YACHAI 59
Chuscu jovencunaca Jehovatami cazurcacuna
Nabucodonosorca Judata mandajcunapaj churicunata apashpami Aspenaz shuti runa paicunata ricuchun churarca. Chai jovencunamantaca ashtahuan inteligentecunata, sanocunata mashcachunmi mandarca. Paicunaca quimsa huatacunatami alli yachaita chasquishpa reypaj huasipi trabajana carca. Babiloniocunapaj shimita rimanata, liyinata, escribinatapishmi yachana carcacuna. Chashnallataj reyman cushca micunallatatajmi micuna carcacuna. Chai chuscu jovencunaca Daniel, Hananías, Misael, Azarías shuticunami carca. Pero Aspenazca babiloniocunapaj shuticunata churashpami paicunataca Beltsasar, Sadrac, Mesac, Abednego nishpa shutichirca. ¿Chai jovencunaca chai yachaicunata chasquishpaca Jehová Diosta cungarircacunachu?
Chai chuscu jovencunaca Jehová Diosta tucuipi cazunatami munarcacuna. Paicunaca Diospaj Leypi huaquin micunacunata ama micuchun mandashcamantami reypaj micunata mana chasquircacuna. Chaimantami Aspenaztaca: ‘Reypaj micunata micuchunca ama obligaichu’ nircacuna. Pero Aspenazca: ‘Cancuna mana alli micujpi, rey cancuna irqui ñahuicuna cajta ricushpaca ñucatami huañuchinga’ nircami.
Danielca alli yuyarishpami guardiataca: ‘10 punllacunacama yacuta cupai, verduracunatapish carapai. Qꞌuipaca reypaj micunata micuj jovencunahuan ñucanchijta chꞌimbapurashpa ricungui’ nircami. Guardiaca allimi can nircami.
10 punllacuna qꞌuipaca Daniel, paipaj quimsa amigocunapish shujtaj jovencunata yallimi alli ricurirca. Jehová Diosca paicuna cazushcamantami achcata cushicurca. Chaimantami muscuipi shina ricushcacunata, muscuicunata intindichun Diosca Danielman yachaita curca.
Quimsa huatacunata yachachishca qꞌuipami Aspenazca paicunataca Nabucodonosorpajman pusharca. Reyca Danielhuan paipaj amigocunahuan parlanacushpami shujtaj jovencunata yalli inteligentes cajta ricurca. Chaimantami paita sirvichun churarca. Reyca achca cutinmi paicunata consejocunata cuchun mañarca. Dios ayudashcamantami chuscu jovencunaca reypaj yachaisapa runacunata, brujocunatapish yalli alli yachaita charircacuna.
Daniel, Hananías, Misael, Azariaspish mana paicunapaj llajtapi carcacunachu. Chashna cajpipish Jehová Diosta adorajcuna cashcataca manataj cungarircacunachu. ¿Cambaj yaya mama mana canhuan cajpica Diosta adorashpa catinguimanchu?
“Maijanpish can joven cashcallamanta canta mana valichichunca ama saquingui. Ashtahuanpish cambaj rimaihuan, cambaj ruraihuan, cambaj cꞌuyaihuan, cambaj crishcahuan, cambaj chuya causaihuanmi Diosta tucui shunguhuan sirvijcunapaj alli ejemplo cana cangui” (1 Timoteo 4:12).