NÚMEROS

1 Israelitacuna Egipto llajtamanta llujshishca ishqui huatapi, segundo quillapaj primer punllapimi Jehová Diosca Sinaí chaquishca pambapi, tandanacuna carpa huasipi Moiseshuan parlarca. Paitaca cashnami nirca: 2 “Canpish, Aaronpish tucui israelitacunata* censota rurashpa shuj shujta yupaichij. Tucui cꞌaricunapaj shuticunataca según paicunapaj familiacunata, según paicunapaj yayacunapaj familiacunata shuj listapi anotaichij. 3 Canpish, Aaronpish 20 huatacunata o ashtahuan huatacunata charij, Israel llajta soldadocunahuan macanacuiman rinata pudij cꞌaricunataca tucuicunatami grupo grupopi registrana canguichij.

4 Cancunahuanca cada familiamantami shuj runata pushana canguichij. Paicunaca paicunapaj yayapaj familiata pushajcunami cana can. 5 Cancunata ayudagrij runacunapaj shuticunaca caicunami can: Rubenpaj familiamantaca Sedeurpaj churi Elizur, 6 Simeonpaj familiamantaca Zurisadaipaj churi Selumiel, 7 Judapaj familiamantaca Aminadabpaj churi Nahsón, 8 Isacarpaj familiamantaca Zuarpaj churi Netanel, 9 Zabulonpaj familiamantaca Helonpaj churi Eliab, 10 Efrainpaj familiamantaca Amihudpaj churi Elisamá, Manasespaj familiamantaca Pedahzurpaj churi Gamaliel (Efrainpish, Manasespish Josepaj churicunami can), 11 Benjaminpaj familiamantaca Guideonipaj churi Abidán, 12 Danpaj familiamantaca Amisadaipaj churi Ahiézer, 13 Aserpaj familiamantaca Ocranpaj churi Paguiel, 14 Gadpaj familiamantaca Deuelpaj churi Eliasaf, 15 Neftalipaj familiamantaca Enanpaj churi Ahirami can. 16 Paicunaca israelitacunapuramanta agllashcacunami can. Paicunapaj yayacunapaj familiacunata pushajcunami can. Paicunaca Israel llajtapi 1.000 gentecunata pushajcunami can” nircami.

17 Chai qꞌuipami Moisespish, Aaronpish Dios agllashca runacunata cacharcacuna. 18 Segundo quillapaj primer punllapica 20 huatacunata charij o ashtahuan huatacunata charij cꞌaricunata registrangapajmi tucuicunata tandachircacuna. Según paicunapaj familiacunata, según paicunapaj yayacunapaj familiacunatami shuj shujta shutipi tandachircacuna. 19 Jehová Dios Moisesman mandashca shinami tandachircacuna. Chashnami Moisesca Sinaí chaquishca pambapi paicunata registrarca.

20 Israelpaj punta churi Rubenpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 21 Rubenpaj familiamanta registrashcacunaca 46.500 cꞌaricunami carca.

22 Simeonpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 23 Simeonpaj familiamanta registrashcacunaca 59.300 cꞌaricunami carca.

24 Gadpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 25 Gadpaj familiamanta registrashcacunaca 45.650 cꞌaricunami carca.

26 Judapaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 27 Judapaj familiamanta registrashcacunaca 74.600 cꞌaricunami carca.

28 Isacarpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 29 Isacarpaj familiamanta registrashcacunaca 54.400 cꞌaricunami carca.

30 Zabulonpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 31 Zabulonpaj familiamanta registrashcacunaca 57.400 cꞌaricunami carca.

32 Josepaj churi Efrainmanta shamuj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 33 Efrainpaj familiamanta registrashcacunaca 40.500 cꞌaricunami carca.

34 Manasespaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 35 Manasespaj familiamanta registrashcacunaca 32.200 cꞌaricunami carca.

36 Benjaminpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 37 Benjaminpaj familiamanta registrashcacunaca 35.400 cꞌaricunami carca.

38 Danpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 39 Danpaj familiamanta registrashcacunaca 62.700 cꞌaricunami carca.

40 Aserpaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 41 Aserpaj familiamanta registrashcacunaca 41.500 cꞌaricunami carca.

42 Neftalipaj huahua huahuacunaca según paicunapaj familiacuna, según paicunapaj yayacunapaj familiacunami shutipi registrashca carcacuna. 20 huatacunata charij o ashtahuan huatacunata charij tucui cꞌaricunatami macanacuiman rinata pudijcunataca shuj shujta cuentarcacuna. 43 Neftalipaj familiamanta registrashcacunaca 53.400 cꞌaricunami carca.

44 Moisespish, Aaronpish, israelitacunata 12 pushajcunapish tucui chai cꞌaricunatami registrarcacuna. Chai 12 runacunaca cada unomi paicunapaj yayapaj familiata pushajcuna carca. 45 Israelitacunamanta 20 huatacunata charij o ashtahuan huatacunata charij, Israel llajta soldadocunahuan macanacuiman rinata pudijcunaca según paicunapaj yayapaj familiami tucuicuna registrashca carcacuna. 46 Tucui registrashcacunaca 603.550 cꞌaricunami carca.

47 Pero levitacunaca caishuj familiacunahuanca mana registrashcacunachu carca. 48 Jehová Diosca Moisestaca cashnami nirca: 49 “Levipaj familiallatami mana registrana cangui. Caishuj israelitacunandijca mana cuentanachu cangui. 50 Levitacunataca Leyta huaquichina arcata churashca Diospaj carpa huasita, chaipi tiyaj shujtaj cosascunata cuidachunmi churana cangui. Paicunami Diospaj carpa huasitapish, chaipi imalla tiyaj tucui cosascunatapish apangacuna. Diospaj carpa huasipimi sirvingacuna. Chai muyundijpimi carpa huasicunapi saquiringacuna. 51 Diospaj carpa huasita apana cajpica levitacunami pascana can. Cutin Diospaj carpa huasita shayachina cajpica levitacunami shayachina can. Pero maijanpish mana levita cashpa Diospaj carpa huasiman cꞌuchuyashpaca huañunami can.

52 Cada israelitami paiman cushca puestopi paipaj carpa huasita shayachina can. Quimsa familiacuna cashcapi, paipaj grupopimi cada runa paipaj carpa huasita shayachina can. 53 Levitacunaca Leyta huaquichina arcata churashca Diospaj carpa huasi muyundijpimi carpa huasicunapi saquirina can. Chashnami ñucaca israelitacunahuan mana pꞌiñarisha. Levitacunaca Leyta huaquichina arcata churashca Diospaj carpa huasitami cuidangacuna”* nircami.

54 Israelitacunaca Jehová Dios Moisesman mandashcatami tucuita rurarcacuna. Pai nishca shinami rurarcacuna.

2 Chai qꞌuipami Jehová Diosca Moiseshuan, Aaronhuan parlarca. Paicunataca cashnami nirca: 2 “Israelitacunaca cada quimsa familiaman cushca puestopimi paicunapaj carpa huasicunata shayachina can. Cada runami paipaj yayapaj familiapaj señalashca cꞌuchullapi cana can. Paicunapaj carpa huasicunataca tandanacuna carpa huasi muyundijpimi shayachina can.

3 Inti llujshin ladomanca Judapaj carpa huasicunami grupo grupopi saquiringa. Chaipica quimsa familiacunami canga. Judapaj huahua huahuacunata pushajca Aminadabpaj churi Nahsonmi can. 4 Judapaj familiamanta registrashca soldadocunaca 74.600 cꞌaricunami can. 5 Judapaj familiapaj ladopica Isacarpaj familiami carpa huasicunata shayachinga. Isacarpaj huahua huahuacunata pushajca Zuarpaj churi Netanelmi can. 6 Isacarpaj familiamanta registrashca soldadocunaca 54.400 cꞌaricunami can. 7 Judapaj familiapaj caishuj ladopica Zabulonpaj familiami can. Zabulonpaj huahua huahuacunata pushajca Helonpaj churi Eliabmi can. 8 Zabulonpaj familiamanta registrashca soldadocunaca 57.400 cꞌaricunami can.

9 Judapaj carpa huasicunamanta tucui registrashca soldadocunaca 186.400 cꞌaricunami can. Paicunami puntapica carpa huasicunata pascana can.

10 Ura ladomanca quimsa familiacunami canga. Rubenpaj familiami ishqui familiacunapaj chaupipi canga. Chaipimi paicunaca grupo grupopi saquiringacuna. Rubenpaj huahua huahuacunata pushajca Sedeurpaj churi Elizurmi can. 11 Rubenpaj familiamanta registrashca soldadocunaca 46.500 cꞌaricunami can. 12 Rubenpaj familiapaj ladopica Simeonpaj familiami carpa huasicunata shayachinga. Simeonpaj huahua huahuacunata pushajca Zurisadaipaj churi Selumielmi can. 13 Simeonpaj familiamanta registrashca soldadocunaca 59.300 cꞌaricunami can. 14 Rubenpaj familiapaj caishuj ladopica Gadpaj familiami canga. Gadpaj huahua huahuacunata pushajca Reuelpaj churi Eliasafmi can. 15 Gadpaj familiamanta registrashca soldadocunaca 45.650 cꞌaricunami can.

16 Rubenpaj carpa huasicunamanta tucui registrashca soldadocunaca 151.450 cꞌaricunami can. Paicunaca Judapaj familiapaj qꞌuipami carpa huasicunata pascana can.

17 Tandanacuna carpa huasita apana cajpica Levipaj familiamanta cajcunaca caishuj familiacunapaj chaupipimi rina can.

Carpa huasicunapi saquiricushca ordenllapitajmi rina can, según cada quimsa familiacuna cashcapimi rina can.

18 Inti huashicun ladomanca quimsa familiacunami canga. Efrainpaj familiami ishqui familiacunapaj chaupipi canga. Chaipimi paicunaca grupo grupopi saquiringacuna. Efrainpaj huahua huahuacunata pushajca Amihudpaj churi Elisamami can. 19 Efrainpaj familiamanta registrashca soldadocunaca 40.500 cꞌaricunami can. 20 Efrainpaj familiapaj ladopica Manasespaj familiami canga. Manasespaj huahua huahuacunata pushajca Pedahzurpaj churi Gamalielmi can. 21 Manasespaj familiamanta registrashca soldadocunaca 32.200 cꞌaricunami can. 22 Efrainpaj familiapaj caishuj ladopica Benjaminpaj familiami canga. Benjaminpaj huahua huahuacunata pushajca Guideonipaj churi Abidanmi can. 23 Benjaminpaj familiamanta registrashca soldadocunaca 35.400 cꞌaricunami can.

24 Efrainpaj carpa huasicunamanta tucui registrashca soldadocunaca 108.100 cꞌaricunami can. Paicunaca Rubenpaj familiapaj qꞌuipami carpa huasicunata pascana can.

25 Janaj ladomanca quimsa familiacunami canga. Danpaj familiami ishqui familiacunapaj chaupipi canga. Chaipimi paicunaca grupo grupopi saquiringacuna. Danpaj huahua huahuacunata pushajca Amisadaipaj churi Ahiezermi can. 26 Danpaj familiamanta registrashca soldadocunaca 62.700 cꞌaricunami can. 27 Danpaj familiapaj ladopica Aserpaj familiami carpa huasicunata shayachinga. Aserpaj huahua huahuacunata pushajca Ocranpaj churi Paguielmi can. 28 Aserpaj familiamanta registrashca soldadocunaca 41.500 cꞌaricunami can. 29 Danpaj familiapaj caishuj ladopica Neftalipaj familiami canga. Neftalipaj huahua huahuacunata pushajca Enanpaj churi Ahirami can. 30 Neftalipaj familiamanta registrashca soldadocunaca 53.400 cꞌaricunami can.

31 Danpaj carpa huasicunamanta tucui registrashca soldadocunaca 157.600 cꞌaricunami can. Paicunaca ultimopimi paicunapaj quimsa familiacunapaj carpa huasicunata pascana can” nircami.

32 Cai israelitacunami según paicunapaj yayacunapaj familiacuna registrashca carca. Tucui registrashca soldadocunaca 603.550 cꞌaricunami carca. 33 Pero levitacunaca Jehová Dios Moisesman mandashca shinami caishuj israelitacunahuanca mana registrashca carcacuna. 34 Israelitacunaca Jehová Dios Moisesman mandashcatami tucuita rurarcacuna. Chashnami paicunaca según quimsa familiacuna paicunapaj carpa huasicunata shayachijcuna carca, pascajcunapish carca. Cada unomi según paicunapaj familia, según paicunapaj yayacunapaj familiacuna chashna rurajcuna carca.

3 Caicunami Aaronpaj, Moisespaj huahua huahuacuna carca. Chai tiempopimi Jehová Diosca Sinaí urcupi Moiseshuan parlarca. 2 Aaronpaj churicunaca Nadab, Abihú, Eleazar, Itamar shuticunami carca. Punta churica Nadabmi carca. 3 Paicunami Aaronpaj churicuna carca. Paicunaca agllashca sacerdotecuna shina sirvingapaj nombrashcami carcacuna. 4 Shinapish Nadabhuan, Abihuhuanca Sinaí chaquishca pambapimi Jehová Diospaj ñaupajpi mana cuna cashca ofrendata* curcacuna. Chaimantami Jehová Diospaj ñaupajpi huañurcacuna. Paicunaca churicunata mana charircacunachu. Pero Eleazarpish, Itamarpish paipaj yaya Aarondijmi sacerdotecuna shina sirvishpa catircacuna.

5 Jehová Diosca Moisestaca cashnami nirca: 6 “Levipaj familiata cꞌuchuyachishpa sacerdote Aaronpaj ñaupajpi churai. Paicunami Aaronta ayudangacuna. 7 Paicunaca tandanacuna carpa huasi ñaupajpimi sirvingacuna. Paicunaca cai carpa huasipimi Aaronta ayudashpa, tucui israelitacunata ayudashpa paicunaman mingashcata pajtachingacuna. 8 Paicunaca tandanacuna carpa huasipi tiyaj tucui cosascunatami cuidana can. Shinallataj carpa huasipi sirvishpami israelitacuna rurana cashcata rurashpa paicunaman mingashcata pajtachingacuna. 9 Levitacunataca Aaronmanpish, paipaj churicunamanpishmi cuna cangui. Paicunaca Aaronta ayudachunmi israelitacunapuramanta chꞌicanyachishca cashcacuna. 10 Aarontapish, paipaj churicunatapishmi sacerdotecuna shina sirvichun nombrana cangui. Sacerdotepaj familiamanta mana caj runa* Diospaj carpa huasiman cꞌuchuyashpaca huañunami can” nircami.

11 Jehová Diosca Moisestaca cashnapishmi nirca: 12 “¡Ricui! Israelitacunapaj tucui punta churicunapaj randica israelitacunapuramantaca levitacunatami ñucapaj agllashcani. Levitacunaca ñucapajmi canga. 13 Punta churicunaca ñucapajmi can. Egipto llajtapi caj tucui punta churicunata huañuchi punllami israelitacunapaj tucui punta churicunataca ñucapaj chꞌicanyachircani. Punta huacharishca animalcunatapish ñucapajmi chꞌicanyachircani. Paicunaca ñucapajmi canga. Ñucaca Jehová Diosmi cani” nircami.

14 Jehová Diosca Sinaí chaquishca pambapimi cutin Moiseshuan parlarca. Paitaca cashnami nirca: 15 “Levipaj familiataca* según paicunapaj yayacunapaj familiacunata, según paicunapaj familiacunatami registrana cangui. Shuj quillata charij cꞌari huahuacunamanta huichimanmi tucui cꞌaricunata registrana cangui” nircami. 16 Chaimi Moisesca Jehová Dios mandashca shina registrarca. 17 Levipaj churicunaca Guersón, Cohat, Merarí shuticunami carca.

18 Guersonpaj churicunaca según paicunapaj familiacunami Libní, Simeí shuticuna carca.

19 Cohatpaj churicunaca según paicunapaj familiacunami Amram, Izhar, Hebrón, Uziel shuticuna carca.

20 Meraripaj churicunaca según paicunapaj familiacunami Mahlí, Musí shuticuna carca.

Tucui paicunami según paicunapaj yayacunapaj familiacuna Levipaj huahua huahuacuna carca.

21 Guersonmantaca libnitacunapaj familia, simeitacunapaj familiami shamurca. Paicunami Guersonmanta shamuj familiacuna carca. 22 Shuj quillata charij cꞌari huahuacunamanta huichiman tucui registrashcacunaca 7.500 cꞌaricunami carca. 23 Guersonitacunapaj familiacunaca Diospaj carpa huasi huasha ladopimi inti huashicun ladoman paicunapaj carpa huasicunata shayachircacuna. 24 Guersonitacunapaj yayapaj familiata pushajca Laelpaj churi Eliasafmi carca. 25 Guersonpaj huahua huahuacunaca tandanacuna carpa huasipica caicunatami cuidana carca: Diospaj carpa huasita, carpa huasi cꞌatata, tandanacuna carpa huasi yaicunapi churashca cortinata, 26 patiopi tiyaj cortinacunata, patioman yaicunapi tiyaj cortinata (chai cortinaca Diospaj carpa huasi muyundijpi, altar muyundijpimi churashca carca), huascacunatapishmi cuidana carca. Paicunaca tucui chai trabajotami rurana carcacuna.

27 Cohatmantaca amramitacunapaj familia, izharitacunapaj familia, hebronitacunapaj familia, uzielitacunapaj familiami shamurca. Paicunami Cohatmanta shamuj familiacuna carca. 28 Shuj quillata charij cꞌari huahuacunamanta huichiman tucui registrashcacunaca 8.600 cꞌaricunami carca. Paicunami Diospaj carpa huasita cuidana carcacuna. 29 Cohatitacunapaj familiacunaca Diospaj carpa huasi ura ladopimi paicunapaj carpa huasicunata shayachircacuna. 30 Cohatitacunapaj yayapaj familiata pushajca Uzielpaj churi Elizafanmi carca. 31 Paicunaca Arcata, mesata, candelerota, altarcunata, Diospaj carpa huasipi sirvingapaj utilizashca cosascunata, chꞌicanyachij cortinatami cuidana carcacuna. Paicunaca tucui chai trabajotami rurana carcacuna.

32 Tucui levitacunata pushajca sacerdote Aaronpaj churi Eleazarmi carca. Paica Diospaj carpa huasipi trabajocunata rurajcunatami ricuj carca.

33 Merarimantaca mahlitacunapaj familia, musitacunapaj familiami shamurca. Paicunami Meraripaj familiacuna carca. 34 Shuj quillata charij cꞌari huahuacunamanta huichiman tucui registrashcacunaca 6.200 cꞌaricunami carca. 35 Meraritacunapaj yayapaj familiata pushajca Abihailpaj churi Zurielmi carca. Paicunaca Diospaj carpa huasi janaj ladomanmi paicunapaj carpa huasicunata shayachircacuna. 36 Meraripaj huahua huahuacunaca Diospaj carpa huasi armazoncunata, barracunata, pilarcunata, basecunata,* tucui cosascunatami cuidana carcacuna. Paicunaca tucui chai trabajotami rurana carcacuna. 37 Shinallataj patio muyundijpi tiyaj pilarcunata, basecunata, estacacunata, huascacunatami cuidana carcacuna.

38 Diospaj carpa huasi chꞌimbapurapi, inti llujshin ladoman tandanacuna carpa huasi ñaupajpica Moisespish, Aaronpish, Aaronpaj churicunapishmi paicunapaj carpa huasicunata shayachircacuna. Paicunaca israelitacunapaj randimi Diospaj carpa huasita cuidana carcacuna. Levitacunapuramanta mana caj runa Diospaj carpa huasiman cꞌuchuyashpaca huañunami carca.

39 Shuj quillata charij cꞌari huahuacunamanta huichiman tucui registrashca levitacunaca 22.000 cꞌaricunami carca. Paicunatami Jehová Dios mandashcamanta Moisespish, Aaronpish según paicunapaj familiacunata registrarcacuna.

40 Chai qꞌuipami Jehová Diosca Moisestaca cashna nirca: “Israelitacunapaj tucui punta churicunata registrai. Paicunataca shuj quillata charij cꞌari huahuacunamanta huichiman yupai. Shinallataj paicunapaj shuticunataca shuj listapi churai. 41 Israelitacunapaj tucui punta churicunapaj randica levitacunatami ñucapaj chꞌicanyachina cangui. Ñucaca Jehová Diosmi cani. Israelitacunapaj tucui punta huacharishca animalcunapaj randica levitacunapaj animalcunata chꞌicanyachi” nircami. 42 Chaimi Moisesca israelitacunapaj tucui punta churicunataca Jehová Dios mandashca shina registrarca. 43 Shuj quillata charij cꞌari huahuacunamanta huichiman tucui punta churicunata shutipi registrajpica 22.273 cꞌaricunami carca.

44 Jehová Diosca Moiseshuanmi parlashpa catirca. Paitaca cashnami nirca: 45 “Israelitacunapaj tucui punta churicunapaj randica levitacunata chꞌicanyachi. Paicunapaj animalcunapaj randica levitacunapaj animalcunata chꞌicanyachi. Levitacunaca ñucapajmi cana can. Ñucaca Jehová Diosmi cani. 46 Israelitacunapaj punta churicunaca levitacunataca 273 cꞌaricunahuan yallimi can. Chai punta churicunata randishpa quishpichingapajca* 47 cada unomantami pichca* siclo* cullquita japina cangui. Chai sicloca Diospaj huasipi pesaj siclo shinallatajmi pesana can. Shuj sicloca 20 guerás* cullquimi valin. 48 Cullquitaca Aaronmanpish, paipaj churicunamanpishmi cuna cangui. Chai cullquica israelitacunapaj punta churicunata randishpa quishpichingapaj cushcami can” nircami. 49 Chashnami Moisesca israelitacunapaj 273 punta churicunata randishpa quishpichingapaj cushca cullquita chasquirca. 50 Paica israelitacunapaj punta churicunamantaca 1.365 siclo cullquitami japirca. Chai sicloca Diospaj huasipi pesaj siclo shinallatajmi pesarca. 51 Moisesca chai cullquitaca Jehová Dios nishca shinami Aaronmanpish, Aaronpaj churicunamanpish curca. Moisesca Jehová Dios paiman mandashca shinami rurarca.

4 Chai qꞌuipami Jehová Diosca Moisestapish, Aarontapish cashna nirca: 2 “Levipaj familiamantaca Cohatpaj huahua huahuacunatami según paicunapaj familiacunata, según paicunapaj yayacunapaj familiacunata censana canguichij. 3 Tandanacuna carpa huasipi ima trabajocunata rurangapaj agllashcacunataca 30 huatacunamanta 50 huatacunacama charijcunatami tucuicunata censana canguichij.

4 Cohatpaj huahua huahuacunaca tandanacuna carpa huasipica Diospajlla ashtahuan chꞌicanyachishca cosascunatami cuidana can. Paicunaca caicunatami rurana can. 5 Israelitacuna shuj ladomanta caishuj ladoman rina cajpica Aaronpish, paipaj churicunapish carpa huasiman yaicushpami chꞌicanyachij cortinata uriyachishpa Leyta huaquichina arcataca chai cortinahuan tapachingacuna. 6 Chai jahuapica foca carahuanmi tapachingacuna. Foca cara jahuapica azul telahuanmi tapachingacuna. Arcapica apana caspicunatami churangacuna.

7 Diosman cushca tandata churana mesa jahuapica azul telatami tindingacuna. Chai jahuapica platocunata, copacunata, tazoncunata, vino ofrendapaj jarracunatami churangacuna. Diosman cushca tandaca siempremi chai mesa jahuapi cana can. 8 Chai cosascuna jahuapica pucanicuj telatami churangacuna. Mesataca foca carahuanmi tapachingacuna. Mesapica apana caspicunatami churangacuna. 9 Chai qꞌuipaca shuj azul telata japishpami achijyachinapaj candelerota, lamparacunata, pinzacunata, braserillocunata, candeleropi ninata japichishpa charingapaj aceiteta churana tucui jarracunatapish tapachingacuna. 10 Candelerotapish, candeleropaj tucui cosascunatapish foca carahuanmi pilluchingacuna. Chaicunata apangapajca barra jahuapimi churangacuna. 11 Oro altar jahuapica shuj azul telatami churangacuna. Shinallataj foca carahuanmi tapachingacuna. Chaita apangapajca caspicunapimi churangacuna. 12 Chai qꞌuipaca tandanacuna carpa huasipi sirvingapaj utilizashca tucui cosascunata japishpami azul telapi churangacuna. Chaicunataca foca carahuanmi tapachingacuna. Chaicunata apangapajca barrapimi churangacuna.

13 Paicunaca altarmantami ushpata* anchuchina can. Shinallataj altar jahuapica shuj morado* telatami churana can. 14 Chai tela jahuapica altarpi sirvingapaj utilizashca tucui cai cosascunatami churangacuna: braserillocunata, jatun trinchecunata, palacunata, tazoncunata, altarpaj tucui shujtaj cosascunatapishmi churangacuna. Tucui chai cosascunataca foca carahuanmi tapachingacuna. Shinallataj chaicunata apangapajca caspicunapimi churangacuna.

15 Israelitacuna shuj ladomanta caishuj ladoman rina cajpica Aaronpish, paipaj churicunapishmi Diospaj carpa huasita, Diospaj carpa huasipi tiyaj tucui cosascunatapish tapachina can. Chai qꞌuipami Cohatpaj huahua huahuacunaca chaicunata apangapaj yaicungacuna. Pero Diospaj carpa huasipi tiyaj cosascunataca mana tuparinachu can. Chaicunata tuparishpaca huañungacunami. Tandanacuna carpa huasipica chaicunatami Cohatpaj huahua huahuacunaca rurana can.

16 Sacerdote Aaronpaj churi Eleazarmi achijyachinapaj aceiteta, mishquijllata ashnacuj inciensota, punllanta cuna grano ofrendata, agllana aceitetapish ricungapaj encargado can. Paica Diospaj tucui carpa huasita, Diospajlla chꞌicanyachishca lugarta, chaipi tucui imalla tiyashcatapishmi ricuna can” nircami.

17 Jehová Diosca Moiseshuan, Aaronhuanmi parlashpa catirca. Paicunataca cashnami nirca: 18 “Levitacunapuramanta cohatitacunapaj familiacuna chingarichunca ama saquinguichijchu. 19 Ashtahuanpish paicuna causashpa catichun, Diospajlla ashtahuan chꞌicanyachishca cosascunaman cꞌuchuyashpa ama huañuchunca caitami rurana canguichij. Aaronpish, paipaj churicunapish tandanacuna carpa huasiman yaicushpami paicuna imata rurana cashcata, imata apana cashcata cada unoman ricuchingacuna. 20 Cohatitacuna yaicushpaca Diospajlla chꞌicanyachishca cosascunataca shuj ratollapish mana ricunachu can. Chaicunata ricushpaca huañungacunami” nircami.

21 Chai qꞌuipami Jehová Diosca Moisestaca cashna nirca: 22 “Guersonpaj huahua huahuacunataca según paicunapaj yayacunapaj familiacunata, según paicunapaj familiacunatami censana can. 23 Tandanacuna carpa huasipi ima trabajocunata rurangapaj agllashcacunataca 30 huatacunamanta 50 huatacunacama charijcunatami tucuicunata registrana cangui. 24 Guersonitacunapaj familiacunaca caicunatami cuidana can, apana can: 25 Diospaj carpa huasi telacunata, tandanacuna carpa huasita, carpa huasi cꞌatata, chai jahuapi caj foca cara cꞌatata, tandanacuna carpa huasi yaicunpi churashca cortinatami apangacuna. 26 Shinallataj patiopi churashca cortinacunata, patioman yaicunapi tiyaj cortinata (chai cortinaca Diospaj carpa huasi muyundijpi, altar muyundijpimi churashca can), huascacunata, tucui shujtaj cosascunata, Diospaj carpa huasipi sirvingapaj tiyashca tucui cosascunatapishmi apangacuna. Chaitami guersonitacunaca rurana can. 27 Aaronpish, paipaj churicunapishmi guersonitacuna tucui imata rurana cashcata, imata apana cashcataca ricungacuna. Cancunami tucui imata apana cashcataca ricuchina canguichij. Chaitami paicunaca rurana can. 28 Guersonitacunapaj familiacunaca tandanacuna carpa huasipica caicunatami rurana can. Paicunaca sacerdote Aaronpaj churi Itamar pushajpimi paicunaman mingashcataca pajtachina can.

29 Meraripaj huahua huahuacunataca según paicunapaj familiata, según paicunapaj yayapaj familiatami registrana cangui. 30 Paicunataca 30 huatacunamanta 50 huatacunacama charijcunatami registrana cangui. Tandanacuna carpa huasipi sirvingapaj agllashcacunataca tucuicunatami registrana cangui. 31 Meraripaj huahua huahuacunaca tandanacuna carpa huasimantaca caicunatami apana can: Diospaj carpa huasi armazoncunata, barracunata, pilarcunata, basecunatami* apana can. 32 Shinallataj patio muyundijpi tiyaj pilarcunata, basecunata, estacacunata, huascacunatapish tucui shujtaj cosascunandij, chai trabajota rurangapaj tucui cosascunatapishmi apana can. Cancunami shutipi cayashpa paicuna imata apana cashcata ricuchina canguichij. 33 Chashnami Meraripaj huahua huahuacunapaj familiacunaca sacerdote Aaronpaj churi Itamar pushajpi tandanacuna carpa huasipica sirvina can” nircami.

34 Chai qꞌuipami Moisespish, Aaronpish, israelitacunata pushajcunapish cohatitacunapaj huahua huahuacunataca según paicunapaj familiacunata, según paicunapaj yayapaj familiata registrarcacuna. 35 Tandanacuna carpa huasipi sirvingapaj agllashcacunataca 30 huatacunamanta 50 huatacunacama charijcunataca tucuicunatami registrarcacuna. 36 Tucui registrashcacunaca según paicunapaj familiacunami 2.750 cꞌaricuna carca. 37 Caicunami cohatitacunapaj familiacunamantaca registrashca carcacuna. Tandanacuna carpa huasipi tucui sirvijcunami registrashca carcacuna. Moisespish, Aaronpish Jehová Dios Moisesman mandashca shinami paicunata registrarcacuna.

38 Guersonpaj huahua huahuacunaca según paicunapaj familiacuna, según paicunapaj yayapaj familiami registrashca carcacuna. 39 Tandanacuna carpa huasipi sirvingapaj agllashcacunaca 30 huatacunamanta 50 huatacunacama charijcunaca tucuicunami registrashca carcacuna. 40 Tucui registrashcacunaca según paicunapaj familiacuna, según paicunapaj yayapaj familiami 2.630 cꞌaricuna carca. 41 Guersonpaj huahua huahuacunamantaca caicunami registrashca carcacuna. Tandanacuna carpa huasipi tucui sirvijcunami registrashca carcacuna. Jehová Dios mandashcamantami Moisespish, Aaronpish paicunata registrachircacuna.

