Davidca Goliattami huañuchirca

Jehová Diosca Samueltaca: ‘Jesepajman ri. Paipaj churicunamantami shujta rey cachun agllashcani’ nircami. Chaimi Samuelca Jesepaj huasiman rirca. Jesepaj punta churita ricushpaca paimi agllashca canga nishpami yuyarca. Pero Diosca Samueltaca: ‘Mana paichu can. Runaca paipaj ñahui ima ricushcallatami ricun. Ñucaca shungupi ima tiyashcatami ricuni’ nircami.

Jeseca paipaj seis churicunatami Samuelpajman apamurca. Chaimi Samuelca: ‘Caicunataca Diosca pita mana agllashcachu. ¿Tucui caicunachu cambaj churicuna can?’ nirca. Jeseca: “Mana, ashtahuan joven churimi faltanraj. Paica ovejacunatami michicun” nircami. David chayajpimi Diosca: “¡Paimi can!” nirca. Chaimi Samuelca Davidpaj umapi aceiteta churarca. Chashnami David Israel llajtapi catij mandaj cachun agllashcata ricuchirca.

Asha tiempo qꞌuipaca israelitacunaca filisteocunahuanmi macanacucurcacuna. Filisteocunamantaca Goliat shuti jatun macanacuj runami tiyarca. Paica punllantami israelitacunamanta burlarishpa: ‘Ñucahuan macanacuchun shuj runata cachaichij. Pai mishajpica ñucanchijmi cancunata sirvishun. Pero, ñuca paita mishajpica, cancunami ñucanchijta sirvinguichij’ nishpa caparij carca.

Davidpaj huauquicuna soldadocunami carca. Chaimantami Davidca paicunapaj carpa huasicunaman micunata apashpa rirca. Chaipimi Goliat caparicujta uyashpaca: ‘Ñucami paihuan macanacunaman risha’ nirca. Chaimi Saulca: “Canca shuj huambrallami cangui” nirca. Davidca: ‘Jehovami ñucata ayudanga’ nircami.

Chaimantami Saulca paipaj macanacuna churanacunata curca. Pero Davidca: ‘Cai churanahuanca mana macanacui tucunichu’ nircami. Davidca paipaj huaracata japishcahuan yacuman rishpami pichca llambujlla rumicunata japishpa muchilapi churarca. Qꞌuipaca Goliatpajmanmi callpashpa rirca. Goliatca caparishpami: “Cꞌuchuyai, a ver imami tucungui. Ñucaca cambaj aichataca jahuata volaj animalcunaman, campopi tiyaj animalcunamanmi cusha” nirca. Cutin Davidca mana manchashpami: “Canca ñucapajmanca shuj espadahuan, lanzahuanmi macanacunaman shamungui. Pero ñucaca Jehová Diospaj shutipimi canhuanca macanacunaman shamuni. Diostami canca burlarishcangui. Tucui caipi cajcunami Jehová Dios espadacunatapish, lanzacunatapish mana minishtishcata yachaj chayangacuna. Paimi tucui cancunataca ñucanchij maquipi entreganga” nirca.

Qꞌuipaca Davidca paipaj huaracapi rumita churashpami tucui fuerzahuan shitarca. Jehovapaj ayudahuanca Goliatpaj frentepimi rumica yaicurca. Chashnami Goliatca huañurca. Caishuj filisteocunaca ama huañuchichunmi callpashpa rircacuna. ¿Canpish David shinachu Jehová ayudanata tucui shunguhuan cringui?