“Ama upallaichu, huillashpa catilla”

1-3. a) ¿Pabloca imapajtaj Corinto llajtaman rirca? b) ¿Chaipica imallatataj minishtirca?

HUATA 50 tucuricujpi Pabloca Corinto llajtapimi carca. Chaipica cꞌatuna, randina achca tiyashcamantami griegocunapish, romanocunapish, judiocunapish causajcuna carca.a Shinapish Pabloca mana trabajota mashcangapaj chaiman rircachu. Ashtahuanpish Diospaj Gobiernomanta huillangapajmi chaiman rirca. Pero maipi saquirinatami minishtirca, paillataj mantiniringapajca trabajanami carca. Alli huillaicunata huillashcamantaca gentecuna paiman cullquita cuna cashcata yuyachunca mana munarcachu.

² Pabloca carpacunata rurashpami trabajaj carca. Mana fácil cajpipish mantiniringapajmi chaita rurarca. Shinapish shuj jatun ciudadpi cashcamanta trabajota, maipi saquirinata mashcanami minishtirirca. Chaita rurana importante cajpipish paipajca Diosmanta huillanami ashtahuan valishca carca.

³ Pabloca Corintopi achca tiempotami saquirirca. Achcacunami Pablo huillashcata uyarcacuna. Pablo Corintopi imata rurashcata ricushpaca ñucanchijpish ima shina Diospaj Gobiernomanta tucuita huillana cashcatami yachashun.

‘Carpa huasicunata rurashpami trabajaj carca’ (Hechos 18:1-4)

4, 5. a) ¿Corintopi cashpaca Pabloca maipitaj saquirirca? b) ¿Mantiniringapajca imapitaj trabajaj carca? c) ¿Ima shinataj Pabloca carpacunata ruranata yacharca?

⁴ Pabloca Corinto llajtaman chayashca huashallami Aquilatapish, Priscilatapish rijsirca. Aquilaca judiomi carca. Priscilataca Prisca nishpami rijsijcuna carca. Paicunaca cꞌuyaj, pozadata cuj cusa huarmimi carcacuna. “Mandaj Claudio tucui judiocunata Roma llajtamanta llujshichun mandajpimi” paicunaca chaimanta llujshishpa rircacuna (Hech. 18:1, 2). Bibliapi nishca shinaca Aquilapish, Priscilapish carpa huasicunata rurashpami trabajaj carca. Pabloca chai trabajota ruranata yachashcamantami paicunapaj huasipi saquirishpa paicunahuan trabajarca (Hech. 18:3). Pabloca Corintopi tucui huillacushca tiempomi Áquila y Priscilapaj huasipi saquirirca. Chaipimi Bibliapaj huaquin cartacunata escribishcanga.b

⁵ Pablotaca ‘Gamaliel runami yachachirca’. Achcata yachaj cashpaca, ¿imamantataj carpacunata ruranata yacharca? (Hech. 22:3). Punta siglopi judiocunaca huahuacunata estudiachina cashpapish shuj oficiotami uchillamanta yachachijcuna carca. Chaimantami joven cashpallataj Pabloca chai oficiota yachashcanga. Yuyarishun, Pabloca Ciliciapi saquirij Tarsomantami carca. Chaipica carpacunata rurangapajmi cilicium nishca tejidota utilizajcuna carca. Chai tejidomantami chai llajtaca rijsishca carca. Carpacunata rurangapajca racu telacunatachari pꞌitishpa sirana carca, huaquinpicarin telata ruranami sinchi cashcanga.

6, 7. a) ¿Pabloca trabajanamantaca imatataj yuyaj carca? b) ¿Áquila y Priscila Pablo shina yuyashcataca ima shinataj yachanchij? c) ¿Ñucanchijpish paicuna shina cashcataca ima shinataj ricuchinchij?

⁶ Pabloca mantiniringapajllami trabajarca. Paipajca shujtajcunata ‘cullquita mana mañashpa huillanami’ valishca carca (2 Cor. 11:7). Aquilapish, Priscilapish shinallatajmi yuyarcacuna. Apóstol Pablo huata 52-pi Corintomanta rijpica paicunapishmi tucuita saquishpa Éfeso llajtaman paihuan rircacuna. Shinallataj paicunapaj huasipimi tandanacui callarircacuna (1 Cor. 16:19). Qꞌuipaca Roma llajtamanmi tigrarcacuna. Chai huashaca cutinmi Éfeso llajtaman rircacuna. Paicunaca Diospaj Gobiernota puntapi churashpami, shujtajcunatapish ayudashpa catircacuna. Chaita ruracushcamantami shujtaj llajtacunapi causaj huauqui panicunapish paicunata agradicircacuna (Rom. 16:3-5; 2 Tim. 4:19).