42 Meraripaj huahua huahuacunaca según paicunapaj familiacuna, según paicunapaj yayapaj familiami registrashca carcacuna. 43 Tandanacuna carpa huasipi sirvingapaj agllashcacunaca 30 huatacunamanta 50 huatacunacama charijcunaca tucuicunami registrashca carcacuna. 44 Tucui registrashcacunaca según paicunapaj familiacunami 3.200 cꞌaricuna carca. 45 Meraripaj huahua huahuacunapaj familiacunaca caicunami registrashca carcacuna. Paicunatami Moisespish, Aaronpish Jehová Dios Moisesman mandashca shina registrarcacuna.

46 Moisespish, Aaronpish, israelitacunata pushajcunapish tucui levitacunataca según paicunapaj familiacunata, según paicunapaj yayacunapaj familiacunatami registrarcacuna. 47 Paicunaca 30 huatacunamanta 50 huatacunacamami charirca. Tucui paicunami tandanacuna carpa huasipica sirvina carcacuna. Tandanacuna carpa huasipi tiyaj cosascunatapishmi apana carcacuna. 48 Tucui registrashcacunaca 8.580 cꞌaricunami carca. 49 Paicunaca Jehová Dios Moisesman mandashca shinami registrashca carcacuna. Cada unomi imata rurana cashca shinallataj, imata apana cashca shinallataj registrashca carcacuna. Jehová Dios Moisesman mandashca shinami registrashca carcacuna.

5 Jehová Diosca Moiseshuan cutin parlashpaca cashnami nirca: 2 “Israelitacunataca lepra ungüihuan cajcunata, cuerpomanta imapish cacharirijpi ungushcacunata, huañushca cuerpota tuparishpa mapa saquirijcunataca carpa huasicunamanta canllaman llujshichichun mandai. 3 Cꞌari cajpipish, huarmi cajpipish canllaman llujshichishpa cachachun. Carpa huasicunapi causaj caishujcunata ama mapayachichunmi canllaman llujshichishpa cachana can. Ñucaca paicunapurapimi causani” nircami. 4 Chaimi israelitacunaca mapa saquirishca gentecunataca carpa huasicunamanta canllaman llujshichishpa cacharcacuna. Israelitacunaca Jehová Dios Moisesman mandashca shinami rurarcacuna.

5 Jehová Diosca Moisestaca cashnapishmi nirca: 6 “Israelitacunataca cashna ningui: ‘Maijan cꞌaripish, maijan huarmipish shujtaj runapaj contra ima mana allita rurashpa, Jehová Diospaj ñaupajpi juchata rurashpaca culpayujmi canga. 7 Paica ima juchata rurashcatami huillana can. Shinallataj tucuitami tigrachina can. Llaquichishca runamanca mashna valishcamantaca pichcapi chaupishca shuj partehuanmi* cuna can. 8 Pero chai runa huañushca cajpi, pagashcata japingapaj shuj cꞌuchulla familia mana tiyajpica chaitaca Jehová Diosmanmi cuna can. Chai pagashcaca sacerdotepajmi canga. Shinallataj juchacunamanta perdonashca cachun cushca carneropish sacerdotepajmi canga.

9 Israelitacuna sacerdotepajman apashca Diosman cushca tucui ofrendacunaca sacerdotepajmi canga. 10 Cada israelita cushca Diospajlla chꞌicanyachishca cosascunahuanca sacerdotemi saquiringa. Cada israelita sacerdoteman imata cushcaca sacerdotepajmi canga’ ningui” nircami.

11 Jehová Diosca Moiseshuanmi parlashpa catirca. Paitaca cashnami nirca: 12 “Israelitacunahuan parlai. Paicunataca cashna ningui: ‘Shuj runapaj huarmi juchata rurashpa cusata traicionajpica caitami rurana canguichij. 13 Chai huarmi shujtaj cꞌarihuan chayarishca cajpi pero paipaj cusa mana yachajpi, pai ima rurashca pacalla saquirijpi, pai mapa saquirishca cajpi, pai chaita rurashcata huillaj shuj testigo mana tiyajpi, pai juchata ruracujta pi mana japishca cajpica caitami rurana canguichij. 14 Chai huarmi mapayashca cajpi o mana mapayashca cajpipish cusa celashpa paita traicionashcata yuyashpaca 15 paipaj huarmitaca sacerdotepajmanmi apana can. Huarmimantaca shuj ofrendatapishmi apana can. Ishqui libra yalli* cebada harinatami apana can. Chai ofrenda jahuapica aceitetapish, olibanotapish mana churanachu can. Chaica celashcamanta cushca grano ofrendami can. Chai grano ofrendaca culpayuj cashcata yuyachij ofrendami can.

16 Sacerdoteca chai huarmita cꞌuchuyachishpami Jehová Diospaj ñaupajpi shayarichun mañanga. 17 Sacerdoteca shuj uchilla barro puñupimi chuya yacuta jundachinga. Chai qꞌuipaca Diospaj carpa huasi pambamanta asha ñutu allpata japishpami chai yacupi shitanga. 18 Chaita rurashca huashami sacerdoteca chai huarmitaca Jehová Diospaj ñaupajpi shayarichun mañanga. Paipaj uma ajchata cacharishpami paipaj ishquindij maqui shungupica culpayuj cashcata yuyachij grano ofrendata churanga. Chaica celashcamanta cushca grano ofrendami can. Sacerdoteca paipaj maquipica maldicionta apamuj jayaj yacutami charicunga.

19 Chai huashami sacerdoteca chai huarmitaca cashna nishpa jurachinga: “Cambaj cusahuan cazarashca cashparaj shujtaj cꞌarihuan mana chayarishca cajpi, ima juchata can mana rurashca cajpi, can mana mapayashca cajpica maldicionta apamuj cai jayaj yacuca cantaca ima dañota ama rurachun. 20 Pero cambaj cusahuan cazarashca cashparaj shujtaj cꞌarihuan chayarishpa juchata rurashpa mapayashca cajpica...” nishpami jurachinga. 21 Chai qꞌuipami sacerdoteca chai huarmitaca mana allita rurashcamanta maldicishca cana cashcata jurachinga. Paica chai huarmitaca cashnami ninga: “Cambaj llajta gentecuna maldicicujpi, juracujpica Jehová Diosca paicuna cambaj shutita nichunmi saquinga. Can huainayashca cajpica Jehová Diosca huahuacunata charichunca ama saquichun, cambaj huijsatapish pꞌunguillichichun. 22 Maldicionta apamuj cai yacuca cambaj tripacunapi yaicushpami cambaj huijsataca pꞌunguillichinga. Chaimi huahuacunataca mana chari tucungui” ningami. Chaimi huarmica: “¡Chashna cachun! ¡Chashna cachun!”* nishpa cutichinga.

23 Chai qꞌuipami sacerdoteca cai maldicioncunataca shuj libropi escribina can. Chai escribishcataca jayaj yacuhuanmi anchuchina can. 24 Chai huashaca Maldicionta apamuj jayaj yacutami huarmimanca ubyachina can. Maldicionta apamuj yacu chai huarmipaj huijsaman yaicushpami achcata nanachinga. 25 Sacerdoteca celashcamanta cushca grano ofrendata huarmipaj maquicunamanta japishpami Jehová Diospaj ñaupajpi caiman chaiman cuyuchina can. Chashna rurashpaca altarmanmi cꞌuchuyachinga. 26 Sacerdoteca maqui junda grano ofrendamanta shuj parteta japishpami altar jahuapi rupachishpa cushnichinga. Chai qꞌuipaca huarmimanmi yacuta ubyachinga. 27 Sacerdote chai huarmiman yacuta ubyachijpica chai huarmi mapayashca cajpi, paipaj cusata traicionashca cajpica maldicionta apamuj yacu paipaj huijsaman yaicushpami jayaj tucunga. Paipaj huijsaca pꞌunguillingami. Paica huahuacunataca mana chari tucungachu. Paipaj llajta gentecuna maldicicushpa, juracushpaca paipaj shutitami ningacuna. 28 Shinapish chai huarmi mana mapayashca cajpi, chuya cajpica mana castigashcachu canga. Paica chichu saquirishpami huahuacunata chari tucunga.

29 Celashcamanta leyca caimi can. Shuj huarmi paipaj cusahuan cazarashca cashparaj juchata rurashpa, mapayashpa, 30 o shuj cꞌari celashpa, paipaj huarmi traicionashcata yuyashpaca caitami rurana can. Cusaca paipaj huarmitaca Jehová Diospaj ñaupajmanmi pushana can. Sacerdoteca cai leypi nishca shinami chai huarmihuanca rurana can. 31 Cꞌarica culpa illajmi saquiringa. Pero huarmica paipaj culpamantami castigashca canga’ ningui” nircami.

6 Jehová Diosca Moiseshuanmi parlashpa catirca. Paitaca cashnami nirca: 2 “Israelitacunahuan parlashpaca cashna ningui: ‘Shuj cꞌari o shuj huarmi nazareo* shina causangapaj quiquin munaimanta Jehová Diosman mingarishpaca 3 vinotaca mana ubyanachu can, ima shujtaj laya tragocunatapish mana ubyanachu can. Vinomanta rurashca vinagretapish, ima shujtaj laya tragocunamanta rurashca vinagretapish mana ubyanachu can. Uvamanta rurashca ima ubyanacunatapish mana ubyanachu can. Cunanlla pallashca uvatapish, chaquishca uvatapish mana micunachu can. 4 Nazareo cashca punllacunapica uva yuramantaca imata mana micunachu can. Verde uvacunallatapish, uva caracunallatapish mana micunachu can.

5 Nazareo cashca punllacunapica paipaj uma ajchataca mana ruturinachu can. Jehová Diospajlla chꞌicanyachishca cashca punllacuna pajtangacamami paipaj uma ajchataca huiñachun saquina can. 6 Jehová Diospajlla chꞌicanyachishca cashca punllacunapica shuj huañushca cuerpopajmanca mana cꞌuchuyanachu can.* 7 Paipaj uma ajchaca Diospaj nazareo cashcata ricuchij señalmi can. Chaimantami paipaj yaya, paipaj mama, paipaj huauqui, paipaj pani huañujpipish paica mana mapa saquirina can.

8 Paica nazareo cashca punllacunapica Jehová Diospajlla chꞌicanyachishcami can. 9 Pero maijanpish paipaj ladopi ñapish huañujpi, Diospajlla chꞌicanyachishca cashcata ricuchij ajcha mapayajpica pai chuya saquirishcata huillai punllami paipaj uma ajchataca lluchullata ruturina can. Paica séptimo punllapimi umataca lluchullata ruturina can. 10 Octavo punllapica ishqui urpicunata o ishqui huahua palomacunatami sacerdoteman cungapaj tandanacuna carpa huasi yaicunaman apana can. 11 Sacerdoteca shuj animaltaca juchamanta ofrendata shina, caishuj animaltaca rupachishca ofrendata shinami cunga. Sacerdoteca chai runa paipaj juchamanta perdonashca cachunmi chashna cunga. Chai runaca huañushca cuerpota tuparishcamantami mapa saquirishca. Chaimi chai runaca chai punllallataj Diospajlla chꞌicanyarishpa paipaj uma ajchata cutin huiñachinga. 12 Paica nazareo shina causangapaj ñaupaman ari nishcamantami cutinllataj Jehová Diospajlla chꞌicanyarina can. Paica culpamanta ofrendata shinaca shuj huatata charij malta carnerotami apanga. Chashnapish ña pasashca punllacunataca mana yupanachu can. Paica nazareo cashca punllacunapimi mapa saquirishca.

13 Nazareo runaca cai leytami pajtachina can. Nazareo cashca punllacuna pajtajpica paica tandanacuna carpa huasi yaicunamanmi ringa. 14 Chaipimi Jehová Diosman cai ofrendacunata cuna can: rupachishca ofrendata shinaca shuj huatata charij sano malta carnerotami cuna can. Juchamanta ofrendata shinaca shuj huatata charij sano huarmi ovejatami cuna can. Dioshuan alli tucungapaj sacrificiota shinaca shuj sano carnerotami cuna can. 15 Aceitehuan, alli* harinahuan rurashca levadura illaj roscas tandata, aceitehuan jahuata llihuishca levadura illaj ñañujlla galletastapishmi shuj canastapi cuna can. Shinallataj grano ofrendata, vino ofrendacunatami cuna can. 16 Sacerdoteca tucui caicunatami Jehová Diospaj ñaupajpi cunga. Paica juchamanta ofrendatapish, rupachishca ofrendatapishmi cunga. 17 Sacerdoteca Jehová Dioshuan alli tucungapaj sacrificiota shinaca shuj carnerotami cunga. Chai sacrificiohuanca levadura illaj roscas tandatami shuj canastapi cunga. Shinallataj grano ofrendata, vino ofrendatami cunga.

18 Chai qꞌuipami nazareo runaca paipaj uma ajchataca tandanacuna carpa huasi yaicunapi lluchullata ruturina can. Paica nazareo cashca punllacunapi huiñachishca ajchata japishpami Dioshuan alli tucungapaj sacrificiota rupachicuj ninapi shitanga. 19 Chai qꞌuipami sacerdoteca carneropaj rigra aicha* yanushcata, canastamanta levadura illaj shuj rosca tandata, levadura illaj shuj ñañujlla galletatapish japishpa nazareo runapaj ishqui maqui shungupi churana can. Nazareo cashcata ricuchij señal ajchata lluchullata ruturishca qꞌuipami chashna rurana can. 20 Sacerdoteca caiman chaiman cuyuchishpa cushca ofrendata shinami chaicunataca Jehová Diospaj ñaupajpi caiman chaiman cuyuchinga. Chaica caiman chaiman cuyuchishpa cushca ofrendamanta pecho aicha shinallataj, Diospajlla chꞌicanyachishca ofrenda chaqui shinallatajmi sacerdotepaj canga. Chai qꞌuipami nazareo cashca runaca vinota ubyai tucunga.

21 Nazareo runaca imata rurangapaj ari nishpaca cai leytami pajtachina can. Nazareocunaman leypi mandashcata yalli ashtahuan Jehová Diosman cusha nishpaca, pai chaita rurai pudishpaca leypi mandashca shinami pai ari nishcataca pajtachina can’ ningui” nircami.

22 Chai qꞌuipaca Jehová Diosca Moisestaca cashnami nirca: 23 “Aarontapish, paipaj churicunatapish cashna ningui: ‘Israelitacunataca cashnami bendiciana canguichij. Paicunataca cashna ninguichij:

24 “Jehová Dios canta bendiciachun, canta cuidachun.

25 Jehová Diosca canta llaquishcata, cꞌuyashcata ricuchichun.

26 Jehová Diosca canhuan alli cachun, sumaj causaitapish cuchun” ninguichij’ ningui.

27 Paicunaca ñuca shutipimi israelitacunataca bendiciana can. Chaimi ñucapish israelitacunata bendiciasha” nircami.

7 Moisesca Diospaj carpa huasita shayachinata tucuchishca qꞌuipami chai carpa huasita, chai carpa huasipaj tucui cosascunata, altarta, altarpaj tucui cosascunatapish aceiteta churashpa Diospajlla chꞌicanyachirca. Aceiteta churashca qꞌuipa, chai cosascunata Diospajlla chꞌicanyachishca qꞌuipami 2 israelitacunata pushajcunaca shuj ofrendata curcacuna (paicunaca yayacunapaj familiacunata pushajcunami carca). Chai pushajcunaca censopi registracujpimi ricushpa ayudarcacuna. 3 Chai pushaj runacunami Jehová Diospaj ñaupajman paicunapaj ofrendata aparcacuna. Tapashca 6 carretacunata, 12 torocunatami curcacuna. Cada ishqui pushajmanta shuj carretata, cada pushajmanta shuj torota apashpami Diospaj carpa huasi ñaupajpi curcacuna. 4 Jehová Diosca Moisestaca cashnami nirca: 5 “Chai cosascunata chasqui. Chaicunaca tandanacuna carpa huasipi tiyaj cosascunata apangapajmi canga. Levitacunamanca cada unomanmi paicuna rurana trabajopaj minishtishcata cuna cangui” nircami.

6 Chaimi Moisesca carretacunatapish, torocunatapish chasquirca. Chaicunataca levitacunamanmi curca. 7 Guersonpaj huahua huahuacunamanca ishqui carretacunata, chuscu torocunatami curca. Paicuna rurana trabajopaj minishtishca shinami curca. 8 Meraripaj huahua huahuacunamanca chuscu carretacunata, pusaj* torocunatami paicuna rurana trabajopaj minishtishca shina curca. Paicunataca sacerdote Aaronpaj churi Itamarmi pushaj carca. 9 Pero Cohatpaj huahua huahuacunamanca imata mana curcachu. Paicunapaj trabajoca Diospaj carpa huasipi sirvinami carca. Paicunaca paicunapaj rigra jahuapimi Diospajlla chꞌicanyachishca cosascunata apaj carcacuna.

10 Pushaj runacunaca altarpi aceiteta churashca punllami altarta inagurangapaj* paicunapaj ofrendata curcacuna. Chai pushaj runacuna altar ñaupajpi paicunapaj ofrendata cujpimi 11 Jehová Diosca Moisestaca: “Altarta inagurangapajca pushajcunamanta shuj pushajmi cada punlla paipaj ofrendata cunga” nircami.

12 Primer punllaca Judapaj familiamanta Aminadabpaj churi Nahsonmi paipaj ofrendata curca. 13 Paipaj ofrendaca caimi carca: grano ofrendapajca 130 siclota* pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli* harinahuan junda carca. 14 Chashnallataj 10 siclota pesaj oro copami* carca. Chai copaca inciensohuan jundami carca. 15 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 16 Juchamanta ofrendapajca shuj malta chivomi carca. 17 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Aminadabpaj churi Nahsonca curca.

18 Segundo punllaca Isacarpaj familiata pushaj Zuarpaj churi Netanelmi paipaj ofrendata curca. 19 Paipaj ofrendaca caimi carca: grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 20 Chashnallataj 10 siclota pesaj oro copami carca. Chai copaca inciensohuan jundami carca. 21 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 22 Juchamanta ofrendapajca shuj malta chivomi carca. 23 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Zuarpaj churi Netanelca curca.

24 Tercer punllaca Zabulonpaj huahua huahuacunata pushaj Helonpaj churi Eliabmi 25 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 26 Chashnallataj 10 siclota pesaj oro copami carca. Chai copaca inciensohuan jundami carca. 27 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 28 Juchamanta ofrendapajca shuj malta chivomi carca. 29 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Helonpaj churi Eliabca curca.

30 Cuarto punllaca Rubenpaj huahua huahuacunata pushaj Sedeurpaj churi Elizurmi 31 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 32 Chashnallataj 10 siclota pesaj oro copami carca. Chai copaca inciensohuan jundami carca. 33 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 34 Juchamanta ofrendapajca shuj malta chivomi carca. 35 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Sedeurpaj churi Elizurca curca.

36 Quinto punllaca Simeonpaj huahua huahuacunata pushaj Zurisadaipaj churi Selumielmi 37 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 38 Chashnallataj 10 siclota pesaj oro copami carca. Chai copaca inciensohuan jundami carca. 39 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 40 Juchamanta ofrendapajca shuj malta chivomi carca. 41 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Zurisadaipaj churi Selumielca curca.

42 Sexto punllaca Gadpaj huahua huahuacunata pushaj Deuelpaj churi Eliasafmi 43 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 44 Chashnallataj 10 siclota pesaj oro copami carca. Chai copaca inciensohuan jundami carca. 45 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 46 Juchamanta ofrendapajca shuj malta chivomi carca. 47 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Deuelpaj churi Eliasafca curca.

48 Séptimo punllaca Efrainpaj huahua huahuacunata pushaj Amihudpaj churi Elisamami 49 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 50 Chashnallataj 10 siclota pesaj oro copami carca. Chai copaca inciensohuan jundami carca. 51 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 52 Juchamanta ofrendapajca shuj malta chivomi carca. 53 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Amihudpaj churi Elisamaca curca.

54 Octavo punllaca Manasespaj huahua huahuacunata pushaj Pedahzurpaj churi Gamalielmi 55 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 56 Chashnallataj 10 siclota pesaj oro copami carca. Chai copaca inciensohuan jundami carca. 57 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 58 Juchamanta ofrendapajca shuj malta chivomi carca. 59 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Pedahzurpaj churi Gamalielca curca.

60 Noveno punllaca Benjaminpaj huahua huahuacunata pushaj Guideonipaj churi Abidanmi 61 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 62 Chashnallataj 10 siclota pesaj oro copami carca. Chai copaca inciensohuan jundami carca. 63 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 64 Juchamanta ofrendapajca shuj malta chivomi carca. 65 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Guideonipaj churi Abidanca curca.

66 Décimo punllaca Danpaj huahua huahuacunata pushaj Amisadaipaj churi Ahiezermi 67 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 68 Chashnallataj 10 siclota pesaj oro copami carca. Chai copaca inciensohuan jundami carca. 69 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 70 Juchamanta ofrendapajca shuj malta chivomi carca. 71 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Amisadaipaj churi Ahiezerca curca.

72 Once punllapica Aserpaj huahua huahuacunata pushaj Ocranpaj churi Paguielmi 73 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 74 Chashnallataj 10 siclota pesaj oro copami carca. Chai copaca inciensohuan jundami carca. 75 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 76 Juchamanta ofrendapajca shuj malta chivomi carca. 77 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Ocranpaj churi Paguielca curca.

78 Doce punllapica Neftalipaj huahua huahuacunata pushaj Enanpaj churi Ahirami 79 paipaj ofrendata curca. Grano ofrendapajca 130 siclota pesaj shuj cullqui platomi carca. Shinallataj 70 siclota pesaj shuj cullqui tazonmi carca. Chai sicloca Diospaj huasipi pesaj siclo shinallatajmi pesaj carca. Ishquindijmi aceitehuan chagrushca alli harinahuan junda carca. 80 Chashnallataj 10 siclota pesaj oro copami carca. Chai copaca inciensohuan jundami carca. 81 Rupachishca ofrendapajca shuj malta toro, shuj carnero, shuj huatata charij shuj malta ovejami carca. 82 Juchamanta ofrendapajca shuj malta chivomi carca. 83 Cutin Dioshuan alli tucungapaj sacrificiopajca ishqui toro, pichca carnero, pichca cꞌari chivo, shuj huatata charij pichca malta ovejami carca. Cai ofrendatami Enanpaj churi Ahiraca curca.

84 Israelitacunata pushajcunaca altarpi aceiteta churashca qꞌuipami altarta inagurangapajca 12 cullqui platota, 12 cullqui tazonta, 12 oro copata curcacuna. 85 (Cada cullqui platomi 130 siclota pesarca. Shinallataj cada cullqui tazonmi 70 siclota pesarca. Tucui cullquica 2.400 siclotami pesarca. Chai sicloca Diospaj huasipi pesaj siclo shinallatajmi pesaj carca. 86 Cutin 12 oro copacunamantaca cada copami inciensohuan junda carca. Shinallataj cada copami 10 siclota pesarca. Chai sicloca Diospaj huasipi pesaj siclo shinallatajmi pesaj carca. Tucui oroca 120 siclotami pesarca). 87 Rupachishca ofrendapaj cushca tucui animalcunaca 12 toro, 12 carnero, shuj huatata charij 12 malta ovejami carca. Shinallataj paicunapaj grano ofrendacunapishmi carca. Juchamanta ofrendapajca 12 malta chivomi carca. 88 Shinallataj Dioshuan alli tucungapaj sacrificiopaj cushca tucui animalcunaca 24 toro, 60 carnero, 60 cꞌari chivo, shuj huatata charij 60 malta ovejami carca. Cai ofrendaca altarpi aceiteta churashca qꞌuipa altarta inagurangapajmi carca.

89 Moisesca Dioshuan* parlanacungapaj tandanacuna carpa huasiman yaicushpaca Leyta huaquichina arca tapa jahuamanta, ishqui querubincuna chaupimantami paihuan parlashcata uyaj carca. Diosca chai jahuamantami Moiseshuan parlaj carca.

8 Jehová Diosca Moiseshuanmi parlarca. Paitaca cashnami nirca: 2 “Aaronhuan parlai. Paitaca: ‘Canchis* lamparacunata can japichijpica chai lamparacunaca candelero ñaupajtami tucui achijyachina can’ ningui” nircami. 3 Shina nijpimi Aaronca chaita rurarca. Paica candelero ñaupajta tucui achijyachichunmi lamparacunata japichirca. Jehová Dios Moisesman mandashca shinami rurarca. 4 Candeleroca orohuan rurashcami carca. Chaupipi huichiman shayacuj ejemanta callarishpaca sisacunacamami martillohuan labrashca carca. Chai candeleroca Jehová Dios Moisesman shuj muscuipi shina ricuchishcata rurashcami carca.

5 Jehová Diosca Moiseshuan cutin parlashpaca cashnami nirca: 6 “Levitacunataca israelitacunapuramanta chꞌicanyachishpa chuyayachi. 7 Paicunataca cashnami chuyayachina cangui. Juchacunata chuyayachij yacuhuanmi tsirapana* cangui. Paicunaca tucui cuerpotami shuj navajahuan rasurarina* can. Paicunapaj ropatapish tajshanami can. Paicunapish chuyayarinami can. 8 Chai qꞌuipami paicunaca shuj malta torota apangacuna. Cutin grano ofrendapajca aceitehuan chagrushca alli* harinatami apangacuna. Canpish juchamanta ofrendapajca shujtaj malta torotami apana cangui. 9 Levitacunataca tandanacuna carpa huasi ñaupajmanmi pushana cangui. Shinallataj tucui israelitacunatami tandachina cangui. 10 Levitacunata Jehová Diospaj ñaupajman can pushajpica israelitacunaca levitacunapaj uma jahuapimi paicunapaj maquicunata churana can. 11 Cutin Aaronca levitacunataca caiman chaiman cuyuchishpa cushca ofrendata shinami israelitacunapaj shutipi Jehová Diosman cunga. Chai qꞌuipami levitacunaca Jehová Diosta sirvi callaringacuna.

12 Chai huashami levitacunaca paicunapaj maquicunataca torocunapaj uma jahuapi churangacuna. Chaita rurashca huashaca shuj torotaca juchamanta ofrendata shina, caishuj torotaca rupachishca ofrendata shina Jehová Diosman cungui. Chashnami levitacunaca paicunapaj juchacunamanta perdonashca cangacuna. 13 Levitacunataca Aaronpaj ñaupajman, paipaj churicunapaj ñaupajman pushangui. Paicunataca caiman chaiman cuyuchishpa cushca ofrendata shina Jehová Diosman cungui. 14 Levitacunataca israelitacunamantami chꞌicanyachina cangui. Levitacunaca ñucapajmi canga. 15 Chai qꞌuipami levitacunaca tandanacuna carpa huasipi sirvingapaj yaicungacuna. Chashnami paicunataca chuyayachina cangui. Shinallataj caiman chaiman cuyuchishpa cushca ofrendata shinami cuna cangui. 16 Israelitacunamantaca levitacunami ñucapaj chꞌicanyachishca cashca. Israelitacunapaj tucui punta churicunapaj randimi paicunataca ñucapaj agllasha. 17 Israelitacunapuramanta tucui punta churicunaca ñucapajmi can. Punta huacharishca animalcunapish ñucapajmi can. Egipto llajtapi tucui punta churicunata huañuchi punllami paicunataca ñucapajlla chꞌicanyachircani. 18 Israelitacunapaj tucui punta churicunapaj randica levitacunatami ñucapaj agllasha. 19 Levitacunaca israelitacunapuramantami cushca cangacuna. Paicunaca Aarontapish, paipaj churicunatapishmi sirvingacuna. Israelitacunapaj randimi tandanacuna carpa huasipi sirvingacuna. Shinallataj israelitacunapaj juchacuna perdonashca cachunmi sacerdotecunata ayudangacuna. Chashnami israelitacunaca Diospaj carpa huasimanca mana cꞌuchuyangacuna. Ima llaquipish paicunataca mana japingachu” nircami.

20 Moisespish, Aaronpish, tucui israelitacunapish chaitami levitacunahuanca rurarca. Jehová Dios Moisesman mandashca shinami paicunahuanca rurarca. 21 Levitacunaca chuyayarircacunami. Paicunapaj ropatapish tajsharcacunami. Chai qꞌuipami Aaronca paicunataca caiman chaiman cuyuchishpa cushca ofrendata shina Jehová Diosman curca. Chaimantaca levitacuna chuya saquirichun, paicunapaj juchacuna perdonashca cachunmi Aaronca shuj ofrendata curca. 22 Chai qꞌuipami levitacunaca tandanacuna carpa huasipi paicuna rurana trabajota rurangapaj yaicurcacuna. Chai trabajotaca Aaronpaj ñaupajpi, paipaj churicunapaj ñaupajpimi rurana carcacuna. Jehová Dios Moisesman mandashca shinami levitacunahuanca rurarcacuna.

23 Jehová Diosca cutinllatajmi Moiseshuan parlarca. Paitaca cashnami nirca: 24 “Shuj levita runaca 25 huatacunata o ashtahuan huatacunata charishpaca tandanacuna carpa huasipi sirvijcunahuanmi sirvi callaringa. 25 Pero ña 50 huatacunata charishpaca tandanacuna carpa huasipi sirvijcunahuanca ña mana cangachu. Chaipica ña mana ashtahuan sirvingachu. 26 Paica tandanacuna carpa huasipi sirvij caishuj levitacunatami* ayudai tucun. Pero chaipica mana sirvinachu can. Caitami levitacunahuanpish, paicuna imata rurana cashcahuanpish rurana cangui” nircami.

9 Israelitacuna Egipto llajtamanta llujshishca ishqui huatapi, chai huatapaj primer quillapimi Jehová Diosca Sinaí chaquishca pambapi Moiseshuan parlarca. Paitaca cashnami nirca: 2 “Israelitacunaca agllashca punllapimi Pascua fiestata rurana can. 3 Cai quillapaj 14 punllapimi ña tutayacujpi, agllashca punllapi Pascua fiestata rurana can. Paicunaca leycunapi nishca shina, ima shina rurana cashca shinami rurana can” nircami.

4 Chaimi Moisesca israelitacunataca Pascua fiestata rurachun mandarca. 5 Chashna mandajpimi israelitacunaca primer quillapi, chai quillapaj 14 punllapi ña tutayacujpi Pascua fiestata Sinaí chaquishca pambapi rurarcacuna. Israelitacunaca Jehová Dios Moisesman mandashca shinami rurarcacuna.

