Davidca jatun juchatami rurarca

Saúl huañujpica Davidmi catij rey tucurca. Paica 30 huatacunatami charirca. Achca huatacuna qꞌuipaca shuj tutaca paipaj palacio jahuapimi puricurca. Chaimantami shuj sumaj huarmita ricurca. Davidca chai huarmipaj shuti Bat-Seba cashcata, Urías shuti soldadopaj huarmi cashcatami yachaj chayarca. Shinapish paita pushachun cachashpami paihuan chayarinacurca. Qꞌuipaca Bat-Sebaca chichumi saquirirca. Davidca chaita pacasha nishpami paipaj soldadocunata mandajtaca: ‘Uriastaca macanacucuj puntapi churashpa paillata saquichij’ nirca. Uriasca chai macanacuipimi huañurca. Qꞌuipaca Davidca Bat-Sebahuanmi cazararca.

Jehová Diosca David mana allicunata ruracujtami ricurca. Chaimantami profeta Natanta Davidhuan parlachun cacharca. Natanca: ‘Shuj llajtapica ishqui runacunami tiyarca. Shujca charij runa, caishujca pobre runami carca. Charij runaca achca ovejacunatami charirca. Cutin pobre runaca shuj cꞌuyashca ovejallatami charirca. Charij runaca chai ovejitatami quichurca’ nircami. Chaimi Davidca achcata pꞌiñarishpa: ‘¡Chai runaca huañunatajmi can!’ nirca. Chashna nijpimi Natanca: “¡Chai runaca canmi cangui!” nirca. Chaita uyashpami Davidca achcata llaquirishpa Natantaca: ‘Ñucaca Jehovapaj ñaupajpimi juchata rurashcani’ nirca. Chai juchata rurashcamantami Davidpish, paipaj familiapish achca llaquicunata charirca. Diosca Davidta castigashpapish mana jatun tucushcata ricushpami catichun saquirca.

Davidca Jehová Diospajmi shuj huasita rurasha nirca. Pero Diosca paipaj churi Salomontami chai huasita rurachunca agllarca. Davidca Salomón imalla minishtishcacunatami tandachi callarirca. Paica: ‘Jehová Diospaj huasica sumajmi cana can. Shinapish Salomón jovenraj cashcamantami paita ayudasha’ nircami. Davidca chai huasita rurachunmi achca cullquita convidarca. Shinallataj alli trabajajcunatami mashcarca. Platata, orotapishmi tandachirca. Tiromanta Sidonmanta cedro caspicunatapishmi apamurca. Davidca manaraj huañushpami Salomonmanca: ‘Jehovami paipaj huasita ima shina ruranata canman cuchun ñucaman escribichirca. Paimi cantaca ayudanga. Ama manchaichu. Rurashpa callarilla’ nishpa planocunata curca.