Esdrasca Diospaj Leymantami yachachirca

Judiocuna Jerusalenman tigrashcamantaca ñami 70 huatacuna pasashca carca. Pero huaquincunaca Esdras shinami Persia pueblocunapi causacurcacunaraj. Esdrasca Diospaj Leyta yachachij sacerdotemi carca. Paica Jerusalenpi causajcuna Diospaj Leyta mana cazucujtami yachaj chayarca. Chaimantami paicunata ayudangapaj risha nirca. Rey Artajerjesca Esdrastaca: ‘Diosca paipaj Leyta yachachichunmi canmanca yachaita cushca. Canhuan risha nijcunata apashpa chaiman rilla’ nircami. Esdrasca Jerusalenman tigrasha nijcunataca tucuicunatami tandachirca. Qꞌuipaca Jehová Dios paicunata cuidachun mañashpami Jerusalenman tigrarcacuna.

Chuscu quillacunapimi Jerusalenman chayarcacuna. Chaipi mandajcunaca Esdrastaca: ‘Israelitacunaca Diosta mana cazushpami yanga dioscunata adoraj huarmicunahuan cazarashcacuna’ nircacunami. Chaimi Esdrasca tucuicunapaj ñaupajpi cungurishpa: ‘Jehová, canca ñucanchijtaca achcatami ayudashcangui. Pero ñucanchijca juchapimi urmashcanchij’ nishpa mañarca. Israelitacunaca arrepintirishpapish mana allicunatami rurashpa catircacuna. Chaimantami Esdrasca ancianocunata, juezcunata gentecuna imata ruracushcata ricuchun churarca. Quimsa quillacunapica Jehovata mana adorasha nijcunataca llujshichishpami cacharcacuna.

12 huatacuna qꞌuipaca Jerusalén pircacunata cutinmi shayachishpa tucuchircacuna. Chaimi Esdrasca Diospaj Leyta liyingapajca gentecunataca plazapi tandachirca. Esdras chai librota pascajpica tucuicunami shayarircacuna. Esdras Jehová Diosta alabajpica tucuicunami maquicunata alzashpa chashna cachun nircacuna. Qꞌuipaca Diospaj Leyta liyishpami intindichirca. Chaita alli uyashpami israelitacunaca Jehovamanta cutin caruyashcata cuentata curcacuna. Chaimi huacai callarircacuna. Cayandij punllapishmi Esdrasca Diospaj Leyta liyishpa catirca. Chaimi israelitacunaca Chuglla huasicunata rurana fiestata rurana cashcata intindircacuna. Chai fiestata rurangapajmi utca allichirircacuna.

Chuglla fiestataca achcata cushicushpami siete punllacunata rurarcacuna. Alli cosecha tiyashcamantapishmi Diosta pagui nircacuna. Chuglla fiestataca Josuepaj punllacunamantapachami mana rurashcacuna carca. Chai fiesta tucurijpica israelitacunaca: ‘Yaya Dioslla, esclavocuna cajpimi ñucanchijta quishpichircangui. Chaquishca pambapipish carashpami cai sumaj allpatapish curcangui. Chashna jahuapish ñucanchijca cutin cutinmi mana cazushcanchij. Profetacunata huillachun cachajpipish mana uyarcanchijchu. Ñucanchijcuna mana cazujpipish canca Abrahanman nishcacunataca pajtachishcanguimi. Pacienciatapishmi ricuchishcangui. Cunanca canllatami cazushun’ nishpami mañarcacuna. Israelitacuna paicuna ima nishcata escribishca qꞌuipami mandajcuna, levitacuna, sacerdotecunapish firmashpa shuj sellota churarcacuna.