NEHEMÍAS

1 Caicunaca Hacaliaspaj churi Nehemías* parlashca shimicunami can. Rey Artajerjes ña 20 huatacunata mandacujpimi kislev* quillapi ñucaca Susa* llajtapi caj palaciopi carcani. 2 Chai punllacunapica ñuca huauquicunamanta shuj huauquimi shamurca. Paica Hananimi carca. Paimi Judamanta caishuj runacunandij ñucata visitanaman shamurcacuna. Chaimi paicunataca prezu shina cashcamanta cacharichishca caishuj judiocunapish, Jerusalén llajtapish ima shina cashcata tapurcani. 3 Paicunaca: “Prezu shina cashcamanta cacharichishca Judá llajtapi causajcunaca llaquinaitami causacuncuna, pingachishcami cancuna. Jerusalén pircacunapish urmashcami. Pungucunapish rupachishcami siricun” nishpami huillarcacuna.

4 Chaita uyashpami tiyarishpa huacarcani. Achca punllacunatami llaquilla carcani. Ayunashpami jahua pacha Diosta mañarcani. 5 Paita mañashpami cashna nircani: “Jahua pacha Jehová Dioslla, canca tucui poderta charij, mancharina Diosmi cangui. Can ari nishcatapish* pajtachinguimi. Canta cꞌuyajcunamanpish, can mandashcata cazujcunamanpish mana tucurij cꞌuyaitami ricuchingui. 6 Cunan canta sirvij mañashcataca alli uyahuayari, alli ricuhuayari. Canta sirvij israelitacunamantaca tutapish, punllapish mañacunillamari. Israelitacuna cambaj ñaupajpi rurashca juchacunatapishmi huillapani. Ñuca yayapaj familiapish, ñucapish juchapimi urmashcanchij. 7 Canta sirvij Moisesmanmi mandashcacunata, leycunata, can imallata rurachun nishcacunatapish curcangui. Chaicunata mana cazushpami yallitaj millaita rurashpa canta pꞌiñachishcanchij.

8 Canta sirvij Moisesman ima nishcata yuyaripai. Canca cashnami nircangui: ‘Ñucata mana cazujpica cancunataca tucui pueblocunatami caita chaita cachasha. 9 Pero ñucapajman cutirishpa, ñuca mandashcacunata cancuna cazujpica tucui allpa pachata urata janajta rishca cajpipish tandachishami. Ñuca shutita jatunyachingapaj agllashca lugarmanmi pushamusha’ nircanguimi. 10 Paicunaca canta sirvijcuna, cambaj pueblomari. Canmari paicunataca cambaj jatun poderhuan, cambaj poderyuj maquihuan quishpichircangui. 11 Jehová Dioslla, canta sirvij mañashcataca alli uyahuayari. Canta sirvijcuna mañashcatapish uyahuayari. Paicunaca tucui shunguhuanmi cantaca respetancuna. Cunanpish tucui alli llujshichun, reypish ñucata llaquichun* ayudahuayari” nircanimi.

Chai punllacunapica ñucaca reymanmi copapi vinota pasachij carcani.

2 Rey Artajerjes ña 20 huatacunata mandacujpimi nisán* quillapi reypajman vinota apamurcacuna. Ñucaca ima shina ruraj cashca shinallatajmi vinota japishpa reyman curcani. Chai ratoca ñucaca llaquillami carcani. Chashna llaquilla cajtaca reyca mana nunca ricushcachu carca. 2 Chaimantami reyca: “Llaquilla ñahuitami ricuni. ¿Imataj tucungui? Mana ungushcachu cangui. Shungu pꞌaquirishcami caj yuyachingui” nirca. Cashna nijpimi achcata mancharircani.

3 Chaimi reymanca: “¡Ñuca reylla, achca tiempota causangui! Ñuca ñaupa yayacunata pambashca llajtaca llaquinaimari. Chai llajta pungucunapish rupachishcami siricun. Chaimantami llaquilla cani” nircani. 4 Chaimi reyca: “¿Imatataj rurasha ningui?” nishpa tapurca. Chai ratomi jahua pacha Diosta mañarcani. 5 Chai qꞌuipami: “Reypaj yuyaipi alli cajpi, ñucapish quiquinpaj ñaupajpi alli ricurishca cajpica Judá llajtata cutin shayachingapaj cachahuai. Chai llajtapimi ñuca ñaupa yayacunapish pambashca can” nishpa cutichircani. 6 Reyca: “¿Mashna punllacunatataj rigringui? ¿Ima horataj tigramungui?” nishpami tapurca. Chashna tapujpimi mashna punllacunata rigrishcata huillarcani. Chaimi reyca ñucata cacharcalla. Reinapish reypaj ladopimi tiyacurca.

7 Chai qꞌuipami reytaca cashna nircani: “Reypaj yuyaipi alli cajpica Éufrates jatun yacu inti huashicun ladopi saquirij llajtacunata mandajcunaman cungapaj cartacunata cuhuai. Chaimi ñucataca Judá llajtaman chayangacama tranquilo pasachun saquingacuna. 8 Shinallataj reypaj bosqueta cuidaj Asaf runaman cungapaj shuj cartata cuhuai. Chashnami paica Diospaj huasi cꞌuchullapi saquirij soldadocunapaj huasi pungucunata, llajta pircacunata, ñuca maipi causagrishca huasitapish rurangapaj caspicunata cunga” nircani. Ñuca Diospaj llaquij maqui ñucahuan cashcamantami reyca chai cartacunata ñucaman curca.

9 Tiempohuanca Éufrates jatun yacu inti huashicun ladopi saquirij llajtacunata mandajcunapajmanmi chayarcani. Paicunapajman chayashpami rey cachashca cartacunata curcani. Shinallataj reyca soldadocunata mandajcunata, caballopi purij runacunatami ñucahuan cacharca. 10 Bet-Horonmanta Sanbalat runapish, Ammonmanta Tobías shuti sirvij runapishmi caitaca yachaj chayarcacuna. Chaimi israelitacunata shuj runa ayudanaman shamushcamantaca achcata pꞌiñarircacuna.

11 Jerusalenmanmi por fin chayarcani. Quimsa punllacuna qꞌuipaca 12 tuta jatarishpami huaquin runacunata ñucahuan pusharcani. Jerusalenpi imata rurachun Dios yuyachishcataca* mana piman huillarcanichu. Ñucallami burropi montashca rircani, ima shujtaj animaltaca mana pusharcanchijchu. 13 Chai tutaca Pugru pamba Pungu nishcatami llujshircani. Chaita llujshishpaca Jatun culebra Pugyu nishca chꞌimbata pasashpami Ushpata* montonashca Pungu nishcaman chayarcani. Chaiman chayashpaca Jerusalén pircacuna urmashca siricujta, pungucunapish tucui rupachishca cashcatami ricurcani. 14 Qꞌuipaca Pugyu yacu Pungu nishcacama rishpami Reypaj Jatun tanque yacucama chayarcani. Pero ñuca montashca burroca maita mana pasai tucurcachu. 15 Chai tutaca pugru pambata huichiyashpami pircacuna ima shina cashcata ricushpa catircani. Qꞌuipaca Pugru pamba Pungu nishcata yaicushpami tigrarcani.

16 Catij mandajcunaca ñuca maiman rishcata, imata ruracujtapish mana yacharcacunachu. Judiocunamanpish, sacerdotecunamanpish, pushaj runacunamanpish, catij mandajcunamanpish, shujtaj trabajajcunamanpish manaraj imata huillarcanichu. 17 Chai qꞌuipami paicunamanca: “Cancunaca ñucanchijcuna llaquinaita causacujtami ricunguichij. Jerusalén pircacunapish urmashcami siricun, pungucunatapish rupachishcacunami. Shujtajcunapaj ñaupajpi ña ama pingai tucungapajca jacuchij, Jerusalén pircacunata shayachishunchij” nircani. 18 Chashna nishca qꞌuipami paicunamanca ñuca Diospaj llaquij maqui ñucahuan ima shina cashcata, reypish ñucaman imata nishcata parlarcani. Chaita uyashpami paicunaca: “¡Jacuchij, pircacunata shayachishunchij!” nircacuna. Chashnami chai alli trabajota rurangapaj caishuj chaishuj animarircacuna.

19 Bet-Horonmanta Sanbalat runapish, Ammonmanta Tobías shuti sirvij runapish, Arabiamanta Guésem runapish caita yachaj chayashpaca ñucanchijmanta burlarishpami mana alli tratai callarircacuna. Paicunaca: “¿Imatataj ruracunguichij? ¿Reypaj contrachu jataricunguichij, imamí?” nircacunami. 20 Cashna nijpimi paicunamanca: “Jahua pacha Diosmi ñucanchijta ayudanga. Paita sirvijcunaca cai pircacunataca shayachishuntajmi. Pero cancunaca Jerusalenpica imata mana charinguichijchu, ima reclamana derechotapish mana charinguichijchu. Cancunata yuyarichunpish Jerusalenpica ima allita mana rurashcanguichijchu” nircani.

3 Sacerdotecunata jatun mandaj Eliasibca paipaj huauqui sacerdotecunahuanmi Ovejacunapaj Pungu nishcata allichi callarircacuna. Diospajlla cachun chꞌicanyachishpaca pungucunatami churarcacuna. Meá Torrecama chayaj pircata, Hananel Torrecama chayaj pircatapishmi Diospajlla chꞌicanyachircacuna. 2 Catij parte pircacunataca Jericomanta runacunami allichircacuna. Catij partetaca Imripaj churi Zacurmi allichirca.

3 Hasenaapaj churicunaca Pescado Pungu nishcatami allichircacuna. Paicunaca vigacunata, pungucunata, jatun aldabacunata, barracunatapishmi* churarcacuna. 4 Uriyapaj churi Meremotca catij partetami allichirca. Paipaj abueloca Hacozmi carca. Berekiaspaj churi Mesulamca catij partetami allichirca. Paipaj abueloca Mesezabelmi carca. Baanapaj churi Sadocca catij partetami allichirca. 5 Tecoamanta runacunaca catij partetami allichircacuna. Pero paicunamanta importante runacunaca chai obrapi encargadocunapajca mana trabajashun nircacunachu.

6 Paseahpaj churi Joiadaca Besodeyapaj churi Mesulamhuanmi Ñaupa llajta Pungu nishcata allichircacuna. Paicunaca vigacunata, pungucunata, jatun aldabacunata, barracunatapishmi churarcacuna. 7 Gabaonmanta Melatiasca, Meronot pueblomanta caj Jadonhuanmi catij parteta allichircacuna. Paicunaca Gabaonmanta, Mizpamanta runacunami carca. Paicunataca Éufrates jatun yacu inti huashicun ladopi saquirij llajtacunata mandajmi mandacurca. 8 Harhayapaj churi Uzielca catij partetami allichirca. Paica orohuan, cullquihuan adornocunata rurajmi carca. Perfumecunata ruraj Hananiasca catij partetami allichirca. Paicunaca Jerusalentaca Ancho pirca nishcacamami pavimentarcacuna. 9 Hurpaj churi Refayaca catij partetami allichirca. Paica Jerusalén chaupi llajtata mandajmi carca. 10 Harumafpaj churi Jedayaca paipaj huasi chꞌimbapurapi caj catij partetami allichirca. Hasabneyapaj churi Hatusca catij partetami allichirca.

11 Harimpaj churi Malkiyaca Pahat-Moabpaj churi Hasubhuanmi catij parteta allichircacuna. Hornocuna tiyan Torretapishmi allichircacuna. 12 Halohespaj churi Salumca paipaj ushushicunahuanmi catij parteta allichircacuna. Paica Jerusalén chaupi llajtata mandajmi carca.

