LEVÍTICO

1 Jehová Diosca Moisesta cayashpaca tandanacuna carpa huasimantami paihuan parlarca. Paitaca cashnami nirca: 2 “Israelitacunahuan* parlashpaca cashna ningui: ‘Maijanpish paipaj animalcunamanta shuj ofrendata shina Jehová Diosman cusha nishpaca huagrata cashpa, ovejata cashpa, chivota cashpami apamuna can.

3 Maijanpish shuj huagrata rupachishca ofrendata shina cusha nishpaca sano cꞌari animaltami cuna can. Paica tucui shunguhuanmi chai ofrendataca Jehová Diospaj ñaupajpi, tandanacuna carpa huasi yaicunapi cuna can. 4 Rupachishca ofrendata shina cushca animalpaj uma jahuapimi maquita churana can. Chashna rurajpimi Diosca chai ofrendata chasquishpa paipaj juchacunata perdonanga.

5 Chai qꞌuipaca malta torotaca Jehová Diospaj ñaupajpimi huañuchina can. Chai toropaj yahuartaca Aaronpaj churi sacerdotecunami Diosman cungacuna. Shinallataj chai yahuartaca tandanacuna carpa huasi yaicunapi caj altar tucui ladocunapimi tsirapangacuna.* 6 Rupachishca ofrendata shina cushca animaltaca lluchushpami mirga mirgata pꞌitina can. 7 Aaronpaj churi sacerdotecunami altarpi ninata japichishpa chai jahuapica yantata churana can. 8 Shinallataj Aaronpaj churi sacerdotecunaca mirga mirgapi* pꞌitishca aichatapish, umatapish, huiratapish* altar jahuapi rupacuj yanta jahuapimi churangacuna. 9 Tripacunatapish,* chaqui tullucunatapish yacuhuanmi maillana can. Tucui chaicunatami sacerdoteca altar jahuapi rupachishpa cushnichina can. Chaica rupachishca ofrendami can. Jehová Diosman cushca ninahuan rupachishca, mishquijllata ashnacuj ofrendami can.

10 Maijanpish carnerota cashpa, chivota cashpa rupachishca ofrendata shina cusha nishpaca sano cꞌari animaltami cuna can. 11 Chai animaltaca altar janaj ladopimi Jehová Diospaj ñaupajpi huañuchina can. Chai animalpaj yahuartaca Aaronpaj churi sacerdotecunami altar tucui ladocunapi tsirapangacuna. 12 Paica aichataca mirga mirgatami pꞌitinga. Cutin sacerdoteca aichatapish, umatapish, huiratapish altar jahuapi rupacuj yanta jahuapimi churanga. 13 Paica tripacunatapish, chaqui tullucunatapish yacuhuanmi maillanga. Cutin sacerdoteca tucuitami altar jahuapi rupachishpa cushnichina can. Chaica rupachishca ofrendami can. Jehová Diosman cushca ninahuan rupachishca, mishquijllata ashnacuj ofrendami can.

14 Shinapish alasyuj animalcunamanta rupachishca ofrendata shina Jehová Diosman cusha nishpaca urpicunata cashpa o huahua palomacunata cashpami cuna can. 15 Sacerdotemi alasyuj animalcunataca cada unota altar jahuapi churashpa Diosman cunga. Chai animaltaca silluhuan tispishpami cungata pꞌitinga. Chaita rurashca huashaca altar jahuapimi rupachishpa cushnichinga. Pero chai animalpaj yahuartaca altar ladopimi shutuchinga. 16 Paica plumacunatapish pelashpa, buchitapish anchuchishpami chaicunataca altar ladopi, inti llujshin ladoman saquirij ushpata* shitanapi shitana can. 17 Alascuna cꞌuchullata cuchushpami pascana can, chashnapish ishquipica mana chaupinachu can. Chaitami sacerdoteca altar jahuapi, ninata japichishca yanta jahuapi rupachishpa cushnichina can. Chaica rupachishca ofrendami can. Jehová Diosman cushca ninahuan rupachishca, mishquijllata ashnacuj ofrendami can.

2 Maijanpish Jehová Diosman grano ofrendata cushpaca pai cushca ofrendaca alli* harinahuan rurashcami cana can. Chai harina jahuapica aceitetami tallina can. Aceite jahuapica olibanotami* churana can. 2 Chai qꞌuipami ofrendataca Aaronpaj churi sacerdotecunapajman apana can. Cutin sacerdoteca aceitehuan, tucui olibanohuan churashca maqui junda alli harinata japishpami ofrendamanta shuj parteta* rupachishpa cushnichinga. Chaica Jehová Diosman cushca ninahuan rupachishca, mishquijllata ashnacuj ofrendami canga. 3 Saquirishca grano ofrendaca Aaronpajpish, paipaj churicunapajpishmi can. Caica Jehová Diosman cushca ninahuan rupachishca ofrendacunamanta cashcamantami Diospajlla ashtahuan chꞌicanyachishca can.

4 Hornopi cusashca grano ofrendata cushpaca chai ofrendaca alli harinahuan rurashcami cana can. Shinallataj aceitehuan rurashca levadura illaj roscas tanda o aceitehuan jahuata llihuishca levadura illaj ñañujlla galletasmi cana can.

5 Cambaj grano ofrenda sartenpi rurashca cajpica chai ofrendaca aceitehuan chagrushca levadura illaj alli harinahuan rurashcami cana can. 6 Mirga mirgata chaupishpami chai jahuapica aceiteta tallina cangui. Chaica grano ofrendami can.

7 Cambaj grano ofrenda cacerolapi rurashca cajpica aceitehuan chagrushca alli harinahuan rurashcami cana can. 8 Chaicunahuan rurashca grano ofrendata Jehová Diospajman apashpami sacerdoteman cuna cangui. Cutin paimi chai ofrendataca altarman apanga. 9 Chai qꞌuipami sacerdoteca grano ofrendamanta ashata japishpa shuj parteta altar jahuapi rupachishpa cushnichinga. Chaica Jehová Diosman cushca ninahuan rupachishca, mishquijllata ashnacuj ofrendami canga. 10 Saquirishca grano ofrendaca Aaronpajpish, paipaj churicunapajpishmi canga. Caica Jehová Diosman cushca ninahuan rupachishca ofrendacunamanta cashcamantami Diospajlla ashtahuan chꞌicanyachishca can.

11 Levadurahuan chagrushca grano ofrendataca Jehová Diosmanca imata mana cunachu canguichij. Jehová Diosman cushca ninahuan rupachishca ofrendataca levadurahuan rurashcatapish, mielhuan* rurashcatapish mana rupachishpa cushnichinachu canguichij.

12 Chaicunataca Jehová Diosmanmi punta pꞌucushca grano ofrendacunata shina cui tucunguichij. Pero mishquijllata ashnacuj ofrenda shina cachunca altarpica mana rupachinachu canguichij.

13 Tucui grano ofrendacunatami cachihuan sazonana cangui. Cambaj Dios ari nishcata* yuyachij cachitaca tucui ofrendacunapi churangui. Shuj ofrendata siempre cushpaca cachitapishmi cuna cangui.

14 Jehová Diosman punta pꞌucushca grano ofrendata cushpaca ninapi camchashca mushuj granota,* cutashca mushuj granotami cuna cangui. Chaica cambaj granocunamanta punta pꞌucushca grano ofrendami canga. 15 Grano ofrenda jahuapica aceitetami tallina cangui. Cutin aceite jahuapica olibanotami churana cangui. Chaica shuj grano ofrendami can. 16 Chai qꞌuipami sacerdoteca asha ofrendata japishpa shuj parteta rupachishpa cushnichinga. Paica cutashca asha granota, aceiteta, tucui olibanotapishmi rupachinga. Chaica Jehová Diosman cushca ninahuan rupachishca ofrendami canga.

3 Maijanpish Dioshuan alli tucungapaj sacrificiota cusha nishpaca torota cashpa o vacata cashpami Jehová Diospaj ñaupajpica sano animalta cuna can. 2 Paica ofrendata shina cushca animalpaj uma jahuapimi paipaj maquita churana can. Chai animaltaca tandanacuna carpa huasi yaicunapimi huañuchina can. Chai animalpaj yahuartaca Aaronpaj churi sacerdotecunami altar tucui ladocunapi tsirapangacuna. 3 Paica Dioshuan alli tucungapaj cushca sacrificiomantaca ninahuan rupachishca ofrendata shinami Jehová Diosman ashata cuna can. Tripacuna jahuapi tiyaj huiratapish, tripacunapi pegarishca tucui huiratapishmi cuna can. 4 Shinallataj lomo cꞌuchullapi caj ishqui riñoncunata, riñoncunapi tiyaj huiratapishmi cuna can. Riñoncunandijmi higadopi tiyaj huiratapish* anchuchinga. 5 Tucui chaicunatami Aaronpaj churicunaca altar jahuapi rupachishpa cushnichingacuna. Rupacuj yanta jahuapimi rupachishca ofrendata churashca jahuapi cushnichingacuna. Caica Jehová Diosman cushca ninahuan rupachishca, mishquijllata ashnacuj ofrendami can.

6 Maijanpish Jehová Dioshuan alli tucungapaj shuj ovejata o shuj chivota sacrificiota shina cusha nishpaca huarmi animal cajpipish, cꞌari animal cajpipish sanotami cuna can. 7 Malta carnerota cusha nishpaca Jehová Diospaj ñaupajmanmi apana can. 8 Paica ofrendata shina cushca animalpaj uma jahuapimi paipaj maquita churana can. Chai animaltaca tandanacuna carpa huasi yaicunapimi huañuchina can. Chai animalpaj yahuartaca Aaronpaj churi sacerdotecunami altar tucui ladocunapi tsirapangacuna. 9 Paica Dioshuan alli tucungapaj cushca sacrificiomanta huirataca Jehová Diosman cushca ninahuan rupachishca ofrendata shinami cuna can. Huira chupataca siqui tullu mucupi pꞌitishpami tucui anchuchinga. Tripacuna jahuapi tiyaj huiratapish, tripacunapi pegarishca tucui huiratapishmi anchuchinga. 10 Shinallataj lomo cꞌuchullapi caj ishqui riñoncunata, riñoncunapi tiyaj huiratapishmi anchuchinga. Riñoncunandijmi higadopi tiyaj huiratapish anchuchinga. 11 Sacerdotemi tucui chaicunataca altar jahuapi rupachishpa cushnichinga. Chaica micunami* can, Jehová Diosman cushca ninahuan rupachishca ofrendami can.

12 Maijanpish shuj chivota cusha nishpaca Jehová Diospaj ñaupajmanmi apana can. 13 Paica ofrendata shina cushca animalpaj uma jahuapimi paipaj maquita churana can. Chai animaltaca tandanacuna carpa huasi yaicunapimi huañuchina can. Chai animalpaj yahuartaca Aaronpaj churi sacerdotecunami altar tucui ladocunapi tsirapangacuna. 14 Jehová Diosman cushca ninahuan rupachishca ofrendata shinami tripacuna jahuapi tiyaj huiratapish, tripacunapi pegarishca tucui huiratapish cuna can. 15 Shinallataj lomo cꞌuchullapi caj ishqui riñoncunata, riñoncunapi tiyaj huiratapishmi cuna can. Riñoncunandijmi higadopi tiyaj huiratapish anchuchinga. 16 Sacerdotemi tucui chaicunataca altar jahuapi rupachishpa cushnichinga. Chaica micunami can, ninahuan rupachishca mishquijllata ashnacuj ofrendami can. Tucui huirami Jehová Diospaj can.

17 Cancunaca huiratapish, yahuartapish mana nunca micunachu canguichij. Cai leytaca cancunapish, cancunapaj huahua huahuacunapishmi maipi causashpapish siempre pajtachina canguichij’ ningui” nircami.

4 Jehová Diosca Moisestaca cashnapishmi nirca: 2 “Israelitacunataca cashna ningui: ‘Maijan runa mana munashpapish juchata rurashpa, Jehová Dios ama rurachun nishcata rurashpaca caitami rurana can:

3 Agllashca sacerdote juchata rurashpa, tucui israelitacuna chai juchamanta culpayuj tucujpica juchata rurashcamantami Jehová Diosmanca juchamanta ofrendata shina shuj sano malta torota cuna can. 4 Paica chai torotaca Jehová Diospaj ñaupajman, tandanacuna carpa huasi yaicunamanmi apana can. Chai toropaj umapi maquita churashpami Jehová Diospaj ñaupajpi huañuchinga. 5 Chai qꞌuipami agllashca sacerdoteca toropaj asha yahuartaca tandanacuna carpa huasi ucuman apanga. 6 Sacerdoteca yahuarpimi paipaj dedota shutujyachinga. Chashnami asha yahuartaca Diospajlla chꞌicanyachishca ucupi tiyaj cortina ñaupajpi, Jehová Diospaj ñaupajpi canchis* cutin tsirapanga. 7 Shinallataj sacerdoteca asha yahuartaca mishquijllata ashnacuj inciensota rupachina altar gachucunapimi churanga. Chai altarca Jehová Diospaj ñaupajpimi tandanacuna carpa huasipi can. Cutin toropaj sobrashca yahuartaca rupachishca ofrendata cuna altar chaquipimi tallinga. Chai altarca tandanacuna carpa huasi yaicunapimi can.

8 Chai qꞌuipaca juchamanta ofrendata shina cushca toropaj tucui huiratami anchuchinga. Tripacuna jahuapi tiyaj huiratapish, tripacunapi pegarishca huiratapishmi anchuchinga. 9 Shinallataj lomo cꞌuchullapi caj ishqui riñoncunata, riñoncunapi tiyaj huiratapishmi anchuchinga. Riñoncunandijmi higadopi tiyaj huiratapish anchuchinga. 10 Dioshuan alli tucungapaj sacrificiota cushca toromanta anchuchishca shinallatajmi tucui huirata anchuchinga. Chaimi sacerdoteca rupachishca ofrendata cuna altar jahuapi tucuita rupachishpa cushnichinga.

11 Pero toropaj carata, tucui aichata, umata, chaqui tullucunata, tripacunata, majadata, 12 toromanta tucui imalla sobrashcatami carpa huasicunamanta canllaman, ushpata* shitana chuya lugarman apachun mandanga. Paica tucuitami rupacuj yanta jahuapi rupachinga. Chaitaca ushpata shitanapimi rupachina can.

13 Tucui israelitacuna mana munashpapish shuj juchata rurashpa culpayuj tucujpi, paicuna* mana yachajpi Jehová Dios ama rurachun nishcata rurajpi, 14 pero chai juchata rurashcata yachaj chayajpica paicunaca* juchamanta ofrendata shinami shuj malta torota cuna can. Chai torotaca tandanacuna carpa huasi ñaupajmanmi apana can. 15 Chaipimi israelitacunata pushajcunaca* Jehová Diospaj ñaupajpi toropaj umapi paicunapaj maquicunata churangacuna. Chai torotaca Jehová Diospaj ñaupajpimi huañuchingacuna.

16 Chai qꞌuipami agllashca sacerdoteca toropaj asha yahuartaca tandanacuna carpa huasi ucuman apanga. 17 Sacerdoteca yahuarpimi paipaj dedota pambana can. Chashnami asha yahuartaca Diospajlla chꞌicanyachishca ucupi tiyaj cortina ñaupajpi, Jehová Diospaj ñaupajpi canchis cutin tsirapanga. 18 Chai qꞌuipaca asha yahuartaca Jehová Diospaj ñaupajpi caj altar gachucunapimi churanga. Chai altarca tandanacuna carpa huasipimi can. Cutin sobrashca yahuartaca rupachishca ofrendata cuna altar chaquipimi tallinga. Chai altarca tandanacuna carpa huasi yaicunapimi can. 19 Toropaj tucui huirata anchuchishpami altar jahuapi rupachishpa cushnichinga. 20 Chai torotaca juchamanta ofrendata cushca caishuj torota shinallatajmi ruranga. Sacerdoteca israelitacuna paicunapaj juchamanta perdonashca cachunmi chai torota cunga. Chashnami paicunaca perdonashca canga. 21 Paica chai torotaca carpa huasicunamanta canllaman apachunmi mandanga. Punta torota rupachishca shinallatajmi rupachinga. Chai toroca israelitacunata perdonangapaj juchamanta ofrendami can.

22 Israelitacunamanta shuj pushaj mana munashpapish juchata rurashpa, Jehová Dios ama rurachun nishcata rurashpa culpayuj tucushpa, 23 o shuj mandamientota mana cazushpa juchata rurashcata cuentata cushpaca shuj sano malta chivotami ofrendata shina cuna can. 24 Paica malta chivopaj uma jahuapi paipaj maquita churashpami rupachishca ofrendata shina cushca animalta huañuchinallapitaj huañuchinga. Jehová Diospaj ñaupajpimi huañuchinga. Chai animalca juchamanta ofrendami can. 25 Sacerdoteca juchamanta ofrendata shina cushca animalpaj asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca rupachishca ofrendata cuna altar chaquipimi tallinga. 26 Shinallataj sacerdoteca Dioshuan alli tucungapaj sacrificiomanta cushca huirata shinallatajmi juchamanta cushca ofrendamanta huiratapish altar jahuapi rupachishpa cushnichinga. Sacerdoteca chai runa paipaj juchamanta perdonashca cachunmi chaita ruranga. Chashnami chai runaca perdonashca canga.

27 Israelitacunamanta maijan runapish mana munashpapish Jehová Dios ama rurachun nishcata rurashpa culpayuj tucushpa, 28 o shuj juchata rurashcata cuentata cushpaca pai juchata rurashcamantami shuj sano malta chivata juchamanta ofrendata shina cuna can. 29 Paica chai animalpaj uma jahuapi maquita churashpami rupachishca ofrendata shina cushca animalta huañuchinallapitaj huañuchinga. 30 Sacerdoteca ofrendamanta asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca altar chaquipimi tallinga. 31 Dioshuan alli tucungapaj cushca sacrificiomanta huirata anchuchij shinallatajmi chai ofrendamantapish tucui huirata anchuchinga. Chai qꞌuipami sacerdoteca Jehová Diosman cushca mishquijllata ashnacuj ofrendata shina huirataca altar jahuapi rupachishpa cushnichinga. Chai runa paipaj juchamanta perdonashca cachunmi chaita ruranga. Chashnami paica perdonashca canga.

32 Pero juchamanta ofrendata shina shuj malta ovejata cushpaca sano huarmi ovejatami cuna can. 33 Paica chai animalpaj uma jahuapi paipaj maquita churashpami juchamanta ofrendata shina huañuchinga. Rupachishca ofrendata shina cushca animalta huañuchinallapitajmi huañuchinga. 34 Sacerdoteca juchamanta ofrendata cushca animalmanta asha yahuarta paipaj dedohuan japishpami rupachishca ofrendata cuna altar gachucunapi churanga. Sobrashca yahuartaca altar chaquipimi tallinga. 35 Chai animalmantapish Dioshuan alli tucungapaj sacrificiota shina cushca malta carneromanta huirata anchuchishca shinallatajmi tucui huirata anchuchinga. Chai qꞌuipami sacerdoteca huirataca altar jahuapi rupachishpa cushnichinga. Jehová Diosman cushca ninahuan rupachishca ofrendacuna jahuapimi cushnichinga. Chai runa paipaj juchamanta perdonashca cachunmi chaita ruranga. Chashnami paica perdonashca canga.

5 Maijanpish shujtaj runa juchata rurajta ricushpa o juchata rurashcata yachaj chayashpa, chai juchamanta testigocunata huillanaman cayacujta uyashca jahua huillanaman mana rishpaca culpayujmi canga. Chashna pandarishcamantaca castigashcami canga.

2 Maijanpish ima mapa cashcapi tuparishpaca mapami* tucushca. Huañushca sacha animal cajpipish, charina animal cajpipish, allpapi achcapura causaj uchilla animalcuna cajpipish chaicunata tuparishpaca mapami tucushca. Mana cuentata cushpapish paica culpayujmi tucushca. 3 Maijanpish mana yachashpa mapa caj runata tuparishpa o ima mapa cosascunata tuparishpaca qꞌuipaman chaita cuentata cushpapish culpayujmi tucun.

4 Maijanpish allita rurangapaj o mana allita rurangapaj rato jurashpa, qꞌuipaman rato jurashcata cuentata cushpaca culpayujmi tucun.*

5 Maijanpish caicunamanta culpayuj tucushpaca ima juchata rurashcatami huillana can. 6 Shinallataj chai juchata rurashcamantami culpamanta ofrendata Jehová Diosman cuna can. Juchamanta ofrendata shinaca shuj malta huarmi ovejata cashpa o shuj malta chivata cashpami cuna can. Chai qꞌuipami sacerdoteca chai runa paipaj juchamanta perdonashca cachun chai animalta cunga.

7 Shinapish shuj ovejata cungapaj mana suficienteta charishpaca pai juchata rurashcamantami culpamanta ofrendata shina Jehová Diosmanca ishqui urpicunata o ishqui huahua palomacunata cuna can. Shujtaca juchamanta ofrendata shina, caishujtaca rupachishca ofrendata shinami cuna can. 8 Chai animalcunataca sacerdotepajmanmi apana can. Chaimi sacerdoteca puntaca juchamanta ofrendata Diosman cunga. Paica chai animaltaca silluhuanmi cunga ñaupaj ladota tispishpa pꞌitinga. Pero cungamantaca umataca mana libri pꞌitingachu. 9 Juchamanta ofrendata cushca animalpaj asha yahuartaca altar ladopimi tsirapanga. Pero sobrashca yahuartaca altar chaquipimi tallinga. Chaica juchamanta ofrendami can. 10 Caishuj animaltaca rupachishca ofrendata shinami ima shina ruraj cashca shinallataj Diosman cunga. Chai qꞌuipami sacerdoteca chai runa paipaj juchamanta perdonashca cachun chai animalta cunga. Chashnami chai runaca perdonashca canga.

11 Shinapish ishqui urpicunata o ishqui huahua palomacunata cungapaj mana suficienteta charishpaca pai juchata rurashcamantaca juchamanta ofrendata shinami ishqui libra yalli* alli* harinata cuna can. Chai harinapica aceitetapish, olibanotapish mana churanachu can. Chaica juchamanta ofrendami can. 12 Paica chai ofrendataca sacerdotepajmanmi apanga. Chaimi sacerdoteca chai ofrendamanta maqui junda harinata japishpa shuj parteta* altar jahuapi rupachishpa cushnichinga. Jehová Diosman cushca ninahuan rupachishca ofrendacuna jahuapi churashpami rupachishpa cushnichinga. Chaica juchamanta ofrendami can. 13 Chai qꞌuipami sacerdoteca chai runa ima juchata rurashca cajpipish paipaj juchamanta perdonashca cachun chaita cunga. Chashnami chai runaca perdonashca canga. Sobrashca ofrendaca grano ofrenda shinallatajmi sacerdotepaj canga’ ningui” nircami.

14 Jehová Diosca Moiseshuanmi parlashpa catirca. Paitaca cashnami nirca: 15 “Maijanpish mana cuentata cushpa Jehová Diospajlla chꞌicanyachishca cosascunamanta cushca leyta mana pajtachishpaca, culpamanta ofrendata shinami Jehová Diosmanca shuj sano carnerota cuna can. Chai carnero mashna siclo* cullqui valishcataca sacerdotemi ninga. Chai siclo cullquica Diospaj huasipi pesaj siclo shinallatajmi pesana can. 16 Paica Diospajlla chꞌicanyachishca cosascunamanta cushca leyta mana pajtachishcamantami paganga. Mashna valishcamantapish pichcapi chaupishca shuj partehuanmi* cunga. Tucuitami sacerdoteman cunga. Chaimi sacerdoteca chai runa paipaj juchamanta perdonashca cachun culpamanta ofrendata shina carnerota cunga. Chashnami chai runaca perdonashca canga.

