana cangui. 4 Shinallataj mesatapishmi chai ucupi churana cangui. Mesa jahuapi churana cosascunatapishmi alajata allichina cangui. Candelerotapishmi chai ucupi churashpa lamparacunata japichina cangui. 5 Chai qꞌuipaca Leyta huaquichina arca ñaupajpimi inciensota rupachina oro altarta churana cangui. Shinallataj Diospaj carpa huasiman yaicuna cortinataca maipi churana cashcapimi churana cangui.

6 Rupachishca ofrendata cuna altartaca Diospaj carpa huasi* ñaupajpimi churana cangui. 7 Tandanacuna carpa huasihuan altarhuan chaupipimi shuj tanqueta churashpa chaipi yacuta jundachina cangui. 8 Chai huashaca carpa muyundijpimi shuj patiota rurana cangui. Patioman yaicunapica cortinatami huarcuna cangui. 9 Chai qꞌuipaca agllana aceiteta churashpami Diospaj carpa huasitapish, tucui chaipi imalla tiyajtapish chꞌicanyachina cangui. Diospaj carpa huasitapish, tucui shujtaj cosascunatapishmi chuyayachina cangui. 10 Shinallataj rupachishca ofrendata cuna altartapish, chaipi tiyaj tucui cosascunatapishmi chꞌicanyachina cangui. Chai altartaca yallitaj chuya cachunmi chuyayachina cangui. 11 Shinallataj tanquetapish, tanquepaj basetapishmi chꞌicanyachishpa chuyayachina cangui.

12 Chai huashaca Aarontapish, Aaronpaj churicunatapishmi tandanacuna carpa huasi yaicunaman cꞌuchuyachina cangui. Paicunataca yacuhuanmi maillana cangui. 13 Aaronmanca sacerdote churarina churanatami churachina cangui. Shinallataj paita agllashpami ñucapajlla cachun chꞌicanyachina cangui. Paica ñuca sacerdotemi canga. 14 Chai huashaca Aaronpaj churicunatami cꞌuchuyachina cangui. Paicunamanpishmi churanacunata churachina cangui. 15 Paicunatapish ñuca sacerdotecuna cachunmi paicunapaj yayata agllashca shinallataj agllana cangui. Chashna agllashcamantami paicunaca siempre sacerdotecuna canga. Paicunapaj huahua huahuacunapishmi sacerdotecuna canga” nircami.

16 Moisesca Jehová Dios mandashcatami tucuita rurarca. Paica Dios nishca shinallatajmi rurarca.

17 Moisesca ishqui huatapi, primer quillapaj punta punllapimi Diospaj carpa huasita shayachirca. 18 Moisesca Diospaj carpa huasita rurashpaca basecunatami churarca. Basecuna jahuapica armazoncunatami churarca. Barracunatapish maipi churana cashcapimi churarca, pilarcunatapishmi shayachirca. 19 Moisesca Jehová Dios mandashca shinami Diospaj carpa huasi jahuataca telacunahuan cꞌatachirca. Cutin chai telacuna jahuataca caracunahuanmi cꞌatachirca.

20 Chai qꞌuipaca Leyta quillcashca tabla rumicunata japishpami Arca ucupi huaquichirca. Arca argollacunapica caspicunatami churarca. Shinallataj arca tapatapishmi churarca. 21 Cutin Arcataca Diospaj carpa huasi ucupimi churarca. Chꞌicanyachij cortinataca maipi churana cashcapimi churarca. Chashnami Leyta huaquichina arcaca Jehová Dios mandashca shina pacalla saquirirca.

22 Chai huashaca mesataca tandanacuna carpa huasipi, Diospaj carpa huasi janaj ladoman, cortina caishuj ladomanmi churarca. 23 Chai mesa jahuapica Jehová Dios mandashca shinami Jehová Diospaj ñaupajpi montonashca tandacunata allichirca.

24 Candelerotaca tandanacuna carpa huasi ucupimi churarca. Diospaj carpa huasi ura ladoman, mesa chꞌimbapurapimi churarca. 25 Shinallataj Jehová Dios mandashca shinami Jehová Diospaj ñaupajpi lamparacunata japichirca.

26 Chai qꞌuipaca tandanacuna carpa huasipimi cortina ñaupajpi oro altarta churarca. 27 Jehová Dios mandashca shina mishquijllata ashnacuj inciensota rupachingapajmi chashna churarca.

28 Chai huashaca Diospaj carpa huasiman yaicunapimi cortinata churarca.

29 Shinallataj Jehová Dios mandashca shinami rupachishca ofrendata cuna altartaca Diospaj carpa huasi* ñaupajpi churarca. Chai altarca rupachishca ofrendata cungapaj, grano ofrendata cungapajmi carca.

30 Chai qꞌuipami tanquetaca tandanacuna carpa huasihuan altarhuan chaupipi churarca. Chai tanquepica maillaringapajmi yacuta jundachirca. 31 Chaipimi Moisespish, Aaronpish, Aaronpaj churicunapish maquicunata, chaquicunata maillarircacuna. 32 Jehová Dios Moisesman mandashca shinami tandanacuna carpa huasiman cada yaicuita o altarman cada cꞌuchuyaita maillarijcuna carca.

33 Ultimopica Diospaj carpa huasi muyundijpi, altar muyundijpimi patiota rurarca. Patioman yaicunapica cortinatami churarca.

Chashnami Moisesca chai obrata tucuchirca. 34 Chai qꞌuipami tandanacuna carpa huasitaca pꞌuyu taparca. Chaimi Diospaj carpa huasipica Jehová Diospaj sumaj achijnicuj jundarca. 35 Moisesca tandanacuna carpa huasi jahuapi pꞌuyu cashcamantami chaimanca mana yaicui tucurca. Diospaj carpa huasipica Jehová Diospaj sumaj achijnicujmi jundarca.

36 Israelitacunaca chaquishca pambapi puricushpaca Diospaj carpa huasi jahuamanta pꞌuyu anchurijpimi paicunapaj carpa huasicunata pascajcuna carca. 37 Pero pꞌuyu mana anchurijpica paicunapaj carpa huasicunataca mana pascajcunachu carca. Pꞌuyu anchuringacamami shuyajcuna carca. 38 Israelitacunaca paicunapaj tucui viajepimi punllaca Diospaj carpa huasi jahuapi Jehová Diospaj pꞌuyu cajta ricurcacuna. Cutin tutaca chai jahuapica lunyacuj nina cajtami ricurcacuna.