¿Verdadta yachanaca imamantataj valishca can?

¿Cai pachata shuj ruraj tiyashcata yachanaca imamantataj valishca can? Cai Allpapi tucui tiyashcacunata ricushpa, Diospish tiyashcata yachashpaca Bibliapish paimanta shamushcata o mana shamushcatachari yachasha ningui. Biblia nishcacunapi cri callarishpaca cai bendicioncunatami charingui.

Ashtahuan cushillami causangui

BIBLIAPICA CASHNAMI NIN: “Taita Diosca tamyata cachashpa granocuna pꞌucuna punllapitaj pꞌucuchishpami ñucanchijmanca mana nijta carashpa cushichin. Chashnami pai alli cashcataca ricuchin” (Hechos 14:17).

CAICA IMATATAJ NISHA NIN? Cai Allpapi can tucui ricushcacunaca Yayitu Dios cushca sumaj regalomi can. Bibliata liyishpa Yayitu Dios cꞌuyaj cashcata yachashpami pai cushca regalocunataca ashtahuan valorangui.

Cambaj causaipajmi alli consejocunata taringui

BIBLIAPICA CASHNAMI NIN: ‘Cashcata ruraj canatapish, allita ruraj canatapish, mana pandarij canatapish, tucuipi alli canatapishmi yachangui’ (Proverbios 2:9).

¿CAICA IMATATAJ NISHA NIN? Diosca canta ruraj cashcamantami can cushilla causangapaj imalla minishtishcataca alli yachan. Biblia ima nishcata estudiashpaca causaipaj alli consejocunatami taringui.

Can tapurishcacunatami cutichingui

BIBLIAPICA CASHNAMI NIN: “Taita Diosmanta alli yachaitapish japinguimi” (Proverbios 2:5).

¿CAICA IMATATAJ NISHA NIN? Tucuita Ruraj Dios tiyashcata yachashpaca importante tapuicunapaj respuestacunatami taringui. Por ejemplo: “¿Imapajtaj causanchij?, ¿imamantataj achca llaquicunata charinchij?, ¿huañushpaca imataj tucunchij?” nishca tapuicunapaj respuestacunatami Bibliapica taringui.

Shamuj punllacunapi alli causai tiyanatami yachangui

BIBLIAPICA CASHNAMI NIN: “Ñuca cancunapaj imallata ruranataca ñucamari yachani. Cancunapajca llaquitaca mana cachashachu, ashtahuanpish sumaj causaitami cugrini. Cancuna shuyacushcatatajmi cusha” (Jeremías 29:11).

¿CAICA IMATATAJ NISHA NIN? Yayitu Diosca llaquicunata, millai ruraicunata, huañuitapish tucuchinatami nin. Dios cusha nishcacunapi tucui shunguhuan crishpaca can tucui charishca llaquicunatami ahuantangui.

Dios tiyashcata yachanami paicunata ayudarca

“Yayitu Diosca causaipi ima ashtahuan importante cashcata, shujtajcunahuan charishca problemacunata allichinata, ima shina paipaj amigo tucuna cashcatami ñucamanca yachachin. Chaita ricushpami dimastij cushilla sintirini” (Cyndi, Estados Unidos).

“Tucuita Ruraj Dios tiyashcata yachashcamantami ñucaca cushilla causani. Chaimantami paimanta, pai rurashcacunamanta, paipaj Shimimanta yachashpaca mana nunca shaicurini” (Elise, Francia).

“Tucuita Ruraj Dios Bibliapi sumaj consejocunata cushcamantami cushilla causani. Shujtajcunatapish ña mana criticanichu. Ashtahuanpish paicunamanta preocuparishpami tranquilo sintirini. Shinallataj alli yayapishmi cani” (Peter, Países Bajos).

“Ñaupaca ñucaca micushpalla, dormishpalla, trabajashpallami pasaj carcani. Mana cushilla causarcanichu. Pero cunanmi causaica shuj sumaj regalo cashcata alli intindini. Chaimantami cunanca cushilla causani” (Liz, Estonia).

“Ñucaca imamantapish ratomi sustarinilla. Pero millai ruraicuna, llaquicuna tucurinata yachashpami ashtahuan tranquilo sintirini” (Adrien, Francia).