LAMENTACIONES
א [álef]*
1 ¡Achca gentecuna causana llajtaca shitashcamari saquirishca!
¡Llajtacunapurapi achca gentecuna causan llajta cashpapish viuda huarmi shinamari saquirishca!
¡Provinciacunapurapi mandaj huarmi* cajtaca sinchi trabajocunata rurachunmari churashca!
ב [bet]
2 Tutaca huacashpami pasan, quijados uritaca huiquica manataj chaquinchu.
Tucui paihuan huainayajcunamantapish paita cushichingapajca shujllapish mana chaipichu.
Tucui paipaj amigocunapish traicionashcacunami. Cunanca paicunaca paipaj contracunami tucushcacuna.
ג [guímel]
3 Judaca llaquinaitamari prezuman apashca cashca. Paica sinchi trabajocunata rurachunmari apashca cashca.
Shujtaj llajtacunapurapi causashpapish mana tranquilo causai tucushcachu.
Tucui paipaj contracunapish llaquihuan cai horasmari paitaca japishcacuna.
ד [dálet]
4 Fiestacunaman pi mana shamujpimari Sionman rina ñancunapish llaquilla cancuna.
Chai llajtapaj pungucunapish shitashcamari, paipaj sacerdotecunapish yallitaj llaquillamari.
Paipaj solteracunapish yallitaj llaquillamari, Sionpish yallitaj llaquillamari.
ה [he]
5 Paipaj contracunaca cunanca paipaj amomari can. Paipaj contracunaca imamanta mana preocuparishcacunachu can.
Pai yallitaj juchacunata rurashcamantamari llaquita charichun Jehová Diosca saquishca.
Paipaj huahuacunapish paipaj contrapaj ñaupajtami prezu shina apashca cashcacuna.
ו [waw]
6 Sionpaj ushushica tucui paipaj achijnicuj canatamari chingachishca.
Paipaj mandajcunapish qꞌuihuacunata mana japij tarugacuna* shinamari cancuna.
Paicunapaj contrapaj ñaupajpimari yallitaj shaicushca puricuncuna.
ז [zayin]
7 Llaquilla, huasi illaj cai horasmari Jerusalenca
ñaupa punllacunapi charishca tucui valishca cosascunata yuyarin.
Paipaj gentecuna contracunapaj maquipi urmajpica paica pi ayudajtaca mana charircachu.
Chaimi paipaj contracunaca pai urmajta ricushpa asircacuna.
ח [jet]
8 Jerusalenca yallitaj juchatamari rurashca.
Chaimantami yallitaj millanana tucushca.
Pai lluchulla cajta ricushpamari ñaupaman alli nijcunaca cunanca paita pꞌiñancuna.
Paillatajmari sufrin, pingai tucushcamantamari paipaj ñahuitapish pacan.
ט [tet]
9 Paipaj churanaca mapamari.
Paica shamuj punllacunapica mana yuyarcachu.
Pai urmashcamantami tucuicuna mancharishca, paitaca pi mana cushichi tucunchu.
Enemigoca jatunyarishcamari, chaimanta Jehová Dioslla, ñuca sufricujta ricuhuayari.
י [yod]
10 Paipaj enemigoca valishca cosascunatami shuhuashca.
Paica shujtaj llajtacuna Diospaj huasiman yaicujtamari ricurca.
Can ama yaicuchun nishca llajtacunaca cambaj pueblomanmari yaicushcacuna.
כ [kaf]
11 Jerusalenmanta tucui gentecunamari huacacuncuna, paicunaca micunatamari mashcashpa puricuncuna.
Mana huañusha nishpami, paicunapaj valishca cosascunata micunahuan cambiashcacuna.
Jehová Dioslla, ñucata ricuhuayari, ñucaca imapajpish mana valij huarmi* shinamari tucushcani.
ל [lámed]
12 Tucui cancuna, cai ñanta pasajcuna, ¿cancunapajca caica manachu ima can?
¡Caita ricuichijyari!
¿Ñuca charishca nanai shina shujtaj nanai tiyanchu?
¿Manachu Jehová Dios yallitaj pꞌiñari punllapi ñucata chashna sufrichirca?
מ [mem]
13 Jahua pachamantami ñucapaj cada tullucunata rupachingapaj ninata cachashca.
Ñuca chaquicunapi mallata churashpamari ñucataca huashaman tigrachirca.
Ñucataca shitashca huarmita shinamari saquishca.
Tucui punllami ungushca cani.
נ [nun]
14 Ñuca juchacunaca paipaj maquihuan shuj yugopi huatashca shinamari can.
