Cushilla ñahuihuan huillashunchij

HELEN shuti panica Baguio, Filipinas llajtapimi huillana carritohuan predicacurca. Pai huillacun ladotami ishqui solteracunaca pasashpa ricurcacuna. Chaimi pani Helenca asijlla ñahuihuan paicunata ricurca. Cai ishqui solteracunaca chai huarmica imamantashi asijlla ñahui can nishpami pasashpa rircacunalla.

Paicunaca huasiman buspi tigracushpami testigo de Jehovacunapaj tandancuna huasipica jw.org nishca letrerota ricurcacuna. Chai laya letrerollatatajmi huillana carritopica ricushcacuna carca. Chaimi tandanacuicuna ima horalla tiyanata yachangapajca busmanta uriyashpa ricurcacuna.

Cai ishqui solteracunaca tandanacuimanmi rircacuna. Paicunaca tandanacuna huasiman yaicucushpaca Helentami ricurcacuna. Helenca paicuna cꞌuchuyajpica ima mana allitashi rurarcani nishpami mancharircani ninmi. Chai solteracunaca cantaca carritohuan huillacujtami ricurcanchij nishpami parlarcacuna.

Paicunaca tandanacuicunapi ima yachachishcata, huauqui panicunahuan canataca achcatami munarcacuna. Tandanacui qꞌuipa huauqui panicuna tandanacuna huasita pꞌichacujta ricushpaca paicunapishmi ayudarcacuna. Paicunamanta shujca chai llajtapi ña na causanchu. Pero caishujca tandanacuicunaman rishpami catin. Bibliatapish estudiashpami caticun. ¿Imamanta? Asijlla ñahuita ricuchishcamanta.