Bautizarishpami Diospajman ashtahuan cꞌuchuyanchij

1. ¿Etiopía llajtamanta runaca imamantataj bautizachun mañarca?

“CAIPICA yacu tiyanmari. ¿Manachu ñucaca cunanllataj bautizari tucuni?”. Chashnami punta siglopica Etiopía llajtamanta shuj runaca tapurca. Paimanca Jesusta catij Felipemi, shamuna cashca Mesiasca Jesús cashcata Diospaj Shimihuan yachachirca. Chaita yachaj chayashcamantami Etiopía llajtamanta runaca cushicushpa bautizachun mañarca (Hechos 8:26-36).

2. ¿Imamantataj bautizarinata yuyana cangui?

² Cai libropaj ñaupa capitulocunata shuj testigo de Jehovahuan alli yachashca cashpaca, canpish etíope runa shinachari ‘¿ñucaca cunanllataj bautizari tucunichu?’ nishpa ña tapusha ningui. Bibliapimi paraíso Allpapi gentecuna huiñai huiñaita causana cashcata ña yachashcangui (Lucas 23:43; Apocalipsis 21:3, 4). Huañushpa ima tucuna cashcatapish, huañushcacuna causarinatapish ñami yachashcangui (Eclesiastés 9:5; Juan 5:28, 29). Shinallataj tauca cutinchari testigo de Jehovacunapaj tandanacuicunaman rishpa, paicuna alli religionpi cashcata ricushcangui (Juan 13:35). Ashtahuanpish canllatajchari Diospaj amigo tucunata ña callarishcangui.

3. a) ¿Jesusca imatataj mandarca? b) ¿Jesusta catijcunaca ima shinataj bautizarina canchij?

³ ¿Diosta servisha nishpaca imatataj rurana canchij? Jesusca paita catijcunataca cashnami mandarca: “Tucui cai pachata richij, ñuca yachacujcunata ruraichij” “bautizaichij” nircami (Mateo 28:19). Jesusllatajmi ima shina bautizarina cashcata ricuchirca. Paitaca mana yacuta umapi churashpa, yacuta umapi tallishpachu bautizarca (Mateo 3:16). Bautizana shimica griego rimaipica “yacupi pambana” nisha ninmi. Chaimantami Jesusta catijcunaca yacupi pambarishpa bautizarina canchij.

4. ¿Bautizarishpaca imatataj ricuchinchij?

⁴ Diospaj amigocuna tucusha nijcunaca bautizarinami can. Bautizarishpami Diosta servisha nishcata, paipaj munaita rurasha nishcatapish shujtajcunapaj ñaupajpi ricuchinchij (Salmo 40:7, 8). Shinapish ¿bautizaringapajca imatataj rurana canchij?

ALLI YACHANAPISH, CRINAPISHMI MINISHTIRIN

5. a) ¿Bautizaringapajca imatataj rurana cangui? b) ¿Imamantataj tandanacuicunaman rina cangui?

⁵ Canca puri callarij shinami Bibliahuan yachachishcamantaca Jehová Diosmantapish Jesucristomantapish yachacungui. Bibliapica “Huiñai causaita charingapajca can shujlla Diostapish, can cachashca Jesucristotapishmi rijsina can” ninmi (Juan 17:3, NM). Shinapish ashtahuanmi yachashpa catina cangui. Jesusta catijcunaca ‘Diospaj munaita allitaj yachaj cachunmi’ munanchij (Colosenses 1:9). Chaipajca testigo de Jehovacunapaj tandanacuicunami achcata ayudan. Chaimantami tandanacuicunaman rinata mana saquina cangui (Hebreos 10:24, 25). Tandanacuicunaman cutin cutin rishpaca Diosmantami ashtahuan yachangui.

6. ¿Bautizaringapajca mashnatataj Bibliamanta yachana cangui?