17 Maijan runa mana cuentata cushpapish Jehová Dios ama rurachun nishcata rurashpaca culpayujmi canga. Pai pandarishcamantapish castigashcami canga. 18 Culpamanta ofrendata shinami shuj carnerota sacerdotepajman apana can. Sacerdotemi chai carnero mashna valishcata ninga. Chai qꞌuipami sacerdoteca chai runa mana munashpapish, mana yachashpapish pai pandarishpa juchata rurashcamanta perdonashca cachun chaita cunga. Chaimi chai runaca perdonashca canga. 19 Chaica culpamanta ofrendami can. Paica Jehová Diospaj ñaupajpi juchata rurashpami culpayuj tucushca” nircami.

6 Jehová Diosca Moisestaca cashnapishmi nirca: 2 “Maijanpish Jehová Diospaj ñaupajpi ima juchata rurashpa paipaj projimota llullashpa, paiman mingashcata pacashpa o cuidachun saquishcata japishpa o paipaj projimota imata shuhuashpa o umashpa imata quichushpa 3 o ima chingarishcata japishca jahua llullashpa o ima juchata mana rurashcanichu nishpa llullashpa jurashpaca caitami rurana can: 4 juchata rurashpa culpayuj cashpaca shuhuashcatami tigrachina can. Shinallataj umashpa japishcata, umashpa quichushcata, paiman mingashcata, chingarishcata japishcatami tigrachina can. 5 Llullashpa jurashpa japishcatapishmi tigrachina can. Tucuitami pagana can. Shinallataj mashna valishcamantaca pichcapi chaupishca shuj partehuanmi* cuna can. Paita culpayuj cashcata ricuchi punllami dueñomanca cunga. 6 Culpamanta ofrendata Jehová Diosman cungapajmi shuj sano carnerota sacerdotepajman apanga. Sacerdotemi chai carnero mashna valishcata ricushpa culpamanta ofrendata shina cunga. 7 Sacerdotemi chai runa Jehová Diospaj ñaupajpi paipaj juchamanta perdonashca cachun chaita cunga. Chashna rurajpimi imamanta culpayuj cashpapish perdonashca canga” nircami.

8 Jehová Diosca Moiseshuanmi parlashpa catirca. Paitaca cashnami nirca: 9 “Aarontapish, paipaj churicunatapish cashna ningui: ‘Rupachishca ofrendata* cuna leyca caimi can. Rupachishca ofrendaca tucui tutami cayandij tutamantacama altar jahuapi rupacuj ninapi saquiringa. Altarpica ninaca rupacungallami. 10 Sacerdoteca paipaj lino churanatami churaringa. Shinallataj lino calzoncillocunata churarishpami paipaj lluchulla aichata tapachinga. Chai qꞌuipaca altar jahuapi rupachishca ofrendapaj ushpata* anchuchishpami altar cꞌuchupi churanga. 11 Chai huashaca pai churarishca churanata llujshichishpami shujtaj churanata churarishpa ushpataca* carpa huasicunamanta canllaman shuj chuya lugarman apanga. 12 Altarpica ninaca rupacungallami. Ninataca mana huañuchinachu can. Sacerdoteca cada tutamantami altarpica yantata rupachina can. Chai jahuapica rupachishca ofrendatami churana can. Shinallataj Dioshuan alli tucungapaj sacrificiocunamanta cushca huiratami chai jahuapica rupachishpa cushnichina can. 13 Altarpica ninaca siempre rupacungallami. Ninataca mana huañuchinachu can.

14 Grano ofrendata cuna leyca caimi can. Aaronpaj churicuna, cancunaca Jehová Diospaj ñaupajpimi altar chꞌimbapurapi chai ofrendata cuna canguichij. 15 Paicunamanta shuj sacerdoteca asha aceitehuan chagrushca, grano ofrenda jahuapi churashca tucui olibanohuan chagrushca alli* harinata maqui jundata japishpami shuj parteta* altar jahuapi rupachishpa cushnichinga. Jehová Diosman cushca mishquijllata ashnacuj ofrendata shinami rupachishpa cushnichinga. 16 Chai ofrendamanta sobrashcataca Aaronpish, paipaj churicunapishmi micungacuna. Chaitaca levadura illaj tandata shinami Diospajlla chꞌicanyachishca lugarpi micungacuna. Paicunaca tandanacuna carpa huasi patiopimi micungacuna. 17 Chai ofrendataca levadurahuan chagrushca ima shujtaj cosascunahuanca mana cusanachu can. Ñucaman cushca ninahuan rupachishca ofrendacunamantami paicuna japina cashcataca cushcani. Chai ofrendaca juchamanta ofrenda shina, culpamanta ofrenda shinami ñucapajlla ashtahuan chꞌicanyachishca can. 18 Chaitaca Aaronpaj familiamanta tucui cꞌaricunami micungacuna. Chai micunaca paicunapajmi siempre canga. Jehová Diosman cushca ninahuan rupachishca ofrendacunamantaca chaimi paicunapajpish, paicunapaj huahua huahuacunapajpish canga. Chai ofrendacuna imapi tuparijpica chaicunaca Diospajlla chꞌicanyachishcami canga’ ningui” nircami.

19 Jehová Diosca Moiseshuan cutin parlashpaca cashnami nirca: 20 “Aaronta agllai punllaca Aaronpish, paipaj churicunapish cai ofrendatami Jehová Diosman cuna can: punllanta cuna grano ofrendata shinaca ishqui libra yalli* alli harinatami cunga. Chaupitaca tutamanta lado, chaupitaca chishi ladomi cunga. 21 Chai ofrendataca aceitehuanmi sartenpi rurana can. Chaitaca aceitehuan alli chagrushpa apangui. Cusashca grano ofrendataca mirga mirgapi chaupishpami Jehová Diosman cushca mishquijllata ashnacuj ofrendata shina cuna cangui. 22 Chai ofrendataca Aaronpaj churicunamanta agllashca catij sacerdotemi cunga. Cai leytaca siempremi pajtachina can. Jehová Diospajmi tucui ofrendata rupachishpa cushnichinga. 23 Shuj sacerdotemanta cushca grano ofrendataca tucuitami rupachina can. Chaitaca mana micunachu can” nircami.

24 Jehová Diosca Moiseshuan cutin parlashpaca cashnami nirca: 25 “Aarontapish, paipaj churicunatapish cashna ningui: ‘Juchamanta ofrendapaj leyca caimi can. Juchamanta ofrendata shina cushca animaltaca rupachishca ofrendata shina cushca animalta huañuchishcallapitajmi Jehová Diospaj ñaupajpi huañuchina can. Chai ofrendaca Diospajlla ashtahuan chꞌicanyachishcami can. 26 Chai ofrendataca juchamanta cuj sacerdotemi micunga. Diospajlla chꞌicanyachishca lugarpi, tandanacuna carpa huasi patiopimi micunga.

27 Maijanpish ofrendata shina cushca aichapi tuparijca Diospajlla chꞌicanyachishcami canga. Shinallataj paipaj churanapi yahuar saltajpica chai churanataca Diospajlla chꞌicanyachishca lugarpimi* tajshana can. 28 Aichata barro mangapi yanushca cashpaca chai mangataca pꞌaquinami can. Pero cobre mangapi yanushca cashpaca chai mangataca sobashpami yacuhuan maillana can.

29 Chai aichataca sacerdote shina sirvij cꞌaricunallami micungacuna. Chaica Diospajlla ashtahuan chꞌicanyachishcami can. 30 Shinapish juchamanta ofrendata shina cushca animalpaj asha yahuarta juchacuna perdonashca cachun tandanacuna carpa huasi ucuman apajpi, Diospajlla ashtahuan chꞌicanyachishca ucuman apajpica chai aichataca mana micunachu can. Ashtahuanpish ninapimi rupachina can.

7 Culpamanta ofrendata cuna leyca caimi can. Chaica Diospajlla ashtahuan chꞌicanyachishcami can. 2 Culpamanta ofrendata shina cushca animaltaca rupachishca ofrendata shina cushca animalcunata huañuchishcallapitajmi huañuchingacuna. Chai animalpaj yahuartaca shuj sacerdotemi altar tucui ladocunapi tsirapanga. 3 Paica tucui huiratami Diosman cunga: huira chupatapish, tripacuna jahuapi tiyaj huiratapish, 4 lomo cꞌuchullapi caj ishqui riñoncunatapish, riñoncunapi tiyaj huiratapishmi cunga. Riñoncunandijmi higadopi tiyaj huiratapish anchuchinga. 5 Sacerdoteca tucui chaicunatami Jehová Diosman cushca ninahuan rupachishca ofrendata shina altar jahuapi rupachishpa cushnichinga. Chaica culpamanta ofrendami can. 6 Chaitaca sacerdote shina sirvij cꞌaricunallami micungacuna. Diospajlla chꞌicanyachishca lugarpimi* micungacuna. Chai ofrendaca Diospajlla ashtahuan chꞌicanyachishcami can. 7 Juchamanta ofrendapajpish, culpamanta ofrendapajpish chai leyllatajmi can. Ofrendata cushca aichaca juchata perdonachun ofrendata cuj sacerdotepajmi canga.

8 Sacerdoteca rupachishca ofrendata shuj runamanta cushpaca rupachishca ofrendata shina cushca animalpaj carahuanmi saquiringa.

9 Tucui grano ofrendami hornopi cusashca cashpapish o shuj cacerolapi o shuj sartenpi rurashca cashpapish Diospaj ñaupajpi cuj sacerdotepaj canga. Chaica paipajmi canga. 10 Pero tucui grano ofrendami aceitehuan chagrushca cashpapish o chaquishca cashpapish Aaronpaj tucui churicunapaj canga. Cada unomi chai valillatataj japingacuna.

11 Dioshuan alli tucungapaj sacrificiota cuna leyca caimi can. Maijanpish Jehová Diosman chai sacrificiota cushpaca leypi nishca shinami rurana can. 12 Diosta pagui ningapaj sacrificiota cushpaca aceitehuan rurashca levadura illaj roscas tandatapish, aceitehuan jahuata llihuishca levadura illaj ñañujlla galletastapish cuchun. Shinallataj achca aceitehuan chagrushca alli* harinahuan rurashca roscas tandatapish cuchun. 13 Paipaj ofrendataca levadurahuan rurashca roscas tandahuan, Dioshuan alli tucungapaj sacrificiocunahuanmi cunga. Chai sacrificiocunaca Diosta pagui ningapaj cushca sacrificiomi can. 14 Cai ofrendamantaca Jehová Diospajlla chꞌicanyachishca ofrendata shinami tucui laya tandacunamanta shuj shujta cuna can. Chaica Dioshuan alli tucungapaj sacrificiota shina cushca animalpaj yahuarta altarpi tsirapaj sacerdotepajmi canga. 15 Dioshuan alli tucungapaj sacrificiocunamanta cushca aichataca pai cushca punllallatajmi micuna can. Chai sacrificiocunaca Diosta pagui ningapaj cushca sacrificiomi can. Paica cayandij tutamantapajca imata mana huaquichinachu can.

16 Imata rurangapaj ari nishcamanta o shungumanta cushca ofrendata shina shuj sacrificiota cushpaca pai cushca punllallatajmi micuna can. Sobrashcataca cayandij punllapishmi micui tucun. 17 Pero tercer punllapica sacrificiomanta sobrashca aichataca ninapimi rupachina can. 18 Shinapish Dioshuan alli tucungapaj sacrificiomanta asha aichata tercer punllapi micujpica chai sacrificiota cujtaca Diosca mana chasquingachu. Chai sacrificioca imapaj mana valingachu. Millananami can. Chai sacrificiomanta micujca pai pandarishcamantami castigashca canga. 19 Ima mapapi aicha tuparijpica chai aichataca mana micunachu can. Ashtahuanpish ninapimi rupachina can. Mana mapa cajcunallami chuya aichataca micui tucuncuna.

20 Pero maijanpish mapa cashca jahua, Dioshuan alli tucungapaj sacrificiomanta aichata micushpaca huañunami can. Chai sacrificioca Jehová Diospajmi can. 21 Maijanpish mapa caj gentecunata tuparishca jahua o mapa caj animalcunata tuparishca jahua o millanana cosascunapi tuparishca jahua Dioshuan alli tucungapaj sacrificiomanta asha aichata micushpaca huañunami can. Chai sacrificioca Jehová Diospajmi can’ ningui” nircami.

22 Jehová Diosca Moiseshuanmi parlashpa catirca. Paitaca cashnami nirca: 23 “Israelitacunataca cashna ningui: ‘Toro huiratapish, malta carnero huiratapish, chivo huiratapish ama micunguichijchu. 24 Huañushcata japishca animalpaj huirahuan, shujtaj animal huañuchishca animalpaj huirahuanca imatapish rurai tucunguichijmi. Pero chai huirataca manataj micunachu canguichij. 25 Maijanpish Jehová Diosman cushca ninahuan rupachishca ofrendamanta huirata micushpaca huañunami can.

26 Cancuna maipi causashpapish yahuartaca ama micunguichijchu. Alasyuj animalcunapaj yahuartapish, shujtaj animalcunapaj yahuartapish ama micunguichijchu. 27 Maijanpish yahuarta micushpaca huañunami can’ ningui” nircami.

28 Jehová Diosca Moisestaca cashnapishmi nirca: 29 “Israelitacunataca cashna ningui: ‘Maijanpish Jehová Dioshuan alli tucungapaj sacrificiota* cushpaca chai sacrificiomanta shuj partetami Jehová Diosman cunga. 30 Paipaj maquipica huiratapish, pecho aichatapishmi Jehová Diosman cushca ninahuan rupachishca ofrendata shina apanga. Chaitaca caiman chaiman cuyuchishpa cushca ofrendata* shinami Jehová Diospaj ñaupajpi caiman chaiman cuyuchinga. 31 Sacerdotemi huirataca altar jahuapi rupachishpa cushnichinga. Pero pecho aichaca Aaronpajpish, paipaj churicunapajpishmi canga.

32 Dioshuan alli tucungapaj sacrificiocunamantaca alli lado chaquitami sacerdoteman cuna canguichij. Chaica Diospajlla chꞌicanyachishca ofrendami canga. 33 Dioshuan alli tucungapaj sacrificiocunamanta yahuartapish, huiratapish Diospaj ñaupajpi cuj Aaronpaj churimi alli lado chaquitaca japinga. 34 Caiman chaiman cuyuchishpa cushca ofrenda pecho aichahuanpish, ñucahuan alli tucungapaj israelitacuna cushca sacrificiocunamanta ñucapajlla chꞌicanyachishca ofrenda chaquihuanpish ñucami saquirisha. Chaicunataca sacerdote Aaronman, paipaj churicunamanpishmi cusha. Israelitacunaca chaitaca siempremi pajtachina can.

35 Jehová Diosman cushca ninahuan rupachishca ofrendacunamantaca caicunatami sacerdote Aaronpaj, paipaj churicunapajpish separana carca. Caicunataca Jehová Diospaj sacerdotecuna cachun paicunata nombrashca punllami separana carca. 36 Paicunata agllai punllami Jehová Diosca israelitacunataca chaicunata cuchun mandarca. Cai leytaca paicunapish, paicunapaj huahua huahuacunapishmi siempre pajtachina can’ ningui” nircami.

37 Cai leyca rupachishca ofrendata cungapaj, grano ofrendata cungapaj, juchamanta ofrendata cungapaj, culpamanta ofrendata* cungapaj, sacerdoteta nombrangapaj sacrificiota cungapaj, Dioshuan alli tucungapaj sacrificiota cungapajpishmi can. 38 Cai leyca Sinaí urcupi Jehová Dios Moisesman mandashca shinami carca. Chai punllami Jehová Diosca israelitacunataca Sinaí chaquishca pambapi paiman ofrendacunata cuchun mandarca.

8 Jehová Diosca Moiseshuanmi parlashpa catirca. Paitaca cashnami nirca: 2 “Aarontapish, paipaj churicunatapish pushai. Paicunapaj churanacunatapish, agllana aceitetapish, juchamanta ofrendata shina cushca torotapish, ishqui carnerocunatapish, levadura illaj tandacunahuan caj canastatapish apai. 3 Tucui israelitacunatapish tandanacuna carpa huasi yaicunapi tandachi” nircami.

4 Moisesca Jehová Dios mandashca shinallatajmi rurarca. Tucui israelitacunami tandanacuna carpa huasi yaicunapi tandanacurcacuna. 5 Chai qꞌuipaca Moisesca israelitacunataca: “Jehová Diosca caita rurachunmi mandashca” nircami. 6 Chaimantaca Moisesca Aarontapish, Aaronpaj churicunatapish paipajman cꞌuchuyachishpami paicunataca yacuhuan maillarca. 7 Chai qꞌuipaca Aaronmanca paipaj churanata churachishpami cinturonhuan huatarca. Shinallataj sin mangas churanatami churachirca. Chai qꞌuipaca efodta churachishpami efodpi caj ahuashca cinturonhuan alli huatarca. 8 Chai huashaca pectoraltami churachirca. Pectoralpica Urimtapish, Tumimtapishmi churarca. 9 Chai qꞌuipaca Aaronpaj umapimi sumaj turbanteta churachirca. Turbante ñaupajpica achijnicuj oro placatami churarca. Chaica Dios agllashcata ricuchij jucha illaj señalmi carca. Moisesca Jehová Dios paiman mandashca shinami rurarca.

10 Chai qꞌuipaca Moisesca Diospaj carpa huasitapish, chaipi tucui imalla tiyajcunatapish agllana aceitehuan churashpami Diospajlla chꞌicanyachirca. 11 Chai huashaca altarpica canchis cutinmi asha aceiteta tsiraparca. Chashnami altartapish, altarpi tucui imalla tiyajcunatapish, tanquetapish, tanquepaj basetapish Diospajlla chꞌicanyachirca. 12 Ultimopica Aaronpaj umapimi agllana asha aceiteta tallirca. Chashnami Aarontaca agllashpa Diospajlla chꞌicanyachirca.

13 Chai qꞌuipaca Moisesca Aaronpaj churicunata paipajman cꞌuchuyachishpami churanacunata churachirca. Shinallataj cinturontapish, turbantetapishmi churachirca.* Moisesca Jehová Dios paiman mandashca shinami rurarca.

14 Chai qꞌuipaca juchamanta ofrendata shina cushca torota apachunmi mandarca. Chaimantaca Aaronpish, paipaj churicunapishmi juchamanta ofrendata shina cushca toropaj umapi paicunapaj maquicunata churarcacuna. 15 Moisesca chai animalta huañuchishpami chai animalpaj asha yahuartaca altar tucui gachucunapi* paipaj dedohuan churarca. Chashnami altartaca juchamanta chuyayachirca. Sobrashca yahuartaca altar chaquipimi tallirca. Chashnami paica juchacunata perdonachun sacrificiocunata chai jahuapi cungapaj altarta chuyayachirca. 16 Chai qꞌuipaca Moisesca tripacuna jahuapi tiyaj tucui huiratapish, higadopi tiyaj huiratapish, ishqui riñoncunatapish, riñoncunapi tiyaj huiratapish anchuchishpami altar jahuapi rupachishpa cushnichirca. 17 Cutin toromanta sobrashcacunataca caratapish, aichatapish, majadatapish carpa huasicunamanta canllaman ninapi rupachichunmi mandarca. Moisesca Jehová Dios paiman mandashca shinami rurarca.

18 Chai qꞌuipaca rupachishca ofrendata shina cushca carnerota cꞌuchuyachichunmi mandarca. Chaimi Aaronpish, paipaj churicunapish carneropaj uma jahuapi paicunapaj maquicunata churarcacuna. 19 Chai huashami Moisesca chai animalta huañuchirca. Chai animalpaj yahuartaca altar tucui ladocunapimi tsiraparca. 20 Paica carnerotaca mirga mirgapimi pꞌitirca. Moisesca mirga mirgapi pꞌitishca aichatapish, umatapish, huiratapishmi* rupachishpa cushnichirca. 21 Paica tripacunatapish, chaqui tullutapish yacuhuanmi maillarca. Moisesca carnerotaca tucuitami altar jahuapi rupachishpa cushnichirca. Chaica mishquijllata ashnacuj rupachishca ofrendami carca. Jehová Diosman cushca ninahuan rupachishca ofrendami carca. Moisesca Jehová Dios paiman mandashca shinami rurarca.

22 Chai qꞌuipaca Moisesca sacerdoteta nombrangapaj cushca caishuj carnerota apachunmi mandarca. Aaronpish, paipaj churicunapish chai carneropaj uma jahuapimi paicunapaj maquicunata churarcacuna. 23 Moisesca chai animalta huañuchishpami Aaronpaj alli lado rinrinpi asha yahuarta churarca. Shinallataj Aaronpaj alli lado maqui mama dedopi, alli lado chaqui mama dedopimi churarca. 24 Shinallataj Moisesca Aaronpaj churicunata cꞌuchuyachishpami paicunapaj alli lado rinrinpi, paicunapaj alli lado maqui mama dedopi, paicunapaj alli lado chaqui mama dedopi asha yahuarta churarca. Moisesca sobrashca yahuartaca altar tucui ladocunapimi tsiraparca.

25 Chai qꞌuipaca carneromanta huiratami anchuchirca. Shinallataj huira chupata, tripacunapi tiyaj tucui huirata, higadopi tiyaj huirata, ishqui riñoncunata, riñoncunapi tiyaj huirata, alli lado chaquitapishmi anchuchirca. 26 Chai qꞌuipaca Jehová Diospaj ñaupajpi caj levadura illaj tandacunahuan caj canastamantaca levadura illaj shuj rosca tandatami llujshichirca. Shinallataj aceitehuan rurashca rosca tandata, ñañujlla galletatapishmi llujshichirca. Chaicunataca huira jahuapi, alli lado chaqui jahuapimi churarca. 27 Chaimantaca Aaronpaj maqui shungupi, Aaronpaj churicunapaj maqui shungupimi tucui chaicunataca churarca. Chashnami caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchi callarirca. 28 Chai qꞌuipaca Moisesca paicunapaj maquicunamanta japishpami chaicunataca altar jahuapi, rupachishca ofrenda jahuapi rupachishpa cushnichirca. Chaica sacerdoteta nombrangapaj cushca mishquijllata ashnacuj sacrificiomi carca. Jehová Diosman cushca ninahuan rupachishca ofrendami carca.

29 Chai qꞌuipaca Moisesca pecho aichata japishpami caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchirca. Sacerdoteta nombrangapaj cushca carneropaj pecho aichaca Jehová Dios mandashca shinami Moisespaj carca.

30 Chai qꞌuipaca Moisesca Aaronpipish, paipaj churanapipish, Aaronpaj churicunapipish, paicunapaj churanacunapipishmi agllana asha aceitehuan, altar jahuapi caj asha yahuarhuan tsiraparca. Chashnami Aarontapish, paipaj churanatapish, Aaronpaj churicunatapish, paicunapaj churanacunatapish Diospajlla chꞌicanyachirca.

31 Chai huashaca Moisesca Aarontapish, paipaj churicunatapish cashnami nirca: “Aichataca tandanacuna carpa huasi yaicunapi tꞌimbuchichij. Chaipimi aichataca sacerdoteta nombrangapaj cushca canastapi caj tandahuan micunguichij. Diosca ñucamanca: ‘Aaronpish, paipaj churicunapishmi chaicunataca micungacuna’ nishpami mandarca. 32 Cutin sobrashca aichatapish, sobrashca tandatapish ninapi rupachinguichij. 33 Tandanacuna carpa huasi yaicunamantaca canchis punllacunata ama anchuringuichijchu. Sacerdoteta nombrana punllacuna tucuringacama ama anchuringuichijchu. Sacerdotecunaca canchis punllacunapimi nombrashca cangacuna. 34 Jehová Diosca cancunapaj juchacunata perdonangapajmi cunan rurashcata rurachun mandarca. 35 Cancunaca tutapish, punllapish tandanacuna carpa huasi yaicunapimi saquirina canguichij. Ama huañungapajca Jehová Dios imata mandashcatami pajtachina canguichij. Ñucataca chashna rurachunmi mandarca” nircami.