6 Huaquin cꞌaricunaca huañushca cuerpota tuparishcamantami mapa saquirishcacuna carca. Chaimantami chai punllaca Pascua fiestata mana rurai tucurcacuna. Chaimi paicunaca chai punllallataj Moisespaj ñaupajman, Aaronpaj ñaupajman rircacuna. 7 Paicunaca: “Ñucanchijca shuj huañushca cuerpota tuparishcamantami mapa saquirishcanchij. ¿Imatataj rurai tucunchij? Ñucanchijpish caishuj israelitacuna shinallatajmi agllashca punllapi ñucanchij ofrendata Jehová Diosman cusha ninchij” nircacunami. 8 Shina nijpimi Moisesca: “Caipi shuyaichij. Cancunamanta Jehová Dios ima nijtami uyagrini” nirca.

9 Jehová Diosca Moisestaca cashnami nirca: 10 “Israelitacunataca cashna ningui: ‘Cancunapuramanta maijan runapish o cancunapaj huahua huahuacunapish shuj huañushca cuerpota tuparishcamanta mapa saquirishca cashpapish o caru viajepi cashpapish Jehová Diospajmi Pascua fiestata rurana can. 11 Paicunaca segundo quillapaj 14 punllapimi ña tutayacujpi Pascua fiestata rurana can. Chai punllami malta ovejapaj aichataca levadura illaj tandahuan, jayaj verduracunahuan micuna can. 12 Malta ovejapaj aichataca cayandij tutamantacamaca imata mana saquinachu can. Shinallataj shuj tullullatapish mana pꞌaquinachu can. Pascua fiestataca leycunapi nishca shinami rurana can. 13 Pero maijanpish chuya cashca jahua o mana maiman viajashca jahua Pascua fiestata mana rurashpaca israelitacunapuramantaca huañuchishcami canga. Paica agllashca punllapimi ofrendataca Jehová Diosman mana cushca. Chai runaca paipaj juchamantami castigashca canga.

14 Shujtaj llajtamanta shamushca runa cancunahuan causashpaca paipishmi Jehová Diospaj Pascua fiestata rurana can. Paica Pascua fiestamanta leypi mandashca shina, ima shina rurana cashcata ricuchishca shinami rurana can. Shujtaj llajtamanta shamushca runapajpish, israelita runapajpish shujlla leymi tiyana can’ ningui” nircami.

15 Diospaj carpa huasita tucui shayachi punllami pꞌuyuca Diospaj carpa huasita taparca. Pero nina lunyacuj shina pꞌuyuca tutayaimantaca cayandij tutamantacamami Leyta huaquichina arcata churashca Diospaj carpa huasi jahuapi saquirirca. 16 Siempremi cashna tucuj carca: punllaca pꞌuyumi Diospaj carpa huasita tapaj carca. Tutaca chai pꞌuyuca nina lunyacuj shinami tucuj carca. 17 Diospaj carpa huasi jahuamanta pꞌuyu anchurijpica israelitacunaca chai ratomi rijcuna carca. Cutin pꞌuyu maipi shayarijpica israelitacunaca chaipimi carpa huasicunapi saquirijcuna carca. 18 Israelitacunaca Jehová Dios mandajpimi rijcuna carca. Shinallataj Jehová Dios mandajpimi carpa huasicunapi saquirijcuna carca. Diospaj carpa huasi jahuapi pꞌuyu cajpica israelitacunaca carpa huasicunapimi saquirijcuna carca. 19 Diospaj carpa huasi jahuapi pꞌuyu achca punllacunata saquirijpica israelitacunaca Jehová Diosta cazushpami mana rijcuna carca. 20 Huaquinpica pꞌuyuca achca punllacunatami Diospaj carpa huasi jahuapi saquirij carca. Israelitacunaca Jehová Dios mandajpimi carpa huasicunapi saquirijcuna carca. Shinallataj Jehová Dios mandajpimi rijcuna carca. 21 Shujtaj cutincunaca pꞌuyuca tutayaimantaca achijyangacamallami saquirij carca. Chaimi israelitacunaca tutamanta lado pꞌuyu anchurijpica rijcunalla carca. Punlla cajpipish, tuta cajpipish pꞌuyu anchurijpica rijcunallami carca. 22 Diospaj carpa huasi jahuapi pꞌuyu cajpica ishqui punlla cajpipish, shuj quilla cajpipish o ashtahuan punllacuna cajpipish israelitacunaca carpa huasicunapi saquirishpami mana rijcuna carca. Pero pꞌuyu anchurijpica paicunaca rijcunallami carca. 23 Israelitacunaca Jehová Dios mandajpimi carpa huasicunapi saquirijcuna carca. Shinallataj Jehová Dios mandajpimi rijcuna carca. Paicunaca Jehová Dios Moisesman mandashca shinami Jehová Diosta cazurcacuna.

10 Chai qꞌuipami Jehová Diosca Moisestaca cashna nirca: 2 “Cullquimanta ishqui trompetacunata rurai. Chaicunataca martillohuan labrashpa rurai. Chai trompetacunaca israelitacunata tandachingapaj, carpa huasicunata pascachun huillangapajmi canga. 3 Ishqui trompetacunapi tocajpica tucui israelitacunami tandanacuna carpa huasi yaicunapi canhuan tandanacuna can. 4 Shuj trompetallapi tocajpica 1.000 israelitacunata pushajcunallami canhuan tandanacungacuna.

5 Trompetapi cutin cutin asha asha tocajpica inti llujshin ladoman cajcunami rina can. 6 Trompetapi cutin cutin asha asha tocashcata cutinllataj uyashpaca ura ladoman cajcunami rina can. Quimsa grupo familiacuna cada ritami trompetapica chashna tocana can.

7 Israelitacunata tandachingapajca trompetacunapimi tocana can. Pero mana cutin cutin asha asha tocanachu can. 8 Aaronpaj churi sacerdotecunami trompetacunapica tocana can. Cai leytaca cancunapish, cancunapaj huahua huahuacunapishmi siempre pajtachina canguichij.

9 Cancunapaj allpapi cajpi cancunapaj contracuna llaquichijpica macanacunaman ringapajmi trompetacunapi tocana canguichij. Chashnami Jehová Diosca cancunata yuyarishpa cancunapaj contracunamanta quishpichinga.

10 Shinallataj cushicuna punllacunapi, fiesta punllacunapi, quilla callari punllacunapi, cancunapaj rupachishca ofrendacunata cushpa, Dioshuan alli tucungapaj sacrificiocunata cushpami trompetacunapica tocana canguichij. Chai trompetacunapi tocashcata uyashpami cancunapaj Diosca cancunata yuyaringa. Ñucaca cancunapaj Jehová Diosmi cani” nircami.

11 Ishqui huatapi, segundo quillapaj 20 punllapimi Leyta huaquichina arcata churashca Diospaj carpa huasi jahuamanta pꞌuyu anchurirca. 12 Chashnami israelitacunaca Sinaí chaquishca pambamantaca ima shina rina cashca shinallataj ordenpi llujshi callarircacuna. Pꞌuyuca Parán chaquishca pambapimi saquirirca. 13 Chashnami israelitacunaca Jehová Dios Moisesman mandashcata cazushpa punta cutin llujshircacuna.

14 Puntaca Judapaj huahua huahuacunapaj quimsa familiacunami grupo grupopi llujshircacuna. Chai grupota pushajca Aminadabpaj churi Nahsonmi carca. 15 Isacarpaj huahua huahuacunapaj familiata pushajca Zuarpaj churi Netanelmi carca. 16 Cutin Zabulonpaj huahua huahuacunapaj familiata pushajca Helonpaj churi Eliabmi carca.

17 Diospaj carpa huasita pascajpica guersonitacunapish, meraritacunapishmi llujshircacuna. Paicunami Diospaj carpa huasitaca apajcuna carca.

18 Chai qꞌuipaca Rubenpaj huahua huahuacunapaj quimsa familiacunami grupo grupopi llujshircacuna. Chai grupota pushajca Sedeurpaj churi Elizurmi carca. 19 Simeonpaj huahua huahuacunapaj familiata pushajca Zurisadaipaj churi Selumielmi carca. 20 Cutin Gadpaj huahua huahuacunapaj familiata pushajca Deuelpaj churi Eliasafmi carca.

21 Chai qꞌuipaca cohatitacunami llujshircacuna. Paicunami Diospaj carpa huasipi imalla tiyashcata apajcuna carca. Paicuna chayangapajca Diospaj carpa huasica ñami shayachishca cana carca.

22 Chai huashaca Efrainpaj huahua huahuacunapaj quimsa familiacunami grupo grupopi llujshircacuna. Chai grupota pushajca Amihudpaj churi Elisamami carca. 23 Manasespaj huahua huahuacunapaj familiata pushajca Pedahzurpaj churi Gamalielmi carca. 24 Cutin Benjaminpaj huahua huahuacunapaj familiata pushajca Guideonipaj churi Abidanmi carca.

25 Chai qꞌuipaca Danpaj huahua huahuacunapaj quimsa familiacunami grupo grupopi llujshircacuna. Paicunaca caishuj grupocunata cuidangapajmi tucuicunapaj qꞌuipa llujshircacuna. Chai grupota pushajca Amisadaipaj churi Ahiezermi carca. 26 Aserpaj huahua huahuacunapaj familiata pushajca Ocranpaj churi Paguielmi carca. 27 Cutin Neftalipaj huahua huahuacunapaj familiata pushajca Enanpaj churi Ahirami carca. 28 Israelitacunapish, paicunapaj chꞌicanyachishca grupocunapish rishpaca chai ordenpimi llujshijcuna carca.

29 Chai qꞌuipami Moisesca paipaj suegro Reuelpaj* churi Hobabtaca: “Ñucanchijca Jehová Dios ‘Ñucami cancunaman cusha’ nishca lugarmanmi ricunchij. Shinaca ñucanchijhuan jacu, cantaca allimi tratashun. Jehová Diosca israelitacunamanca alli cosascunatami cusha nishca” nirca. Moisespaj suegroca Madián llajtamantami carca. 30 Pero Hobabca: “Mana rishachu. Ashtahuanpish ñuca llajtaman, ñuca familiacuna maipi cashcamanmi tigrasha” nircami. 31 Chaimi Moisesca cashna nirca: “Ñucanchijtaca ama saquihuaichu. Canmi chaquishca pambapica maipi saquirina cashcata yachangui. Ñucanchij maita rinatapishmi ricuchi tucungui.* 32 Ñucanchijhuan rishpaca Jehová Dios ñucanchijta bendiciajpica canpishmi chai bendicioncunata chasquingui” nircami.

33 Chaimi paicunaca Jehová Diospaj urcumanta rishpa quimsa punllacunata purircacuna. Paicuna maipi samarinata japingacamami quimsa punllacunata puricushpaca Jehová Dioshuan ari ninacushca arcataca paicunapaj ñaupajpi apashpa rircacuna. 34 Paicuna samaricushca lugarmanta rijpica Jehová Diospaj pꞌuyuca punllaca paicunapaj jahuapimi carca.

35 Arcata apashpa rijpica Moisesca: “Jehová Dioslla, jatari. Cambaj contracunataca caita chaita cachapai. Canta pꞌiñajcunaca canmanta miticushpa richunllacuna” nijmi carca. 36 Cutin Arcata uriyachijpica: “Jehová Dioslla, achca huaranga huaranga israelitacunapajman tigramupailla” nijmi carca.

11 Israelitacunaca llaquinaita causacushca shinami Jehová Diospaj ñaupajpi quejari callarircacuna. Jehová Dios chaita uyashpaca achcatami pꞌiñarirca. Chaimantami Jehová Diosca paicunamanca ninata cacharca. Chai ninami carpa huasicuna canllaman caj huaquin runacunata rupachirca. 2 Israelitacunaca ayudachun nishpami Moisesta rogarircacuna. Chaimi Moisesca Jehová Diosta rogarishpa mañarca. Shina mañajpimi ninaca huañurca. 3 Chai lugartaca Taberá* nishpami shutichircacuna. Chaipimi Jehová Diosca paicunamanta huaquin runacunataca ninahuan rupachishpa huañuchishca carca.

4 Israelitacunahuanca shujtaj llajtacunamanta tucui laya achca gentecunami carca. Chai gentecunaca alli micunata micuna yuyaillami carcacuna. Chaimi israelitacunapish cutinllataj huacai callarishpaca cashna nircacuna: “¿Micungapajca pitaj aichata cungari? 5 ¡Egipto llajtapica pescadotapish, pepinotapish, sandiatapish, puerrostapish,* cebollatapish, ajostapish gratismi micuj carcanchij. Chaitaca manataj cungarinchijchu! 6 Pero cunanca librimi irquiyacunchij. Caipica cai maná shuti micunallatami charinchij” nircacunami.

7 Cierto, maná shuti micunaca culantro* muyu shinami carca. Bedelio shinapishmi carca. 8 Gentecunaca chaita tandanaman rishpami cutana rumicunapi cutajcuna carca. Mana cashpaca shuj mortero rumipimi ñutujcuna carca. Chai qꞌuipaca mangacunapimi yanujcuna carca. Mana cashpaca redondo tandacunatami rurajcuna carca. Maná shuti micunaca aceitehuan rurashca mishquijlla galleta shinami carca. 9 Israelitacuna maipi cashcapi shulla tamya tuta urmajpica maná shuti micunapishmi urmaj carca.

10 Moisesca tucui gentecuna huacacujtami uyarca. Cada familia, cada runami paicunapaj carpa huasi yaicunapi huacacurcacuna. Chaimi Jehová Diosca paicunahuanca achcata pꞌiñarirca. Moisespishmi paicunahuanca yallitaj pꞌiñarirca. 11 Chaimantami Moisesca Jehová Diostaca cashna nirca: “¿Canta sirvijtaca imamantataj sufrichinguiyari? ¿Imamantataj ñucahuanca pꞌiñarishca canguiyari?* ¿Imamantataj cai tucui pueblota cuidachunca obliganguiyari? 12 ¿Ñucachari cai tucui gentecunapaj mama cani? Canca ‘Paicunataca shuj sirvij runa chuchucuj huahuata marcashpa apaj shina* marcashpa apai’ ninguimi. ¿Paicunapaj ñaupa yayacunaman cushami nishpa can jurashca allpaman pushangapajca ñucachari paicunataca huacharcani? 13 ¿Cai tucui gentecunaman carangapajca maimantataj aichataca llujshichishari? Paicunaca ñuca ñaupajpimi huacashpa catincuna. ‘¡Micungapaj aichata cui!’ nishpami catincuna. 14 Ñucallaca cai tucui gentecunataca mana cuidai tucunichu. Ñucapajca caica dimastij sinchimi can. 15 Ñucata can chashna tratana cashpaca cunanllataj huañuchihuai. Pero cambaj ñaupajpi alli ricurishca cajpica cai llaquita apachunca ama saquihuaichu” nircami.

16 Jehová Diosca Moisestaca cashnami nirca: “Israelitacunapuramanta 70 pushajcunata* tandachi. Paicunaca can agllashca pushajcuna, autoridadta charijcunami cana can. Paicunataca tandanacuna carpa huasiman pushai. Paicunaca chaipimi canhuan saquiringacuna. 17 Chaimi ñucaca canhuan chaipi parlangapaj uriyasha. Canpi caj asha espirituta japishpami chai runacunapi churasha. Paicunami ama can solo cai sinchi trabajota rurachunca cai tucui gentecunata cuidashpa ayudanga. 18 Gentecunataca cashnami nina cangui: ‘Cayapajca chuyayarichij, cayaca ciertotajmi aichata micunguichij. Cancunaca: “¿Micungapajca pitaj aichata cungari? Egipto llajtapica allimi causarcanchij” nishpami huacacunguichij. Chashna huacacujtami Jehová Diosca uyashca. Chaimantami Jehová Diosca cancunamanca aichata cugrin, chaitami micunguichij. 19 Aichataca mana shuj punllallata, ishqui punllallata, pichca punllallata, chunga punllallata, veinte punllallata micunguichijchu. 20 Ashtahuanpish chai aichataca shuj quilla jundatami micunguichij. Singaman llujshingacama, millanayachingacamami micunguichij. Cancunaca cancunapurapi causaj Jehová Diostami saquircanguichij. Paipaj ñaupajpi huacashpami: “¿Ima nishpataj Egipto llajtamantaca llujshircanchijyari?” nircanguichij’ ningui” nircami.

21 Chaimi Moisesca cashna nirca: “Ñucahuan caj gentecunapurapica 600.000 cꞌaricunami tiyan. ¿Chashna jahuachu canca ‘Shuj quilla jundata micuchunmi suficiente aichata cusha’ ningui? 22 Achca ovejacunata, achca huagracunata huañuchijpipish, ¿paicunapajca suficientechari canga? O mama cuchamanta tucui pescadocunata japijpipish, ¿paicunapajca suficientechari canga?” nircami.

23 Chashna nijpimi Jehová Diosca Moisestaca: “¿Manachu Jehová Diospaj maquica chaita rurai tucunga? Cunanmi ñuca ima nishca pajtarijta o mana pajtarijta ricungui” nirca.

24 Chaimi Moisesca llujshishpa Jehová Dios imata nishcata israelitacunaman huillarca. Shinallataj israelitacunata pushajcunamanta 70 runacunata tandachishpami paicunataca tandanacuna carpa huasi muyundijpi churarca. 25 Chai qꞌuipami Jehová Diosca pꞌuyupi uriyamushpa Moiseshuan parlarca. Moisespi caj asha espirituta japishpami 70 pushajcunapaj jahuapi churarca. Chai runacunapaj jahuapi espíritu cajpimi paicunaca profetacuna shina rimai* callarircacuna. Pero chai cutinllami chashna rurarcacuna.

26 Shinapish paicunapuramanta ishqui runacunaca carpa huasicuna maipi cashcallapitajmi saquirishcacuna carca. Paicunaca Eldad, Medad shuti runacunami carca. Paicunapaj shuticunapish anotashca cajpipish tandanacuna carpa huasimanca mana rishcacunachu carca. Shinapish Diospaj espirituca paicunapajmanpishmi shamurca. Chaimi paicunaca carpa huasicuna maipi cashcapica profetacuna shina rimai callarircacuna. 27 Chaimi shuj jovenca Moisesman huillanaman callpashpa rirca. Paica: “¡Eldadpish, Medadpish carpa huasicuna maipi cashcapica profetacuna shinami rimacuncuna!” nircami. 28 Shina nijpimi Nunpaj churi Josueca: “¡Ñuca amito Moisés, paicunata jarcai!” nirca. Josueca jovenmantami Moisesta ayudaj carca. 29 Pero Moisesca: “¿Ñucamantachu sustaringui? Ama sustarichu. ¡Ñucaca Jehová Diospaj pueblomanta tucuicuna profetacuna cachunmi munaiman. Shinallataj Jehová Dios tucuicunaman paipaj espirituta cuchunmi munaiman!” nircami. 30 Chai qꞌuipami Moisesca carpa huasicuna maipi cashcaman israelitacunata pushajcunahuan tigrarca.

31 Chai qꞌuipami Jehová Diosca huairata jatarichishpa codornizcunataca mama cuchamanta carpa huasicuna muyundijpi urmachun saquirca. Chai codornizcunaca pambataca casi shuj metro* altotami taparca. Tucui carpa huasicuna muyundijtami shuj ladomanca shuj punllata purina shina, caishuj ladomanpish shuj punllata purina shina carca. 32 Chaimi gentecunaca tucui chai punlla, tucui tuta, cayandij punllapish tucui punlla codornizcunata japishpa saquirircacuna. Chunga homermanta* menostaca ni maijan mana japircachu. Chashna rurashpaca carpa huasicuna muyundijpimi tindishpa chaquichircacuna. 33 Pero aichata paicunapaj shimipi* charicujpiraj, manaraj tucui cashtujpimi Jehová Diosca gentecunahuan pꞌiñarirca. Chaimi Jehová Diosca jatun llaquita cachashpa achcacunata huañuchirca.

34 Chaimantami chai lugartaca Quibrot-Hataavá nishpa shutichircacuna. Chaipimi alli micunata micuna yuyailla caj gentecunataca pambarcacuna. 35 Chai qꞌuipami gentecunaca Quibrot-Hataavamanta llujshishpaca Hazerotman rircacuna. Paicunaca Hazerotpimi saquircacuna.

12 Moisesca Cus llajtamanta huarmihuanmi cazarashca carca. Chaimantami Miriampish, Aaronpish Moisespaj contra rimai callarircacuna. 2 Paicunaca: “¿Jehová Diosca Moisesllahuanchu parlan? ¿Manachu ñucanchijhuanpish parlan?” nircacunami. Jehová Diosca paicuna ima nishcatami uyacurca. 3 Moisesca allpapi causaj tucui gentecunamantaca ashtahuan manso* runami carca.

4 Ñapishmi Jehová Diosca Moisesta, Aaronta, Miriamtaca: “Cancunaca tandanacuna carpa huasiman quimsandij richij” nirca. Chaimi quimsandij rircacuna. 5 Chai qꞌuipami Jehová Diosca shayacuj jatun pꞌuyupi uriyamushpa tandanacuna carpa huasi yaicunapi saquirirca. Chaimantaca Aaronta, Miriamtami cayarca. Chashna cayajpimi ishquindij cꞌuchuyarcacuna. 6 Chai huashami Diosca cashna nirca: “Ñuca nishcata uyapaichij. Cancunapurapi Jehová Diospaj shuj profeta tiyajpica ñuca pi cashcataca shuj muscuipi shinami paimanca huillaiman. Paihuanca shuj muscuipimi parlaiman. 7 ¡Pero ñucata sirvij Moiseshuanca mana chashna ruranichu! Paimanca tucui ñuca pueblo Israeltami mingashcani.* 8 Paihuanca ñahui ñahuimi parlani. Imata mana pacashpami tucuita huillani. Paica Jehová Dios ima shina cashcatami ricun. Shinaca ¿ima nishpataj ñucata sirvij Moisespaj contra rimanataca mana mancharcanguichij?” nircami.

9 Chaita nishpami Jehová Diosca paicunahuan pꞌiñarishpa chaimanta rirca. 10 Pꞌuyupish tandanacuna carpa huasimanta anchurircallami... cutin Miriampaj tucui cuerpopica lepra ungüimi ricurirca. Chai lepraca rasu shinami yurajlla carca. Aarón tigrarishpaca Miriamtaca lepra ungüihuan cajtami ricurca. 11 Chai ratomi Aaronca Moisestaca cashna nirca: “¡Ñuca amitolla, caitami rogapani! Caitaca yuyai illajcuna shinamari rurashcanchij. ¡Cai juchamantaca ama castigapaichu! 12 ¡Paitaca chaupi cuerpo ismushca huañushca huahua huacharishca shina cachunca ama saquipaichu!” nircami. 13 Chaimi Moisesca Jehová Diostaca: “¡Ñuca Dioslla! ¡Paitaca alliyachipai!” nishpa rogarirca.

14 Jehová Diosca Moisestaca: “Paipaj yaya ñahuipi chꞌucajpica, ¿manachu paica canchis punllacunata pingaipi saquirinman? Shinaca carpa huasicunamanta canllaman canchis punllacunata cuarentenapi saquirichun. Chai qꞌuipami paica cutin yaicui tucunga” nircami. 15 Chaimi Miriamca carpa huasicunamanta canllaman canchis punllacunata cuarentenapi pasarca. Israelitacunaca Míriam cutin tigrangacamami carpa huasicunataca mana pascarcacuna. 16 Chai qꞌuipami israelitacunaca Hazerotmanta rishpaca Parán chaquishca pambapi paicunapaj carpa huasicunata shayachishpa saquirircacuna.

13 Jehová Diosca Moiseshuanmi parlarca. Paitaca cashnami nirca: 2 “Israelitacunaman ñuca cugrishca Canaán allpata pacalla ricunaman richunca paicunapaj yayacunapaj cada familiamanta shuj pushaj runata agllashpa cachai” nircami.

3 Chaimi Moisesca Jehová Dios mandajpi paicunataca Parán chaquishca pambamanta cacharca. Tucui chai cꞌaricunaca israelitacunata pushajcunami carca. 4 Paicunapaj shuticunaca caicunami can: Rubenpaj familiamantaca Zacurpaj churi Samúa, 5 Simeonpaj familiamantaca Horipaj churi Safat, 6 Judapaj familiamantaca Jefunepaj churi Caleb, 7 Isacarpaj familiamantaca Josepaj churi Igal, 8 Efrainpaj familiamantaca Nunpaj churi Hosea, 9 Benjaminpaj familiamantaca Rafupaj churi Paltí, 10 Zabulonpaj familiamantaca Sodipaj churi Gadiel, 11 Josepaj churi Manasespaj familiamantaca Susipaj churi Gaddí, 12 Danpaj familiamantaca Guemalipaj churi Amiel, 13 Aserpaj familiamantaca Miguelpaj churi Setur, 14 Neftalipaj familiamantaca Vofsí runapaj churi Nahbí, 15 Gadpaj familiamantaca Makí runapaj churi Gueuel runami can. 16 Moisesca cai runacunatami allpata pacalla ricunaman richun cacharca. Moisesca Nunpaj churi Hoseataca Josué* shutitami churarca.

17 Moisesca Canaán allpata pacalla ricunaman cachagrishpaca paicunataca cashnami nirca: “Neguebman huichiyaichij. Chai qꞌuipaca urcucunaman huichiyaichij. 18 Chai allpa ima shina cashcata ricuichij. Chaipi causaj gentecunapish sinchi o débil cajta, ashacunalla o achcacuna cajta ricuichij. 19 Alli allpa cashcata o mana alli allpa cashcata ricuichij. Paicuna causashca llajtacunapish muyundijta pircashca cashcata o mana muyundijta pircashca cashcata ricuichij. 20 Alli pꞌucuj allpa cashcata o mana pꞌucuj allpa cashcata ricuichij. Chaipi yuracuna tiyashcata o mana tiyashcata ricuichij. Cancunaca mana manchajmi cana canguichij. Chai allpapi pꞌucushca huaquin granocunatami apamuna canguichij” nircami. Chai punllacunaca punta pꞌucushca uvacunata cosechana punllacunami carca.

21 Chaimi paicunaca huichiyarcacuna. Chai allpataca Zin nishca chaquishca pambamanta callarishpaca Rehobcamami pacalla ricurcacuna. Rehobca Lebó-Hamat cꞌuchullapimi* carca. 22 Neguebman paicuna huichiyashpaca Hebronmanmi chayarcacuna. Chaipimi Anacpaj huahua huahuacunamanta Ahimán, Sesái, Talmái shuti runacuna causarcacuna. Hebrón llajtataca Egiptopi saquirij Zoan llajtapaj canchis huatacunahuan ñaupami shayachishcacuna carca. 23 Escol pugru pambaman chayashpaca shuj racimo uvatami ramandijta pꞌitircacuna. Chai racimotaca ishqui runacunami caspipi huandushpa aparcacuna. Shinallataj huaquin granadacunata,* higocunatami aparcacuna. 24 Israelitacuna chai lugarpi racimo uvata pꞌitishcamantami chai lugartaca Escol* pugru pamba nishpa shutichircacuna.

25 Paicunaca 40 punllacunapimi allpata pacalla ricushpa tigrarcacuna. 26 Moisés, Aarón, tucui israelitacuna maipi cashcamanmi rircacuna. Paicunaca Cadespi saquirij Parán chaquishca pambapimi carcacuna. Chaipimi tucui gentecunaman imata ricushcata huillarcacuna. Chai allpapi pꞌucushca granotapishmi ricuchircacuna. 27 Moisesmanca caitami nircacuna: “Can ricunaman cachashca allpamanmi yaicurcanchij. Chai allpapica ciertotajmi achca leche, achca miel tiyan. Caimi chai allpapi pꞌucushca granoca. 28 Shinapish chai allpapi causajcunaca sinchi runacunami can. Muyundijta pircashca llajtacunapish jatun llajtacunami can. Chaipica Anacpaj huahua huahuacunatapishmi ricurcanchij. 29 Négueb allpapica amalequitacunami causan. Urcucunapica hititacuna, jebuseocuna, amorreocunami causan. Cutin mama cucha ladopi, Jordán jatun yacu uripica cananeocunami causan” nircacunami.

30 Chaimi Calebca Moisespaj ñaupajpi caj gentecuna calmarichunca: “Cai rato huichiyashunchij. Ñucanchijmi chai allpataca japishun. Chai gentecunataca mishashuntajmi” nirca. 31 Pero Calebhuan huichiyaj runacunaca: “Chai gentecunahuanca mana macanacui tucushunchu. Paicunaca ñucanchijtapish yalli sinchi runacunami can” nircacunami. 32 Chai runacunaca paicuna pacalla ricunaman rishca allpamantaca israelitacunamanca mana allicunallatami huillashpa catircacuna. Paicunaca cashnami nircacuna: “Pacalla ricunaman rishca allpaca chaipi causaj gentecunata millpuj allpami. Chaipi causaj gentecunapish yallitaj jatun runacunami. 33 Chaipica Anacpaj huahua huahuacunata, jatun runacunatami* ricurcanchij. Paicunaca nefilimcunapaj huahua huahuacunamantami can. Ñucanchijca paicunahuan ricunapajca saltamontecuna shinallami carcanchij. Paicunapaj ñahuipica chashnatajmi ricurircanchij” nircacunami.

14 Chai qꞌuipami tucui gentecunaca sinchita caparircacuna. Paicunaca tucui tutami caparirishpa huacarcacuna. 2 Tucui israelitacunami Moisesmanta, Aaronmanta quejarishpa paicunapaj contra rimai callarircacuna. Paicunaca cashnami nircacuna: “¡Egipto llajtapi huañushca cashpachari alli canchijman carca! ¡Cai chaquishca pambapi huañushca cashpachari alli canchijman carca! 3 ¿Jehová Diosca imapajtaj ñucanchijtaca cai allpaman pushamushcari? ¿Espadahuan huañuchichunchu pushamushca? Ñucanchij huarmicunatapish, ñucanchij huahuacunatapish prezumi apangacuna. ¿Manachu Egipto llajtaman tigrana alli canga?” nircacunami. 4 Paicunapura caishuj chaishuj parlanacushpaca: “¡Shuj pushajta agllashpa Egipto llajtaman tigrashunchij!” nircacunami.

5 Chaita uyashpami Moisespish, Aaronpish chaipi tandanacushca tucui israelitacunapaj ñaupajpi pambacama cumurircacuna. 6 Nunpaj churi Josuepish, Jefunepaj churi Calebpishmi chai allpata pacalla ricunaman rijcunapurapi carca. Paicunaca paicunapaj ropacunata lliquirishpami 7 tucui israelitacunataca cashna nircacuna: “Pacalla ricunaman rishca allpaca yallitaj alli allpami. 8 Jehová Diosca paipaj ñaupajpi ñucanchijcuna alli ricurijpica chai allpaman pushashpami chai allpataca ñucanchijman cunga. Chai allpapica achca leche, achca mielmi tiyan. 9 Pero Jehová Diospaj contraca ama tucuichijchu. Chai llajta gentecunatapish ama manchaichijchu, paicunataca jahuallami mishashun.* Jehová Diosca ñucanchijhuanmi, paicunataca pi mana ayudanchu. Ama manchaichijchu” nircacunami.