⁷ Cunan punllacunapipish Diosta sirvijcunaca paicuna shinallatajmi huillanapi ocupado cashpapish, shujtajcunapaj shuj carga shina ama cangapaj sinchita trabajancuna (1 Tes. 2:9). Por ejemplo, achca precursorcunaca huaquin punllacunallatajmi trabajancuna. Cutin shujtajcunaca huatapi huaquin quillacunallatami trabajancuna. Chashnami huillangapaj tiempota charincuna. Shujtajcunaca Áquila, Priscila shinallatajmi superintendente de circuito huauquita puzachincuna. ‘Cꞌuyaihuan chasquishcamantami’ sinchi tucushpa ñaupajman catingapaj achca animota chasquincuna (Rom. 12:13).

Corintomantaca achcacunami “cri callarircacuna” (Hechos 18:5-8)

8, 9. a) ¿Achca judiocuna Pablota mana uyasha nijpipish paica imatataj rurarca? b) ¿Pabloca maipitaj huillashpa catingapaj rirca?

⁸ Pabloca paillata mantiniringapaj, predicashpa catingapajmi trabajaj carca. Por ejemplo, Pablota minishtirishcahuan ayudangapajmi Silaspish, Timoteopish Macedoniaman chayarcacuna (2 Cor. 11:9). ¿Chashna ayudajpica Pabloca imatataj rurarca? Paica chai ratomi ‘Diospaj Shimita tucui punllacuna huillai callarirca’ (Hech. 18:5). Shinapish judiocunaca Pablopaj contra tucushpami, Jesús quishpichij cashcata mana uyasha nircacuna. Chaimi Pabloca paipaj churanata chaspirishpa: “Cancunapaj culpallamantatajmi huañunguichij. Ñuca ima culpata mana charinichu. Cunanmantaca shujtaj llajta gentecunapajmanmi rigrini” nirca (Hech. 18:6; Ezeq. 3:18, 19).

⁹ ¿Pabloca maipitaj huillashpa catingapaj rirca? Sinagogamanta llujshishpaca Diosta adoraj Ticio Justo runapaj huasimanmi Pabloca yaicurca. Chai runapaj huasica sinagoga ladopimi saquirirca. Ticio Justoca judiocunapaj yachachishcata catijmi cashcanga (Hech. 18:7). Corintopi cashpa Aquilapaj, Priscilapaj huasipimi causashpa catishpapish huillana obrata organizangapaj Pabloca Ticio Justopaj huasitami utilizarca.

10. ¿Pabloca judiocunaman, judiocunapaj yachachishcacunata catijcunaman huillanata mana saquishcataca ima shinataj ricuchirca?

¹⁰ Shujtaj llajta gentecunapajmanmi rigrini nishpaca, ¿Pabloca judiocunamanpish, judiocunapaj yachachishcacunata catijcunamanpish ña mana huillana cashcatachu nicushcanga? Mana. Bibliapica: “Sinagogata pushaj Crispo shuti runapish, paipaj huasipi causajcunapish tucuicunami Amitopi crircacuna” ninmi. Shinallataj sinagogapi Pablota uyangapaj chayajcunapish “achcacunami alli huillaicunata uyashpa cri callarircacuna, bautizarircacunapish” ninmi (Hech. 18:8). Ticio Justopaj huasipimi Corintopi mushuj congregacionca tandanacui callarirca. Lucas chai tiempopi imalla tucushcata ordenpi escribishca cajpica judiocuna, judiocunapaj yachachishcacunata catijcunaca, Pablo paipaj churanata chaspishca qꞌuipami Jesusta catijcuna tucushcanga. Chashnami Pabloca maijan uyasha nijcunallaman huillashpa catishcata ricuchin.

11. ¿Pablo shinallataj Jesusta catinchij nij gentecunataca ima shinataj ayudanchij?

¹¹ Achca lugarcunapi iglesiacunaca achca catijcunatami charin. Chai iglesiata pushajcunaca gentecuna iglesiamanta ama caruyachunmi tucuita rurashcacuna. Cunan punllacunapipish Corintopi causashca judiocuna shinallatajmi achca gentecunaca tradicioncunata mana saquisha nincuna. Ñucanchijpish Pablo shinallatajmi gentecunaman shunguman chayangapajca Biblia ima nishcata alli intindichingapaj esforzarinchij. Religionta pushajcuna huillanata jarcajpi, ñucanchijta catirashpa llaquichijpipish huillashpami catinchij. Chai iglesiacunapi huaquincuna ‘Diosta sirvingapaj achcata esforzarishpapish Diosmantaca mana alli yachancunachu’. Chaimantami Diosta sirvisha nij gentecunata mashcana canchij (Rom. 10:2).

“Cai llajtapica achca gentecunami ñucapi cringacuna” (Hechos 18:9-17)

12. ¿Jesusca ima shinataj Pablota animarca?