Cai juchacunaca ñuca cungapi churashca shinamari can, fuerza illajmari saquirishcani.
Jehová Diosca ñucataca runacunapaj maquipimari entregashca, paicunahuanca ñucaca mana macanacui tucunichu.
ס [sámekh]
15 Jehová Diosca ñuca chaupipi caj sinchi runacunatamari anchuchishca.
Ñuca joven runacunata tucuchingapajmi ñucapaj contra achca gentecunata tandachishca.
Jehová Diosca Judapaj soltera* ushushitami uvata saruna jutcupi sarushca.
ע [ayin]
16 Cai cosascunamantami huacacuni, ñuca ñahuicunapish huiqui jundamari can.
Tucui ñucata cushichisha nijcuna, sinchiyachisha nijcunaca ñucamantaca carupimari cancuna.
Ñuca enemigo mishashcamantami ñuca huahuacunapish shitashca saquirishcacuna.
פ [pe]
17 Sionca ayudata mañashpamari maquicunata chutashca. Paica pi paita cushichichunca mana charinchu.
Jacobpaj muyundijpi tucui cajcunataca Jehová Diosca paipaj contra cachunmi mandashca.
Jerusalenca paicunapajca yallitaj millananamari tucushca.
צ [sadé]
18 Jehová Diosca cashcata rurajmari, ñucaca paipaj mandashcacunata mana uyashpami paipaj contra tucushcani.
Tucui llajtacuna uyaichij, ñuca llaquita ricuichijyari.
Solteracunapish, ñuca joven cꞌaricunapish prezu shinamari apashcacuna cashca.
ק [qof]
19 Ñucahuan huainayajcunatami cayarcani, pero paicunaca ñucatami traicionarcacuna.
Llajtapi causangapaj imallatapish micunata mashcacushpami
ñuca sacerdotecunapish, israelitacunata pushajcunapish* huañurcacuna.
ר [resh]
20 Ricui, Jehová Dioslla, ñucaca yallitaj preocuparishcamari cani.
Shungumantami yallitaj llaquirini.
Cantaca yallitajmi mana cazushcani, chaimantami ñuca shunguca chaupirishpa nanacun.
Canllapica espadahuanmi huañuncuna, huasipipish huañuica tiyanllatajmi.
ש [shin]
21 Gentecunaca ñuca huacashcataca uyashcacunami. Chashnapish mana pi cushichishcachu.
Tucui ñuca contracunami ñuca charishca llaquicunata yachashcacuna.
Can ñucaman llaquita cachashcamantami paicunaca yallitaj cushicuncuna.
Pero canca paicunahuan imata rurasha nishca punllataca apamunguitajmari, chai punllami paicunapish ñuca shinallataj tucuringacuna.
ת [taw]
22 Paicunapaj tucui millai ruraicunaca cambaj ñaupajman chayachun.
Tucui ñuca juchacunamanta can castigashca shinallatajmi paicunatapish castigangui.
Ñucaca yallitaj llaquillamari cani, ñuca shungupish ungushcamari can.
א [álef]
2 ¡Jehová Diosca pai yallitaj pꞌiñarishpaca Sionpaj ushushitaca paipaj amsa pꞌuyuhuanmi tapachishca!
Israelpaj sumaj canatapish jahua pachamantami allpaman shitashca.
Pai yallitaj pꞌiñarina punllapica paipaj chaqui sarunataca mana yuyarishcachu.
ב [bet]
2 Jehová Diosca Jacobpaj tucui huasicunataca mana llaquishpami tucuchirca.
Pai yallitaj pꞌiñarishpaca Judapaj ushushipaj jatun pircacunatami tucuchirca.
Gobiernotapish, paipaj mandajcunatapish pambaman shitashpami pingaipi saquirca.
ג [guímel]
3 Yallitaj pꞌiñarishca cashpami paica Israelpaj podertaca tucuchirca.*
Contracuna cꞌuchuyacujpica paipaj alli lado maquitami anchuchirca.
Pai yallitaj pꞌiñarishcaca nina sindirij shinami Jacobpaj contra carca, chashnami paipaj tucui muyundijpi cajcunataca tucuchirca.
ד [dálet]
4 Paica paipaj arcotaca shuj enemigo shinami chutashca.* Paipaj alli lado maquipish llaquichingapajmi listo can.
Ñahuicunapi tucui alli ricurijcunatapishmi huañuchishpa catirca.
Paica yallitaj pꞌiñarishpami Sionpaj ushushipaj carpa huasitaca ninahuan shina tucuchirca.
ה [he]
5 Jehová Diosca shuj enemigo shinami tucushca.
Israelitacunatamari tucuchishca.