⁶ Shina cajpica bautizaringapajca mana tucui Bibliatachu yachana cangui. Yuyarishun: Etiopía llajtamanta runaca ñami Diospaj Shimimanta ashata yacharca. Shinapish huaquin yuyaicunata entendichichunmi minishtirca (Hechos 8:30, 31). Chashnallataj canpish manaraj tucuita yachanguichu. Diosmantaca huiñaitami yachashpa catina cangui (Eclesiastés 3:11). Shinapish bautizaringapajca Bibliapaj huaquin yuyaicunatami yachanapish, chasquinapish cangui (Hebreos 5:12). Por ejemplo, huañushcacuna ima tucushcata, Diospaj shutipish, Diospaj Mandanapish imamanta valishca cashcatami yachana cangui.

7. ¿Bibliamanta yachashpaca imatataj rurana cangui?

⁷ Ashtahuanpish mana yachashpallachu saquirina cangui. Crinami minishtirin, “mana crishpaca” ‘Dios munashcataca mana rurai tucushunchu’ (Hebreos 11:6). Bibliapica Corinto llajtapi causajcuna imata rurashcatami parlan. Jesusta catijcuna Diospaj Shimita huillajpica paicunaca ‘crishpami bautizarircacuna’ (Hechos 18:8). Canpish chaillatatajmi rurana cangui. Bibliamanta yachashpaca, Bibliaca Dios quillcachishca cashcatami crina cangui. Shinallataj Dios imata rurasha nishcata, Jesús huañushcamanta ñucanchijta quishpichisha nishcatami crina cangui (Josué 23:14; Hechos 4:12; 2 Timoteo 3:16, 17).

BIBLIAPI YACHASHCATAMI PARLANA CANGUI

8. ¿Yachacushcata shujtajcunaman parlangapajca imataj ayudanga?

⁸ Tucui shunguhuan crishpaca, yachacushcata parlasha nishpami mana upalla saquiringui (Jeremías 20:9). Crishcamantami Diosmantapish, pai imata rurasha nishcatapish shujtajcunaman parlangui (2 Corintios 4:13-ta rezai).

9, 10. a) ¿Callaringapajca picunamantaj Bibliamanta parlai tucungui? b) ¿Testigo de Jehovacunahuan huillanaman llujshisha nishpaca imatataj rurana cangui?

⁹ Callaringapajca cambaj familiacunaman, amigocunaman, vecinocunaman, trabajopi compañerocunamanmi alli shimicunahuan Biblia imata yachachishcata parlai tucungui. Qꞌuipaca testigo de Jehovacunahuanchari huillanaman llujshisha ningui. Huillanaman llujshisha nishpaca Bibliamanta canta yachachij testigohuan parlai. Requisitocunata can pajtachijpica, ishquindij tucushpami congregacionpaj ishqui ancianocunahuan parlanacuna canguichij.

¹⁰ Chashnami Diospaj ovejacunata michij huaquin ancianocunata rijsingui (Hechos 20:28; 1 Pedro 5:2, 3). Paicunahuan parlanacushpaca Bibliamanta huaquin yuyaicunata entendishcata, crishcata, Biblia yachachishca shina causacushcata, tucui shunguhuan testigo de Jehová tucusha nishcatami ricuchina cangui. Tucui requisitocunata pajtachijpica ñami manaraj bautizarishca cashpapish testigocunahuan huillai tucungui ningacunami. Chashnami alli huillaicunata shujtajcunaman parlai tucungui.

11. ¿Huillanaman llujshingapajca ima cambiocunatataj rurana cangui?

¹¹ Cutin huaquinpica huillanaman llujshingapajca, cambaj causaipi huaquin cambiocunata rurana cashcatami ancianocunaca ricunga. Por ejemplo, ima mana allita pacalla ruracushcatachari saquina cangui. Shinashpaca manaraj bautizarishpa huillanaman llujshingapajca limpio causaitami charina cangui. Por ejemplo, huainayanata, machanata, drogacunata ubyanatami saquina cangui (1 Corintios 6:9, 10; Gálatas 5:19-21-ta rezai).

ARREPINTIRINAPISH, DIOSPAJMAN TIGRARINAPISH

12. ¿Imamantataj arrepintirina cangui?

