Jesusca sábado punllapimi jambirca

Fariseocunaca Jesusta pꞌiñashcamantami prezupi churasha nircacuna. Paicunaca: ‘Sábado punllaca samana punllami. Chaimantami Jesusca ungushcacunata mana jambina can’ nijcunami carca. Jesusca shuj sábado punllaca shuj ciego runatami callepi caridadta mañacujta ricurca. Chaipimi paita catijcunataca: ‘Diospaj poderhuan cai runata ima shina alliyachijta ricuichij’ nirca. Qꞌuipaca allpata chꞌucahuan chapushpami paipaj ñahuipi churashpa: ‘Siloam tanque yacupi maillarigri’ nirca. Ñahuita maillarishpaca huacharishca punllamanta ciego runaca ricurcallami.

Gentecunaca: ‘¿Caica manachu caridadta mañashpa tiyacuj runa? Paitajmari yuyachin’ nishpami mancharircacuna. Chaimi paica: ‘Ñucatajmari cani’ nirca. Paicunaca: ‘¿Ima shinataj cunanca ricunguiyari?’ nircacunami. Chashna nijpimi chai runaca Jesús paita ima shina jambishcata huillarca. Qꞌuipaca chai runataca fariseocunapajmanmi aparcacuna.

Chai runaca fariseocunamanca: ‘Jesusmi allpahuan lodota rurashpa ñahuicunapi churarca. Qꞌuipaca: “Maillarigri” nircami. Chaitami rurarcani. Cunanca ñami ricui tucuni’ nishpami huillarca. Chaimi fariseocunaca: ‘Sábado punllapi Jesús jambishpaca mana Diospaj poderhuanchu chaitaca ruracun’ nircacuna. Cutin shujtajcunaca: ‘Diospaj poderllahuanmi ungushcacunata alliyachi tucun’ nircacunami.

Fariseocunaca chai runapaj yaya mamata cayashpami: ‘¿Cancunapaj churica ima shinataj cunanca ricui tucun?’ nishpa tapurcacuna. Chaimi chai runapaj yaya mamaca: ‘Mana yachanchijchu. Paillatataj tapupaichij’ nircacuna. Fariseocuna maijanpish Jesuspi crijta sinagogamanta llujshichishpa cachanata yachashcamantami chashna nircacuna. Chaimi fariseocunaca chai runataca ashtahuan tapushpa catircacuna. Chai runaca: ‘Ña tucuita huillanica. ¿Ima nishpataj cutinca tapunguichij?’ nircami. Cashna nijpica fariseocunaca pꞌiñarishpami chaimanta llujchishpa cacharcacuna.

Qꞌuipaca Jesusca chai runata ricunamanmi rirca. Paihuan tupashpaca: ‘¿Mesiaspi cringuichu?’ nishpami tapurca. Chaimi chai runaca: ‘Amito, ¿Mesiasca pitaj canyari? Ñuca paipi cringapaj huillahuai’ nirca. Jesusca: ‘Ñucami Mesías cani’ nircami. ¿Manachu Jesusca ciego runata llaquishcata ricuchirca? Ari. Jesusca chai runata jambirca, paipi feta churachunpishmi ayudarca.