13 Hanunpish, Zanoahmanta caj runacunapish Pugru pamba Pungu nishcatami allichircacuna. Allichishca qꞌuipaca pungucunata, jatun aldabacunata, barracunatami churarcacuna. Shinallataj pircacunataca Ushpata montonashca Pungu nishcacamami 445 metrocunata* allichircacuna. 14 Recabpaj churi Malkiyaca Ushpata montonashca Pungu nishcatami allichirca. Paica Bet-Hakerem llajtata mandajmi carca. Chai punguta allichishca qꞌuipaca jatun aldabacunata, barracunatami churarca.

15 Colhozepaj churi Salunca Pugyu yacu Pungu nishcatami allichirca. Paica Mizpá llajtata mandajmi carca. Chai punguta allichishpaca techota, jatun aldabacunata, barracunatami churarca. Canal Jatun tanque nishca pircacunatapishmi allichirca. Reypaj Jardín cꞌuchumanta callarishpaca Davidpaj Llajtaman uriyaj Gradacunacamami allichirca.

16 Azbucpaj churi Nehemiasca catij partetami allichirca. Paica Bet-Zur chaupi llajtata mandajmi carca. Davidpaj familiacunata Pambana jutcu chꞌimbapuramanta callarishpaca rurashcalla jatun tanquecama, Macanacuj runacunapaj Huasicamami allichirca.

17 Levitacunaca catij partetami allichircacuna. Paicunataca Banipaj churi Rehúm runami ricucurca. Cutin Queilá chaupi llajtata mandaj Hasabiasmi paipaj llajtapaj shutipi catij partetaca allichirca. 18 Paicunapaj huauquicunami catij partetaca allichircacuna. Paicunataca Henadadpaj churi Bavaimi ricucurca. Bavaica Queilá chaupi llajtata mandajmi carca.

19 Bavaipaj ladopica Jesuapaj churi Ezermi catij parteta allichirca. Macanacunacunata huaquichina Huasi huichi chꞌimbapurapimi Pircacunata jarcaj Pilar tiyanpi allichirca. Ezerca Mizpá llajtata mandajmi carca.

20 Chai qꞌuipaca Zabaipaj churi Barucmi sinchita trabajashpa catij parteta allichirca. Paica Pircacunata jarcaj Pilarmanta callarishpaca sacerdotecunata jatun mandaj Eliasibpaj huasi yaicunacamami allichirca.

21 Chai qꞌuipaca Uriyapaj churi Meremotmi catij parteta allichirca. Paipaj abueloca Hacozmi carca. Paica Eliasibpaj huasi yaicunamanta callarishpaca Eliasibpaj huasi tucuricamami allichirca.

22 Jordán llajtamanta* sacerdotecunaca catij partetami allichircacuna. 23 Benjaminpish, Hasubpishmi paicunapaj huasi chꞌimbapurapi caj catij parteta allichircacuna. Maaseyapaj churi Azariasca paipaj huasi cꞌuchullapi caj catij partetami allichirca. Paipaj abueloca Ananiahmi carca. 24 Chai qꞌuipaca Henadadpaj churi Binuimi catij parteta allichirca. Paica Azariaspaj huasimanta callarishpaca Pircacunata jarcaj Pilarcamami allichirca. Shinallataj esquinacamami allichirca.

25 Uzaipaj churi Palalmi catij partetaca allichirca. Paica Pircacunata jarcaj Pilar chꞌimbapurapi, Reypaj Huasimanta* llujshij torre chꞌimbapurapimi allichirca. Chai torreca janaj janajman Guardiacunapaj Patiopimi carca. Parospaj churi Pedayaca catij partetami allichirca.

26 Ofelpi causaj Diospaj huasipi sirvijcunaca* inti llujshin ladopi saquirij Yacu Pungu nishca chꞌimbapuracama, pircamanta llujshij torrecamami allichircacuna.

27 Chai qꞌuipaca Tecoamanta cajcunami catij parteta allichircacuna. Paicunaca jatun torre chꞌimbapuramanta callarishpaca Ofel nishca pircacunacamami allichircacuna.

28 Sacerdotecunaca Caballocunapaj Pungu nishca janaj lado pircatami allichircacuna. Cada unomi paicunapaj huasi chꞌimbapurapi trabajarcacuna.

29 Imerpaj churi Sadocca paipaj huasi chꞌimbapurapi caj catij partetami allichirca.

Cutin Secaniaspaj churi Semayaca catij partetami allichirca. Paica Inti llujshin lado Pungu nishcata cuidajmi carca.

30 Chai qꞌuipaca Selemiaspaj churi Hananiasca Zalafpaj churi Hanunhuanmi catij parteta allichircacuna. Hanunca Zalafpaj sexto churimi carca.

Cutin Berekiaspaj churi Mesulamca paipaj huasi chꞌimbapurapi caj catij partetami allichirca.

31 Chai qꞌuipaca orohuan, cullquihuan adornocunata ruraj Malkiyami Diospaj huasipi sirvijcunapaj,* comerciantecunapaj huasicama pircacunata allichirca. Chai pircacunaca Ricungapaj cayana Pungu nishca chꞌimbapurapimi carca. Shinallataj esquinapi saquirij terraza jahuapi caj cuartocamami allichirca.

32 Orohuan, cullquihuan adornocunata rurajcunapish, comerciantecunapish esquinapi saquirij terraza jahuapi caj cuartomantaca Ovejacunapaj Pungu nishcacamami allichircacuna.

4 Jerusalén pircacunata cutin shayachicushcata uyashpaca Sanbalatca achcatami pꞌiñarirca. Judiocunamantapish burlarishpami catirca. 2 Chaimantami paipaj compañerocunapaj ñaupajpipish, Samariamanta soldadocunapaj ñaupajpipish: “¿Cai mana vali judiocunaca imatashi rurashun nincuna? ¿Paicunalla caita ruranatachu yuyancuna? ¿Sacrificiocunatachu cugrincuna? ¿Shuj punllallapi tucuchinatachu yuyancuna? ¿Chai ñuturishca, rupachishca rumicunahuanchu cutin pircacunata shayachinata yuyancuna?” nirca.

3 Sanbalatpaj ladopi caj Ammonmanta Tobiaspish: “Paicuna shayachicushca pirca jahuaman shuj zorrollapish llujshishpaca chai rumicunataca urmachingallami” nircami.

4 Chaimi Diosta mañashpaca cashna nircani: “Ñucanchij Dioslla, uyahuayari. Paicunaca ñucanchijmantami burlaricuncuna. Ñucanchijmanta burlarishcaca paicunapaj jahuallapitaj urmachun. Contracunapaj maquipi churashpa paicunataca shujtaj llajtaman prezu shina cachapai. 5 Paicuna pandarishcataca ama cungarichu, paicunapaj juchacunatapish ama perdonaichu. Paicunaca pircata shayachijcunatami cꞌamishpa rimashcacuna” nircanimi.

6 Shinapish pircacunataca cutin shayachishpami catircanchij. Altomanpish jutcucunataca chaupi pircacamami tapachircanchij. Tucuicunami shungumanta trabajashpa catircacuna.

7 Pero Sanbalatpish, Tobiaspish, Arabiamanta cajcunapish, Ammonmanta cajcunapish, Asdodmanta cajcunapish Jerusalén llajta pircacunata cutin shayachishpa caticujta yachaj chayashpa, jutcucunata tapashpa caticujta yachaj chayashpaca achcatami pꞌiñarircacuna. 8 Chaimantami Jerusalenta llaquichinaman shamungapaj, chaipi bullata ruranaman shamungapaj tucuicuna tandanacurcacuna. 9 Chaimi ñucanchij Diosta mañarcanchij. Shinallataj paicunamanta cuidaringapajmi tutapish, punllapish guardiacunata churarcanchij.

10 Ashtahuanpish Judamanta gentecunaca: “Trabajajcunaca* ña mana fuerzata charincunachu. Urmashca rumicunapish achcami siricun. Pircacunataca mana nunca cutin shayachi tucushunchu” nircacunami.

11 Ñucanchijta pꞌiñajcunaca: “Ima tucucushcata manaraj yachaj chayajpi, ñucanchijta manaraj ricujpimi paicunapurapi yaicushpa huañuchishun. Chashnami pircacunata shayachinata jarcashun” nircacunami.

12 Ashtahuanpish ñucanchijta pꞌiñajcunapaj cꞌuchullapi causaj judiocuna shamushpaca: “Tucui ladocunamantami llaquichinaman shamungacuna” nishpami cutin cutin* advirtircacuna.

13 Chashna advirtijpimi pircacuna huashapica mai yaicunalla lugarcunapi guardiacunata churarcani. Paicunataca cada familiapurapimi tandachircani. Paicunaca espadacunahuan, lanzacunahuan, arcocunahuanmi carcacuna. 14 Paicuna manchaihuan cajta ricushpaca chai ratomi pushajcunata, catij mandajcunata, caishuj gentecunatapish: “Ama manchaichijchu. Jehová Diosta yuyarichij. Paica jatun, mancharina Diosmari. Cancunapaj huauquicunamanta, churicunamanta, ushushicunamanta, huarmicunamanta, huasicunamanta macanacuichij” nircani.

15 Ñucanchijta pꞌiñajcunaca paicuna imata ruragrishcata ñucanchij yachaj chayashcatami cuentata curcacuna. Shinallataj Diospish paicuna imata ruragrishcata jarcashcatami cuentata curcacuna. Shinapish ñucanchijca pircacunapi trabajanamanmi tigrarcanchijlla. 16 Chai punllamantami ñuca trabajadorcunamanta chaupica pircacunapi trabajarcacuna. Cutin caishuj chaupica lanzacunata, escudocunata, arcocunata apashca, pechopi fierro churanata churashcami carcacuna. Caishuj mandajcunapish tucui judiocunatami ayudarcacuna. 17 Paicunaca pircacunata shayachicuj judiocunatami ayudarcacuna. Cargata apajcunaca chulla maquillahuan trabajashpami caishuj maquipica lanzata aisashca carcacuna. 18 Pircata shayachijcuna trabajacushpaca cinturapi espadata huarcuchishcami carcacuna. Gachupi tocajca ñuca ladopimi carca.

19 Chaimi pushajcunata, catij mandajcunata, caishuj gentecunataca: “Pircacunata shayachinaca achcami. Ñucanchijca pircacunapica caru carumi trabajacunchij. 20 Chaimanta gachupi tocashcata uyashpaca ñucanchij maipi cashcaman tucuicuna shamuichij. Ñucanchij Diosmi ñucanchijmanta macanacunga” nircani.

21 Achijyamui horasmantaca tutapi estrellacuna llujshingacamami chaupicunaca trabajarcacuna. Cutin chaupicunaca lanzacuna aisashcami carcacuna. 22 Chaimi tucui gentecunataca: “Cꞌaricunaca tutaca Jerusalén ucupi pacarichun. Cada unomi paita ayudajhuan compañashca cana can. Tutaca cuidachun, punllaca pircacunapi trabajachun” nircani. 23 Ñucapish, ñuca huauquicunapish, ñucata ayudajcunapish, ñucahuan caj guardiacunapish churarishca ropataca mana llujshichircanchijchu. Tucuicunami alli maquipica lanzata aisashca carcanchij.