¹² Bautizaringapajca purishpa caticuj shinami ñaupajman catina cangui. Apóstol Pedroca: “Cancunapaj juchacunata pꞌichachun, llaquirishpa Diospajman tigrarichij” nircami (Hechos 3:19, NVI). Shungumanta llaquirishpami arrepintirina canchij. Shinapish mana mapa causaita charijcunallachu arrepintirina can. Alli causanchij nijcunapishmi arrepintirina can. Juchayuj cashcamanta, Dios perdonachun minishtishcamantami tucuicuna arrepintirina canchij (Romanos 3:23; 5:12). Bibliata manaraj estudiashpaca Diospaj munai maijan cashcataca mana yacharcanguichu. ¿Mana yachashpaca Dios munashca shina causanguimanchu carca? Mana. Chaimantami arrepintirina canchij.

13. ¿Diospajman tigrarinaca imataj can ?

¹³ Arrepintirishca qꞌuipaca ‘Diospajman tigrarinami’ minishtirin. Tigrarishpaca mana ñaupa causaipi imata rurashcamanta llaquirishpallachu saquirina cangui. Ashtahuanpish ñaupa causaitaca huashamanmi saquina cangui. Cunanmantapachaca allita rurashpa causanatami yuyana cangui. Shinashpaca manaraj bautizarishpaca arrepintirina, Diospajman tigrarinami minishtirin.

DIOSMAN MINGARINAPISH

14. ¿Manaraj bautizarishpaca imatataj rurana cangui?

¹⁴ Shinallataj manaraj bautizarishpaca Diosmanmi mingarina cangui.

15, 16. a) ¿Diosman mingarinaca imatataj nisha nin? b) ¿Diosman mingaringapajca imatataj rurana cangui?

¹⁵ ¿Diosman mingarinaca imatataj nisha nin? Jehová Diosta mañashpa paillata servingapaj cambaj tucui causaita paipaj maquipi churana cashcatami nisha nin (Deuteronomio 6:15). ¿Imamantataj chaita rurana canchij? Shuj chꞌimbapuraita rurashun: Shuj cꞌarica shuj huarmitami ashtahuan rijsisha nin. Chai huarmihuan parlanacushpa, ima shina cashcata ricushpaca chai huarmita cꞌuyai callarishpami cazarashun nin. Cazarashpaca achca ruraicunatami pajtachina can. Shinapish chai huarmita cꞌuyashcamantami paihuan cazaran.

¹⁶ Jehová Diosta rijsishpa, paita cꞌuyashpaca tucui shunguhuanmi paita servishun. Mana imapish jarcachun saquishunchu. Shinallataj Diospaj Churi Jesucristota catisha nijcunaca quiquin causaita mana llaquinachu can (Marcos 8:34). Diosmanta caruyachij munaicunata, yuyaicunatapish huashaman saquishpami ñucanchij causaita mana llaquinchij. Shinashpaca manaraj bautizarishpami cambaj causaipica, Jehová Diospaj munaita puntapi churanata yuyana cangui (1 Pedro 4:2-ta rezai).

PANDARINATA AMA MANCHAICHU

17. ¿Huaquincunaca imamantataj Diosman mana mingarincuna?

¹⁷ Huaquincunaca pandarinata manchashcamantami Jehová Diosman mana mingarisha nin. Diosta servi callarishpaca imamanta pandarishcatami paipaj ñaupajpi ricuchina canga nincunami. Ñuca pandarijpica Jehová Diosca llaquiringami nishpami yuyancuna. Chaimantami Diosman mana mingarishcacuna.

18. ¿Diosman mingaringapajca imataj ayudanga?

¹⁸ Jehová Diosta ashtahuan cꞌuyashpaca paiman mingarina munaita, pai mandashcata pajtachina munaitami charingui (Eclesiastés 5:4). Mingarishca qꞌuipaca ‘Diosta cushichina’ yuyaillami causangui (1 Tesalonicenses 4:1). Diosta cꞌuyashpaca paipaj munaitaca jahuallami pajtachingui. Apóstol Juanca, “Diosta cꞌuyacushcataca pai mandashcacunata cazushpami ricuchina. Pai mandashcacunata cazunaca mana sinchichu” nircami. Canpish chashnallatajmi yuyangui (1 Juan 5:3).

19. ¿Imamantataj Diosman mingarinata mana manchana cangui?