¹² Apóstol Pabloca mashna tiempota Corinto llajtapi saquirinataca mana yacharcachu. Chaimi Jesús shuj tuta ricurishpa Pablotaca: “Ama manchaichu. Ama upallaichu, huillashpa catilla. Ñucami canhuan cani. Maijanpish cantaca mana llaquichingachu. Cai llajtapica achca gentecuna ñucapi cringacuna” nircami (Hech. 18:9, 10). Jesús nishcacunaca Pablotaca achcatami animarca. Jesusllatajmi Pablotaca ñucami canta cuidagrini nirca. Shinallataj achca gentecunami alli huillaicunata uyanga nircami. Chaimi Pabloca “Diospaj shimita yachachishpa shuj huata chaupita chai llajtapi saquirirca” (Hech. 18:11).

13. a) ¿Tribunalpi cashpa Pabloca imatataj yuyarishcanga? b) ¿Imamantataj paihuanpish chashnallataj mana tucuna cashcata yacharca?

¹³ Corintopi ña shuj huatata cashpami Pabloca Jesús ayudacushcata ashtahuan ricurca. Chaipimi “judiocunaca Pablota llaquichingapaj shuj yuyailla tucushpa tribunalman pusharcacuna” (Hech. 18:12). Huaquin yachajcuna nishca shinaca chai tribunalca shuj plataformami carca (griego rimaipi, bḗma). Chai plataformaca plaza cꞌuchullapimi carca. Chaica yuraj, azul marmolhuan sumaj dibujocunahuanpishmi rurashca carca. Chꞌimba ladomanca gentecuna tandanacuchunmi shuj jatun pushtu tiyarca. Huaquin arqueologocunaca cai tribunalca sinagogapaj, Ticio Justopaj huasi cꞌuchullapi cashcatami nincuna. Pabloca Saulo cashpa rumicunahuan shitashpa Estebanta huañuchijta ricushcatami yuyarishcanga (Hech. 8:1). ¿Pablotapish chashnallatajchu huañuchina carca? Mana. Jesusllatajmi: “Maijanpish cantaca mana llaquichingachu” nirca (Hech. 18:10).

14, 15. a) ¿Judiocunaca ima nishpataj Pablota juchachircacuna? b) ¿Galionca shuj juicio mana tiyana cashcataca imamantataj decidirca? c) ¿Sosteneshuanca imataj tucurca? d) ¿Qꞌuipaca Sostenesca imatataj rurarca?

¹⁴ ¿Pablo tribunalman chayajpica imataj tucurca? Chaipi juezca Galionmi carca. Paica Acayapi mandaj, yachaj Senecapaj punta huauquimi carca. Paipaj ñaupajpimi judiocunaca Pablota cashna nishpa juchachircacuna: “Cai runaca leypi mana mandashca shinamari Diosta adorachun gentecunataca yachachicun” nircacunami (Hech. 18:13). Caicunata nishpaca Pablo leyta mana cazushpa judiocuna Jesusta catij tucuchun obligashcatami intindichircacuna. Ashtahuanpish Galionca Pablo ‘ima mana allita mana rurashcata’, paicuna llullacushcatami cuentata curca (Hech. 18:14). Galionca judiocunapaj problemacunapi mana chagrurisha nircachu. Chaimantami Pablopajca shuj juicio mana tiyana cashcata huillarca. Chaimi Pabloca mana difindirirca. Galión chashna decidishcamantami judiocunaca Sóstenes shuti runahuan achcata pꞌiñarircacuna. Paica Crispopaj randimi sinagogapi presidente cashcanga. Paita “japishpaca tribunalpaj ñaupajpi macai callarircacuna” (Hech. 18:17).

¹⁵ ¿Sostenesta gentecuna macacujpica imamantataj Galionca mana jarcarca? Galionca Sóstenes Pablopaj contra tucuchun gentecunata jatarichishcatami yuyashcanga. Chaimantami Sostenesta macachun saquirca. Paita macachun imamanta saquishcata mana yachashpapish Sóstenes Jesusta catij tucuchun chaita ayudashcatami yachanchij. Qꞌuipa huatacuna Corinto llajtaman Pablo cachashca cartapica: ‘Ñucanchij huauqui Sóstenes’ nishpami quillcarca (1 Cor. 1:1, 2). ¿Pabloca tribunalpi gentecuna macashca Sostenesllamantajchu parlacurca? Paimanta parlanacushca cajpica tribunalpi ima tucushcata Jesusta catichunmi ayudashcanga.

16. ¿Jesús Pablota ima nishcata yachashpaca imamantataj huillashpa catisha ninchij?