5 Achca cꞌaricunaca paicunapaj huarmicunandijmi paicunapaj huauqui judiocunamanta shujtajcunapaj ñaupajpi quejarircacuna. 2 Maijancunaca: “Ñucanchijca churicunayuj, ushushicunayuj achcacunapurami canchij. Yaricaihuan ama huañungapajca granocunatami minishtinchij” nircacunami. 3 Caishujcunaca: “Micunapish casi ña mana tiyanchu, granocunata japingapajpish ñucanchij allpacunata, uva chagracunata, huasicunatami prendata shina churacunchij” nircacunami. 4 Caishujcunapish cashnami nircacuna: “Reyman tributota* pagangapajca prestamotami llujshichircanchij. Shinallataj ñucanchij allpacunata, uva chagracunatami prendata shina churashcanchij. 5 Ñucanchijca ñucanchij huauquicuna shinallatajmi canchij. Ñucanchij huahuacunapish paicunapaj huahuacuna shinallatajmi can. Chashnapish ñucanchij churicunata, ñucanchij ushushicunataca esclavocuna cachunmi cuna canchij. Ñucanchij maijan ushushicunacarin ñami esclavacuna can. Ñucanchijca imata mana rurai tucunchijchu. Cunanca ñucanchij allpacunapish, uva chagracunapish shujtajcunapajmi can” nircacunami.

6 Paicuna chashna quejarijta uyashpaca achcatami pꞌiñarircani. 7 Ñuca shungupi yuyarishca qꞌuipami pushajcunatapish, catij mandajcunatapish sinchita rimarcani. Paicunataca: “Tucui cancunami cancunapaj propio huauquicunata interesta cobracunguichij” nircanimi.

Chai problemata allichingapajmi shuj jatun asambleaman cayarcani. 8 Paicunataca: “Ñucanchij pudishcacamaca ima laya tucushpapish ñucanchij huauqui judiocunataca shujtaj llajtaman cꞌatushca cajpipish chaimanta cacharichingapajmi randircanchij. Shinapish ¿cunanca cancunapaj huauquicunata cꞌatujpica ñucanchijchu cutin randishun?” nircanimi. Chaita uyashpami paicunaca imata mana ni tucushpa upalla saquirircacuna. 9 Shinallataj cashnami nircani: “Cancunaca mana allitami ruracunguichij. ¿Ñucanchijta pꞌiñaj llajtacuna ñucanchijmanta ama burlarichunca manachu Diosta manchashpa causana canguichij? 10 Ñucapish, ñuca huauquicunapish, ñucata ayudajcunapishmi cullquita, granocunata mañachicunchij. Interés jahua imata mañachinata saquipashunchij. 11 Cunanllataj allpacunata, uva chagracunata, olivo chagracunata, huasicunata tigrachipaichij. Cullquimanta, granocunamanta, llullu vinomanta, aceitemanta interesta* cobracushcatapish tigrachipaichij” nircanimi.

12 Chashna nijpimi paicunaca: “Tucuitami tigrachishun, imata mana mañashunchu. Can nishca shinami rurashun” nircacuna. Chashnami sacerdotecunata cayashpa culpata charijcunataca paicuna ari nishcata pajtachichun jurachircani. 13 Shinallataj ñuca pecho churanata chaspirishpaca: “Diosca ari nishcata mana pajtachijtaca cashna chaspishpa huasi illajta, allpacuna illajta saquichun. Cashna chaspijpica ima illajlla saquirichun” nircanimi. Caita uyashpami tucui chaipi cajcunaca “¡Chashna cachun!”* nircacuna. Chashna nishca qꞌuipaca Jehová Diostami alabarcacuna. Tucui gentecunami imata ari nishcata pajtachircacuna.

14 Rey Artajerjesca pai mandacushca 20 huatacunamantaca 32 huatacunacamami Judá llajtapi mandaj cachun ñucata nombrarca. Ñucaca 12 huatacunatami mandarcani. Ñucata nombrashca punllamantami ñucapish, ñuca huauquicunapish mandajpaj cashca micunataca mana micushcanchij. 15 Ñucapaj ñaupa mandajcunaca gentecunataca achcatami llaquichishcacuna carca. Paicunaca micunata, vinota randingapajmi cada punlla 40 siclo* cullquita cobrashcacuna carca. Chai mandajcunata ayudajcunapishmi gentecunataca llaquichishcacuna carca. Pero ñucaca Diosta manchashcamantami chaitaca mana rurarcani.

16 Ashtahuanpish ñucallatajmi pircacunata cutin shayachishpa ayudarcani. Tucui ñucata ayudajcunapish chaipimi trabajarcacuna. Ñucanchijca ima allpata mana randircanchijchu. 17 Ñuca mesapica judiocunapish, catij mandajcunapish 150 runacunami micujcuna carca. Shujtaj llajtamanta visitanaman shamuj gentecunapishmi ñuca mesapi micujcuna carca. 18 Cada punllami shuj huagrata, sujta* alli ovejacunata, alasyuj animalcunata huañuchishpa ñucapaj* preparajcuna carca. Shinallataj cada chunga punllacunami tucui laya vinota achca achca sirvijcuna carca. Shinapish gentecuna reypaj ña achcata ruracushcamantami mandajman cuna cashca micunataca mana mañarcani. 19 Ñuca Dioslla, cai gentecunamantami cai tucuita rurashcani. Chaimanta ñucata yuyarishpa bendiciapai.

6 Sanbalatpish, Tobiaspish, Arabiamanta Guésem runapish, ñucanchijta pꞌiñaj caishuj runacunapishmi pircacunata ñuca cutin shayachishcata, jutcucunatapish tucui tapachishcata yachaj chayarcacuna. (Pero pungucunataca manaraj churarcanichu). 2 Chai ratomi Sanbalatpish, Guesempish: “Shamui, Onó pambapi tiyaj shuj uchilla pueblopi tandanacungapaj shuj punllata agllashun” nishpa huillanaman cacharcacuna. Ashtahuanpish ñucata llaquichingapajllami chaitaca nicurcacuna. 3 Chaimi ñucapish huillajcunata cachashpaca: “Ñucaca shuj importante trabajotami ruracuni. Cancunapajmanca mana ri tucunichu. Maitataj cai obrata chaipi shitashpa cancunata ricunallamanca rishayari” nircani. 4 Paicunaca chuscu cutinmi chaillatataj huillanaman cacharcacuna. Ñucapish chuscu cutinmi chaillatataj cutichircani.

5 Shinapish Sanbalatca caihuanca pichca* cutinmi chaillatataj huillachun paita sirvijta ñucapajman cacharca. Chai sirvijca paipaj maquipica shuj pascashca cartatami charicurca. 6 Chai cartapica: “Cai cꞌuchulla llajtapi causaj gentecunaca canpish, judiocunapish reypaj contra jatarinata yuyacushcatami nincuna. Guesempish chaillatatajmi nin. Chaimantami pircacunataca cutin shayachicungui. Canmi paicunapaj rey tucusha nicungui nincunami. 7 Shinallataj: ‘¡Judá llajtapica shuj reymi tiyan!’ nishpa tucui Jerusalenpi canmanta huillachunmi profetacunata agllashcangui. Chaitaca reyca yachaj chayangami. Chaimanta shamui caicunamanta parlanacungapaj” nishpa quillcashcami carca.

8 Shinapish ñucaca: “Can nishcacunaca mana ciertochu. Cambaj yuyaillamantami nicungui” nishpa huillachunmi cacharcani. 9 Paicunaca manchachishun nishpami ñucanchijtaca: “Paicunapaj maquicunaca shaicuringami. Chai obrataca mana nunca tucuchingacunachu” nijcuna carca. Chashna nicujpipish ñuca Dioslla, ñuca maquicunata sinchiyachihuai.

10 Chaimantaca Delayapaj churi Semayapaj huasimanmi rircani. Paipaj abueloca Mehetabelmi carca. Semayaca paipaj huasipimi huichcarishca carca. Paica: “Diospaj huasipi tupangapaj shuj punllata agllashun. Chai ucuman yaicushpa pungucunata huichcashun. Cantaca huañuchinamanmi shamungacuna. Tutami huañuchinaman shamungacuna” nircami. 11 Shinapish ñucaca: “¿Mandaj cashca jahuachu miticunaman risha? ¿Ñuca laya runa Diospaj huasiman yaicushpaca causashpa catingachu? ¡Ñucaca mana yaicushachu!” nircanimi. 12 Chai profetata Dios mana cachashcatami cuentata curcani. Ashtahuanpish pai huillashca shimicunahuan ñucata llaquichichunmi Tobiaspish, Sanbalatpish pagashca carcacuna. 13 Paicunaca ñucata manchachingapaj, juchapi urmachingapajmi pagashca carcacuna. Chashnami ñucata pingaipi saquichinata, ñucamanta mana allita rimanata yuyarcacuna.

14 Ñuca Dioslla, Tobiaspish, Sanbalatpish imallata rurashcataca ama cungarichu. Profeta huarmi Noadiaspish, caishuj profetacunapish imallata rurashcataca ama cungarichu. Paicunaca achca cutinmi ñucata manchachisha nircacuna.

15 Pircacunata cutin shayachinataca 52 punllacunapimi tucuchircanchij. Elul* quillapaj 25 punllapimi tucuchircanchij.

16 Ñucanchijta pꞌiñajcunapish caita yachaj chayashpa, cꞌuchulla llajta gentecunapish caita ricushpaca tucuicunami achcata pingarircacuna. Ñucanchij Dios ayudashcamanta cai pircacunata cutin shayachishcatami cuentata curcacuna. 17 Chai punllacunapica Judamanta pushajcunaca achca cartacunatami Tobiasman cachajcuna carca. Chai cartacunatami paica cutichij carca. 18 Tobiasca Ará runapaj churi Secaniaspaj yernomi carca. Tobiaspaj churi Jehohananpish Berekiaspaj churi Mesulampaj ushushihuanmi cazarashca carca. Chaimantami Judá llajtapica achca gentecuna Tobiasta apoyanata jurashcacuna carca. 19 Paicunaca siempremi Tobiasmantaca allicunata ñucaman parlajcuna carca. Qꞌuipaca ñuca ima nishcatami chai runaman huillagrijcuna carca. Chaimi Tobiasca ñucata manchachingapaj cartacunata cachaj carca.

7 Pircacunata cutin shayachinata tucuchishpaca chai ratomi pungucunata churarcani. Qꞌuipaca punguta cuidajcunata, cantajcunata, levitacunatami nombrarcani. 2 Chai qꞌuipami ñuca huauqui Hananitapish, soldadocunapaj huasipi mandaj Hananiastapish Jerusalenta mandachun churarcani. Hananiasca confiaipaj, tucui caishujcunamanta yalli Diosta manchaj runami carca. 3 Paicunataca: “Jerusalén pungucunataca manaraj chaupi punlla cajpica* mana pascanachu can. Punguta cuidajcunapish cuidacushpaca ña tutayajpica huichcashpami trancacunata churana can. Jerusalenpi causajcunamanta maijancunataca cuidana puestocunapi churaichij. Cutin caishujcunataca paicunapaj huasi chꞌimbapurapi cuidachun churaichij” nircanimi. 4 Jerusalén llajtaca jatunmi carca. Pero chai llajta ucupica ashacunallami causarcacuna. Huasicunatapish manaraj cutin shayachishcacunachu carca.

