LECCIÓN 5
Diosca ¿imatataj cai Allpahuanca ruranga?
1. Allpataca ¿imapajtaj Diosca rurarca?
Jehová Diosca Allpataca gentecuna causachunmi rurarca. Adanta Evata rurashpaca mana jahua pachapi causachunchu rurarca. Jahua pachapi causachunca Diosca angelcunatami rurarca (Job 38:4, 7). Punta cꞌaritaca Edén sumaj huertapimi Jehová Diosca churarca (Génesis 2:15-17). Chashnami Diosca punta cꞌarimanpish paipaj huahua huahuacunamanpish cai Allpapi huiñaita causana bendicionta curca. Salmo 115:16; Proverbios 2:21-ta rezapai.
Edén huertaca cai Allpapi shuj uchilla ladopimi carca. Adán Evahuan huahuacunata charishpami chai huertata mirachina carca (Génesis 1:28). Allpaca gentecunapaj huasimi can, manataj tucuchishcachu canga. Salmo 104:5-ta rezapai.
Cai videota ricui: ¿Diosca imapajtaj cai Allpata rurarca?
2. Allpaca ¿imamantataj mana shuj paraíso can?
Diosta mana cazushcamantami Adanpish Evapish Edén huertamanta o paraisomanta llujshichishca carca. Chaimantami Edén huertaca chingarirca. Chai punllamantami Allpapica achca millai gentecuna tiyan (Job 9:24). Cutin paraíso tiyachunca ni pi mana imata rurai tucushcachu. Génesis 3:23, 24-ta rezapai.
Shinaca ¿Jehová Diosca manachu paipaj munaita pajtachi tucushca? Paica achca podertami charin. Paipaj munaitaca pajtachingatajmi (Isaías 45:18). Shamuj punllacunapica, callaripi Dios munashca shinami gentecunaca causanga. Isaías 65:21, 22-ta rezapai.
3. ¿Ima shinataj cai Allpaca shuj paraíso tucunga?
Diospaj Mandanapi Jesús mandacushpami Allpataca shuj paraisota ruranga. Jesusca angelcunahuanmi Diosta mana cazujcunataca Armagedón macanacuipi tucuchinga. Chai qꞌuipaca Adanta Evata pandachij millai ángel Satanastami, huaranga huatata huichcanga. Shinapish Diosta servijcunaca Jesús cuidajpi, ayudajpimi paraíso Allpapi huiñai huiñaita causangacuna. Apocalipsis 20:1-3; 21:3, 4-ta rezapai.
4. ¿Llaquicunaca ima horashi tucuringa?
Diosca ¿ima horashi llaquicunata tucuchinga? Chai punlla chayamucushcata yachangapaj imalla tucunatami Jesusca huillarca. Cunan punllacunapi ricurij llaquicunaca, Jehová Dios ñalla tucui llaquicunata tucuchina cashcatami ricuchin. Mateo 24:7-14, 21, 22-ta rezapai.
Jahua pachamanta Jesús huaranga huatata Allpata mandacushpaca, tucui llaquicunatami tucuchinga (Isaías 9:6, 7; 11:9). Qꞌuipaca Diosta cꞌuyaj gentecunapaj juchacunatami anchuchinga. Jesús mandacujpimi Diosca ungüicunata, yuyajyanata, huañuitapish tucuchinga. Isaías 25:8; 33:24-ta rezapai.
5. ¿Picunataj paraíso Allpapica causanga?
Tandanacuna Huasicunapica Diosta cꞌuyaj, Diospaj munaita rurasha nij gentecunatami rijsingui.
Paraíso Allpapica Diosta cazujcunami causanga (1 Juan 2:17). Jesusca paita catijcunataca alli shungu gentecunata ayudachun, Diospaj amigo tucunata yachachichunmi mandarca. Cunan punllacunapica Jehová Diosca, achca huaranga huaranga gentecunatami paraíso Allpapi causachun ayudacun (Sofonías 2:3). Testigo de Jehovacunapaj Tandanacuna Huasicunapica achca gentecunami shuj shinalla Diosta servishpa, alli cusacuna, alli huarmicuna, alli huahuacuna canata yachacun. Chashnami Bibliapaj alli huillaicunata tucuicuna yachacun. Miqueas 4:1-4-ta rezapai.