36 Aaronpish, paipaj churicunapish Jehová Dios Moisesman imalla mandashcacunatami tucuita rurarcacuna.

9 Octavo punllapica Moisesca Aarontapish, Aaronpaj churicunatapish, israelitacunata pushajcunatapishmi* cayarca. 2 Paica Aarontaca cashnami nirca: “Cambajca juchamanta ofrendata shinaca shuj bizita apamui. Rupachishca ofrendata shinaca shuj sano carnerota apamui. Chaicunataca Jehová Diospaj ñaupajman apamui. 3 Pero israelitacunataca cashnami nina cangui: ‘Juchamanta ofrendata shinaca shuj cꞌari chivota apamuichij. Cutin rupachishca ofrendata shinaca shuj huatata charij sano bizita, shuj malta carnerota apamuichij. 4 Shinallataj Dioshuan alli tucungapaj sacrificiocunata shinaca shuj torota, shuj carnerota apamuichij. Chaicunataca Jehová Diospaj ñaupajpi huañuchingapaj apamuichij. Shinallataj aceitehuan chagrushca grano ofrendata apamuichij. Jehová Diosca cunanmi paipaj sumaj achijnicujta cancunaman ricuchinga’ ningui” nircami.

5 Chaimi paicunaca tandanacuna carpa huasi ñaupajman Moisés imalla apachun nishcata aparcacuna. Qꞌuipaca tucui israelitacunami cꞌuchuyashpa Jehová Diospaj ñaupajpi shayarishpa saquirircacuna. 6 Moisesca: “Jehová Dios paipaj sumaj achijnicujta cancunaman ricuchichunca caita rurachunmi Jehová Diosca cancunataca mandashca” nircami. 7 Chai qꞌuipami Moisesca Aarontaca: “Altarman cꞌuchuyashpa juchamanta cambaj ofrendatapish, cambaj rupachishca ofrendatapish Diosman cui. Chashnami cambaj juchamanta perdonashca cangui. Cambaj familiapish paicunapaj juchamanta perdonashca canga. Chai huashaca Jehová Dios mandashca shina israelitacunapaj ofrendata cui. Chashnami paicunapish paicunapaj juchamanta perdonashca canga” nircami.

8 Chaimi Aaronca enseguida altarman cꞌuchuyashpa paipaj juchacunamanta ofrendata shina cushca bizita huañuchirca. 9 Chai qꞌuipaca Aaronpaj churicunaca Aaronpajmanmi yahuartaca cꞌuchuyachircacuna. Chaimi Aaronca paipaj dedota yahuarpi pambashpa altar gachucunapi churarca. Qꞌuipaca sobrashca yahuartaca altar chaquipimi tallirca. 10 Chai qꞌuipaca Aaronca juchamanta ofrendata shina cushca animalpaj huirata, riñoncunata, higadopi tiyaj huiratapishmi altar jahuapi rupachishpa cushnichirca. Paica Jehová Dios Moisesman mandashca shinami rurarca. 11 Shinallataj aichatapish, caratapish carpa huasicunamanta canllamanmi ninapi rupachirca.

12 Qꞌuipaca rupachishca ofrendata shina cushca animaltami huañuchirca. Aaronpaj churicunaca paimanmi yahuarta curcacuna. Chaimi paica altar tucui ladocunapi tsiraparca. 13 Paicunaca rupachishca ofrendamanta mirga mirgapi pꞌitishca aichata, umatami curcacuna. Chaimi Aaronca altar jahuapi rupachishpa cushnichirca. 14 Shinallataj tripacunata, chaqui tullucunata maillashpami altar jahuapi rupachishca ofrendandij rupachishpa cushnichirca.

15 Chai qꞌuipami Aaronca israelitacuna cushca ofrendata Diosman curca. Paica israelitacuna paicunapaj juchacunamanta ofrendata shina cushca cꞌari chivota japishpami huañuchirca. Bizita cushca shinallatajmi cꞌari chivotapish juchamanta ofrendata shina curca. 16 Shinallataj rupachishca ofrendatapishmi curca. Ima shina rurana cashca shinallatajmi rurarca.

17 Chai qꞌuipaca grano ofrendatami Diosman curca. Paica chai ofrendamanta maqui jundata japishpami tutamanta lado rupachishca ofrendahuan altar jahuapi rupachishpa cushnichirca.

18 Chai huashaca israelitacuna Dioshuan alli tucungapaj sacrificiota shina cushca torotapish, carnerotapishmi huañuchirca. Chaita rurashca qꞌuipami Aaronpaj churicunaca yahuarta paiman curca. Cutin Aaronca chai yahuartami altar tucui ladocunapi tsiraparca. 19 Toropaj huirata, carneropaj huira chupata, tucui tripacuna jahuapi tiyaj huirata, riñoncunata, higadopi tiyaj huirata japishpami 20 paicunaca tucui chai huirata toropaj pecho aichapi, carneropaj pecho aichapi churarcacuna. Chai qꞌuipami paica huirataca altar jahuapi rupachishpa cushnichirca. 21 Pero chai animalcunapaj pecho aichata, alli lado chaquitapish Aaronca caiman chaiman cuyuchishpa cushca ofrendata shinami Jehová Diospaj ñaupajpi caiman chaiman cuyuchirca. Chaitaca Moisés mandashca shinami rurarca.

22 Juchamanta ofrendata, rupachishca ofrendata, Dioshuan alli tucungapaj sacrificiocunata cushca qꞌuipami Aaronca israelitacunata ricushpa paipaj maquicunata alzarca. Paica israelitacunata bendiciashpami altarmanta uriyarca. 23 Ultimopica Moisespish, Aaronpishmi tandanacuna carpa huasiman yaicurcacuna. Qꞌuipaca chaimanta llujshishpami israelitacunata bendiciarcacuna.

Chai huashami Jehová Diospaj sumaj achijnicujca tucui israelitacunaman ricurirca. 24 Chai qꞌuipami Jehová Diosca ninata cacharca. Chai ninami rupachina* ofrendatapish, altar jahuapi tiyaj huiratapish rupachi callarirca. Chaita ricushpami israelitacunaca cushicushpa caparircacuna. Paicunaca pambacamami cumurircacuna.

10 Chai qꞌuipaca Aaronpaj churicuna Nadabpish, Abihupish paicunapaj braserillocunata japishpami chaipi ninata churashpa, chai jahuapi inciensota churarcacuna. Shina rurashpaca mana cuna cashca ofrendatami* Jehová Diosman cui callarircacuna. Shinapish chaita rurachunca Diosca mana mandashcachu carca. 2 Chaimi Jehová Diospaj ñaupajmanta nina llujshishpaca paicunata rupachirca. Chashnami paicunaca Jehová Diospaj ñaupajpi huañurcacuna. 3 Moisesca Aarontaca: “Jehová Diosca: ‘Ñucapajman cꞌuchuyajcunapurapica jucha illajmi casha. Tucui israelitacunapaj ñaupajpica jatunyachishcami casha’ ninmi” nircami. Chashna nijpica Aaronca upallami saquirirca.

4 Chai qꞌuipaca Moisesca Uzielpaj churicuna Misaelta, Elzafantami cayarca. Uzielca Aaronpaj tiomi carca. Paicunataca: “Shamuichij, cancunapaj huañushca familiacunapaj cuerpota carpa huasi ñaupajmanta canllaman llujshichichij” nircami. 5 Chaimi paicuna rishpaca chai huañushca cuerpocunataca Moisés mandashca shina canllaman llujshichircacuna. Chai huañushca cuerpocunaca sacerdotecunapaj churanata churarishcami carcacuna.

6 Chai qꞌuipaca Moisesca Aaronpaj caishuj churicuna Eleazartapish, Itamartapish cashnami nirca: “Cancunapaj ajchataca ama maipishcachun charinguichijchu. Cancunapaj churanacunatapish ama lliquiringuichijchu. Chashnami cancunaca mana huañunguichij. Diospish tucui israelitacunahuanca mana pꞌiñaringachu. Jehová Dios ninahuan huañuchishca runacunamantaca cancunapaj huauqui tucui israelitacunami huacangacuna. 7 Tandanacuna carpa huasi ñaupajmantaca ama caruyanguichijchu. Chaimanta caruyashpaca huañunguichijmi. Jehová Diospaj agllana aceiteca cancunapaj jahuapimi can” nircami. Chaimi paicunaca Moisés nishcata rurarcacuna.

8 Chai huashaca Jehová Diosca Aarontaca cashnami nirca: 9 “Ama huañungapajca canpish, cambaj huahuacunapish vinota, ima shujtaj laya tragocunataca tandanacuna carpa huasiman yaicushpaca mana ubyanachu canguichij. Cai leytaca canpish, cambaj huahua huahuacunapishmi siempre pajtachina canguichij. 10 Chashnami cancunaca imalla Diospaj cajta, imalla mana Diospaj cajta, ima chuya* cajta, ima mapa cajta ricunguichij. 11 Shinallataj Jehová Dios Moisesman cushca tucui leycunatami israelitacunaman yachachinguichij” nircami.

12 Chai qꞌuipaca Moisesca Aaronpaj caishuj churicuna Eleazartapish, Itamartapish cashnami nirca: “Grano ofrendamanta saquirishcata japishpa levadura illaj tandata shina altar cꞌuchupi micuichij. Chai ofrendaca Jehová Diosman cushca ninahuan rupachishca ofrendacunamantami can. Chaica Diospajlla ashtahuan chꞌicanyachishcami can. 13 Chaitaca Diospajlla chꞌicanyachishca lugarpimi* micuna canguichij. Jehová Diosman cushca ninahuan rupachishca ofrendacunamanta saquirishcaca cambajpish, cambaj huahuacunapajpishmi can. Diosca chaita rurachunmi ñucataca mandarca. 14 Shinallataj caiman chaiman cuyuchishpa cushca ofrenda pecho aichata, Diospajlla chꞌicanyachishca ofrenda chaquitami shuj chuya lugarpi canpish, cambaj churicunapish, cambaj ushushicunapish micuna canguichij. Chaicunaca Dioshuan alli tucungapaj sacrificiocunamanta israelitacuna cushcami can. Chaicunataca canmanpish, cambaj churicunamanpishmi cushca. 15 Diospajlla chꞌicanyachishca ofrenda chaquitapish, caiman chaiman cuyuchishpa cushca ofrenda pecho aichatapish, ninahuan rupachishca ofrendamanta huiratapishmi Jehová Diospaj ñaupajpi caiman chaiman cuyuchishpa cungapaj apana canguichij. Chaica Jehová Dios mandashca shinami cambajpish, cambaj churicunapajpish siempre canga” nircami.

16 Moisesca juchamanta ofrendata shina cushca cꞌari chivotaca tucui ladocunatami mashcarca. Chashna mashcashpami chai animalta rupachishcata yachaj chayarca. Chaimi Aaronpaj chaishuj churicuna Eleazarhuanpish, Itamarhuanpish pꞌiñarirca. Paicunataca cashnami nirca: 17 “¿Cancunaca juchamanta ofrendataca imamantataj Diospajlla chꞌicanyachishca lugarpi mana micurcanguichij? Chaica Diospajlla ashtahuan chꞌicanyachishcami can. ¿Manachu Diosca cancunamanca israelitacunapaj juchata apachun chaitaca curca? ¿Manachu Jehová Diospaj ñaupajpi paicunapaj juchata perdonachun chaitaca curca? 18 ¡Ricuichij! Ofrendata shina cushca animalpaj yahuartaca Diospajlla ashtahuan chꞌicanyachishca ucumanca pi mana apashcachu. Ñucaman mandashca shinami chai ofrendataca Diospajlla chꞌicanyachishca lugarpi micuna carcanguichij” nircami. 19 Chaimi Aaronca Moisestaca: “Ricui, israelitacunaca cunan punllami juchamanta ofrendata, rupachishca ofrendataca Jehová Diospaj ñaupajpi curcacuna. Pero ñucaca chai aichataca mana micui tucurcanichu. Cunan punlla ñuca ima llaquita charishcataca canca allimi yachangui. ¿Juchamanta ofrenda aichata ñuca micushca cajpica Jehová Diospaj ñaupajpica allichu canman carca?” nircami. 20 Chashna nijta uyashpaca Moisesca allita rurashcatami intindirca.

11 Chai huashaca Jehová Diosca Moisestapish, Aarontapish cashnami nirca: 2 “Israelitacunataca cashna ninguichij: ‘Allpapi causaj animalcunamantaca caicunatami micui tucunguichij: 3 ñaupajmanta huashacama ishquipi chaupishca silluta charij animalcunata, tigrachishpa cashtuj animalcunatami micui tucunguichij.

4 Tigrachishpa cashtuj animalcunamanta o ishquipi chaupishca silluta charij animalcunamantaca caicunatami mana micuna canguichij. Camellotaca mana micunachu canguichij. Chai animalca tigrachishpa cashtuj cashpapish ishquipi chaupishca sillutaca mana charinchu. Chai animalca cancunapajca mapami can. 5 Shinallataj damán nishca animaltapish mana micunachu canguichij. Chai animalca tigrachishpa cashtuj cashpapish ishquipi chaupishca sillutaca mana charinchu. Chai animalca cancunapajca mapami can. 6 Liebretapish* mana micunachu canguichij. Chai animalca tigrachishpa cashtuj cashpapish ishquipi chaupishca sillutaca mana charinchu. Chai animalca cancunapajca mapami can. 7 Cuchitapish mana micunachu canguichij. Chai animalca ñaupajmanta huashacama ishquipi chaupishca silluta charishpapish mana tigrachishpa cashtunchu. Chai animalca cancunapajca mapami can. 8 Chai animalcunapaj aichataca mana micunachu canguichij. Chai huañushca animalcunatapish mana tuparinachu canguichij. Chai animalcunaca cancunapajca mapami can.

9 Yacupi causaj tucui animalcunamantaca caicunatami micui tucunguichij: yacupi causaj animalcunamantaca aletacunata charijcunata, escamacunata charijcunatami micui tucunguichij. Mama cuchapi causajcunata o jatun yacucunapi causajcunatami micui tucunguichij. 10 Pero mama cuchapi, jatun yacucunapi causaj animalcunataca aletacunata, escamacunata mana charijpica mana micunachu canguichij. Yacupi achcapura causaj tucui uchilla animalcunatapish o yacupi causaj shujtaj animalcunatapish mana micunachu canguichij. Chaicunaca cancunapajca millananami can. 11 Chai animalcunaca cancunapajca millananami cana can. Chaicunapaj aichataca mana micunachu canguichij. Chai huañushca animalcunatapish millanayachinami canguichij. 12 Yacupi causajcunamanta aletacunata mana charij, escamacunata mana charij animalcunaca cancunapajca millananami can.

13 Jahuata volaj animalcunamantaca caicunatami millanayachina canguichij. Cai animalcunataca millanana cashcamantami mana micuna canguichij: aguilata, pescadota micuj aguilata, yana buitreta, 14 milano realta, tucui laya yana milanota, 15 tucui laya cuervota, 16 avestruzta, lechuzata,* gaviotata, tucui laya halconta, 17 mochuelota, cuervo marinota, búho chicota, 18 cisneta, pelicanota, buitreta, 19 cigüeñata, tucui laya garzata, abubillata, murcielagotapish mana micunachu canguichij. 20 Allpapi achcapura causaj, alasyuj, chuscu chaquiyuj tucui uchilla animalcunataca* mana micunachu canguichij. Chai animalcunaca cancunapajca millananami can.

21 Allpapi achcapura causaj, alasyuj, chuscu chaquiyuj uchilla animalcunamantaca saltangapaj ishqui suni chaquita charijcunallatami micui tucunguichij. 22 Cai animalcunatami micui tucunguichij: caruta purij tucui laya langostacunata, micuna langostacunata, grillocunata, saltamontecunatami micui tucunguichij. 23 Shinapish allpapi achcapura causaj alasyuj, chuscu chaquiyuj uchilla shujtaj animalcunaca cancunapajca millananami can. 24 Chai animalcunata micushpaca cancunaca mapami tucunguichij. Chai huañushca animalcunata maijanpish tuparishpaca chishiyangacamami mapa saquiringa. 25 Maijanpish chai huañushca animalta apashpaca paipaj churanataca tajshanami can. Paica chishiyangacamami mapa saquiringa.

26 Ima animalpish ñaupajmanta huashacama ishquipi chaupishca silluta charishpapish mana tigrachishpa cashtuj cashpaca cancunapajca mapami can. Maijanpish chai animalta tuparishpaca mapami saquiringa. 27 Chuscu chaquiyuj animalcunamanta chaqui silluhuan purij animalcunapish cancunapajca mapami can. Chai huañushca animalcunata tuparijca chishiyangacamami mapa saquiringa. 28 Maijanpish chai huañushca animalta apashpaca paipaj churanatami tajshana can. Paica chishiyangacamami mapa saquiringa. Chai animalcunaca cancunapajca mapami can.

29 Allpapi achcapura causaj uchilla animalcunamantaca caicunami cancunapajca mapa can: rata topo nishca, ucucha, tucui laya lagarto, 30 geco, jatun lagarto, yacupi causaj salamandra, lagartija, camaleón. 31 Allpapi achcapura causaj cai uchilla animalcunaca cancunapajca mapami can. Maijanpish chai huañushca animalcunata tuparijca chishiyangacamami mapa saquiringa.

32 Chai animalcuna ima jahuapi huañujpica chaica mapami saquiringa. Caspimanta rurashca cosascuna cashpapish, churana cashpapish, cara cashpapish, asha racu saco cashpapish mapami saquiringa. Chai cosascunata siempre utilizaj cashpaca yacupimi pambana can. Chaicunaca chishiyangacamami mapa saquiringa. Chai qꞌuipaca limpiomi saquiringa. 33 Huañushca animal barro puñupi urmajpica chaitaca pꞌaquinami cangui. Chai ucupi ima tiyacushca cashpapish mapami saquiringa. 34 Chai barro puñupi tiyaj yacuhuan ima micuna chagrurishpaca mapami saquiringa. Ubyanapaj chaipi ima tiyashcapish mapami saquiringa. 35 Chai huañushca animalcuna ima jahuapi urmajpica chaica mapami saquiringa. Horno cajpipish, tullpa cajpipish ñutunami can. Chai animalcunaca mapami can. Cancunapajca mapa cashpami catinga. 36 Pugyucunalla, yacuta tandana jutcucunallami limpio cashpa catinga. Pero maijanpish chai huañushca animalcunata tuparishpaca mapami saquiringa. 37 Chai huañushca animalcuna tarpuna muyu jahuapi urmajpica chai muyuca chuyami canga. 38 Pero chai muyu jahuapi yacuta shitajpi, chai muyu jahuapi huañushca animalcunamanta ashallapish urmajpica muyuca cancunapajca mapami canga.

39 Cancuna micui tucushca animal huañujpi, chai huañushca animalta maijanpish tuparishpaca chishiyangacamami mapa saquiringa. 40 Maijanpish huañushca animalmanta ashallatapish micushpaca paipaj churanataca tajshanami can. Paica chishiyangacamami mapa saquiringa. Maijanpish chai huañushca animalta apashpaca paipaj churanataca tajshanami can. Paica chishiyangacamami mapa saquiringa. 41 Allpapi achcapura causaj tucui uchilla animalcunaca millananami can. Chaicunataca mana micunachu canguichij. 42 Huijsahuan llucashpa purij animalcunatapish, chuscu chaquiyuj animalcunatapish, allpapi achcapura causaj achca chaquiyuj uchilla animalcunatapish mana micunachu canguichij. Chai animalcunaca millananami can. 43 Allpapi achcapura causaj uchilla animalcunamantaca cancunallatajca ama millanana tucuichijchu. Chai animalcunamantaca ama mapa saquirichijchu. 44 Ñucaca cancunapaj Jehová Diosmi cani. Ñucaca jucha illajmi cani. Chaimantami cancunapish chuyayarishpa jucha illaj cana canguichij. Cancunaca allpapi achcapura causaj uchilla animalcunamantaca ama mapa saquirichijchu. 45 Ñucaca Jehová Diosmi cani. Cancunapaj Dios cangapajmi cancunataca Egipto llajtamanta llujshichircani. Ñucaca jucha illajmi cani. Chaimantami cancunapish jucha illaj cana canguichij.

46 Chuscu chaquiyuj animalcunamanta, jahuata volaj animalcunamanta, yacupi causaj tucui laya animalcunamanta, allpapi achcapura causaj tucui uchilla animalcunamanta leyca caimi can. 47 Chashnami maijan animal chuya cashcata, maijan animal mapa cashcata, maijan animalta micunalla cashcata, maijan animalta mana micunalla cashcata yachanguichij’ ninguichij” nircami.

12 Jehová Diosca Moisestaca cashnapishmi nirca: 2 “Israelitacunataca cashna ningui: ‘Shuj huarmi chichu saquirishpa shuj cꞌari huahuata huachashpaca quilla ungüihuan* mapa cashca shinallatajmi canchis punllacunata mapa saquiringa. 3 Ña octavo punlla tucujpica huahuataca circuncisiontami rurachinga. 4 Paica paipaj yahuarmantami 33 punllacunahuan chuyayarishpa catinga. Paica chuyayarina punllacuna tucuringacamami Diospajlla chꞌicanyachishca cosascunataca mana tuparina can. Diospajlla chꞌicanyachishca lugarmanpish mana yaicunachu can.

5 Cutin huarmi huahuata huachashpaca quilla ungüihuan mapa cashca shinallatajmi 14 punllacunata mapa saquiringa. Chai huarmica paipaj yahuarmantami 66 punllacunahuan chuyayarishpa catinga. 6 Paipaj churimanta o paipaj ushushimanta chuyayarina punllacuna pajtajpica, paica sacerdotepajmanmi tandanacuna carpa huasi yaicunman rina can. Chaiman rishpaca shuj huatata charij malta carnerotami rupachishca ofrendata shina apana can. Shinallataj shuj huahua palomata o shuj urpitami juchamanta ofrendata shina apana can. 7 Chai ofrendacunataca sacerdotemi huarmipaj jucha perdonashca cachun Jehová Diospaj ñaupajpi cunga. Chaimi chai huarmica paipaj yahuarmanta* chuyayarishca saquiringa. Shuj cꞌari huahuata o shuj huarmi huahuata huachaj huarmipaj leyca caimi can. 8 Pero shuj ovejata cungapaj mana suficienteta charishpaca paica ishqui urpicunata o ishqui huahua palomacunatami apana can. Shujtaca rupachishca ofrendata shina, caishujtaca juchamanta ofrendata shinami cuna can. Chaicunatami sacerdoteca chai huarmi paipaj juchamanta perdonashca cachun cunga. Chaimi chai huarmica chuya saquiringa’ ningui” nircami.

13 Jehová Diosca Moiseshuan, Aaronhuanmi parlashpa catirca. Paicunataca cashnami nirca: 2 “Maijan runapaj aicha cara pꞌunguijpi, caracha llujshijpi, roncha llujshijpica aicha carapi lepra* ungüi canamantami paitaca sacerdote Aaronpajman o Aaronpaj churicunamanta shuj sacerdotepajman apana can. 3 Sacerdotemi aicha carapi ima ungüi* japishcata alli ricunga. Chugripi millma yurajyajpi, aicha ucucama chugri cajpica lepra ungüimi can. Sacerdotemi alli ricushpa chai runa mapa cashcata huillanga. 4 Aicha carapi roncha yuraj cajpi, aicha ucucama chugri mana cajpi, millma mana yurajyashca cajpica sacerdoteca ungushca runataca canchis punllacunatami cuarentenapi churanga. 5 Ña séptimo punlla tucujpimi sacerdoteca alli ricunga. Chai ungüi alliyashca laya cajpi, mana mirarishca cajpica sacerdoteca canchis punllacunahuanmi chai runataca cuarentenapi churanga.