5 Ñuca Diosmi pushajcunatapish, catij mandajcunatapish, tucui gentecunatapish tandachishpa cada familiamanta shuj registrota rurachun ñucaman yuyaita curca.* Jerusalenman punta tigrajcunapaj shuticunata cada familiamanta registrashca librotami japircani. Chaipica cashnami quillcashca carca:

6 “Rey Nabucodonosorca judiocunatami Babiloniaman prezu shina apashca carca. Paicunaca provinciapi causajcunami carca. Paicunami qꞌuipamanca Babiloniamanta llujshishpa Jerusalenman, Judaman cada uno paicunapaj propio llajtaman tigrarcacuna. 7 Chai gentecunata pushajcunaca Zorobabel, Jesúa, Nehemías, Azarías, Raamías, Nahamaní, Mardoqueo, Bilsán, Mispéret, Bigvái, Nehúm, Baanami carcacuna.

Israelita cꞌaricunapish tucui caicunami carca. 8 Parospaj churicunaca 2.172-mi carca. 9 Sefatiaspaj churicunaca 372-mi carca. 10 Arapaj churicunaca 652-mi carca. 11 Pahat-Moabpaj churicuna, Jesuapaj churicuna, Joabpaj churicunaca 2.818-mi carca. 12 Elampaj churicunaca 1.254-mi carca. 13 Zatupaj churicunaca 845-mi carca. 14 Zacaipaj churicunaca 760-mi carca. 15 Binuipaj churicunaca 648-mi carca. 16 Bebaipaj churicunaca 628-mi carca. 17 Azgadpaj churicunaca 2.322-mi carca. 18 Adonicampaj churicunaca 667-mi carca. 19 Bigvaipaj churicunaca 2.067-mi carca. 20 Adinpaj churicunaca 655-mi carca. 21 Ezequiaspaj familiamanta Aterpaj churicunaca 98-mi carca. 22 Hasumpaj churicunaca 328-mi carca. 23 Bezaipaj churicunaca 324-mi carca. 24 Harifpaj churicunaca 112-mi carca. 25 Gabaonpaj churicunaca 95-mi carca. 26 Belenmanta, Netofamanta cꞌaricunaca 188-mi carca. 27 Anatotmanta cꞌaricunaca 128-mi carca. 28 Bet-Azmavetmanta cꞌaricunaca 42-mi carca. 29 Quiryat-Jearimmanta, Kefiramanta, Beerotmanta cꞌaricunaca 743-mi carca. 30 Ramamanta, Guebamanta cꞌaricunaca 621-mi carca. 31 Micmasmanta cꞌaricunaca 122-mi carca. 32 Betelmanta, Haimanta cꞌaricunaca 123-mi carca. 33 Caishuj Nebomanta cꞌaricunaca 52-mi carca. 34 Shujtaj Elampaj churicunaca 1.254-mi carca. 35 Harimpaj churicunaca 320-mi carca. 36 Jericopaj churicunaca 345-mi carca. 37 Lodpaj, Hadidpaj, Onopaj churicunaca 721-mi carca. 38 Senaapaj churicunaca 3.930-mi carca.

39 Sacerdotecunaca caicunami carca. Jedayapaj churicunaca 973-mi carca. Paicunaca Jesuapaj familiamantami carca. 40 Imerpaj churicunaca 1.052-mi carca. 41 Pasjurpaj churicunaca 1.247-mi carca. 42 Harimpaj churicunaca 1.017-mi carca.

43 Levitacunaca caicunami carca. Jesuapaj churicunaca 74-mi carca. Paicunaca Cadmielpaj familiamanta, Hodevapaj huahua huahuacunamantami carca. 44 Cantajcunaca caicunami carca. Asafpaj churicunaca 148-mi carca. 45 Punguta cuidajcunaca caicunami carca: Salumpaj churicuna, Aterpaj churicuna, Talmonpaj churicuna, Acubpaj churicuna, Hatitapaj churicuna, Sobaipaj churicunami carca. Paicunaca 138-mi carca.

46 Diospaj huasipi sirvijcunaca* caicunami carca: Zihapaj churicuna, Hasufapaj churicuna, Tabaotpaj churicuna, 47 Querospaj churicuna, Siapaj churicuna, Padonpaj churicuna, 48 Lebanapaj churicuna, Hagabapaj churicuna, Salmaipaj churicuna, 49 Hananpaj churicuna, Guidelpaj churicuna, Gaharpaj churicuna, 50 Reayapaj churicuna, Rezinpaj churicuna, Necodapaj churicuna, 51 Gazampaj churicuna, Uzapaj churicuna, Paseahpaj churicuna, 52 Besaipaj churicuna, Meunimpaj churicuna, Nefusesimpaj churicuna, 53 Bacbucpaj churicuna, Hacufapaj churicuna, Harhurpaj churicuna, 54 Bazlitpaj churicuna, Mehidapaj churicuna, Harsapaj churicuna, 55 Barcospaj churicuna, Sisarapaj churicuna, Temahpaj churicuna, 56 Neziaspaj churicuna, Hatifapaj churicunami carca.

57 Salomonta sirvijcunapaj churicunaca caicunami carca: Sotaipaj churicuna, Soferetpaj churicuna, Peridapaj churicuna, 58 Jaalapaj churicuna, Darconpaj churicuna, Guidelpaj churicuna, 59 Sefatiaspaj churicuna, Hatilpaj churicuna, Pokéret-Hazebaimpaj churicuna, Amonpaj churicunami carca. 60 Diospaj huasipi sirvijcunapish,* Salomonta sirvijcunapaj churicunapish tucuica 392-mi carca.

61 Cutin caicunami Tel-Melahmanta, Tel-Harsamanta, Kerubmanta, Adonmanta, Imermantapish huichiyarcacuna. Shinapish paicunaca maijan familiamanta cashcata o israelita cashcatapish mana ricuchi tucurcacunachu. Paicunaca 62 Delayapaj churicuna, Tobiaspaj churicuna, Necodapaj churicunami carca. Paicunaca 642-mi carca. 63 Sacerdotecunamantaca caicunami carca: Habayapaj churicuna, Hacozpaj churicuna, Barzilaipaj churicunami carca. Barzilaica Galaadmanta Barzilaipaj ushushicunamanta shuj ushushihuanmi cazararca. Chaimi paipaj huarmipaj familiapaj shutita japirca. 64 Paicunaca maijan familiamanta cashcata ricuchingapajmi paicunapaj familiapaj shuticunata registrashcacunapi mashcarcacuna. Chashna mashcashpapish paicunapaj shuticunataca mana japi tucurcacunachu. Chaimi paicunataca sacerdotecuna shina sirvichun mana saquircacuna. 65 Mandajca* Diospajlla chꞌicanyachishca micunataca shuj sacerdote Urimpi, Tumimpi* ricushpa tapungacama mana micunachu canguichij nishpami mandarca.

66 Tucui tigrajcunaca 42.360 gentecunami carca. 67 Shinapish sirvijcunata, cantajcunataca paicunahuan igualca mana yupashcachu carca. Sirvij cꞌaricuna, sirvij huarmicunaca 7.337-mi carca. Cantaj cꞌaricuna, cantaj huarmicunapish 245-mi carca. 68 Paicunaca 736 caballocunata, 245 mulacunatami charircacuna. 69 Shinallataj 435 camellocunata, 6.720 burrocunatami charircacuna.

70 Yayacunapaj familiacunata pushajcunamanta huaquincunaca chai obrata rurachunmi imallatapish cushpa ayudarcacuna. Mandajca* cullquita huaquichinapi churachunmi 1.000 oro dracmacunata,* 50 tazoncunata, sacerdote churarina 530 churanacunatapish curca. 71 Yayacunapaj familiacunata pushajcunamanta huaquincunaca cullquita huaquichinapi churachunmi chai obrapajca 20.000 oro dracmacunata, 2.200 mina* cullquita curcacuna. 72 Caishuj gentecunaca 20.000 oro dracmacunata, 2.000 mina cullquita, sacerdote churarina 67 churanacunatami curcacuna.

73 Sacerdotecunapish, levitacunapish, punguta cuidajcunapish, cantajcunapish, caishuj gentecunapish, Diospaj huasipi sirvijcunapish,* tucui israelitacunapishmi paicunapaj llajtacunapi causai callarircacuna. Israelitacunaca séptimo quilla tucujpica ñami paicunapaj llajtacunapi causacurcacuna”.

8 Tucui gentecunami shuj yuyailla tucushpa Yacu Pungu nishca chꞌimbapurapi saquirij plazapi tandanacurcacuna. Paicunaca quillcaj* Esdrastami Moisesman cushca leyta quillcashca librota apamuchun mañarcacuna. Chai leytami Jehová Diosca israelitacunaman cushca carca. 2 Chaimi sacerdote Esdrasca séptimo quillapaj punta punllapica tucui tandanacushcacunapaj ñaupajman Leyta aparca. Chaipica cꞌaricuna, huarmicuna, uyashcata intindi tucuipaj tucui gentecunapishmi carca. 3 Leyta apamushpaca Yacu Pungu nishca chꞌimbapurapi saquirij plazapimi sinchita liyirca. Chai Leytaca cꞌaricunapaj, huarmicunapaj, uyashcata intindi tucuipaj tucui gentecunapaj ñaupajpimi achijyaimanta callarishpaca chaupi punllacama liyirca. Leyta quillcashca librota liyicujpica tucuicunami alli uyarcacuna. 4 Quillcaj Esdrasca caspihuan rurashca tarima jahuapimi shayacurca. Chai tarimataca chai tandanacuipajmi rurashca carcacuna. Paipaj alli ladopica Matitías, Sema, Anaya, Urías, Hilquías, Maaseyami shayacurcacuna. Cutin paipaj lluqui ladopica Pedaya, Misael, Malkiya, Hasum, Has-Badaná, Zacarías, Mesulammi shayacurcacuna.

5 Esdrasca jahuaman cashcamantami tucuicunapaj ñaupajpi librota pascarca. Chashna pascajpimi tucui gentecunaca shayarircacuna. 6 Chaimi Esdrasca Jatun Jehová Diosta, Dios verdaderota alabarca. Shinallataj tucui gentecunami paicunapaj maquicunata alzashpa “¡Chashna cachun!* ¡Chashna cachun!” nishpa caparircacuna. Chai qꞌuipaca Jehová Diospaj ñaupajpi cungurishpami pambacama cumurircacuna. 7 Jesúa, Baní, Serebías, Jamín, Acub, Sabetái, Hodías, Maaseya, Quelitá, Azarías, Jozabad, Hanán, Pelayá levitacunaca chaipi shayacuj gentecunamanmi Leyta intindichicurcacuna. 8 Shinallataj Dios verdaderopaj Leyta quillcashca librotami sinchita liyishpa, chaipi ima nisha nishcata alli intindichishpa catircacuna. Chashnami imata liyicushcata tucuicunaman intindichishpa ayudarcacuna.

9 Leypi nishca shimicunata uyashpaca tucuicunami huacacurcacuna. Chaimantami mandaj* Nehemiaspish, quillcaj sacerdote Esdraspish, gentecunaman yachachij levitacunapish tucui gentecunamanca: “Cunan punllaca ñucanchij Jehová Diospaj agllashca jatun punllamari. Ama huacaichijchu, ama yallitaj llaquirichijchu” nircacuna. 10 Nehemiasca* paicunataca: “Richijlla, alli micunacunata micugrichij, mishqui ubyanacunata ubyagrichij, imata mana charijcunaman caraichij. Cai punllaca ñucanchij Amitopaj agllashca jatun punllamari. Ama llaquilla caichijchu, Jehová Dios cushichijpimi cancunaca fuerzayuj tucunguichij”* nircami. 11 Levitacunapishmi tucui gentecunataca: “Ama huacaichijchu, cai punllaca Diospaj agllashca jatun punllamari. Ama llaquilla caichijchu” nishpa animachicurcacuna. 12 Tucui gentecunaca yachachishca shimicunata intindishcamantami micunaman, ubyanaman, caishujcunaman micunata caranaman rircacuna. Shinallataj chai punllaca jatunta cushicunamanmi rircacuna.

