Huañuimantaca pi mana quishpiri tucunchu

SHUJ peliculata ricucushcata yuyai. Chaipica shuj rijsishca huarmipaj causaitami ricuchin. Uchilla cashpa pianopi tocaj cashcata, achca horascunata practicaj cashcatami ricungui. Qꞌuipaca shujtaj llajtacunapi conciertota cungapaj rishpami famosa tucun. Cutin película manaraj tucurijpimi chai huarmipaj último punllacuna ima shina cashcata, chai qꞌuipa huañushpa chingarishcata ricungui.

Chai rijsishca huarmihuanca chashnami tucurca. Cientificocunahuan, deportistacunahuan, shujtaj famoso gentecunahuanpish chashnallatajmi pasan. Chai famoso gentecuna paicunapaj causaipi achca cosascunata rurashca cajpipish mana yuyajyashca cashpa, mana huañushca cashpaca “¿imatashi ashtahuan ruranman carca?” nishpami tapurinchij.

Huañuna cashcataca tucuicunami yachanchij (Eclesiastés 9:5). Imata rurashpapish yuyajyanamanta, huañuimantaca mana quishpiri tucunchijchu. Maipica ungüi tucushcamanta, o shuj accidenteta charishcamantami huañui tucunchij. Bibliapipish ñucanchij causaitaca pꞌuyuhuanmi chꞌimbapuran. Pꞌuyuca ashacama ricurishpapish ñapish chingarinllami (Santiago 4:14).

Huaquin gentecunaca, ‘ima horas huañunata mana yachashcamantami: “Micushunchij, ubyashunchij, cayaca huañushunmi”’ nincuna (1 Corintios 15:32). Pero, paicuna chashna nishpaca shuj punlla huañuna cashcatami yuyaipi charincuna. Tucuicunami ima llaquita charishpaca “¿huañungapajllachu huacharishcanchij?” nishpa tapurishcanchij. Cai tapuitaca ¿maipitaj yachai tucunchij?

Imapaj causashcata yachasha nishpami achca gentecunaca cientificocuna ima nishcata yachasha nincuna. Cientificocuna, doctorcunaca gentecuna ashtahuan tiempota causachunmi jambicunahuan ayudashca. Shinallataj gentecuna ashtahuan causashpa catichunmi mushuj jambicunata mashcacuncuna. Shinapish ¿imamantataj yuyajyanchij, huañunchij? ¿Shuj punllaca huañui tucuringachu? nishca tapuicunataca manaraj pi cutichishcachu. Cai revistapimi caicunamantaca yachashun. Shinallataj ¿huañungapajllachu huacharishcanchij? nishca tapuitami cutichishun.