Chaipi tiyaj tucui torrecunatapish tucuchishcamari.
Paipaj jatun pircacunatapish tucuitamari urmachishca.
Judapaj ushushipica huacanata, yallitaj llaquirinatamari mirachishca.
ו [waw]
6 Paipaj chuglla huasitaca shuj jardinpi tiyaj ujsha techota charij huasita shinamari urmachin.
Paipaj fiestatapishmi tucuchirca.
Jehová Diosca Sionpica fiestacunatapish, sabadocunatapish ama yuyarichunmi anchuchirca.
Yallitaj pꞌiñarishpami reytapish, sacerdotetapish llaquishcata mana ricuchin.
ז [zayin]
7 Jehová Diosca paipaj altartaca mana chasquishcachu.
Paipaj huasitapish mana ricunayachishcachu.
Sinchi torrecunapaj pircacunatapish paipaj contrapaj maquipimari entregashca.
Shuj fiesta punllapi shinamari Jehová Diospaj huasipi caparircacuna.
ח [jet]
8 Jehová Diosca Sionpaj ushushipaj pircatami tucuchinata decidishca.
Midina huascatapishmi chutashca.
Paipaj maquihuan tucuchinatapish* mana saquishcachu.
Pirca chaquicunatapish, pircacunatapish llaquilla cachunmi saquin.
Chaicunaca tandallami fuerza illaj saquirishcacuna.
ט [tet]
9 Paipaj pungucunapish allpapimi pambarishca.
Paica paipaj barracunatapish pꞌaquishpami tucuchishca.
Paipaj reypish, mandajcunapish llajtacunapurapimi can.
Leypish* mana tiyanchu, paipaj profetacunapish Jehová Diosmanta muscuipi shina ricushcacunataca mana chasquincunachu.
י [yod]
10 Sionpaj ushushipaj pushajcunaca* pambapimi upalla tiyarincuna.
Paicunapaj umapipish ñutu allpatami shitarincuna, racu sacotapish* churarishcami cancuna.
Jerusalenpaj soltera* ushushicunaca paicunapaj umatapish pambacamami cumurichishcacuna.
כ [kaf]
11 Ñuca ñahuicunapish yallitaj huacashcamanta shaicushcamari can.
Ñuca shungupipish yallitaj llaquillamari cani.
Ñuca pueblopaj ushushipish urmashcamanta, huahuacunapish,
llullu huahuacunapish pueblopaj plazacunapi desmayashcamantamari ñuca shunguca yallitaj pꞌaquirishca can.*
ל [lámed]
12 Paicunaca paicunapaj mamacunataca “Yaricanmi, yacunayanmi”* ninataca mana saquincunachu.
Llajtapaj plazacunapimi chugririshca shina desmayarincuna.
Chashnami paicunapaj mamacunapaj rigrapi asha asha huañuncuna.
מ [mem]
13 ¿Jerusalenpaj ushushilla, cantaca imahuantaj chꞌimbapurai tucushayari?
¿Pitaj can shina llaquilla canyari?
¿Sionpaj soltera ushushilla, canta cushichingapajca imahuantaj chꞌimbapurai tucuniyari?
Cambaj chugrica jatun mama cucha shinamari. ¿Pitaj cantaca jambi tucungayari?
נ [nun]
14 Cambaj profetacunaca llulla, imapajpish mana valij muscuicunatami cambajca ricushcacuna.
Chashnami ama prezu shina apashca cangapaj can pandarishcataca mana ricuchircacuna.
Paicunaca llulla, panda muscuicunatami canmanca parlashpa catircacuna.
ס [sámekh]
15 Ñanta tucui pasajcunaca canmanta burlarishpami maquipi huajtarincuna.
Jerusalenpaj ushushita ricushpaca mancharishpami burlaringancuna,* umatapish cuyuchishpaca:
“¿Cai llajtatachu ‘Yallitaj sumajmari, tucui allpapi causajcunatapish cushichijmari’ nijcuna carca?” nincuna.
פ [pe]
16 Cambaj tucui enemigocunaca, cambaj contrami rimashcacuna.
Burlarishpa, quirucunata canirishpami: “Paitaca tucuchishcanchijmari.
¡Cai punllatamari ñucanchijca shuyacurcanchij! ¡Chai punllaca chayashcamari, chaitamari ricushcanchij!” nincuna.
ע [ayin]
17 Jehová Diosca pai yuyashcatami rurashca, pai nishcacunatami pajtachishca.
Ñaupa tiempomantami pai mandashcata pajtachishca.