13 Catij punllaca yayacunapaj familiacunata pushajcunapish, sacerdotecunapish, levitacunapishmi Leypi nishca shimicunata ashtahuan intindingapaj quillcaj Esdrashuan tandanacurcacuna. 14 Jehová Diosca israelitacunataca séptimo quilla fiesta punllacunapica chuglla huasicunapi* causachun nishpami Moisesman mandashca carca. Paicunaca Leypi chashna quillcashca cashcatami ricurcacuna. 15 Shinallataj tucui llajtacunata rishpa, tucui Jerusalenta rishpa: “Quillcashcapi nishca shinaca chuglla huasicunata rurangapaj urcu ladocunata rishpa olivo yura jatun ramacunata, pino yuracunata, mirto yuracunata, palmera yuracunata, shujtaj jatun yuracunatapish apamugrichij” nishpa huillachunmi mandashca carca.

16 Chaimi gentecunaca chaimanta rishpa ramacunata apamurcacuna. Chashna apamushpami paicunapaj propio terrazacunapi, patiocunapi, Diospaj huasi patiocunapi, Yacu Pungu nishcapi saquirij plazapi, Efraín Pungu nishcapi saquirij plazapipish chuglla huasicunata rurarcacuna. 17 Prezu shina cashcamanta tucui tigramujcunaca chuglla huasicunata rurashpami chaipi causai callarircacuna. Nunpaj churi Josué causashca punllacunamanta chai punllacama chashna fiestataca mana rurashcacunachu carca. Chaimantami tucui israelitacunaca chai fiestata cutin rurashpaca achcata cushicurcacuna. 18 Diospaj Leyta quillcashca librotaca tucui punllacunami liyirca. Punta punllamanta callarishpaca último punllacamami liyirca. Chai fiestaca canchis* punllacunatami tiyarca. Cutin octavo punllapica Leypi mandashca shinami shuj jatun tandanacui tiyarca.

9 Israelitacunaca séptimo quillapaj 24 punllapimi tandanacurcacuna. Chai punllaca ayunashpa, racu sacota* churarishpami paicunapaj jahuapipish ñutu allpata shitarircacuna. 2 Israelitacunaca shujtaj llajta gentecunamantami chꞌicanyarircacuna. Chai qꞌuipami paicunaca shayarishpa paicunapaj juchacunata, paicunapaj ñaupa yayacunapaj pandarishcacunatapish tucuita huillarcacuna. 3 Paicuna shayacushcapimi ñucanchij Jehová Diospaj Leyta quillcashca librotaca casi quimsa horasta sinchita liyircacuna. Cutin catij quimsa horastaca paicunapaj juchacunatami tucuita huillacurcacuna. Shinallataj ñucanchij Jehová Diospaj ñaupajpimi cunguricurcacuna.

4 Jesúa, Baní, Cadmiel, Sebanías, Buní, Serebías, Baní, Kenaní runacunaca levitacunapaj tarima jahuaman huichiyashpami ñucanchij Jehová Diosta caparishpa mañarcacuna. 5 Jesúa, Cadmiel, Baní, Hasabneya, Serebías, Hodías, Sebanías, Petahías levitacunaca cashnami nircacuna: “Jatarishpa Jehová Diosta huiñai huiñaipaj* alabaichij. Ñucanchij Dioslla, cambaj sumaj shutica alabashca cachun. Cambaj shutica ima bendicionmantapish, ima alabashcamantapish ashtahuan jatunmari.

6 Canllami Jehová Dios cangui. Canmi jahua pachatapish, jahua pachamanta jahuaman caj jahua pachacunatapish, chaicunapi tiyaj tucui soldadocunatapish* rurarcangui. Canmi allpa pachatapish, chaipi tucui imalla tiyajcunatapish, mama cuchacunatapish, chaicunapi tucui imalla tiyajcunatapish rurarcangui. Canmi tucuicunaman causaita cungui. Jahua pacha soldadocunaca cambaj ñaupajpimi cungurincuna. 7 Canmi Jehová Dios cangui, canmi Dios verdadero cangui. Canca Abranta agllashpami caldeocunapaj Ur llajtamanta llujshichircangui. Paitaca Abrahán shutitami shutichircangui. 8 Paipaj shungupi canta cazujta ricushpami paimanpish, paipaj huahua huahuacunamanpish cananeocunapaj, hititacunapaj, amorreocunapaj, perizitacunapaj, jebuseocunapaj, guirgaseocunapaj allpacunata cungapaj paihuan ari ninacurcangui. Canca cashcata ruraj cashcamantami can imalla cusha nishcataca pajtachircangui.

9 Chaimantami Egipto llajtapi ñucanchij ñaupa yayacuna llaquita apacujta ricushpa, Puca mama cucha cꞌuchupi ayudachun tucui shunguhuan paicuna mañashcata uyashpaca 10 faraonta, paita sirvijcunata, paipaj llajtamanta caj tucui gentecunata llaquichingapaj milagrocunata rurarcangui, señalcunatapish ricuchircangui. Paicuna jatun tucushpa cambaj pueblota llaquichishcamantami chashna rurarcangui. Chashnami cambaj shutitaca cunan punllacunacama rijsichishcangui. 11 Canta sirvijcunapaj ñaupajpimi mama cuchata chaupircangui. Chaimi paicunaca chaquishca allpata pasarcacuna. Caiman chaiman cuyuricuj yacupi rumita shitaj shinami paicunata llaquichijcunataca mama cucha yacu ucujman shitarcangui. 12 Punllaca shayacuj jatun pꞌuyuhuan, tutaca jatun lunyacuj ninahuanmi cambaj pueblotaca pusharcangui. Chashnami paicuna maita rina ñanta achijyachircangui. 13 Sinaí urcuman uriyashpami jahua pachamanta paicunahuan parlarcangui. Paicunamanca cashcata rurashpa juzgachunmi leycunata curcangui. Shinallataj mana llulla leycunata, mandashcacunata, alli mandamientocunatapishmi curcangui. 14 Cambajlla chꞌicanyachishca sábado punllatapishmi paicunaman ricuchircangui. Canta sirvij Moiseshuanmi mandamientocunata, mandashcacunata, shuj leytapish paicunaman curcangui. 15 Yaricachijpica jahua pacha micunatami* curcangui. Yacunachijpipish jatun pata rumimantami yacuta surcurcangui. Can cushatajmi nishca allpaman yaicushpa chaipi causachun nircanguimi.

16 Shinapish ñucanchij ñaupa yayacunaca jatun tucushcacuna, rumi shungumi tucurcacuna. Cambaj mandamientocunatapish mana cazurcacunachu. 17 Paicunaca mana cazusha nircacunachu. Paicunapaj ñaupajpi jatun milagrocunata can rurashcatapish mana yuyarircacunachu. Ashtahuanpish rumi shungu tucushpami Egiptoman esclavocuna shina tigrangapaj shuj pushajta agllarcacuna. Pero canca perdonaj, alli shungu, llaquij, pacienciata charij,* achcata cꞌuyajmi* cangui. Chaimantami paicunataca mana shitashpa saquircangui. 18 Paicunaca fierrota yacuyachishpa shuj bizita rurashpaca: ‘Caimi ñucanchij Dios. Paimari Egipto llajtamanta ñucanchijta llujshichirca’ nircacunami. Chashnami canta mana respetashcata ricuchircacuna. 19 Chashna rurajpipish canca yallitaj llaquij cashpami paicunataca chaquishca pambapi mana shitashpa saquircangui. Punllaca shayacuj jatun pꞌuyumi paicuna rina ñanta pushangapajca mana anchurirca. Cutin tutaca jatun lunyacuj ninami paicuna maita rina ñanta siempre achijyachirca. 20 Yachaisapacuna cachunpish cambaj alli espiritutami curcangui. Maná shuti cambaj tandatapish mana mitsarcanguichu. Paicuna yacunachijpipish yacutami curcangui. 21 Chaquishca pambapica 40 huatacunatami paicunaman cararcangui. Paicunapajca ima mana illarcachu. Paicunapaj ropapish mana tucurircachu, paicunapaj chaquicunapish mana pꞌunguircachu.

22 Paicunamanca llajtacunata, chai llajtacunapi causajcunatami curcangui. Allpacunatapish chaupishpami curcangui. Chaimantami paicunaca rey Sehón mandacushca Hesbón allpacunata, rey Og mandacushca Basán allpacunatapish japircacuna. 23 Paicunapaj huahuacunatapish jahua cielopi tiyaj estrellacunata shinami yallitaj achcata mirachircangui. Qꞌuipaca paicunapaj ñaupa yayacunaman cusha nishca allpamanmi pusharcangui. Paicunami chai allpataca japina carcacuna. 24 Chaimantami paipaj huahuacunaca chai allpaman yaicushpa japircacuna. Paicunapaj ñaupajpimi chai allpapi causaj cananeocunataca misharcangui. Chashna mishashpami paicuna munashcata rurachun chai llajtata mandaj reycunata, chaipi causajcunatapish paicunapaj maquipi curcangui. 25 Paicunaca muyundijta pircashca llajtacunata, alli allpacunatami japircacuna. Shinallataj tucui laya alli cosascunahuan junda huasicunata, yacuta tandana allashca jutcucunata, uva chagracunata, olivo chagracunata, frutacunata pꞌucuj achca yuracunatapishmi japircacuna. Chashnami huijsa pajtata micushpa gordoyarcacuna. Paicunaca can jatunta llaquishcamantami cushicurcacuna.

26 Chashnapish paicunaca mana cazushpami cambaj contra jatarircacuna. Cambaj Leytapish mana cazurcacunachu. Ashtahuanpish cambajman tigrarichun nishpa advertenciacunata cuj cambaj profetacunatami huañuchircacuna. Chashnami canta mana respetashcata ricuchircacuna. 27 Chaimantami paicunataca pꞌiñajcunapaj maquipi churarcangui. Paicunami achcata llaquichircacuna. Pero chashna llaquicunapi cashpaca ayudachunmi caparishpa canta mañarcacuna. Chashna mañajpimi canca jahua pachamanta uyarcangui. Canca jatunta llaquijmi cangui. Chaimantami paicunata pꞌiñajcunapaj maquimanta quishpichichun quishpichij runacunata cacharcangui.

28 Shinapish paicunata pꞌiñajcuna ña mana llaquichijpica cutinllatajmi cambaj ñaupajpica mana allita rurarcacuna. Chaimantami paicunata pꞌiñajcunapaj maquipi saquircangui. Paicunami achcata llaquichircacuna. Chashna llaquipi cashpaca cutinllatajmi ayudachun canta rogarcacuna. Chashna rogashcatami jahua pachamanta cutin cutin uyarcangui. Jatunta llaquij cashcamantami paicunataca quishpichircangui. 29 Cambaj Leyta cutin cazuchunmi advertenciacunata curcangui. Pero paicunaca jatun tucushpami cambaj mandamientocunataca mana uyashun nircacuna. Cambaj mandashcacunaca cazujcunamanca causaitami cun. Pero paicunaca chai mandashcacunata mana cazushpami juchapi urmarcacuna. Canta cungarishpami rumi shungu tucushpa mana uyashun nircacuna. 30 Achca huatacunatami pacienciata charishcata paicunamanca ricuchircangui. Cambaj profetacunata cachashpami cambaj espirituhuan advertenciacunata curcangui. Shinapish manataj uyasha nircacunachu. Chaimantami chai llajtacunapi causaj gentecunapaj maquipi churarcangui. 31 Canca jatunta llaquij Dios cashcamantami paicunataca mana tucuchircangui, mana shitashpa saquircangui. Canca alli shungu, llaquij Diosmi cangui.

