Caitami tapushcacuna
¿Levítico 19:16-pi “pita ama huañuchisha nishpa puringui” nishca shimimantaca imatataj yachanchij?
Jehová Diosca israelitacunataca jucha illaj cachunmi mandarca. Caita intindichingapajca Diosca: “Cambaj llajtapica ama huashalla parlashpa purij cangui. Pita ama huañuchisha nishpa puringui. Ñucami Mandaj Dios cani” nircami (Levítico 19:2, 16).
Hebreo shimipica “pita ama huañuchisha nishpa puringui” nishca shimica shujtajcunata llaquichingapaj shayarina ninmi. ¿Cai shimicunaca imatataj nisha nin? Judiocunapaj shuj libropica caimanta parlashpaca: “Cai versomanta intindinaca sinchimi can. Hebreo rimaipi cai shimicuna ima nisha nishcataca mana alli yachanchijchu. Tal vez hebreo shimipica cꞌuchullapi, ladolla shayarishpa saquirina nisha nin” ninmi.
Yachaj runacunaca cai shimicuna verso 15-manta cashcatami yuyancuna. Chaipica: “Maijan ima mana allita rurashcata allichichun nijpica, imata mana charij huajchapuralla ama tucunguichijchu. Achcata charijpurallapish ama tucunguichijchu. Ashtahuanpish maijanmanpish ama tucushpa, imatapish cashcata ricuchinguichij” ninmi (Levítico 19:15). Levítico 19:16-pi ama pita huañuchisha nishpa puringuichij nishca shimica israelitacunapajca negociopi, familiapi o imata juzgacushpapish tucuipi justo canatami nisha nishcanga. Shinallataj shujtajcunata ama llaquichingapaj tucuipi honrados canatami yachashcangacuna. Ñucanchijpish cai nishcacunatami pajtachina canchij. Pero chaita alli pajtachingapajca Levítico 19:16-pi imata yachachisha nishcatami alli intindina canchij.
Levítico 19:16-pi tiyaj callari shimicunapi yuyashun. Diosca israelitacunataca ama huashalla rimashpa puringuichij nircami. Pita huashalla rimashpaca paicunatami llaquichishun. Shinallataj problemapipishmi churashun (Proverbios 10:19; Eclesiastés 10:12-14; 1 Timoteo 5:11-15; Santiago 3:6). Maipica pimanta huashalla rimashpaca shujtajcunapaj ñaupajpimi paicunata mana allipi saquishun. Hasta paicunapaj causaitami peligropi churashun. Nabot runamantaca huashalla rimaj runacunaca paimantami llullacunata nirca. Chaimantami paitaca yangamanta juchachishpa, ima culpata mana charijpipish rumicunahuan shitashpa huañuchircacuna (1 Reyes 21:8-13). Levítico 19:16-pi nishca shinaca pita huashalla rimashpaca paicunapaj causaitami peligropi churai tucunchij.
Maijancunaca pita pꞌiñashcamantami huashalla rimancuna. 1 Juan 3:15-pica: “Paipaj huauquita maijanpish pꞌiñajca huañuchij shinallatajmi. Maijanpish huañuchijca, huiñai causaita mana charij cashcataca yachanguichijmi” ninmi. Levítico 19:16-pi nishca importante shimita nishca qꞌuipaca Jehová Diosca: “Cambaj huauquita, cambaj shungupi ama pꞌiñangui” nicushca shinami cashcanga (Levítico 19:17).
Levítico 19:16-pi mandashcaca Diosta sirvijcunapajca valishcami can. Diosta sirvijcunaca mana alli yuyaicunataca mana charinachu canchij. Shinallataj shujtajcunatapish mana huashalla rimanachu canchij. Shujtajcuna ñucanchijpaj mana alli urmajpi o paicunata envidiashpa huashalla rimashpaca paicunata pꞌiñacushcatami ricuchishun. Pero Diosta sirvijcunaca shujtajcunataca mana pꞌiñanachu canchij (Mateo 12:36, 37).