Ocho gentecunallami salvarircacuna

Noeca paipaj familiandij, animalcunahuanpishmi arcaman yaicurcacuna. Qꞌuipaca Jehová Dios punguta huichcajpimi yallitaj tamyai callarirca. Chaimi arcaca huambui callarirca. Asha ashami yacucunaca tucui allpata taparca. Millai gentecuna canllapi saquirishcamantami huañurcacuna. Pero Noepish, paipaj familiapish arca ucupi cashcamantami mana ima tucurcacuna. Paicunaca Diosta cazushcamantami cushilla sintirishcangacuna.

40 punllacunata, 40 tutacunata sinchita tamyashpami usyarirca. Tiempohuanca yacucunaca asha ashami chaquiri callarirca. Chaimi arcaca shuj urcu jahuapi shayarirca. Yacucunaca manaraj tucui chaquirishcachu carca. Chaimantami Noepish, paipaj familiapish chai arcamanta mana llujshi tucurcacuna.

Punllacuna pasajpica yacucunaca tucuimi chaquirirca. Noepish, paipaj familiapish arca ucupica huata yallitami causarcacuna. Chai qꞌuipaca Diosca, ‘arcamanta llujshichijlla’ nircami. Noeca paicunata quishpichishcamantami Diosta achcata agradicirca. Chaimantami paiman shuj ofrendata curca.

Diosca cushicushpami chai ofrendata chasquirca. Chaimantami millai gentecunata tucuchingapajca cunan tamyachishca shinaca cutin mana tamyachishachu nirca. Pai nishcata yuyarichunmi cielopi punta cutin shuj cuichita ricuchirca. ¿Cuichita ricushcanguichu?

Diosca Noetapish, paipaj churicunatapish huahuacunata charishpa cai allpapi jundarichij nishpami mandarca.