10 Chashnapish tucui gentecunami paicunataca rumicunahuan shitanata yuyarcacuna. Pero tandanacuna carpa huasi jahuapimi tucui israelitacunapaj ñaupajpi Jehová Diospaj sumaj achijnicuj ricurirca.

11 Chai qꞌuipami Jehová Diosca Moisestaca cashna nirca: “¿Cai puebloca ima horacamataj ñucataca mana respetangacuna? ¿Paicunapaj ñaupajpi tucui milagrocunata* rurashca jahuapish ima horacamataj ñucapica feta mana churangacuna? 12 Paicunataca shuj millai ungüihuanmi llaquichigrini. Paicunataca tucuchishatajmi. Canmantami paicunatapish yalli shuj jatun llajtata, paicunatapish yalli ashtahuan poderta charij llajtata rurasha” nircami.

13 Pero Moisesca Jehová Diostaca cashnami nirca: “Canmi cai pueblotaca Egiptomanta cambaj poderhuan llujshichircangui. Paicunata can llaquichijpica egipciocuna uyashpami 14 cai allpapi causaj gentecunaman huillangacuna. Paicunapishmi can Jehová Dios cai pueblohuan cashcata, cai pueblo gentecunaman can ñahui ñahui ricurishcatapish uyashcacuna. Canca Jehová Diosmi cangui, cambaj pꞌuyuca paicunapaj jahuapimi can. Canca punllaca shayacuj jatun pꞌuyupi, tutaca jatun lunyacuj ninapimi paicunata ñaupashpa ringui. 15 Tucui cai pueblota chai ratollataj* can huañuchijpica canmanta uyaj llajtacunapi causajcunaca cashnami ningacuna: 16 ‘Jehová Diosca cai gentecunataca pai cushami nishpa jurashca allpamanca mana pushai tucurcachu. Chaimantami paicunataca chaquishca pambapi huañuchirca’ ningacunami. 17 Cunanca Jehová Dioslla, can nishca shina cambaj jatun poderta ricuchi. Canca cashnami nircangui: 18 ‘Jehová Diosmi cani. Ñucaca pacienciata charij,* achcata cꞌuyaj,* pandarishcacunata perdonaj, juchacunatapish perdonaj Diosmi cani. Pero culpata charijtaca sin castigoca manataj saquinichu. Yayacuna pandarishcamantaca paicunapaj huahuacunata, paicunapaj nietocunata, paicunapaj bisnietocunatapishmi castigani’ nircanguimi. 19 Cai pueblotaca achcatami cꞌuyangui. Chaimanta Egipto llajtapi cashca horamanta cunancama perdonashca shinallataj paicunapaj pandarishcacunata perdonapai” nircami.

20 Shina nijpimi Jehová Diosca cashna nirca: “Can mañashca shinallatajmi paicunataca perdonani. 21 Chashnapish ñuca causacushca shinallatajmi jurani, allpapica tucui ladocunapimi Jehová Diospaj sumaj achijnicujta ricungacuna. 22 Ñucaca Egipto llajtapipish, chaquishca pambapipishmi milagrocunata rurarcani. Pero chai milagrocunata ricushpapish, ñuca sumaj achijnicujta ricushpapish cai chunga cutinhuanmi ñucataca pruebapi churashpa catishcacuna. Ñuca nishcatapish mana uyashcacunachu. Chai runacunamantaca ni maijan 23 paicunapaj yayacunaman cushami nishpa jurashca allpataca mana nunca ricungachu. Ñucata mana respetajcunaca ni maijan mana ricungachu. 24 Pero ñucata sirvij Calebca paicuna shina mana cashcachu. Paica tucui shunguhuanmi ñucata cazushca. Chaimantami paitaca pai ricunaman rishca allpaman pushasha. Paipaj huahua huahuacunami chai allpataca dueñoyangacuna. 25 Pugru pambapi amalequitacunapish, cananeocunapish causacushcamantaca cayaca tigrashpa richij. Puca mama cucha ñanta catishpa chaquishca pambaman richij” nircami.

26 Chai qꞌuipami Jehová Diosca Moisestapish, Aarontapish cashna nirca: 27 “¿Cai millai gentecunaca ima horacamataj ñucamantaca quejarishpa catingacunari? Israelitacuna ñucamanta imata nishcataca uyashcanimi. 28 Paicunataca cashna ningui: ‘¡Jehová Diosca cashnatajmi nin: Ñuca causacushca shinatajmi jurani. Cancuna imata nishcata ñuca uyashca shinami rurasha! 29 Cai chaquishca pambapimi cancunaca huañunguichij. Ari, tucui cancunami huañunguichij. 20 huatacunata o ashtahuan huatacunata charijcuna ña registrashcacunaca ñucamanta quejarijcunaca tucuicunami huañunguichij. 30 Chaipimi causanguichij nishpa ñuca jurashca allpamanca ni maijan mana yaicunguichijchu. Jefunepaj churi Calebhuan, Nunpaj churi Josuellahuanmi yaicungacuna.

31 Cancunaca ñucanchij huahuacunataca prezuta shinami apangacuna nircanguichijmi. Paicunatami cancuna mana yaicusha nishca allpamanca pushasha. Paicunami chai allpataca rijsingacuna. 32 Pero cancunaca cai chaquishca pambapimi huañunguichij. 33 Cancunapaj huahuacunaca chaquishca pambapimi 40 huatacunata michijcuna canga. Paicunaca cancuna ñuca ñaupajpi juchata rurashcamantami* pagangacuna. Cai chaquishca pambapi tucui cancunacuna huañungacamami pagangacuna. 34 Cancunaca 40 punllacunatami chai allpataca pacalla ricunaman rircanguichij. Chaimantami cancuna pandarishcamantaca 40 huatacunata paganguichij. Shuj punllamanta shuj huatata, shuj punllamanta shuj huatatami paganguichij. Chashnami ñucapaj contra tucushcamanta ima tucuna cashcata yachanguichij.

35 Ñuca, Jehová Diosmi caita nishcani. Cai millai gentecunahuan, ñucapaj contra tucujcunahuanca caitami rurasha: paicunaca cai chaquishca pambapimi tucuringacuna, caipimi huañungacuna. 36 Chai allpata pacalla ricunaman Moisés cachashca runacuna tigrashpaca chai allpamantaca mana allicunatami huillarcacuna. Chaimantami tucui gentecunaca paimanta quejarircacuna. 37 Chai runacunaca chai allpamanta mana allicunata huillashcamantami castigashca cangacuna. Paicunaca Jehová Diospaj ñaupajpimi huañungacuna. 38 Pero Nunpaj churi Josuepish, Jefunepaj churi Calebpish causashpami catingacuna. Paicunapishmi chai allpata pacalla ricunaman rijcunapurapi carcacuna’ ningui” nircami.

39 Tucui israelitacunaman Moisés chaita huillajpimi gentecunaca yallitaj llaquilla carcacuna. 40 Paicunaca utca jatarishpami urcu jahuaman huichiyashun nircacuna. Paicunaca: “Ñucanchijca juchatami rurashcanchij. Pero cunanca Jehová Dios cusha nishca allpaman huichiyangapajca listomi canchij” nircacunami. 41 Pero Moisesca cashnami nirca: “¿Jehová Dios mandashcataca imamantataj mana cazunguichij? Cancuna imata rurasha nicushcaca mana alli llujshingachu. 42 Ama huichiyaichijchu, Jehová Diosca mana cancunahuanchu. Cancunapaj contracunami cancunataca mishanga. 43 Amalequitacunapish, cananeocunapish cancunahuan macanacungapajmi chaipi can. Cancunataca espadahuanmi huañuchingacuna. Jehová Diosta mana cazushcamantami Jehová Diospish cancunahuanca ña mana canga” nircami.

44 Chashnapish paicunaca urcu jahuamanmi huichiyarcacuna. Pero Jehová Dioshuan ari ninacushca arcapish, Moisespish carpa huasicuna chaupillapitajmi saquirirca. 45 Chai qꞌuipaca chai urcupi causaj amalequitacunapish, cananeocunapishmi uriyarcacuna. Paicunaca israelitacunahuan macanacushpami misharcacuna. Israelitacunataca Hormá nishcacamami caita chaita cacharcacuna.

15 Jehová Diosca Moiseshuan cutin parlashpaca cashnami nirca: 2 “Israelitacunahuan parlai. Paicunataca cashna ningui: ‘Cancuna causachun ñuca cugrishca allpaman chayashpaca 3 ninahuan rupachishca ofrendata shina Jehová Diosman cungapajmi cancunapaj huagracunamanta, cancunapaj ovejacunamanta o chivocunamanta shujta apamui tucunguichij. Rupachishca ofrenda cajpipish o shujtaj ofrenda cajpipish, imata ari nishcata pajtachingapaj ofrenda cajpipish, shungumanta cushca ofrenda cajpipish o fiesta punllacunapi cushca ofrenda cajpipish apamui tucunguichijmi. Chaica Jehová Diosman cushca mishquijllata ashnacuj ofrendami canga. 4 Paipaj ofrendata cujca grano ofrendatapishmi Jehová Diosman cuna can. Chai grano ofrendaca shuj litro* aceitehuan chagrushca ishqui libra yalli* alli* harinami cana can. 5 Shinallataj shuj litro vino ofrendatami* cuna cangui. Chaitaca rupachishca ofrendandijmi cuna cangui, mana cashpaca cada malta ovejata huañuchingapajmi cuna cangui. 6 Shuj carnerota cushpaca shuj grano ofrendatapishmi cuna cangui. Chai ofrendaca shuj litro yalli* aceitehuan chagrushca chuscu libra yalli* alli harinami cana can. 7 Shinallataj shuj litro yalli vinotami cuna cangui. Chaitaca Jehová Diosman cushca mishquijllata ashnacuj vino ofrendata shinami cuna cangui.

8 Pero Jehová Diosman rupachishca ofrendata shina o ari nishcata pajtachingapaj ofrendata shina o Dioshuan alli tucungapaj ofrendata shina shuj torota cushpaca 9 chai torohuanca grano ofrendata shinami casi ishqui litro* aceitehuan chagrushca canchis libra yalli* alli harinata cuna cangui. 10 Shinallataj casi ishqui litro vinotami cuna cangui. Chaica Jehová Diosman cushca ninahuan rupachishca, mishquijllata ashnacuj ofrendami canga. 11 Cada toromanta, cada carneromanta, cada malta ovejamanta o cada cꞌari chivomantami chashna rurana can. 12 Mashna animalcunata cushpapish cada animalmantami chashna rurana can. 13 Chashnami israelitacunaca Jehová Diosman cushca ninahuan rupachishca, mishquijllata ashnacuj ofrendata cuna can.

14 Shujtaj llajtamanta runa cancunahuan causacushpa o maijan ña achca huatacunata cancunapurapi causacushpa Jehová Diosman cushca ninahuan rupachishca, mishquijllata ashnacuj ofrendata cusha nishpaca cancuna shinallatajmi rurana can. 15 Cancunapish, cancunapurapi causaj shujtaj llajtamanta runapish shuj leyllatami charinguichij. Cai leytaca cancunapish, cancunapaj huahua huahuacunapishmi siempre pajtachina canguichij. Shujtaj llajtamanta shamushca runapish Jehová Diospaj ñaupajpica cancuna shinallatajmi canga. 16 Cancunapajpish, cancunahuan causaj shujtaj llajtamanta runapajpish shuj leyllami* tiyana can. Tucuicunami chai shinallataj juzgashca cangacuna’ ningui” nircami.

17 Chai qꞌuipami Jehová Diosca Moisestaca cashna nirca: 18 “Israelitacunahuan parlai. Paicunataca cashna ningui: ‘Ñuca pushacushca allpaman cancuna yaicushpa, 19 chai allpapi pꞌucushca granota micushpaca Jehová Diosmanmi shuj ofrendata cuna canguichij. 20 Cancuna cutashca punta racu harinamanta roscas tandata rurashpami ofrendata cuna canguichij. Chaitaca trillana pambamanta cushca ofrendata shinallatajmi cuna canguichij. 21 Cancunapaj punta cutashca racu harinamantaca ashatami Jehová Diosman shuj ofrendata shina siempre cuna canguichij.

22 Shinapish cancuna pandarishpa, Jehová Dios Moisesman cushca cai tucui mandamientocunatapish mana cazushpa, 23 (cai tucui mandamientocunatami Jehová Diosca Moisesman curca. Jehová Dios cushca punllamantami cancunapajpish, cancunapaj huahua huahuacunapajpish carca) 24 mana cuentata cushpa, shujtajcuna mana yachajpi pandarishca cashpaca tucui cancunami shuj malta torota cuna canguichij. Chaica Jehová Diosman cushca mishquijllata ashnacuj rupachishca ofrendami canga. Chai ofrendahuan igualca grano ofrendatapish, vino ofrendatapishmi ima shina rurana cashca shinallataj cuna canguichij. Shinallataj juchamanta ofrendata shinaca shuj malta chivotami cuna canguichij. 25 Sacerdoteca israelitacunapaj juchacuna perdonashca cachunmi chai ofrendacunata cunga. Chashnami paicunaca perdonashca cangacuna. Paicunaca pandarishcamantami Jehová Diosman shuj ofrendata curcacuna. Jehová Diosman cushca ninahuan rupachishca ofrendatapish, juchamanta ofrendatapishmi curcacuna. 26 Tucui israelitacunapish, paicunapurapi causaj shujtaj llajtamanta gentecunapishmi perdonashca cangacuna. Paicunaca tucuicunami pandarircacuna.

27 Maijanpish pandarishpa juchata rurashpaca shuj huatata charij chivatami juchamanta ofrendata shina cuna can. 28 Chai runaca mana munaimantami Jehová Diospaj ñaupajpi juchata rurarca. Sacerdoteca pandarij runapaj jucha perdonashca cachunmi chivataca shuj ofrendata shina cunga. Chashnami chai runaca perdonashca canga. 29 Israelitapajpish, paicunapurapi causaj shujtaj llajtamanta runapajpish mana munaimanta imata rurajpica chai leyllatajmi tiyanga.

30 Pero israelita cashpapish, shujtaj llajtamanta shamushca runa cashpapish quiquin munaimanta imata rurashpaca Jehová Diostami cꞌamicun. Chaimantami paica israelitacunapuramantaca huañuchishca cana can. 31 Paica Jehová Dios nishcacunata mana uyashcamanta, paipaj mandamientota mana cazushcamantami huañunataj can. Chai runaca paipaj culpallamantatajmi castigashca canga’ ningui” nircami.

32 Israelitacunaca chaquishca pambapi cashpaca sábado punllapi shuj runa yantata pallacujtami japircacuna. 33 Yantata pallacujta japijcunaca paitaca Moisespajman, Aaronpajman, tucui israelitacunapajmanmi pusharcacuna. 34 Paihuan imata ruranata manaraj decidishcamantami huichcashpa churarcacuna.

35 Jehová Diosca Moisestaca: “Chai runaca huañunatajmi can. Tucui israelitacunami paitaca carpa huasicunamanta canllaman llujshichishpa rumicunahuan shitana can” nircami. 36 Chashna nijpimi tucui israelitacunaca chai runataca carpa huasicunamanta canllaman llujshichishpa huañungacama rumicunahuan shitarcacuna. Paicunaca Jehová Dios Moisesman mandashca shinami rurarcacuna.

37 Jehová Diosca Moisesmanca caitapishmi nirca: 38 “Israelitacunahuan parlai. Paicunataca cashna ningui: ‘Cancunapish, cancunapaj huahua huahuacunapishmi cancunapaj churana muyundij filopica flecocunata churana canguichij. Chai flecocuna jahuamanca azul puchcatami churana canguichij. 39 Cancunapaj churana muyundij filopi tiyaj flecocunata ricushpami Jehová Diospaj tucui mandamientocunata yuyarishpa cazunguichij. Cancunapaj shungu munashcatapish, ñahui ricushcatapish ama catichijchu. Chaicunata catishpaca shujtaj dioscunatami adoracunguichij.* 40 Cai flecocunami cancunata yuyachinga. Chashnami cancunaca tucui ñuca mandamientocunata cazunguichij, cancunapaj Diospaj ñaupajpipish chuya canguichij. 41 Ñucaca cancunapaj Jehová Diosmi cani. Ñucami cancunataca cancunapaj Dios cangapaj Egipto llajtamanta llujshichircani. Ñucaca cancunapaj Jehová Diosmi cani’ ningui” nircami.

16 Chai qꞌuipami Coré runaca Datanhuan, Abiramhuan, On shuti runahuanpish tandanacurca. Coreca Levipaj huahua huahuacunamantami carca. Levipaj churica Cohat shutimi carca. Cohatpaj churica Izhar shutimi carca. Izharpaj churica Coremi carca. Datán, Abiram, On shuti runaca Rubenpaj huahua huahuacunamantami carcacuna. Datán, Abiramca Eliabpaj churicunami carca. Cutin On shuti runaca Pelezpaj churimi carca. 2 Paicunaca caishuj 250 israelitacunahuanmi Moisespaj contra jatarircacuna. Chai runacunaca israelitacunata pushajcuna, israelitacunapuramanta agllashca runacuna, importante runacunami carca. 3 Paicunaca Moisespaj contra, Aaronpaj contra tandanacushpami: “¡Cancunamantaca ñami shaicushca canchij! Tucui israelitacunami Diospajlla chꞌicanyachishca can. Jehová Diosca paicunapaj chaupipimi. ¿Ima nishpataj cancunaca Jehová Diospaj pueblotaca jatun tucushpa mandacunguichijyari?” nircacuna.

4 Moisés chaita uyashpaca chai ratomi pambacama cumurirca. 5 Chai qꞌuipami paica Coretapish, Coreta apoyaj runacunatapish cashna nirca: “Caya tutamantami Jehová Diosca pi paipaj cashcata, pi paipajlla chꞌicanyachishca cashcata, pi paipajman cꞌuchuyana cashcata ricuchinga. Pitami pai agllan chai runami paipajman cꞌuchuyanga. 6 Caita ruraichij: Corepish, paita tucui apoyaj runacunapish braserillocunata japishpa, 7 chaicunapi ninata japichishpa cayaca Jehová Diospaj ñaupajpi inciensota churaichij. Jehová Dios agllashca runami paipajlla chꞌicanyachishca canga. ¡Levipaj huahua huahuacuna, cancunaca yallitaj mana allitamari rurashcanguichij!” nircami.

8 Chai qꞌuipami Moisesca Coretaca cashna nirca: “Levipaj huahua huahuacuna, ñucata uyapaichij. 9 Israelitacunapaj Diosca cancunataca israelitacunapuramanta chꞌicanyachishpami paipajman cꞌuchuyachun, Jehová Diospaj carpa huasipi sirvichun, israelitacunata sirvingapaj paicunapaj ñaupajpi cachun saquishca. ¿Chaica cancunapajca manachu imapaj valin? 10 Cantapish, Levipaj huahua huahuacunamanta caj tucui cambaj huauquicunatapishmi paipajman cꞌuchuyachun saquishca. ¿Chaipish cambajca manachu imapaj valin? ¿Cunanca sacerdote canatapishchu munanguichij? 11 Chaimantami canpish, canta apoyangapaj canhuan tucui tandanacushca runacunapish Jehová Diospaj contra canguichij. Ashtahuanpish ¿Aaronmanta cancuna quejarichunca paica imataj canyari?” nircami.

12 Chai qꞌuipami Moisesca Eliabpaj churicuna Datanta, Abiramta cayanaman cacharca. Pero paicunaca cashnami nircacuna: “¡Mana rishunchu! 13 Ñucanchijtaca cai chaquishca pambapi huañuchingapajmi achca leche, achca miel tiyan allpamanta pushamushcangui. ¿Chaica ima mana cashcatachu yuyangui? ¿Cunancarin ñucanchij jatun mandajchu casha ningui? 14 Achca leche, achca miel tiyan allpamanca mana pushamushcanguichu. Herenciata shinaca ima allpata, ima uva chagrata mana cushcanguichu. ¿Cai runacuna ciego runacuna shina canta catichunchu munangui? ¡Mana rishunchu!” nircacunami.

15 Chaimi Moisesca achcata pꞌiñarishpa Jehová Diostaca: “Paicuna cushca grano ofrendataca ama chasquichu. Ñucaca paicunataca shuj burrollatapish mana quichushcanichu, ni maijanta ima dañota mana rurashcanichu” nirca.

16 Chai qꞌuipami Moisesca Coretaca cashna nirca: “Cayaca tucui canta apoyajcunandij Jehová Diospaj ñaupajpi ricuri. Canpish, paicunapish, Aaronpishmi ricurina canguichij. 17 Cada unomi paicunapaj braserillota japishpa chai jahuapica inciensota churashpa paicunapaj braserillocunataca Jehová Diospaj ñaupajman apana can. Tucuica 250 braserillocunami cana can. Canpish, Aaronpishmi cancunapaj braserillocunata apana canguichij” nircami. 18 Chaimi cada uno paicunapaj braserillota japishpa chaipi ninata churarcacuna. Chai jahuapica inciensotami churarcacuna. Chaita rurashpaca tucuicunami tandanacuna carpa huasi yaicunapi saquirircacuna. Paicunaca Moiseshuan, Aaronhuan igualmi chaipi saquirircacuna. 19 Coreca tucui paita apoyaj runacunataca Moisespaj contra, Aaronpaj contrami tandanacuna carpa huasi yaicunapi tandachirca. Chashna tandachijpica Jehová Diospaj sumaj achijnicujmi tucui israelitacunaman ricurirca.

20 Jehová Diosca Moisestapish, Aarontapish cashnami nirca: 21 “Chai runacunamanta caruyaichij. Paicunataca cunanllatajmi tucuchigrini” nircami. 22 Chashna nijpimi paicunaca pambacama cumurishpaca: “Yaya Dioslla, canca tucui gentecunaman causaita cuj Diosmi cangui. ¿Shuj runa juchata rurashcallamantachu tucui cai gentecunahuan pꞌiñaringui?” nircacuna.

23 Chaimi Jehová Diosca Moisestaca cashna nirca: 24 “Israelitacunataca: ‘¡Corepaj, Datanpaj, Abirampaj carpa huasicunamanta caruyaichij!’ ni” nircami.

25 Shina nijpimi Moisesca jatarishpa israelitacunata pushajcunandij* Datán, Abiram maipi cashcaman rirca. 26 Moisesca tucui israelitacunataca: “Paicunapaj juchamanta ama tucuchishca cangapajca chai millai runacunapaj carpa huasicunamanta caruyapaichij, paicunapaj cosascunatapish ama tuparichijchu” nircami. 27 Chashna nijpimi paicunaca chai rato Corepaj, Datanpaj, Abirampaj carpa huasicunamanta caruyarcacuna. Shinapish Datán, Abiram llujshishpaca paicunapaj huarmicunandij, paicunapaj churicunandij, paicunapaj uchilla huahuacunandijmi paicunapaj carpa huasicuna yaicunapi saquirircacuna.

28 Chai qꞌuipami Moisesca cashna nirca: “Chashnami cancunaca tucui caicunata mana ñuca munaimanta ruracushcata, ashtahuanpish tucui caicunata rurachun Jehová Dios ñucata cachashcata yachanguichij. 29 Cai runacuna shujtaj gentecuna shinallataj huañujpi, shujtaj gentecuna shinallataj castigashca cajpica Jehová Diosca ñucataca mana cachashcachu. 30 Pero Jehová Dios jatun mancharinata rurajpi, pamba pascarishpa paicunatapish, tucui paicunapaj cosascunatapish millpujpi, Pambana Jutcuman* causaj huashicujpica cancunaca cai runacuna Jehová Diosta mana respetashcatami alli yachanguichij” nircami.

31 Moisés ña parlashpa tucuchijpica chai ratomi chai runacuna shayacushca pambaca pascarirca. 32 Allpa pascarishpaca paicunatapish, tucui paicunapaj familiacunatapishmi millpurca. Shinallataj Corepaj parte caj tucui runacunatapish, tucui paicuna imalla charishca cosascunatapishmi millpurca. 33 Chashnami paicunapish, paicunapaj parte caj tucui gentecunapish Pambana Jutcumanca causaj huashicurcacuna. Chai qꞌuipami allpaca paicunata taparca. Chaimi paicunaca israelitacunapuramanta chingarircacuna. 34 Chai muyundijpi caj tucui israelitacunaca paicuna caparishcata uyashpami manchaihuan caruyashpa rircacuna. Paicunaca: “¡Ñucanchijtapish allpa millpunatami manchanchij!” nircacunami. 35 Chai huashaca Jehová Diosca ninatami cacharca. Chai ninami inciensota rupachicuj 250 runacunata rupachirca.

36 Chai qꞌuipami Jehová Diosca Moisestaca cashna nirca: 37 “Sacerdote Aaronpaj churi Eleazartaca ninamanta braserillocunata llujshichi ni. Chai braserillocunaca Diospajlla chꞌicanyachishcami can. Shinallataj rupacuj carbontaca caruta shitai ni. 38 Chai runacunaca paicunapaj juchamantami huañurcacuna. Pero paicunapaj braserillocunaca Jehová Diospaj ñaupajpi cushcamantami Diospajlla chꞌicanyachishca tucushca. Shinaca ñañujlla fierro laminacunata rurashpa altar jahuapi churaichij. Chaica israelitacunapajca shuj señal shinami canga” nircami. 39 Chaimi sacerdote Eleazarca ninapi rupashpa huañushca runacunapaj cobre braserillocunata japishpa altar jahuapi churangapaj laminacuna tucungacama martillohuan tacarca. 40 Paica Jehová Dios Moisesman mandashca shinami rurarca. Caica israelitacunataca Aaronpaj huahua huahuacunamanta mana cajcunaca Jehová Diospaj ñaupajpica inciensota ni maijan mana rupachina cashcatami yuyachirca. Shinallataj Coré runa shina, paita apoyaj runacuna shina ni pi mana cana cashcatami yuyachirca.

41 Cayandij punllaca tucui israelitacunami Moisespaj contra, Aaronpaj contra quejari callarircacuna. Paicunaca: “Cancunami Jehová Diospaj pueblotaca huañuchircanguichij” nircacunami. 42 Israelitacunaca Moisespaj contra, Aaronpaj contrami tandanacurcacuna. Paicunaca tandanacuna carpa huasi ladoman tigrarishpaca chai carpa huasita pꞌuyu tapashcatami ricurcacuna. Jehová Diospaj sumaj achijnicujpishmi ricuri callarirca.

43 Moisesca Aaronhuanmi tandanacuna carpa huasiman cꞌuchuyarca. 44 Chaipimi Jehová Diosca Moisestaca cashna nirca: 45 “Paicunata cai rato tucuchingapaj cancuna ishquica cai gentecunamanta caruyaichij” nircami. Chaimi paicunaca pambacama cumurircacuna. 46 Chai qꞌuipami Moisesca Aarontaca: “Braserillota japishpa altarmanta ninata chaipi churai. Chai jahuapica inciensota churashpa paicunapaj juchacuna perdonashca cachun israelitacuna maipi cashcaman callpashpa ri. Jehová Diosca paicunahuanca yallitajmi pꞌiñarishca. ¡Huañuchij ungüica ñami callarishca!” nirca. 47 Chai ratomi Aaronca Moisés mandashca shina rurarca. Paica israelitacunapaj chaupimanmi callpashpa yaicurca. ¡Pero israelitacunataca ñami chai huañuchij ungüi llaquichi callarishca carca! Chaimi paica braserillopi inciensota churashpa israelitacunapaj juchacuna perdonashca cachun inciensota rupachi callarirca. 48 Aaronca huañushcacunapaj, causajcunapaj chaupipimi shayarirca. Chaimi huañuchij ungüica pararirca. 49 Huañuchij ungüihuanca 14.700 runacunami huañurca. Chai huañushca runacunapurapica Corepaj culpamanta huañushcacunaca mana cuentashcachu carca. 50 Moisesca tandanacuna carpa huasi yaicunapimi carca. Aarón chaiman tigrajpica huañuchij ungüica ñami pararishca carca.

17 Chai qꞌuipami Jehová Diosca Moisestaca cashna nirca: 2 “Israelitacunataca cada familiamanta* shuj varata apamuchun ni. Cada familiata pushajmi shuj varata apamuna can. Tucuica 12 varacunami canga. Chai varacunapica cada unopaj shutita quillcai. 3 Aaronpaj shutitaca Levipaj familiapaj varapi quillcai. Cada familiata pushajpajmi shujlla vara tiyanga. 4 Chai varacunataca tandanacuna carpa huasipi, Leyta huaquichina arca ñaupajpi churai. Ñucaca chaipimi cancunapaj ñaupajpi siempre ricurini. 5 Ñuca agllashca runapaj varami sisanga. Chashnami israelitacunaca ñucamanta quejarinata, cancunamantapish quejarinata saquingacuna” nircami.

6 Chashna nijpimi Moisesca israelitacunahuan parlarca. Chaimi familiacunata pushajcunaca cada uno paicunapaj varacunata curcacuna. Tucuica 12 varacunami carca. Aaronpaj varapishmi chai varacunahuan carca. 7 Moisesca chai varacunataca Jehová Diospaj ñaupajpi, Leyta huaquichina arcata churashca Diospaj carpa huasipimi saquirca.

8 Cayandij punllaca Moisesca Leyta huaquichina arcata churashca Diospaj carpa huasimanmi yaicurca. Chaipimi Levipaj familiamanta caj Aaronpaj varapi sisacuna llujshishcata ricurca. Chai varapica pascarishca sisacuna, manaraj pascarishca sisacuna, pꞌucushca almendracunami tiyarca. 9 Chai huashami Moisesca Jehová Diospaj ñaupajmanta tucui varacunata llujshichishpa tucui israelitacunaman ricuchirca. Chaimi pushaj runacunaca alli ricushpa cada uno paicunapaj varata japircacuna.

10 Chai qꞌuipami Jehová Diosca Moisestaca: “Aaronpaj varataca Leyta huaquichina arca ñaupajpi cutin churai. Chai varaca mana cazuj runacuna ñucamanta quejarinata saquichun, paicunapaj shuj señal cachunmi huaquichishca canga. Chashnami paicunaca mana huañungacuna” nirca. 11 Chaimi chai rato Moisesca Jehová Dios mandashca shinallataj rurarca. Paica Dios nishca shinallatajmi rurarca.

12 Chai huashami israelitacunaca Moisestaca cashna nircacuna: “¡Huañugrinchijmari! ¡Cunantajca huañugrinchijmari! ¡Tucuicunami huañugrinchij! 13 ¡Maijanpish Jehová Diospaj carpa huasiman cꞌuchuyashpaca huañungami! ¿Ñucanchijca chashnachu huañuna carcanchij?” nircacunami.

