Lección 10
Jesusca tucuipimi cazurca
¿Yaya mamata cazunaca jahuallachu can?... Huaquinpica sinchimi can. ¿Yaya mamata cazungapajca imataj ayudai tucun? Jesusmanta yachanami ayudai tucun. ¿Jehovatapish paipaj yaya mamatapish Jesusca cazurcachu?... Jesusmanta yachashun.
Allpaman manaraj shamushpaca, Jesusca jahua pachapimi yaya Dioshuan causarca. Shinapish cai Allpapi causashpaca yaya mamata charircami. Paicunapaj shutica José, Mariami carca. ¿Josepish Mariapish ima shinataj Jesuspaj yaya mama tucurca?...
Jesús cai Allpapi huacharichunca Jehová Diosca shuj milagrotami rurarca. Chaimantami Jesusca 9 quillacunata paipaj mamapaj huijsapi huiñashpa shujtaj huahuacuna shina huacharirca. Qꞌuipaca Mariami paipaj cusa Josehuan Jesusta huiñachirca.
Ña 12 huatacunata charishpaca, Jehová Diosta cꞌuyashcatami Jesusca ricuchirca. Paica paipaj yaya mamandijmi Jerusalenpi Diosta adoranaman rirca. Ña huasiman tigracushpaca, paipaj yaya mamaca Jesús mana paicunahuan cashcatami ricurcacuna. ¡Maipipish mana ricurircachu! ¿Josepish Mariapish imatashi rurarcacuna?...
¿Jesusca imamantataj Diospaj huasipi carca?
Paicunaca utcami Jerusalenman tigrashpa Jesusta mashcai callarircacuna. ¡Tucui ladocunapimi mancharishca mashcarcacuna! Quimsa punlla qꞌuipami Jesusta tarircacuna. ¿Jesusca maipitaj carca?... Diospaj huasipimi carca. ¿Imatataj chaipica ruracurca? Chaipica Diosmantami ashtahuan yachacurca. Jesusca achcatami Diosta cꞌuyaj carca. Chaimantami paipaj tucui ruraicunahuan Diosta cushichisha nirca. Jesús huiñashpaca Jehová Diosta cazushpami catirca. Gentecuna llaquichishcamanta Diosta cazuna sinchi ricurijpipish cazushpami catirca. ¿Jesusca Josetapish Mariatapish cazurcachu?... Ari, chaitami Bibliaca yachachin.
¿Jesusca tucuipimi cazuj cashca nachu?... Jesús tucuipi cazuj cashcata yachashpaca, yaya mamata cazuna sinchi ricurijpipish paicunata cazuna cashcatami ricushcanchij. ¿Canca yaya mamata cazusha ninguichu?...