Jefteca ari nishcatami pajtachirca

Israelitacunaca cutinmi Diosta cungarishpa yanga dioscunata adorai callarircacuna. Amonitacuna llaquichijpica yanga dioscunaca mana cuidarcachu. Achca huatacunata llaquicunahuan causacushpami Diostaca: “Ñucanchijca juchatamari rurashcanchij. Pero cunanca ñucanchijta quishpichihuai” nircacuna. Israelitacunaca yanga dioscunata tucuchishpami cutin Jehová Diosta adorarcacuna. Paica israelitacunata llaquichishpa catichunca mana saquircachu.

Israelitacunaca alli macanacuj Jefté runatami agllarca. Paimi amonitacunahuan macanacungapajca pushaj cana carca. Jefteca Jehová Diostaca: ‘Ammonitacunata mishachun can ayudajpi, ñuca ganashpa tigramucujpi ñuca huasi pungumanta tupanaman llujshijtaca Jehová Dioslla, canmanmi cusha’ nircami. Jehová Diosca Jefté mañashcata uyashpami macanacuita ganachun ayudarca.

Jefté huasiman tigrajpica paita tupangapajca paipaj shujlla ushushimi puntapi llujshirca. Paica panderetata tocashpa, bailashpami tuparca. Chaimi Jefteca Diosman ima nishcata yuyarishpa: ‘¡Aij ñuca huahualla! Ñuca shunguca pꞌaquirishcami can. Mandaj Diosman nishcata maitataj pꞌaquishari. Siló llajtapi Diospaj carpa huasipi Diosta sirvichunmi cantaca cachana cani’ nirca. Chaimi paipaj ushushica: ‘Ñuca yayitulla. Diosman ari nishcataca pajtachilla. Ñuca amigacunahuan ishqui quillata urcucunapi purigringapaj cachahuai. Qꞌuipaca rishallami’ nirca. Jeftepaj ushushica Diospaj carpa huasipimi paipaj tucui causaipi Diosta tucui shunguhuan sirvirca. Paipaj amigacunaca cada huatami Silopi visitanaman rijcuna carca.