18 Chai qꞌuipami Jehová Diosca Aarontaca cashna nirca: “Maijanpish Diospaj carpa huasita yangapi churajpica canpish, cambaj churicunapish, cambaj huahua huahuacunapishmi culpayuj canguichij. Sacerdotecunaman cushca mandashcacunata pi mana pajtachijpica canpish, cambaj churicunapishmi culpayuj canguichij. 2 Cantapish, cambaj churicunatapish ayudachunca Levipaj familiamanta caj, cambaj yayapaj familiamanta caj cambaj huauquicunata pushamui. Paicunataca Leyta huaquichina arcata churashca Diospaj carpa huasi ñaupajpi canhuan tandalla sirvichunmi pushamuna cangui. 3 Paicunaca can mingashca trabajotami pajtachina can. Shinallataj Diospaj carpa huasipi tucui imalla rurana cashcatami rurana can. Chashnapish Diospaj carpa huasipi tiyaj cosascunamanpish, altarmanpish mana cꞌuchuyai tucuncunachu. Chashnami cancunapish, paicunapish mana huañunguichij. 4 Paicunaca tandanacuna carpa huasipi imata rurana cashcatami canhuan pajtachingacuna. Shinallataj chaipi tucui imalla rurana cashcatami rurangacuna. Shinapish sacerdotepaj familiamanta mana caj runaca* cancunapajmanca mana cꞌuchuyai tucunchu. 5 Cancunaca Diospaj carpa huasipipish, altarpipish cancunaman mingashca trabajotami pajtachina canguichij. Chashnami israelitacunahuanca ña mana pꞌiñarishca casha. 6 Tucui israelitacunamantami cancunapaj huauqui levitacunataca shuj regalota shina cancunaman cungapaj ñucallataj agllashcani. Paicunaca Jehová Diospajmi can. Paicunaca tandanacuna carpa huasipimi sirvingacuna. 7 Canpish, cambaj churicunapishmi altarpipish, Diospajlla ashtahuan chꞌicanyachishca ucupipish* sacerdotecuna shina sirvina canguichij. Cancunami chai trabajotaca rurana canguichij. Cancunamanmi sacerdote canataca shuj regalota shina cushcani. Sacerdotepaj familiamanta mana caj runa cꞌuchuyashpaca huañunami can” nircami.

8 Jehová Diosca Aarontaca cashnapishmi nirca: “Ñucallatajmi cantaca ñucaman cushca ofrendacunata cuidachun churashcani. Israelitacuna ñucaman tucui cushcacunamantaca shuj partetami canmanpish, cambaj churicunamanpish cushcani. Chai parteca siempremi cancunapaj canga. 9 Ninahuan rupachishca Diospajlla ashtahuan chꞌicanyachishca ofrendacunaca cambajmi canga. Ñucaman cushca tucui ofrendacunami grano ofrendacunapish, juchamanta ofrendacunapish, culpamanta ofrendacunapish cambaj canga. Chai ofrendacunaca Diospajlla ashtahuan chꞌicanyachishcami can. Chaicunaca cambajpish, cambaj churicunapajpishmi canga. 10 Chai ofrendacunataca Diospajlla ashtahuan chꞌicanyachishca lugarpimi micuna canguichij. Cancunapuramanta tucui cꞌaricunami micuna canguichij. Cambajpish chai ofrendacunaca Diospajlla chꞌicanyachishcami canga. 11 Shinallataj israelitacuna cushca regalocunapish cambajmi can. Caiman chaiman cuyuchishpa cushca tucui paicunapaj ofrendacunapish cambajmi can. Chaicunataca canmanpish, cambaj churicunamanpish, cambaj ushushicunamanpishmi cushcani. Chaica siempremi cancunapaj canga. Cambaj familiamanta chuya cajcunaca micui tucungacunallami.

12 Israelitacuna Jehová Diosman cushca punta pꞌucushca granocunamantaca alli aceiteta, alli llullu vinota, alli granocunatapishmi canman cuni. 13 Paicunapaj allpapi tiyaj punta pꞌucushca granocunata Jehová Diosman cungapaj apashcacunaca cambajmi canga. Cambaj familiamanta chuya cajcunaca micui tucungacunallami.

14 Diospajlla siempre cachun Israelpi tucui imalla chꞌicanyachishcacunaca cambajmi cana can.

15 Israelitacuna Jehová Diosman cushca tucui punta huacharishcacunaca gentecuna cashpapish, animalcuna cashpapish cambajmi cana can. Shinapish punta churicunata quishpichingapaj shuj preciota pagachunmi saquina cangui. Shinallataj mapa animalcunamanta punta huacharishca animalcunata quishpichingapaj shuj preciota pagachunmi saquina cangui. 16 Shuj quillamanta huichiman charijpimi shuj preciota pagashpa quishpichichun saquina cangui. Chai precioca 5 siclo* cullquimi canga. Chai sicloca Diospaj huasipi pesaj siclo shinallatajmi pesana can. Shuj sicloca 20 guerás* cullquimi valin. 17 Shinapish vacacunapaj, ovejacunapaj, chivacunapaj punta huacharishca cꞌari animalcunata quishpichingapaj shuj preciota pagachunca mana saquinachu cangui. Chaicunaca Diospajlla chꞌicanyachishcacunami can.* Chai animalcunapaj yahuartaca altarpimi tsirapana cangui. Shinallataj Jehová Diosman cushca ninahuan rupachishca, mishquijllata ashnacuj ofrendata shinami huirataca rupachishpa cushnichina cangui. 18 Chai animalcunapaj aichaca cambajmi canga. Caiman chaiman cuyuchishpa cushca pecho aicha shinallataj, alli lado chaqui shinallatajmi cambaj canga. 19 Israelitacuna Jehová Diosman cushca tucui ofrendacunataca canmanpish, cambaj churicunamanpish, cambaj ushushicunamanpishmi cushcani. Chaica siempremi cancunapaj canga. Caica Jehová Dios canhuan, cambaj huahua huahuacunahuanpish huiñai huiñaipaj ari ninacushcami can”* nircami.

20 Jehová Diosca Aarontaca cashnapishmi nirca: “Israelitacunapaj allpapica ima herenciata mana charinguichu. Israelitacunapurapica ñucami cambaj herencia cani.

21 Ricui, israelitacuna cushcacunataca Levipaj huahua huahuacunamanmi cada chungamanta shujta herenciata shina cushcani. Paicunamanca tandanacuna carpa huasipi sirvishcamantami chashna cushcani. 22 Israelitacunaca tandanacuna carpa huasimanca ña mana cꞌuchuyai tucungacunachu. Chaiman cꞌuchuyashpaca juchatami rurangacuna, huañungacunapishmi. 23 Levitacunallami tandanacuna carpa huasipica trabajocunata rurana can. Israelitacuna Diospaj carpa huasita yangapi churashpa pandarijpica paicunami culpayuj cangacuna. Cai leyca paicunapajpish, paicunapaj huahua huahuacunapajpishmi siempre canga. Levitacunaca israelitacunapurapica ima herenciata mana charingacunachu. 24 Israelitacuna Jehová Diosman cushca ofrendacunamantaca cada chungamanta shujtami levitacunamanca herenciata shina cushcani. Chaimantami ñucaca: ‘Paicunaca israelitacunapurapica ima herenciata mana charingacunachu’ nishcani” nircami.

25 Chai qꞌuipami Jehová Diosca Moisestaca cashna nirca: 26 “Levitacunataca cashnami nina cangui: ‘Cancunamanca israelitacuna cushcacunataca cada chungamanta shujtami herenciata shina cushcani. Chaitami cancunaca japinguichij. Tucui chai japishcacunamantaca cada chungamanta shujtami ofrendata shina Jehová Diosman cuna canguichij. 27 Chai ofrendaca trillana pambamanta grano shinallataj, uvata saruna jutcumanta achca vino shinallataj o aceitunata saruna jutcumanta achca aceite shinallatajmi canga. 28 Chashnami cancunapish israelitacuna cushca ofrendacunataca cada chungamanta shujta Jehová Diosman cuna canguichij. Jehová Diospaj ofrendataca sacerdote Aaronmanmi cuna canguichij. 29 Ima ofrendata Jehová Diosman cushpaca ashtahuan alli regalocunatami cuna canguichij. Chaica Diospajlla chꞌicanyachishcami canga’ ningui.

30 Paicunataca cashnapishmi nina cangui: ‘Levitacuna, cancuna imalla japishcacunamanta ashtahuan alli regalocunata cujpica imalla saquirishcacunaca trillana pambamanta grano shinallataj, uvata saruna jutcumanta vino shinallataj o aceitunata saruna jutcumanta aceite shinallatajmi cancunapaj canga. 31 Chaitaca cancunapish, cancunapaj familiacunapishmi maipi cashpapish micui tucunguichij. Chaica tandanacuna carpa huasipi sirvishcamanta cancunaman cushcami can. 32 Israelitacuna cushcacunamantaca ashtahuan alli regalocunatami cuna canguichij. Mana chashna rurashpaca juchatami ruranguichij. Israelitacuna cushca Diospajlla chꞌicanyachishca cosascunataca ama yangapi churaichijchu. Chashna rurashpaca huañunguichijmi’ ningui” nircami.

19 Jehová Diosca cutinllatajmi Moiseshuan, Aaronhuan parlarca. Paicunataca cashnami nirca: 2 “Jehová Dios mandashca leyca caimi can: ‘Israelitacunataca cancunapajman shuj puca vacata apamuchun nichij. Chai vacaca sano, ima mana tucushca, shuj cutinllapish yugota mana apachishcami cana can. 3 Chai vacataca sacerdote Eleazarmanmi cuna canguichij. Chaimi Eleazarca vacataca carpa huasicunamanta canllaman llujshichinga. Chaipimi paipaj ñaupajpi vacataca huañuchingacuna. 4 Chai qꞌuipami sacerdote Eleazarca paipaj dedotaca asha yahuarpi shutujyachinga. Chashna rurashpaca tandanacuna carpa huasi yaicun ladomanmi canchis cutin tsirapanga. 5 Chai vacaca Eleazarpaj ñaupajpimi rupachishca canga. Carapish, aichapish, yahuarpish, majadapishmi rupachishca canga. 6 Sacerdoteca cedro caspita, hisopota, pucanicuj puchcata japishpami vacata rupachicuj ninapi shitanga. 7 Chai qꞌuipaca sacerdoteca paipaj ropatami tajshanga, paipish yacuhuanmi armanga. Chaita rurashca qꞌuipami carpa huasicuna maipi cashcaman yaicui tucunga. Pero sacerdoteca chishiyangacamami mapa saquiringa.

8 Vacata rupachij runaca paipaj ropataca yacupimi tajshanga, paipish yacuhuanmi armanga. Paica chishiyangacamami mapa saquiringa.

9 Chuya caj runami vacata rupachishca ushpataca* tandashpa carpa huasicunamanta canllaman shuj chuya lugarpi churanga. Chai ushpatami israelitacunaca chuyayachina yacuta preparangapaj huaquichingacuna. Chaica juchamanta ofrendami can. 10 Vacata rupachishca ushpata tandaj runaca paipaj ropatami tajshanga. Paica chishiyangacamami mapa saquiringa.

Cai leytaca israelitacunapish, israelitacunapurapi causaj shujtaj llajtamanta runapishmi siempre pajtachina can. 11 Maijanpish shuj huañushca runata* tuparishpaca canchis punllacunatami mapa saquiringa. 12 Paica tercer punllapimi yacuhuan chuyayarina can. Chashnami séptimo punllapica chuya saquiringa. Pero tercer punllapi mana chuyayarishpaca séptimo punllapica mana chuya saquiringachu. 13 Maijanpish shuj huañushca runapaj cuerpota tuparishpa mana chuyayarishpaca Jehová Diospaj carpa huasitami mapayachishca. Paica israelitacunapuramantami huañuchishca cana can. Chai runaca chuyayachina yacuhuan paipi mana tsirapashcamantami mapa can. Paica mapa cashpami catinga.

14 Shuj carpa huasi ucupi shuj runa huañujpica cai leytami pajtachina can: carpa huasi ucuman yaicuj runapish, carpa huasi ucupi caj runapish canchis punllacunatami mapa saquiringa. 15 Mana alli tapashca* puñucunapish mapami can. 16 Maijanpish campopi cashpa espadahuan huañuchishca runata, huañushca cuerpota, huañushca runapaj tulluta, pambana jutcuta tuparishpaca canchis punllacunatami mapa saquiringa. 17 Chai mapa caj runapajca juchamanta rupachishca ofrendamanta asha ushpata japishpami shuj puñupi churana can. Chai ushpa jahuapica pugyumanta llujshichishca yacutami tallina can. 18 Chai qꞌuipami chuya caj runaca asha hisopota japishpa chai yacupi shutujyachishpa carpa huasipi, chaipi tiyaj tucui cosascunapi, carpa huasipi caj gentecunapi tsirapanga. Shinallataj huañuchishca runata, huañushca runapaj tulluta, huañushca cuerpota, pambana jutcuta tuparij runapaj jahuapimi tsirapanga. 19 Chuya caj runaca tercer punllapi, séptimo punllapimi mapa caj runataca yacuhuan tsirapanga. Chashnami mapa caj runaca séptimo punllapica paipaj juchamanta chuya saquiringa. Chai qꞌuipami mapa caj runaca paipaj ropata tajshana can. Shinallataj yacuhuanmi armana can. Paica chishitami ña chuya saquiringa.

20 Pero mapa caj runa mana chuyayarishca cashpaca israelitacunapuramantaca huañuchishcami cana can. Paica Jehová Diospaj carpa huasitami mapayachishca. Chai runaca paipaj jahuapi chuyayachina yacuta mana tsirapashcamantami mapa can.

21 Paicunaca cai leytami siempre pajtachina can: chuyayachina yacuta tsirapajca paipaj ropatami tajshana can. Cutin chuyayachina yacuta tuparijca chishiyangacamami mapa saquiringa. 22 Mapa caj runa imapi tuparijpica chaica mapami saquiringa. Chaita tuparij runaca chishiyangacamami mapa saquiringa’” nircami.

20 Tucui israelitacunami primer quillapica Zin nishca chaquishca pambaman chayarcacuna. Chaiman chayashpaca tucuicunami Cadespi saquirircacuna. Chaipimi Miriamca huañurca. Paitaca chaillapitajmi pambarcacuna.

2 Chaipica israelitacunapajca yacuca mana tiyarcachu. Chaimi paicunaca Moisespaj contra, Aaronpaj contra tandanacurcacuna. 3 Israelitacunaca Moiseshuan pꞌiñanacushpaca cashnami nircacuna: “¡Ñucanchij huauquicuna Jehová Diospaj ñaupajpi huañujpi, ñucanchijpish huañushca cashpachari alli canchijman carca! 4 ¿Imapajtaj Jehová Diospaj pueblotaca cai chaquishca pambamanca pushamurcanguichij? ¿Ñucanchijpish, ñucanchij animalcunapish huañuchunchu pushamurcanguichij? 5 ¿Imamantataj Egipto llajtamanta llujshichishpa cai llaquinai lugarmanca pushamurcanguichij? Caipica mana tarpui tucunchijchu. Higocunapish, uvacunapish, granadacunapish mana tiyanchu. Ubyangapajpish yacuca mana tiyanchu” nircacunami. 6 Chaimi Moisespish, Aaronpish israelitacunamanta caruyarcacuna. Chashna caruyashpaca tandanacuna carpa huasi yaicunaman rishpami pambacama cumurircacuna. Chaimi paicunapaj ñaupajpica Jehová Diospaj sumaj achijnicuj ricurirca.

7 Chai qꞌuipami Jehová Diosca Moisestaca cashna nirca: 8 “Cambaj varata japi. Canpish, cambaj huauqui Aaronpishmi israelitacunata tandachina canguichij. Paicuna ricucujpi jatun pata rumimanta yacu llujshichun chai rumita rimaichij.* Chashnami jatun pata rumimanta yacuta llujshichingui. Chai yacutaca israelitacunapish, paicunapaj animalcunapish ubyachunmi cuna cangui” nircami.

9 Chaimi Moisesca Jehová Diospaj ñaupajmanta paipaj varata japirca. Pai mandashca shinami chaita rurarca. 10 Chai qꞌuipami Moisespish, Aaronpish israelitacunataca jatun pata rumi ñaupajpi tandachircacuna. Chashna tandachishpami Moisesca: “¡Mana cazuj runacuna, uyaichij! ¿Cancunaca cai jatun pata rumimanta yacuta ñucanchij llujshichichunchu munanguichij?” nirca. 11 Chashna nishca qꞌuipami Moisesca paipaj maquita alzashpa jatun pata rumitaca ishqui cutin paipaj varahuan huajtarca. Chaimi achca yacu llujshi callarirca. Chashna yacu llujshijpimi gentecunapish, animalcunapish ubyai callarircacuna.

12 Chai qꞌuipami Jehová Diosca Moisesta, Aarontaca: “Cancunaca ñucapi feta charishcataca mana ricuchishcanguichijchu. Tucui israelitacunapaj ñaupajpipish ñucataca mana jatunyachishcanguichijchu. Chaimantami israelitacunataca paicunaman ñuca cugrishca allpamanca cancunaca mana pushanguichij” nirca. 13 Cai yacucunami Meribá* yacucuna can. Chaipimi israelitacunaca Jehová Diosmanta quejarircacuna. Chai punllami Diosca paicunapurapi paipaj shutita jatunyachirca.

14 Moisesca Cadesmantami huillajcunata cacharca. Paicunaca Edom llajtata mandaj reymanmi cashna nircacuna: “Cambaj huauqui Israelca caitami nin: ‘Canca ñucanchij imalla llaquicunata apashcataca allimi yachangui. 15 Ñucanchij ñaupa yayacunaca Egipto llajtamanmi rircacuna. Chaimi ñucanchijca achca huatacunata* Egiptopi causarcanchij. Egipciocunaca ñucanchijtapish, ñucanchij ñaupa yayacunatapish achcatami maltratarcacuna. 16 Chaimi ayudachun Jehová Diosta rogarishpa mañarcanchij. Paica ñucanchij mañashcataca uyarcami. Paipaj angelta cachashpami ñucanchijtaca Egipto llajtamanta llujshichirca. Cunanca Cadés llajtapimi canchij. Cai llajtaca cambaj llajta lindepimi can. 17 Shinaca cambaj llajtata pasachun saquipai. Cambaj tarpushca allpatapish, cambaj uva chagratapish mana pasashunchu. Cambaj pugyucunamanta yacutapish mana ubyashunchu. Cambaj llajtata pasangacamami alli ladomanpish, lluqui ladomanpish mana llujshishpa Reypaj Ñan nishcata rishun’ ninmi” nircacunami.

18 Pero Edom llajtata mandaj reyca: “Ñuca llajtataca mana pasanachu canguichij. Chaita pasajpica ñuca espadahuanmi cancunata tupanaman risha” nircami. 19 Shinapish israelitacunaca: “Ñucanchijca jatun ñantami rishun. Ñucanchijpish, ñucanchij animalcunapish cambaj yacuta ubyashpaca pagashunllami. Chaquillahuanmi pasashun” nircacunami. 20 Pero paica: “Caitaca mana pasanguichijchu” nircami. Chai qꞌuipami Edom llajtata mandaj reyca achca gentecunahuan, sinchi macanacuj soldadocunahuan israelitacunata tupanaman llujshirca. 21 Chashnami Edom llajtata mandaj reyca israelitacuna paipaj llajtata pasachunca mana saquirca. Chaimantami israelitacunaca shujtaj ladota rircacuna.

22 Tucui israelitacunami Cadés llajtamanta llujshishpaca Hor shuti urcuman chayarcacuna. 23 Chai qꞌuipami Jehová Diosca Moisestapish, Aarontapish Hor shuti urcupi, Edom llajta lindepica cashna nirca: 24 “Aaronca huañungami. Paipaj ñaupa yayacuna shinallatajmi pambashca canga.* Cancunaca Meribá yacucunamanta imata mandashcataca mana cazurcanguichijchu. Chaimantami israelitacunaman ñuca cugrishca allpamanca paica mana yaicunga. 25 Aarontapish, paipaj churi Eleazartapish pushashpa Hor shuti urcuman huichiyai. 26 Chaipi cashpaca Aarón churarishca churanata anchuchishpa paipaj churi Eleazarman churachi. Aaronca chaipimi huañunga” nircami.

27 Chaimi Moisesca Jehová Dios mandashca shinallataj rurarca. Paicunaca tucui israelitacuna ricucujpimi Hor shuti urcuman huichiyarcacuna. 28 Chai huashami Moisesca Aarón churarishca churanata anchuchishpa Aaronpaj churi Eleazarman churachirca. Chai qꞌuipami Aaronca urcu jahuapi huañurca. Cutin Moisespish, Eleazarpish urcumantami uriyarcacuna. 29 Israelitacunaca Aarón huañushcata yachaj chayashpaca tucuicunami paimantaca 30 punllacunata huacarcacuna.

21 Cananeocunapuramanta caj Arad llajtata mandaj reyca Neguebpimi causarca. Paica israelitacuna Atarim llajtaman rina ñanta rishcata yachaj chayashpaca paicunatami llaquichirca. Huaquincunatacarin prezumi aparca. 2 Chaimi israelitacunaca Jehová Diosmanca caita ruranata ari nircacuna. Paicunaca: “Cai gentecunata ñucanchij maquipi cujpica paicunapaj llajtacunatami tucui tucuchishun” nircacunami. 3 Chaimi Jehová Diosca israelitacuna nishcata uyashpa cananeocunata mishachun saquirca. Israelitacunaca cananeocunatapish, paicunapaj llajtacunatapishmi tucuchircacuna. Chaimantami chai lugartaca Hormá nishpa shutichircacuna.

4 Israelitacunaca Hor shuti urcumanta llujshishpaca Edom llajtata muyungapajmi Puca mama cucha ñanta catircacuna. Pero gentecunaca ñami shaicurircacuna. 5 Chaimi israelitacunaca Diospaj contra, Moisespaj contra rimashpa catircacuna. Paicunaca: “¿Egipto llajtamantaca imamantataj ñucanchijtaca llujshichishcacuna? ¿Cai chaquishca pambapi huañuchunchu llujshichishcacuna? Caipica micunapish, yacupish mana tiyanchu. Cai millanana tandatapish ñami aminchij” nircacunami. 6 Chaimi Jehová Diosca venenoyuj culebracunata cacharca. Chai culebracuna canijpimi achca israelitacuna huañurca.

7 Chai qꞌuipami israelitacuna Moisespajman rishpaca: “Ñucanchijca Jehová Diospaj contra, cambaj contra rimashpami juchata rurashcanchij. Cai culebracunata anchuchichun Jehová Diosta mañapai” nircacuna. Chaimi Moisesca israelitacunamanta Diosta mañarca. 8 Jehová Diosca Moisestaca: “Venenoyuj culebraman rijchaj shuj culebrata rurai. Chaitaca shuj postepi churai. Maijantapish culebra canijpica causashpa catingapajmi postepi churashca culebrata ricuna can” nircami. 9 Chai ratomi Moisesca shuj cobre culebrata rurarca. Chai culebrataca postepimi churarca. Maijantapish shuj culebra canijpica chai cobre culebrata ricushpaca causashpami catij carca.

10 Chai qꞌuipaca israelitacunaca chaimanta rishpaca Obotpimi paicunapaj carpa huasicunata shayachishpa saquirircacuna. 11 Obotmanta llujshishpaca chaquishca pambapi saquirij Iyé-Abarim nishcapimi paicunapaj carpa huasicunata shayachishpa saquirircacuna. Chai chaquishca pambaca Moab chꞌimbapurapi, inti llujshin ladomanmi can. 12 Chaimanta rishpaca Zered pugru pamba cꞌuchullapimi paicunapaj carpa huasicunata shayachishpa saquirircacuna. 13 Chaimanta llujshishpaca chaquishca pambapi saquirij Arnón pugru pambapimi paicunapaj carpa huasicunata shayachishpa saquirircacuna. Chai chaquishca pambaca amorreocunapaj allpa lindecunamantami callarin. Arnón pugru pambaca Moab llajtahuan lindemi can. Moab llajtataca amorreocunamantami chꞌicanyachin. 14 Chaimantami Jehová Diospaj Macanacuicunamanta parlaj Libropica cashna nin: “Sufá pugru pambapi saquirij Vaheb, Arnón pugru pambacuna. 15 Cai pugru pambacunaca Ar llajtacamami can. Moab llajta linde cꞌuchullapimi can” ninmi.

16 Chai qꞌuipami paicunaca Beer nishcaman rircacuna. Chaipi tiyaj pugyupimi Jehová Diosca Moisestaca: “Israelitacunaman yacuta cungapaj paicunata tandachi” nirca.

17 Chai punllami israelitacunaca cai cantota cantarcacuna:

“¡Yacu, cai pugyumanta llujshiyari! ¡Cancunaca shuj cantota cantaichijyari!

Chai qꞌuipami israelitacunaca chaquishca pambamantaca Mataná nishca ladoman rircacuna. 19 Mataná nishcamantaca Nahaliel nishca ladomanmi rircacuna. Nahaliel nishcamantaca Bamot nishca ladomanmi rircacuna. 20 Bamot nishcamantaca Moab llajtapi saquirij pugru pamba ladomanmi rircacuna. Chai pugru pambaca Pisgá nishca jahua ladoman, Jesimón nishca* ladomanmi can.

21 Chai qꞌuipami israelitacunaca amorreocunata mandaj rey Sehonpajman huillajcunata cachashpaca cashna nircacuna: 22 “Cambaj llajtata pasachun saqui. Cambaj tarpushca allpacunamanpish, cambaj uva chagracunamanpish mana yaicushunchu. Pugyucunamantapish yacuta mana ubyashunchu. Ñucanchijca cambaj llajtata pasangacamami Reypaj Ñan nishcata rishun” nircacunami. 23 Pero rey Sehonca israelitacuna paipaj llajtata pasachunca mana saquircachu. Chaipaj randica paipaj tucui soldadocunata tandachishpami chaquishca pambapi israelitacunahuan tupangapaj llujshirca. Paica Jáhaz llajtamanmi chayarca. Chaipimi israelitacunahuan macanacurca. 24 Pero israelitacunaca espadahuanmi misharcacuna. Chashna mishashpami paipaj allpataca Arnón pugru pambamanta callarishpaca ammonitacunapaj cꞌuchullapi saquirij Jaboc pugru pambacama japircacuna. Jazer llajtaca ammonitacunapaj allpa lindepimi can.

25 Chashnami israelitacunaca tucui chai llajtacunata japircacuna. Paicunaca amorreocunapaj tucui llajtacunapimi causai callarircacuna. Hesbón llajtapi, tucui cꞌuchulla pueblocunapipishmi causai callarircacuna. 26 Hesbón llajtaca amorreocunata mandaj rey Sehonpaj llajtami carca. Paimi Moab llajtamanta reyhuan macanacushpa paipaj tucui allpacunata Arnón pugru pambacama quichurca. 27 Chashna tucushcamantami gentecunaca burlarishpa cashna ni callarircacuna:

“Hesbón llajtaman shamuichij.

Sehonpaj llajtata shayachichij. Chai llajtaca alli shayachishca saquirichun.

28 Hesbonmantaca ninami llujshishca. Sehonpaj pueblomantaca lunyacuj ninami llujshishca.

Moabpi saquirij Ar llajtatami tucuchishca. Arnón pugru pamba jahuaman caj amocunatapishmi tucuchishca.

29 ¡Aij Moab llajtalla! ¡Kemós pueblolla, tucuchishcami cangui!

Paipaj culpamantami paipaj churicunaca caita chaita cachashca canga. Paipaj ushushicunatapish amorreocunata mandaj rey Sehonmi prezuta shina apanga.

31 Chashnami israelitacunaca amorreocunapaj allpapi causai callarircacuna. 32 Chai qꞌuipami Moisesca Jazer llajtata pacalla ricunaman richun huaquin runacunata cacharca. Chaimi israelitacunaca Jazer llajta cꞌuchulla pueblocunata japishpa chaipi causaj amorreocunata llujshichishpa cacharcacuna. 33 Chai qꞌuipaca israelitacunaca tigrashpami Basanman rina Ñanta huichiyarcacuna. Cutin Basán llajtata mandaj Og runaca Edréi llajtapi israelitacunahuan macanacungapajmi paipaj tucui soldadocunandij llujshirca. 34 Jehová Diosca Moisestaca: “Ama manchaichu. Paitapish, paipaj tucui soldadocunatapish, paipaj allpatapish cambaj maquipimi churasha. Paitaca Hesbón llajtapi causaj amorreocunata mandaj rey Sehonta shinallatajmi rurangui” nircami. 35 Chaimi israelitacunaca paitapish, paipaj churicunatapish, paipaj tucui soldadocunatapish huañuchircacuna. Shujllapish causashpa catichunca mana saquircacunachu. Paipaj allpatapishmi japircacuna.

22 Chai qꞌuipami israelitacunaca chaimanta llujshishpa Moab chaquishca pambapi carpa huasicunata shayachishpa saquirircacuna. Chai chaquishca pambaca Jordán caishuj ladoman, Jericó llajta chꞌimbapurapimi carca. 2 Zipor runapaj churi Balacca israelitacuna amorreocunata tucui imallata rurashcatami yachaj chayarca. 3 Chaimi moabitacunaca israelitacuna achca cashcamanta paicunataca dimastij mancharcacuna. Ari, moabitacunaca israelitacunata manchashpami chujchucurcacuna. 4 Chaimantami moabitacunaca madianitacunata pushajcunataca:* “Cunanca cai achca gentecunaca qꞌuihuata shuj toro tucui millpuj shinami ñucanchij llajtata tucui tucuchinga” nircacuna.

Chai punllacunapica Zipor runapaj churi Balacca Moab llajtata mandaj reymi carca. 5 Balacca Beorpaj churi Balaam runapajmanmi huaquin huillajcunata cacharca. Balaamca Éufrates jatun yacu cꞌuchullapi saquirij Petor llajtapimi paipaj familiacunapurapi causacurca. Paita cayanaman cachashpaca Balacca cashnami nirca: “Ricui, Egipto llajtamantaca shuj pueblomi llujshishca. ¡Ricui! Paicunaca tucui llajtacunapimi jundarishcacuna. Cunanca ñuca llajta chꞌimbapurapimi causacuncuna. 6 Shinaca shamui, cai pueblota maldicipai. Paicunaca ñucata yalli sinchicunamari. Paicunata mishashpa cai llajtamanta llujshichishpa cachai tucushapishchari. Maijanpish can bendiciajpica bendiciashcami can. Pero maijanpish can maldicijpica maldicishcami can. Chaitaca ñucaca allimi yachani” nircami.

7 Chaimi moabitacunata pushajcunapish, madianitacunata pushajcunapish adivinashcamanta pagangapaj maquipi cullquita apashpa rircacuna. Paicunaca Balaamta ricunaman rishpami Balac ima nishcata huillarcacuna. 8 Chaimi Balaamca paicunataca: “Tutaca caipi pacarichij. Ñucaca Jehová Dios ima nishcatami cancunaman huillasha” nirca. Chashna nijpimi moabitacunata mandajcunaca Balaampaj huasipi saquirircacuna.