6 Séptimo punllapica sacerdoteca cutinllatajmi alli ricunga. Chai ungüi chingarishca cajpi, aicha carapi mana mirarishca cajpica sacerdoteca chai runa ña chuya cashcatami huillanga. Chaica shuj carachallami carca. Chai qꞌuipami ungushca runaca paipaj churanata tajshashpa chuya saquiringa. 7 Pero sacerdote chai runata ña chuya cashcata huillashca qꞌuipa, caracha* ungüi cutin ricurishpa paipaj aicha carapi mirarijpica cutinmi sacerdotepaj ñaupajpi ricuringapaj tigrana can. 8 Chaimi sacerdoteca chaita alli ricunga. Caracha ungüi chai runapaj aicha carapi mirarishca cajpica chai runa mapa cashcatami sacerdoteca huillanga. Chaica lepra ungüimi can.

9 Shuj runapi lepra ungüi ricurijpica paitaca sacerdotepajmanmi apana can. 10 Chai runataca sacerdotemi alli ricunga. Aicha cara yurajyashpa pꞌunguishca cajpi, chaipi millma yurajyashca cajpi, pꞌunguishcapi llullu aicha ricurishca cajpica 11 chai runaca aicha carapimi anchayashca lepra ungüita charin. Sacerdoteca chai runa mapa cashcatami huillanga. Paitaca mapa cashcamantami cuarentenapica mana churanga. 12 Pero lepra tucui aicha carapi mirarijpi, umamanta chaquicama tapashcata sacerdote ricushpa, 13 lepra ima shina cajta sacerdote alli ricushpa, lepra tucui aicha carata tapashcata ricushpaca chai ungushca runa chuya saquirishcatami* huillanga. Tucui aicha cara yurajlla saquirishcamantami chai runaca chuya saquiringa. 14 Pero chai runapaj aicha carapi llullu aicha ricurijpica paica mapami saquiringa. 15 Chai llullu aichata ricushpami sacerdoteca ungushca runa mapa cashcata huillanga. Llullu aicha ricurishcaca mapami can. Chaica lepra ungüimi can. 16 Pero chai llullu aicha cutin yurajyajpica chai runaca sacerdotepajmanmi rina can. 17 Chaimi sacerdoteca alli ricunga. Chugri yurajyashca cajpica paitaca chuya cashcatami sacerdoteca huillanga. Chai runaca chuyami saquirishca.

18 Maijanpaj aicha carapi úlcera* ungüi llujshijpi, chai ña alliyashca cajpi, 19 pero úlcera ungüi llujshishcapi aicha cara yurajyashpa pꞌunguijpi o yuraj puca roncha ricurijpica paica sacerdotepaj ñaupajpimi ricurina can. 20 Chai ronchataca sacerdotemi alli ricunga. Aicha ucucama chugririshca cajpi, millmapish yurajyashca cajpica sacerdoteca chai runa mapa cashcatami huillanga. Úlcera ungüi maipi cashcapimi lepra ungüi ricurishca. 21 Pero sacerdote alli ricushpa chai ronchapi millma mana yurajyashca cajpi, aicha ucucama chugri mana cajpi, ña alliyacuj layata ricushpaca chai runataca canchis punllacunatami cuarentenapi churanga. 22 Ashtahuanpish chai roncha tucui aicha carapi mirarishca cajpica sacerdoteca chai runa mapa cashcatami huillanga. Chai runaca lepra ungüihuanmi can. 23 Pero chai roncha chashnallataj cajpi, mana mirarishca cajpica úlcera ungüi pꞌunguishcallami can. Chaimi sacerdoteca chai runa chuya cashcata huillanga.

24 Maijanpish rupashpa chugririjpi, chai chugripi yuraj puca roncha ricurijpi o yuraj roncha ricurijpica 25 sacerdotemi chaitaca alli ricunga. Chai ronchapi millma yurajyashca cajpi, aicha ucucama chugri cajpica rupashca aichapimi lepra ungüi ricurishca. Chaimi sacerdoteca chai runa mapa cashcata huillanga. Chaica lepra ungüimi can. 26 Pero sacerdote alli ricushpa chai ronchapi millma mana yurajyashca cajpi, aicha ucucama chugri mana cajpi, ña alliyacujta ricushpaca sacerdoteca chai runataca canchis punllacunatami cuarentenapi churanga. 27 Ña séptimo punlla tucujpimi sacerdoteca alli ricunga. Chai roncha tucui aicha carapi mirarishca cajpica sacerdoteca chai runa mapa cashcatami huillanga. Chaica lepra ungüimi can. 28 Pero chai roncha chashnallataj catijpi, mana mirarishca cajpi, ashtahuanpish roncha ña chingaricujpica rupashcapi pꞌunguishcallami can. Chaimi sacerdoteca chai runa chuya saquirishcata huillanga. Chaica rupashcapi pꞌunguishcallami can.

29 Shuj cꞌaripaj o shuj huarmipaj umapi o intunpi* shuj ungüi ricurishca cajpica 30 sacerdotemi chai ungüitaca alli ricunga. Chai ungüi aicha ucucama cajpi, ajcha quilluyashca raloyashca cajpica sacerdoteca chai cꞌari o huarmi mapa cashcatami huillanga. Chaica umapi o intunpi japishca ungüimi can. Umapi o intunpi japishca lepra ungüimi can. 31 Pero sacerdote chaita ricushpa chai ungüi aicha ucucama mana cajpi, chaipi yana ajcha mana ricurijpica sacerdoteca ungushca runataca canchis punllacunatami cuarentenapi churana can. 32 Ña séptimo punlla tucujpimi sacerdoteca chai ungüitaca alli ricunga. Mana mirarishca cajpi, quillu ajcha chaipi mana ricurijpi, aicha ucucama chugri mana cajpica 33 chai runaca umataca lluchullatami ruturina can, intuntapish rasurarinami can. Pero chugririshca partetaca mana rasurarinachu can. Chai qꞌuipami sacerdoteca ungushcataca canchis punllacunata cuarentenapi churanga.

34 Ña séptimo punlla tucujpimi sacerdoteca chugririshca partetaca cutin alli ricunga. Umapi, intunpi ricurishca ungüi mana mirarishca cajpi, aicha ucucama chugri mana cajpica sacerdoteca chai runa chuya cashcatami huillana can. Chai qꞌuipami chai runaca paipaj churanata tajshashpa chuya saquirina can. 35 Pero paita chuyayachishca qꞌuipa chai ungüi tucui aicha carapi mirarijpica 36 sacerdotemi alli ricunga. Chai ungüi tucui aicha carapi mirarishca cajpica sacerdoteca ajcha quilluyashcataca mana ricunachu can. Chai runaca mapami can. 37 Pero chai ungüi mana mirarishca cajpi, chaipi yana ajcha huiñashca cajpica alliyashcami canga. Chai runaca chuyami saquirishca. Chaimi sacerdoteca chuya saquirishcata huillanga.

38 Shuj cꞌaripaj o huarmipaj aicha carapi ronchas llujshijpi, chai ronchas yuraj cajpica 39 sacerdotemi alli ricunga. Aicha carapi llujshishca ronchas asha yurajyashca asha yanayashca cajpica mana millai ungüichu. Chai runaca chuyami can.

40 Shuj runapaj uma ajcha urmajpi lluchu uma* saquirishpaca paica chuyami can. 41 Frente ajcha urmajpi chai parte lluchu saquirishpapish paica chuyami can. 42 Pero lluchu umapi o lluchu frentepi yuraj puca chugri ricurijpica leprami umapi o frentepi ricuricunga. 43 Chaitaca sacerdotemi alli ricunga. Coronillapi o frentepi calvo saquirishcapi ungüi pꞌunguishpa yuraj puca cajpi, chaipi lepra ungüi laya ricurijpica 44 paica lepra ungüihuanmi can. Paica mapami can. Sacerdoteca chai runa umapi chai ungüita charishcamantami mapa cashcata huillanga. 45 Lepra ungüita charij runaca lliqui ropata churarishcami purina can. Ajchatapish mana allichirinachu can. Shinallataj shimita* taparishpami: ‘¡Mapami* cani, mapami cani!’ nishpa caparina can. 46 Paica chai ungüihuan cashca tucui tiempomi mapa canga. Mapa cashcamantami shujtajcunamanta carupi causana can. Carpa huasicunamanta canllamanmi causanga.

47 Lepra ungüi millma churanapi o lino churanapi ricurijpi, 48 linohuan o millmahuan ahuashca telapi* o carahuan rurashca ima cosascunapi ricurijpi, 49 churanapi, carapi, ahuashca telapi o caramanta rurashca ima cosascunapi verde quillu mancha o puca mancha ricurijpica chaicunaca lepra ungüihuanmi can. Chaitaca sacerdotemanmi ricuchina can. 50 Chai ungüitaca sacerdotemi alli ricunga. Chai qꞌuipami cosascunataca canchis punllacunata cuarentenapi churanga. 51 Ña séptimo punlla tucujpimi sacerdoteca chai ungüitaca alli ricunga. Churanapi, ahuashca telapi o carapi ungüi mirarishca cajpica (carahuan imata rurangapaj cajpipish) llaquichij lepra ungüimi can. Leprahuan caj cosascunaca mapami can. 52 Sacerdoteca churanatapish, millmahuan o linohuan ahuashca telatapish o carahuan rurashca ima cosascunatapish chaicunapi lepra ungüi ricurishca cajpica rupachinami can. Chaica llaquichij lepra ungüimi can. Chaicunataca ninapimi rupachina can.

53 Pero sacerdote chai cosascunata alli ricushpa churanapi, ahuashca telapi o carahuan rurashca ima cosascunapi mancha mana mirarishca cajpica 54 sacerdoteca chai mapayashca cosascunata tajshachunmi mandanga. Chai qꞌuipami chaicunataca canchis punllacunahuan cuarentenapi churanga. 55 Chai mapayashca cosascunataca ña alli tajshashca qꞌuipami sacerdoteca alli ricunga. Chai mancha chashnallataj catijpi, ungüi mana mirarishca cajpipish chai cosascunaca mapami can. Chai cosascunataca ucu lado o jahua lado ismushcamantami ninapi rupachina cangui.

56 Pero sacerdote alli ricushca qꞌuipa, chai cosascunata alli tajshashca qꞌuipa mancha chingaricujpica sacerdoteca churanamanta, caramanta, ahuashca telamantaca mapayashca partetami lliquinga. 57 Shinapish churanapi, ahuashca telapi o carahuan rurashca ima cosascunapi chai mancha ricurishpa catijpica chai ungüica mirarishpami caticun. Ima cosas cajpipish mapa cashcamantami ninapi rupachina cangui. 58 Pero tajshashca qꞌuipa churanamanta, ahuashca telamanta o carahuan rurashca ima cosascunamanta chai mancha chingarijpica chaicunataca cutinmi tajshana can. Chai huashami chai cosascunaca chuya saquiringa.

59 Millmahuan o linohuan rurashca churanacunapi, ahuashca telapi, o carahuan rurashca ima cosascunapi lepra ricurijpi imata ruranata yachangapaj leyca caimi can. Sacerdotemi chaicunataca chuya cashcata o mapa cashcata huillanga” nircami.

14 Jehová Diosca Moisestaca cashnapishmi nirca: 2 “Lepra ungüihuan caj runa paita chuya cashcata huillai punllaca cai leytami pajtachina can. Paitaca sacerdotepajmanmi pushangacuna. 3 Sacerdoteca carpa huasicunamanta canllaman llujshishpami paitaca alli ricunga. Lepra ungüihuan caj runa ña alliyashca cajpica 4 sacerdoteca chai runata chuyayachingapajmi ishqui chuya pajarocunata, cedro caspita, pucanicuj puchcata, hisopotapish apachun mandanga. 5 Sacerdoteca shuj pajarotaca barro mangapi tiyaj pugyu yacu jahuapi huañuchichunmi mandanga. 6 Pero causaj pajarotaca cedro caspihuan, pucanicuj puchcahuan, hisopohuanmi igual japinga. Chaicunataca tucuitami pugyu yacu jahuapi huañuchishca pajaropaj yahuarpi shutujyachinga. 7 Chai qꞌuipami sacerdoteca lepra ungüimanta chuyayaricuj runataca yahuarhuan canchis cutin tsirapanga. Chai huashami chai runa chuya saquirishcata huillanga. Cutin causaj pajarotaca campopimi cacharinga.

8 Chuyayaricuj runaca paipaj churanatami tajshana can. Paipaj uma ajchatapish lluchullatami ruturina can, paipaj cuerpo millmatapish rasurarinami can, paipish yacuhuanmi armana can. Chashnami paica chuya saquiringa. Chaita rurashca qꞌuipami paica carpa huasicuna maipi cashcaman yaicui tucunga. Pero paipaj carpa huasi canllapimi canchis punllacunata causanga. 9 Séptimo punlla tucujpica paipaj uma ajchatami lluchullata ruturina can. Paipaj intuntapish,* cejastapishmi rasurarina can. Tucuita rasurarishca qꞌuipami paipaj churanatapish tajshashpa, paipish yacuhuan armashpa chuya saquiringa.

10 Octavo punlla tucujpica sano ishqui malta carnerota, shuj huatata charij sano huarmi ovejatami apanga. Cutin grano ofrendata shinaca aceitehuan chagrushca canchis libra yalli* alli* harinatami apanga. Shinallataj shuj taza* aceitetapishmi apanga. 11 Chuyayaricuj runa ña chuya saquirishcata huillagrij sacerdotemi paitapish, paipaj ofrendacunatapish Jehová Diospaj ñaupajpi, tandanacuna carpa huasi yaicunapi ricuchinga. 12 Sacerdoteca shuj malta carnerota japishpami culpamanta ofrendata shina shuj taza aceitehuan cunga. Chaitaca caiman chaiman cuyuchishpa cushca ofrendata shinami Jehová Diospaj ñaupajpi caiman chaiman cuyuchinga. 13 Chai qꞌuipami malta carnerotaca juchamanta ofrendata shina cushca animalta, rupachishca ofrendata shina cushca animalta huañuchishcallapitaj huañuchinga. Chai animaltaca carpa huasi patiopimi huañuchinga. Culpamanta ofrendaca juchamanta ofrenda shinallatajmi sacerdotepaj can. Chaica Diospajlla ashtahuan chꞌicanyachishcami can.

14 Chai qꞌuipaca sacerdoteca culpamanta ofrendata shina cushca animalpaj asha yahuartaca chuyayaricuj runapaj alli lado rinrinpi, alli lado maqui mama dedopi, alli lado chaqui mama dedopimi churanga. 15 Shinallataj sacerdoteca taza aceitemanta asha aceiteta japishpami paipaj lluqui maqui shungupi tallinga. 16 Chai huashami sacerdoteca paipaj lluqui maqui shungupi caj aceitepi paipaj alli lado maqui dedota shutujyachishpa Jehová Diospaj ñaupajpi asha aceiteta canchis cutin tsirapanga. 17 Chai qꞌuipami sacerdoteca paipaj maqui shungupi saquirishca asha aceitetaca chuyayaricuj runapaj alli lado rinrinpi, alli lado maqui mama dedopi, alli lado chaqui mama dedopi churanga. Culpamanta ofrenda yahuarta churashca jahuapimi churanga. 18 Chai qꞌuipaca sacerdoteca paipaj maqui shungupi saquirishca aceitetami chuyayaricuj runapaj uma jahuapi churanga. Sacerdoteca chai runa Jehová Diospaj ñaupajpi paipaj juchamanta perdonashca cachunmi chaita ruranga.

19 Sacerdoteca juchamanta ofrendata shina cushca animalta huañuchishpami chuyayaricuj runa paipaj juchamanta perdonashca cachun cunga. Chai qꞌuipaca rupachishca ofrendata shina cushca animaltami huañuchinga. 20 Chaimantaca sacerdoteca chai runa paipaj juchamanta perdonashca cachunmi rupachishca ofrendatapish, grano ofrendatapish altar jahuapi cunga. Chashnami chai runaca ña chuya saquiringa.

21 Shinapish chai runa pobre cashpa, mana suficienteta charishpaca paipaj juchamanta perdonashca cangapajmi culpamanta ofrendata shina shuj malta carnerota japishpa caiman chaiman cuyuchina can. Grano ofrendata shinaca aceitehuan chagrushca ishqui libra yalli* alli harinatami cuna can. Shinallataj shuj taza aceiteta, 22 ishqui urpicunata o ishqui huahua palomacunatami pai cui pudishcallata cuna can. Shujca juchamanta ofrendapajmi canga, caishujca rupachishca ofrendapajmi canga. 23 Octavo punlla tucujpica chuya saquiringapajmi tucui chaicunata sacerdotepajman apanga. Chaicunataca tandanacuna carpa huasi yaicunapi, Jehová Diospaj ñaupajpimi cunga.

24 Sacerdoteca culpamanta ofrendata shina cushca malta carnerota, taza aceiteta japishpami caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchinga. 25 Chai qꞌuipaca sacerdoteca culpamanta ofrendata shina cushca malta carnerotami huañuchinga. Chai huashaca sacerdoteca asha yahuarta japishpami chuyayaricuj runapaj alli lado rinrinpi, alli lado maqui mama dedopi, alli lado chaqui mama dedopi churanga. 26 Sacerdoteca asha aceitetaca paipaj lluqui maqui shungupimi tallinga. 27 Chaimantaca paipaj alli lado maqui dedohuanmi paipaj lluqui maqui shungupi caj asha aceiteta japishpa Jehová Diospaj ñaupajpi canchis cutin tsirapanga. 28 Shinallataj sacerdoteca paipaj maqui shungupi caj asha aceitetami chuyayaricuj runapaj alli lado rinrinpi, alli lado maqui mama dedopi, alli lado chaqui mama dedopi churanga. Culpamanta ofrendata shina cushca animalpaj yahuarta churashcallapitajmi churanga. 29 Chai qꞌuipaca sacerdoteca paipaj maqui shungupi saquirishca aceitetami chuyayaricuj runapaj uma jahuapi churanga. Sacerdoteca chai runa Jehová Diospaj ñaupajpi paipaj juchamanta perdonashca cachunmi chaita ruranga.

30 Sacerdoteca shuj urpita cashpa o shuj huahua palomata cashpami chai runa cui pudishcallata Diosman cunga. 31 Shujtaca juchamanta ofrendata shinami cunga. Caishujtaca rupachishca ofrendata shinami grano ofrendahuan igual cunga. Sacerdoteca chuyayaricuj runa Jehová Diospaj ñaupajpi paipaj juchamanta perdonashca cachunmi chaita ruranga.

32 Lepra ungüihuan caj runa paita chuyayachichun mana suficienteta charishpaca cai leytami pajtachina can” nircami.

33 Chai qꞌuipami Jehová Diosca Moisestapish, Aarontapish cashna nirca: 34 “Cancunaman ñuca cugrishca Canaán llajtaman yaicushpa chai llajtapi shuj huasipi lepra ricurichun ñuca saquijpica 35 chai huasi dueñoca sacerdotepajman rishpami: ‘Ñuca huasipica shuj mancha layami ricurishca’ ninga. 36 Sacerdoteca mancha laya ricurishcata alli ricunaman manaraj yaicushpami huasitaca chushajllata saquichun mandanga. Chashnami huasi ucupi tucui imalla tiyashcacuna mana mapa cashcata huillanga. Chai qꞌuipami sacerdoteca huasita alli ricungapaj yaicunga. 37 Chai mancha ricurishca parteta alli ricushpa huasi pircapi verdeyashca quilluyashca jutcucuna ricurijpi o pucayashca jutcucuna ricurijpi, tucui chaicuna pirca ucucama cajpica 38 sacerdoteca huasi punguman llujshishpami chai huasitaca canchis punllacunata cuarentenapi churanga.

39 Séptimo punlla tucujpica sacerdoteca cutinmi chai huasita alli ricunga. Huasi pircapi chai mancha ashtahuan mirarishca cajpica 40 sacerdoteca mapayashca rumicunata llujshichishpa llajtamanta canllaman, mapacunata shitana lugarpi shitachunmi mandanga. 41 Chai qꞌuipaca huasi ucuta alli raspachunmi mandanga. Llujshichishca yesotapish, mezclatapish llajtamanta canllaman, mapacunata shitana lugarpimi shitana can. 42 Llujshichishca rumicuna cashcapica shujtaj rumicunatami churana can. Cutin huasi pircataca shujtaj mezclahuanmi enlucina can.

43 Shinapish rumicunata llujshichishca qꞌuipa, pircacunata raspashca qꞌuipa, mezclahuan enlucishca qꞌuipa cutinllataj mancha ricurijpica 44 sacerdoteca yaicushpami chai huasita alli ricunga. Huasipi chai mancha mirarishca cajpica chai huasitaca llaquichij leprami japishca. Chai huasica mapami can. 45 Sacerdoteca huasita urmachichunmi mandanga. Rumicunatapish, caspicunatapish, yesotapish, mezclatapish urmachishpa llajtamanta canllaman, mapacunata shitana lugarman apachunmi mandanga. 46 Pero maijanpish huasita cuarentenapi churashca punllacunapi yaicushpaca chishiyangacamami mapa saquiringa. 47 Maijanpish chai huasipi dormijca paipaj ropatami tajshana can. Maijanpish chai huasipi micujca paipaj ropatami tajshana can.

48 Shinapish sacerdote rishpa, mezclahuan enlucishca qꞌuipa chai huasipi mancha mana mirarishcata ricushpaca sacerdoteca chai huasi chuya saquirishcatami huillanga. Chai manchaca chingarishcami.* 49 Sacerdoteca chai huasita chuyayachingapajca ishqui pajarocunata, cedro caspita, pucanicuj puchcata, hisopotapishmi igual japinga. 50 Shuj pajarotaca barro mangapi tiyaj pugyu yacu jahuapimi huañuchina can. 51 Chai qꞌuipaca cedro caspita, hisopota, pucanicuj puchcata, causaj pajarotapish japishpami huañushca pajaropaj yahuarpi, pugyu yacupi shutujyachinga. Shinallataj chai yahuartaca huasi ladomanmi canchis cutin tsirapana can. 52 Chai huasitaca pajaropaj yahuarhuan, pugyu yacuhuan, causaj pajarohuan, cedro caspihuan, hisopohuan, pucanicuj puchcahuanmi chuyayachinga. 53 Chai qꞌuipami causaj pajarotaca llajtamanta canllaman, campopi cacharinga. Huasitapishmi chuyayachinga, chaimi huasica chuya saquiringa.

54 Ima lepra* ungüi japijpipish, umapi o barbaspi ungüi ricurijpipish cai leytami pajtachina can. 55 Shinallataj churanapi o huasipi lepra ungüi ricurijpi, 56 aicha cara pꞌunguijpi, caracha llujshijpi, ronchas ricurijpipish cai leytami pajtachina can. 57 Chashnami sacerdoteca ima chuya cashcata o ima mapa cashcata decidinga. Lepra ungüi japijpica cai leytami pajtachina can” nircami.

15 Jehová Diosca Moiseshuan, Aaronhuanmi parlashpa catirca. Paicunataca cashnami nirca: 2 “Israelitacunahuan parlashpaca paicunataca cashna ninguichij: ‘Shuj cꞌari pai charishca aichamanta quiya shina yacu llujshijpica paica mapami can. 3 Chai cꞌari pai charishca aichamanta quiya shina yacu llujshishpa catijpi o pai charishca aichata chai yacu tapajpica mapa cashpami catin.

