CAPÍTULO 25
¿Ñuca charishcacunata japirishpa mapata rurana munaita saqui tucushachu?
Luisca: “Ocho huatacunata charishpami ñuca charishcacunata japirishpa ñucallataj mapata rurai callarircani. Qꞌuipamanmi chai mapa ruraimanta Dios imata yuyashcataca yachaj chayarcani. Chai punllamantami cutinllataj chai mapata rurashpaca mana alli sintirircani. ‘Diosca ñucataca mana nunca cꞌuyangachu’ nishpami yuyaj carcani” ninmi.
ÑA JOVENCITOCUNA tucushpami aichapi chayarina munaitaca ashtahuan charincuna. Chaimantami achca jovencunaca paicunapaj charishcacunata japirishpa mapata ruranapi urmancuna.a Maijancunaca: “Chaita ruranaca mana gravechu can. Pita mana llaquichicunguichu” ningacunami. Shinapish cai mapa ruraicunata imamanta mana rurana cashcatami jovencunaca yachana can. Apóstol Pabloca: ‘Cancunapi tiyaj cai pachapaj yuyaicunata millai munaicunata huañuchichij’ nishpami aconsejarca (Colosenses 3:5). Quiquin charishcacunallatataj japirishpa mapata ruranaca huainayana munaitaca mana anchuchinchu. Ashtahuanpish chai munaitami ashtahuan mirachin. ¿Chai mapa ruraica ima shinataj ashtahuan llaquichi tucun?
● Cai mapa ruraita rurajca pai cushicunallapimi yuyan.
● Cꞌaritapish o huarmitapish aichapi chayarinapaj cashca shinallatajmi ricun.
● Paillapi yuyaj cashcamantami paipaj cusahuan o paipaj huarmihuan aichapi chayarinacushpaca mana cushicunga.
Quiquin charishcacunata japirishpa mapata rurashpa aichapi chayarina munaicunata pasachinapaj randica chaicunamanta jarcarinami alli canga (1 Tesalonicenses 4:4, 5). ¿Ima shinataj jarcari tucungui? Chai mapa ruraipi imacunalla urmachisha nishcacunamanta caruyachunmi Bibliapica mandan (Proverbios 5:8, 9). Pero chai mapa ruraipi ama urmangapajchari achcata esforzarishcangui. Shinapish manachari mishai pudishcangui. Chaimantachari chai mapa ruraitaca mana saqui tucushachu. Dios munashca shinapish mana causai tucushachu nishpa yuyashcangui. Pedro shuti jovenpish chashna shinallatajmi yuyarca. Paica: “Cutinllataj chai mapa ruraipi urmashpaca culpablemi sintirircani. Diostapish mana mañai tucurcanichu. Imata rurashpapish caitaca mana allichi tucushachu nishpami yuyarcani” nircami.
Canpish chashnallataj sintirishpaca ama preocuparichu. Jovencunapish, yuyajcunapishmi cai mapa ruraitaca saqui tucushcacuna. Canpish cai mapa ruraitaca saqui tucunguimi.
Culpata charishcata sintina
Paicunapaj charishcacunata japirishpa mapata rurajcunaca qꞌuipamanca culpayujmi sintirincuna. 2 Corintios 7:11-pi nishca shinaca yallitaj llaquillami sintirincuna. Chashna sintirinaca mana malochu, ashtahuanpish chai mapa ruraita saquichunmi ayudanga. Pero yallitaj llaquirishpaca chai mapa ruraitaca mana saqui tucunguichu, ashtahuanpish desanimaringuimi (Proverbios 24:10).
Mishai tucushcata yuyai. Charishcacunata japirinaca yallitaj mapami can. Chai munaicunaca shuj esclavo shinatami ruran. Cambaj yuyaitapishmi dañota ruran (Tito 3:3). Shinapish cai mapa ruraica mana huainayana jucha shinallatajchu can (Judas 7). Chaimantami cai mapata rurashpaca mana nunca perdonashcachu casha nishpaca mana yuyanachu cangui. Ashtahuanpish cai mana alli munaita mishangapajmi mana shaicushpa, esforzarishpa catina cangui.
Mapa ruraipi cutin urmashpaca ama desanimarichu. Proverbios 24:16-pi ima nishcata yuyari. Chaipica: “Cashcata ruraj runaca, canchis cutin urmachijpipish, cutin jataringallami. Ashtahuanpish Diosta mana manchajcuna jatun llaquipi huashicushpaca, ña mana jataringachu” ninmi. Imapi pandarishpaca mana millai cashcatachu ricuchingui. Ashtahuanpish imamanta chai tentacionpi urmashcata, ama cutin urmangapaj imata rurana cashcapi yuyai.
Dios mashnata cꞌuyashcata, mashnata llaquishcata yuyai. Davidca ima juchapi urmashpa llaquilla sintiri tucushcatami yacharca. Chaimantami paica: “Yaya paipaj huahuacunata ima shina llaquij shinallatajmi, Mandaj Diospish paita manchajcunataca llaquin. Paica ñucanchij imamanta rurashca cashcataca yachanmi. Ñutu allpamanta ñucanchij cashcatapish yuyaipimi” charin nishpa quillcarca (Salmo 103:13, 14). Diosca ñucanchijcuna juchayuj cashcatami yachan. Chaimantami paica ‘perdonangapaj listo can’ (Salmo 86:5). Shinapish cambiangapaj esforzarishpa catichunmi munan. Cunanca cai mapa ruraipi ama urmangapaj imata rurana cashcata ricushun.
