¿Guerra tiyajpipish tranquilo sintiri tucunchijchu?
Garyca soldadomi carca. Paica: “Ñaupaca imamanta achca problemacuna, mana alli ruraicuna tiyashcataca mana yacharcanichu. Pero Bibliata estudiashpami Jehová Dios cai Allpata shuj paraisota rurana cashcata intindini. Chaimantami tranquilo sintirini” ninmi.
Shujtajcunapish Gary shinami sintirincuna. Paicunata Biblia ima shina ayudashcata ricushun.
BIBLIACA CAITAMI YACHACHIN: “Jatun Dios quiquinca allimari cangui, perdonajmari cangui” (Salmo 86:5).
¿IMA SHINATAJ AYUDAN?: Colombiamanta Wilmerca: “Cai versopi tiyaj shimicunaca Jehová Dios llaquij, perdonaj cashcatami yuyachin. Chaimantami guerrapi ñuca imallata rurashcata Dios perdonanata crini” ninmi.
BIBLIACA CAITAMI YACHACHIN: ‘Ñucaca mushuj jahua pachata, mushuj cai pachatami ruragrini. Ñaupaman imapish tucushcataca mana yuyaringacunachu’ (Isaías 65:17).
¿IMA SHINATAJ AYUDAN?: Estados Unidosmanta Zafira huarmica: “Guerra tucurishca qꞌuipaca estrés ungüi, depresión ungüimi ñucataca japirca. Pero cai versoca llaquichij yuyaicunata Jehová Dios ñuca umamanta anchuchina cashcatami yuyachin. Chaimantami contenta cani” ninmi.
BIBLIACA CAITAMI YACHACHIN: “Paipaj punllacunapica cashcata ruranacunallami sisanga. Sumaj causaillami yallitaj tiyanga. Luna mana tiyangacamami chashnaca canga” (Salmo 72:7).
¿IMA SHINATAJ AYUDAN?: Ucraniamanta Alexsandraca: “Cai versoca guerrapi tiyashca llaquicuna tucurina cashcatami ricuchin. Shamuj punllacunapica ñucanchij familiataca pi mana llaquichingachu. Chaimantami ña mana preocuparishun. Cai versotaca yuyaricunillami” ninmi.
BIBLIACA CAITAMI YACHACHIN: ‘Cambaj caj huañushcacunaca causaringacunami. Ñutu allpapi causacujcuna rijcharichij, cantaichij’ (Isaías 26:19).
¿IMA SHINATAJ AYUDAN?: Ruandamanta Mariaca: “Tutsi familliamanta caj gentecunata huañuchicushpaca ñuca familiatapishmi huañuchircacuna. Pero cai verso nishca shinaca ñuca familiaca cutinmi causaringa. Paicunapaj vozta cutin uyanatami achcata munani” ninmi.
BIBLIACA CAITAMI YACHACHIN: ‘Millaicunaca ñallami mana tiyanga. Alli shungucunami, Dios cusha nishca allpataca japingacuna. Yallitaj sumaj causaipimi cushicungacuna’ (Salmo 37:10, 11).
¿IMA SHINATAJ AYUDAN?: Tayikistanmanta Daler runaca: “Caipica guerra tucurishca qꞌuipapish millai gentecuna, injusticiaca tiyarajmi. Cai versopi tiyaj shimicunaca ñucamanca fuerzastami cun. Jehová Diosca tucuitami ricun, ñuca ima laya sintirishcatapish allimi intindin. Paica ñallami ñucanchij llaquicunata tucuchinga. Chai llaquicunataca ña mana yuyarishunchu” ninmi.
Cai revistapi parlashca gentecunaca testigo de Jehovacunami can. Paicunaca ñaupaca shujtaj razamanta, shujtaj culturamanta, shujtaj llajtamanta gentecunatami pꞌiñajcuna carca (Efesios 4:31, 32). Pero Bibliata estudiashpami tucuicunata alli tratashpa tranquilo sintirincuna. Testigo de Jehovacunaca politicapi, pꞌiñanacuipica mana chagrurinchijchu (Juan 18:36).
Testigo de Jehovacunaca shuj familia shinami ayudanacunchij (Juan 13:35). Por ejemplo Alexsandraca guerra tiyashcamantami shujtaj llajtaman paipaj ñañandij rirca. Paica: “Fronterata pasajpica chai llajtamanta Testigocunaca ñucanchijta chasquingapajmi shuyacushcacuna carca. Paicuna ayudajpimi chai llajtapi causanaca mana tanto sinchi carca” ninmi.
Ñucanchij tandanacuiman shamuchunmi invitanchij. Chaipica llaquicunata charishpapish tranquilo sintiri tucushcata, shamuj punllacunapi sumaj causai tiyanatami yachangui. Can causacun cꞌuchullapi tandanacui tiyashcata yachangapajca jw.org paginanaman yaicui. Mana cashpaca Bibliamanta yachachichun mañai. Shuj Testigomi Huiñai huiñaita cushilla causai nishca folletohuan canmanca gratis yachachinga.