Diospaj gobiernoca tranquilo causaitami cunga

Diospaj gobierno cai Allpata mandachunmi cutin cutin mañashcanchij. Cai gobiernoca tucuicuna tandalla, cushilla causangapajmi ñalla mandanga. Salmo 72:7-pica: ‘Cai Allpapica sumaj causaillami yallitaj tiyanga’ ninmi. Pero ¿Diospaj gobiernoca ima horataj mandanga? ¿Ima shinataj mandanga? ¿Cai gobiernoca cambajca imatataj ruranga?

¿DIOSPAJ GOBIERNOCA IMA HORATAJ MANDANGA?

Bibliapica Diospaj gobierno manaraj cai Allpata mandajpica jatun llaquicuna, yaricaicuna, macanacuicuna, ungüicuna, terremotocuna, mana alli ruraicuna mirana cashcatami huillashca. Caicunata ricushpami Diospaj gobierno ñalla mandagrishcata yachanchij (Mateo 24:3, 7, 12; Lucas 21:11; Apocalipsis 6:2-8).

Shinallataj 2 Timoteo 3:1-manta 4-camaca: ‘Chai punllacunapica quiquinlla alli canata munajcuna, quiquinpajlla charinata munajcuna, yaya mamata mana cazujcuna, mana pagui nijcuna, Taita Diosta mana rijsijcuna, rumi shungucuna, pꞌiñarishpapish manataj cungarijcuna, yangamanta juchachijcuna, mana jarcari tucujcuna, pꞌiña millaicuna, allita pꞌiñajcuna, imapish mana caipajta yuyajcuna, Taita Diosta mashcanapaj randica aicha munaipi cushicunallatami cꞌuyangacuna’ ninmi. Cunan punllacunapica cai shina gentecunami ashtahuan miraricun.

Caicunaca 1914 huatapimi pajtari callarirca. Shinallataj huaquin estudiashca runacuna, politicocunapish chai huatamantami tucui cambiashca nincunami. Por ejemplo, Dinamarca llajtamanta shuj runaca: “Manaraj 1914 huata chayajpica gentecunaca cai Allpapi alli causai tiyanatami yuyarcacuna. Pero 1914 huata qꞌuipaca guerra tiyashcamantami tucui cambiarca. Achca llaquicunapishmi mirarishca” nircami.

Pero shamuj punllapi sumaj causai tiyanatami yachanchij. Tucui cai llaquicunami Diospaj gobierno cai Allpata ñalla mandanata ricuchin. Caica alli huillaicunami can. Jesuspish: ‘Diospaj gobiernomanta alli huillaita, tucui cai Allpapi causajcunamanmi huillashca canga. Chai qꞌuipami cai shina causaica tucuringa’ nircami (Mateo 24:14, NM).

Cai alli huillaicunatami Testigo de Jehovacunaca tucui Allpapi huillacunchij. Shinallataj Jehová Dios Mandacushcata Huillaj revistatami tucui gentecunaman saquicunchij. Cai revistapimi Diospaj gobierno cai Allpapi imata ruranata, gentecunapajpish imallata ruranata huillan.

¿DIOSPAJ GOBIERNOCA IMA SHINATAJ MANDANGA?

Caita alli intindingapajca 4 yuyaicunata ricushun:

1. Diospaj gobiernoca cai Allpapi mandaj politicocuna mandashpa catichunca manataj saquingachu.

2. Politicocunaca paicuna mandashpa catinataca mana saquisha ningacunachu. Ashtahuanpish Diospaj gobiernopaj contracunami tucungacuna (Salmo 2:2-9).

3. Diospaj gobiernoca, chai politicocunatami shuj macanacuipi tucuchinga (Daniel 2:44; Apocalipsis 19:17-21). Cai tucuri macanacuitaca Armagedón nishpami Bibliapica shutichin (Apocalipsis 16:14, 16).

4. Diospaj gobierno mandachun saquijcunami Armagedón macanacuipica quishpiringacuna. Chashnami huiñaita paraíso Allpapi causangacuna. Bibliapica “pi mana yupaipaj” achca millón gentecunami canga ninmi (Apocalipsis 7:9, 10, 13, 14).

¿DIOSPAJ GOBIERNOCA CAMBAJCA IMATATAJ RURANGA?

Diospaj gobierno mandachun munajcunaca Diosmantami alli yachana can. Jesusca paipaj Yayata mañacushpaca, huiñai causaita charingapajca: “Diostajca canlla cashcata rijsinami, Jesucristopish can cachashca cashcata crinami” nircami (Juan 17:3, QC, 1989).

Diosmanta alli yachanami ñucanchijta ayudanga. Puntapica, Diosmanta alli yachashpami paipi ashtahuan crishun. Paipi crishpaca Diospaj gobierno ñalla mandanatami tucui shunguhuan crishun (Hebreos 11:1). Ashtahuanpish, Diosmanta alli yachashpaca paita, shujtajcunatami cꞌuyashun. Diosta cꞌuyashpaca shungumantami cazushun. Shujtajcunata cꞌuyashpaca Jesuspaj valishca consejotami pajtachishun. Paica: “Ima shinami shujtajcunataca cancunapaj allita rurachun munanguichij, chashnallataj cancunapish shujtajcunapaj allita ruraichij” nircami (Lucas 6:31).

Yaya Diosca ñucanchij alli yaya cashcamantami, Bibliapi nishca shina paica ‘huiñaita causachun’ munan (1 Timoteo 6:19). Cai causaitaca cunan punllacunapica mana charinchijchu. Chaimantami achca gentecunaca, “causashpa catinaca sinchimi can” nincuna. Cushilla, huiñaita causangapajca Diospaj gobierno ñucanchijpaj imata ruragrishcata yachashunchij.