Imapi tiempota pasacushcata alli ricui. ¿Huainayana munaicunata rijchachij peliculacunata, televisionpi programacunata, internetpi huaquin paginacunatapishchu ricungui? Salmos librota quillcaj shuj runaca: “Yangacunallapi ñuca ñahuita churanamanta anchuchihuayari” nishpami Diostaca mañarca (Salmo 119:37).b
Allicunapi yuyai. Huauqui William nishcata rurai. Paica: “Manaraj dorminaman rishpaca Bibliamanta huaquin yuyaicunata liyi. Chashnami cambaj yuyaipica Diosmanta, Bibliamanta alaja yuyaicunata charingui” nircami (Filipenses 4:8).
Cambaj problemamanta parlai. Chai mapa ruraita parlanata pinganayachishpapish canta ayudachunca parlanami cangui. Chashnami chai mapa ruraitaca saqui tucungui. Jovencito Davidca chaitami rurarca. Paica: “Ñuca papitoman parlanatami decidircani. Pai imata nishcataca mana nunca cungarishachu. Chai mapa ruraimanta huillana mana jahualla cajpipish huillajpimi paica ‘canmantaca orgullosomi cani’ nirca. Chashna nijpimi ñucaca achcata animarircani. Shinallataj cambiangapajmi ñuca shungupi decidircani.
Ama mana alli sintirichunca callaripica ñuca papitoca huaquin versocunatami liyirca. Shinallataj cai mapa rurai mana alli cashcata intindicujta ricungapajpishmi shujtaj versocunata liyirca. Chashna liyishca huashami paihuan cutin parlangacama chai mapa ruraipi ama urmangapaj shuj fechata churachun animarca. Shinallataj chai mapa ruraipi cutinllataj urmashpaca ama yalli sustaringuichu. Ashtahuanpish chai mapa ruraimanta jarcaringapajca ashtahuan tiempota churangui” nircami. ¿Chashna nijpica Davidca imatataj yuyarca? “Ñucata chashna ayudashcamantami cai mapa ruraitaca saquishcani” nircami.c
CATIJ YACHAIPICA CAITAMI YACHANGUI:
¿Gentecuna yuyashca shina pugllaimanta aichapi chayarinaca allichu can?
[Notacuna]
a Maijan jovencunaca huaquinpica manapish munashpami aichapi chayarina munaita sintincuna. Tutapipish yuraj yacu shinatami shitancuna. Cutin huarmicunaca quilla ungüi manaraj shamujpi o chai ungüi ña pasashca qꞌuipami aichapi chayarina munaita sintincuna. Mana paicuna munashcamantachu chashna sintincuna. Pero maijancunaca paicunapaj quiquin munaimantami, paicunapaj charishcacunata japirishpa paicunallataj mapata rurancuna.
b Caimanta ashtahuan yachangapajca los jóvenes preguntan volumen 2 libropi capítulo 33-ta ricui.
c Caimanta ashtahuan yachangapajca los jóvenes preguntan volumen 2 libropi páginas 239 al 241-ta ricui.
TEXTO BÍBLICO CLAVE
“Qꞌuipa huiñaicunapaj millai munaita ruranamanta anchuri. Mandaj Jesusta chuya shunguhuan mañajcunahuan tandanacushpa, cashcata ruranata, alli crinata, cꞌuyaj canata, sumajta causanata catirai” (2 Timoteo 2:22).
CAITA RURAI
“Tucuita rurai tucunaca” Diosmantami shamun (2 Corintios 4:7). Chaimanta mana alli munaicuna manaraj canta mishajpi fuerzata cuchun Diosta mañai.
¿CAITA YACHARCANGUICHU?
Aichapi chayarina munaicunata ruranaca facilmi can. Pero, espiritualmente sinchi cajca pi mana ricucujpipish chai mana alli munaicunamantami jarcarin.
IMATA RURAGRISHCATA ANOTAI
¿Ñuca yuyaicuna chuya, limpio cachunca imatataj rurana cani?
¿Cai mapa ruraita rurana munaita charishpaca chaipi ama urmangapajca imatataj rurana cani?
¿Cai temamantaca ñuca papitota o ñuca mamitataca imatataj tapusha nini?
¿CANCA IMATATAJ YUYANGUI?
● ¿Jehová Dios perdonangapaj listo cashcataca imamantataj yuyarina cangui? (Salmo 86:5).
● Diosllatajmi aichapi chayarina munaita charichun gentecunataca rurarca. Chai munaita can yallitaj charijpipish jarcarichunmi Diosca mañan. Chai munaita mishai tucushcata yachashcamantami chaita rurachun mañan.
[Comentario]
Saraca: “Mapa ruraita mishashpaca ñuca concienciapica tranquilami sintirini. Caitaca imahuan mana cambiashachu” ninmi.
[Ilustración]
Shuj carrerapi callpacushpa ñitcarishpa urmashpaca, jatarishpami callpashpa catingui. Chashnallatajmi mapa ruraipi cutinllataj urmashpaca mana desanimarishpa ñaupajman catina cangui