Rutpish, Noemipish

Israelpi achca yaricai tiyashcamantami Noemí shuti huarmica paipaj cusandij, ishqui churindij Moabpi causanaman rircacuna. Chaipimi Noemipaj cusaca huañurca. Cutin paipaj churicunaca moabita huarmicunahuanmi cazararcacuna. Chai huarmicunaca Rut, Orpá shuticunami carca. Qꞌuipaca Noemipaj churicunapishmi huañurca.

Israelpi yaricai tucurishcata uyashpami Noemica paipaj llajtaman tigrarca. Rutpish, Orpapish paihuanmi rircacuna. Ñanta ricushpaca Noemica: ‘Cancunaca alli huarmicuna, alli nueracunami cashcanguichij. Cutin cazarachunmi munani. Moab llajtaman tigraichijlla’ nircami. Paicunaca: ‘Cantaca achcatami cꞌuyanchij, canllataca mana saquishunchu’ nircacunami. Noemí cutin cutin tigraichijlla nijpimi Orpaca tigrarca. Pero Rutca mana tigrarcachu. Chaimantami Noemica: ‘Orpaca paipaj llajtaman, paipaj dioscunapajman tigranmi. Canpish paihuan rilla, cambaj mamapaj huasiman tigrai’ nircami. Chaimi Rutca: ‘Can maiman rishcamanmi ñucapish risha. Cambaj Diospish ñuca Diosmi canga’ nirca. ¿Chashna nijpica Noemica ima shinashi sintirishcanga?

Rutpish, Noemipish Israelpi cebadata cosechana callari tiempopimi chayarcacuna. Shuj punllaca Rutca Boazpaj chagrapimi chꞌalanaman rirca. Boazca Rahabpaj churimi carca. Rut moabita cashpapish Noemita cꞌuyashpa paita mana saquishcatami Boazca uyashca carca. Chaimantami paipaj trabajajcunataca: ‘Rut chꞌalashpa catichun, granocunata ama tucuita japinguichij’ nirca.

Chai tutallatajmi Noemica Ruttaca: “¿Maipitaj trabajamungui?” nirca. Paica: ‘Boazpaj chagrapimi chꞌalamuni’ nircami. Chaimi Noemica: ‘Chai runaca ñuca cusapaj familiami. Paipaj trabajaj huarmicunahuan saquiringuilla. Chaipimi alli cangui’ nirca.

Rutca cosecha tucuringacamami Boazpaj chagrapi chꞌalarca. Rut alli trabajaj huarmi cashcatami Boazca ricurca. Chai tiempopica huahuacunata mana charishpa shuj runa huañujpica paipaj familiami viuda huarmihuan cazarai tucurca. Chaimantami Boazca Ruthuan cazararca. Paicunaca shuj huahuatami charircacuna. Obed shutitami churarcacuna. Qꞌuipaca Obedca rey Davidpaj abuelomi tucurca. Noemipaj amigacunaca cushicushpami: ‘Diosca canta cuidachunca Ruttami cushca. Cunanca shuj nietotapishmi charingui. Chaimanta Jehová Diosta alabashunchij’ nircacuna.