9 Diosca Balaamhuan parlashpaca: “¿Canhuan caj runacunaca picunataj can?” nishpami tapurca. 10 Chaimi Balaamca Dios verdaderomanca cashna nirca: “Ziporpaj churi Balacca Moab llajtata mandaj reymi can. Paimi ñucamanca caita nishca: 11 ‘Ricui, Egiptomanta llujshishca puebloca tucui llajtacunapimi jundarishca. Cunanca shamui, paicunata maldicipai. Paicunahuan macanacushpa paicunata llujshichishpa cachai tucushapishchari’ nishcami” nircami. 12 Pero Diosca Balaamtaca: “Paicunahuanca ama richu. Chai pueblotaca ama maldicichu.* Chai puebloca bendiciashcami can” nircami.

13 Balaamca cayandij tutamanta jatarishpaca Balac cachashca mandajcunataca: “Cancunapaj llajtaman tigraichijlla. Jehová Diosca ñucataca cancunahuan richunca mana saquinchu” nircami. 14 Chaimi moabitacunata mandajcunaca: “Balaamca ñucanchijhuanca mana shamusha nircachu” nishpa Balacman huillanaman tigrarcacuna.

15 Chashnapish Balacca cutinllatajmi mandajcunata cacharca. Cai cutinca ashtahuan achca runacunami carca. Paicunaca punta cachashca runacunatapish yalli importante runacunami carca. 16 Paicunaca Balaampajman rishpaca cashnami nircacuna: “Ziporpaj churi Balacca caitami nin: ‘Ñucapajman shamuchun imapish jarcachunca ama saquipaichu. 17 Cantaca ashtahuanmi jatunyachisha, can imata mañashcatami rurasha. Shinaca shamui, cai pueblota maldicipai’ ninmi” nircacunami. 18 Chashna nijpimi Balaamca Balacta sirvijcunataca cashna nirca: “Balac paipaj huasi junda cullquita, orota cujpipish ñucaca ima uchillatapish, ima jatuntapish mana rurai tucunichu. Jehová Dios mandashcallatami rurai tucuni. 19 Pero Jehová Dios imata ashtahuan nijta ñuca yachangacama cai tutapish caipi saquiripaichij” nircami.

20 Diosca chai tuta Balaamhuan parlashpaca: “Chai runacuna canta mashcanaman shamushca cajpica paicunahuan rilla. Pero ñuca imata nishcallatami nina cangui” nircami. 21 Chaimi Balaamca cayandij tutamanta jatarishpa, paipaj burrapi tiyarishpa ringapaj parejashpaca moabitacunata mandajcunahuan rirca.

22 Pero Balaam rijpica Diosca achcatami pꞌiñarirca. Chaimantami Jehová Diospaj angelca pai ama pasachun ñanpi shayarirca. Balaamca paipaj burrapi tiyarishpami rirca. Paita ishqui sirvijcunapishmi paihuan rirca. 23 Shinapish burraca Jehová Diospaj ángel espadata maquipi aisashca shayacujta ricushpami ñanmanta llujshishpa chagraman yaicusha nirca. Pero Balaamca burra ñanman tigrachunmi macai callarirca. 24 Chaimantaca Jehová Diospaj angelca ishqui uva chagracuna chaupita pasaj shuj quichqui ñanpimi shayarirca. Chai ñanca ishquindij ladoman rumicunahuan pircashcami carca. 25 Jehová Diospaj angelta ricushpami burraca pircaman ashtahuan cꞌuchuyai callarishpaca Balaampaj chaquita pircapi llapirca. Chaimi Balaamca cutinllataj macai callarirca.

26 Jehová Diospaj ángel ashahuan ñaupajman rishpaca shujtaj quichqui ñanpimi shayarirca. Chaipica alli ladomanpish, lluqui ladomanpish mana tigraripajmi carca. 27 Jehová Diospaj angelta ricushpaca burraca Balaamta aparishcami pambapi siririrca. Chaimi Balaamca pꞌiñarishpa cutinllataj burrataca paipaj tauna caspihuan macarca. 28 Chai qꞌuipami Jehová Diosca burrataca rimachirca. Chaimi burraca Balaamtaca: “Cai quimsa cutin macachunca, ¿ñucaca imatataj rurashcaniyari?” nirca. 29 Chaimi Balaamca burrataca: “Canca muspa runata shinami ñucataca chanzata rurashcangui. ¡Shuj espadata charicushpaca cantaca huañuchimanmi!” nirca. 30 Chaimi burraca Balaamtaca: “¿Manachu ñucaca cambaj tucui causaipi cunan punllacama can tiyarina burra cashcani? ¿Cantaca ima hora chashna tratashcanichu?” nirca. Chaimi Balaamca: “¡Mana!” nirca. 31 Chai qꞌuipami Jehová Diosca Balaampaj ñahuicunata pascarca. Chaimi paica Jehová Diospaj ángel espadata maquipi aisashca ñanpi shayacujta ricurca. Chaimi Balaamca chai rato cungurishpa pambacama cumurirca.

32 Jehová Diospaj angelca cashnami nirca: “¿Imamantataj cambaj burrataca cai quimsa cutin macashcanguiyari? Ricui, ñucami canta jarcanaman llujshircani. Canca ñuca munaitaca mana ruracunguichu. 33 Burraca ñucata ricushpami cai quimsa cutin caruyasha nirca. ¿Mana chashna rurashca cajpica imashi tucunguiman carca? Cantaca ñami huañuchiman carcani. Pero burrataca causashpa catichunmi saquiman carcani” nircami. 34 Chaimi Balaamca Jehová Diospaj angeltaca: “Juchatami rurashcani. Ñanpi can ñucata shuyacujtaca mana yachashcanichu. Pero cai gentecunahuan rina cambaj ñaupajpi mana alli cajpica tigrashallami” nirca. 35 Shinapish Jehová Diospaj angelca Balaamtaca: “Chai runacunahuan rilla. Pero ñuca ima nishcallatami ni tucungui” nircami. Chashna nijpimi Balaamca Balac cachashca mandajcunahuan rircalla.

36 Balacca Balaam chayamushcata uyashpaca chai ratomi Moab llajtapi paihuan tupanaman rirca. Chai llajtaca Arnón pugru pamba uripi, linde cꞌuchullapimi can. 37 Balacca Balaamtaca: “¿Manachu cantaca cayanaman cacharcani? ¿Imamantataj ñuca maipi cashcaman mana shamurcangui? ¿Canta mana ashtahuan jatunyachi tucushcatachu yuyangui?” nircami. 38 Chaimi Balaamca Balactaca: “Ñami caipi cani. Pero ñuca imata munashcataca mana ni tucushachu. Ñuca shimipi Dios churashca shimicunallatami huillasha” nirca.

39 Chaimi Balaamca Balac runahuan rirca. Paicunaca Quiryat-Huzot nishcamanmi chayarcacuna. 40 Balacca vacacunata, ovejacunatami huañuchirca. Chai animalcunapaj asha aichatami Balaammanpish, paihuan caj mandajcunamanpish cacharca. 41 Cayandij tutamantami Balacca Balaamta pushashpa Bamot-Baal llajtaman huichiyarca. Chai llajtamantami Balaamca tucui israelitacunata ricui tucurca.

23 Chai qꞌuipami Balaamca Balactaca: “Canchis altarcunata caipi rurai. Shinallataj canchis torocunata, canchis carnerocunata ñucapaj huañuchi” nirca. 2 Balacca chai ratomi Balaam nishca shinallataj rurarca. Balacpish, Balaampishmi cada altarpi shuj torota, shuj carnerota rupachircacuna. 3 Chai qꞌuipami Balaamca Balactaca: “Canca cambaj rupachishca ofrendapaj cꞌuchullapi saquiri, ñucaca rigrinimi. Jehová Dios ñucahuan parlangapishchari. Pai imata nishcatami ñucaca canman huillasha” nirca. Chashna nishpaca paica shuj chaquishca lomamanmi rirca.

4 Chai qꞌuipami Diosca Balaamhuan parlarca. Chaimi Balaamca: “Canchis altarcunatami filapi churarcani. Cada altarpimi shuj torota, shuj carnerota rupachircani” nirca. 5 Jehová Diosca Balaammanca ima nina cashcatami huillarca. Paitaca: “Balac maipi cashcaman tigrai. Paimanca caitami nina cangui” nircami. 6 Chaimi Balaam tigrashpaca Balacpish, moabitacunata tucui mandajcunapish rupachishca ofrenda cꞌuchupi shayacujta ricurca. 7 Chaimi paica cashna nishpa huillai callarirca:

‘Shamui, ñucapaj randi Jacobta maldici.

Ari. Shamui, Israelta juchachi’ nircami.

 8 ¿Dios mana maldicishcacunataca ima shinataj ñucaca maldicishari?

¿Jehová Dios mana juchachishcacunataca ima shinataj juchachishari?

11 Chaimi Balacca Balaamtaca: “¿Imatataj rurashcanguiyari? Ñuca contracunata maldicichunmi pushamurcani. Ashtahuanpish paicunataca bendiciashcanguimi” nirca. 12 Chashna nijpimi Balaamca: “¿Manachu ñucaca Jehová Dios ima nishcallata huillana cani?” nirca.

13 Balacca Balaamtaca: “Ama shina caichu, shujtaj lugarman ñucahuan jacu. Chai lugarmantami paicunataca ricui tucungui. Mana tucuicunata ricunguichu, shuj partellatami ricungui. Chai lugarmanta paicunata maldicipai” nircami. 14 Chashna nishpaca Balacca Balaamtaca Pisgá urcu jahuapi saquirij Zofim nishca campomanmi pusharca. Chaipimi canchis altarcunata shayachishpa cada altarpi shuj torota, shuj carnerota rupachirca. 15 Balaamca Balactaca: “Ñuca chaipi Dioshuan parlangacama canca cambaj rupachishca ofrendapaj cꞌuchullapi saquiri” nircami. 16 Jehová Diosca Balaamhuan parlashpaca ima nina cashcatami huillarca. Paitaca: “Balac maipi cashcaman tigrai. Paimanca caitami nina cangui” nircami. 17 Chaimi Balaamca Balac maipi cashcaman rirca. Chaiman rishpaca Balac paipaj rupachishca ofrendapaj cꞌuchullapi shuyacujtami ricurca. Moabitacunata mandajcunapish paihuanmi carca. Balacca: “¿Jehová Diosca imatataj nirca?” nishpami tapurca. 18 Chaimi Balaamca cashna nishpa huillai callarirca:

“Balac jatari, caita uyapai.

Ziporpaj churilla, ñucata uyapai.

Pai imata nishpaca, ¿manachu chaitataj ruran?

Pai imata rurasha nishpaca, ¿manachu chaitataj pajtachin?

22 Diosmi paicunataca Egipto llajtamanta llujshichicun.

Paica jatun huagrapaj* gachucuna shinami paipaj poderhuan paicunataca ayudan.

Cunanca Jacobmantapish, Israelmantapish:

‘¡Dios imata rurashcata ricuichij!’ ni tucunchijmi.

25 Chaimi Balacca Balaamtaca: “Paicunata mana maldici tucushpaca ama bendiciaichu” nirca. 26 Chashna nijpimi Balaamca Balactaca: “¿Manachu ñucaca Jehová Dios ima nishcallatami rurasha nircani?” nirca.

27 Balacca Balaamtaca: “Shamui, shujtaj lugarman pushachun saquipai. Dios verdaderopaj ñaupajpica chai lugarmanta paicunata can maldicichun alli cangapishchari” nircami. 28 Chashna nishpaca Balacca Balaamtaca Peor nishca urcu jahuamanmi pusharca. Chai urcumantaca Jesimón* ladotami ricunalla carca. 29 Chaipi cashpami Balaamca Balactaca: “Canchis altarcunata caipi rurai. Shinallataj canchis torocunata, canchis carnerocunata ñucapaj huañuchi” nirca. 30 Chaimi Balacca Balaam nishca shinallataj rurarca. Paica cada altarpimi shuj torota, shuj carnerota rupachirca.

24 Jehová Diosca Israelta bendicianatami munarca. Chaita ricushpami Balaamca mana alli señalcunata cutin mashcanamanca ña mana rirca. Chaipaj randica chaquishca pamba ladotami tigrarishpa ricurca. 2 Balaam paipaj ñahuita alzashpaca israelitacuna cada familia paicunapaj carpa huasicunapi cajtami ricurca. Chai qꞌuipami Balaamca Diospaj espirituta chasquirca. 3 Chaimi paica cashna nishpa huillai callarirca:

10 Chaimi Balacca Balaamhuan pꞌiñarirca. Balacca yallitaj pꞌiñarishpa paipaj maquicunapi huajtarishpaca Balaamtaca cashnami nirca: “Ñuca contracunata maldicichunmi cayarcani. Pero canca cai quimsa cutinmi paicunataca bendiciashcangui. 11 Cai rato cambaj huasiman tigrai. Ñucaca cantaca ashtahuanmi jatunyachisha nircani. Pero ricui, Jehová Diosca chaita can ama chasquichunmi jarcashca” nircami.

12 Balaamca Balactaca cashnami nirca: “¿Manachu can cachashca huillajcunamanca: 13 ‘Balac paipaj huasi junda cullquita, orota cujpipish ñucaca ima allitapish, ima mana allitapish Jehová Dios mana mandajpica ñuca munaimantaca mana rurai tucushachu’ nircani? ¿Manachu ‘Ñucaca Jehová Dios ima nishcallatami huillasha’ nircani? 14 Cunanca ñuca llajtaman rishallami. Pero manaraj rishpa cai pueblo cambaj pueblota shamuj punllacunapi imata ruranata shamui huillasha” nircami. 15 Chai qꞌuipaca paica cashna nishpami huillai callarirca:

20 Balaamca Amalecta ricushpaca:

21 Balaamca quenitacunata ricushpaca cashna nishpami huillashpa catirca:

“Cambaj huasica alli shayachishcami can, cambaj causanaca jatun pata rumi jahuapimi can.

22 Pero maijan runapish Cayintaca rupachingami.

¿Asiria llajtaman canta prezuta shina apachunca mashna tiempotaj illan?” nircami.

23 Balaamca cashna nishpami huillashpa catirca:

“¡Aij! ¿Dios chaicunata rurajpica pitaj quishpiringari?

Pero paipishmi tucui tucuchishca canga” nircami.

25 Chai qꞌuipaca Balaamca jatarishpa paipaj llajtaman tigrarcallami. Balacpish paipaj ñanta rircallami.

25 Sitimpi causacushpami israelita cꞌaricunaca Moab llajta huarmicunahuan huainayarcacuna. 2 Chai llajtamanta huarmicunaca paicunapaj dioscunaman sacrificiocunata cushpaca israelita cꞌaricunatami invitajcuna carca. Chaimi israelitacunaca chai dioscunaman cushca sacrificiocunata micui callarircacuna. Shinallataj chai huarmicunapaj dioscunapaj ñaupajpimi cumuri callarircacuna. 3 Chashnami israelitacunaca Peor nishcapi caj Baal diosta adorarcacuna. Chaimi Jehová Diosca israelitacunahuan pꞌiñarirca. 4 Jehová Diosca Moisestaca: “Chai gentecunata tucui pushajcunata japishpa Jehová Diospaj ñaupajpi huarcushpa churai. Chaitaca achijlla punllapi rurai. Chashnami Jehová Diosca israelitacunahuan ña mana yallitaj pꞌiñarishca canga” nircami. 5 Chaimi Moisesca israelitacunapaj juezcunataca: “Peor nishcapi caj Baal diosta adorajcunataca cada uno huañuchichij” nirca.

6 Pero chai ratomi shuj israelita cꞌarica shuj madianita huarmita pushashca ricurirca. Paica Moisés ricucujpi, tucui israelitacuna ricucujpimi paipaj huauquicuna maipi cashcaman chai huarmita pushacurca. Tucui israelitacunaca tandanacuna carpa huasi yaicunapimi huacacurcacuna. 7 Sacerdote Aaronpaj churi Eleazarpaj churi Finehás chaita ricushpaca chai ratomi israelitacunapaj chaupimanta jatarishpa shuj lanzata japirca. 8 Qꞌuipaca israelita cꞌarita catishpami carpa huasiman yaicurca. Chaipimi ishquindijta cꞌaritapish, huarmitapish paicuna charishcapi lanzahuan satishpa pasachirca. Chai ratomi israelitacunata huañuchij ungüica pararirca. 9 Huañuchij ungüihuanca 24.000 runacunami huañurcacuna.

10 Chai qꞌuipami Jehová Diosca Moisestaca cashna nirca: 11 “Sacerdote Aaronpaj churi Eleazarpaj churi Finehasmantami israelitacunahuanca ña mana pꞌiñarishca cani. Paica ñucapaj randi shujtaj dioscunata israelitacuna adorachunca mana saquircachu. Chaimantami israelitacunataca mana tucuchishcani. Ñucaca ñucallata adorachun munaj Diosmi cani. 12 Shinaca Finehasmanca tranquilo causaita charichun paihuan shuj ari ninacuita* rurashcata huillai. 13 Chai ari ninacuimantami paipish, paipaj huahua huahuacunapish sacerdotecuna shina achca tiempota sirvingacuna. Paica paipaj Diosta adoranapaj randi shujtaj dioscunata adorachunca mana saquircachu. Chaita rurashpami israelitacuna paicunapaj juchamanta perdonashca cachun ayudarca” nircami.

14 Madianita huarmindijta huañuchishca israelita cꞌarica Zimrí shutimi carca. Paica Salupaj churimi carca. Shinallataj Simeonpaj familiamanta shuj pushajmi carca. 15 Cutin Finehás huañuchishca madianita huarmica Cozbí shutimi carca. Paica Zur runapaj ushushimi carca. Zurca Madianpi shuj familiata pushajmi carca.

16 Chai qꞌuipami Jehová Diosca Moisestaca cashna nirca: 17 “Madianitacunata llaquichishpa paicunata tucuchi. 18 Paicunami Peor nishcapi cancunata inquitashpa juchapi urmachircacuna. Madianitacunata pushajpaj ushushi Cozbihuanmi chashna urmachircacuna. Chai huarmipish Peor nishcapi huañuchij ungüihuan cancunata huañuchi punllami huañuchishca carca” nircami.

26 Huañuchij ungüi pasashca qꞌuipami Jehová Diosca Moisestapish, sacerdote Aaronpaj churi Eleazartapish cashna nirca: 2 “Tucui israelitacunataca 20 huatacunata charijpi o ashtahuan huatacunata charijpica según paicunapaj yayacunapaj familiacunata shuj censota ruraichij. Israel llajta soldadocunahuan macanacuiman rinata pudij tucui cꞌaricunata yupaichij” nircami. 3 Chashna nijpimi Moisespish, sacerdote Eleazarpish Moab chaquishca pambapi israelitacunahuan parlarcacuna. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca. Paicunaca: 4 “Tucuicunata 20 huatacunata o ashtahuan huatacunata charijpica shuj censota ruraichij. Jehová Dios Moisesman mandashca shina ruraichij” nircacunami.

Egipto llajtamanta llujshimuj Israelpaj huahua huahuacunaca caicunami carca. 5 Israelpaj punta churica Rubenmi carca. Rubenpaj churicunaca caicunami carca: Hanokmantaca hanokitacunapaj familia, Palumantaca paluitacunapaj familia, 6 Hezronmantaca hezronitacunapaj familia, Carmimantaca carmitacunapaj familiami carca. 7 Paicunami rubenitacunapaj familiacuna carca. Tucui registrashcacunaca 43.730 runacunami carca.

8 Palupaj churica Eliab shutimi carca. 9 Eliabpaj churicunaca Nemuel, Datán, Abiram shuticunami carca. Datanpish, Abirampish israelitacunamanta agllashcacunami carca. Coreta apoyaj runacuna Jehová Diospaj contra jatarijpica chai ishqui runacunapishmi Moisespaj contra, Aaronpaj contra jatarircacuna.

10 Chaimi allpa pascarishpa paicunata millpurca. 250 runacunata nina rupachijpica Corepish paita apoyaj runacunapishmi huañurcacuna. Paicunahuan ima tucushcaca shujtajcunapaj advertenciami carca. 11 Shinapish Corepaj churicunaca mana huañurcacunachu.

12 Simeonpaj churicunamanta shamuj familiacunaca caicunami carca: Nemuelmantaca nemuelitacunapaj familia, Jaminmantaca jaminitacunapaj familia, Jakinmantaca jakinitacunapaj familia, 13 Zerahmantaca zerahitacunapaj familia, Shaulmantaca shaulitacunapaj familiami carca. 14 Paicunami simeonitacunapaj familiacuna carca. Paicunaca 22.200 runacunami carca.

15 Gadpaj churicunamanta shamuj familiacunaca caicunami carca: Zefonmantaca zefonitacunapaj familia, Haguimantaca haguitacunapaj familia, Sunimantaca sunitacunapaj familia, 16 Oznimantaca oznitacunapaj familia, Erimantaca eritacunapaj familia, 17 Arodmantaca aroditacunapaj familia, Arelimantaca arelitacunapaj familiami carca. 18 Paicunami Gadpaj churicunapaj familiacuna carca. Tucui registrashcacunaca 40.500 runacunami carca.

19 Judapaj churicunaca Er, Onán shuticunami carca. Paicunaca Canaán allpapimi huañurcacuna. 20 Judapaj churicunamanta shamuj familiacunaca caicunami carca: Selamantaca selanitacunapaj familia, Perezmantaca perezitacunapaj familia, Zerahmantaca zerahitacunapaj familiami carca. 21 Perezpaj churicunaca caicunami carca: Hezronmantaca hezronitacunapaj familia, Hamulmantaca hamulitacunapaj familiami carca. 22 Paicunami Judapaj familiacuna carca. Tucui registrashcacunaca 76.500 runacunami carca.

23 Isacarpaj churicunamanta shamuj familiacunaca caicunami carca: Tolamantaca tolaitacunapaj familia, Puvamantaca punitacunapaj familia, 24 Jasubmantaca jasubitacunapaj familia, Simronmantaca simronitacunapaj familiami carca. 25 Paicunami Isacarpaj familiacuna carca. Tucui registrashcacunaca 64.300 runacunami carca.

26 Zabulonpaj churicunamanta shamuj familiacunaca caicunami carca: Seredmantaca sereditacunapaj familia, Elonmantaca elonitacunapaj familia, Jahleelmantaca jahleelitacunapaj familiami carca. 27 Paicunami zabulonitacunapaj familiacuna carca. Tucui registrashcacunaca 60.500 runacunami carca.

28 Josepaj huahua huahuacunaca Manasespaj familia, Efrainpaj familiami carca. 29 Manasespaj churicunaca caicunami carca. Makirmantaca makiritacunapaj familiami carca. Makirca Galaadpaj yayami carca. Galaadmantaca galaaditacunapaj familiami carca. 30 Galaadpaj churicunaca caicunami carca: Yezermantaca yezeritacunapaj familia, Helecmantaca helequitacunapaj familia, 31 Asrielmantaca asrielitacunapaj familia, Siquemmantaca siquemitacunapaj familia, 32 Semidamantaca semidaitacunapaj familia, Hefermantaca heferitacunapaj familiami carca. 33 Heferpaj churi Zelofehadca churicunataca mana charircachu, ushushicunallatami charirca. Zelofehadpaj ushushicunaca Mahlá, Noá, Hoglá, Milcá, Tirzá shuticunami carca. 34 Paicunami Manasespaj familiacuna carca. Tucui registrashcacunaca 52.700 runacunami carca.

35 Efrainpaj churicunamanta shamuj familiacunaca caicunami carca: Sutelahmantaca sutelahitacunapaj familia, Bekermantaca bekeritacunapaj familia, Tahanmantaca tahanitacunapaj familiami carca. 36 Sutelahpaj churicunaca caicunami carca. Eranmantaca eranitacunapaj familiami carca. 37 Paicunami Efrainpaj churicunamanta shamuj familiacuna carca. Tucui registrashcacunaca 32.500 runacunami carca. Paicunami Josepaj churicunamanta shamuj familiacuna carca.

38 Benjaminpaj churicunamanta shamuj familiacunaca caicunami carca: Belamantaca belaitacunapaj familia, Asbelmantaca asbelitacunapaj familia, Ahirammantaca ahiramitacunapaj familia, 39 Sefufammantaca sufamitacunapaj familia, Hufammantaca hufamitacunapaj familiami carca. 40 Belapaj churicunaca Ard, Naamán shuticunami carca. Ardmantaca arditacunapaj familia, Naamanmantaca naamitacunapaj familiami carca. 41 Paicunami Benjaminpaj churicunamanta shamuj familiacuna carca. Tucui registrashcacunaca 45.600 runacunami carca.

42 Danpaj churicunamanta shamuj familiacunaca caicunami carca. Suhammantaca suhamitacunapaj familiami carca. Paicunami Danpaj huahua huahuacunamanta shamuj familiacuna carca. 43 Suhamitacunamanta tucui registrashcacunaca 64.400 runacunami carca.

44 Aserpaj churicunamanta shamuj familiacunaca caicunami carca: Imnamantaca imnitacunapaj familia, Isvimantaca isvitacunapaj familia, Beriasmantaca beritacunapaj familiami carca. 45 Beriaspaj churicunapaj familiacunaca caicunami carca: Hebermantaca heberitacunapaj familia. Malkielmantaca malkielitacunapaj familia. 46 Aserpaj ushushica Sérah shutimi carca. 47 Paicunami Aserpaj churicunapaj familiacuna carca. Tucui registrashcacunaca 53.400 runacunami carca.

48 Neftalipaj churicunamanta shamuj familiacunaca caicunami carca: Jahzeelmantaca jahzeelitacunapaj familia, Gunimantaca gunitacunapaj familia, 49 Jezermantaca jezeritacunapaj familia, Silemmantaca silemitacunapaj familiami carca. 50 Paicunami Neftalipaj huahua huahuacunapaj familiacuna carca. Tucui registrashcacunaca 45.400 runacunami carca.

51 Israelitacunamanta tucui registrashcacunaca 601.730 runacunami carca.

52 Chai qꞌuipami Jehová Diosca Moisestaca cashna nirca: 53 “Allpaca paicunapajmi herencia shina chaupishca canga. Shuticunata listapi churashca shinallatajmi chaupishca canga. 54 Achca cajcunamanca herenciataca mirachinami cangui. Cutin ashalla cajcunamanca herenciataca menoranami cangui. Cada familiami mashna shuticunata registrashca shinallataj herenciata japingacuna. 55 Pero allpataca sorteashpami chaupina can. Cada familiami paicunapaj familiaman cushca herencia allpata chasquina can. 56 Cada familiapaj herencia allpataca achcacuna cajpipish, ashallacuna cajpipish sorteashpami chaupina can” nircami.

57 Levitacunapaj registrashca familiacunaca caicunami carca: Guersonmantaca guersonitacunapaj familia, Cohatmantaca cohatitacunapaj familia, Merarimantaca meraritacunapaj familiami carca. 58 Levitacunapaj familiacunaca caicunami carca: libnitacunapaj familia, hebronitacunapaj familia, mahlitacunapaj familia, musitacunapaj familia, coreitacunapaj familiami carca.

Cohatca Amrampaj yayami carca. 59 Amrampaj huarmica Levipaj ushushi* Jokebedmi carca. Levica Egipto llajtapi cashpami Jokébed ushushitaca paipaj huarmihuan charirca. Jokebedca Amramhuanmi Aaronta, Moisesta, Miriamtapish charirca. 60 Aaronca Nadabpaj, Abihupaj, Eleazarpaj, Itamarpaj yayami carca. 61 Pero Nadabpish, Abihupish Jehová Diospaj ñaupajpi mana cuna cashca ofrendata* cushcamantami huañurcacuna.

62 Tucui registrashca levitacunaca 23.000 cꞌaricunami carca. Shuj quillata charij cꞌari huahuacunamanta huichimanmi registrashca carcacuna. Paicunaca israelitacunahuan ima herenciata mana chasquina cashcamantami israelitacunahuanca mana registrashca carcacuna.

63 Chai israelitacunatami Moisespish, sacerdote Eleazarpish Moab chaquishca pambapi registrashcacuna carca. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca. 64 Pero paicunapurapica Sinaí chaquishca pambapi cashpa Moisespish, sacerdote Aaronpish israelitacunata censota rurashpa registrashcacunaca shujllapish mana carcachu. 65 Jehová Diosca paicunamantaca: “Chaquishca pambapimi huañungacuna” nishcami carca. Chaimantami paicunapuramantaca shuj runallapish mana saquirirca. Jefunepaj churi Calebhuan, Nunpaj churi Josuellahuanmi saquirircacuna.

27 Chai qꞌuipami Zelofehadpaj ushushicunaca Moisespajman cꞌuchuyarcacuna. Zelofehadca Heferpaj churimi carca. Heferca Galaadpaj churimi carca. Galaadca Makirpaj churimi carca. Makirca Manasespaj churimi carca. Zelofehadca Josepaj churi Manasespaj familiamantami carca. Paipaj ushushicunaca Mahlá, Noá, Hoglá, Milcá, Tirzá shuticunami carca. 2 Paicunaca tandanacuna carpa huasi yaicunaman cꞌuchuyashpami Moisesta, sacerdote Eleazarta, pushajcunata, tucui israelitacunatapish cashna nircacuna: 3 “Ñucanchij yayaca chaquishca pambapimi huañurca. Pero paica Coreta apoyaj runacuna Jehová Diospaj contra jatarijpica mana paicunahuan carcachu. Paica paipaj juchallamantatajmi huañurca. Ashtahuanpish cꞌari huahuacunataca mana charircachu. 4 ¿Ñucanchij yaya shuj cꞌari huahuata mana charishcallamantachu paipaj shutica paipaj familiamanta chingaringa? Ñucanchij yayapaj huauquicunaman shinallataj ñucanchijmanpish shuj herenciata cui” nircacunami. 5 Chashna nijpimi Moisesca paicuna ima nishcata Jehová Diosman huillarca.

6 Chaimi Jehová Diosca Moisestaca cashna nirca: 7 “Zelofehadpaj ushushicunaca allitami nicun. Paicunapaj yayapaj huauquicunaman shinallatajmi paicunamanpish shuj herenciata cuna cangui. Paicunapaj yaya japina cashca herenciaca paicunapajmi canga. 8 Israelitacunatapish cashna ningui: ‘Shuj runa shuj cꞌari huahuata mana charishpa huañujpica paipaj herenciataca paipaj ushushimanmi cuna canguichij. 9 Ushushicunata mana charijpica paipaj herenciataca paipaj huauquicunamanmi cuna canguichij. 10 Huauquicunata mana charijpica paipaj herenciataca yayapaj huauquicunamanmi cuna canguichij. 11 Paipaj yaya huauquicunata mana charijpica paipaj herenciataca ashtahuan cꞌuchulla shuj familiamanmi cuna canguichij. Chai cꞌuchulla familiami herenciahuanca saquiringa. Caica israelitacunapajca shuj leymi canga. Jehová Dios Moisesman mandashca shinami canga’ ningui” nircami.