Mana llaquishpami tucuchishca.
Paica cambaj enemigo canta mishachunmi saquin. Chaimantami enemigoca canta mishashpa cushicun. Paica cambaj enemigocunatapish ashtahuan sinchitami rurashca.
צ [sadé]
18 Sionpaj ushushipaj pircalla, gentecunapaj shungucunaca Jehová Diostami caparincuna.
Cambaj huiquicunaca punllapish, tutapish larca yacu shina llujshichun.
Canpish ama samaringui, cambaj ñahuicunataca* ama samachishpa huacacuilla.
ק [qof]
19 ¡Jatari! Tucui tuta huacai.
Canca huacashpami Jehová Diosmanca cambaj shungupi tucui imallata charishcata parlana cangui.
Cambaj huahuacunapaj causaimanta cambaj maquicunata paiman alzai.
Paicunaca tucui callecunapaj esquinacunapimi yaricaimanta desmayacuncuna.
ר [resh]
20 Jehová Dioslla, cambaj pueblota canllataj sinchita tratashcata ricuhuayari.
¿Huarmicunaca paicunapaj propio, sano huachashca huahuacunatachu micushpa catina can?
¿Jehová Dioslla, cambaj propio huasipichu sacerdotecunapish, profetacunapish huañuchishca cana cancuna?
ש [shin]
21 Jovencunapaj huañushca cuerpocunapish, mayorllacunapaj huañushca cuerpocunapish callecunapimi shitashca cancuna.
Ñuca solteracunatapish, ñuca solterocunatapish espadahuanmari huañuchishcacuna.
Paicunataca can yallitaj pꞌiñarishca punllapimari huañuchishcangui. Paicunataca mana llaquishpamari llaquinaita huañuchishcangui.
ת [taw]
22 Shuj fiesta punllapaj shinami tucui ladocunamanta enemigocunata tandachishcangui.
Jehová Dios yallitaj pꞌiñarishca punllapica ni pi mana quishpirishpa miticui tucushcachu.
Ñuca enemigoca ñuca huachashpa* huiñachishcacunatamari tucuchishca.
א [álef]
3 Ñucaca Dios yallitaj pꞌiñarishpa paipaj varahuan gentecunata sufrichishcata ricuj runamari cani.
2 Paimi ñucataca llujshichishpa cachashca. Achij luzman pushanapaj randica amsamanmi pushashca.
3 Paipaj maquipish tucui punllamari cutin cutin ñucapaj contra can.
ב [bet]
4 Paica ñuca aichatapish, ñuca caratapish chaquichishcamari.
Paica ñuca tullucunatapish pꞌaquishcamari.
5 Ñuca muyundijpimi shuj pircata shayachishca. Jayaj venenohuan, problemacunahuanmi ñuca muyundijpi shayarishca.
6 Achca tiempota huañushca runacunata shinamari ñucataca amsa lugarcunapi cachun obligashca.
ג [guímel]
7 Ama miticushpa richunmi ñucataca patacunapaj chaupipi huichcashpa churashca.
Cobremanta rurashca llashaj cadenacunahuanmi ñucataca huatashpa churashca.
8 Paita caparishpa, sustarishpa ñucata ayudachun mañajpica paica ñuca mañashcataca mana chasquinchu.
9 Labrashca rumicunahuanmi ñuca purina ñancunatapish jarcashcangui.
Canmi ñuca purina ñancunatapish huishtuyachishcangui.
ד [dálet]
10 Paica shuj oso shina llaquichingapajmi chapan, shinallataj miticushpa pacalla chapaj león shinami ñucata llaquichingapaj shuyacun.
11 Paica ñancunamanta llujshichunmi ñucataca obligarca, mirga mirgami ñucataca ñuturca.*
Ñucataca shitashcatami saquirca.
12 Paipaj arcota chutashpami* paipaj flechahuan ñucata ricurashpa shitan.
ה [he]
13 Paipaj flechacunata huaquichinamanta flechacunata llujshichishpami ñuca riñoncunapi clavashca.
14 Tucui pueblocunapi cajcunaca ñucamantamari chanzata rurashpa asincuna. Paicunaca cantashpamari ñucamanta tucui punlla burlarincuna.
15 Jayaj cosascunahuanmi ñucataca jundachishca, ajenjo yacutapish yallitajmi ubyachishca.
ו [waw]
16 Paica ñuca quirucuna pꞌaquiringacamami ripiota cashtuchin.
Ushpapimi* ñucataca singuchin.
