4 Perdonajcuna caichij

¿IMA SHINATAJ CAITA RURAI TUCUNGUICHIJ?

Cusa o huarmica huaquinpica achcatami llaquichin. Caita cungarinaca maipica sinchimi can. Shinapish shungumantami perdonanata yachana canchij.

BIBLIAPICA: “Maijan caishujta pꞌiñashpa juchachijpica, caishuj chaishuj ahuantanacushpa, ima shinami cancunata Cristo perdonarca, chai shinallataj caishuj chaishuj perdonanacuichij” ninmi (Colosenses 3:13).

Aaron runaca: “Ñucanchij huarmita o cusata cꞌuyashpaca mana pandarishcacunallata ricunachu canchij. Ashtahuanpish pai cambiangapaj esforzaricushcatami ricuna canchij” ninmi.

¿IMAMANTATAJ CAITA RURANA CANGUICHIJ?

Shujtajcunahuan resintirishpalla causashpaca ñucanchij yuyaipi, cuerpopimi ungüita charishun. Chashnami ñucanchij cusahuan o huarmihuan mana alli causashun.

Julia huarmica: “Shuj punllaca ñuca cusaca achcatami llaquichirca. Qꞌuipaca paica chashna llaquichishcamantami perdonta mañarca. Paita perdonana mana jahualla cajpipish perdonarcanimi. Shinapish mana utca perdonashcamantami achcata llaquirircani” ninmi.

¿IMATATAJ RURANA CANGUI?

CAIPI YUYAI

Cambaj cusa o huarmi canta llaquichijpica:

• “¿Jahuallachu resintiringui?”

• “¿Llaquichishcata rato cungari tucunguichu? o ¿perdonahuai ningacamachu shuyangui?”

CUSANDIJ HUARMINDIJ ALLI PARLANACUICHIJ

• ¿Perdonangapajca mashnatataj shuyanguichij?

• ¿Utca perdonangapajca imatataj rurana canguichij?

CAITA RURAI

• Cambaj cusa o huarmi llaquichijpica, “ñucata llaquichina yuyaihuanmi chashna ruran” nishpaca mana yuyanachu cangui.

• Cambaj cusa o huarmita alli intindi. Bibliapica: “Tucuicunami achca cutin pandarinchij” ninmi (Santiago 3:2).

Kimberly huarmica: “Ishquindij culpata charishpaca perdonanaca jahuallami can. Pero shujlla culpata charishpaca perdonta mañanaca sinchimi can. Perdonangapajca humildesmi cana canchij” ninmi.

BIBLIAPICA: “Maijanpish canta imamanta juchachijpica chai problemata utca allichichij” ninmi (Mateo 5:25, NM).