Adán, Evaca Diosta mana cazurcacunachu

Shuj punlla Eva pailla cajpimi shuj culebraca paihuan parlarca. Culebraca: “¿Ciertotajchu Diosca huertapi tiyaj tucui yuracunamantaca ama micunguichij nirca?” nishpami tapurca. Chashna nijpimi Evaca: ‘Maijan yuramantapish micui tucunchijmi. Pero shuj yuramantaca mana micui tucunchijchu. Micushpaca huañushunmi’ nirca. Chaimi culebraca: ‘Cancunaca mana huañunguichijchu. Ashtahuanpish chai yuramanta micushpaca Dios shinami tucunguichij’ nirca. Chashna nishpaca llullacurcami. Shinapish Evaca culebratami crirca. Chai yurapi pꞌucushca frutata ricurashpa saquirishcamantami micurca. Qꞌuipaca Adanmanpishmi cararca. Paica huañunata yachashpapish Diosta mana cazushpami micurca.

Chai punllallatajmi Diosca paicunahuan parlarca. ¿Imamantataj ñucata mana cazurcanguichij? nircami. Chaimi Evaca culebrata culparca. Cutin Adanca Evatami culparca. Mana cazushcamantami Diosca paicunata huertamanta llujshichishpa cacharca. Chaiman ama tigrachunca angelcunata, muyucuj ninahuan lunyacuj espadatapishmi huerta yaicunapi churarca.

Diosca Evaman llullacunata nijtapishmi castigasha nirca. Pero mana culebrachu Evahuanca parlarca. Diosca culebracuna rimachunca mana rurarcachu. Shuj millai angelmi culebrata rimachishpa Evata pandachirca. Chai angelca Satanás, Diablo shutimi can. Shamuj punllacunapica Diosca Diablotaca tucuchingami. Shinami paica ña mana pandachishpa catinga.