17 Canca ñuca tranquilo causaimantamari jarcashcangui. Ñuca alli cosascunata rurashcatapish mana yuyarinichu.
18 Chaimantami ñucaca: “Ñuca achijnicuj canami chingarishca, Jehová Diospi shuyanapishmi chingarishca” nini.
ז [zayin]
19 Ñuca llaquilla cashcata, huasi illaj cashcata yuyariyari. Ajenjo yacuta, jayaj venenota ubyacujta yuyariyari.
20 Chaitaca canca yuyaringuitajmari, ñucata ayudangapajmi cumuringui.
21 Chaitami ñuca shungupi yuyarini, chaimantami pacienciahuan shuyasha.
ח [jet]
22 Jehová Diospaj mana tucurij cꞌuyaimantamari ñucanchijca manaraj tucuchishca cashcanchij.
Paipaj llaquij canaca mana nunca tucurinchu.
23 Cada mushuj punllami pai llaquishcataca ricuchin. Paipimi siempre confiai tucunchij.
24 Ñucaca: “Jehová Diosmari ñuca herencia,* chaimantami paitaca pacienciahuan shuyasha” nircanimi.
ט [tet]
25 Jehová Diosca paipi shuyajhuanpish, paita mashcanata mana saquijhuanpish allimari can.
26 Jehová Dios quishpichichunca pacienciahuan* shuyanamari alli can.
27 Shuj runapajca jovenraj cashpa yugota aparinamari alli can.
י [yod]
28 Runapaj jahuapi Dios cai cargata churajpica pailla tiyarishpa upalla saquirichun.
29 Paipaj shimitaca ñutu allpapi churachun, chashna rurajpica paica quishpiri tucungapishchari.
30 Maijanpish paita huajtajmanca quijadosta ricuchichun, shaicungacama cꞌamishcatapish chasquichun.
כ [kaf]
31 Jehová Diosca ñucanchijtaca mana huiñaipaj shitashcata saquingachu.
32 Pai yallitaj llaquita cachashca cashpapish paipaj mana tucurij cꞌuyaimantami llaquishcata ricuchinga.
33 Paica runacunapaj churicunata sufrichinata, huacachinataca manataj munanchu.
ל [lámed]
34 Diosca allpapi prezu shina cajcunata maijanpish paipaj chaquihuan saruchunca manataj saquingachu.
35 Jatun Diospaj ñaupajpi shuj runata cashcata rurashpa ama juzgachunca paica manataj saquingachu.
36 Shuj runata juzgacujpi yangamanta llaquichichunca Diosca manataj saquingachu.
Cai cosascunataca Jehová Diosca manataj munanchu.
מ [mem]
37 ¿Jehová Diospaj munai mana cajpica pitaj pai nishcata paillataj pajtachi tucunyari?
38 Jatun Diospaj shimimantaca
alli cosascunapish, mana alli cosascunapish chagruca mana llujshinchu.
39 ¿Maijanpish* juchata rurashcamanta llaquicunata charishpaca chaimanta quejari tucunchu?
נ [nun]
40 Ñucanchij ima shina causacushcata yuyarishpa Jehová Diospajman tigrashunchij.
41 Jahua pachapi caj Diosman ñucanchij shunguta, ñucanchij maquicunata alzashpa cashna nishunchij:
42 “Juchatami rurashcanchij, mana cazushcanchijchu. Chaimari canca mana perdonashcangui.
ס [sámekh]
43 Yallitaj pꞌiñarishpami cambajman cꞌuchuyachunca mana saquishcangui.
Ñucanchijtaca catirashpami mana llaquishpa huañuchishcangui.
44 Ñucanchij mañashcacuna cambajman ama chayachunmi pꞌuyuhuan jarcashcangui.
45 Llajtacunapurapimi ñucanchijtaca basurata shina, imapajpish mana valijta shina rurangui” nishunchij.
פ [pe]
46 Tucui ñucanchij enemigocunami ñucanchij contra rimancuna.
47 Ñucanchijtaca manchaipish, trampacunapishmi japishca. Ñucanchijca shitashca, llaquicunahuanmari canchij.
48 Ñuca pueblopaj ushushi urmashcamantami ñuca ñahuicunamantaca larca yacucuna shina llujshin.
ע [ayin]
49 Ñuca ñahuicunaca mana shaicushpa, mana samarishpami huacacunlla.
50 Jahua pachamanta Jehová Dios ricungacamami ñuca ñahuicunaca cashna huacacungalla.
51 Ñuca llajtapaj tucui ushushicuna ima tucushcata ricushpami ñuca ñahuicunaca sufrichin.
