Cusa huarmicuna cullquita alli cuidaichij

Familiacuna minishtishcata randishpa cungapajca cullquimi minishtirin (Proverbios 30:​8). Cullquica ‘escudo shinami huaquichin’ (Eclesiastés 7:12). Shinapish cusandij huarmindij cullquimanta parlanacuna sinchi ricurijpipish, parlanacunataca mana saquinachu canguichij (Efesios 4:​32). Ishquindijpura alli parlanacushpami, cullquita imapi gastanata alli yuyana canguichij.

1 ALLI YUYAICHIJ

BIBLIACA CAITAMI YACHACHIN: “Cancunamanta maijanpish shuj torreta shayachisha nishpaca, tucuringacama rurangapajca mashna pajtana cashcata ricungapaj ¿manachu tiyarishpa ricunguichijraj?” (Lucas 14:28). Ishquindijpura imapi cullquita gastanatami alli parlanacuna canguichij (Amós 3:​3). Imata minishtishcata, mashnata gastanatami alli parlanacuna canguichij (Proverbios 31:16). Cullquita charishpapish mana maipishcachun gastanachu canguichij. Charishcallata gastashpami mana debi tucuna canguichij (Proverbios 21:5; 22:​7).

CAITA RURAI:

• Quilla tucurishca qꞌuipa cullqui sobrajpica, ishquindijpurami chai cullquihuan imata ruranata parlanacuna canguichij

• Cullqui mana pajtajpica, ashallata gastangapaj parlanacuichij. Canllapi randishpa micunapaj randica, huasipi yanushpa micuichij

2 AMA PACASHPA, AMA LLULLASHPA PARLANACUICHIJ

BIBLIACA CAITAMI YACHACHIN: ‘Tucuicuna ama llullanacushpa parlanacuichij’ (Efesios 4:25). Cambaj huarmiman o cusamanca mashna ganashcata, mashna gastashcatami tucuita huillana cangui.

Imata randina cashpaca cambaj cusahuan o cambaj huarmihuanmi puntapica alli parlanacuna cangui (Proverbios 13:10). Cusandij huarmindij cullquita imapi, ima shina gastanata parlanacunaca cushilla causachunmi ayudan. Can ganashca cullquica mana cambajllachu tucui familiapajmi can (1 Timoteo 5:​8).

CAITA RURAI:

• Mana tapushpa cada uno mashna cullquita gastanata cambaj cusahuan o cambaj huarmihuan parlanacuichij

• Cullqui illashcamanta pꞌiñanacuicuna manaraj tiyajpimi parlanacuna canguichij