“Llaquicunata apashcamantami cazunata yacharca”

Jesusca Jehová Diostaca siempremi cazushca (Juan 8:29). Shinapish ¿imamantataj Bibliapica “Jesusca llaquicunata apashcamantami cazunata yacharca” nin? (Hebreos 5:8).

Jesusca jahua pachapica ima llaquicunataca mana charircachu. Pero cai Allpapi cashpaca tucui laya llaquicunatami charirca. Por ejemplo, paipaj yaya mamaca Jehovata cꞌuyashpapish juchayujcunami carca (Lucas 2:51). Religionta millai pushajcunapish, mana allita ruraj mandajcunapishmi Jesusta llaquichircacuna (Mateo 26:59; Marcos 15:15). Ashtahuancarin Jesusca humillarishpami llaquichina caspipi huañungacama Diosta cazurca (Filipenses 2:8).

Chaimantami Jesusca llaquicunata charishpapish Jehová Diosta cazunata yacharca. Cazunata yachashcamantami Jehová Diosca Jesustaca Rey cachun, Sacerdotecunata jatun mandaj cachunpish agllarca. Shinallataj Jesusca tucui laya llaquicunata apashcamantami ñucanchijtaca alli intindi tucun. Chaimi ñucanchijcuna llaquicunata charijta ricushpaca ayudasha nin (Hebreos 4:15; 5:9). Ñucanchijpish llaquicunata apacushpa cazujcuna cashpaca Diospaj ñaupajpimi alli ricurishun (Santiago 1:4).