4 Quiya shina yacu llujshicuj ungüihuan caj cꞌari maijan camapi dormijpipish chai camaca mapami saquiringa. Pai imapi tiyarijpipish chaica mapami saquiringa. 5 Maijanpish chai cꞌaripaj camata tuparishpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 6 Chai ungushca cꞌari tiyarishcapi maijanpish tiyarishpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 7 Chai ungushca cꞌaripaj cuerpota maijanpish tuparishpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 8 Chai ungushca cꞌari chuya caj runata chꞌucajpica chai runaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 9 Quiya shina yacu llujshicuj ungüihuan caj cꞌari maijan monturapi montashca cajpipish chaica mapami saquiringa. 10 Maijanpish ungushca cꞌari tiyarishcapi tuparishpaca chishiyangacamami mapa saquiringa. Cutin ungushca cꞌari tiyarishca cosascunata apajca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 11 Chai ungushca cꞌari paipaj maquicunata yacuhuan mana maillarishpa pitapish tuparijpica chai runaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 12 Quiya shina yacu llujshicuj ungüihuan caj cꞌari shuj barro puñupi tuparijpica chaitaca pꞌaquinami can. Cutin caspi matepi tuparijpica chaitaca yacuhuanmi maillana can.

13 Ungushca cꞌarica pai charishca aichamanta quiya shina yacu pararijpi, chai ungüimanta ña alliyashpaca chuyayachishca cangapajmi canchis punllacunata cuentana can. Paipaj churanataca tajshanami can. Shinallataj pugyu yacuhuanmi armana can. Chashnami paica chuya saquiringa. 14 Ña octavo punlla tucujpica paica ishqui urpicunata o ishqui huahua palomacunatami Jehová Diospaj ñaupajpi, tandanacuna carpa huasi yaicunapi sacerdoteman cuna can. 15 Sacerdoteca shujtaca juchamanta ofrendata shinami cunga. Caishujtaca rupachishca ofrendata shinami cunga. Chashnami sacerdoteca chai ungushca cꞌaritaca pai charishca aichamanta quiya shina yacu llujshicushcamanta Jehová Diospaj ñaupajpi chuyayachinga.

16 Shuj cꞌarimanta semen cacharirijpica paica tucui cuerpotami yacuhuan armana can. Paica chishiyangacamami mapa saquiringa. 17 Ima churanapish o carahuan rurashca ima cosaspish semenhuan mapayajpica yacuhuanmi tajshana can. Chaicunaca chishiyangacamami mapa saquiringa.

18 Shuj cꞌari shuj huarmihuan siririshpa chai cꞌarimanta semen cacharirijpica ishquindijmi yacuhuan armana can. Paicunaca chishiyangacamami mapa saquiringacuna.

19 Shuj huarmi quilla ungüihuan* cashpaca canchis punllacunatami mapa saquiringa. Maijanpish paita tuparishpaca chishiyangacamami mapa saquiringa. 20 Quilla ungüihuan mapa cashpa imapipish siririjpica chaica mapami saquiringa. Pai imapi tiyarijpipish chaica mapami saquiringa. 21 Maijanpish chai huarmipaj camata tuparishpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 22 Maijanpish chai huarmi tiyarishcapi tuparishpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. 23 Maijanpish chai huarmipaj camata tuparishpa o pai imapi tiyarishcapi tuparishpaca chishiyangacamami mapa saquiringa. 24 Shuj cꞌari chai huarmihuan siririjpi quilla ungüimanta yahuar cꞌaripi urmajpica chai cꞌarica canchis punllacunatami mapa saquiringa. Chai cꞌari maijan camapi siririjpipish chai camaca mapami saquiringa.

25 Shuj huarmipaj quilla ungüi manaraj shamunapi achca punllacunata yahuar cacharirijpi o paipaj quilla ungüi ashtahuan punllacunata shamujpica paica tucui chai punllacunatami mapa saquiringa. Quilla ungüihuan mapa cashca shinallatajmi tucui chai punllacunata mapa saquiringa. 26 Yahuar shamucui punllacunapi maijan camapi siririjpica chai camaca quilla ungüihuan cashpa pai siririshca cama shinallatajmi mapa saquiringa. Imapi pai tiyarijpipish quilla ungüihuan cashpa imapi tiyarishca shinallatajmi chaica mapa saquiringa. 27 Maijanpish chai cosascunata tuparishpaca mapami saquiringa. Paipaj churanataca tajshanami can. Shinallataj yacuhuanmi armana can. Paica chishiyangacamami mapa saquiringa.

28 Shinapish yahuar pararijpica chai huarmica canchis punllacunatami cuentana can. Chai qꞌuipami paica chuya saquiringa. 29 Octavo punlla tucujpica ishqui urpicunata o ishqui huahua palomacunatami sacerdoteman cungapaj tandanacuna carpa huasi yaicunaman apanga. 30 Sacerdoteca shujtaca juchamanta ofrendata shinami cunga. Caishujtaca rupachishca ofrendata shinami cunga. Chashnami sacerdoteca chai huarmitaca yahuar shamujpi mapa saquirishcamanta Jehová Diospaj ñaupajpi chuyayachinga.

31 Cancunaca israelitacunataca chuya cachunmi ayudana canguichij. Paicuna mana chuya cashpaca paicunapaj chaupipi caj ñuca carpa huasitami mapayachingacuna. Chashna rurashpaca paicunaca huañungacunami.

32 Shuj cꞌari pai charishca aichamanta quiya shina yacu llujshicujpi, semen cachariricushcamanta mapa cashpaca cai leytami pajtachina can. 33 Shuj huarmi paipaj quilla ungüimanta mapa cashpa, maijan cꞌaripaj cuerpomanta o maijan huarmipaj cuerpomanta ima cacharirijpi, mapa caj huarmihuan shuj cꞌari siririshpapish cai leytami pajtachina can’ ninguichij” nircami.

16 Jehová Diosca Aaronpaj churicuna huañushca qꞌuipami Moiseshuan parlarca. Aaronpaj churicunaca Jehová Dios mana munashca shina paipajman cꞌuchuyashcamantami huañurcacuna. 2 Jehová Diosca Moisestaca cashnami nirca: “Cambaj huauqui Aaronmanca ama huañungapajca arca tapa chꞌimbapurapi caj Diospajlla ashtahuan chꞌicanyachishca ucumanca* ima horapish ama yaicuchun ningui. Chai ucuca cortina huashapimi can. Ñucaca arca tapa jahuapimi shuj pꞌuyupi ricurisha.

3 Diospajlla ashtahuan chꞌicanyachishca ucuman yaicungapajca Aaronca caitami apana can: juchamanta ofrendata shinaca shuj malta torotami apana can. Rupachishca ofrendata shinaca shuj carnerotami apana can. 4 Paica Diospajlla chꞌicanyachishca lino churanatami churarina can. Paipaj lluchulla aichata tapachingapajpish lino calzoncillocunatami churarina can. Shinallataj lino cinturontami churarina can. Umapipish lino sumaj turbantetami churarina can. Chaicunaca sacerdote churarina churanacunami can. Paica yacuhuan armashpami chaicunataca churarina can.

5 Aaronca israelitacuna juchamanta ofrendata shina cushca ishqui malta chivocunatami japina can. Rupachishca ofrendata shina cushca shuj carnerotapishmi japina can.

6 Aaronca paipaj juchacunamantami shuj torota juchamanta ofrendata shina cuna can. Chaitaca paipaj juchacunatapish, paipaj familiapaj juchacunatapish perdonachunmi Diosman cunga.

7 Chai qꞌuipaca ishqui malta chivocunata japishpami Jehová Diospaj ñaupajpi, tandanacuna carpa huasi yaicunapi churanga. 8 Aaronca ishquindij malta chivocunatami sorteanga: shujca Jehová Diospajmi canga, caishujca Azazelpajmi* canga. 9 Sorteajpi Jehová Diospaj urmashca malta chivotaca Aaronca juchamanta ofrendata shinami cunga. 10 Pero sorteajpi Azazelpaj urmashca caishuj malta chivotaca israelitacunapaj jucha perdonashca cachunmi Jehová Diospaj ñaupajman causajta apana can. Chashnami chai malta chivotaca chaquishca pambaman Azazelpaj cachanga.

11 Aaronca paipaj juchacunamantami shuj torota juchamanta ofrendata shina cuna can. Chaitaca paipaj juchacunatapish, paipaj familiapaj juchacunatapish Dios perdonachunmi cunga. Chai qꞌuipami ofrendata shina cushca torotaca paipaj juchacunamanta huañuchinga.

12 Qꞌuipaca Jehová Diospaj ñaupajpi caj altarmantami rupacuj carbón junda braserillota japinga. Mishquijllata ashnacuj cutashca inciensotapish ishqui maqui jundata japishpami cortina huashaman apanga. 13 Shinallataj inciensotaca Jehová Diospaj ñaupajpimi ninapi shitanga. Chaimi inciensota* rupachishca cushnica Leyta huaquichina arca tapata tapanga. Chashnami paica mana huañunga.

14 Toropaj asha yahuarta japishpami paipaj dedohuan arca tapa chꞌimbapurapi inti llujshin ladoman tsirapanga. Shinallataj asha yahuarta japishpami paipaj dedohuan arca tapa ñaupajpi canchis cutin tsirapanga.

15 Chai qꞌuipaca israelitacunapaj juchacunamanta ofrendata shina cushca malta chivotami huañuchinga. Chai animalpaj yahuartaca cortina huashaman apashpami toropaj yahuarhuan rurashca shinallataj arca tapa ladota, arca tapa ñaupajpi tsirapanga.

16 Aaronca Diospajlla ashtahuan chꞌicanyachishca ucutaca israelitacunapaj mapa ruraicunamanta, mana alli ruraicunamanta, juchacunamantami chuyayachina can. Tandanacuna carpa huasimantapish chaillatatajmi rurana can. Chaica mapa ruraicunata ruracuj israelitacunapaj chaupipimi can.

17 Juchacunata perdonachun Diospajlla ashtahuan chꞌicanyachishca ucupi yahuarta tallingapaj Aarón yaicushca horasmanta llujshingacamaca tandanacuna carpa huasipica pi shujtaj runaca mana canachu can. Chaipimi Aaronca paipaj juchacunatapish, paipaj familiapaj juchacunatapish, tucui israelitacunapaj juchacunatapish perdonachun yahuarta tallinga.

18 Chai qꞌuipami Aaronca Jehová Diospaj ñaupajpi caj altarman llujshinga. Paica altarta chuyayachingapajmi toropaj asha yahuarta, malta chivopaj asha yahuarta altar tucui gachucunapi churanga. 19 Shinallataj asha yahuarta japishpami paipaj dedohuan altar jahuapi canchis cutin tsirapanga. Chashnami altartaca israelitacunapaj mapa ruraicunamanta chuyayachishpa Diospajlla chꞌicanyachinga.

20 Diospajlla ashtahuan chꞌicanyachishca ucutapish, tandanacuna carpa huasitapish, altartapish chuyayachishca qꞌuipami causaj malta chivotapish cunga. 21 Aaronca chai malta chivopaj uma jahuapi paipaj ishqui maquicunata churashpami israelitacunapaj pandarishcacunata, mana allita rurashcacunata, juchacunatapish tucuita huillanga. Chaicunataca malta chivopaj umapimi churanga. Chaimantaca malta chivotaca shuj agllashca runahuanmi chaquishca pambaman cachanga. 22 Malta chivoca israelitacunapaj tucui pandarishcacunata apashpami chaquishca pambaman ringa. Chai runaca malta chivotaca chaquishca pambamanmi cachanga.

23 Chai qꞌuipaca Aaronca tandanacuna carpa huasimanmi yaicunga. Diospajlla ashtahuan chꞌicanyachishca ucuman yaicushpa churarishca lino churanata llujshichishpami chaipi saquinga. 24 Paica Diospajlla chꞌicanyachishca lugarpi armashpami churanata churarina can. Qꞌuipaca chaimanta llujshishpami pai cushca rupachishca ofrendatapish, israelitacuna cushca rupachishca ofrendatapish cunga. Chashnami paipaj juchacunamanta perdonashca canga. Israelitacunapish paicunapaj juchacunamantami perdonashca canga. 25 Altar jahuapica juchamanta cushca ofrendamanta huiratami rupachishpa cushnichinga.

26 Azazelpaj malta chivota cachaj runaca paipaj churanatami tajshana can. Shinallataj yacuhuanmi armana can. Chai qꞌuipami paica carpa huasicuna maipi cashcaman yaicui tucunga.

27 Juchamanta ofrendata shina cushca torotapish, juchamanta ofrendata shina cushca malta chivotapish carpa huasicunamanta canllamanmi apanga (chai animalcunapaj yahuarca juchata perdonachunmi Diospajlla ashtahuan chꞌicanyachishca ucuman apashca carca). Chai animalcunapaj caratapish, aichatapish, majadatapish ninapimi rupachinga. 28 Chaicunata rupachij runaca paipaj churanatami tajshana can. Shinallataj yacuhuanmi armana can. Chai qꞌuipami paica carpa huasicuna maipi cashcaman yaicui tucunga.

29 Cai leytami cancunaca siempre pajtachina canguichij: cancunapish, cancunapurapi causaj shujtaj llajtamanta runapish séptimo quillapaj chunga punllapica humillarinami* canguichij. Ima trabajotapish mana ruranachu canguichij. 30 Chuya saquiringapajmi chai punllaca cancunapaj juchacunamanta perdonashca canguichij. Chashnami Jehová Diospaj ñaupajpica tucui cancunapaj juchacunamanta chuya saquiringuichij. 31 Sábado punllaca cancunapajca samarina jatun punllami can. Chai punllaca humillarinami canguichij. Cai leytaca siempremi pajtachina canguichij.

32 Yayapaj randi agllashca, nombrashca sacerdotemi juchacunata perdonachun sacrificiocunata cunga. Shinallataj paica sacerdote churarina lino churanatami churaringa. 33 Chai sacrificiocunataca Diospajlla ashtahuan chꞌicanyachishca ucumanta, tandanacuna carpa huasimanta, altarmanta, sacerdotecunamanta, tucui israelitacunamantami ruranga. 34 Cai leytaca cancunaca siempremi pajtachina canguichij. Israelitacunapaj tucui juchacuna perdonashca cachunmi huatapica shuj cutin rurana canguichij” nircami.

Aaronca Jehová Dios Moisesman mandashca shinallatajmi rurarca.

17 Jehová Diosca Moisestaca cashnapishmi nirca: 2 “Aaronhuan, paipaj churicunahuan, tucui israelitacunahuan parlai. Paicunataca cashna ningui: ‘Jehová Diosca caitami mandashca:

3 “Israelitacunamanta maijan runapish carpa huasicuna maipi cashcapi o carpa huasicunamanta canllaman shuj torota, shuj malta carnerota o shuj chivota huañuchishpaca 4 paica culpayujmi tucunga. Paica chai animaltaca tandanacuna carpa huasi yaicunapi huañuchingapajmi apana carca. Chaitaca Jehová Diospaj carpa huasi ñaupajpimi Jehová Diosman shuj ofrendata shina cuna carca. Chai runaca yahuartami jichashca. Chaimantami israelitacunapuramantaca huañuchishca canga. 5 Cai leyca israelitacuna paicunapaj sacrificiocunata campopi ña ama ashtahuan rurachunmi can. Paicunaca Jehová Diosman cungapajmi chai sacrificiocunataca tandanacuna carpa huasi yaicunaman, sacerdotepajman apana can. Chaicunataca Jehová Dioshuan alli tucungapaj sacrificiocunata shinami cuna can. 6 Sacerdoteca tandanacuna carpa huasi yaicunapimi Jehová Diospaj altartaca yahuarhuan tsirapanga. Cutin huirataca Jehová Diosman cushca mishquijllata ashnacuj ofrendata shinami rupachishpa cushnichinga. 7 Israelitacunaca chivoman rijchaj demoniocunamanca sacrificiocunataca ña mana cunachu can. Paicunaca chaicunahuanmi huainayacuncuna. Cai leytaca cancunapish, cancunapaj huahua huahuacunapishmi siempre pajtachina canguichij” nishpami mandashca’ ningui.

8 Shinallataj paicunataca cashna ningui: ‘Israelitacunamanta shuj runa o cancunapurapi causaj shujtaj llajtamanta maijan runapish rupachishca ofrendata o shuj sacrificiota cushpa, 9 pero tandanacuna carpa huasi yaicunapi Jehová Diosman cungapaj mana apashpaca israelitacunapuramantaca huañuchishcami canga.

10 Israelitacunamanta shuj runa o cancunapurapi causaj shujtaj llajtamanta maijan runapish ima yahuarta micujpica paipaj contra jatarishpami paitaca israelitacunapuramanta huañuchisha. 11 Gentecunapaj causaipish, tucui animalcunapaj causaipish yahuarpimi can. Ñucallatajmi yahuartaca cancunapaj juchacunata perdonangapaj altar jahuapi cancunamanta churashcani. Causaica yahuarpimi can. Chaimantami cancunapaj juchacunamanta perdonashca canguichij. 12 Chaimantami israelitacunataca: “Cancunaca yahuartaca ni pi mana micunachu canguichij. Cancunapurapi causaj shujtaj llajtamanta runapish yahuartaca ni pi mana micunachu can” nircani.

13 Shuj israelita runa o cancunapurapi causaj shujtaj llajtamanta runa animalcunata japicushpa micunalla sacha animalta o micunalla alasyuj animalta japishpaca chai animalpaj yahuarta shutuchishpami allpahuan tapana can. 14 Tucui causajcunapaj causaica yahuarpimi can. Chaimantami israelitacunataca: “Ima aichamantapish yahuartaca ama micunguichijchu. Tucui causajcunapaj causaica yahuarpimi can. Maijanpish yahuarta micujca huañuchishcami canga” nircani. 15 Maijanpish israelitacunamanta cashpa o shujtaj llajtamanta runa cashpapish shuj huañushca animalta japishcata micushpa o sacha animal huañuchishca animalta micushpaca paipaj churanatami tajshana can. Shinallataj yacuhuanmi armana can. Paica chishiyangacamami mapa saquiringa. Chai qꞌuipami chuya saquiringa. 16 Pero paipaj churanata mana tajshashpa, paipish mana armashpaca pai pandarishcamantami castigashca canga’ ningui” nircami.

18 Jehová Diosca Moiseshuanmi parlashpa catirca. Paitaca cashnami nirca: 2 “Israelitacunataca cashna ningui: ‘Ñucaca cancunapaj Jehová Diosmi cani. 3 Egipto llajta gentecuna shinaca ama comportarichijchu. Cancunaca chai llajtapimi causarcanguichij. Canaán* llajta gentecuna rurashcatapish ama ruraichijchu. Cancunataca chai llajtamanmi pushacuni. Paicunapaj costumbrecunataca ama catinguichijchu. 4 Ñuca imallata rurachun nishcacunata pajtachichij. Ñuca leycunapi nishca shina causaichij, chai leycunapi nishcata cazuichij. Ñucaca cancunapaj Jehová Diosmi cani. 5 Ñuca leycunatapish, ñuca imallata rurachun nishcacunatapish cazunami canguichij. Chaicunata ruraj runaca cazushcamantami causanga. Ñucaca Jehová Diosmi cani.

6 Cancunamantaca maijanpish propio familiacunahuan chayaringapajca ama cꞌuchuyanguichijchu. Ñucaca Jehová Diosmi cani. 7 Cambaj yayahuanca ama chayaringuichu. Cambaj mamahuanpish ama chayaringuichu. Paica cambaj mamami can. Paihuanca ama chayaringuichu.

8 Cambaj yayapaj huarmihuanca ama chayaringuichu. Chaita rurashpaca cambaj yayatami pingaipi churangui.

9 Cambaj panihuanca ama chayaringuichu. Cambaj yayallapaj ushushi cajpipish o cambaj mamallapaj ushushi cajpipish, chai huasillapitaj huacharishca cajpipish o mana chai huasillapitaj huacharishca cajpipish ama chayaringuichu.

10 Cambaj churipaj ushushihuan o cambaj ushushipaj ushushihuanca ama chayaringuichu. Chaita rurashpaca pingaipimi saquiringui.

11 Cambaj yayapaj huarmipaj ushushihuanca ama chayaringuichu. Paica cambaj yayapaj ushushi, cambaj panimi can.

12 Cambaj yayapaj panihuanca ama chayaringuichu. Paica cambaj yayapaj propio familiami can.

13 Cambaj mamapaj ñañahuanca ama chayaringuichu. Paica cambaj mamapaj propio familiami can.

14 Cambaj yayapaj huauquipaj huarmihuan chayarishpa cambaj tiotaca ama pingaipi churanguichu. Chai huarmica cambaj tiami can.

15 Cambaj nuerahuanca ama chayaringuichu. Paica cambaj churipaj huarmimi can. Paihuanca ama chayaringuichu.

16 Cambaj huauquipaj huarmihuanca ama chayaringuichu. Chaita rurashpaca cambaj huauquitami pingaipi churangui.

17 Shuj huarmihuan cazarashpaca paipaj ushushihuanpish ama chayaringuichu. Chai huarmipaj churipaj ushushihuan o chai huarmipaj ushushipaj ushushihuan chayaringapajca ama cazaranguichu. Chai huarmicunaca propio familiacunami can. Chaica pinganayai ruraimi can.

18 Cambaj huarmipaj ñañahuanca ama cazaranguichu. Chaita rurajpica paicunapura pꞌiñanacushpami causangacuna. Cambaj huarmi causacujpirajca paihuanca ama chayaringuichu.

19 Shuj huarmi paipaj quilla ungüimanta* mapa cajpiraj paihuan chayaringapajca ama cꞌuchuyanguichu.

20 Cambaj projimopaj* huarmihuanca ama chayaringuichu. Chaita rurashpaca mapami saquiringui.

21 Cambaj huahuacunamanta maijantapish Mólek diosmanca ama cunguichu. Cambaj Diospaj shutitaca ama chashna mapayachichu. Ñucaca Jehová Diosmi cani.

22 Shuj huarmihuan siririj shinaca shuj cꞌarihuanca ama siriringuichu. Chaica millanana ruraimi can.

23 Maijan cꞌaripish shuj animalhuanca ama chayarichun. Chaita rurashpaca mapami saquiringa. Maijan huarmipish shuj animalhuan chayaringapaj chai animalpaj ñaupajpica ama shayarichun. Chaica yallitaj mapa ruraimi can.

24 Chai ruraicunamantaca ama mapa saquirichijchu. Cancunapaj ñaupajmanta llujshichishpa cachagrishca llajta gentecunami tucui chaicunata rurashpa mapa saquirishcacuna. 25 Chaimantami chai llajtaca mapa saquirishca. Chai llajtapi causajcunataca paicuna pandarishcamantami castigasha. Paicunataca allpapish vomitangami.* 26 Pero cancunaca ñuca leycunata, ñuca imallata rurachun nishcacunatami cazuna canguichij. Tucui chai millanana ruraicunataca ama ruraichijchu. Israelitacuna cashpapish, cancunapurapi causaj shujtaj llajtamanta cashpapish chaitaca ama ruraichijchu. 27 Tucui chai millanana ruraicunataca cancunapaj ñaupa chai allpapi causaj runacunami rurarca. Chaimantami allpaca cunanca mapa can. 28 Shinapish cancuna mana mapayachishcamantami chai allpaca cancunapaj ñaupa causaj gentecunata vomitagrishca shinaca cancunataca mana vomitanga. 29 Maijanpish chai millanana ruraicunata rurashpaca israelitacunapuramantaca huañuchishcami canga. 30 Cancunapaj ñaupa causaj gentecuna rurashca millanana costumbrecunata mana catishpami ñuca mandashcacunata cazuna canguichij. Chashnami chai ruraicunahuanca mana mapa saquiringuichij. Ñucaca cancunapaj Jehová Diosmi cani’ ningui” nircami.

19 Jehová Diosca cutinllatajmi Moiseshuan parlarca. Paitaca cashnami nirca: 2 “Tucui israelitacunahuan parlai. Paicunataca cashna ningui: ‘Ñuca, cancunapaj Jehová Diosca jucha illajmi cani. Chaimantami cancunapish jucha illaj cana canguichij.