¹⁹ Paiman mingarijcuna jucha illaj cachunca Diosca mana shuyanchu. Jehová Diosca gentecuna imata rurai tucushcata, imata mana rurai tucushcataca allimi yachan. (Salmo 103:14). Paimi cantaca tucuipi ayudanga. Can alli causachunmi paica munan (Isaías 41:10-ta rezai). Jehová Diospi tucui shunguta churajpica, paica ‘alli ñantami pushanga’ (Proverbios 3:5, 6).

BAUTIZARISHPA DIOSMAN MINGARISHCATA RICUCHI

20. ¿Diosman mingarishcataca imamantataj shujtajcunapaj ñaupajpi huillana cangui?

²⁰ Caicama yachashcata yuyarishpaca, canlla cashpachari Diosta mañashpa paiman mingarisha ningui. Shinapish mana mingarishpallachu saquirina cangui. Tucui shunguhuan Diosta cꞌuyashpaca shujtajcunapaj ñaupajpimi mingarishcata huillana cangui (Romanos 10:10). ¿Ima shinataj caitaca rurana cangui?

21, 22. ¿Diosman mingarishcataca ima shinataj shujtajcunapaj ñaupajpi huillana cangui?

²¹ Bautizarisha nishpaca ancianocunata pushaj ancianohuanmi parlana cangui. Chai ancianoca Bibliapaj huaquin yuyaicunamanta can imata entendishcata ricuchunmi shujtaj ancianocunata agllanga. Requisitocunata pajtachijta ricushpaca ancianocunaca shamuj jatun tandanacuipimi bautizari tucungui ningallami. a Bautizarina punlla chayajpica shuj conferenciapimi bautizarina imata nisha nishcata yachachin. Chai conferenciata tucuchingapajca conferenciata cuj huauquica, bautizarigrijcunataca ishqui tapuicunatami ruran. Bautizarigrijcunaca sinchita parlashpami cutichin. Chashnami shujtajcunapaj ñaupajpi Diosman mingarishcata huillancuna.

²² Bautizarishpaca Diosman mingarishcata, testigo de Jehová tucushcatami shujtajcunaman ricuchicungui. Bautizarigrijcunataca Jehová Diosman mingarishcata ricuchingapajmi shujtajcunapaj ñaupajpi tucui cuerpota yacupi pambancuna.

BAUTIZARISHPACA IMATATAJ RICUCHINCHIJ

23. ¿‘Yayapaj, Churipaj, jucha illaj espiritupaj shutipi bautizarishpaca’ imatataj ricuchinchij?

²³ Jesusca yachachircami paita catijcunaca ‘Yayapaj, Churipaj, jucha illaj espiritupaj shutipi bautizarina’ cashcata (Mateo 28:19). Jehovapaj shutipi, Jesuspaj shutipi bautizarishpaca, paicunalla mandana poderta charishcatami ricuchinchij (Salmo 83:18; Mateo 28:18). Jucha illaj espiritupaj shutipi bautizarishpaca, Diospaj fuerza imata ruraj cashcata entendishcatami ricuchinchij (Gálatas 5:22, 23; 2 Pedro 1:21).

24, 25. a) ¿Bautizarishpaca imatataj ricuchinchij? b) ¿Catij capitulopica imatataj yachashun?

²⁴ Bautizarinaca mana yacupi pambarina cashcallatachu nisha nin. Ashtahuanpish shuj alli ruraimi can. Yacupi pambarinaca huañuj shina ñaupa causaita huashaman saquishcatami ricuchin. Yacumanta llujshinaca chai punllamantapacha Diospaj munaita rurashpa causana cashcatami ricuchin. Canca mana shuj yuyaita catingapaj, mana shuj runata catingapaj, mana shuj organizacionta catingapajchu bautizaringui. Ashtahuanpish Diosman mingarishpa, bautizarishpaca paipaj alli amigo tucunatami mashcacungui (Salmo 25:14).

²⁵ Shinapish mana bautizarishpallachu quishpirinchij. Apóstol Pabloca: “Quishpirinataca, manchaihuan chujchuihuan alli catiraichij” nircami (Filipenses 2:12, NVI). Bautizarinaca quishpiringapaj callari alli ruraillami can. Shinashpaca Jehová Dios quishpichichunca ‘Diospaj cꞌuyaipimi catirana’ canchij (Judas 21). Cai libropaj último capitulopimi chaita yachashun.