צ [sadé]
52 Imatapish mana rurajpimi ñuca contracunaca shuj pajarota shina ñucataca japishcacuna.
53 Paicunaca ñucataca jutcupi shitashpami huañuchisha nishcacuna. Rumicunahuan shitanatapish mana saquircacunachu.
54 Yacucunaca ñuca umatami taparca, chaimantami: “¡Ñucaca chingachishcami cani!” nircani.
ק [qof]
55 Jehová Dioslla, yallitaj ucujman caj jutcumantamari cambaj shutita nishpa mañarcani.
56 Ñuca nishcacunata uyahuayari. Ñucata ayudachun, ñucata quishpichichun caparicushcata cambaj rinrincunata ama huichcashpa uyahuayari.
57 Canca, ñuca canta cayai punllamari cꞌuchuyarcangui. Canca: “Ama manchaichu” nircanguimi.
ר [resh]
58 Jehová Dioslla, ñucataca juezcunapaj* ñaupajpimari difindishcangui. Ñuca causaitapish quishpichishcanguimari.
59 Jehová Dioslla, ñucata mana allita rurashcatamari ricushcangui. Cashcata rurashpa juzgahuayari.
60 Ñucata tigra llaquichicujtaca canllatajmi ricushcangui. Paicuna ñucapaj contra tucui imallata rurangapaj yuyacushcatapishmi ricushcangui.
ש [sin o shin]
61 Jehová Dioslla, paicuna cꞌamishcatapish uyashcanguimi, paicuna ñucapaj contra tucui imallata rurangapaj yuyacushcatapish ricushcanguimi.
62 Ñuca contracunapaj shimicuna tucui punlla ñucamanta allijlla rimacushcatapishmi uyashcangui.
63 ¡Ricuhuayari! ¡Paicunaca shayacushpapish, tiyacushpapish paicunapaj cantocunapimi ñucamanta burlarincuna!
ת [taw]
64 Jehová Dioslla, paicunapaj ruraicunamantaca paicuna chasquina cashcatami cungui.
65 Canca paicunataca rumi shungutami rurangui, chashnami paicunataca maldicingui.
66 Can yallitaj pꞌiñarishpaca Jehová Dioslla, paicunataca catirashpami llaquichingui. Paicunataca cai allpamantami tucuchingui.
א [álef]
4 ¡Aij, alli oroca achijnicuj canatamari chingachishca!
¡Diospajlla chꞌicanyachishca lugarpaj rumicunaca tucui calle esquinacunapimi caita chaita shitashca can!
ב [bet]
2 Sionpaj cꞌuyashca churicunaca chuyayachishca oro shina valishcamari carcacuna.
¡Cunanca paicunataca barro puñucunata shinallamari ricushcacuna,
allpamanta imatapish ruraj runapaj maquihuan rurashca shinallamari cancuna!
ג [guímel]
3 Sacha allcucunapish paicunapaj huahuacunata chuchuchingapajmi cꞌuchuyancuna.
Shinapish ñuca pueblopaj ushushica millaimi tucushca. Paica chaquishca pambapi tiyaj avestruzcuna shinami can.
ד [dálet]
4 Chuchucuj huahuacunapaj cꞌalluca yacunaimanta chaquishpami jahua lado shimi ucupi pegarin.
Uchilla huahuacunaca micunatami mañancuna, pero pipish imata mana cuncunachu.
ה [he]
5 Mishqui micunata micujcunaca cunanca yaricaimantami callecunapi urmancuna.
Pucanicuj ropata churarishpa huiñajcunaca cunanca ushpapimi siririncuna.
ו [waw]
6 Ñuca pueblopaj ushushita castigashcaca* Sodomapaj juchamanta castigashcatapish yallimari can.
Paica chai ratomi urmarca, paitaca pi mana maquita chutashpa ayudai tucurcachu.
ז [zayin]
7 Paipaj nazareocunaca rasutapish yalli chuyamari carcacuna, lechetapish yalli yurajllamari carcacuna.
Paicunaca coral rumicunatapish yalli pucanicujmi carca. Paicunaca zafiro rumicuna shina achijnicujcunami carca.
ח [jet]
8 Pero cunanca paicunaca tishnatapish yalli amsamari cancuna.
Paicuna callecunapi cajpica pi cashcata mana rijsincunachu.
Paicunapaj aicha caraca tulluman pegarishpa chaquishca caspi shinami tucushca.
ט [tet]
9 Espadamanta huañujcunami yaricaimanta huañujcunatapish yalli ashtahuan alli can.
Campocunapi micuna illashcamantami asha asha fuerza illaj saquirishpa, espadahuan caishuj ladoman pasachishca shina tucushcacuna.