3 Cancunaca tucuicunami cancunapaj mamatapish, yayatapish respetana* canguichij. Ñuca sábado punllacunatapishmi respetana canguichij. Ñucaca cancunapaj Jehová Diosmi cani. 4 Imapaj mana vali dioscunataca ama adoranguichijchu. Fierrota yacuyachishpapish dioscunataca ama ruranguichijchu. Ñucaca cancunapaj Jehová Diosmi cani.

5 Jehová Dioshuan alli tucungapaj shuj sacrificiota cushpaca paipaj ñaupajpi alli ricuringapaj cuichij. 6 Chai sacrificiotaca cushca punllami micuna canguichij. Cayandij punllapishmi micuna canguichij. Pero sobrashcataca tercer punllami ninapi rupachina canguichij. 7 Shinapish tercer punllapi chai sacrificiomanta imata micujpica chaica millananami canga. Chai sacrificioca mana chasquishcachu canga. 8 Chai sacrificiomanta imata micujca pai pandarishcamantami castigashca canga. Paica Jehová Diospajlla chꞌicanyachishca ofrendatami mapayachishca. Chai runaca israelitacunapuramantaca huañuchishcami canga.

9 Cambaj allpapi cosechashpaca chagra uripi saquirishcacunataca ama tucui cosechaichu. Cambaj cosechamanta sobrashcatapish* ama tandaichu. 10 Cambaj uva chagrapi sobrashcataca ama tandaichu. Cambaj uva chagrapi urmashca uvacunatapish ama tandaichu. Chaicunataca pobrecunapaj,* shujtaj llajtamanta shamushca runacunapajmi saquina cangui. Ñucaca cancunapaj Jehová Diosmi cani.

11 Ama shuhuaichijchu, ama umaichijchu, caishuj chaishuj ama traicionaichijchu. 12 Ñuca shutipi ama yanga juraichijchu. Chashna rurashpaca cancunapaj Diospaj shutitami yangapi churanguichij. Ñucaca Jehová Diosmi cani. 13 Cambaj projimotaca ama llaquichichu, paitaca ama shuhuaichu. Cullqui jahua trabajaj runamanca chai punllallataj pagangui. Paipaj pagohuanca ama tucui tuta cayandij tutamantacama saquiringuichu.

14 Mana uyaj runataca ama maldicichu. Mana ricuj runapaj ñaupajpipish ima jarcaita ama churaichu. Ashtahuanpish cambaj Diosta manchai. Ñucaca Jehová Diosmi cani.

15 Shuj juiciopica cashcata rurajcuna cajta ricuchichij. Pobrecunahuanca pobre cashcallamanta ama paicunapaj parte tucuichijchu. Charijcunahuanpish charij cashcallamanta ama paicunapaj parte tucuichijchu. Ashtahuanpish cancunapaj projimotaca cashcata rurashpa juzgaichij.

16 Cambaj llajta gentecunapurapica shujtajcunata llaquichingapaj llullacunata nishpa ama purichu. Cambaj projimopaj causaita llaquipi churangapajpish ama imata ruraichu.* Ñucaca Jehová Diosmi cani.

17 Cambaj huauquitaca ama cambaj shungupi pꞌiñaichu. Cambaj projimotaca sinchita rimai.* Chashnami pai juchata rurashcamantaca paihuan igual culpayuj mana tucungui.

18 Cambaj projimotaca ama tigra llaquichichu, cambaj shungupipish paitaca ama pꞌiñaichu. Can quiquin cꞌuyarij shinallataj cambaj projimotapish cꞌuyangui. Ñucaca Jehová Diosmi cani.

19 Ñuca leycunata cazuichij: chꞌican chꞌican ishqui animalcunataca ama japichichijchu.* Chꞌican chꞌican ishqui muyucunataca cancunapaj allpapica ama tarpuichijchu. Chꞌican chꞌican ishqui puchcahuan rurashca churanatapish ama churarichijchu.

20 Shuj sirvij huarmi shuj cꞌarihuan cazarangapaj ari nishca cajpi, pero manaraj cullquihuan randishca cajpi, manaraj cacharichishca cajpi, chai huarmihuan shujtaj cꞌari siririshpa, paihuan chayarijpica ishquindijmi castigashca cangacuna. Shinapish chai huarmi manaraj cacharichishca cashcamantami paicunaca mana huañungacuna. 21 Chai cꞌarica paipaj culpamanta ofrendataca* tandanacuna carpa huasi yaicunamanmi Jehová Diospaj apana can. Culpamanta ofrendata shinaca shuj carnerotami apana can. 22 Sacerdoteca chai runa paipaj juchamanta perdonashca cachunmi Jehová Diospaj ñaupajpi chai carnerota cunga. Chashnami chai runaca pai juchata rurashcamantaca perdonashca canga.

23 Ñuca cugrishca allpaman chayashpa frutacunata* pꞌucuj ima yurata tarpushpaca pꞌucushca frutacunataca mapa cashcata, mana tuparipaj cashcatami ricuna canguichij. Quimsa huatacunatami mana tuparina canguichij. Chaicunataca mana micunachu canguichij. 24 Pero chuscu huata tucujpica tucui pꞌucushca granocunami Diospajlla chꞌicanyachishca ofrenda canga. Chaitaca Jehová Diosmanmi cushicuihuan cuna canguichij. 25 Ña pichca* huata tucujpica chai pꞌucushca granocunataca micui tucunguichijmi. Chashnami cancunapaj cosecha granocunaca ashtahuan miraringa. Ñucaca cancunapaj Jehová Diosmi cani.

26 Yahuarhuan cajtaca ama imata micuichijchu.

Ama adivino caichijchu, magiatapish ama ruraichijchu.

27 Uma cada lado ajchataca ama lluchullata ruturichijchu. Barbas puntacunatapish ama maipishcachun uturichijchu.

28 Shuj huañushca runamantaca cancunapaj cuerpotaca ama cuchurichijchu. Tatuajecunatapish ama rurarichijchu. Ñucaca Jehová Diosmi cani.

29 Cambaj ushushitaca huainayaj huarmita rurashpa ama pingaipi churaichu. Chashna rurajpica huainayaj huarmicunamantami allpaca mapayanga, millai ruraicunapish jundaringa.

30 Ñuca sábado punllacunata respetaichij. Ñuca carpa huasitapish tucui shunguhuan respetaichij. Ñucaca Jehová Diosmi cani.

31 Huañushcacunahuan parlajcunapajmanca ama richijchu, adivinocunatapish* ama tapuichijchu. Chaita rurashpaca paicunapaj culpamantami mapa saquiringuichij. Ñucaca cancunapaj Jehová Diosmi cani.

32 Yurajlla uma yuyajcunapaj ñaupajpica shayarinami cangui. Mayorllacunataca respetanami cangui. Cambaj Diostapish manchanami cangui. Ñucaca Jehová Diosmi cani.

33 Cancunapaj allpapi shujtaj llajtamanta runa cancunahuan causajpica paitaca ama llaquichichijchu. 34 Cancunapurapi causaj shujtaj llajtamanta runataca cancunapaj llajtamanta caj runata shinallataj ricuichij. Paitaca cancuna cꞌuyarij shinallataj cꞌuyaichij. Cancunapish Egipto llajtapica shujtaj llajtamanta shamushca runa shinami carcanguichij. Ñucaca cancunapaj Jehová Diosmi cani.

35 Imata midishpapish, imata pesashpapish honrados caichij. 36 Chaquishca granocunata alli midingapajpish,* vinota, aceiteta, shujtaj cosascunata alli midingapajpish* cabalta pesaj balanzacunata, cabalta pesaj pesascunata charichij. Ñucaca cancunata Egipto llajtamanta llujshichij cancunapaj Jehová Diosmi cani. 37 Tucui ñuca leycunata, tucui ñuca imallata rurachun nishcacunata cazuichij, chaicunata pajtachichij. Ñucaca Jehová Diosmi cani’ ningui” nircami.

20 Jehová Diosca Moisestaca cashnapishmi nirca: 2 “Israelitacunataca cashna ningui: ‘Shuj israelita runapish, Israelpi causaj shujtaj llajtamanta runapish paipaj huahuacunamanta shuj huahuata Mólek* diosman cushpaca huañunatajmi can. Gentecunaca chai runataca huañungacamami rumicunahuan shitana can. 3 Ñucami chai runapaj contra jatarishpa israelitacunapuramanta huañuchisha. Chai runaca paipaj huahuacunamanta shuj huahuatami Mólek diosman cushca. Paica ñuca huasitami mapayachishca, ñuca jucha illaj shutitapish yangapimi churashca. 4 Chai runa paipaj huahuacunamanta shuj huahuata Mólek diosman cujta gentecuna ricushpapish imata mana rurajpi, mana huañuchijpica 5 ñucallatajmi chai runapaj contra, paipaj familiapaj contrapish jatarisha. Chai runataca israelitacunapuramantami huañuchisha. Pai shinallataj Mólek diosta adorashpa huainayajcunatapishmi huañuchisha.

6 Maijanpish ñucata saquishpa rurashcalla dioscunata adorashpa* huañushcacunahuan parlajcunapajman rijpi, adivinocunapajman rijpica chai runapaj contra jatarishpami israelitacunapuramanta huañuchisha.

7 Ñucaca cancunapaj Jehová Diosmi cani. Chaimantami cancunapish chuya,* jucha illaj cana canguichij. 8 Ñuca leycunatami cazuna canguichij, chaicunataca pajtachinami canguichij. Ñucaca Jehová Diosmi cani, ñucami cancunataca chuyayachicuni.*

9 Maijan runapish paipaj yayata o paipaj mamata maldicishpaca huañunatajmi can. Paipaj yayata o paipaj mamata maldicishcamantami paipaj culpallamantataj huañunga.*

10 Maijan runapish shujtaj cꞌaripaj huarmihuan huainayajpica castigashcami canga. Paipaj projimopaj huarmihuan huainayashpaca huañunatajmi can. Huainayaj cꞌaripish, huainayaj huarmipish huañunami can. 11 Maijan runapish paipaj yayapaj huarmihuan siririshpaca paipaj yayatami pingaipi churashca. Huarmipish, cꞌaripish huañunatajmi can. Paicunapaj culpallamantatajmi huañungacuna. 12 Maijan runapish paipaj nuerahuan siririshpaca ishquindijmi huañunataj can. Paicunaca yallitaj mapa ruraitami rurashcacuna. Paicunapaj culpallamantatajmi huañungacuna.

13 Maijan runapish shuj huarmihuan siririj shinallataj shuj cꞌarihuan siririshpaca ishquindijmi millanana ruraita rurashcacuna. Paicunaca huañunatajmi can. Paicunapaj culpallamantatajmi huañungacuna.

14 Maijan runapish shuj huarmihuan cazarashpa chai huarmipaj mamahuanpish chayarishpaca pinganayai ruraitami rurashca. Cancunapurapi pinganayai ruraicuna ama tiyachunmi chai runatapish, chai huarmicunatapish ninapi rupachina canguichij.

15 Maijan runapish shuj animalhuan chayarishpaca huañunatajmi can. Chai animaltapish cancunaca huañuchinami canguichij. 16 Maijan huarmipish shuj animalhuan chayaringapaj cꞌuchuyajpica huarmitapish, animaltapish huañuchinami canguichij. Paicunaca huañunatajmi can. Paicunapaj culpallamantatajmi huañungacuna.

17 Maijan runapish paipaj panihuan chayarijpica chai ruraica pingaimi can. Paipaj yayallapaj ushushi cajpipish o paipaj mamallapaj ushushi cajpipish panita lluchullata ricujpi, panipish paita lluchullata ricujpica chai ruraica pingaimi can. Paicunaca tucui israelitacuna ricucujpimi huañuchishca cangacuna. Chai runaca paipaj panitami pingaipi churashca. Pai pandarishcamantaca castigashcami canga.

18 Maijan runapish quilla ungüihuan caj huarmihuan siririshpa paihuan chayarishpaca ishquindijmi huarmipaj yahuarmantaca respetota mana ricuchishcacuna. Ishquindijmi israelitacunapuramantaca huañuchishca cangacuna.

19 Cambaj mamapaj ñañahuanpish, cambaj yayapaj panihuanpish ama chayaringuichu. Chaita rurashpaca propio familiatami pingaipi churangui. Paicuna pandarishcamantaca ishquindijmi castigashca cangacuna. 20 Shuj runa paipaj tiopaj huarmihuan siririshpaca paipaj tiotami pingaipi churashca. Paicunapaj juchamantaca castigashcami cangacuna. Paicunaca huahuacuna illajmi huañungacuna. 21 Maijan runapish paipaj huauquipaj huarmihuan cazarashpaca* millanana ruraitami rurashca. Chai runaca paipaj huauquitami pingaipi churashca. Paicunaca huahuacunata mana charingacunachu.

22 Tucui ñuca leycunatapish, tucui ñuca imallata rurachun nishcacunatapish cazuichij, chaicunataca pajtachichij. Chashnami cancuna causachun ñuca pushacushca allpaca cancunataca mana vomitanga.* 23 Cancunapaj ñaupajmanta ñuca llujshichishpa cachagrishca llajtapi causaj gentecunapaj costumbrecunataca ama catichijchu. Paicunami tucui chaicunata rurashpa causashcacuna. Chaicunataca ñucaca millanayachinimi. 24 Chaimantami cancunataca: “Cancunaca chai llajta gentecunapaj allpahuanmi saquiringuichij. Ñucami cancunamanca chai allpataca shuj herenciata shina cusha. Chai allpapica achca leche, achca mielmi tiyan. Ñucaca cancunapaj Jehová Diosmi cani. Ñucami cancunataca shujtaj pueblocunamanta chꞌicanyachishcani” nircani. 25 Cancunaca maijan animal chuya cashcata, maijan mapa cashcatami yachana canguichij. Shinallataj alasyuj animalcunamanta maijan chuya cashcata, maijan mapa cashcatami yachana canguichij. Shuj animalmantapish, alasyuj animalmantapish o llucashpa purij ima animalmantapish ama millanana tucuichijchu. Chai animalcuna mapa cashcata yachachunmi chꞌicanyachishcani. 26 Ñuca, Jehová Diosca jucha illajmi cani. Chaimantami cancunapish jucha illaj cana canguichij. Cancunataca ñucapajlla cachunmi shujtaj pueblocunamanta chꞌicanyachicuni.

27 Maijan runapish o maijan huarmipish huañushcacunahuan parlaj* cashpa o adivino cashpaca huañunatajmi can. Gentecunaca paicunataca huañungacamami rumicunahuan shitana can. Paicunapaj culpallamantatajmi huañungacuna’ ningui” nircami.

21 Jehová Diosca Moisestaca cashnapishmi nirca: “Aaronpaj churi sacerdotecunamanca cashna ningui: ‘Sacerdotecunaca israelitacunapuramanta shuj huañushca runata tuparishpaca mana mapayanachu can. 2 Pero paipaj propio familia huañushcataca tupari tucunmi. Mama cajpipish, yaya cajpipish, churi cajpipish, ushushi cajpipish, huauqui cajpipish tupari tucunmi. 3 Shinallataj cꞌarihuan manaraj chayarishca, manaraj cazarashca pani paipaj huasipi causacushpa huañujpica paipi tuparishpa mapayai tucunmi. 4 Israelitacunapuramanta shuj runapaj huañushca huarmita tuparishpaca mana mapayanachu can. 5 Sacerdotecunaca umataca mana lluchullata ruturinachu can. Barbas muyundij filotapish mana rasurarinachu can. Cuerpotapish mana cuchurinachu can. 6 Paicunapaj Diospaj ñaupajpica chuyami cana can. Paicunapaj Diospaj shutitapish mana mapayachinachu can. Paicunami Jehová Diosman cushca ninahuan rupachishca ofrendacunata cungacuna. Chai ofrendacunaca paicunapaj Diosman cushca micunami* can. Paicunaca chuyami cana can. 7 Sacerdotecunaca Diospajlla chꞌicanyachishca cashcamantami huainayaj huarmihuan, cꞌarihuan chayarishca huarmihuan o cusamanta divorciarishca huarmihuanca mana cazarana can. 8 Cancunaca shuj sacerdotetaca ñucapajlla chꞌicanyachishca cashcatami ricuna canguichij. Paimi cancunapaj Diosman cushca micunata cun. Cancunata chuyayachij* ñuca, Jehová Diosca jucha illajmi cani. Chaimantami paipish cancunapajca jucha illaj cana can.

9 Shuj sacerdotepaj ushushi huainayashpa mapa saquirishpaca paipaj yayapaj shutitami mapayachicun. Paitaca ninapimi rupachina canguichij.

10 Sacerdotecunapurapi sacerdotecunata jatun mandajca paipaj uma jahuapi agllana aceiteta tallishca cashcamanta, sacerdotepaj churanata churangapaj nombrashca cashcamantami paipaj ajchataca mana maipishcachun charina can. Paipaj churanatapish mana lliquirinachu can. 11 Paica ni maijan huañushcapajman mana cꞌuchuyanachu can. Paipaj yayamantapish, paipaj mamamantapish mana mapayanachu can. 12 Paica Diospaj carpa huasimantaca mana llujshinachu can, paipaj Diospaj carpa huasitapish mana mapayachinachu can. Paipaj jahuapi agllana aceite cashcamantami chaitaca mana rurana can. Chai aceiteca paipaj Dios agllashcata ricuchij señalmi can. Ñucaca Jehová Diosmi cani.

13 Paica cꞌarihuan manaraj chayarishca soltera huarmihuanmi cazarana can. 14 Paica viuda huarmihuan, divorciada huarmihuan, cꞌarihuan chayarishca huarmihuan o huainayaj huarmihuanca mana cazarai tucunchu. Ashtahuanpish cꞌarihuan manaraj chayarishca israelitacunapuramanta soltera huarmihuanmi cazarana can. 15 Israelitacunapurapica paipaj huahua huahuacunataca mana pingaipi churanachu can. Ñucaca Jehová Diosmi cani. Ñucami paitaca ñucapajlla cachun chꞌicanyachicuni’ ningui” nircami.

16 Jehová Diosca Moiseshuanmi parlashpa catirca. Paitaca cashnami nirca: 17 “Aarontaca cashna ningui: ‘Cambaj huahua huahuacunamanta maijanpish cuerpopi mana sano cashpaca Diosman cushca micunata cungapajca mana nunca cꞌuchuyai tucunchu. 18 Cuerpopi mana sano cashpaca maijan runapish mana cꞌuchuyai tucunchu: mana ricuj cashpa, patojo cashpa, huishtu singa cashpa o shuj chaqui shuj rigra ashtahuan suni cashpa, 19 chaqui pꞌaqui cashpa o maqui pꞌaqui cashpa, 20 curcu cashpa, enano cashpa, ñahuicunapi ima ungüihuan cashpa, sarna ungüihuan cashpa, tiña ungüihuan cashpa, luluncuna llapirishca cashpaca mana cꞌuchuyai tucunchu. 21 Sacerdote Aaronpaj huahua huahuacunamantaca maijanpish cuerpopi mana sano cashpaca Jehová Diosman cushca ninahuan rupachishca ofrendacunata cungapajca mana cꞌuchuyai tucunchu. Paica cuerpopi mana sano cashcamantami paipaj Diosman cushca micunata cungapajca mana cꞌuchuyai tucun. 22 Shinapish Diospajlla ashtahuan chꞌicanyachishca cosascunamantapish, Diospajlla chꞌicanyachishca cosascunamantapish paipaj Diosman cushca micunataca micui tucunmi. 23 Pero paica cuerpopi mana sano cashcamantami cortinamanpish, altarmanpish mana cꞌuchuyai tucun. Ñuca carpa huasitaca mana mapayachinachu can. Ñucaca Jehová Diosmi cani. Ñucapajlla cachunmi paicunataca* chꞌicanyachicuni’ ningui” nircami.

24 Chaimi Moisesca Aaronhuanpish, Aaronpaj churicunahuanpish, tucui israelitacunahuanpish parlarca.

22 Jehová Diosca cutinllatajmi Moiseshuan parlarca. Paitaca cashnami nirca: 2 “Aarontapish, paipaj churicunatapish israelitacuna cushca ñucapajlla chꞌicanyachishca cosascunamantaca respetota ricuchichun,* ñuca jucha illaj shutitapish ama yangapi churachun mandai. Ñucaca Jehová Diosmi cani. 3 Paicunataca cashna ningui: ‘Cancunapaj huahua huahuacunamanta maijan runapish mapa cashca jahua israelitacuna cushca Jehová Diospajlla chꞌicanyachishca cosascunaman cꞌuchuyajpica chai runaca huañuchishcami canga. Ñucaca Jehová Diosmi cani. 4 Aaronpaj huahua huahuacunamanta maijanpish lepra ungüihuan cashpa o pai charishca aichamanta quiya shina yacu llujshicujpica chuya saquiringacamami Diospajlla chꞌicanyachishca cosascunamantaca mana micuna can. Huañushca cuerpota tuparishcamanta mapa saquirij cꞌaripish, semen cachariricuj cꞌaripish mana micunachu can. 5 Allpapi achcapura causaj uchilla mapa animalcunapi tuparij runapish o imamantapish mapa caj runata tuparishpa mapa saquirij runapish mana micunachu can. 6 Maijanpish chaicunata tuparijca chishiyangacamami mapa saquiringa. Paica yacuhuan armangacamami Diospajlla chꞌicanyachishca cosascunamantaca imata mana micui tucunga. 7 Paica inti huashicushca qꞌuipami chuya saquiringa. Chai qꞌuipami Diospajlla chꞌicanyachishca cosascunamanta micui tucunga. Chai cosascunaca paipaj micunami can. 8 Shuj huañushca animalta japishcatapish o sacha animal huañuchishca animaltapish mana micunachu can. Chaita micushpaca mapami saquiringa. Ñucaca Jehová Diosmi cani.

9 Paicunaca ñuca mandashcatami cazuna can. Juchata ama rurangapaj, ama huañungapajpish ñucapajlla chꞌicanyachishca cosascunataca mana yangapi churanachu can. Ñucaca Jehová Diosmi cani. Ñucami paicunataca ñucapajlla chꞌicanyachicuni.

10 Sacerdotepaj familiamanta mana caj runaca* Diospajlla chꞌicanyachishca cosascunamantaca imata mana micui tucunchu. Sacerdotepaj huasipi saquiricuj shujtaj llajtamanta runapish, cullqui jahua trabajaj runapish Diospajlla chꞌicanyachishca cosascunamantaca imata mana micui tucunchu. 11 Pero shuj sacerdote paipaj cullquihuan maijan runata randijpica chai runaca micui tucunmi. Sacerdotepaj huasipi huacharij esclavocunapish sacerdotepaj micunamantaca micui tucunmi. 12 Shuj sacerdotepaj ushushi mana sacerdote caj runahuan cazarashpaca Diospajlla chꞌicanyachishca cosascunata cushcacunamantaca mana micui tucunchu. 13 Shuj sacerdotepaj ushushi viuda saquirishpa o divorciarishpa, huahuacunata mana charishpa, jovenpi shinallataj paipaj yayapaj huasiman tigrashpaca paipaj yayapaj micunamantaca micui tucunmi. Pero sacerdotepaj familiamanta mana caj runaca mana micui tucunchu.

14 Maijan runapish pandarishpa Diospajlla chꞌicanyachishca cosascunamanta imata micushpaca mashna valishcamantaca pichcapi chaupishca shuj partehuanmi* sacerdoteman tigrachina can. 15 Sacerdotecunaca israelitacuna Jehová Diosman cushca, paipajlla chꞌicanyachishca cosascunataca mana mapayachinachu can. 16 Chaita rurajpica Diospajlla chꞌicanyachishca cosascunata israelitacuna micushpaca paicunapaj culpallamantatajmi castigashca cangacuna. Ñucaca Jehová Diosmi cani. Ñucami paicunataca ñucapajlla chꞌicanyachicuni’ ningui” nircami.