12 Qꞌuipaca Jehová Diosca Moisestaca cashnami nirca: “Abarimpi caj urcuman huichiyai. Chai urcumanta israelitacunaman ñuca cugrishca allpata ricui. 13 Chai allpata ricushca qꞌuipaca canca huañunguimi.* Cambaj huauqui Aarón shinallatajmi huañungui. 14 Israelitacuna Zin nishca chaquishca pambapi cashpa ñucamanta quejarijpica cancunaca ñuca mandashcataca mana cazurcanguichijchu. Paicunaman yacuta cujpica paicunapaj ñaupajpi ñucataca mana jatunyachircanguichijchu. Cai yacucunaca Cadespi saquirij Meribá yacucunami can. Meribá yacucunaca Zin nishca chaquishca pambapimi can” nircami.

15 Chai qꞌuipami Moisesca Jehová Diostaca cashna nirca: 16 “Tucui gentecunaman causaita cuj Jehová Dioslla, israelitacunata pushachunca shuj runata churapai. 17 Paimi israelitacunata ñaupashpa llujshinga, ñaupashpa yaicunga. Ima ruraicunapipish paimi puntapi canga. Chashnami Jehová Diospaj puebloca michij illajlla ovejacuna shina mana canga” nircami. 18 Chaimi Jehová Diosca Moisestaca cashna nirca: “Nunpaj churi Josueta pushamui. Paica alli yachajmi can. Paipaj jahuapi cambaj maquita churai.* 19 Chai qꞌuipaca sacerdote Eleazarpaj ñaupajman, tucui israelitacunapaj ñaupajman pushai. Chaipimi tucuicunapaj ñaupajpi paicunata pushaj cachun nombrana cangui. 20 Tucui israelitacuna paita cazuchunmi can charishca autoridadta paiman ashata cuna cangui. 21 Josueca sacerdote Eleazarpajmanmi ringa. Chaimi sacerdoteca Urimta shitashpa Jehová Dios imata decidishcata yachangapaj paimanta tapunga. Josuepish, tucui israelitacunapish, tucui pueblomi pai mandajpi llujshinga, pai mandajpi yaicunga” nircami.

22 Chaimi Moisesca Jehová Dios mandashca shinallataj rurarca. Paica Josuetaca sacerdote Eleazarpaj ñaupajman, tucui israelitacunapaj ñaupajmanmi pusharca. 23 Jehová Dios paiman nishca shinami Moisesca Josuepaj jahuapi maquicunata churashpa israelitacunata pushaj cachun nombrarca.

28 Chai qꞌuipami Jehová Diosca Moisestaca cashna nirca: 2 “Israelitacunamanca caita mandai. Paicunataca: ‘Ñuca ofrendataca cunatajmi canguichij. Chaica ñuca tandami canga. Ninahuan rupachishca mishquijllata ashnacuj ñuca ofrendacunataca agllashca punllacunapimi ñucaman cuna canguichij’ ni.

3 Paicunataca cashnapish ni: ‘Ninahuan rupachishca cai ofrendatami Jehová Diosman cuna canguichij: cada punllami shuj huatata charij sano ishqui malta ovejacunata rupachishca ofrendata shina siempre cuna canguichij. 4 Shuj malta ovejataca tutamanta ladomi cuna cangui, caishuj malta ovejataca tutayaitami cuna cangui. 5 Cada ofrendahuanmi shuj litro* aceite de olivahuan chagrushca ishqui libra yalli* alli* harinataca grano ofrendata shina cuna cangui. 6 Chaica punllanta rupachishca ofrendami can. Chaitaca Jehová Diosman cushca ninahuan rupachishca, mishquijllata ashnacuj ofrendata shina cuchunmi Sinaí urcupi mandashca carca. 7 Chai ofrendahuanca vino ofrendatapish cungui. Cada malta ovejamantami shuj litro vino ofrendata cuna cangui. Chaitaca Jehová Diosman cushca vino ofrendata shina altarpi tallingui. 8 Caishuj malta ovejataca tutayaitami cuna cangui. Chai ofrendataca grano ofrendandij, vino ofrendandijmi cuna cangui. Tutamanta ladoman cushca ofrendata shinallatajmi cuna cangui. Chaica Jehová Diosman cushca ninahuan rupachishca, mishquijllata ashnacuj ofrendami can.

9 Shinapish sábado punllaca shuj huatata charij sano ishqui malta ovejacunatami cuna canguichij. Cutin grano ofrendata shinaca aceitehuan chagrushca chuscu libra yalli* alli harinatami vino ofrendandij cuna canguichij. 10 Cai ofrendaca sábado punllapaj rupachishca ofrendami can. Punllanta rupachishca ofrendata cushpapish, vino ofrendata cushpapish cai ofrendatapishmi cuna canguichij.

11 Cada quilla callaripimi ishqui malta torota, shuj carnerota, shuj huatata charij sano canchis malta ovejacunataca rupachishca ofrendata shina Jehová Diosman cuna canguichij. 12 Shinallataj cada toromantami aceitehuan chagrushca canchis libra yalli* alli harinata cuna canguichij. Cutin carneromantaca aceitehuan chagrushca chuscu libra yalli alli harinatami cuna canguichij. 13 Cada malta ovejamantami aceitehuan chagrushca ishqui libra yalli alli harinata cuna canguichij. Chaica mishquijllata ashnacuj rupachishca ofrendami canga. Shinallataj Jehová Diosman cushca ninahuan rupachishca ofrendami canga. 14 Cada toromantami casi ishqui litro* vinota cuna canguichij. Carneromantaca shuj litro yalli* vinotami cuna canguichij. Cutin malta ovejamantaca shuj litro vinotami cuna canguichij. Cai ofrendaca cada quilla rupachishca ofrendami canga. Caitaca huatapica cada quillami cuna canguichij. 15 Shinallataj juchamanta ofrendata shinaca shuj malta chivotami Jehová Diosman cuna canguichij. Chaita cushpapish punllanta rupachishca ofrendata, vino ofrendatapishmi cuna canguichij.

16 Primer quillapaj 14 punllapica Jehová Diospaj Pascua fiestatami rurana canguichij. 17 Chai quillapaj 15 punllapica shuj fiestami tiyanga. Canchis punllacunatami levadura illaj tandata micuna canguichij. 18 Primer punllapica Diosta adorangapaj shuj tandanacuimi tiyanga. Ima sinchi trabajotaca mana ruranachu canguichij. 19 Jehová Diosman cushca ninahuan rupachishca ofrendata shinaca ishqui malta torota, shuj carnerota, shuj huatata charij canchis malta ovejacunatami cuna canguichij. Sano animalcunatami cuna canguichij. 20 Chai animalcunamantaca aceitehuan chagrushca alli harinatapishmi grano ofrendata shina cuna canguichij. Toromantaca canchis libra yalli harinatami cuna canguichij. Cutin carneromantaca chuscu libra yalli harinatami cuna canguichij. 21 Shinallataj canchis malta ovejacunamantaca cada unomantami ishqui libra yalli harinata cuna canguichij. 22 Chashnallataj juchamanta ofrendata shinaca shuj cꞌari chivotami cuna canguichij. Chashnami cancunapaj juchacunamanta perdonashca canguichij. 23 Punllanta rupachishca ofrendamanta tutamanta lado rupachishca ofrendata cushpapish tucui caicunatami cuna canguichij. 24 Cada punllami chashnallataj cuna canguichij. Canchis punllacunatami Jehová Diosman cushca ninahuan rupachishca, mishquijllata ashnacuj ofrendataca micunata shina cuna canguichij. Chaitaca punllanta rupachishca ofrendata cushpapish, vino ofrendata cushpapishmi cuna canguichij. 25 Séptimo punllapica Diosta adorangapajmi shuj tandanacuita rurana canguichij. Ima sinchi trabajotaca mana ruranachu canguichij.

26 Punta pꞌucushca granocunata tandai punlla, Semana nishca fiestata ruracushpa Jehová Diosman mushuj grano ofrendata cui punllami Diosta adorangapaj shuj tandanacuita rurana canguichij. Ima sinchi trabajotaca mana ruranachu canguichij. 27 Jehová Diosman cushca mishquijllata ashnacuj rupachishca ofrendata shinaca ishqui malta torota, shuj carnerota, shuj huatata charij canchis malta ovejacunatami cuna canguichij. 28 Shinallataj grano ofrendata shinaca aceitehuan chagrushca alli harinatami cuna canguichij. Cada toromantaca canchis libra yalli harinata, carneromantaca chuscu libra yalli harinatami cuna canguichij. 29 Shinallataj canchis malta ovejacunamantaca cada unomantami ishqui libra yalli harinata cuna canguichij. 30 Chashnallataj shuj malta chivotami cuna canguichij. Chashnami cancunapaj juchacunamanta perdonashca canguichij. 31 Punllanta rupachishca ofrendata cushpapish, grano ofrendata cushpapish tucui caicunatapishmi cuna canguichij. Sano animalcunatami vino ofrendacunandij cuna canguichij.

29 Séptimo quillapaj primer punllapica Diosta adorangapajmi shuj tandanacuita rurana canguichij. Ima sinchi trabajotaca mana ruranachu canguichij. Chai punllaca trompetapimi tocana canguichij. 2 Jehová Diosman cushca mishquijllata ashnacuj rupachishca ofrendata shinaca shuj malta torota, shuj carnerota, shuj huatata charij canchis malta ovejacunatami cuna canguichij. Tucui animalcunami sano cana can. 3 Chai animalcunahuanca grano ofrendata shinaca aceitehuan chagrushca alli* harinatami cuna canguichij. Toromantaca canchis libra yalli* harinata, carneromantaca chuscu libra yalli* harinatami cuna canguichij. 4 Shinallataj canchis malta ovejacunamantaca cada unomantami ishqui libra yalli* harinata cuna canguichij. 5 Juchamanta ofrendata shinaca shuj malta chivotami cuna canguichij. Chashnami cancunapaj juchaca perdonashca canga. 6 Cada quilla rupachishca ofrendata grano ofrendandij cushpapish, punllanta rupachishca ofrendata grano ofrendandij, vino ofrendacunandij cushpapish ima shina rurana cashca shinallatajmi tucui caicunata cuna canguichij. Chaica Jehová Diosman cushca ninahuan rupachishca, mishquijllata ashnacuj ofrendami canga.

7 Séptimo quillapaj chunga punllapica Diosta adorangapajmi shuj tandanacuita rurana canguichij. Chai punllaca humillarinami* canguichij. Ima sinchi trabajotaca mana ruranachu canguichij. 8 Jehová Diosman cushca mishquijllata ashnacuj rupachishca ofrendata shinaca shuj malta torota, shuj carnerota, shuj huatata charij canchis malta ovejacunatami cuna canguichij. Tucui animalcunami sano cana can. 9 Chai animalcunahuanca grano ofrendata shinaca aceitehuan chagrushca alli harinatami cuna canguichij. Toromantaca canchis libra yalli harinata, carneromantaca chuscu libra yalli harinatami cuna canguichij. 10 Shinallataj canchis malta ovejacunamantaca cada unomantami ishqui libra yalli harinata cuna canguichij. 11 Shinallataj Juchacunata perdonana punllapi cuna juchamanta ofrendata cushpapish, punllanta rupachishca ofrendata grano ofrendandij, vino ofrendacunandij cushpapish juchamanta ofrendata shinaca shuj malta chivotami cuna canguichij.

12 Shinallataj séptimo quillapaj 15 punllapica Diosta adorangapajmi shuj tandanacuita rurana canguichij. Ima sinchi trabajotaca mana ruranachu canguichij. Cancunaca Jehová Diospajmi canchis punllacunata shuj fiestata rurana canguichij. 13 Rupachishca ofrendata shinaca 13 malta torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. Chaica Jehová Diosman cushca ninahuan rupachishca, mishquijllata ashnacuj ofrendami canga. 14 Grano ofrendata shinaca aceitehuan chagrushca alli harinatami cuna canguichij. 13 torocunamantaca cada unomantami canchis libra yalli harinata cuna canguichij. Ishqui carnerocunamantaca cada unomantami chuscu libra yalli harinata cuna canguichij. 15 Shinallataj 14 malta ovejacunamantaca cada unomantami ishqui libra yalli harinata cuna canguichij. 16 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj malta chivotami cuna canguichij.

17 Segundo punllapica 12 malta torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 18 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunata cuna canguichij. 19 Punllanta rupachishca ofrendata grano ofrendandij, vino ofrendacunandij cushpapish juchamanta ofrendata shinaca shuj malta chivotami cuna canguichij.

20 Tercer punllapica 11 torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 21 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunatapish cuna canguichij. 22 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj cꞌari chivotami cuna canguichij.

23 Cuarto punllapica 10 torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 24 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunatapish cuna canguichij. 25 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj malta chivotami cuna canguichij.

26 Quinto punllapica 9 torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 27 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunatapish cuna canguichij. 28 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj cꞌari chivotami cuna canguichij.

29 Sexto punllapica 8 torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 30 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunata cuna canguichij. 31 Punllanta rupachishca ofrendata grano ofrendandij, vino ofrendacunandij cushpapish juchamanta ofrendata shinaca shuj cꞌari chivotami cuna canguichij.

32 Séptimo punllapica 7 torocunata, 2 carnerocunata, shuj huatata charij 14 malta ovejacunatami cuna canguichij. Tucui animalcunami sano cana can. 33 Ima shina rurana cashca shinallatajmi torocunamanta, carnerocunamanta, malta ovejacunamantapish grano ofrendata, vino ofrendacunata cuna canguichij. 34 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj cꞌari chivotami cuna canguichij.

35 Octavo punllapica shuj jatun tandanacuitami rurana canguichij. Chai punllaca ima sinchi trabajotaca mana ruranachu canguichij. 36 Rupachishca ofrendata shinaca shuj torota, shuj carnerota, shuj huatata charij canchis malta ovejacunatami cuna canguichij. Tucui animalcunami sano cana can. Chaica Jehová Diosman cushca ninahuan rupachishca, mishquijllata ashnacuj ofrendami canga. 37 Ima shina rurana cashca shinallatajmi toromanta, carneromanta, malta ovejacunamantapish grano ofrendata, vino ofrendacunata cuna canguichij. 38 Punllanta rupachishca ofrendata grano ofrendandij, vino ofrendandij cushpapish juchamanta ofrendata shinaca shuj cꞌari chivotami cuna canguichij.

39 Cancunapaj fiestacunapica cai ofrendacunatami Jehová Diosman cuna canguichij. Shinallataj Diosman cusha nishca ofrendacunata, shungumanta cushca ofrendacunata, rupachishca ofrendacunata, grano ofrendacunata, vino ofrendacunata, Dioshuan alli tucungapaj sacrificiocunatapishmi cuna canguichij’ ni” nircami. 40 Moisesca israelitacunamanca Jehová Dios tucui imalla mandashcatami huillarca.

30 Chai qꞌuipami Moisesca israelitacunapaj familiacunata pushajcunahuan parlashpaca cashna nirca: “Jehová Diosca caitami mandashca. 2 Shuj runa imata rurangapaj Jehová Diosman ari nishpa o imata mana rurangapaj jurashpaca pajtachinatajmi can. Pai ima nishcataca tucuitami rurana can.

3 Shuj huarmi jovenraj cashpa, paipaj yayapaj huasipi causacushparaj imata rurangapaj Jehová Diosman ari nishca cajpi o imata mana rurangapaj ari nishca cajpi, 4 imata rurangapaj ari nishcata o imata mana rurangapaj ari nishcata paipaj yaya yachaj chayashpa imata mana nijpica, chai huarmica pai imata rurangapaj ari nishcataca pajtachinami can. Shinallataj pai imata mana rurangapaj ari nishcataca pajtachinami can. 5 Pero imata pajtachingapaj ari nishcata o imata mana rurangapaj ari nishcata pajtachichun paipaj yaya jarcajpica mana pajtachinachu can. Jehová Diosca paipaj yaya ama pajtachichun jarcashcamantami chai huarmitaca perdonanga.

6 Shinapish chai huarmi imata rurangapaj ari nishca qꞌuipa o shuj promesata pajtachingapaj mana alli yuyashpa ari nishca qꞌuipa cazarajpi, 7 pero paipaj cusa chaita yachaj chayajpi, yachaj chayashca punlla imata mana nijpica chai huarmica imata rurangapaj ari nishcata o imata mana rurangapaj ari nishcataca pajtachinatajmi can. 8 Pero yachaj chayashca punlla pai ari nishcata o mana alli yuyashpa shuj promesata pajtachingapaj ari nishcata paipaj cusa pajtachichun jarcajpica Jehová Diosca chai huarmitaca perdonangami.

9 Shinallataj shuj viuda huarmi o divorciada huarmi imata rurangapaj ari nishpaca pai ari nishcataca tucuitami pajtachina can.

10 Shinapish shuj huarmi paipaj cusapaj huasipi cashparaj imata rurangapaj ari nishca cajpi o imata mana rurangapaj ari nishca cajpi, 11 pero paipaj cusa chaita yachaj chayashpa imata mana nijpi o mana jarcajpica tucui pai imata rurangapaj ari nishcata o imata mana rurangapaj ari nishcatami chai huarmica pajtachina can. 12 Pero paipaj cusa yachaj chayashca punlla imata rurangapaj ari nishpa jurashcata o imata mana rurangapaj ari nishpa jurashcata pajtachichun jarcajpica chai huarmica pai imata ari nishcataca mana pajtachinachu can. Paipaj cusa jarcashcamantami Jehová Diosca chai huarmita perdonanga. 13 Paipaj cusami imata rurangapaj ari nishcata o imata mana rurangapaj jurashcata pajtachichun saquinga mana cashpaca jarcanga. 14 Pero punllacuna pasajpi chai huarmipaj cusa mana imata nijpica paipaj huarmi imata rurangapaj ari nishcata o imata mana rurangapaj ari nishcata pajtachichun saquicushcatami ricuchinga. Paipaj huarmi imata nishcata yachaj chayashpa imata mana nishcamantami cusaca pajtachichun saquicushcata ricuchinga. 15 Pero yachaj chayashca asha tiempo qꞌuipa paipaj huarmi ari nishcata pajtachichun jarcashpaca paipaj huarmi pandarishcamantaca paimi culpayuj canga.

16 Jehová Diosca cusapajpish, paipaj huarmipajpish, yayapajpish, paipaj huasipi causaj joven ushushipajpish cai leycunatami Moisesman curca” nircami.

31 Chai qꞌuipami Jehová Diosca Moisestaca cashna nirca: 2 “Madianitacunataca israelitacunata ima shina llaquichishca shinallataj llaquichi. Chai qꞌuipami canca huañungui”* nircami.

3 Chaimi Moisesca israelitacunataca cashna nirca: “Madianitacunapaj contra macanacuchun cancunapuramanta huaquin runacunata allichichij. Madianitacunataca Jehová Diosmi llaquichinga. 4 Israelitacunapaj cada familiamantaca 1.000 runacunatami macanacuiman cachana canguichij” nircami. 5 Shinaca huaranga huaranga israelitacunamantaca 12.000 runacunatami macanacuiman richun allichircacuna. Cada familiamantami 1.000 runacunata allichircacuna.

6 Chaimi Moisesca chai runacunataca macanacuiman cacharca. Cada familiamantami 1.000 runacunata Eleazarpaj churi Finehás runahuan cacharca. Sacerdote Finehasca soldadocunahuanmi rirca. Paica Diospajlla chꞌicanyachishca cosascunata apashca, señalcunata cungapaj tocana trompetacunata apashcami rirca. 7 Paicunaca Jehová Dios Moisesman mandashca shinami madianitacunahuan macanacurcacuna. Tucui cꞌaricunatami huañuchircacuna. 8 Chai runacunata huañuchishca jahuapish madianitacunapaj reycunatami huañuchircacuna. Madianitacunapaj pichca reycunaca Eví, Réquem, Zur, Hur, Reba shuticunami carca. Shinallataj Beorpaj churi Balaamtami espadahuan huañuchircacuna. 9 Pero israelitacunaca Madianmanta uchilla huahuacunata, huarmicunataca prezumi aparcacuna. Shinallataj paicunapaj charina tucui animalcunahuan, huagracunahuan, shujtaj cosascunahuanpishmi saquirircacuna. 10 Madianitacuna maipi causacushca tucui llajtacunata, paicunapaj tucui carpa huasicunatami rupachircacuna. 11 Shinallataj tucui imalla quichushcatami aparcacuna. Gentecunatapish, animalcunatapishmi aparcacuna. 12 Qꞌuipaca prezu japishcacunatapish, tucui imalla quichushcatapish Moisespajman, sacerdote Eleazarpajman, tucui israelitacunapajmanmi aparcacuna. Paicunaca Moab chaquishca pambapimi carpa huasicunapi carcacuna. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca.

13 Moisespish, sacerdote Eleazarpish, israelitacunata tucui pushajcunapishmi carpa huasicuna canllapi paicunata tupanaman llujshircacuna. 14 Pero Moisesca soldadocunata pushajcunahuanca achcatami pꞌiñarirca. 1.000 soldadocunata pushajcunahuan, 100 soldadocunata pushajcunahuanmi achcata pꞌiñarirca. Chai pushajcunaca macanacuimantami tigramurcacuna. 15 Moisesca paicunataca cashnami nirca: “¿Ima nishpataj huarmicunataca mana huañuchircanguichij? 16 ¡Ricuichij! Chai huarmicunami Balaam mandashcata catishpa Peor nishcapi yanga diosta adorachun inquitashpa israelitacunataca Jehová Diosmanta caruyachircacuna. Shinallataj paicunapaj culpamantami Jehová Diospaj puebloca huañuchij ungüihuan llaquichishca carca. 17 Shinaca tucui cꞌari huahuacunata, cꞌarihuan chayarishca tucui huarmicunatami huañuchina canguichij. 18 Pero cꞌarihuan mana chayarishca tucui joven huarmicunataca causashpa catichun saquichijlla. 19 Cancunaca carpa huasicuna canllamanmi canchis punllacunata saquirina canguichij. Maijan runata huañuchijpish, shuj huañushca cuerpota tuparijpish tercer punllapi, séptimo punllapimi chuyayarina can. Cancunapish, cancuna prezu apamushcacunapishmi chuyayarina canguichij. 20 Tucui ropata, carahuan rurashca tucui cosascunata, chivo millmahuan rurashca tucui cosascunata, maderahuan rurashca tucui cosascunatapishmi chuyayachina canguichij” nircami.

21 Chai qꞌuipami sacerdote Eleazarca macanacuiman rishca soldadocunataca cashna nirca: “Jehová Dios Moisesman mandashca leyca caimi can: 22 ‘Orollata, cullquillata, cobrellata, fierrollata, estañollata, plomollatami 23 ninapi rupachina canguichij. Chashnami chaicunaca chuya saquiringa. Ninapi mana yacuyajcunallatami ninapi rupachina canguichij. Chashna jahuapish chaicunataca chuyayachina yacuhuanmi chuyayachina canguichij. Ninapi rupashpa yacuyajllataca yacuhuanmi maillana canguichij. 24 Séptimo punllapica cancunapaj ropatami tajshana canguichij. Chashnami chuya saquiringuichij. Qꞌuipaca carpa huasicuna maipi cashcamanmi yaicui tucunguichij’” nircami.

25 Chai qꞌuipami Jehová Diosca Moisestaca cashna nirca: 26 “Tucui quichushpa apamushcacunamantaca shuj inventariota* rurai. Gentecunamantapish, animalcunamantapish shuj inventariota rurai. Chaitaca sacerdote Eleazarhuan, yayacunapaj familiacunata pushajcunahuan rurai. 27 Quichumushcacunataca ishqui partepi chaupi. Shuj parteca macanacuiman rij runacunapajmi canga, caishuj parteca tucui israelitacunapajmi canga. 28 Macanacuiman rij soldadocunataca paicuna quichumushcacunamanta impuestota shina Jehová Diosman cuchunmi mañana cangui. Cada 500 gentecunamanta shujta, huagracunamanta shujta, burrocunamanta shujta, ovejacunamanta shujtami mañana cangui. 29 Chaitaca paicunaman cushca chaupimanta japishpami sacerdote Eleazarman cuna cangui. Chaica Jehová Diospaj shuj ofrenda shinami canga. 30 Israelitacunaman cushca chaupimantaca cada 50 gentecunamanta shujta, huagracunamanta shujta, burrocunamanta shujta, ovejacunamanta shujta, tucui shujtaj charina animalcunamantapish shujta japishpami levitacunaman cuna cangui. Paicunaca Jehová Diospaj carpa huasipimi trabajocunata rurancuna” nircami.

31 Chaimi Moisespish, sacerdote Eleazarpish Jehová Dios Moisesman mandashca shinallataj rurarcacuna. 32 Macanacuiman rij gentecuna quichushpa apamushcamanta saquirishcaca 675.000 ovejacunami carca. 33 Shinallataj 72.000 huagracunami carca. 34 Chashnallataj 61.000 burrocunami carca. 35 Cꞌarihuan manaraj chayarishca huarmicunaca 32.000 huarmicunami carca. 36 Macanacuiman rijcunaman chaupishpa cushca ovejacunaca 337.500 ovejacunami carca. 37 Jehová Diospaj chꞌicanyachishca impuestoca 675 ovejacunami carca. 38 Shinallataj 36.000 huagracunami carca. Chaicunamanta Jehová Diospaj chꞌicanyachishca impuestoca 72 huagracunami carca. 39 Shinallataj 30.500 burrocunami carca. Chaicunamanta Jehová Diospaj chꞌicanyachishca impuestoca 61 burrocunami carca. 40 Shinallataj 16.000 gentecunami carca. Chai gentecunamanta Jehová Diospaj chꞌicanyachishca impuestoca 32 gentecunami carca. 41 Chai impuestotami Moisesca sacerdote Eleazarman curca. Chaica Jehová Diospaj shuj ofrenda shinami carca. Moisesca Jehová Dios paiman mandashca shinami rurarca.

42 Moisesca macanacuiman rijcuna mishashpa quichumushcacunataca ishqui partepimi chaupirca. Shuj partetaca israelitacunamanmi curca. Israelitacunaman chaupishpa cushcaca caicunami carca. 43 Paicunaman chaupishpa cushca ovejacunaca 337.500 ovejacunami carca. 44 Paicunaman chaupishpa cushca huagracunaca 36.000 huagracunami carca. 45 Paicunaman chaupishpa cushca burrocunaca 30.500 burrocunami carca. 46 Paicunaman chaupishpa cushca gentecunaca 16.000 gentecunami carca. 47 Chashnami Moisesca israelitacunaman chaupishpa cushcataca cada 50 gentecunamanta shujta, cada 50 animalcunamanta shujta japishpa levitacunaman curca. Paicunaca Jehová Diospaj carpa huasipimi trabajocunata rurajcuna carca. Moisesca Jehová Dios paiman mandashca shinami rurarca.

48 Chai qꞌuipami 1.000 soldadocunata pushajcunapish, 100 soldadocunata pushajcunapish Moisespajman cꞌuchuyashpa 49 Moisestaca cashna nircacuna: “Canta sirvijcunaca ñucanchij mandachun churashca soldadocunatami cuentashcanchij. Paicunamantaca shujllapish mana faltanchu. 50 Shinaca cada uno imata japimushcata Jehová Diosman ofrendata shina cuchun saquipai. Orohuan rurashca cosascunata, chaquipi churarina uchilla cadenacunata, brazaletecunata, sellota churana anillocunata, aretecunata, shujtaj joyacunatapish paiman cuchun saquipai. Chashnami Jehová Diospaj ñaupajpica ñucanchij juchamanta perdonashca cashun” nircacunami.

51 Chaimi Moisespish, sacerdote Eleazarpish paicuna cushca orota, tucui joyacunata chasquircacuna. 52 Mil soldadocunata pushajcunapish, cien soldadocunata pushajcunapish ofrendata shina Jehová Diosman cushca tucui oroca 16.750 siclomi* carca. 53 Macanacuiman rij cada soldadomi imalla tiyashcacunata quichumushca carca. 54 Moisespish, sacerdote Eleazarpish 1.000 soldadocunata pushajcuna, 100 soldadocunata pushajcuna cushca orotaca tandanacuna carpa huasi ucumanmi aparcacuna. Chai oroca israelitacuna Jehová Dios ima shina ayudashcata yuyarichunmi carca.*

32 Rubenpaj huahua huahuacunapish, Gadpaj huahua huahuacunapish achca animalcunatami charircacuna. Paicunaca Jazer allpacunapish, Galaad* allpacunapish animalcunata huiñachingapaj alli cashcatami ricurcacuna. 2 Chaimi Gadpaj huahua huahuacunapish, Rubenpaj huahua huahuacunapish Moisespajman, sacerdote Eleazarpajman, israelitacunata pushajcunapajman rishpaca cashna nircacuna: 3 “Ñucanchijca Atarot, Dibón, Jazer, Nimrá, Hesbón, Elealé, Sebam, Nebo, Beón allpacunatami ricushcanchij. 4 Jehová Diosca israelitacunapaj ñaupajpi macanacushpami chai allpacunataca japirca. Chai allpacunaca animalcunata huiñachingapaj alli allpacunami can. Canta sirvij ñucanchijcunaca achca animalcunatami charinchij” nircacunami. 5 Shinallataj paicunaca: “Cambaj ñaupajpi alli ricurishca cajpica cai allpacunataca canta sirvij ñucanchijcunaman cuhuai. Jordán jatun yacu caishuj ladomanca ñucanchijtaca ama pasachichu” nircacunami.

6 Chashna nijpimi Moisesca Gadpaj huahua huahuacunatapish, Rubenpaj huahua huahuacunatapish cashna nirca: “Cancunapaj huauqui israelitacuna macanacunaman rijpica, ¿cancunaca caipichu causashpa saquirigringuichij? 7 ¿Ima nishpataj israelitacunataca desanimachinguichij? Chashna rurashpaca Jehová Dios paicunaman cusha nishca allpaman ama yaicuchunmi jarcacunguichij. 8 Cadés-Barneapi cashpa chai allpata ñuca ricunaman cachajpica cancunapaj yayacunapish chashnallatajmi rurarcacuna. 9 Paicunaca Escol pugru pambaman huichiyashpa chai allpata ricushpaca, Jehová Dios paicunaman cusha nishca allpaman ama yaicuchunmi israelitacunataca desanimachircacuna. 10 Chai punllaca Jehová Diosca achcatami pꞌiñarirca. Chaimantami cashna nishpa jurarca: 11 ‘Egipto llajtamanta llujshimuj 20 huatacunata o ashtahuan huatacunata charij runacunaca ñucata tucui shunguhuan mana cazushcamantami Abrahanman, Isaacman, Jacobman cushami nishpa jurashca allpataca mana ricungacuna. 12 Quenizitacunapuramanta Jefunepaj churi Calebhuan, Nunpaj churi Josuellahuanmi chai allpataca ricungacuna. Paicunaca Jehová Diostaca tucui shunguhuanmi cazushcacuna’ nishpami jurarca. 13 Chaimantami Jehová Diosca israelitacunahuan achcata pꞌiñarishpa Jehová Diospaj ñaupajpi mana allita ruraj gentecuna huañungacama 40 huatacunata caipi chaipi causachun saquirca. 14 Juchayuj runacuna, cancunapish cancunapaj yayacuna shinallatajmi ruracunguichij. Chaimantami Jehová Diosca israelitacunahuanca ashtahuan pꞌiñarishca can. 15 Cancuna paita cazunata saquijpica paipish cancunataca cutinmi chaquishca pambapi saquinga. Cancunapaj culpamantami tucui cai gentecunaca huañunga” nircami.

