“Taita Dios tandachishcataca...”

Moisesman cushca leypi mandashca shinaca shuj cꞌari paipaj huarmimanta divorciarisha nishpaca shuj certificado de divorciotami cuna carca. Chashna rurashpami mana yangamanta divorciarinalla carca. Pero Jesús causashca punllacunapica religionta pushajcunaca jahualla divorciarichunmi shujtaj mandashcacunata churarcacuna. Cꞌaricunaca imamantapish paicunapaj huarmita shitajcunallami carca (nwtsty Mr 10:4, 11-manta yachangapaj notacuna: “huarmita shitashcata ricuchij quillca”; “paipaj huarmita shitashpa”; “huainayanmi”). Matrimoniotaca Jehová Dios callarichishcatami Jesusca yachachirca (Mr 10:2-12). Cusa huarmica ‘shuj aichalla tucushpami’ huañungacama ishquindij tandalla causana can. Mateo libropi yachachishca shinaca cusa o huarmi huainayajpillami divorciari tucuncuna (Mt 19:9).

Cunan punllacunapish achca gentecunaca matrimoniotaca fariseocuna shinami ricuncuna. Jesús yachachishcataca mana cazuncunachu. Llaquicunata charishpaca divorciarinllacunami. Pero Diosta sirvij cusa huarmicunaca Diospaj ñaupajpi ari nishcata pajtachishpami Bibliapaj consejocunata catishpa problemacunata utca allichincuna. Cꞌuyaita ricuchishpa, respetanacushpaca familiacunaca tandallami causanga nishca videota ricushca qꞌuipaca catij tapuicunata cutichi:

• 

  ¿Proverbios 15:1-pi yachachishcataca ima shinataj cazarashcacunaca pajtachi tucuncuna? ¿Caita pajtachinaca imamantataj alli canga?

• ¿Proverbios 19:11-pi yachachishcata pajtachinaca imamantataj mana yalli problemacuna charichun ayudanga?

• Cusa huarmi chꞌicanyarishca shina cashpaca, ¿divorciarinapi yuyanapaj randica ima tapuicunapitaj yuyana can?

• ¿Mateo 7:12-pi yachachishcacunaca ima shinataj alli cusa, alli huarmi cachun ayudai tucun?