17 Jehová Diosca Moiseshuanmi parlashpa catirca. Paitaca cashnami nirca: 18 “Aaronhuan, paipaj churicunahuan, tucui israelitacunahuan parlai. Paicunataca cashna ningui: ‘Israelitacunapuramanta shuj runa o shujtaj llajtamanta shamushca runa Jehová Diosman rupachishca ofrendata cushpaca pai ari nishcata pajtachingapaj ofrenda cajpipish o shungumanta cushca ofrenda cajpipish 19 Diospaj ñaupajpi alli ricuringapajmi shuj sano torota, sano malta carnerota o sano chivota cuna can. 20 Mana sano caj animaltaca ama cunguichijchu. Chaica Diospaj ñaupajpi alli ricuringapajca mana valingachu.

21 Maijan runapish Jehová Dioshuan alli tucungapaj sacrificiota cushpaca pai ari nishcata pajtachingapaj cajpipish o shungumanta cushca ofrenda cajpipish sano animaltami cuna can. Diospaj ñaupajpi alli ricurisha nishpaca sano torota o sano ovejata o sano chivotami cuna can. Chai animalca tucuimi sano cana can. 22 Mana ricuj animalta, tullucuna pꞌaqui animalta, chugririshca animalta, chꞌimbi llujshishca animalta, carachayuj animalta, tiña ungüihuan caj animaltaca mana cunachu can. Chashna animalcunataca Jehová Diosmanca ni maijanta mana cunachu can. Altar jahuapipish Jehová Diosmanca shuj ofrendata shinaca mana cunachu can. 23 Shungumanta cushca ofrendata shinaca shuj torota, shuj ovejatami shuj chaqui ashtahuan suni cajpipish o shuj chaqui ashtahuan uchilla cajpipish cui tucunguichij. Pero chai animalca Diosman cusha nishca ofrenda shinaca mana chasquishcachu canga. 24 Jehová Diosmanca luluncuna chugririshca, luluncuna llapirishca, capashca animaltaca mana cunachu canguichij. Chai animalcunataca cancunapaj llajtapica mana cunachu canguichij. 25 Shujtaj llajtamanta runa chai animalcunamanta Diosman shuj ofrendata shina cusha nijpica mana chasquinachu canguichij. Chai animalcunaca ungushca animalcunami can, mana sano animalcunachu can. Chai animalcunata cujpica Diosca mana chasquingachu’ ningui” nircami.

26 Jehová Diosca cutinllatajmi Moiseshuan parlarca. Paitaca cashnami nirca: 27 “Shuj cꞌari bizi, shuj huahua carnero, shuj huahua chivo huacharishpaca chai animalca paipaj mamahuanmi canchis punllacunata saquiringa. Pero octavo punlla tucujpica chai animalca ofrenda shinami chasquishca canga. Jehová Diosman cushca ninahuan rupachishca ofrenda shinami chasquishca canga. 28 Shuj vacata paipaj huahuatapish o shuj ovejata paipaj huahuatapish ama chai punllallataj huañuchichijchu.

29 Jehová Diosta pagui ningapaj shuj sacrificiota cushpaca paipaj ñaupajpi alli ricuringapajmi cuna canguichij. 30 Chai sacrificiotaca cushca punllallatajmi micuna canguichij. Cayandij tutamantapajca imata mana saquinachu canguichij. Ñucaca Jehová Diosmi cani.

31 Ñuca mandamientocunatami cazuna canguichij. Chaicunataca pajtachinami canguichij. Ñucaca Jehová Diosmi cani. 32 Ñuca jucha illaj shutitaca ama yangapi churaichijchu. Israelitacunapaj ñaupajpica ñucaca jatunyachishcami casha. Ñucaca Jehová Diosmi cani. Ñucami cancunataca ñucapajlla chꞌicanyachicuni. 33 Cancunapaj Dios cangapajmi cancunataca Egipto llajtamanta llujshichircani. Ñucaca Jehová Diosmi cani” nircami.

23 Jehová Diosca Moiseshuanmi parlashpa catirca. Paitaca cashnami nirca: 2 “Israelitacunahuan parlai. Paicunataca cashna ningui: ‘Cancunaca Jehová Diospajmi fiestacunata rurana canguichij. Diosta adorangapaj tandanacuicunamanmi cayana canguichij. Cai fiestacunaca ñuca fiestacunami can:

3 Sujta* punllacunatami trabajai tucunguichij. Pero séptimo punllaca sábado punlla, samarina jatun punllami can. Diosta adorangapaj tandanacui punllami can. Chai punllaca ima trabajota mana ruranachu canguichij. Cancuna maipi causajpipish chai punllaca Jehová Diospajlla chꞌicanyachishca sábado punllami can.

4 Jehová Diospaj fiestacunaca caicunami can. Diosta adorangapaj tandanacuicunamanca agllashca punllacunapi rurangapajmi cayana canguichij. 5 Primer quillapaj 14 punllapica ña tutayaitami Jehová Diospaj Pascua fiestata rurana canguichij.

6 Chai quillapaj 15 punllapica Jehová Diospajmi Levadura illaj tandata micuna fiestata rurana canguichij. Cancunaca canchis punllacunatami levadura illaj tandata micuna canguichij. 7 Primer punllapica Diosta adorangapaj tandanacuitami rurana canguichij. Ima sinchi trabajotaca mana ruranachu canguichij. 8 Ashtahuanpish cancunaca canchis punllacunatami Jehová Diosman cushca ninahuan rupachishca ofrendata cuna canguichij. Séptimo punllapica Diosta adorangapaj shuj tandanacuimi tiyanga. Ima sinchi trabajotaca mana ruranachu canguichij’ ningui” nircami.

9 Jehová Diosca Moisestaca cashnapishmi nirca: 10 “Israelitacunahuan parlai. Paicunataca cashna ningui: ‘Ñuca cugrishca allpaman ña chayashpa, cancunapaj cosechata ña tandashpaca punta cosechamanta shuj gavillataca sacerdoteman cungapajmi apana canguichij. 11 Chaimi sacerdoteca Jehová Diospaj ñaupajpi cancuna alli ricurichun cancuna cushca gavillataca paipaj ñaupajpi caiman chaiman cuyuchinga. Sacerdoteca chai gavillataca sábado punlla cayandijmi caiman chaiman cuyuchina can. 12 Gavillata caiman chaiman cuyuchi punllami cancunaca shuj huatata charij, sano malta carnerota rupachishca ofrendata shina Jehová Diosman cuna canguichij. 13 Grano ofrendata shinaca aceitehuan chagrushca chuscu libra yalli* alli* harinatami cuna canguichij. Chaica Jehová Diosman cushca ninahuan rupachishca, mishquijllata ashnacuj ofrendami canga. Shinallataj shuj litro* vino ofrendatami cuna canguichij. 14 Cancunaca tandatapish, camchashca granotapish, mushuj granotapish chai punllacama mana micunachu canguichij. Cancunapaj Diosman ofrendata cungacama mana micunachu canguichij. Cai leytaca cancunapish, cancunapaj huahua huahuacunapishmi maipi causashpapish siempre pajtachina canguichij.

15 Cancunaca sábado punlla cayandijmantami canchis sabadocunata cuentana canguichij. Caiman chaiman cuyuchishpa cushca ofrendata shina cungapaj gavillata apai punllamantami chashna cuentana canguichij. Chai semanacunaca completomi cana can. 16 Cancunaca séptimo sábado punlla cayandijcamami 50 punllacunata cuentana canguichij. Chai huashaca mushuj grano ofrendatami Jehová Diosman cuna canguichij. 17 Cancuna maipi causashcamantaca ishqui tandatami caiman chaiman cuyuchishpa cushca ofrendata shina apana canguichij. Chai ishqui tandataca chuscu libra yalli alli harinahuan rurashpami levadurahuan cusana canguichij. Punta pꞌucushca granocunataca Jehová Diosmanmi cuna canguichij. 18 Tandacunahuanca shuj huatata charij sano canchis malta ovejacunatapishmi cuna canguichij. Shinallataj shuj malta torota, ishqui carnerocunatami cuna canguichij. Chaicunataca grano ofrendahuan, vino ofrendacunahuanmi rupachishca ofrendata shina Jehová Diosman cuna canguichij. Chaica Jehová Diosman cushca ninahuan rupachishca, mishquijllata ashnacuj ofrendami canga. 19 Juchamanta ofrendata shinaca shuj malta chivotami cuna canguichij. Dioshuan alli tucungapaj sacrificiota shinaca shuj huatata charij ishqui malta ovejacunatami cuna canguichij. 20 Sacerdoteca ishqui malta ovejacunataca punta pꞌucushca granocunahuan rurashca tandahuanmi caiman chaiman cuyuchishpa cushca ofrendata shina Jehová Diospaj ñaupajpi caiman chaiman cuyuchinga. Chaicunaca Jehová Diospajlla chꞌicanyachishcami canga, sacerdotepajpishmi canga. 21 Cai punllallatajmi Diosta adorangapaj tandanacuiman cayana canguichij. Ima sinchi trabajotaca mana ruranachu canguichij. Cai leytaca cancunapish, cancunapaj huahua huahuacunapishmi maipi causashpapish siempre pajtachina canguichij.

22 Cancunapaj allpapi cosechashpaca chagra uripi saquirishcacunataca ama tucui japichijchu. Cancunapaj cosechamanta saquirishcacunatapish ama tandaichijchu. Chaicunataca pobrecunapaj,* shujtaj llajtamanta shamushca runacunapajmi saquina canguichij. Ñucaca cancunapaj Jehová Diosmi cani’ ningui” nircami.

23 Jehová Diosca Moisestaca cashnapishmi nirca: 24 “Israelitacunataca cashna ningui: ‘Séptimo quillapaj punta punllapica ima trabajota ruranata saquishpami samarina canguichij. Chai punllaca yuyarina punllami canga. Trompetapi tocashcata uyashpami cancunaca Diosta adorangapaj shuj tandanacuita rurana canguichij. 25 Cancunaca ima sinchi trabajotaca mana ruranachu canguichij. Shinallataj Jehová Diosman cushca ninahuan rupachishca ofrendatami cuna canguichij’ ningui” nircami.

26 Jehová Diosca Moisestaca cashnapishmi nirca: 27 “Shinapish séptimo quillapaj chunga punllaca Juchacunata perdonana punllami* can. Chai punllaca Diosta adorangapajmi shuj tandanacuita rurana canguichij. Shinallataj humillarinami* canguichij. Cancunaca Jehová Diosmanmi ninahuan rupachishca ofrendata cuna canguichij. 28 Chai punllaca ima trabajota mana ruranachu canguichij. Chai punllaca Jehová Diospaj ñaupajpi cancunapaj juchata perdonana punllami can. 29 Chai punlla mana humillarijcunaca* israelitacunapuramantaca huañuchishcami canga. 30 Chai punlla ima trabajota rurajcunataca ñucami israelitacunapuramantaca huañuchisha. 31 Ima trabajota ama ruranguichijchu. Cai leytaca cancunapish, cancunapaj huahua huahuacunapishmi maipi causashpapish siempre pajtachina canguichij. 32 Chai sábado punllaca cancunapajca samarina jatun punllami can. Cancunaca chai quillapaj iscun* punllami chishi ladotaca humillarina canguichij. Chai samarina punllataca chishi ladomantaca cayandij chishi ladocamami pajtachina canguichij” nircami.

33 Jehová Diosca Moiseshuanmi parlashpa catirca. Paitaca cashnami nirca: 34 “Israelitacunataca cashna ningui: ‘Séptimo quillapaj 15 punllapica Jehová Diospajmi Chuglla huasicunata rurana fiesta* callaringa. Cai fiestaca canchis punllacunatami tiyanga. 35 Primer punllaca Diosta adorangapaj tandanacuitami rurana canguichij. Chai punllapica ima sinchi trabajotaca mana ruranachu canguichij. 36 Canchis punllacunatami Jehová Diosman cushca ninahuan rupachishca ofrendata cuna canguichij. Octavo punllapica Diosta adorangapaj tandanacuitami rurana canguichij. Shinallataj Jehová Diosman cushca ninahuan rupachishca ofrendatami cuna canguichij. Chai tandanacuica shuj jatun tandanacuimi canga. Chai punllaca ima sinchi trabajotaca mana ruranachu canguichij.

37 Cai fiestacunaca Jehová Diospaj fiestacunami can, Diosta adorangapaj tandanacuicunamanmi cayana canguichij. Cai fiestacunapica Jehová Diosman cushca ninahuan rupachishca ofrendacunatami cuna canguichij: rupachishca ofrendata, grano ofrendata, vino ofrendacunatami cada punllapaj minishtirishcata cuna canguichij. 38 Cai ofrendacunata cushpapish sábado punllacunapi Jehová Diosman cuna ofrendacunata, regalocunata, Diosman cusha nishca ofrendacunata,* shungumanta cushca ofrendacunatami Jehová Diosmanca cuna canguichij. 39 Shinapish séptimo quillapaj 15 punllapica cosechata tucui tandashca qꞌuipami cancunaca canchis punllacunata Jehová Diospaj shuj fiestata rurana canguichij. Primer punllaca samarina jatun punllami canga, octavo punllapish samarina jatun punllami canga. 40 Primer punllapica alli yuracunapi pꞌucushca granocunatami tandana canguichij. Shinallataj palmera hojacunata, pꞌangasapa yuracunapi tiyaj ramacunata, pugru pambapi tiyaj álamo yuracunapaj ramacunatami tandana canguichij. Cancunapaj Jehová Diospaj ñaupajpica canchis punllacunatami cushilla canguichij. 41 Cai fiestataca Jehová Diospajmi huatapica canchis punllacunata rurana canguichij. Cai fiestataca séptimo quillapimi rurana canguichij. Cai leytaca cancunapish, cancunapaj huahua huahuacunapishmi siempre pajtachina canguichij. 42 Cancunaca chuglla huasicunapimi canchis punllacunata causana canguichij. Tucui israelitacunami chuglla huasicunapi causana canguichij. 43 Chashnami qꞌuipa huiñaicunaca ñuca cancunata Egipto llajtamanta llujshichishpa chuglla huasicunapi causachun saquishcata yachangacuna. Ñucaca cancunapaj Jehová Diosmi cani’ ningui” nircami.

44 Chaimi Moisesca Jehová Diospaj fiestacunata ruranamanta israelitacunahuan parlarca.

24 Jehová Diosca Moiseshuan cutin parlashpaca cashnami nirca: 2 “Israelitacunataca lamparacuna siempre japichishca cachun, lamparacunapi ninata japichingapaj aceite de oliva purota cambajman apamuchun mandai. 3 Aaronca cada tutami lamparacunataca japichina can. Chaimantaca Jehová Diospaj ñaupajpi cayandij tutamantacama japichishca cachunmi ricuna can. Chai lamparacunaca tandanacuna carpa huasi ucupi, Leyta huaquichina arca cꞌuchullapi caj cortina caishuj ladopimi can. Cai leytaca paipish, paipaj huahua huahuacunapishmi siempre pajtachina can. 4 Paica Jehová Diospaj ñaupajpi lamparacuna japichishca cachunmi lamparacunataca oro candelero jahuapi siempre listo charina can.

5 Alli* harinata japishpami 12 roscas tandacunata cusana cangui. Cada tandatami chuscu libra yalli* harinahuan rurana cangui. 6 Chai roscas tandacunataca ishqui montonta rurashpami churana cangui. Cada montonpimi sujta tandata churana cangui. Chaicunataca Jehová Diospaj ñaupajpimi oro purohuan rurashca mesa jahuapi churana cangui. 7 Montonashca tandacuna jahuapica olíbano purotami churana cangui. Chaica tandacunapaj randi cushca ofrendami canga. Jehová Diosman cushca ninahuan rupachishca ofrendami canga. 8 Sacerdoteca tucui sábado punllacunami tandacunataca Jehová Diospaj ñaupajpi siempre churana can. Cai ari ninacushcatami israelitacunaca siempre pajtachina can. 9 Cai tandacunaca Aaronpajpish, paipaj churicunapajpishmi canga. Paicunami chaitaca Diospajlla chꞌicanyachishca lugarpi* micungacuna. Chai tandacunaca Jehová Diosman cushca ninahuan rupachishca ofrendacunamanta sacerdotepaj chꞌicanyachishcami can. Cai leytaca siempremi pajtachina can” nircami.

10 Israelitacunapurapica shuj israelita huarmipaj churimi tiyarca. Paipaj yayaca shuj egipciomi carca. Paica carpa huasicuna maipi cashcapimi shuj israelita runahuan macanacui callarirca. 11 Israelita huarmipaj churica Diospaj shutita cꞌamishpami maldici callarirca. Chaimi paitaca Moisespajman pusharcacuna. Paipaj mamaca Danpaj familiamanta caj Dibrí runapaj ushushi Selomit shutimi carca. 12 Chai runataca Jehová Dios paihuan imata ruranata ricuchingacamami huichcashpa churarcacuna.

13 Jehová Diosca Moisestaca cashnami nirca: 14 “Ñuca shutita maldicijtaca carpa huasicunamanta canllaman llujshichi. Pai ima nishcata uyajcunaca tucuicunami paipaj uma jahuapi maquicunata churana can. Chai qꞌuipami chai runataca tucui gentecuna rumicunahuan shitana can. 15 Israelitacunataca cashna ningui: ‘Maijan runapish Diosta maldicishpaca paipaj juchamantami castigashca canga. 16 Maijanpish Jehová Diospaj shutita cꞌamishpaca huañunatajmi can. Paitaca tucuicunami rumicunahuan shitana can. Shujtaj llajtamanta shamushca runa cashpapish o shuj israelita runa cashpapish Diospaj shutita cꞌamishcamantami huañuna can.

17 Maijanpish shuj runata huañuchishpaca paipish huañunatajmi can. 18 Maijanpish shujtaj runapaj animalta chugrichishpa huañuchijca paganami can. Causaitaca causaihuanmi* pagana can. 19 Maijanpish paipaj projimota chugrichijpica paitapish chashnallatajmi chugrichina can. 20 Tulluta pꞌaquijtaca paipaj tullutapish pꞌaquichun, ñahui lulunta chugrichijtaca paipaj ñahui luluntapish chugrichichun, quiruta pꞌaquijtaca paipaj quirutapish pꞌaquichun. Caishujta ima shinami llaquichirca chashnallatajmi paitapish llaquichina can. 21 Maijanpish shuj animalta chugrichishpa huañuchijca paganami can. Pero shuj runata chugrichishpa huañuchijca huañunami can.

22 Shujtaj llajtamanta shamushca runatapish, israelitacunapuramanta runatapish chashnallatajmi juzgana canguichij. Ñucaca cancunapaj Jehová Diosmi cani’ ningui” nircami.

23 Chai qꞌuipami Moisesca israelitacunahuan parlarca. Chaimi paicunaca Diospaj shutita maldicij runataca carpa huasicunamanta canllaman llujshichishpa rumicunahuan shitarcacuna. Chashnami israelitacunaca Jehová Dios Moisesman mandashca shinallataj rurarcacuna.

25 Jehová Diosca Sinaí urcupi Moiseshuan cutin parlashpaca cashnami nirca: 2 “Israelitacunataca cashna ningui: ‘Ñuca cugrishca allpaman ña chayashpaca sabadopaj Jehová Dios cushca leyta cazushpami allpataca samachina canguichij. 3 Cancunapaj allpapica sujta huatacunatami tarpuna canguichij. Uva chagracunamanta ramacunatapish pꞌitinami canguichij. Granocunatapish tandanami canguichij. 4 Pero séptimo huataca samarina* huatami cana can. Chai huataca allpaca huata jundatami samaringa. Jehová Diospajlla chꞌicanyachishca sabadomi can. Cancunapaj allpapica mana tarpunachu canguichij. Cancunapaj uva chagracunamanta ramacunatapish mana pꞌitinachu canguichij. 5 Cosechacujpi urmashca granocuna huiñashcataca mana cosechanachu canguichij, cancunapaj uva yuracunamantapish uvacunata mana tandanachu canguichij. Allpaca huata jundatami samarina can. 6 Shinapish chai huata allpapi huiñashca granocunataca micui tucunguichijmi. Cancunapish, cancunapaj esclavocunapish, esclavacunapish, cullqui jahua trabajaj runacunapish, cancunapurapi causaj caru llajtamanta shamushca runacunapish micui tucunguichijmi. 7 Cancunapaj allpapi tiyaj charina animalcunapish, sacha animalcunapish chaicunataca micui tucunmi. Allpapi pꞌucushca tucui granocunaca micungapajmi canga.

8 Samarina canchis huatacunataca canchis cutin cuentaichij. Chai tucui huatacunata cuentajpica 49 huatacunami canga. 9 Chai qꞌuipaca* séptimo quillapaj chunga punllapimi gachupi sinchita tocana canguichij. Juchacunata perdonana punllami cancunapaj tucui llajtapica gachupi tocashcata uyachina canguichij. 10 Ña 50 huata tucujpica chai huatataca Diospajllami chꞌicanyachina canguichij. Chai huatapica tucui gentecunata cacharichishcatami huillana canguichij. Cancunapajca Cushicuna huatami* canga. Maijanpish paipaj herencia allpata cꞌatushca cashpaca cutinmi tigra japinga. Maijanpish esclavo shina cꞌatushca cashca cashpaca paipaj familiapajmanmi tigranga. 11 Ña 50 huata tucujpica cancunapajca Cushicuna huatami canga. Chai huatapica mana tarpunachu canguichij. Pambapi urmashpa huiñashca granocunatapish mana cosechanachu canguichij. Uva yuracunapi mana pꞌitishca ramacunapi huiñashca uvacunatapish mana tandanachu canguichij. 12 Chai huataca Cushicuna huatami can. Diospajlla chꞌicanyachishcami can. Chai huatapica allpapi paillamantataj pꞌucushca granocunallatami micui tucunguichij.

13 Cushicuna huatapica cancunaca cada unomi herencia allpataca tigra japina canguichij. 14 Cancunapaj projimoman imata cꞌatushpapish o imata randishpapish paitaca ama umanguichijchu. 15 Paipaj projimoman imata randijca Cushicuna huatamanta mashna huatacuna pasashcatami ricuna can. Imata cꞌatujpish mashna cosecha huatacuna saquirishcatami ricuna can. 16 Achca huatacuna illajpica preciotaca mirachi tucunmi. Pero ashalla huatacuna saquirijpica preciotaca menorai tucunmi. Paica mashna cosechacuna saquirishcata ricushpami chaita rurana can. 17 Cancunapaj projimotaca ni maijan mana umanachu canguichij. Ashtahuanpish cancunapaj Diostami manchana canguichij. Ñucaca cancunapaj Jehová Diosmi cani. 18 Ñuca leycunata pajtachishpa, ñuca imallata rurachun nishcacunata cazushpaca cancunapaj allpapica imata mana manchashpami causanguichij. 19 Chai allpapica alli granocunami pꞌucunga. Chaimi cancunaca huijsa pajtata micunguichij. Chaipica imata mana manchashpami causanguichij.

20 Pero cancunaca “Mana tarpui tucunchijca, ñucanchij granocunatapish mana tandai tucunchijca, ¿séptimo huatapica imatashi micushun?” nishpachari tapuringuichij. 21 Shinapish ama sustarichijchu. Ñucami sexto huatapica bendiciasha. Chaimi allpapica quimsa huatacunapaj suficiente pꞌucunga. 22 Octavo huatapimi tarpunguichij. Shinapish sexto huatapi cosechashcataca noveno huatacamami micunguichij. Cosechana punllacuna chayangacamami sexto huatapi cosechashcata micunguichij.

23 Allpahuan siempre saquirichunca mana cꞌatunachu canguichij. Allpaca ñucapajmi can. Cancunaca ñucapajca shujtaj llajtamanta shamushca runacuna shina, caru llajtamanta shamushca runacuna shinallami canguichij. 24 Cancuna japigrishca allpapica cꞌatuj runaca tigra randina derechotami charinga.

