Lección 5
Cusapaj o huarmipaj familiacunahuan alli apanacuichij
“Cuj canata, mana jatun tucushca canata, manso shungu canata, mana pꞌiñarij canata churarichij.” (Colosenses 3:12)
Shuj cꞌari shuj huarmi cazarajpica shuj mushuj familiami callarin. Yaya mamata cꞌuyanata, respetanata mana saquishpami, cunanca cusapi o huarmipi ashtahuan yuyana can. Shinapish huaquinpica familiacunaca cai mushuj causaitaca mana chasquisha nincunachu. Bibliapi tiyashca consejocunaca familiacunahuan alli apanacuchun, cusandij huarmindij ashtahuan cꞌuyanacuchunmi ayudan.
1 FAMILIACUNAHUAN ALLI APANACUI
BIBLIACA CAITAMI YACHACHIN: “Cambaj yaya mamata alli ningui” (Efesios 6:2). Mashna huatata charishpapish, cambaj yaya mamata alli ninata, respetanataca mana saquinachu cangui. Shinapish ama cungaringui, cambaj cusapish o huarmipish paipaj yaya mamahuan cangapajmi tiempota charina can. Shinaca cambaj cusa o huarmi yaya mamahuan cangapaj tiempota charijpica mana jarcanachu cangui. Bibliaca: “Cꞌuyaita charijca mana shujtajpajta munanchu” ninmi (1 Corintios 13:4; Gálatas 5:26).
CAITA RURAI:
“Cambaj familiaca ñucata rimacunllami” o “cambaj mamata ayudajpica manataj cushicunchu” nishpa mana rimanachu cangui
Cambaj cusa o huarmi imata yuyashcata entendi
2 MINISHTIRIJPICA ALLI ENTENDICHISHPA PARLAI
BIBLIACA CAITAMI YACHACHIN: “Cꞌarica, paipaj yayata mamata saquishpa paipaj huarmihuan tandanacushpa ishquindijmanta shuj aichallami tucunga” (Génesis 2:24). Cazarashca qꞌuipapish yaya mamacunaca ayudasha nishpami, cancuna ima shina causacushcata yachasha nin.
Cancunapura parlanacushpami yaya mamacuna imata cancunapaj causaipi ama rurachun munashcata cꞌuyaihuan parlana canguichij. Mana maipishcachun parlashpami alli entendichina canguichij (Proverbios 15:1). Mana jatun tucuna, mana pꞌiñarij, manso shungu canami familiacunahuan alli apanacuchun ayudanga. Bibliaca: “Cꞌuyaimantaca caishujmanta chaishujmanta ama pꞌiñarishpa llaquicunata apaichijlla” ninmi (Efesios 4:2).
CAITA RURAI:
Yaya mamacuna ima shina causacushcata tucuita yachasha nijpica, mana pꞌiñanacushpami cusandij huarmindij parlanacuna canguichij
Familia ucupi llaquicuna ricurijpica ima shina allichinata parlanacuichij