32 Ñucanchij Dioslla, canca jatun, poderyuj, mancharina Diosmi cangui. Can ari nishcatapish pajtachishcanguimi. Cambaj mana tucurij cꞌuyaitapish ricuchishcanguimi. Cunanca, Asiria llajtata mandaj reycuna causashca punllacunamanta cunancama ñucanchijcuna, ñucanchij reycuna, ñucanchij mandajcuna, ñucanchij sacerdotecuna, ñucanchij profetacuna, ñucanchij ñaupa yayacuna, tucui cambaj pueblopish llaquita apashcataca ama yangata shina ricuhuaichu. 33 Canca tucuita pajtachij cashcamantami ñucanchij ima tucucujpipish cashcata rurashcangui. Ñucanchijmi mana allitaca rurashcanchij. 34 Ñucanchij reycunapish, ñucanchij mandajcunapish, ñucanchij sacerdotecunapish, ñucanchij ñaupa yayacunapish cambaj Leytaca mana cazurcacunachu. Can cushca mandamientocunatapish, can cushca advertenciacunatapish mana uyasha nircacunachu. 35 Paicunapaj reycuna mandacujpipish canmantami achca bendicioncunata chasquircacuna. Can cushca achca alli allpapimi causarcacuna. Shinapish cantaca mana sirvircacunachu. Ashtahuanpish mana allicunata rurashpami catircacuna. 36 Cunanca ricuhuayari, esclavocunami canchij. Allpapi pꞌucushca granocunata, imalla tiyashca allicunata micuchunmi cai allpataca ñucanchij ñaupa yayacunaman curcangui. Cai allpallapitajmi ñucanchijca esclavocuna canchij. 37 Ñucanchij juchacunamantami ñucanchij jahuapi reycunata churashcangui. Achcata pꞌucushca granocunaca paicunapajmi. Paicunapaj munaita rurashpami ñucanchijtapish,* ñucanchij animalcunatapish charincuna. Ñucanchijca achca llaquitami apacunchij.

38 Tucui caicunamantami shuj ari nishcata ruracunchij. Chai ari nishcatami quillcashpa churanchij. Chai quillcachishcata valichingapajca ñucanchij pushajcunapaj, ñucanchij levitacunapaj, ñucanchij sacerdotecunapaj sellohuanmi* sellashpa churanchij” nircacunami.

10 Ñucanchij ari nishcata valichingapaj sellota churajcunaca caicunami carca:

9 Levitacunaca caicunami carca: Azaniaspaj churi Jesúa, Henadadpaj churicunamanta Binuí, Cadmiel, 10 Sebanías, Hodías, Quelitá, Pelayá, Hanán, 11 Micá, Rehob, Hasabías, 12 Zacur, Serebías, Sebanías, 13 Hodías, Baní, Beninú runapishmi carca.

14 Israelitacunata pushajcunaca caicunami carca: Parós, Pahat-Moab, Elam, Zatú, Baní, 15 Buní, Azgad, Bebái, 16 Adonías, Bigvái, Adín, 17 Ater, Ezequías, Azur, 18 Hodías, Hasum, Bezái, 19 Harif, Anatot, Nebái, 20 Magpías, Mesulam, Hezir, 21 Mesezabel, Sadoc, Jadúa, 22 Pelatías, Hanán, Anaya, 23 Hosea, Hananías, Hasub, 24 Halohés, Pilhá, Sobec, 25 Rehúm, Hasabná, Maaseya, 26 Ahíya, Hanán, Anán, 27 Maluc, Harim, Baaná runapishmi carca.

28 Caishuj israelitacunaca sacerdotecuna, levitacuna, punguta cuidajcuna, cantajcuna, Diospaj huasipi sirvijcuna,* Diospaj Leyta catingapaj cꞌuchulla llajta gentecunamanta tucui chꞌicanyarijcuna, paicunapaj huarmicuna, churicuna, ushushicuna, ari nishcata intindingapaj yuyaita charijcunapishmi carca. 29 Paicunaca paicunapaj huauquicunahuanmi tandanacurcacuna. Paicunaca importante runacunami carca. Tucuicunami Diosta sirvij Moisesman cushca Dios verdaderopaj Leypi nishca shina causangapaj maldicishpa,* jurashpa ari ninacurcacuna. Shinallataj ñucanchij Amito Jehová Dios cushca tucui mandamientocunata, pai imallata rurachun nishcacunata, leycunata, mandashcacunata tucui shunguhuan cazungapajmi ari nircacuna. Paicunaca cashnami nircacuna: 30 “Cai llajta gentecunapaj churicunahuanca ñucanchij ushushicunataca mana cazarachishunchu. Ñucanchij churicunatapish paicunapaj ushushicunahuanca mana cazarachishunchu.

31 Cai llajtapi causaj gentecuna sábado punllapi imalla cꞌatunacunata, tucui laya granocunata cꞌatunaman shamujpica sábado punllapipish, Diospaj agllashca shujtaj punllapipish imata mana randishunchu. Séptimo huatapica allpataca samachishunmi, tucui dibicunatapish mana cobrashunchu.

32 Ashtahuanpish ñucanchij Diospaj huasipi imallatapish rurachunca huatapica cada unomi shuj siclota* quimsapi chaupishpa shuj parteta cungapaj ari nishcanchij. 33 Montonashca tandacunapaj,* punllanta cuna grano ofrendapaj, sábado punllapi rupachishca ofrendapaj, llullu lunapi cuna ofrendapaj, agllashca punllapi fiestacunapaj, Diospajlla chꞌicanyachishca ofrendacunapaj, israelitacunapaj culpata anchuchij juchamanta cushca ofrendacunapaj, ñucanchij Diospaj huasipi tucui imalla ruraicunapajpish cungapajmi ari nishcanchij.

34 Shinallataj sacerdotecuna, levitacuna, caishuj israelitacuna según paicunapaj yayapaj familia huatanta ñucanchij Diospaj huasiman huatapi ima hora yantata apana cashcata ricungapajmi sorteashcanchij. Chai yantataca Leypi quillcashca shinami ñucanchij Jehová Diospaj altarpi rupachina can. 35 Huatantami ñucanchij chagracunapi punta pꞌucushca granocunata, tucui yuracunapi punta pꞌucushca frutacunata Jehová Diospaj huasiman apashun. 36 Shinallataj Leypi quillcashca shinaca ñucanchij punta churicunata, ñucanchij animalcunamantapish vacacunapaj, ovejacunapaj, chivocunapaj punta huacharishcacunatami apashun. Tucuitami ñucanchij Diospaj huasiman apashun. Ñucanchij Diospaj huasipi sirvij sacerdotecunapajmanmi apashun. 37 Ñucanchij Diospaj huasipi huaquichina cuartocunapi* churangapajpish sacerdotecunapajmanmi ñucanchij cutashca punta racu harinata, ñucanchij ofrendacunata, tucui yuracunapi pꞌucushca granocunata, llullu vinota, aceitetapish apashun. Shinallataj levitacunapajca ñucanchij chagracunapi pꞌucushca granocunamantaca cada chungamanta shujtami* apashun. Paicunami granocunata pꞌucuj tucui llajtacunapica cada chungamanta shujta japincuna.

38 Aaronpaj familiamanta caj shuj sacerdotemi levitacuna cada chungamanta shujta japicujpica chaipi cana can. Levitacunaca cada chungamanta shujta japishcataca ñucanchij Diospaj huasipaj, chai huasipi huaquichina cuartocunapi churangapajmi cada chungamanta shujta cuna can. 39 Israelitacunapish, levitacunapaj huahuacunapish granocunata, llullu vinota, aceitetaca huaquichina cuartocunamanmi apana can. Diospaj huasipi tiyaj cosascunapish, sirvicuj sacerdotecunapish, punguta cuidajcunapish, cantajcunapish chaipimi can. Ñucanchij Diospaj huasitaca mana cungarishunchu” nircacunami.

11 Israelitacunata mandajcunaca Jerusalenpimi causarcacuna. Pero caishuj israelitacunaca cada chunga familiacunamanta shuj familia jucha illaj llajta Jerusalenpi causanaman richunmi sortearcacuna. Cutin caishuj iscun* familiacunaca shujtaj llajtacunapimi causashpa saquirircacuna. 2 Quiquin munaimanta Jerusalenpi causanaman risha nij runacunataca tucuicunami bendiciarcacuna.

3 Provinciata pushajcunamanta Jerusalenpi causajcunaca caicunami carca. (Caishuj israelitacuna, sacerdotecuna, levitacuna, Diospaj huasipi sirvijcuna,* Salomonta sirvijcunapaj churicunapish Judapi saquirij caishuj llajtacunapimi cada uno paicunapaj allpacunapi, paicunapaj llajtacunapi causarcacuna.

4 Shinallataj Jerusalenpica Judapaj familiamanta, Benjaminpaj familiamanta huaquin gentecunami causarca). Judapaj familiamanta cajcunapurapica Atayami carca. Atayaca Uziaspaj churimi carca, Uziasca Zacariaspaj churimi carca, Zacariasca Amariaspaj churimi carca, Amariasca Sefatiaspaj churimi carca, Sefatiasca Mahalalelpaj churimi carca. Paica Perezpaj familiamantami carca. 5 Judapaj familiamanta cajcunapurapica Maaseyapishmi carca. Maaseyaca Barucpaj churimi carca, Barucca Colhozepaj churimi carca, Colhozeca Hazayapaj churimi carca, Hazayaca Adayapaj churimi carca, Adayaca Joiaribpaj churimi carca, Joiaribca Zacariaspaj churimi carca. Paica Selapaj familiamantami carca. 6 Perezpaj familiamanta Jerusalenpi causajcunaca 468 mana manchaj cꞌaricunami carca.

7 Benjaminpaj familiamanta cajcunapurapica Salumi carca. Saluca Mesulampaj churimi carca, Mesulamca Joedpaj churimi carca, Joedca Pedayapaj churimi carca, Pedayaca Colayapaj churimi carca, Colayaca Maaseyapaj churimi carca, Maaseyaca Itielpaj churimi carca, Itielca Jesayapaj churimi carca. 8 Benjaminpaj familiamanta cajcunapurapica Gabaipish, Salaipishmi carca. Totalca 928-mi carca. 9 Paicunata ricujca Zicripaj churi Joelmi carca. Paita ayudajca Hasenuapaj churi Judami carca.

10 Sacerdotecunamantaca Joiaribpaj churi Jedayá, Jakín, 11 Serayami carca. Serayaca Hilquiaspaj churimi carca, Hilquiasca Mesulampaj churimi carca, Mesulamca Sadocpaj churimi carca, Sadocca Merayotpaj churimi carca, Merayotca Ahitubpaj churimi carca. Ahitubca Diospaj huasipi pushajmi carca. 12 Paicunahuanca Diospaj huasipi sirvij paicunapaj huauquicunapishmi carca. Totalca 822-mi carca. Chaipica Adayapishmi carca. Paica Jerohampaj churimi carca, Jerohamca Pelaliaspaj churimi carca, Pelaliasca Amzipaj churimi carca, Amzica Zacariaspaj churimi carca, Zacariasca Pasjurpaj churimi carca, Pasjurca Malkiyapaj churimi carca. 13 Chaipica Adayapaj huauquicunapishmi carca. Paicunaca yayacunapaj familiacunata pushajcunami carca. Totalca 242-mi carca. Chaipica Amashaipishmi carca. Paica Azarelpaj churimi carca, Azarelca Ahzaipaj churimi carca, Ahzaica Mesilemotpaj churimi carca, Mesilemotca Imerpaj churimi carca. 14 Chaipica Amashaipaj huauquicunapishmi carca. Paicunaca mana manchaj, fuerzasapa runacunami carca. Totalca 128-mi carca. Paicunataca Zabdielmi ricucurca, Zabdielca shuj rijsishca familiamantami carca.

