Diosmi punta cꞌarita, punta huarmitaca rurarca

Jehová Diosca Edenpimi sumaj huertata rurarca. Chai huertapica sisacuna, yuracuna, animalitocunami tiyarca. ‘Qꞌuipaca punta cꞌaritaca allpamanta rurashpami singapi samaita pꞌucurca’. ¿Chaipica imashi tucurca? Paica causai callarircami. Chai runaca Adán shutimi carca. Paitaca Edén huertata cuidachun, tucui animalcunata shutichichunmi Diosca mandarca.

Diosca: “Huertapi tiyaj tucui yuracunamantaca huijsa pajtatami micui tucungui. Shinapish ima alli cashcata, ima mana alli cashcata ricuchij yuramantaca mana micunachu cangui. Ima punlla chai yuramanta micushpaca huañunguitajmi” nishpami Adantaca mandarca.

Qꞌuipaca Jehová Diosca: “Cꞌaripajca sololla canaca mana allichu. Paita compañachunca shuj ayudajtami ruragrini” nircami. Chaimantami Adanta dormichishpa paipaj costillamanta shuj huarmita rurarca. Paipaj shutica Evami carca. Adán, Evami punta familia carca. ¿Paipaj huarmita ricushpaca Adanca ima shinashi sintirirca? Achcata cushicushpami: ‘Diosca ñuca costillamantami paita rurashca, ñuca layami can’ nirca.

Diosca Adanta, Evataca: “Achca huahuacunata charishpa, mirarishpa allpapi jundarichij” nircami. Tandalla trabajashpa cai allpata shuj paraisota rurashpa cushilla causachunmi Diosca munarca. Cai allpaca Edén huerta shinami tucuna carca. Pero mana chashna tucurcachu. ¿Imamanta? Catij yachaipimi caimanta yachashun.