Diosmi cielotapish, allpatapish rurarca

Jehová Diosmi tucuita rurarca. Paimi ñahuihuan ricui tucushcacunatapish, mana ricui tucushcacunatapish rurarca. Imata manaraj rurashpami achca angelcunata rurarca. ¿Angelcunaca picunataj can? Diosta sirvijcunami can. Ima shinami Diosta mana ricui tucunchij. Chashnallatajmi angelcunatapish mana ricui tucunchij. Dios rurashca punta angelca estrellacunata, planetacunata, imalla tiyashcacunatapish rurashpami Diosta ayudarca. Planetacunamanta shujca cai Allpami, ñucanchijca caipimi causanchij.

Chai qꞌuipaca animalcunapish, gentecunapish cai allpapi causachunmi Diosca allichirca. Cai allpata achijyachichunca intitami rurarca. Shinallataj urcucunata, mama cuchata, riocunatapishmi rurarca.

¿Diosca imacunallatataj ashtahuan rurarca? Paica: ‘Qꞌuihuapish, yuracunapish huiñachun’ nircami. Chaimantami allpapica tucui laya frutacuna, verdijlla qꞌuihuacuna, sisacuna tiyai callarirca. Shinallataj volashpa purijcunata, llucashpa purijcunata, yacupi causaj animalcunatami rurarca. Conejo laya uchilla animalcunata, elefante laya jatun animalcunatapishmi rurarca. ¿Maijan animalitotataj ashtahuan munangui?

Diosca punta angeltaca: “Ñucanchijman rijchaj runata rurashun” nircami. Ñucanchijca mana animalcuna shinachu canchij. Ashtahuanpish yuyanata, rimanata, asinata, Diosta mañanatapishmi pudinchij. Chaimantami cai allpatapish, animalcunatapish cuidai tucunchij. ¿Punta runaca pitaj carca? Ricushun.