Predicanataca manataj saquircacunachu

Purinata mana valij shuj runaca caridadta mañangapajmi Diospaj huasi pungupi tiyarij carca. Shuj chishica Pedropish, Juanpish Diospaj huasimanmi shamurcacuna. Paicunatami chai runaca: ‘Ñucaman imatapish cuhuai’ nishpa mañarca. Shinapish Pedroca: ‘Cullquita cunapaj randica Jesuspaj shutipi jatari, puri ninimi’ nircami. Chashna nishpa jatarichishpa ayudajpica puri callarircallami. Gentecunaca chaita ricushpami Jesusta cati callarircacuna.

Sacerdotecuna, saduceocunaca pꞌiñarishpami apostolcunataca religionta pushajcunapaj ñaupajman pusharcacuna. Paicunaca apostolcunataca: ‘¿Chai runata jambingapajca pitaj poderta curca?’ nishpami tapurcacuna. Chaimi Pedroca: ‘Jesusmi ñucanchijmanca poderta curca. Paitami cancunaca huañuchircanguichij’ nirca. Chashna nijpimi religionta pushajcunaca: ‘¡Jesusmanta ñataj yachachinguichijman!’ nishpa caparircacuna. Apostolcunaca: ‘Paimanta yachachinataca manataj saquishunchu’ nircacunami.

Qꞌuipami Pedrotapish, Juantapish cacharircacuna. Paicunaca chai ratomi discipulocunapajman rishpa imalla tucushcata parlarcacuna. Chai qꞌuipaca tucuicunami: ‘Mana manchashpa huillashpa catingapaj ayudahuai’ nishpa Diosta mañarcacuna. Jehová Dios espíritu santota cujpimi paicunaca milagrocunata rurashpa, huillashpa catircacuna. Chaimi achcacuna Jesusta cati callarircacuna. Chaita ricushpami saduceocunaca envidiata charishcamanta apostolcunataca carcelpi churarcacuna. Pero chai tutaca carcelpaj pungucunata pascangapajmi Diosca shuj angelta cacharca. Chai angelca apostolcunataca: ‘Diospaj huasiman cutin rishpa huillaichij’ nircami.

Cayandij punllaca shuj runami religionta pushajcunapajman rishpa: ‘Carcelca llavishcami carca. Pero chaipi cajcunaca mana ricurinchu. Cunanca paicunaca Diospaj huasipimi yachachicuncuna’ nirca. Chaimi apostolcunataca religionta pushajcunapajman cutin pusharcacuna. Sacerdotecunata jatun mandajca: ‘Manachu Jesusmanta ama yachachichun nishpa mandarcanchij’ nircami. Chaita uyashpami Pedroca: ‘Runacunata cazunapaj randica, Diostami cazuna canchij’ nirca.

Religionta pushajcunaca yallitaj colerashpami apostolcunataca huañuchisha nircacuna. Chaipimi Gamaliel shuti fariseoca: ‘Ama imata ruranguichijchu, ñataj Dios cai runacunahuan canman. Paihuanca pi mana macanacui tucunchu’ nirca. Chashna nijpimi religionta pushajcunaca apostolcunata macarcacuna. Chai qꞌuipaca: ‘Ñataj cutin huillashpa catinguichijman’ nishpa cacharircacuna. Pero paicunaca mana manchashpami Diospaj huasipi, huasin huasin rishpapish huillashpa catircacuna.