י [yod]
10 Llaquij huarmicunapaj maquicunaca paicunapaj propio huahuacunatami yanui callarishcacuna.
Chai huahuacunami ñuca pueblopaj ushushi urmai punllaca paicunapaj micuna* tucushca.
כ [kaf]
11 Jehová Diosca pai pꞌiñarishcatami ricuchishca.
Paica nina sindirij shinami yallitaj pꞌiñarishca.
Sionpi ninata japichishpami paipaj cimientocunata tucuchishca.
ל [lámed]
12 Allpapi mandaj reycunapish, chaipi causaj gentecunapish
paicunata pꞌiñajcuna Jerusalenpaj pungucunata yaicunataca mana crircacunachu.
מ [mem]
13 Paipaj profetacunapish juchacunata rurashcamanta, paipaj sacerdotecunapish pandarishcamantami chashna tucurca.
Paicunaca chai llajta chaupipimi cashcata ruraj runacunapaj yahuarta jicharcacuna.
נ [nun]
14 Paicunaca callecunapimi ciegocuna shina caiman chaiman purishcacuna.
Yahuarhuanmi mapayashcacuna can.
Chaimantami paicunapaj ropapipish mana pi tupari tucun.
ס [sámekh]
15 Paicunataca: “¡Mapa cajcuna! ¡Caimanta llujshichij! ¡Caimanta llujshichij! ¡Anchurichij! ¡Ñucanchijta ama tuparichijchu!” nishpami caparincuna.
Profetacunapish, sacerdotecunapish huasi illajmi saquirishcacuna, caita chaitami puricushcacuna.
Shujtaj llajtacunamanta gentecunaca cashnami nishcacuna: “Paicunaca ñucanchijhuan mana caipica saquiri tucunchu.
פ [pe]
16 Jehová Diosca paicunataca caita chaitami cachashca.
Paica paicunata llaquishpaca mana ricungachu.
Runacunaca sacerdotecunataca mana respetangacunachu, autoridadcunatapish* mana llaquingacunachu” nishcacunami.
ע [ayin]
17 Yangamanta ayudata mashcashpa purishcamantami ñucanchij ñahuicunaca shaicushca can.
Manapish quishpichi tucuipaj llajtapaj ayudatamari mashcashpa, mashcashpa catishcanchij.
צ [sadé]
18 Ñucanchij contracunaca catirashpami purircacuna. Chaimantami plazacunapica ña mana puri tucurcanchij.
Ñucanchij causai tucurinaca chayashcamari, ñucanchij punllacunaca tucurishcamari, ñucanchij causai tucurinaca chayamushcamari.
ק [qof]
19 Ñucanchijta catijcunaca jahuata volaj aguilacunatapish yalli utca callpajcunami carca.
Paicunaca urcucunapimi ñucanchijta catircacuna. Chaquishca pambapimi llaquichingapaj pacalla chaparcacuna.
ר [resh]
20 Paicunapaj jatun jutcupimi causaita cuj samaica prezupi urmashca. Paica Jehová Dios agllashcami can.
Paimantaca “Llajtacunapaj chaupipimi pai cuidajpi* causashun” nijcunami carcanchij.
ש [shin]
21 Uz llajtapi causaj Edompaj ushushilla, cushicuiyari.
Pero canmanca llaquichishca cana copatami pasachingacuna. Chaimi canca machashca, lluchulla shujtajcunapaj ñaupajpi ricuringui.
ת [taw]
22 Sionpaj ushushilla, can pandarishcamanta castiganaca ñami tucurishca.
Paica prezuman shinaca mana tigra apangachu.
Pero cunanca Edompaj ushushilla, paica can pandarishcamantami castiganga.
Paimi cambaj juchacunataca ricuchinga.
5 Jehová Dioslla, ñucanchijhuan ima tucushcata yuyariyari.
Ñucanchijta humillashcata ricuhuayari.
2 Ñucanchij herenciataca mana rijsishcacunamanmi entregashcacuna. Ñucanchij huasicunatapish shujtaj llajtamanta runacunamanmi cushcacuna.
3 Ñucanchijca yaya illajmari saquirishcanchij, ñucanchij mamacunapish viudacuna shinamari.
4 Ñucanchij propio yacuta ubyangapajpish paganamari canchij, ñucanchij propio yantata charingapajpish randinamari canchij.
5 Ñucanchij cꞌuchullatamari caticuncuna, ñallamari cati japigrincuna.
Shaicushcami canchij, samaillatapish aisachunca mana saquincunachu.
