6 ¿Mañanaca imapi ayudanchu?

ACHCA gentecunami mañanaca mana imapi ayudanchu nincuna. Pero Bibliapica Diosta mañana ima shina ñucanchijta ayudashcatami ricuchin (Lucas 22:40; Santiago 5:13). Mañanaca Diospajmanmi ashtahuan cꞌuchuyachin. Shinallataj yuyaipipish, cuerpopipish alli cachunmi ayudan.

Por ejemplo, shuj regalota chasquishpaca pagui ninatami munanchij. ¿Imamantataj importante can? Pagui ninata yachashpami ashtahuan agradecidos sintirishun. Yaya Diosta pagui ningapaj mañashpapish chashnallatajmi sintirishun. Huaquin ejemplocunata ricushun.

Diosta pagui ningapaj mañana. Tucui ima allicunata chasquishcamanta Diosta pagui nishun. Diosta mañacushpaca ima bendicioncunata chasquishcatami yuyarishun. Chashnami agradecidos cashcata ricuchishpa cushilla causashun (Filipenses 4:6).

Ejemplo: Jesusca paipaj Yayataca paipaj mañaita uyashcamantami agradicirca (Juan 11:41).

Perdonachun Diosta mañana. Shuj juchata rurashpaca Yaya Diosta perdonahuai nishpami mañana canchij. Chashnami ñucanchij pandarishcacunamanta mana yallitaj llaquilla sintirishun. Shinallataj ima mana alli cashcata, Diosta cazunapish importante cashcatami intindishun.

Ejemplo: Rey Davidca pandarishcamanta arrepentido cashpami Diosta mañarca (Salmo 51).

Yaya Dios alli yuyaita cuchun mañana. Alli yuyaita cuchun Jehová Dios mañashpaca humildes cashcatami ricuchishun. Chashnami mana ñucanchijlla imatapish rurai tucushcata intindishun. Jehová Diospi ashtahuan confiashcata ricuchishun (Proverbios 3:5, 6).

Ejemplo: Rey Salomonca Israel llajtata alli mandangapajmi Yaya Diostaca alli yuyaita cuchun mañarca (1 Reyes 3:5-12).

Llaquicunahuan cashpa Diosta mañana. Llaquicunahuan cashpa tucui shungumanta Yaya Diosta mañashpaca tranquilomi sintirishun. Chashnami ñucanchijllapi confianapaj randi Yaya Diospi confianata yachashun (Salmo 62:8).

Ejemplo: Rey Asaca enemigocunahuan macanacugricushpami Yaya Dios paita ayudachun mañarca (2 Crónicas 14:11).

Yaya Dios shujtajcunata ayudachun mañana. Chashna mañashpami mana ñucanchijllapi yuyashcata, shujtajcunata llaquishcatapish ricuchishun.

Ejemplo: Jesusca paita catijcunamantami mañarca (Juan 17:9-17).

Diosta alabangapaj mañana. Yaya Dios tucui imalla rurashcacunata ricushpaca pai cꞌuyaj, llaquij cashcata intindishpami paita alabanchij. Chashnami Yaya Diosta ashtahuan cꞌuyashpa respetanchij. Paipajmanpish ashtahuan cꞌuchuyanchij.

Ejemplo: Rey Davidca Yaya Dios tucui imalla rurashcacunata ricushpami alabarca (Salmo 8).

Shinallataj Yaya Diosta mañashpaca ‘pipish mana yachaipaj Diospaj sumaj causaitami’ charishun (Filipenses 4:7). Cai punllacunapi sumaj causaita charinaca mana facilchu can. Chaimantami Diospaj sumaj causaita charinaca shuj sumaj bendición can. Ñucanchij saludpajpish allimi can (Proverbios 14:30). Pero ¿ima shinataj Diospaj sumaj causaita charishun? ¿Diospaj sumaj causaitaca ñucanchijllatajchu chari tucunchij?