25 Cambaj huauqui israelita pobre saquirishpa paipaj herencia allpamanta shuj parteta cꞌatujpica tigra randij* cꞌuchulla familia shamushpami paipaj huauqui cꞌatushcataca tigra randina can. 26 Maijanpish tigra randijta mana charishpa, pero paillataj charijyashpa paipaj herencia allpata tigra randingapaj cullquita charishpaca 27 cꞌatushca punllamanta mashna huatacuna pasashcata ricushpami preciota churana can. Sobra cullquitaca paipaj allpata randij runamanmi tigrachina can. Chashnami paica paipaj herencia allpataca cutin japinga.

28 Pero cutin randingapaj cullquita mana charijpica randij runami paiman cꞌatushca allpahuanca Cushicuna huatacama saquiringa. Cushicuna huatapimi allpaca cutin cꞌatuj runapaj tucunga. Paica paipaj herencia allpatami cutin japinga.

29 Maijan runapish muyundij pircacunayuj llajtapi shuj huasita cꞌatushpaca contratota rurashca punllamantaca shuj huata tucungacamami tigra randina derechota charinga. Tigra randina derechoca shuj huatacamallami canga. 30 Pero muyundij pircacunayuj llajtapi caj huasita shuj huatacama mana tigra randijpica chai huasica randij runapajmi siempre canga. Chai huasitaca Cushicuna huatapipish mana tigrachinachu can. 31 Shinapish muyundij pircacunayuj mana caj uchilla pueblocunapi saquirij huasicunaca campopi allpata tigra randij shinami ima horapish tigra randinalla canga. Cꞌatujca tigra randina derechotami charinga. Randijpish Cushicuna huatapimi tigrachina can.

32 Levitacunapaj llajtacunapi saquirij huasicunataca levitacunaca siempremi tigra randina derechota charingacuna. 33 Levitacunapaj llajtacunapi levitacuna paicunapaj huasita mana tigra randijpica cꞌatushca huasica Cushicuna huatapimi tigrachishca canga. Levitacunapaj llajtacunapi saquirij huasicunaca israelitacunapurapica levitacunapaj herenciami can. 34 Shinallataj paicunapaj llajta muyundijpi tiyaj michina allpacunataca mana cꞌatunachu can. Chai allpacunaca siempremi paicunapaj herencia canga.

35 Cambaj cꞌuchullapi causaj shuj huauqui israelita pobre saquirishpa ima minishtishcata mana charijpica canmi shujtaj llajtamanta shamushca runata shinallataj o caru llajtamanta shamushca runata shinallataj ayudana cangui. Chashnami paica canhuan causashpa catinga. 36 Paitaca interesta ama cobranguichu, paimanta imata japinaraicullaca ama imata mañachinguichu. Cambaj Diostami manchana cangui. Chashnami cambaj huauqui israelitaca canhuan causashpa catinga. 37 Interesta cobrangapajllaca cullquita ama mañachinguichu. Paimanta imata japinaraicullaca micunatapish ama cunguichu. 38 Ñucaca cancunapaj Jehová Diosmi cani. Ñucami cancunataca Canaán allpata cungapaj, cancunapaj Dios cangapaj Egipto llajtamanta llujshichircani.

39 Cambaj cꞌuchullapi causaj shuj huauqui israelita pobre saquirishpa canman cꞌaturijpica paitaca esclavo shina trabajachunca mana obliganachu cangui. 40 Paitaca cullqui jahua trabajaj runata shina, caru llajtamanta shamushca runata shinami tratana cangui. Paica Cushicuna huatacamami canta sirvinga. 41 Chai qꞌuipami canta saquishpa ringa. Paipish, paipaj huahuacunapishmi familiapajman tigranga. Shinallataj paipaj ñaupa yayacunapaj herenciatami tigra japinga. 42 Israelitacunaca ñuca esclavocunami can. Paicunataca Egipto llajtamantami llujshichircani. Paicunaca shuj esclavota cꞌatushca shinaca mana cꞌatushcachu canga. 43 Paicunataca ama maltratanguichu. Ashtahuanpish cambaj Diostami manchana cangui. 44 Cambaj esclavocunapish, cambaj esclavacunapish cꞌuchulla llajtacunamantami canga. Chai llajtacunamantami shuj esclavota o shuj esclavataca randi tucunguichij. 45 Shinallataj cancunapurapi causaj caru llajtamanta shamushca runacunapaj huahuacunatami esclavocunata shina randi tucunguichij. Paicunapaj familiacunapuramantami cancunapaj llajtapi huacharijcunatapish randi tucunguichij. Paicunatami cancunapaj esclavocuna cachun randi tucunguichij. 46 Chai esclavocunataca cancunapaj qꞌuipa shamuj huahuacunamanmi herenciata shina saqui tucunguichij. Paicunami chai esclavocunapaj dueño cangacuna. Chai esclavocunaca cancunapaj huahuacunatami sirvishpa catingacuna. Shinapish cancunapaj huauqui israelitacunataca mana maipishcachun maltratanachu canguichij.

47 Pero shujtaj llajtamanta shamushca runa o cancunapurapi causaj caru llajtamanta shamushca runachari charijyanga. Cutin cambaj huauqui israelitaca pobrechari saquiringa. Chaimanta shujtaj llajtamanta shamushca runaman, paipaj maijan familiaman o cancunapurapi causaj caru llajtamanta shamushca runaman cꞌaturishpaca 48 qꞌuipaca paita tigra randichunmi derechota charishpa catinga. Paitaca maijan huauquipish tigra randi tucungami. 49 Shinallataj paipaj tío, paipaj tiopaj churi o paipaj cꞌuchulla familiapuramanta familiami tigra randi tucunga.

Cutin charijyashpaca paillatajmi tigra randiri tucunga. 50 Paita randij runahuanmi paillataj cꞌaturishca huatamantaca Cushicuna huatacama mashna tiempo pasashcata ricunga. Mashna huatacuna illashcata ricushpami paica paganga. Chai tiempopi mashna punllacunata trabajashcamanta pagoca cullqui jahua trabajaj runaman pagashca shinallatajmi canga. 51 Achca huatacuna illajpirajca mashna huatacuna illashcata ricushpami pai mashna valishcata pagana can. 52 Pero Cushicuna huatapaj ashalla huatacuna illajpica mashna huatacuna saquirishcata ricushpami pai mashna valishcata pagana can. 53 Paica paita randij runataca cullqui jahua trabajaj runa shinami huatanta sirvinga. Canca paipaj amo paita ama maipishcachun maltratachunmi ricuna cangui. 54 Shinapish leypi nishca shina paillataj mana tigra randiri tucushpaca paipish, paipaj huahuacunapish Cushicuna huatapimi libre saquiringacuna.

55 Israelitacunaca ñuca esclavocunami can. Paicunaca ñuca esclavocunami can. Paicunataca Egipto llajtamantami llujshichircani. Ñucaca cancunapaj Jehová Diosmi cani.

26 Imapaj mana vali dioscunata, santocunataca ama ruranguichijchu. Adorana pilarcunatapish ama shayachinguichijchu. Cancunapaj llajtapica rumihuan rurashcalla diostaca paipaj ñaupajpi cunguringapajca ama churanguichijchu. Ñucaca cancunapaj Jehová Diosmi cani. 2 Ñuca sábado punllacunatami respetana canguichij. Ñuca carpa huasitapish tucui shunguhuanmi respetana canguichij. Ñucaca Jehová Diosmi cani.

3 Ñuca leycunapi nishca shina purijpi, ñuca mandamientocunata cazujpi, chaipi nishcata pajtachijpica 4 tamyana tiempollapitajmi achcata tamyachisha. Chaimi allpapica granocuna pꞌucunga, yuracunapipish frutacunami pꞌucunga. 5 Trillana* punllacunaca uvata pallana punllacunacamami canga. Cutin uvata pallana punllacunaca tarpuna punllacunacamami canga. Micunataca* huijsa pajtatami micunguichij. Cancunapaj allpapica imata mana manchashpami causanguichij. 6 Cancunapaj llajtapica tranquilo causai tiyachunmi saquisha. Cancunaca imata mana manchashpami dorminguichij. Pipish cancunataca mana manchachingachu. Chai llajtamantaca tucui sacha animalcunatami chingachisha. Maijanpish espadahuan macanacungapajca cancunapajman mana shamungachu. 7 Cancunapaj contracunataca catishpami ringuichij. Paicunataca espadahuanmi huañuchinguichij. 8 Cancunamanta pichca runacunaca paicunapuramanta 100 runacunatami catinguichij. Cutin cancunamanta 100 runacunaca paicunapuramanta 10.000 runacunatami catinguichij. Cancunapaj contracunataca espadahuanmi huañuchinguichij.

9 Ñucami cancunataca bendiciasha. Achca huahuacunata charichun, mirarichunmi saquisha. Cancunahuan ari ninacushcatami pajtachisha. 10 Ñaupa huataman cosechashca granota micucushparajmi mushuj cosechashcata huaquichingapaj ñaupa huataman cosechashcataca llujshichina canguichij. 11 Ñuca carpa huasitaca cancunapaj chaupipimi churasha. Cancunataca mana shitashachu. 12 Ñucaca cancunapurapimi casha, cancunapaj Diosmi casha. Cancunaca ñuca pueblomi canguichij. 13 Ñucaca cancunapaj Jehová Diosmi cani. Cancunataca Egipto llajtapi esclavocuna ña ama cachunmi chai llajtamanta llujshichircani. Cancunapaj yugota* pꞌaquishpami umata alzashpa purichun saquircani.

14 Shinapish tucui cai mandamientocunata cancuna mana uyajpi, mana cazujpi, 15 ñuca leycunata cazunata saquijpi, ñuca imallata rurachun nishcacunata pꞌiñashpa, tucui mandamientocunata mana cazujpi, ñucahuan ari ninacushcata mana pajtachijpica 16 ñucaca caitami rurasha: llaquicunata cachashpami cancunataca castigasha. Tuberculosis ungüihuan, achca fiebrehuanmi llaquichisha. Chaimantami cancunapaj ñahuicunapish mana alli ricunga. Cancunapaj causaipish asha ashami tucuringa. Tarpushpapish yangallami tarpunguichij. Cancunapaj contracunami cosechashca granotaca micungacuna. 17 Ñucaca cancunapaj contrami jatarisha. Cancunataca cancunapaj contracunami mishanga. Pꞌiñajcunaca cancunataca sarungacunami. Pi mana caticujpipish miticushpami ringuichij.

18 Chai jahuapish ñucata mana uyajpica cancunapaj juchacunamantaca canchis cutinhuanmi castigasha. 19 Cancunapaj jatun tucushca shungutaca humillachishami. Cielotapish fierro shina cachunmi rurasha, allpatapish cobre shina cachunmi rurasha. 20 Allpaca imata mana pꞌucungachu, cancunaca yangamantami tucui fuerzahuan trabajanguichij. Chagrapi tiyaj yuracunapish ima granota mana pꞌucungachu.

21 Chai jahuapish cancuna ñucapaj contra tucushpa catijpi, ñucata mana uyasha nijpica cancunapaj juchacunamantaca canchis cutinhuanmi castigasha. 22 Cancunapajmanca sacha animalcunatami cachasha. Chai animalcunami cancunapaj huahuacunataca huañuchinga, cancunapaj charina animalcunatapish tucuchinga. Cancunaca ashacunallami saquiringuichij, cancunapaj ñancunapish shitashcami saquiringa.

23 Tucui chai jahuapish ñuca cunashcata mana uyajpi, ñucapaj contra tucushpa catijpica 24 ñucapish cancunapaj contra jatarishpami cancunapaj juchacunamantaca ñucallataj canchis cutin castigasha. 25 Ñucahuan ari ninacushcata mana pajtachishcamantami cancunata castigangapajca espadahuan huañuchichun contracunata cachasha. Cancunapaj llajtacunapi miticujpipish shuj ungüitami cachasha. Cancunapaj contracunapaj maquipimi entregashca canguichij. 26 Cancunapaj tandata huaquichinacunataca* tucuchishami. Chunga huarmicunami shuj solo hornopi cancunapaj tandata cusangacuna. Chai tandataca pesashpami asha asha cungacuna. Chaita micushpapish yaricaihuanmi saquiringuichij.

27 Chai jahuapish ñucata mana uyajpi, ñucapaj contra tucushpa catijpica 28 ñucaca ashtahuanmi cancunapaj contra jatarisha. Cancunapaj juchacunamantaca ñucallatajmi canchis cutin castigasha. 29 Cancunapaj churicunapaj, cancunapaj ushushicunapaj aichatami micunguichij. 30 Cancunapaj adorana lugarcunatami* chingachisha. Inciensota rupachina cancunapaj altarcunatapishmi urmachisha. Cancunapaj millanana* rurashcalla dioscunata urmachishca jahuapimi cancunapaj huañushca cuerpocunatapish montonasha. Millanayachishpami cancunamantaca caruyasha. 31 Cancunapaj llajtacunapi causajcunataca espadahuan huañuchichunmi contracunapaj maquipi churasha. Cancunapaj adorana lugarcunapish shitashcami saquiringa. Cancunapaj rupachishca sacrificiocunamanta mishquijllata ashnacujtapish mana chasquishachu. 32 Cancunapaj llajtaca shitashcami saquiringa. Chaipi causanaman shamuj contracunaca mancharishcami saquiringacuna. 33 Cancunataca shujtaj llajtacunamanmi caita chaita cachasha. Contracuna paicunapaj espadata llujshichishpa cancunahuan macanacuchunmi saquisha. Cancunapaj allpaca shitashcami saquiringa. Cancunapaj llajtacunapish tucuchishcami canga.

34 Cancuna contracunapaj allpapi causacujpica cancunapaj allpaca tucui chai tiempotami shitashca saquiringa. Tucui chai punllacunami allpaca samaringa. Mana samachishcamantami samaringa. 35 Allpaca cancuna chaipi causacushpa mana samachishcamantami shitashca saquirishca punllacunata samaringa.

36 Quishpirishcacuna contracunapaj llajtapi cajpica manchaita charichunmi saquisha. Chaimantami yura pꞌangata huaira cuyuchijllapipish miticushpa ringacuna. Pi mana caticujpipish espadahuan llaquichingapaj caticushcata yuyashpami miticushpa ringacuna. Pi mana caticujpipish urmangacunami. 37 Pi mana caticujpipish espadahuan huañuchingapaj caticujpi miticushpa ricuj shinami caishuj chaishuj tsagnarinacushpa urmangacuna. Paicunapaj contracunahuanca mana chꞌimbapurai tucungacunachu. 38 Paicunaca shujtaj llajtacunapimi huañungacuna. Contracunapaj allpami paicunataca millpunga. 39 Cancunapuramanta saquirijcunaca contracunapaj allpacunapimi ismungacuna. Ari, paicunapaj yayacunapaj pandarishcacunamantami paicunaca ismungacuna. 40 Chai qꞌuipami paicunaca paicunapaj pandarishcacunatapish, paicunapaj yayacunapaj pandarishcacunatapish, mana cazushcatapish huillangacuna. Paicunaca ñucapaj contra tucushpa ñucata mana cazushcatami cuentata cungacuna. 41 Chai tiempopica ñucapishmi paicunapaj contra jatarishpa paicunataca contracunapaj allpaman pushasha.

Chaipica paicunapaj rumi shunguca humillaringapishchari. Chashnami paicunapaj pandarishcacunamantaca pagangacuna. 42 Ñucaca Jacobhuan ari ninacushcata, Isaachuan ari ninacushcata, Abrahanhuan ari ninacushcatami yuyarisha. Allpatapish yuyarishami. 43 Paicuna chaipi ña mana cajpica allpaca shitashcami canga. Mana samachishcamantami allpaca samacungalla. Ñuca imallata rurachun nishcacunata mana cazushcamanta, ñuca leycunatapish pꞌiñashcamantami paicunapaj pandarishcacunamantaca pagangacuna. 44 Tucui chai jahuapish paicunapaj contracunapaj allpapi cajpica ñucaca paicunataca mana libri shitashpa saquishachu. Paicunata tucuchingacamaca mana pꞌiñashachu. Chaita rurashpaca paicunahuan ari ninacushcatami mana pajtachiman. Ñucaca paicunapaj Jehová Diosmi cani. 45 Paicunapaj allipajmi paicunapaj ñaupa yayacunahuan ari ninacushcata yuyarisha. Paicunapaj Dios cangapajmi paicunataca shujtaj llajtamanta gentecuna ricucujpi Egipto llajtamanta llujshichircani. Ñucaca Jehová Diosmi cani’ ningui” nircami.

46 Cai mandashcacunata, imallata rurachun nishcacunata, leycunatami Jehová Diosca israelitacunaman cuchun Sinaí urcupi Moisesman curca.

27 Jehová Diosca Moiseshuan cutin parlashpaca cashnami nirca: 2 “Israelitacunahuan parlai. Paicunataca cashna ningui: ‘Maijanpish shuj runa mashna valishcata Jehová Diosman cungapaj ari nishca cashpaca caitami cuna can. 3 Shuj cꞌari 20 huatacunamanta 60 huatacunacama charijpica 50 siclo* cullquitami pagana can. Chai siclo cullquica Diospaj huasipi pesaj siclo shinallatajmi pesana can. 4 Pero shuj huarmi cajpica 30 siclo cullquitami pagana can. 5 Cutin 5 huatacunamanta 20 huatacunacama charijpica shuj cꞌarimantaca 20 siclo cullquitami pagana can. Huarmimantaca 10 siclo cullquitami pagana can. 6 Cutin shuj quillamanta pichca huatacunacama charijpica cꞌari huahuamantaca pichca siclo cullquitami pagana can. Huarmi huahuamantaca quimsa siclo cullquitami pagana can.

7 Cutin 60 huatacunata o ashtahuan huatacunata charijpica cꞌarimantaca 15 siclo cullquitami pagana can. Huarmimantaca 10 siclo cullquitami pagana can. 8 Pero Diosman cungapaj ari nij runa yallitaj pobre cashcamanta churashca preciota mana pagai tucushpaca sacerdotepajmanmi rina can. Sacerdotemi chai runa mashnata pagai tucushcata ricunga.

9 Maijanpish chuya animalta Jehová Diosman cusha nijpica chai animalca Jehová Diospajlla chꞌicanyachishcami canga. 10 Chai animalpaj randica shujtajtaca mana apamui tucunchu. Achcata valij animaltaca ashallata valij animalhuanca* mana cambiai tucunchu. Ashallata valij animaltapish achcata valij animalhuanca mana cambiai tucunchu. Pero shuj animalta shujtaj animalhuan cambiajpica punta cushca animalpish, cambiashca animalpish ishquindijmi Diospajlla chꞌicanyachishca canga. 11 Shuj mapa animalta Jehová Diosman shuj ofrendata shina mana cuipaj cajpica chai animaltaca sacerdotepaj ñaupajmanmi apana can. 12 Sacerdotemi chai animalta ricushpa achcata valishcata o ashallata valishcata ninga. Chai animalca sacerdote nishca preciomi valinga. 13 Pero Diosman cungapaj ari nij runa chai animalta ima horapish tigra randisha nishpaca pichcapi chaupishca shuj partehuanmi pagana can.

14 Maijanpish paipaj huasita Diospajlla chꞌicanyachishpa shuj regalota shina Jehová Diosman cusha nijpica sacerdotemi chai huasi alli cashcata o mana alli cashcata ricushpa preciota churanga. Chai huasica sacerdote nishca preciomi valinga. 15 Pero paipaj huasita Diospajlla chꞌicanyachij runa tigra randisha nishpaca pichcapi chaupishca shuj partehuanmi pagana can. Chashnami huasica cutin paipaj canga.

16 Maijanpish paipaj allpamanta ashata Jehová Diospajlla chꞌicanyachishpa cujpica chai allpa mashna valishcataca tarpuna muyu mashna yaicushcata ricushpami preciota churanga. Cada homer* cebada muyuta tarpuna allpaca 50 siclo cullquimi valinga. 17 Cushicuna huatapi allpata Diospajlla chꞌicanyachijpica mashna valishca precioca mana cambiangachu. 18 Cushicuna huata qꞌuipa allpata Diospajlla chꞌicanyachijpica sacerdotemi catij Cushicuna huatacama mashna huatacuna illashcata ricushpa preciota churanga. Allpaca menosmi valinga. 19 Pero paipaj allpata Diospajlla chꞌicanyachij runa ima horapish chai allpata tigra randisha nishpaca pichcapi chaupishca shuj partehuanmi pagana can. Chashnami allpaca cutin paipaj canga. 20 Pero chai allpata paillataj mana tigra randijpi, ashtahuanpish shujtaj runaman cꞌatujpica ña mana tigra randi tucungachu. 21 Cushicuna huatapica chai allpaca Jehová Diospajlla chꞌicanyachishcami canga. Chai allpaca sacerdotecunapajmi canga.

22 Maijanpish randishca allpata Jehová Diospajlla chꞌicanyachijpi, pero chai allpa paipaj herenciamanta mana cajpica 23 sacerdotemi Cushicuna huatapaj mashna huatacuna faltashcata ricushpa chai allpa mashna valishcata ninga. Chai runaca chai punllallatajmi allpa mashna valishcataca sacerdoteman paganga. Pagashca cullquica Jehová Diospajlla chꞌicanyachishcami can. 24 Pero Cushicuna huatapica paiman cꞌatuj dueñomanmi chai allpataca tigrachinga. Chai allpaca chai runapajmi can.

25 Chai tucui preciocunataca Diospaj huasipi siclo mashna valishcata ricushpami churana can. Shuj sicloca 20 guerás* cullquimi valina can.

26 Punta huacharishca animalcunataca mana Diospajlla chꞌicanyachinachu can. Punta huacharishca cashcamantami chai animalcunaca ña Jehová Diospaj can. Toro cashpapish, oveja cashpapish ñami Jehová Diospaj can. 27 Mapa animalcunamanta punta huacharishca animalta tigra randisha nishpaca mashna valishca preciotami pagana can. Shinallataj pichcapi chaupishca shuj partehuanmi cuna can. Pero mana tigra randijpica chai animalca sacerdote nishca preciopimi cꞌatushca canga.

28 Maijanpish paipaj ima cashcata Jehová Diospajlla siempre cachun chꞌicanyachishpaca gente cajpipish, animal cajpipish, allpa cajpipish mana cꞌatui tucunchu, ni mana tigra randi tucunchu. Chaicunaca Diospajlla ashtahuan chꞌicanyachishcami can. Jehová Diospajmi can. 29 Maijanpish huañuna cashpaca mana quishpichishca cai tucunchu. Paica huañunatajmi can.

30 Allpapi pꞌucushca tucui granocunaca cada chungamanta shujmi Jehová Diospaj can. Chagrapi pꞌucushcacunapish o yuracunapi pꞌucushcacunapish paipajmi can. Chaicunaca Jehová Diospajlla chꞌicanyachishcami can. 31 Maijanpish cada chungamanta shujta cushcata ima horapish tigra randisha nishpaca pichcapi chaupishca shuj partehuanmi cuna can. 32 Huagracunamanta, ovejacunamanta, chivocunamantaca cada chungamanta shujtami Jehová Diosman cuna canguichij. Michijpaj yupana vara ucuta pasajcunaca cada chungamanta shujmi Diospajlla canga. 33 Achcata valij o ashallata valij animal cashcataca mana ricunachu can. Shinallataj mana cambianachu can. Pero ima hora cambiasha nijpica punta cushca animalpish, cambiashca animalpish ishquindijmi Diospajlla chꞌicanyachishca canga. Chai animalcunataca mana tigra randinachu can’ ningui” nircami.

34 Cai mandamientocunatami Jehová Diosca israelitacunaman cuchun Sinaí urcupi Moisesman curca.