15 Levitacunamantaca Semayami carca. Paica Hasubpaj churimi carca, Hasubca Azricampaj churimi carca, Azricamca Hasabiaspaj churimi carca, Hasabiasca Bunipaj churimi carca. 16 Sabetaipish, Jozabadpishmi carca. Paicunaca levitacunata pushajcunami carca, Diospaj huasi canllamanmi trabajajcuna carca. 17 Levitacunamantaca Mataniaspishmi carca. Paica Miqueaspaj churimi carca, Miqueasca Zabdipaj churimi carca, Zabdica Asafpaj churimi carca. Mataniasca cantajcunata pushajmi carca, Diosta mañacujpica paimi cantocunata cantachij carca. Bacbuquiaspishmi carca, paipaj huauquicunapurapica paimi ayudaj carca. Abdapishmi carca. Paica Samuapaj churimi carca, Samuaca Galalpaj churimi carca, Galalca Jedutunpaj churimi carca. 18 Jucha illaj llajtapi caj levitacunaca totalca 284-mi carca.

19 Punguta cuidajcunaca Acubpish, Talmonpish, paicunapaj huauquicunapishmi carca. Totalca 172-mi carca.

20 Caishuj israelitacunapish, sacerdotecunapish, levitacunapish Judapi saquirij caishuj llajtacunapimi carca. Cada unomi paicuna japishca allpacunapi* carcacuna. 21 Diospaj huasipi sirvijcunaca Ofelpimi causarcacuna. Paicunataca Diospaj huasipi sirvij Ziha, Guispá runacunami mandacurca.

22 Jerusalenpi levitacunata ricujca Uzimi carca. Paica Banipaj churimi carca, Banica Hasabiaspaj churimi carca, Hasabiasca Mataniaspaj churimi carca, Mataniasca Micapaj churimi carca. Paica Asafpaj familiamantami carca. Asafpaj familiaca cantajcunami carca. Uzica Diospaj huasipi imalla ruracujta ricungapajmi encargado carca. 23 Reyca cantajcunaman cada punlla paicuna imalla minishtishcata cuchunmi mandashca carca. 24 Cutin Mesezabelpaj churi Petahiasca gentecunahuan imata ruranata ricuchun reyman consejota cujmi carca. Paica Judapaj churi Zerahpaj familiamantami carca.

25 Uchilla pueblocunapish, cꞌuchulla campocunapish caicunami carca: Judapaj familiamanta maijan gentecunaca Quiryat-Arbapi, chai cꞌuchulla pueblocunapi, Dibonpi, chai cꞌuchulla pueblocunapi, Jecabzeelpi, chai uchilla pueblocunapimi causarcacuna. 26 Shinallataj Jesuapi, Moladapi, Bet-Peletpi, 27 Hazar-Sualpi, Beer-Sebapi, chai cꞌuchulla pueblocunapi, 28 Ziclagpi, Meconapi, chai cꞌuchulla pueblocunapi, 29 En-Rimonpi, Zorapi, Jarmutpi, 30 Zanoahpi, Adulampi, chai uchilla pueblocunapi, Lakispi, chai cꞌuchulla campocunapi, Azecapi, chai cꞌuchulla pueblocunapipishmi causarcacuna. Beer-Sebamanta callarishpaca Hinón pugru pambacamami causarcacuna.

31 Benjaminpaj familiamanta gentecunaca Guebapi, Micmashpi, Ayapi, Betelpi, chai cꞌuchulla pueblocunapimi carcacuna. 32 Shinallataj Anatotpi, Nobpi, Ananiahpi, 33 Hazorpi, Ramapi, Guitaimpi, 34 Hadidpi, Zeboimpi, Nebalatpi, 35 Lodpi, Onopimi* carcacuna. Chai pugru pambapimi artesanocunaca causajcuna carca. 36 Judamanta caj huaquin grupo levitacunataca benjaminitacunapaj allpacunapi causachunmi cacharcacuna.

12 Sealtielpaj churi Zorobabelhuan, Jesúa runahuan Jerusalenman huichiyaj sacerdotecuna, levitacunaca caicunami carca: Seraya, Jeremías, Esdras, 2 Amarías, Maluc, Hatús, 3 Secanías, Rehúm, Meremot, 4 Idó, Guinetói, Abías, 5 Mijamín, Maadías, Bilgá, 6 Semaya, Joiarib, Jedayá, 7 Salú, Amoc, Hilquías, Jedayapishmi carca. Jesúa causashca punllacunapica paicunami sacerdotecunatapish, paicunapaj huauquicunatapish pushajcuna carca.

8 Levitacunaca Jesúa, Binuí, Cadmiel, Serebías, Judá, Mataniaspishmi carca. Mataniasca paipaj huauquicunandijmi Diosta pagui ningapaj cantocunata cantachij carca. 9 Bacbuquías, Uní levitacunaca paicunapaj chꞌimbapurapimi guardiacuna shina sirvicurcacuna. 10 Jesuaca Joiaquimpaj yayami carca, Joiaquimca Eliasibpaj yayami carca, Eliasibca Joiadapaj yayami carca. 11 Joiadaca Jonatanpaj yayami carca, Jonatanca Jaduapaj yayami carca.

12 Joiaquim causashca punllacunapica sacerdotecunapish, yayacunapaj familiacunata pushajcunapish caicunami carca: Serayapaj familiamantaca Meraya, Jeremiaspaj familiamantaca Hananías, 13 Esdraspaj familiamantaca Mesulam, Amariaspaj familiamantaca Jehohanán, 14 Malukipaj familiamantaca Jonatán, Sebaniaspaj familiamantaca José, 15 Harimpaj familiamantaca Adná, Merayotpaj familiamantaca Helcái, 16 Idopaj familiamantaca Zacarías, Guinetonpaj familiamantaca Mesulam, 17 Abiaspaj familiamantaca Zicrí, Miniaminpaj familiamantaca [?],* Moadiaspaj familiamantaca Piltái, 18 Bilgapaj familiamantaca Samúa, Semayapaj familiamantaca Jehonatán, 19 Joiaribpaj familiamantaca Matenái, Jedayapaj familiamantaca Uzí, 20 Salaipaj familiamantaca Calái, Amocpaj familiamantaca Éber, 21 Hilquiaspaj familiamantaca Hasabías, Jedayapaj familiamantaca Netanelmi carca.

22 Eliasib, Joiadá, Johanán, Jadúa causashca punllacunapimi yayacunapaj familiacunata pushajcunapish, levitacunapish, sacerdotecunapish registrashca carcacuna. Rey Darío Persia llajtata mandacui punllacunacamami registrashca carcacuna.

23 Yayacunapaj familiacunata pushaj levitacunaca Eliasibpaj churi Johanán causashca punllacunacamami chai tiempopi imalla tucushcata ricuchij libropi registrashca carcacuna. 24 Levitacunata pushajcunaca Hasabías, Serebías, Cadmielpaj churi Jesúa runapishmi carca. Paicunapaj huauquicunaca Diosta sirvij David mandashca shinami Diosta alabangapaj, pagui ningapaj paicunapaj chꞌimbapurapi shayarijcuna carca. Shuj grupo guardiacunaca caishuj grupo guardiacunapaj ladopimi carca. 25 Matanías, Bacbuquías, Abdías, Mesulam, Talmón, Acub runacunaca pungupimi carcacuna. Paicunaca Diospaj huasi pungucuna cꞌuchullapi saquirij huaquichina cuartocunatami cuidacurcacuna. 26 Paicunaca Joiaquim, mandaj Nehemías, quillcaj* sacerdote Esdras causashca punllacunapimi sirvijcuna carca. Joiaquimca Jesuapaj churimi carca, Jesuaca Jozadacpaj churimi carca.

27 Jerusalén llajta pircacunata tucuchishcata inagurangapajca* levitacunataca paicuna causacushca tucui ladocunapimi mashcanaman rircacuna. Diosta pagui nishpa cantocunahuan, cimbalocunahuan, cuerdata charij instrumentocunahuan, arpacunahuan cushicushpa inaguracionta rurangapajmi Jerusalenman pushamurcacuna. 28 Cantajcunapaj churicunaca* Jordán pambacunamanta, Jerusalén muyundij ladocunamanta, netofatitacuna causashca ladocunamantami tandanacurcacuna. 29 Shinallataj Bet-Guilgalmanta, Gueba campocunamanta, Azmavetmantami tandanacurcacuna. Cantajcunaca Jerusalén muyundijpimi uchilla pueblocunata shayachishcacuna carca. 30 Sacerdotecunapish, levitacunapish Leypi mandashca shinami chuyayarircacuna. Shinallataj tucui gentecunata, pungucunata, pircacunatami chuyayachircacuna.

31 Chai qꞌuipaca Judá llajtata mandajcunatami pircacuna jahuaman huichiyachircani. Shinallataj Diosta pagui ningapajmi cantaj ishqui jatun grupocunata churarcani. Paicunata catichunpish ishqui grupopimi gentecunata chꞌicanyachircani. Cantajcunamanta shuj grupoca alli ladomanmi rirca. Paicunaca Ushpata montonashca Pungu nishca ladomanmi pircacuna jahuata purishpa catircacuna. 32 Hosaya runapish, Judá llajtata mandajcunamanta chaupi runacunapishmi cantajcunata catishpa rircacuna. 33 Shinallataj Azarías, Esdras, Mesulam, 34 Judá, Benjamín, Semaya, Jeremiaspishmi catishpa rircacuna. 35 Paicunahuanca trompetacunata apaj sacerdotecunapaj huaquin churicunapishmi rircacuna. Jonatanpaj churi Zacariasmi rirca. Jonatanca Semayapaj churimi carca, Semayaca Mataniaspaj churimi carca, Mataniasca Micayapaj churimi carca, Micayaca Zacurpaj churimi carca, Zacurca Asafpaj churimi carca. 36 Shinallataj Zacariaspaj huauquicuna Semaya, Azarel, Milalái, Guilalái, Maái, Netanel, Judá, Hananipishmi rircacuna. Paicunaca Diosta sirvij David rurashca musicacunata tocana instrumentocunahuanmi rircacuna. Quillcaj Esdrasmi paicunata ñaupashpa rirca. 37 Pugyu yacu Pungu nishcamantaca Davidpaj Llajta Gradacuna jahuata rishpa, pirca huichita pasashpa, Davidpaj Huasi jananijta rishpami Yacu Pungu nishcacama, inti llujshin ladoman rircacuna.

38 Diosta pagui ningapaj cantajcunamanta caishuj grupoca caishuj ladotami* rirca. Ñucapish, caishuj chaupi gentecunata pushashcami pirca jahuata paicunata catishpa rircani. Chai grupoca Hornocuna tiyan Torreta pasashpa, Ancho pirca nishcata rishpa, 39 Efraín Pungu nishcatami pasarca. Shinallataj Ñaupa llajta Pungu nishcata, Pescado Pungu nishcata, Hananel Torreta, Meá Torreta rishpami catirca. Qꞌuipaca Ovejacunapaj Pungu nishcata rishpami Guardiacunapaj Pungu nishcacama chayarcacuna. Chaipimi shayarircacuna.

