¿Diosta mañanamantaca gentecunaca imatataj yuyan?
“Diosta mañashpaca pai ñuca cꞌuchullapi cashcatami sintini. Imata ruranata mana yachajpi ñuca maquimanta japishpa pushacushca shinami can” (MARÍA).
“Ñuca huarmica 13 huatacunata cáncer ungüihuan cashpami huañurca. Yaya Diostaca punllantami mañaj carcani. Ñuca llaquihuan cajpi pai uyashcata yachashpami tranquilo sintirij carcani” (RAÚL).
“Yaya Diosta mañanaca pai cushca shuj sumaj regalomi can” (ARNE).
María, Raúl, Arne y shujtaj gentecunapish Diosta mañanaca shuj sumaj regalo cashcatami yuyancuna. Diosta mañashpaca paihuan parlacushcatami sintincuna. Shinallataj paita pagui ni tucushcata, paipaj ayudata mashcai tucushcatami yachancuna. Diosta mañanamanta Bibliapi nishca yuyaicuna cierto cashcatami crincuna. Bibliapica: “Pai munashca shina imatapish mañajpica, paica uyashpa cujlla cashcata yachashcamantami paipi shunguta churanchij” ninmi (1 Juan 5:14).
Pero, Diosta mañanamanta Bibliapi ima nishcataca achca gentecunami mana crincuna. Steve imata yuyashcata ricushun. Paica: “Ñuca 17 huatacunata charijpimi shuj amigoca carro accidentepi, caishuj ishquica yacupi aguarishpa huañurcacuna” ninmi. ¿Steveca imatataj rurarca? Paica: “¿Imamantataj chai tucuna carca? nishpami Diosta mañarcani. Pero, Diosca mana contestarcachu. Chaimantami, ¿imamantataj Diosta mañani? nishpa tapurij carcani” ninmi. Achca gentecunami Steve shina yuyashcacuna. Shinallataj, ¿Diostaca mañanachu cani? nishpami tapurishcacuna.
Shujtajcunaca, ‘Diosca ñucanchij ima problemacunata charishcata, imata minishtishcataca ñami yachan. Caicunata paiman huillanaca yangallami can’ nishpami yuyancuna.
Maijancunaca paicunapaj causaipi mana allicunata rurashcamantami, ‘Diosca ñuca mañashcacunataca mana uyangachu’ nishpa yuyancuna. Jennyca: “Imapaj mana valishcatami sintini. Mana allicunatami rurashcani. Dios ñuca mañashcacunata uyachunca mana mericinichu” ninmi.
¿Diosta mañanamantaca canpishchu chashna yuyashcangui? Shina cajpica Bibliapi Diosta mañanamanta imata yachachishcata ricushpami tranquilo sintiringui. Chai yachachishcacunapica tucui shunguhuanmi confiai tucungui.a Shinallataj cai tapuicunapaj respuestacunatami tari tucungui:
¿Diosca ñucanchij mañashcacunataca uyanchu?
¿Diosca imamantataj mana tucui mañashcacunata cutichin?
¿Dios ñucanchijta uyachunca ima shinataj mañana canchij?
¿Diosta mañashpaca ima shinataj beneficiarinchij?
a Bibliapimi Diosta sirvijcunapaj mañashcacunata, Jesuspaj mañashcacunata ricui tucunchij. Ñaupa Testamentopica 150 yalli mañashcacunami ricurin.