¿COSASCUNA CARUYAJPICA IMATATAJ RURASHUN?

Alli yuyashpa cullquita gastai

Preciocuna ashtahuan huichiyajpica causaica sinchimi ricuringa. Shinapish tranquilo sintiringapajca canllatajmi imata ruranata alli ricuna cangui.

¿CAICA IMAMANTATAJ IMPORTANTE CAN?

Cullquita mana alli manejanata yachajpica cullquica maquimanta yacu shina rato tucurinllami. Chashna tucujpica problemacunatami charishun, yallitaj sustarishcami causashun. Chaimantami ashalla cullquita charishpapish ima laya gastanata alli ricuna canchij.

¿IMATATAJ RURANA CANGUI?

Charishca cullquillahuan causai. Chaita rurashpaca tranquilomi sintiringui. Ima gasto ricurijpipish pagai tucunguillami.

Shuj presupuestota rurai. Mashna cullquita ganashcata, mashna cullquita gastashcata anotai. Chashnami mana yalli cullquita gastangui. Presupuestopi churashca cullquillata gastangapaj esforzari. Shinallataj sueldota subijpi, preciocuna cambiarijpica chai presupuestota cambiai. Cazado cashpacarin cullquita manaraj imapi gastashpa cusa huarmipura parlanacuichij.

Caita rurai: A crédito randinapaj randica al contado randi. Chaita ruranami ama yangamanta dibiyangapaj, presupuestomantapish ama pasangapaj achcacunata ayudashca. Bancopi mashna cullquita charishcatapish ricui. Mashna cullquita gastana cashcata yachashpaca mana tanto estresaringuichu.

Ashalla cullquihuan causanaca maipica sinchichari ricuringa. Pero shuj alli presupuestota ruranami achcata ayudanga. Chashnami cullquimantaca mana yalli sustaringui.

‘Mashna cullquita minishtishcata alli yuyari’ (Lucas 14:28).

Cambaj trabajota cuidai. Chaipajca puntual cai, cambaj trabajo alli cashcata ricui. Trabajopi canta mandachunlla ama shuyaichu. Ashtahuanpish trabajador cashcata, respetuoso cashcata ricuchi. Shinallataj cada punlla ashtahuan mejorashpa catingapaj esforzari.

Cullquita ama maipishcachun gastai. “¿Cullquitaca mana minishtirishca cosascunapi o dañota ruraj cosascunapichu gastani?” nishpa tapuri. Achca gentecunaca drogacunapi, pugllaicunapi, tabacota randishpa, yallitaj tragota ubyashpami cullquitaca tucuchincuna. Chai mapa ruraicunamantami unguncuna, trabajo illaj saquirincuna.

‘Maijanpish alli yachaita charijca cushicunmi. Paicunapajca cullquita japishcatapish yallimari’ (Proverbios 3:13, 14).

Llaqui tiempopaj cullquita ahorrai. Ima llaqui atraso japijpi, ima emergencia ricurijpi gastangapaj asha cullquita huaquichi. Chai cullquita charinami canta o cambaj familiata ima ungüi japijpi, tal vez trabajo illaj saquirijpi, ima shujtaj llaqui japijpipish tranquilo sintirichun ayudanga.

“Llaqui punllacunapish, ima llaquipish tucuicunatami mana yuyashcapi japinlla” (Eclesiastés 9:11 La Biblia. Traducción del Nuevo Mundo, NWT).

Cullquita ahorrai

Micunata huasipi yanui

Huasipi yanungapajca tiempo, esfuerzomi minishtirin. Pero achca cullquitami ahorrai tucungui. Shinallataj sano micunatami micungui. Cutin restaurantecunapi micushpa, ña yanushca micunata randishpa o ima ubyanata randishpaca achca cullquitami gastangui.

Alli yuyashpa randi

Mercadoman rishpaca ima munashcatapish ama randichu. Ashtahuanpish listapi anotashcallata randi.
Cullquisitota charishpa o baratolla cajpica imatapish al por mayor randi. Pero ama desperdiciarichunca chaquishca granitocunataca alli huaquichi.
Imata randigrishpapish baratolla cajpipish de calidad cachunmi alli ricunaraj cangui.
¿Can causan ladopica gentecunaca internetpi randinata yachancunachu? Canpishmi cullqui pajtachunca internetpi randi tucungui. Internetpica maipica baratolla cosascunami tiyan.
Promocioncuna tiyai horas, rebajacuna tiyai horasmi randishpa aprovechana cangui. Pero manaraj imata randishpami preciocunata comparana cangui.

Imatapish manaraj randishpa alli yuyai

Telefonota rurajcuna, shujtaj cosascunata rurajcunaca ashtahuan cullquita ganangapajmi mushuj modelocunata llujshichincuna. Chaimanta manaraj imata randishpaca “¿Ciertotajchu caita minishtini? ¿Cunanllatajchu ña randina cani? ¿Mushuj modelotachu randina cani?” nishpa tapuri.

Aparatocunata allichi, de segunda manota randi

Achca tiempota charingapajca cambaj cocinata, refrigeradorata, hornota, shujtaj cosascunatapish alli cuidai. Ña dañarijpica allichinaman cachai. Shinallataj cullquita ahorrangapajca aparato de segunda manota randi.

Shuj huertitota rurai

Allpitata charishpaca canllataj tarpushpami mercadocunapi ña mana randishpa cullquitaca ahorrangui. Shinallataj huertopi pꞌucushcataca shujtajcunaman convidangapaj, cꞌatungapajpishmi charingui.

“Imatapish alli yuyarishpa chai yuyai trabajaj runaca causaipaj charintajmi” (Proverbios 21:5).

Inglaterramanta Miles shuti runaca: “Siempre randishca cosascuna subishcata o bajarishcatami ricunchij. Shinallataj mashna cutin tarjeta de creditohuan randishcatami ricunchij” ninmi.

Estados Unidosmanta Jeremyca: “Ñucapish, ñuca familiapish supermercadoman manaraj rishpami shuj listata ruranchij” ninmi.

Israelmanta Yael shuti runaca: “Imata randinata yuyacushpaca chaita pagangapaj suficiente cullquita charishcatami ricunchij. Shinallataj emergencia tiyai horaspajmi cullquitaca asha asha huaquichishpa catinchij” ninmi.

Estados Unidosmanta Jeffrey shuti runaca: “Carropi, huasipi tiyaj cosascuna dañarijpica mushujta randinapaj randica chaicunata allichichunmi ñucanchij huahuacunata yachachishcanchij. Ñucapish, ñuca huarmipish ima último modelo llujshishcataca mana randinchijllachu” ninmi.

Myanmar llajtamanta Hono shuti runaca: “Micunitapi ama yalli cullquita gastangapajca legumbrecunatami tarpurcani. Pollitocunatapishmi huiñachircani. Chai legumbrecunaca shujtajcunaman regalangapajpishmi avanzan” ninmi.

Shuj runaca legumbrecunatami shuj huertopi japicun.