LECCIÓN 10
Alli religiontaca ¿ima shinataj rijsi tucunchij?
1. ¿Shujlla alli religionchu tiyan?
Panda yachachijcunata ama uyaichij (MATEO 7:15)
Jesuspish paipaj yachacujcunapish shujlla alli religiontami catircacuna. Chai religiontaca huiñai causaiman apaj ñanhuanmi chꞌimbapurarca. Chai religiontaca ashalla gentecunami tarishca (Mateo 7:14). Biblia yachachishca shina adorajcunallatami Diosca chasquin. Paicunaca shujlla shina tucushpami Diosta adoran. Juan 4:23, 24; 14:6; Efesios 4:4, 5-ta rezapai.
Cai videota ricui: Diosca ¿tucui religioncunatachu chasquin?
2. ¿Imatataj Jesusca panda yachachijcunamanta nirca?
‘Diosta yuyarinchij nincunami. Chashna nijpipish paicuna rurashcata ricujpica, manapish Diosta yuyarijcuna cashcatami ricuchin.’ (TITO 1:16)
Panda yachachijcuna ricurishpa llullashpa yachachinatami Jesusca huillarca. Panda yachachijcunapish paicunata catijcunapish Jesustami catinchij nincunami. Alli yachachinchij nishpapish gentecunata pandachinmi. Cutin alli religionta catijcunaca, alli ruraicunahuanmi Jesusta alli catijcuna cashcata ricuchin. Mateo 7:13-23-ta rezapai.
3. ¿Picunataj alli religionta catincuna?
Pichca yuyaicunata ricushun:
Biblia Diospaj Shimi cashcatami crincuna. Gentecuna yachachishcata catinapaj randica, Bibliapi yachachishcata pajtachishpami causan (Mateo 15:7-9). Paicuna yachachishcataca paicunapaj causaipimi pajtachin. Juan 17:17; 2 Timoteo 3:16, 17-ta rezapai.
Diospaj shuti Jehovatami jatunyachincuna. Jesusca Diospaj shutita rijsichishpami chai shutita jatunyachirca. Jehová ima shina cashcata, mañacushpa Diospaj shutita jatunyachina cashcatami Jesusca yachachirca (Mateo 6:9, QCH 2010). Cambaj llajtapica ¿picunataj Diospaj shutita rijsichicun? Salmo 105:1; 1 Crónicas 16:8-ta rezapai.
Diospaj Mandanamantami huillancuna. Diospaj Mandanamanta alli huillaicunata huillangapajmi Jesusca cai Allpaman shamurca. Chai Mandanallami gentecunaman alli causaita cunga. Jesusca huañungacamami Diospaj Mandanamanta huillarca (Lucas 4:43; 8:1; 23:42, 43). Jesusca nircami, ñucata catijcunaca Diospaj Mandanamantami huillanga nishpa. Maijanpish cambaj huasiman chayashpa Diospaj Mandanamanta parlajpica ¿maijan religionmanta cashcatataj yuyanguiman? Mateo 24:14-ta rezapai.
Cai pachapi ruraicunahuan mana chagrurinchu. Jesusta catijcunaca politicapi, parocunapi mana chagrurinchu. Juan 17:16-ta rezapai (Juan 18:36). Cai pachapaj shujtaj mana alli ruraicunatapish mana catinchu (Santiago 4:4).
Paicunapura cꞌuyanacushcata rijsinallami. Tucui gentecunata cꞌuyachunmi Diospaj Shimica yachachin. Mana alli religioncunaca jatun macanacuicunapimi chagrurishca. Jesusta alli catijcunaca mana chashna rurashcacunachu (Miqueas 4:1-3). Chaipaj randica, paicunapaj tiempohuan, imalla charishcacunahuanmi shujtajcunata ayudashpa, cushichishpa causan. Juan 13:34, 35; 1 Juan 4:20-ta rezapai.
4. ¿Maijan religión alli cashcata ñachu yachangui?
¿Maijan religiontaj Bibliamanta yachachin, Diospaj shutita jatunyachin, Diospaj Mandanallami tucui llaquicunata tucuchinga nishpa yachachin? ¿Maijan religionpitaj gentecunaca paicunapura cꞌuyanacun, jatun macanacuicunapipish mana chagrurin? 1 Juan 3:10-12-ta rezapai.