16 Chai qꞌuipami Moisespajman cꞌuchuyashpaca paicunaca cashna nircacuna: “Ñucanchij animalcunapaj corralcunata rumicunahuan caipi rurachun saquipai. Shinallataj ñucanchij huahuacunapaj llajtacunata shayachichun saquipai. 17 Pero ñucanchijca macanacungapajmi allichirishca cashun. Israelitacuna paicuna chayana lugarman chayangacamami paicunata ñaupashpa rishun. Chaicamaca ñucanchij huahuacunaca cai llajta gentecuna paicunata ama llaquichichunmi muyundijta pircashca llajtacunapi causangacuna. 18 Ñucanchijca cada israelita paipaj allpata herenciata shina chasquingacama ñucanchij huasicunamanca mana tigrashunchu. 19 Ñucanchijca Jordán jatun yacu caishuj ladomanpish, ashtahuan chaininijmanpish paicunahuanca ima herenciata mana chasquishunchu. Ñucanchijca Jordán jatun yacu inti llujshin ladopimi ñucanchij herenciata chasquishun” nircacunami.

20 Chashna nijpimi Moisesca paicunataca cashna nirca: “Caita ruraichij. Macanacuipajca Jehová Dios mandashca shina macanacunacunata japichij. 21 Cada unomi cancunapaj macanacunacunata japishpa Jehová Diospaj ñaupajpi macanacungapaj Jordán jatun yacuta pasana canguichij. Diosca paipaj contracunataca paipaj ñaupajmantami llujshichishpa cachanga. 22 Cancunaca Jehová Diospaj ayudahuanmi paicunapaj allpata quichungacama macanacuna canguichij. Chaita rurashpami cancunapaj huasiman tigrai tucunguichij. Jehová Diospaj ñaupajpipish, israelitacunapaj ñaupajpipish culpa illajmi saquiringuichij. Chai allpaca Jehová Diospaj ñaupajpica cancunapajmi canga. 23 Pero mana chaita rurashpaca Jehová Diospaj ñaupajpimi juchata ruranguichij. Chai juchamantami cancunaca castigashca canguichij. 24 Shinaca cancunapaj huahuacunapajmi llajtacunata shayachi tucunguichij. Cancunapaj animalcunapajpishmi corralcunata rurai tucunguichij. Pero cancuna ari nishcataca pajtachinami canguichij” nircami.

25 Gadpaj huahua huahuacunapish, Rubenpaj huahua huahuacunapish Moisestaca cashnami nircacuna: “Canta sirvij ñucanchijcunaca ñucanchij amito mandashca shinami rurashun. 26 Ñucanchij huahuacunapish, ñucanchij huarmicunapish, ñucanchij huagracunapish, ñucanchij tucui charina animalcunapish Galaadpi caj llajtacunapimi saquiringacuna. 27 Pero canta sirvij ñucanchijcunaca Jordán jatun yacutami pasashun. Tucui cꞌaricunami ñucanchij amito mandashca shina Jehová Diospaj ñaupajpi macanacungapaj allichirishca cashun” nircacunami.

28 Chaimi Moisesca sacerdote Eleazarman, Nunpaj churi Josueman, yayacunapaj familiacunata pushajcunamanpish shuj mandatota curca. 29 Moisesca paicunataca cashnami nirca: “Gadpaj huahua huahuacunapish, Rubenpaj huahua huahuacunapish Jordán jatun yacuta pasashpa, Jehová Diospaj ñaupajpi macanacuiman ringapaj tucui allichirishca cꞌaricuna chai allpata cancuna quichungacama cancunahuan cajpica Galaad allpacunata cunguichij. 30 Pero macanacunacunata mana apashpa cancunahuan mana rishpaca cancunapurapimi Canaán allpapi saquiringacuna” nircami.

31 Chashna nijpimi Gadpaj huahua huahuacunapish, Rubenpaj huahua huahuacunapish cashna nircacuna: “Canta sirvij ñucanchijcunaman Jehová Dios imata nishcatami rurashun. 32 Ñucanchijca macanacunacunata apashpami Jehová Diospaj ñaupajpi Canaán allpaman rishun. Pero ñucanchij chasquina herenciaca Jordán jatun yacu inti llujshin ladopimi canga” nircacunami. 33 Chaimi Moisesca Gadpaj huahua huahuacunaman, Rubenpaj huahua huahuacunaman, Josepaj churi Manasespaj chaupi familiamanca amorreocunata mandaj rey Sehón mandacushca llajtacunata, Basán llajtata mandaj rey Og mandacushca llajtacunatapish curca. Tucui chai llajtacunata, chai llajtacuna muyundijpi tiyaj allpacunatapishmi paicunaman curca.

34 Gadpaj huahua huahuacunaca Dibón, Atarot, Aroer llajtacunatami shayachircacuna.* 35 Shinallataj Atrot-Sofán, Jazer, Jogbehá, 36 Bet-Nimrá, Bet-Harán llajtacunatami shayachircacuna. Muyundijta pircashca llajtacunatami shayachircacuna. Animalcunapaj corralcunatapish rumicunahuanmi rurarcacuna. 37 Rubenpaj huahua huahuacunaca Hesbón, Elealé, Quiryataim llajtacunatami shayachircacuna. 38 Shinallataj Nebo, Baal-Meón llajtacunatami shayachircacuna. Chai llajtacunataca shujtaj shuticunatami churarcacuna. Chashnallataj Sibmá llajtatami shayachircacuna. Paicuna cutin shayachishca llajtacunataca shujtaj shuticunatami churai callarircacuna.

39 Manasespaj churi Makirpaj huahua huahuacunaca Galaadman rishpami chaipi causaj amorreocunahuan macanacushpa paicunataca chaimanta llujshichishpa cacharcacuna. 40 Chaimantami Moisesca Manasespaj churi Makirmanca Galaad allpacunata curca. Chaimi paica chaipi causai callarirca. 41 Cutin Manasespaj churi Jaír rishpaca Galaadpi saquirij uchilla pueblocunatami japirca. Chaicunataca Havot-Jaír* nishpami shutichirca. 42 Nóbah rishpaca Quenat llajtata, chai llajtapaj cꞌuchulla pueblocunandijmi quichurca. Chai llajtataca paipaj propio shutitami churarca. Nóbah shutitami churarca.

33 Israelitacunaca Egipto llajtamantaca grupo grupopimi llujshircacuna. Paicunaca asha asha samarishpami viajashpa catircacuna. Paicunataca Moisés, Aaronmi pusharcacuna. 2 Jehová Dios mandajpimi Moisesca mai lugarcunallamanta viajai callarishcata quillcarca. Paicunaca shuj lugarmanta caishuj lugarmanca cashnami viajashpa catircacuna. 3 Israelitacunaca Ramesés llajtamantaca primer quillapaj 15 punllapimi llujshircacuna. Paicunaca Pascua fiesta pasashca cayandij punllami egipciocuna ricucujpi imata mana manchashpa* chai llajtamanta llujshircacuna. 4 Chaicamaca egipciocunaca paicunapaj punta churicunatami pambacurcacuna. Chai churicunataca Jehová Diosmi huañuchishca carca. Jehová Diosca egipciocunapaj dioscunatami juzgashpa castigashca carca.

5 Israelitacunaca Ramesés llajtamanta llujshishpaca Sucotpimi carpa huasicunata shayachishpa saquirircacuna. 6 Sucotmanta llujshishpaca Ezampi, chaquishca pamba callaripimi carpa huasicunata shayachishpa saquirircacuna. 7 Qꞌuipaca Ezammanta llujshishpami Pihahirot ladoman tigrarcacuna. Chai lugarmantami Baal-Zefontaca ricunalla carca. Paicunaca Migdol cꞌuchullapimi carpa huasicunata shayachishpa saquirircacuna. 8 Pihahirotmanta llujshishpaca mama cucha chaupita pasashpami chaquishca pambaman rircacuna. Paicunaca Ezam chaquishca pambataca quimsa punllacunatami viajarcacuna. Chaimantaca Mará nishcapimi carpa huasicunata shayachishpa saquirircacuna.

9 Israelitacunaca Mará nishcamanta llujshishpaca Elim nishcamanmi chayarcacuna. Elim nishcapica 12 pugyu yacucuna, 70 palmeracunami tiyarca. Chaipimi paicunaca carpa huasicunata shayachishpa saquirircacuna. 10 Elim nishcamanta llujshishpaca Puca mama cucha cꞌuchupimi carpa huasicunata shayachishpa saquirircacuna. 11 Puca mama cuchamanta llujshishpaca Sin nishca chaquishca pambapimi carpa huasicunata shayachishpa saquirircacuna. 12 Sin nishca chaquishca pambamanta llujshishpaca Dofcá nishcapimi carpa huasicunata shayachishpa saquirircacuna. 13 Dofcá nishcamanta llujshishpaca Aluspimi carpa huasicunata shayachishpa saquirircacuna. 14 Alusmanta llujshishpaca Refidimpimi carpa huasicunata shayachishpa saquirircacuna. Chaipica israelitacuna ubyachunca yacuca mana tiyarcachu. 15 Refidimmanta llujshishpaca Sinaí chaquishca pambapimi carpa huasicunata shayachishpa saquirircacuna.

16 Sinaí chaquishca pambamanta llujshishpaca Quibrot-Hataavá nishcapimi carpa huasicunata shayachishpa saquirircacuna. 17 Quibrot-Hataavá nishcamanta llujshishpaca Hazerotpimi carpa huasicunata shayachishpa saquirircacuna. 18 Hazerotmanta llujshishpaca Ritmá nishcapimi carpa huasicunata shayachishpa saquirircacuna. 19 Ritmá nishcamanta llujshishpaca Rimón-Pérez nishcapimi carpa huasicunata shayachishpa saquirircacuna. 20 Rimón-Pérez nishcamanta llujshishpaca Libnapimi carpa huasicunata shayachishpa saquirircacuna. 21 Libnamanta llujshishpaca Risá nishcapimi carpa huasicunata shayachishpa saquirircacuna. 22 Risá nishcamanta llujshishpaca Quehelatá nishcapimi carpa huasicunata shayachishpa saquirircacuna. 23 Quehelatá nishcamanta llujshishpaca Séfer urcupimi carpa huasicunata shayachishpa saquirircacuna.

24 Séfer urcumanta llujshishpaca Haradá nishcapimi carpa huasicunata shayachishpa saquirircacuna. 25 Haradá nishcamanta llujshishpaca Maquelot nishcapimi carpa huasicunata shayachishpa saquirircacuna. 26 Maquelot nishcamanta llujshishpaca Táhat nishcapimi carpa huasicunata shayachishpa saquirircacuna. 27 Táhat nishcamanta llujshishpaca Taré nishcapimi carpa huasicunata shayachishpa saquirircacuna. 28 Taré nishcamanta llujshishpaca Mitcá nishcapimi carpa huasicunata shayachishpa saquirircacuna. 29 Mitcá nishcamanta llujshishpaca Hasmoná nishcapimi carpa huasicunata shayachishpa saquirircacuna. 30 Hasmoná nishcamanta llujshishpaca Moserot nishcapimi carpa huasicunata shayachishpa saquirircacuna. 31 Moserot nishcamanta llujshishpaca Bene-Jaacán nishcapimi carpa huasicunata shayachishpa saquirircacuna. 32 Bene-Jaacán nishcamanta llujshishpaca Hor-Haguidgad nishcapimi carpa huasicunata shayachishpa saquirircacuna. 33 Hor-Haguidgad nishcamanta llujshishpaca Jotbatá nishcapimi carpa huasicunata shayachishpa saquirircacuna. 34 Jotbatá nishcamanta llujshishpaca Abroná nishcapimi carpa huasicunata shayachishpa saquirircacuna. 35 Abroná nishcamanta llujshishpaca Ezión-Guéber nishcapimi carpa huasicunata shayachishpa saquirircacuna. 36 Ezión-Guéber nishcamanta llujshishpaca Zin nishca chaquishca pambapimi carpa huasicunata shayachishpa saquirircacuna. Zin nishca chaquishca pambataca Cadés nishpapishmi rijsincuna.

37 Cadesmanta llujshishpaca Hor shuti urcupimi carpa huasicunata shayachishpa saquirircacuna. Chai urcuca Edom llajta lindepimi can. 38 Sacerdote Aaronca Jehová Dios mandajpimi Hor shuti urcuman huichiyarca. Paica israelitacuna Egipto llajtamanta llujshishca 40 huatacuna qꞌuipa, quinto quillapaj* punta punllapimi chai urcupi huañurca. 39 Aaronca 123 huatacunata charishpami Hor shuti urcupi huañurca.

40 Arad llajtata mandaj reyca Canaán allpapi saquirij Négueb llajtapimi causarca. Chai reyca cananeocunapuramantami carca. Paica israelitacuna chayashcatami yachaj chayarca.

41 Tiempohuanca israelitacunaca Hor shuti urcumanta llujshishpami Zalmoná nishcapi carpa huasicunata shayachishpa saquirircacuna. 42 Zalmoná nishcamanta llujshishpaca Punón nishcapimi carpa huasicunata shayachishpa saquirircacuna. 43 Punón nishcamanta llujshishpaca Obot nishcapimi carpa huasicunata shayachishpa saquirircacuna. 44 Obot nishcamanta llujshishpaca Moab llajta lindepi saquirij Iyé-Abarim nishcapimi carpa huasicunata shayachishpa saquirircacuna. 45 Iyim nishcamanta llujshishpaca Dibón-Gad nishcapimi carpa huasicunata shayachishpa saquirircacuna. 46 Dibón-Gad nishcamanta llujshishpaca Almón-Diblataim nishcapimi carpa huasicunata shayachishpa saquirircacuna. 47 Almón-Diblataim nishcamanta llujshishpaca Nebo chꞌimbapurapi saquirij Abarim urcucunapimi carpa huasicunata shayachishpa saquirircacuna. 48 Por finmi Abarim urcucunamanta llujshircacuna. Chaimanta llujshishpaca Moab chaquishca pambapimi carpa huasicunata shayachishpa saquirircacuna. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca. 49 Bet-Jesimot nishcamanta callarishpaca Abel-Sitim nishcacamami Jordán jatun yacu uripi carpa huasicunata shayachishpa saquirircacuna. Chaica Moab chaquishca pambapimi carca.

50 Jehová Diosca Moab chaquishca pambapimi Moiseshuan parlarca. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca. Paitaca cashnami nirca: 51 “Israelitacunahuan parlashpaca cashna ningui: ‘Cancunaca Jordán jatun yacuta pasashpami Canaán allpaman yaicunguichij. 52 Chaiman chayashpaca chai allpapi causaj tucui gentecunatami llujshichishpa cachana canguichij. Shinallataj rumimanta rurashca dioscunata, fierrota yacuyachishpa rurashca dioscunatapishmi ñutuna canguichij. Adorana lugarcunatapishmi* urmachina canguichij. 53 Chai allpata japishpami chaipi causanguichij. Ñucaca chai allpataca herenciata shinami cancunaman cusha. 54 Chai allpataca sorteashpami cada familiaman cuna canguichij. Achca cajcunamanca herenciataca mirachinami canguichij. Cutin ashalla cajcunamanca herenciataca menoranami canguichij. Sorteajpi maipi urmashcapimi tucuicuna paicunapaj herenciata chasquingacuna. Paicunapaj allpataca según paicunapaj yayacunapaj familiacunami herenciata shina chasquingacuna.

55 Chai allpapi causajcunata cancunapaj ñaupajmanta mana llujshichishpa cachajpica paicunaca cancunapaj ñahuicunapica astillacuna shinami canga, cancunapaj cuerpopipish* cashacuna shinami canga. Paicunaca cancuna causagrishca allpapica cancunapaj contrami tucungacuna. 56 Paicunahuan imata ruranata yuyacushcatami cancunatapish rurasha’ ningui” nircami.

34 Jehová Diosca Moiseshuan cutin parlashpaca cashnami nirca: 2 “Israelitacunataca caita ningui: ‘Canaán allpaman yaicushpaca chai allpatami herenciata shina chasquinguichij. Canaán allpa lindecunaca caicunami canga:

3 Ura ladoman caj lindeca Zin nishca chaquishca pambamantami callaringa. Chai chaquishca pambaca Edom llajta ladopimi can. Chai lindeca inti llujshin ladomanca mar Salado* urimantami callaringa. 4 Chai lindeca Acrabim huichi ura ladotami pasanga. Chaimantaca Zin nishca chaquishca pambata pasashpami Cadés-Barnea ura ladocama chayanga. Qꞌuipaca Hazar-Addar nishcata pasashpami Azmón nishcacama chayanga. 5 Azmonpica chai lindeca Egipto pugru pambata* rishpami Jatun mama cuchacama* chayashpa chaipi tucuringa.

6 Inti huashicun ladoman caj lindeca Jatun mama cucha urimi canga. Chaimi inti huashicun ladoman caj linde canga.

7 Janaj ladoman caj lindeca Jatun mama cuchamanta callarishpaca Hor shuti urcucamami canga. 8 Hor shuti urcumantaca Lebó-Hamatcamami* canga. Chai lindeca Zedadcamami chayanga. 9 Shinallataj Zifronta rishpami Hazar-Enanman chayashpa chaipi tucuringa. Chaimi janaj ladoman caj linde canga.

10 Inti llujshin ladoman caj lindeca Hazar-Enanmantaca Sefamcamami canga. 11 Chai lindeca Sefamta rishpami Riblacama chayanga. Chaica Ain inti llujshin ladomanmi can. Chaimantaca uriyashpami Kinéret mama cucha* inti llujshin ladoman saquirij lomacunata pasanga. 12 Chai lindeca Jordán jatun yacuta rishpami mar Saladocama chayashpa chaipi tucuringa. Cai allpami muyundij lindecunandij paicunapaj canga’ ningui” nircami.

13 Chaimi Moisesca israelitacunata mandashpaca cashna nirca: “Cai allpatami cancunaca sorteashpa chaupina canguichij. Jehová Dios mandashca shinami iscun familiacunamanpish, Manasespaj chaupi familiamanpish cuna canguichij. 14 Rubenpaj familiapish según paicunapaj yayapaj familia, Gadpaj familiapish según paicunapaj yayapaj familia, Manasespaj chaupi familiapish paicunapaj herenciataca ñami chasquishcacuna. 15 Cai ishqui familiacunapish, Manasespaj chaupi familiapish Jericó cꞌuchullapi, Jordán inti llujshin ladomanmi paicunapaj herenciata chasquishcacuna” nircami.

16 Jehová Diosca cutinllatajmi Moiseshuan parlarca. Paitaca cashnami nirca: 17 “Cancunapaj herencia allpata chaupijcunaca sacerdote Eleazar, Nunpaj churi Josuemi canga. 18 Cancunaca herencia allpata chaupingapajca cada familiamantami shuj pushajta agllana canguichij. 19 Chai pushaj runacunapaj shuticunaca caicunami can: Judapaj familiamantaca Jefunepaj churi Caleb, 20 Simeonpaj familiamantaca Amihudpaj churi Semuel, 21 Benjaminpaj familiamantaca Kislonpaj churi Elidad, 22 Danpaj familiamantaca Joglí runapaj churi Buquí, 23 Josepaj churi Manasespaj familiamantaca Efodpaj churi Haniel, 24 Efrainpaj familiamantaca Siftanpaj churi Quemuel, 25 Zabulonpaj familiamantaca Parnacpaj churi Elizafán, 26 Isacarpaj familiamantaca Azanpaj churi Paltiel, 27 Aserpaj familiamantaca Selomipaj churi Ahihud, 28 Neftalipaj familiamantaca Amihudpaj churi Pedahelmi can” nircami. 29 Cai runacunatami Jehová Diosca Canaán allpata chaupishpa chai allpata israelitacunaman cuchun mandarca.

35 Jehová Diosca Moab chaquishca pambapimi Moiseshuan parlashpa catirca. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca. Diosca Moisestaca cashnami nirca: 2 “Israelitacunataca cashna ni. Cancuna chasquigrishca herenciamantaca levitacunamanca paicuna maipi causana llajtacunatami cuna canguichij. Shinallataj chai llajtacuna muyundijpi caj michina allpacunatami cuna canguichij. 3 Levitacunaca chai llajtacunapimi causangacuna. Michina allpacunaca paicunapaj charina animalcunapajmi canga. Shujtaj animalcunatapishmi chaipi charingacuna. 4 Levitacunaman can cugrishca michina allpacunaca llajta muyundijtami canga. Muyundij pircamanta canllamanca 445 metrocunatami* midinga. 5 Michina allpacuna cachunmi llajta cada ladotaca 890* metrocunata midina canguichij. Janaj ladota, ura ladota, inti llujshin ladota, inti huashicun ladotami chashna midina canguichij. Llajtaca chaupipimi canga. Caicunami levitacunapaj llajtacunapi saquirij michina allpacuna canga.

6 Levitacunaman cugrishca llajtacunamantaca sujta llajtacunami miticuna llajtacuna* canga. Huañuchij runaca chaicunamanmi miticushpa ringa. Shinallataj paicunamanca caishuj 42 llajtacunatami cuna canguichij. 7 Levitacunamanca tucuica 48 llajtacunatami michina allpacunandij cuna canguichij. 8 Levitacunaman cugrishca llajtacunataca israelitacunapaj allpacunamantami cuna canguichij. Achca cajcunamantaca achca llajtacunatami japina canguichij. Ashalla cajcunamantaca ashalla llajtacunatami japina canguichij. Cada familiami achcata japishca cashpapish, ashallata japishca cashpapish huaquin llajtacunataca levitacunaman cunga” nircami.

9 Jehová Diosca Moiseshuanmi parlashpa catirca. Paitaca cashnami nirca: 10 “Israelitacunahuan parlai. Paicunataca cashna ningui: ‘Cancunaca Jordán jatun yacuta pasashpami Canaán allpaman yaicugringuichij. 11 Jahualla chayana llajtacunatami miticuna llajtacuna cachun agllana canguichij. Mana munashpapish pita huañuchij runaca chai llajtacunamanmi miticushpa ri tucunga. 12 Chai llajtacunaca huañuchishca runapaj familiamanta miticungapajmi cancunapajca sirvinga. Chashnami huañuchij runaca juezcunapaj ñaupajpi juzgashca cangacama mana huañunga. 13 Cancuna cugrishca miticuna sujta llajtacunaca chaipajmi canga. 14 Quimsa llajtacunataca Jordán jatun yacu inti llujshin ladomanmi cuna canguichij. Caishuj quimsa llajtacunataca Canaán allpapimi cuna canguichij. Chai llajtacunaca miticuna llajtacunami canga. 15 Chai sujta llajtacunaca israelitacunapajpish, shujtaj llajtamanta shamushca runacunapajpish, israelitacunapurapi causaj caru llajtamanta shamushca runacunapajpish miticungapajmi sirvinga. Maijanpish mana munashpapish pita huañuchishpaca chai llajtacunapimi miticunaman ringa.

16 Pero maijanpish fierrohuan huajtashpa pita huañuchishpaca paica huañuchij runami can. Paica huañuchij runa cashcamantami huañunataj can. 17 Maijanpish huañuchinalla rumihuan huajtashpa pita huañuchishpaca paica huañuchij runami can. Paica huañuchij runa cashcamantami huañunataj can. 18 Maijanpish huañuchinalla caspihuan huajtashpa pita huañuchishpaca paica huañuchij runami can. Paica huañuchij runa cashcamantami huañunataj can.

19 Huañuchishca runapaj familiami huañuchij runataca huañuchinga. Chai familiallatajmi huañuchij runata japishpaca huañuchinga. 20 Maijanpish shuj runata pꞌiñashcamanta tꞌangashpa shitajpi chai runa huañujpi o mana alli munaihuan imahuan shitashcamanta chai runa huañujpi 21 o maijanpish pꞌiñashcamanta paipaj maquihuan huajtajpi chai runa huañujpica huajtaj runaca huañunatajmi can. Paica huañuchij runami can. Huañuchishca runapaj familiami paita japishpaca huañuchinga.

22 Pero maijanpish mana munashpapish, mana pꞌiñashpapish shuj runata tꞌangajpi o ima mana alli munaita mana charishpapish imata paipi shitajpi 23 o maijanpish shuj runata mana ricushpapish, paipaj contra mana cajpipish, mana ima dañota rurasha nishpapish shuj rumita paipaj jahuapi urmachishpa huañuchijpica 24 juezcunami huañuchij runatapish, huañuchishca runapaj familiatapish cai mandashcacunata catishpa juzgana can. 25 Juezcunami huañuchij runataca huañuchishca runapaj familiapaj maquimanta quishpichishpa miticuna llajtaman tigrachishpa cachana can. Huañuchij runaca chai llajtamanmi miticushpa rishca carca. Huañuchij runaca agllana aceitehuan agllashca sacerdotecunata jatun mandaj huañungacamami chai llajtapi causana can.

26 Pero huañuchij runa pai miticushca llajta lindemanta llujshijpi, 27 huañuchishca runapaj familia miticuna llajta linde canllapi puricujta japishpa paita huañuchishpaca huañuchishca runapaj familiaca ima culpata mana charingachu. 28 Huañuchij runaca sacerdotecunata jatun mandaj huañungacamami miticuna llajtapi causana can. Pero sacerdotecunata jatun mandaj huañujpica chai runaca paipaj llajtamanmi tigrai tucun. 29 Cancuna juzgacushpaca cai mandashcacunatami catina canguichij. Cancunapish, cancunapaj huahua huahuacunapish maipi causashpapish cai mandashcacunatami catina canguichij.

30 Maijanpish pita huañuchijpica testigocuna huillashcata uyashpami paitaca huañuchina can. Pero shujlla testigo tiyajpica pitapish mana huañuchinachu can. 31 Shuj huañuchij runapaj causaita randishpa quishpichingapaj* shuj preciota pagachunca mana chasquinachu canguichij. Paica huañunatajmi can. 32 Maijanpish miticuna llajtapi causangapaj rishca cashpa, pero sacerdotecunata jatun mandaj manaraj huañujpi paipaj llajtapi causangapaj tigrasha nishpa shuj preciota pagajpica mana chasquinachu canguichij.

33 Cancuna causacushca allpataca mana mapayachinachu canguichij. Yahuarca allpatami mapayachin. Yahuarta jichashcamanta mapayashca allpataca pipaj yahuarpish mana chuyayachi tucunchu. Huañuchij runapaj yahuarllami chuyayachi tucun. 34 Cancuna causacushca allpataca mana mapayachinachu canguichij. Chai allpapica ñucami causacuni. Ñuca, Jehová Diosmi israelitacunapurapi causacuni’ ningui” nircami.

36 Galaadpaj huahua huahuacunamanta shamuj yayacunapaj familiata pushajcunaca Moisespajman, israelitacunata pushajcunapajman cꞌuchuyashpami paicunapaj ñaupajpi parlarcacuna. Galaadca Makirpaj churimi carca, Makirca Manasespaj churimi carca. Manasesca Josepaj huahua huahuacunamanta shamuj familiamantami carca. 2 Chai pushajcunaca cashnami nircacuna: “Jehová Diosca ñucanchij amitotaca israelitacunapurapi allpata sorteashpa chaupichunmi mandarca. Shinallataj Jehová Diosca ñucanchij amitotaca ñucanchij huauqui Zelofehadpaj herenciataca paipaj ushushicunaman cuchunmi mandarca. 3 Chai huarmicuna shujtaj familiamanta caj cꞌaricunahuan cazarajpica chai huarmicunapaj herenciaca ñucanchij yayacunapaj herenciamantami quichushca canga. Shinallataj shujtaj familiamanta caj cꞌaricunahuan cazarashcamantami paicunapaj herenciaca chai familiapaj canga. Chaimantami chai huarmicunapaj herenciaca ña mana ñucanchij herencia parte canga. 4 Israelitacunapaj Cushicuna huata pajtajpica chai huarmicunapaj herenciaca paicunahuan cazarashca cꞌaricunapaj familiapajmi canga. Paicunapaj herenciaca ñucanchij yayacunapaj herenciamantami anchuchishca canga” nircacunami.

5 Chaimi Moisesca Jehová Dios mandajpi israelitacunataca cashna nirca: “Josepaj huahua huahuacuna nishcaca ciertomi can. 6 Zelofehadpaj ushushicunataca Jehová Diosca cashna nishpami mandashca: ‘Paicunaca pihuanpish cazarai tucunllami. Pero paicunapaj yayapaj familiamanta caj cꞌaricunallahuanmi cazarai tucuncuna. 7 Israelitacunaman cushca herenciataca shuj familiamanta caishuj familiamanca mana pasachinachu can. Israelitacunaca paicunapaj ñaupa yayacunaman cushca herenciataca cuidanami can. 8 Maijan ushushipish israelitacunapaj familiacunapurapi shuj herenciata charishpaca paipaj yayapaj familiamanta caj cꞌarillahuanmi cazarana can. Chashnami israelitacunaca paicunapaj ñaupa yayacunapaj herenciahuan saquiringacuna. 9 Maijanpaj herenciatapish shuj familiamanta caishuj familiamanca mana pasachinachu can. Israelitacunapaj cada familiami paicunapaj herenciataca cuidana can’ nishpami mandashca” nircami.

10 Zelofehadpaj ushushicunaca Jehová Dios Moisesman mandashca shinallatajmi rurarcacuna. 11 Zelofehadpaj ushushicunaca Mahlá, Tirzá, Hoglá, Milcá, Noá shuticunami carca. Paicunaca paicunapaj yayapaj huauquicunapaj churicunahuanmi cazararcacuna. 12 Chai huarmicunaca Josepaj churi Manasespaj familiamanta caj cꞌaricunapaj huarmicunami tucurca. Chashnami chai huarmicunapaj herenciaca paicunapaj yayapaj familiallahuantaj saquirirca.

13 Cai mandamientocunata, imallata rurachun nishcacunatami Jehová Diosca israelitacunaman huillachun Moab chaquishca pambapi Moisesman mandarca. Chai chaquishca pambaca Jordán jatun yacu cꞌuchupi, Jericó llajta chꞌimbapurapimi carca.