40 Ultimotaca Diosta pagui ningapaj cantaj ishqui grupocunaca Diospaj huasi ñaupajpimi shayarircacuna. Shinallataj ñucapish, ñucahuan caj catij mandajcunapishmi chaipi shayarircanchij. 41 Eliaquim, Maaseya, Miniamín, Micaya, Elioenái, Zacarías, Hananías sacerdotecunapishmi chaipi shayarircacuna. Paicunaca trompetacunata apajcunami carca. 42 Shinallataj Maaseya, Semaya, Eleazar, Uzí, Jehohanán, Malkiya, Elam, Ezerpishmi chaipi shayarircacuna. Cantajcunaca Izrahías cantachijpimi tucui fuerzahuan cantarcacuna.

43 Chai punllaca achca sacrificiocunatami curcacuna. Dios paicunaman cushicuita cushcamantami achcata cushiyarircacuna. Huarmicunapish, huahuacunapish achcatami cushiyarircacuna. Jerusalenpi paicuna cushicushcaca carumanmi uyaricurca.

44 Chai punllaca ofrendacunata, punta pꞌucushca granocunata, cada chungamanta shujta* cushcacunata huaquichinacunapi cuidachunmi encargadocunata nombrarcacuna. Chaipimi allpacunapi pꞌucushca granocunata Leypi mandashca shina sacerdotecunaman, levitacunaman cuna cashcata huaquichina carcacuna. Judamanta tucui gentecunaca sacerdotecunapish, levitacunapish sirvicushcamantami cushilla carcacuna. 45 Sacerdotecunapish, levitacunapish Diostami sirvi callarircacuna. Shinallataj tucuicunatami chuyayachi callarircacuna. Paicunaca David mandashca shina, Davidpaj churi Salomón mandashca shinami cantajcuna rurashca shinallataj, punguta cuidajcuna rurashca shinallataj rurarcacuna. 46 Achca tiempo huashaman, David, Asaf causashca punllacunapica cantajcunata cantachijcunami tiyarca. Shinallataj Diosta alabangapaj, pagui ningapaj cantocunapishmi tiyarca. 47 Zorobabel causashca punllacunapi, Nehemías causashca punllacunapica tucui israelitacunami cantajcunaman, punguta cuidajcunaman cada punlla paicuna imalla minishtishcata charichun paicunaman cuna cashcata cujcuna carca. Levitacunamanpish paicunaman cuna cashcatami cujcuna carca. Cutin levitacunaca Aaronpaj huahua huahuacunamanmi paicunaman cuna cashcata cujcuna carca.

13 Chai punllaca tucuicunamanmi Moisés quillcashca librota liyircacuna. Chaipimi Diosta adorajcunapurapi ammonitacunata, moabitacunata manataj chasquina cashcata ricurcacuna. 2 Paicunaca israelitacunamanca tandatapish, yacutapish mana cushcacunachu carca. Chaipaj randica paicunata maldicichunmi Balaamman pagashcacuna carca. Pero ñucanchij Diosca chai maldicishcata cambiashpami bendiciarca. 3 Leypi ima nishcata tucuicuna uyashpaca shujtaj llajtamanta cajcunatami israelitacunapuramanta chꞌicanyachi callarircacuna.

4 Manaraj chashna rurajpica ñucanchij Diospaj huasipi huaquichina cuartocunata* cuidajca sacerdote Eliasibmi carca. Paica Tobiaspaj familiami carca. 5 Eliasibca shuj jatun huaquichina cuartotami Tobiasman cushca carca. Ñaupaca chai cuartopica grano ofrendata, olibanota, shujtaj cosascunatami huaquichijcuna carca. Shinallataj levitacunaman, cantajcunaman, punguta cuidajcunaman cuna cashca granocunata, llullu vinota, aceitetapishmi cada chungamanta shujta* cushcata huaquichijcuna carca. Chaipica sacerdotecunaman cushca ofrendatapishmi huaquichijcuna carca.

6 Babilonia llajtata mandaj rey Artajerjes 32 huatacunata mandacujpimi rey maipi cashcaman tigrarcani. Chaimi tucui chai tiempoca ña mana Jerusalenpi carcani. Shinapish asha tiempo qꞌuipaca tigrangapajmi reyta permisota mañarcani. 7 Jerusalenman chayashpaca Tobiaspaj ñaupajpi alli saquiringapaj Eliasib mana allita rurashcatami cuentata curcani. Paica Diospaj huasi patiopimi shuj huaquichina cuartota Tobiasman cushca carca. 8 Chaimi mana jahuallata pꞌiñarishpa Tobiaspaj imalla tiyashcacunataca huaquichina cuartomanta tucuita canllaman shitarcani. 9 Qꞌuipaca huaquichina cuartocunata pꞌichachunmi mandarcani. Chai qꞌuipami Diospaj huasipi tiyaj cosascunata, grano ofrendata, olibanotapish cutin chaipi huaquichircani.

10 Shinallataj levitacunaca paicuna japina cashcata mana japicushcatami yachaj chayarcani. Chashna mana japicushcamantami chaipi sirvij levitacunapish, cantajcunapish cada uno paicunapaj chagracunaman tigrashca carca. 11 Chaimantami catij mandajcunataca: “¿Diospaj huasitaca imamantataj shitashpa saquircanguichij?” nishpa sinchita rimarcani. Qꞌuipaca chaimanta rishcacunata tandachishpami paicuna sirvicushcaman cutin tigrachun mandarcani. 12 Judamanta tucui gentecunami chungamanta shujta cuna cashca granota, llullu vinota, aceitetapish huaquichina cuartoman aparcacuna. 13 Chaimantaca sacerdote Selemiasta, quillcaj* Sadocta, levitacunamanta Pedayatami huaquichina cuartocunata cuidachun churarcani. Paicunata ayudajca Hananmi carca. Hananca Zacurpaj churimi carca, Zacurca Mataniaspaj churimi carca. Tucui paicunaca confiaipaj runacunami carca. Paicunami paicunapaj huauquicunamanca cada unoman japina cashcata cuna carcacuna.

14 Ñuca Dioslla, ñucata yuyaripai. Caicunata rurashcatapish yuyaripai. Cambaj huasita cꞌuyashcatapish, chaipi canta sirvingapaj imallata rurashcatapish amataj cungaripaichu.

15 Chai punllacunapica gentecuna sabadopi vinota rurangapaj uvacunata sarucushcata, granocunata tandashpa burrocunaman apachicushcatami ricurcani. Shinallataj Jerusalenman vinota, uvacunata, higocunata, tucui laya granocunata sabadopi apamucushcatami ricurcani. Chaimantami chai punllapi micunacunata cꞌatunata saquichun advirtircani. 16 Shinallataj llajtapi causaj Tiromanta cajcunapishmi pescadocunata, tucui laya cꞌatunacunata apamushpa Judamanta gentecunaman cꞌatujcuna carca. Chaitaca Jerusalenpimi sábado punllapi cꞌatujcuna carca. 17 Chaimantami Judamanta pushajcunata sinchita rimashpaca cashna nircani: “¿Ima nishpataj sábado punllata yangapi churashpa cai jatun millaita ruracunguichijyari? 18 Cancunapaj ñaupa yayacunami chashna rurarcacuna. Chaimantami ñucanchij Diosca ñucanchijmanpish, cai llajtamanpish tucui cai llaquicunata cacharca. ¿Cunanca cancunachu sábado punllataca yangapi churacunguichij? ¿Chashna rurashpaca israelitacunahuan Dios ashtahuan pꞌiñarichunchu munanguichij?” nircanimi.

19 Chaimantaca manaraj amsayajpi, sábado punlla manaraj callarijpimi Jerusalén pungucunata huichcashpa sábado punlla tucuringacama ama pascachun mandarcani. Shinallataj ñucata ayudajcunatami sábado punllapi cꞌatuna cosascunata ama pi apamuchun pungucunata cuidachun churarcani. 20 Chaimantami comerciantecunapish, tucui laya cosascunata cꞌatujcunapish shuj o ishqui tutata Jerusalén canllaman pacarircacuna. 21 Paicunataca: “¿Imatataj caipica ruracunguichij? Pircacuna ñaupajpi cutin pacarinaman shamujpica a la fuerzami llujshichishpa cachasha” nishpami advirtircani. Chai punllamantami sabadopica ña mana shamujcuna carca.

22 Shinallataj levitacunataca chuyayarishpami catina canguichij, sábado punllata ama yangapi churachunpish pungucunata cuidanamanmi shamuna canguichij nircanimi. Ñuca Dioslla, ñucata yuyaripai. Caita rurashcatapish ama cungaripaichu. Canca achcata cꞌuyajmi* cangui, ñucata llaquihuayari.

23 Chai punllacunapica maijan judiocunaca Asdodmanta, Ammonmanta, Moabmanta huarmicunahuan cazarashcatami* ricurcani. 24 Paicunapaj huahuacunamanta chaupica Asdodmanta gentecuna parlashca shimitami parlarcacuna. Cutin caishuj chaupica shujtaj llajtacunamanta gentecunapaj shimitami parlarcacuna. Pero paicunamantaca judiocunapaj shimitaca ni maijan mana parlarcacunachu. 25 Chai judiocunataca maldicishpami sinchita rimarcani. Huaquin cꞌaricunataca macashpa, ajchamantami cꞌutsarcani. Shinallataj Diospaj shutipimi jurachircani. Paicunataca cashnami nircani: “Cancunapaj ushushicunataca paicunapaj churicunahuanca ama cazarachinguichijchu. Cancunapaj churicunatapish paicunapaj ushushicunahuanca ama cazarachinguichijchu. Cancunapish chai huarmicunahuanca ama cazaranguichijchu. 26 ¿Manachu chaita rurashcamanta Israelta mandaj rey Salomonca juchapi urmarca? Tucui llajtacunapi pai shina reyca mana tiyarcachu. Ñucanchij Diospish paita cꞌuyashcamantami tucui Israel llajtapi rey cachun churarca. Chashnapish paitaca shujtaj llajtamanta huarmicunami juchapi urmachirca. 27 ¿Cancunaca imamantataj cai jatun millaitaca rurarcanguichijyari? ¿Imamantataj shujtaj llajtamanta huarmicunahuan cazarashpa Diosta mana cazurcanguichijyari?” nircanimi.

28 Joiadaca sacerdotecunata jatun mandaj Eliasibpaj churimi carca. Joiadapaj churicunamanta shuj churica Bet-horonmanta Sanbalatpaj yernomi carca. Chaimantami paitaca ñuca ladomanta anchuchishpa cacharcani.

29 Ñuca Dioslla, paicuna imalla rurashcata yuyaringui. Paicunaca sacerdote shina sirvinatami mapayachishcacuna. Shinallataj sacerdotecunahuan, levitacunahuan ari ninacushcatami mapayachishcacuna.

30 Ñucaca tucuicunatami shujtaj llajtamanta gentecunapaj mana alli ruraicunamanta chꞌicanyachishpa chuyayachircani. Shinallataj sacerdotecuna, levitacuna cada uno paicuna sirvicushcapi imallata rurana cashcatami organizarcani. 31 Shinallataj yantata, punta pꞌucushca granocunata por turno apamuchunmi organizarcani.

Ñuca Dioslla, ñucata yuyarishpa bendiciapai.