Caitami tapushcacuna
1 Timoteo 5:21-pica “agllashca angelcunamantami” parlan. ¿Chai angelcunaca picunataj can?
Timoteoca apóstol Pablo shinami congregacionta pushaj anciano carca. Pabloca paitaca: “Diospaj ñaupajpi, Cristo Jesuspaj ñaupajpi, agllashca angelcunapaj ñaupajpimi manaraj imata rurashpa alli ricurashpa, shujllaman ama tucushpa cai mandashcacunata pajtachishpa catichun mandani” nircami (1 Timoteo 5:21).
¿Agllashca angelcunaca picunataj can? Pabloca 144.000 ungidocunamantaca mana parlacurcachu. Pablo Timoteoman chai cartata quillcacujpica ungidocunaca jahua pachapica manaraj causarishcacunachu carca. Apostolcunapish, caishuj ungidocunapish manaraj angelcuna shina tucushcacunachu carca. Chaimantami Apóstol Pablo agllashca ungidocunamanta parlashpaca mana paicunamanta parlacurca (1 Corintios 15:50-54; 1 Tesalonicenses 4:13-17; 1 Juan 3:2).
Noepaj punllacunapica maijan angelcunaca Diospaj contracunami tucurcacuna. Pero apóstol Pabloca mana paicunamanta parlacurcachu. Chai angelcunaca Satanaspaj parte tucushpami demoniocuna tucurcacuna. Shinallataj Jesuspaj contracunami tucurcacuna (Génesis 6:2; Lucas 8:30, 31; 2 Pedro 2:4). Shamuj punllacunapica Jesusca 1.000 huatacunatami jatun jutcupi paicunataca huichcanga. Chai qꞌuipaca Satanaspish, demoniocunapishmi tucuchishca cangacuna (Judas 6; Apocalipsis 20:1-3, 10).
1 Timoteo 5:21-pica Jehová Diosmanta, Jesucristomantapishmi parlan. Shinashpaca ‘agllashca angelcunaca’ jahua pachapi Jehová Diosta sirvij angelcunachari can.
Jehová Diosta sirvij angelcunaca achcacunami can (Hebreos 12:22, 23). Pero Jehová Dios jahua pachapi caj tucui angelcunaman chai trabajollatataj rurachun mingashcataca mana yuyanachu canchij (Apocalipsis 14:17, 18). Por ejemplo, Jehová Diosca shujlla angeltami 185.000 asirio soldadocunata huañuchichun mandarca (2 Reyes 19:35). Shinallataj Jesús nishca shinaca tal vez huaquin ‘angelcunallami millaita rurajcunata, shujtajcunata pandachijcunatapish Diospaj Gobiernomanta llujshichingacuna’ (Mateo 13:39-41). Shinallataj tal vez shujtaj angelcunami jahua pachaman rina esperanzata charijcunata tandachingacuna (Mateo 24:31). Cutin Jehová Diosca shujtaj angelcunatami ñucanchijcuna maita puricujpipish ñucanchijta cuidachunmi churashca. Chaitaca Salmo 91:11-pimi yachachin (Mateo 18:10; Mateo 4:11-tapish ricui; Lucas 22:43).
Shinashpaca ¿1 Timoteo 5:21-pi apóstol Pablo “agllashca angelcunamanta” parlacushpaca maijan angelcunamantataj parlacurca? Tal vez apóstol Pabloca congregacioncunata cuidachun Jehová Dios agllashca angelcunamantami parlacurca. 1 Timoteo 5-pica Pabloca ancianocunamantami parlacurca. Shinallataj huauqui panicunataca anciano huauquicunata respetachunmi animacurca. Cutin congregacionta pushaj ancianocunaca manaraj imata rurashpa alli ricurashpa, shujllaman ama tucushpami congregacionpi ayudana carcacuna. Paicunaca ¿imamantataj chaitaca rurana carcacuna? Jehová Dios yuyachijpimi apóstol Pabloca ancianocunaca Diospaj ñaupajpi, Cristo Jesuspaj ñaupajpi, agllashca angelcunapaj ñaupajpi chaita ruracushcata nirca. Chaita nishpaca Jehová Diospish, Jesuspish, agllashca angelcunapish ancianocuna congregacioncunata ima shina cuidacushcata ricurajcuna cashcatami nicurca. Shinashpaca Jehová Diosca huaquin angelcunatami huauqui panicunata cuidachun, predicacionta ricurachun mingashca. Chai angelcunaca Diospaj pueblopi ima tucucushcatami Jehová Diosman huillancuna (Mateo 18:10; Apocalipsis 14:6).