Elisabetca shuj huahuatami charirca

Jerusalén pircacunata cutin shayachishcamantaca ñami 400 yalli huatacuna pasashca carca. Jerusalén cꞌuchullapimi Zacarías shuti sacerdoteca paipaj huarmi Elisabethuan causarca. Achca huatacunata cazadocuna cashpapish huahuacunataca mana chari tucurcacunachu. Shuj punllaca Diospaj huasipimi Zacariasca inciensota rupachinaman yaicurca. Chaipimi ángel Gabriel ricurirca. Paita ricushpami Zacariasca achcata mancharirca. Chaimi angelca: ‘Ama manchaichu. Alli huillaicunatami apamuni. Cambaj huarmi Elisabetca shuj cꞌari huahuatami charinga. Juan shutitami churangui. Diosca Jesús shamunata huillachunmi paitaca agllashca’ nirca. Chashna nijpimi Zacariasca: ‘Ñucapish, ñuca huarmipish ñamari yuyajcuna canchij. ¿Ima shinataj can nishca pajtarinataca crishari?’ nirca. Chaimi angelca: ‘Diosmi canman cai alli huillaita huillachun cacharca. Ñuca huillashcata mana crishcamantami cambaj huahua huacharingacama upa saquiringui’ nirca.

Zacariasca Diospaj huasi ucumanta mana utca llujshircachu. Pai llujshijpica canllapi shuyacujcunaca ima tucushcatami yachasha nircacuna. Pero Zacariasca mana parlai tucushpami maquillahuan señasta rurarca. Chaimi gentecunaca Dios paiman imata huillashcata cuentata curcacuna.

Asha tiempo qꞌuipaca ángel nishca shinami Elisabetca shuj cꞌari huahuata charirca. Paipaj familiacuna, amigocuna, huahuata rijsinaman shamujpica Elisabetca: ‘Juan shutimi canga’ nircami. Chaimi paicunaca: ‘Cambaj familiapica chai shutica mana tiyanchu. Paipaj yayata shina Zacarías nishpa shutichichij’ nircacuna. Pero Zacariasca: ‘Paipaj shutica Juanmi’ nishpami escribirca. Chai ratomi Zacariasca parlai callarirca. Chai huahuamantaca tucui Judeapimi yachaj chayarcacuna. Gentecunaca: “¿Cai huahua huiñashpaca ima shinashi canga?” nishpami tapurircacuna.

Dios paipaj espíritu santota cujpimi Zacariasca: ‘Jehová Diosta alabashunchij. Paica Abrahanmanca ñucanchijta quishpichichun Mesiasta cachanatami huillarca. Chaita huillangapajca Juanmi profeta canga. Paimi Mesías purina ñanta allichishpa ñaupashpa ringa’ nircami.

Elisabetca shuj familiatami charirca. Paica Mariami carca. Paihuan ima tucushcataca shamuj capitulopimi yachashun.