6 Tandata micungapajmi ñucanchij maquita chutashpa Egipto llajtata, Asiria llajtata ayudachun mañanchij.
7 Juchacunata ruraj ñucanchij ñaupa yayacunaca ña mana caipichu. Shinapish ñucanchijmi paicunapaj pandarishcacunata apana canchij.
8 Cunanca sirvijcunamari ñucanchijta mandacun. Paicunapaj maquicunamantaca ni pi mana quishpichi tucuncunachu.
9 Chaquishca pambapi espadamanta huañuna cashpapish ñucanchijpajmi tandata japircanchij.
10 Jatun yaricai tiyashcamantami ñucanchij aicha carapish yallitaj rupacuj horno shina tucushca.
11 Sionpimi cazarashca huarmicunataca humillashcacuna.* Judapi saquirij llajtacunapimi cꞌarihuan manaraj chayarishca huarmicunatapish humillashcacuna.
12 Mandajcunataca maquipi huatashpami huarcurcacuna. Autoridadcunatapish* respetashcataca mana ricuchircacunachu.
13 Jovencunaca cutana rumicunatami apancuna, cutin huahuacunaca llashaj yanta aparishca cashcamantami ñitcarincuna.
14 Autoridadcunaca llajtapaj pungupica ña mana cancunachu. Jovencunapish paicunapaj musicataca ña mana tocancunachu.
15 Ñucanchij shungupipish cushicuica ña mana tiyanchu. Ñucanchij bailanacunapish huacanami tucushca.
16 Umamantaca coronamari urmashca. ¡Aij ñucanchijlla, juchatamari rurashcanchij!
17 Chaimanta ñucanchij shungupish ungushcamari can.
Chai cosascunamantamari ñucanchij ñahuipish amsayashca.
18 Sion urcuca shitashcamari, cunanca zorrocunapish chaipimi puricuncuna.
19 Shinapish Jehová Dioslla, canca cambaj jatun tiyarinapica huiñai huiñaitamari cangui.
Cambaj jatun tiyarinapish huiñai huiñaipajmari canga.
20 ¿Canca imamantataj ñucanchijtaca huiñai huiñaipaj cungarishcanguiyari? ¿Canca imamantataj ñucanchijtaca achca tiempota shitashcanguiyari?
21 Jehová Dioslla, cambajman cutin tigrachimuyari, ñucanchijca chai ratomi cambajman tigramushun.
Ñucanchij causacushca punllacunaca ñaupa tiempocuna shinallataj cachun rurahuayari.
22 Shinapish canca ñucanchijtaca tucuimi shitashpa saquishcangui.
Ñucanchijhuanpish yallitaj pꞌiñarishcamari catingui.
Capítulo 1-manta capítulo 4-camaca llaquilla cantocunamantami parlan. Cai cantocunaca hebreo abecedario letracunahuanmi can.
O “princesa”.
O “venadocuna”.
Caipica Jerusalenmantami parlacun.
Hebreo rimaipica: “cꞌarihuan manaraj chayarishca” ninmi.
Hebreo rimaipica: “ancianocunapish” ninmi.
Hebreo rimaipica: “tucui gachuta pꞌitirca” ninmi.
Hebreo rimaipica: “sarushca” ninmi.
Hebreo rimaipica: “millpunatapish” ninmi.
O “Mandashcapish”.
Hebreo rimaipica: “ancianocunaca” ninmi.
O “pꞌaza sacotapish”, “cañamazu sacotapish”.
Hebreo rimaipica: “cꞌarihuan manaraj chayarishca” ninmi.
Hebreo rimaipica: “ñuca higadoca pambapi tallishca can” ninmi.
Hebreo rimaipica: “¿Maipitaj granopish, vinopish tiyanyari?” ninmi.
Hebreo rimaipica: “silbangacuna” ninmi.
Hebreo rimaipica: “cambaj ñahuipaj ushushitaca” ninmi.
O “sanocunata huachashpa”.
Caitaca “ñucataca yapushca allpata shinami saquin” nishpapishmi traducishcacuna.
Hebreo rimaipica: “sarushpami” ninmi.
O “Uchupapimi”.
Hebreo rimaipica: “ñuca chasquina parte” ninmi.
O “upalla”.
Hebreo rimaipica: “Causaj runaca” ninmi.
O “ñuca almataca demandajcunapaj”.
Hebreo rimaipica: “ushushipaj pandarishcaca” ninmi.
O “llaqui punllapaj micuna”.
Hebreo rimaipica: “ancianocunatapish” ninmi.
Hebreo rimaipica: “paipaj llandupi” ninmi.
O “violashcacuna”.
Hebreo rimaipica: “Ancianocunatapish” ninmi.