Diosta adorana carpa huasi

Moisés Sinaí urcupi cajpimi Diosca shuj carpa huasita rurachun mandarca. Chai carpa huasica mana shujtaj huasicuna shinachu cana carca. Ashtahuanpish israelitacuna Jehová Diosta adorana huasimi cana carca. Chaitaca maimanpish apashpa rinallami carca.

Diosca Moisestaca: ‘Carpa huasita rurangapaj, israelitacunataca imalla charishcacunata apamuchun mañai’ nircami. Paicunaca orota, cullquita, cobreta, achijnicuj rumicunatami apamurcacuna. Chashnallataj millmata, linota, animalcunapaj carata, shujtaj cosascunatapish shungumantami apamurcacuna. Chaimantami Moisesca: “Ña ama ashtahuan apamuichijchu” nirca.

Alli ruraj achca cꞌaricuna, huarmicunami carpa huasita rurashpa ayudarcacuna. Trabajo alli llujshichunca Diosmi alli yuyaita paicunaman curca. Huaquincunaca puchcarcacuna, ahuarcacuna, bordarcacuna. Shujtajcunaca orohuan, rumihuanmi trabajarcacuna. Caishujcunaca tablacunatami rurarcacuna.

Dios mandashca shinami carpa huasitaca rurarcacuna. Chai carpa huasi ishqui ucuta charichunca shuj alaja cortinatami churarcacuna. Shujca Diospajlla chꞌicanyachishca ucumi carca. Caishujca Diospajlla ashtahuan chꞌicanyachishca ucumi carca. Cai ucupica acacia caspihuan, orohuan rurashca shuj cajami tiyarca. Chaitami Dioshuan ari ninacushca arca nijcuna carca. Cutin Diospajlla chꞌicanyachishca ucupica orohuan rurashca candelabro, shuj mesa, inciensota rupachina shuj altarmi tiyarca. Patiopica cobrehuan rurashca batea, sacrificiocunata cunapaj shuj jatun altarmi tiyarca. ¿Dioshuan ari ninacushca arcata israelitacuna ricushpaca imatataj yuyarijcuna carca? Jehová Diosllata cazusha nishcatami yuyarijcuna carca.

Diosca Aaronta, paipaj churicunatapish carpa huasipi sacerdotecuna cachunmi agllarca. Paicunami chai carpa huasitaca cuidashpa Diosman sacrificiocunatapish cuna carca. Diospajlla ashtahuan chꞌicanyachishca ucumanca sacerdotecunata mandaj Aaronllami yaicuna carca. Huatapica shuj cutinllami paipaj juchamanta, paipaj familiapaj juchamanta, tucui israelitacunapaj juchacunamantapish sacrificiocunata Diosman cungapaj yaicuna carca.

Israelitacunaca Egiptomanta llujshishca shuj huata qꞌuipami Diospaj carpa huasitaca rurashpa tucuchircacuna. Diosta adorangapajca ñami shuj huasita charircacuna.

Diosca shuj pꞌuyutami chai carpa huasi jahuapi churarca. Chashnami carpa huasita rurashcamanta cushilla cashcata ricuchirca. Chai pꞌuyu carpa huasi jahuapi saquirijpica israelitacunaca chaipimi saquirina carca. Pero chai pꞌuyu shujtaj ladoman rijpica paicunapishmi rina carca. Diospaj carpa huasita apashpami pꞌuyuta catijcuna carca.