¹⁶ Ña ricushca shinaca Jesusca Pablotaca: “Ama manchaichu. Ama upallaichu, huillashpa catilla. Ñucami canhuan cani” nircami (Hech. 18:9, 10). ¿Ima horastaj chai promesata rurarca? Judiocuna mana uyasha nishca qꞌuipami chaita rurarca. Ñucanchijpish gentecuna mana uyasha nijpica Jesús ima nishcatami yuyarina canchij. Jehová Dios gentecunapaj shunguta ricushcata, paipajman gentecunata pushacushcataca mana cungarinachu canchij (1 Sam. 16:7; Juan 6:44). Chaita yachashcamantami cushilla huillashpa catinchij. Cada huatami achcacuna bautizarincuna. Chaimantami “tucui llajtacunapi causaj gentecunapajman rishpa” Jesusta catijcuna tucuchun yachachisha ninchij. Chaita rurangapaj esforzarishpaca Jesús ñucanchijta cuidanatami seguros canchij. Jesusca: “Cai pachapaj ruraicuna tucuringacamami tucui punllacuna cancunahuan casha” nircami (Mat. 28:19, 20).

‘Jehová Dios munajpica tigramushami’ (Hechos 18:18-22)

17, 18. ¿Pabloca Efesoman ricushpaca imataj yuyarishcanga?

¹⁷ Galión Pablota shuj juiciota mana ruranata decidishcamanta Corinto congregacionpi paz tiyashcataca mana yachanchijchu. Pero Pablo ‘tauca punllacunata’ Corinto llajtapi saquirishcatami yachanchij. Chai qꞌuipami huauquicunata minchacama nishpaca rirca. Huata 52-pimi Pabloca Cencreas llajtamanta barcota japirca. Cencreasca Corintomanta 11 kilometrocunata carupimi carca. Pabloca Siriamanmi rirca. Manaraj chaiman rishpaca Pabloca Diosman ari nishcata pajtachingapajmi “paipaj ajchata rutuchirca” (Hech. 18:18).c Chai qꞌuipaca Aquilata, Priscilata pushashpami Egeo mama cuchata pasashpa Éfeso llajtaman chayarcacuna. Chaica Asia Menorpimi carca.

¹⁸ Ña viajacushpaca Corintopi ima tucushcatami yuyarishcanga. Pai allita rurashcamantami cushilla sintirishcanga. 18 quillacunata Corintopi huillacujpica tucui allimi llujshirca. Punta congregación tiyachunpishmi ayudarca. Chaica Ticio Justo huasipimi callarirca. Chaipica Ticio Justopish, Crispopish paipaj familiapishmi Jesusta cati callarircacuna. Paicunata Jesusta catichun ayudashcamantami achcata cꞌuyarca. Qꞌuipaca corintocunaman shuj cartata escribishpaca: ‘Ñuca shungupi quillcashca cartami canguichij’ nircami. Cunan punllacunapipish Diosta sirvichun ayudashca gentecunataca achcatami cꞌuyanchij. Paicunapish ñucanchij shungupi quillcashca “carta” shinami can (2 Cor. 3:1-3).

19, 20. a) ¿Pablo Efesoman chayashpaca imatataj rurarca? b) ¿Pablopaj ejemplotaca ima shinataj cati tucunchij?

¹⁹ Pabloca Efesoman ña chayashpaca chai rato ‘sinagogaman yaicushpa judiocunata yachachishpa paicunata intindichunmi ayudarca’ (Hech. 18:19). Paica asha tiempollatajmi chaipi saquirirca. “Paicunahuan ashtahuan punllacunata saquirichun mañajpipish Pabloca mana saquirisha nircachu. Ashtahuanpish paicunata minchacama nishpaca: ‘Jehová Dios munajpica cancunata ricunaman tigramushami’” nircami (Hech. 18:20, 21). Chaipi achca trabajo tiyashcataca allimi yacharca. Cutin chaiman tigranata yuyashpapish Jehová Diospaj maquipimi saquirca. Ñucanchijpajca alli ejemplomi can. Ñucanchijpish Jehová Diosta ashtahuan sirvingapajca metacunatami churana canchij. Chaicunata pajtachingapajpishmi esforzarina canchij. Shinapish Jehová Dios ñucanchijta pushachunmi saquina canchij. Chashnami paipaj munaita pajtachishun (Sant. 4:15).

²⁰ Aquilata, Priscilata Éfeso llajtapi saquishpami Pabloca barcota japishpa Cesareaman rirca. Qꞌuipaca Jerusalenman rishpami congregacionpi huauqui panicunata saludarca (Hech. 18:22). Chai qꞌuipami Pabloca Antioquía de Siriaman tigrarca. Pablo rurashca qꞌuipa viajepica tucuimi alli llujshirca. Cunanca misionero shina Pablo rurashca último viajepi ima tucushcata ricushun.